အခန်း (၂၆) ရဲ့ချန်းလျန်၏ ဖြေရှင်းနည်း

"ဒါပေါ့"

"ချန်းရှင်းနန်းဆောင်မှာ အတူတူအိပ်ဖို့ကတော့ အခုထိ မဖြစ်နိုင်သေးဘူး"

"ငါတို့ လက်ထပ်ပြီးတဲ့အထိ စောင့်ရဦးမယ် ထင်တယ် ဟုတ်တယ်မလား"

"ဒါပေမဲ့ အခြေအနေကို ကြည့်ရတာ လက်ထပ်ပြီးရင်တောင် ဖြစ်ပါ့မလားမသိဘူး"

"ငါတို့ရဲ့ သံယောဇဉ်ကို ဖြည်းဖြည်းချင်းပဲ တည်ဆောက်ကြတာပေါ့"

"အနည်းဆုံးတော့ အခု အရင်လို အနေမခက်တော့ဘူးလေ လက်ကိုင်တာကိုလည်း မင်းက တိတ်တဆိတ် ခွင့်ပြုထားတာပဲ မဟုတ်လား"

နန်းဆောင်သို့ ပြန်ရောက်ပြီးနောက် ချူနင် တစ်ယောက် စိတ်အခြေအနေ ကောင်းနေသည်။

အမှန်တကယ်တော့ သူသည် တန်ပြန်ဖြေရှင်းနည်းများကို စဉ်းစားနေခဲ့ခြင်းဖြစ်သော်လည်း ယောကျ်ားနှင့် မိန်းမကြားက ကိစ္စများတွင် တစ်ဖက်လူက စိတ်မပါလျှင် ဘာမှလုပ်၍မရနိုင်ပေ။ ယခုကြည့်ရသည်မှာ သူ့ဇနီးလောင်းက သူ့ကို ချစ်နေဆဲပင်။

ပြန်ပြီး အိပ်ရုံပဲပေါ့။

လွန်ခဲ့သည့်ရက်များက သူ နန်းတော်ထဲတွင် အိပ်နေခဲ့သည်မှာ အိပ်ရုံသက်သက် မဟုတ်ပါ။ သူ၏ ဝိညာဉ်ကို ကိုယ်ပြင်ပသို့ ထွက်ခွာစေပြီး လောကကြီး၏စည်ကားမှုကို လေ့လာနေခြင်း ဖြစ်သလို နန်းတော်အတွင်းကိုလည်း လှည့်လည်ကြည့်ရှုနေခဲ့ခြင်း ဖြစ်သည်။ ယခုတော့ သူ တကယ်ပင် ပင်ပန်းနေပြီ သိပ်ပျော်ဖို့ကောင်းတာပဲ။

နောက်တစ်နေ့ မနက်စောစော ချူနင် ထမင်းချက်ရန် အချိန်ပင် မရောက်သေးမီ ရှောင်ပင်း ရောက်ရှိလာသည်။

"ချူနင် အရှင်မက ဒီနေ့ နန်းတွင်းညီလာခံ တက်စေချင်ပါတယ် ဒါက အရင်ကတည်းက ကြိုတင်ချုပ်လုပ်ထားတဲ့ အဝတ်အစားတွေပါ။ အရှင်မက ဒါကို လဲဝတ်ခဲ့ဖို့ ပြောလိုက်ပါတယ်"

အိပ်ရာနိုးကာစ ချူနင် တစ်ယောက် ကြောင်အမ်းအမ်း ဖြစ်သွားသည်။

"နင် နောက်နေတာ မဟုတ်ဘူးမလား ညီလာခံ တက်ရမယ် ဟုတ်လား"

ရှောင်ပင်းက ပြုံး၍ ပြောသည် ဒါပေါ့ အခု ညီလာခံမှာ အရာရှိတွေ အကုန်လုံး ဒါကိုပဲ ဆွေးနွေးနေကြတာ။

သူတို့က ဧကရာဇ်အတွက် တခြားသူတွေကို အကြံပြုမလို့ လုပ်နေကြတာ ဒါပေမဲ့ အရှင်မက နင့်ကို တိုက်ရိုက် ခန့်အပ်လိုက်လိမ့်မယ်လို့ မထင်ထားကြဘူး။ နင့်ရဲ့ အဆင့်အတန်းက ဒုတိယ ဧကရာဇ် တစ်ပါးနဲ့ အတူတူပဲ"

ရှောင်ပင်းသည် ချူနင့်တွင် အင်ပါယာကို သိမ်းပိုက်လိုသော ရည်ရွယ်ချက်ရှိသည်ဟု မယုံကြည်ပါ။

အဘယ်ကြောင့်ဆိုသော် လွန်ခဲ့သည့်ရက်များက သူမ အကဲခတ်ကြည့်ရာတွင် ချူနင်သည် တကယ်ကို အပျင်းထူနေသောကြောင့်ပင် အရင်က အရှင်မဆီကို မျက်နှာချိုသွေးဖို့ သွားတာကလွဲရင် ကျန်တဲ့အချိန်တွေမှာ အိပ်နေတာပဲ ရှိသည်။ နန်းဆောင်ထဲက ထွက်ဖို့တောင် ပျင်းနေသူ မဟုတ်ပါလား။

ထိုအချိန်တွင် မိန်းကလေးငယ်သည် ချူနင့်ကို စူးစမ်းလိုသော မျက်လုံးများဖြင့် ကြည့်လိုက်သည်။ "မနေ့က အရှင်မနဲ့ ဘာတွေ ပြောခဲ့ကြတာလဲ နင်တို့နှစ်ယောက်ရဲ့ ဆက်ဆံရေးက အများကြီး တိုးတက်လာသလိုပဲ"

ချူနင်က တည်ငြိမ်သော မျက်နှာထားဖြင့် မတ်တပ်ရပ်လိုက်သည်။ "ကလေးတွေ မမေးသင့်တာကို မမေးနဲ့"

"ရှောင်ပင်းက ကျင့်စဉ်ကျင့်လာတာ နှစ်ပေါင်း သုံးဆယ်ကျော်ပြီနော်။ ကျွန်မ အသက်က နင့်ထက် ပိုကြီးမှာပေါ့"

ချူနင် ခေတ္တမျှ ဆွံ့အသွားသည်။ ထို့နောက် နဂါးဝတ်ရုံတစ်ထည်ကို သူ့လက်ထဲ ထည့်ပေးလိုက်သည်။

"တာ့ကျိုးအင်ပါယာမှာလည်း အမျိုးသမီး ဧကရာဇ် ရှိခဲ့ဖူးတဲ့ သာဓက ရှိပါတယ်။ ဧကရာဇ်ရဲ့ အဆင့်အတန်းက ကောင်းကင်ဘုံသားေတာ်နဲ့ အတူတူပဲမို့ ဝတ်စုံကိုလည်း နဂါးဝတ်ရုံအတိုင်းပဲ သီးသန့် ချုပ်လုပ်ထားတာပါ"

ချူနင်သည် လက်ထဲက ဝတ်စုံကို ကြည့်ပြီး ပြန်ချထားလိုက်သည်။ "ငါ အရှင်မကို သွားပြောလိုက်မယ် ညီလာခံတက်ဖို့ ကိစ္စကို မေ့လိုက်စမ်းပါ။ ငါက စိတ်လည်းမပါသလို အရည်အချင်းလည်း မရှိဘူး"

မကြာမီ မနက်စာ အဆင်သင့် ဖြစ်သွားပြီး သူသည် ချန်းရှင်းနန်းဆောင်သို့ ရောက်ရှိသွားသည်။ ရဲ့ချန်းလျန်သည် ချူနင့်ကို မြင်သောအခါ မျက်မှောင်ကြုတ်လိုက်သည်။

"နဂါးဝတ်ရုံက ဘယ်မှာလဲ နင်က ဒီဝတ်စုံနဲ့ ညီလာခံ တက်မလို့လား"

ချူနင်က သက်ပြင်းချကာ "မင်း ပြောရုံပဲ ပြောမယ် ထင်နေတာ တကယ်ကြီး ညီလာခံ တက်ခိုင်းတာလား အင်ပါယာရဲ့ စည်းကမ်းတွေအရလည်း ဒါကမသင့်တော်ဘူးလေ။ အဓိကက ငါက ဒီလိုအရာတွေကို စိတ်မဝင်စားတာပဲ ဒါကြောင့် ငါ့ကို ထပ်ပြီး စမ်းသပ်မနေပါနဲ့တော့"

ရဲ့ချန်းလျန်၏ မျက်နှာမှာ မကျေမနပ် ဖြစ်သွားသည်။ "မနေ့က ငါပြောခဲ့တာတွေကို နင် နားမလည်တာလား တစ်ခုပဲရွေး ငါနဲ့အတူ ညီလာခံ လိုက်မလား ဒါမှမဟုတ် ဒီထမင်းတွေကို ပြန်ယူသွားပြီး မနက်ဖြန်ကစပြီး ဧကရာဇ်ဂူဗိမာန်ထဲမှာ တစ်သက်လုံး သွားအိပ်မလား"

ဘေးနားရှိ ရှောင်ပင်းမှာ သူတို့နှစ်ဦးကို စိတ်ဝင်တစား ကြည့်နေမိသည်။ သူတို့ကြားမှာ ဘာတွေ ဖြစ်ခဲ့တာလဲ အာဏာကို အလေးထားတဲ့ အရှင်မက ဘာလို့ ချူနင့်ကို ဒီလောက် မြင့်မားတဲ့ အဆင့်အတန်း ပေးပြီး ညီလာခံပါ တက်ခိုင်းနေရတာလဲ။

ဒါက အာဏာကို တိုက်ရိုက် မျှဝေလိုက်တာပဲ၊ အရှင်မ ဘာတွေ တွေးနေတာလဲ ဪ မှတ်မိပြီ။ အရင်က သူတို့ဆက်ဆံရေး အေးစက်သွားတာက ချူနင်ရဲ့နည်းလမ်းတွေကြောင့် အရှင်မက သံသယဝင်သွားလို့ မဟုတ်လား ဒါဆိုအရှင်မက သူတို့နှစ်ယောက်ကြား ဆက်ဆံရေးပြန်ကောင်းအောင် လုပ်နေတာပေါ့။

ရှောင်ပင်းသည် အလွန်ပင် ဉာဏ်ကောင်းလှသည်။ သူမသည် တစ်ချက်ကြည့်ရုံဖြင့် အခြေအနေကို နားလည်သွားသည်။ ချူနင်က ထပ်မံ ငြင်းဆိုရန် ကြိုးစားနေသည်ကို မြင်သောအခါ သူမက ချက်ချင်း ကြားဝင်ပြောလိုက်သည်။

"ချူနင်ကျွန်မ အထင်တော့ နင် အရှင်မနဲ့အတူညီလာခံ တက်တာ အကောင်းဆုံးပဲ။ အခု သတင်းတွေက ပြန့်နေပြီဆိုတော့ နင့်မှာ အဲဒီလိုရည်ရွယ်ချက် မရှိရင်တောင် အရှင်မရဲ့ စကားကို အရာမထင်အောင် မလုပ်သင့်ဘူး မဟုတ်ရင် ညီလာခံမှာ ကောလာဟလတွေ ထွက်လာလိမ့်မယ်"

"နင် ဘာမှမလုပ်ချင်ရင်တောင် လူမြင်ကွင်းမှာ တစ်ခါလောက်တော့ မျက်နှာပြသင့်တယ်။ ရုတ်တရက်ကြီး ဧကရာဇ် ခန့်အပ်လိုက်တာဖြစ်ပြီး ထုံးတမ်းစဉ်လာတွေကိုလည်း ချိုးဖောက်ထားတာဆိုတော့ ညီလာခံကတော့ လှုပ်လှုပ်ရှားရှား ဖြစ်နေမှာ သေချာတယ်"

ရဲ့ချန်းလျန်ကလည်း ချူနင့်ကို အေးစက်စွာ ကြည့်လိုက်သည်။ "ထမင်းစားပြီးရင် အဲဒီ နဂါးဝတ်ရုံကို သွားဝတ်လိုက် ငါ စောင့်နေမယ်။ ငါ့ကို စိတ်မပျက်စေနဲ့"

ချူနင်သည် စကားစအအဖြစ်ဖြင့် သက်ပြင်းသာ ချနိုင်တော့သည်။ "ဒါဆိုလည်း အရင် စားကြတာပေါ့"

သူ တကယ် မလုပ်ချင်သော်လည်း ရဲ့ချန်းလျန်က တကယ်ကြီး ခိုင်းလိမ့်မည်ဟု မထင်ထားခဲ့ပါ။ သူမက နည်းမျိုးစုံ သုံးနေတာပဲ မဟုတ်လား။ သူ့ကလေးရဲ့ အမေကတော့ တကယ်ကို ပြတ်သားပြီး အနှိုင်းမဲ့ပါပဲ။

"ဒါပေမဲ့ ဒါက မင်းအတွက် အခက်အခဲ မဖြစ်စေဘူးလား ဥပမာ - အရာရှိတွေက မင်းကို ထုံးတမ်းစဉ်လာ ကျော်လွန်တယ်လို့ ပြောကြမှာမျိုး"

ရဲ့ချန်းလျန်က အေးအေးဆေးဆေးပင် ပြောသည် "ဒါတွေကို နင်စိတ်ပူစရာ မလိုဘူး စားစမ်းပါ"

ယခုအခါ ချူနင်နှင့် ဆက်ဆံရေး ပြန်ကောင်းရန်အတွက် ရဲ့ချန်းလျန်သည် ဤမျှအထိ လုပ်ဆောင်ခဲ့ခြင်းဖြစ်သည်။ ဧကရာဇ်တစ်ပါးကို တိုက်ရိုက် ခန့်အပ်ပြီး အာဏာကို မျှဝေကာ အတူတူအုပ်ချုပ်မည် သူမသည် ချူနင်မှာ ထိုသို့သောလူစားမျိုး မဟုတ်ဟု ယုံကြည်လိုက်ပြီဖြစ်ရာ သူမ၏ယုံကြည်မှုကို ပြသရမည် ဖြစ်သည်။ ဤသည်မှာ ရဲ့ချန်းလျန် ပေးနိုင်သော အကြီးမားဆုံးသော စိတ်ရင်းမှန်ပင် ဖြစ်သည်။

အကယ်၍သာ ချူနင်က တကယ်ပဲ အာဏာကို မက်မောပြီး သူမကို စိတ်ပျက်အောင် လုပ်ခဲ့မည်ဆိုပါက ထိုနေ့သည် ရဲ့ချန်းလျန်နှင့် ချူနင်တို့ လမ်းခွဲမည့်နေ့ ဖြစ်ပေလိမည်။ 

သူမသည် တာ့ချန်းအင်ပါယာ၏ ဧကရာဇ်မင်း ဖြစ်ရုံသာမက နှစ်ပေါင်း တစ်ရာအတွင်း အဆင့် (၇) ကျင့်ကြံသူ ဖြစ်လာခဲ့သည့် ကျင့်ကြံသူတစ်ယောက်လည်း မဟုတ်လား။

ရဲ့ချန်းလျန် ရုတ်တရက် ကြောင်သွားသည်။ အဆင့် (၇) အလယ်အလတ်အဆင့်မဟုတ်သေးဘူး ဒီရက်ပိုင်း သူမ ကျင့်စဉ်မကျင့်ခဲ့ပါဘူး သူမရဲ့ ကျင့်စဉ်က ဒီလောက်တောင် မြန်နေတာလား။

"အိုး... အရှင်မ" ရှောင်ပင်းသည်လည်း သူတို့နှစ်ဦး ဆက်ဆံရေး ပြန်ကောင်းသွားသည်ကို မြင်ရသဖြင့် ဝမ်းသာနေသည်။

"ကျွန်မ ပြောစရာ ရှိလို့ပါ။ လတ်တလောမှာ ကျွန်မရဲ့ ကျင့်စဉ် တိုးတက်မှုက အရမ်း မြန်နေတယ် အခုဆို အဆင့် (၄) နောက်ဆုံးအဆင့်ကို ရောက်နေပြီ"

ရဲ့ချန်းလျန်၏ မျက်လုံးများ ပြူးကျယ်သွားသည်"အဆင့် (၄) နောက်ဆုံးအဆင့်လား ဒါဆိုရင် နင့်ရဲ့ လုံရှိုတာဝါက ပြီးသွားပြီပေါ့ ဒါက တစ်လတောင် မရှိသေးဘူးလေ"

အဆင့် (၃) ကနေ အခု အဆင့် (၄) နောက်ဆုံးအဆင့်အထိလား သန့်စင်မြေတွေမှာတောင် ဒီလောက် မြန်တဲ့ ကျင့်စဉ်မျိုး ရှိမှာမဟုတ်ဘူး။

ရဲ့ချန်းလျန် ချက်ချင်းပင် အကြောင်းရင်းကို စဉ်းစားမိသွားသည်။ ဒါက သေချာပေါက် ငါတို့ ဘိုးဘေးတွေရဲ့ ကောင်းချီးပေးမှုပဲဖြစ်ရမယ်။

ဒီနေ့ နင် အားရင် ရဲ့မိသားစုသန့်စင်မြေကို သွားကြည့်လိုက်ဦး နင်လိုမျိုး ကျင့်စဉ်မြန်မြန်တိုးတက်နေတဲ့သူတွေ ရှိလားဆိုတာ သွားစစ်ဆေးကြည့်။ ရှိရင် သူတို့ကို အစွမ်းကုန် မြေတောင်မြှောက်ပေးရမယ်။

"နားလည်ပါပြီ အရှင်မ"

ဘေးနားတွင် ရှိနေသော ချူနင်ကတော့ တိတ်တဆိတ် ထမင်းစားနေသည်။ ကြည့်ရသည်မှာ ဧကရာဇ်အဆင့် ဟင်းလျာများက ကျင့်စဉ် တိုးတက်မှုကို အမှန်တကယ် အထောက်အကူပြုပုံရသည်။

သူ့ဇနီးအတွက်လည်း ကောင်းသလို သူ့ကလေးအတွက်လည်း သေချာပေါက် ကောင်းမှာပါ။ နောင်ကျရင် ပိုကောင်းတဲ့ ပါဝင်ပစ္စည်းတွေကို သူ ရှာဖွေရဦးမည်။

ဒီနေ့ ညီလာခံမှာ ဘာတွေ ဖြစ်လာမလဲဆိုတာတော့ သူမသိသေးပါ။ အရာရှိတွေက သူ့ရဲ့ အဆင့်အတန်းကို အလွယ်တကူ လက်ခံကြမှာ မဟုတ်ဘူးလို့ သူ ခံစားနေရသည် နည်းနည်းတော့ ခက်ခဲဦးမှာပဲ။

နာရီဝက်ခန့် ကြာသောအခါ နန်းတွင်း ညီလာခံတွင် ဝန်ကြီးဌာန ခြောက်ခု၊ နန်းတွင်းအကြံပေးအဖွဲ့ နှင့် စစ်သူကြီးများ အပါအဝင် အရာရှိ ရာပေါင်းများစွာ တက်ရောက်နေကြသည်။ ရဲ့မိသားစုသန့်စင်မြေမှ လူများပင် ရောက်ရှိနေကြသည်။

ဧကရီရဲ့ချန်းလျန်၏ ဘေးတွင် နဂါးဝတ်ရုံ ဝတ်ဆင်ကာ ထိုင်နေသော အမျိုးသားကို မြင်သောအခါ လူပေါင်းများစွာမှာ ဆွံ့အသွားကြတော့သည် ရဲ့မိသားစု၏ လက်ရှိ အကြီးအကဲ ရဲ့ရွှမ်းပင်လျှင် အံ့အားသင့်သွားရသည် သူက ဂုဏ်သရေရှိ ဧည့်သည်တော် ဖြစ်ရုံတင်မကဘဲ ဧကရာဇ်တစ်ပါးပါလား။

သို့သော် သူသည် ဧကရာဇ် ဖြစ်နေလျှင်ပင် ထုံးတမ်းစဉ်လာနှင့် မညီသော လုပ်ရပ်ကို လက်ခံရန် ခက်ခဲလှသည်။

၎င်းအပြင် ဧကရာဇ်တစ်ပါးကို နန်းတွင်းအကြံပေးအဖွဲ့နှင့် ဝန်ကြီးဌာနများကို အုပ်ချုပ်ခွင့်ပေးပြီး စစ်အာဏာကိုပါ ပေးအပ်ခြင်းမှာ ယနေ့ ညီလာခံသည် ဤကိစ္စကို ဆွေးနွေးရန်ပင် ဖြစ်သည်။

အရာရှိတစ်ဦးက ချူနင့်ကို ကန့်ကွက်ရန် ပါးစပ်ဟလိုက်စဉ်မှာပင် ရဲ့ချန်းလျန်သည် ဖြည်းညှင်းစွာ ထရပ်လိုက်သည်။ သူမ၏ မျက်လုံးများမှာ အလွန်ပင် အေးစက်နေပြီး အဆင့် (၇) ကျင့်ကြံသူ၏ ဖိအားများက နန်းဆောင်တစ်ခုလုံးကို ချက်ချင်း ဖုံးလွှမ်းသွားသည်။

"ဧကရာဇ်ကို ငါကိုယ်တိုင် ခန့်အပ်ခဲ့တာဖြစ်ပြီး ဧကရာဇ်ကိုပေးထားတဲ့ အခွင့်အရေးတွေ အားလုံးက ငါ့ရဲ့ဆုံးဖြတ်ချက်တွေပဲ။

"ဘယ်သူမဆို ကန့်ကွက်ရဲရင် အဲဒါက ငါ့ကို ပုန်ကန်တာနဲ့ တိုင်းပြည်ကို သစ္စာဖောက်တာပဲ အဲဒီလူကို ဒီနေရာမှာတင် ကွပ်မျက်မယ်"

"အားလုံးပဲ အခု ဧကရာဇ်ကို အလေးပြုကြ"

ချူနင် ကြောင်သွားသည်။ မဟုတ်သေးဘူးလေ ဤသည်မှာ သူမ စဉ်းစားထားသော ဖြေရှင်းနည်းလား ဒါက အရမ်းကို ပြတ်သားလွန်းတယ်။

ကျင့်ကြံသူတစ်ယောက်ရဲ့ အဆင့်အတန်းက တကယ်ကို အသုံးဝင်တာပဲနော်

ညီလာခံအတွင်း အရာရှိပေါင်းများစွာမှာ တစ်ဦးကိုတစ်ဦး ကြည့်လိုက်ကြသည်။

ထုံးတမ်းစဉ်လာနှင့် မညီသော်လည်း အဆင့်အတန်းမှာ မြန်မြန်ဆန်ဆန် သတ်မှတ်ခံရသော်လည်း အာဏာများစွာ ပေးအပ်ခံရသော်လည်း အရှင်မ၏ ကျင့်စဉ်မှာ မြင့်မားလှသဖြင့် အရှင်မ၏ စကားသည် ကောင်းကင်ဘုံ၏ အလိုတော်ပင် ဖြစ်တော့သည်။

"ကျွန်တော်မျိုးတို့ ဧကရာဇ်မင်းကို ရိုသေစွာ နှုတ်ခွန်းဆက်သပါတယ်"

"ယဉ်ကျေးမှု ဝန်ကြီးဌာနကနေ ဧကရာဇ် ဘိသိက်ခံပွဲအတွက် အခမ်းအနားကို အမြန်ဆုံး ပြင်ဆင်ပါ့မယ်။ ဧကရာဇ်မင်းကို ရိုသေစွာ နှုတ်ခွန်းဆက်သပါတယ်"