အခန်း (၂၅) နန်းဆောင်အတွင်းမှ ညဉ့်ဦးယံစကားများ

ခဏအကြာတွင် သူတို့နှစ်ဦးသည် စားပွဲ၌ မျက်နှာချင်းဆိုင် ထိုင်နေကြသည်။ ရှေ့တွင် ခေါက်ဆွဲတစ်ပန်းကန် ရှိနေပြီး နှစ်ယောက်လုံး ခေါင်းငုံ့ထားကြသည်။

အမှန်အတိုင်းပြောရလျှင် ရှောင်ပင်းသည် ချူနင့်ကို စကားအများကြီး မပြောခဲ့ပါ။ လွန်ခဲ့သည့်ရက်များက သူတို့နှစ်ဦး၏ ဆက်ဆံရေး အေးစက်နေသည်ကို ရှောင်ပင်းရိပ်မိပြီး ကြားဝင်ဖျန်ဖြေပေးရန် ကြိုးစားခဲ့သော်လည်း ချူနင်ကတော့ ရှောင်ပင်း၏ နည်းလမ်းများသည် သိပ်ပြီး အလုပ်မဖြစ်နိုင်ဟု ခံစားခဲ့ရသည်။

ယခုအခါ ရဲ့ချန်းလျန်သည် ချူနင့်အပေါ် သံသယရှိနေပြီဖြစ်ရာ သူဘာမှထပ်မလုပ်တော့ရန် ဆုံးဖြတ်ထားခြင်းဖြစ်သည်။

မဟုတ်ပါက သူ ပိုလုပ်လေလေ အာဏာမက်မောသော လူယုတ်မာအဖြစ် ပိုပြီး အထင်ခံရလေလေ ဖြစ်ပေလိမည်။

ရဲ့ချန်းလျန်၏ သဘောထားမှာ ယခုအခါ အလွန်ပြတ်သားသွားပြီ ဖြစ်သည်။

နင်အုပ်ချုပ်ရေးမှာ ပါဝင်ချင်တယ်ဆိုရင် ငါက နင့်ကို အမြင့်ဆုံးဘွဲ့ထူးတွေပေးမယ် နန်းတွင်းအကြံပေးအဖွဲ့နဲ့ ဝန်ကြီးဌာနတွေကိုပါ ဧကရာဇ်တစ်ပါးအနေနဲ့ အုပ်ချုပ်ခွင့်ပေးမယ်။

တိန် ပိုင်ရှင်အနေဖြင့် အင်ပါယာကို အုပ်ချုပ်ရန် လိုအပ်နေကြောင်းစနစ်မှ သိရှိသွားပါပြီ။

 ပိုင်ရှင်အား ကမ္ဘာ့အဆင့်မီ အုပ်ချုပ်သူတစ်ဦး ဖြစ်လာစေရန် ရှေးခေတ်နှင့် ခေတ်သစ် ဧကရာဇ်များ၏ အုပ်ချုပ်ရေး လမ်းညွှန်ချက်များကို ပံ့ပိုးပေးလိုက်ပါပြီ။

''ဒုက္ခပါပဲ"

"ငါက တကယ်ပဲ အင်ပါယာကို အုပ်ချုပ်ချင်နေတယ်လို့ မင်းထင်နေတာလား"

စနစ်သည် ပိုင်ရှင်၏ လက်ရှိအခြေအနေပေါ် မူတည်၍သာ အကူအညီပေးခြင်း ဖြစ်ပါသည်။ ပိုင်ရှင်အနေဖြင့် မလိုလားပါက စနစ်မှ ချက်ချင်း ပြန်လည်ရုပ်သိမ်းနိုင်ပါသည်။

"ထားလိုက်တော့... ထားလိုက်တော့"

ချူနင်သည် စိတ်ပျက်လက်ပျက်ဖြင့် နဖူးကို ပွတ်လိုက်မိသည်။ အခုလိုအချိန်မှာ ဒါမျိုးတွေ ရလာတာက သူ့အတွက် ပြဿနာတစ်ခုပဲ သူက ဝင်ပါဖို့ လုံးဝစိတ်ကူးမရှိခဲ့တာလေ။

"အရှင်မ အဲဒီအမိန့်ကို ပြန်ရုပ်သိမ်းလိုက်ပါလား"

ရဲ့ချန်းလျန်က ရုတ်တရက် မော့ကြည့်လိုက်သည်။ သူမ၏ လေသံမှာ အေးစက်ပြီး အာဏာစက် ပါဝင်နေသည်။

"ဧကရာဇ်တစ်ပါးရဲ့ စကားဟာ အတည်ပဲ ငါလုပ်ခိုင်းရင် လုပ်ရမယ်"

အရင်က နင် အုပ်ချုပ်ရေးမှာ ဝင်မပါချင်ခဲ့ရင်တောင် အခု ဒီကိစ္စက ငါတို့ကြားက အတားအဆီးဖြစ်နေပြီဆိုရင်တော့ နည်းလမ်းက ရိုးရိုးလေးပဲ။

ငါက နင့်ကို အုပ်ချုပ်ခွင့်ပေးမယ် ဒီလောကကြီးကို နင်နဲ့အတူ မျှဝေခံစားမယ်။ အဲဒီလိုဆိုရင် နင့်ရဲ့အကြောင်းပြချက်တွေက ပျက်ပြယ်သွားပြီ။

အခု ငါက နင့်ကို အကြီးမားဆုံး အာဏာကို ပေးလိုက်ပြီ။ နင်မယူချင်ရင်တောင် ယူရမယ်။ ဒီကိစ္စကို နင် ထပ်ပြီး ငြင်းနေဦးမယ်ဆိုရင်တော့ နင် သေပြီသာမှတ်။

"နင် ထပ်ပြီးငြင်းဦးမလား နင်က အိပ်ရတာ ဝါသနာပါတာ မဟုတ်လား ဒါဆိုရင် ငါ့ရဲ့ ဂူဗိမာန်ထဲမှာပဲ တစ်သက်လုံး သွားအိပ်နေလိုက်တော့"

ချူနင်က ခါးသက်သက် ပြုံးလိုက်သည်။

 ဒါပေမဲ့ ဒါက ငါ တကယ်ဖြစ်ချင်တဲ့ အရာမဟုတ်ဘူးလေ ငါက မင်းအတွက် အလုပ်သက်သာအောင်ပဲ လုပ်ပေးချင်ခဲ့တာပါ။

ငါ ပြောပြခဲ့တာတွေကလည်း တခြားသူတွေဆီက ကော်ပီကူးလာတာတွေပဲ။ မင်း အရာရာတိုင်းကို ကိုယ်တိုင်လုပ်နေစရာ မလိုအောင်လို့ပါ။

ရဲ့ချန်းလျန်သည် သူမ၏ ဓားကို ဖြည်းညှင်းစွာ ဆွဲထုတ်လိုက်ပြီး စားပွဲပေါ်သို့ ဒုန်း ခနဲ ဆောင့်ချလိုက်သည်။

"ငါ သွားဆိုရင်သွားလိုက် ဘာတွေ အပိုပြောနေတာလဲ နင်က ယောက်ျားလား မဟုတ်ဘူးလား"

ရဲ့ချန်းလျန်၏ စိတ်ဓာတ်မှာ ပြတ်သားနေပြီဖြစ်ကြောင်း ချူနင် သိလိုက်ရသဖြင့် သက်ပြင်းချကာ ဘာမှ ထပ်မပြောတော့ပေ။ သူတို့နှစ်ဦးကြားတွင် ပြန်လည် တိတ်ဆိတ်သွားပြန်သည်။

ဤပြဿနာကို ရဲ့ချန်းလျန်က ပြတ်သားသော နည်းလမ်းဖြင့် ဖြေရှင်းလိုက်ပြီ ဖြစ်သော်လည်း နောက်ထပ် ဘာဆက်ဖြစ်မည်နည်း အရင်ကဆိုလျှင် ချူနင်ကသာ စကားစလေ့ရှိသော်လည်း ယခု ချူနင်ကငြိမ်နေသဖြင့် သူမအနေဖြင့် မည်သို့စကားစရမှန်း မသိဖြစ်နေသည်။

ချူနင်လည်း ဇဝေဇဝါ ဖြစ်နေရသည်။ ရဲ့ချန်းလျန်၏ နည်းလမ်းမှာ ပြဿနာကို တိုက်ရိုက် ရင်ဆိုင်ဖြေရှင်းလိုက်ခြင်း ဖြစ်သည်။

သူတို့ကြားက ဆက်ဆံရေးက အုပ်ချုပ်ရေးကိစ္စကြောင့် အဆင်မပြေဖြစ်ခဲ့ရသည်။ အခုတော့ အဲဒီပြဿနာက ပြေလည်သွားပြီဖြစ်သလို ရဲ့ချန်းလျန်ကလည်း သူမ၏ သဘောထားကိုပြသခဲ့ပြီ။

ဒီကိစ္စတွေကို ထပ်ပြီး စဉ်းစားနေရင်လည်း အပိုပဲဖြစ်မှာကို ချူနင်သိလိုက်သည်။ ရဲ့ချန်းလျန်သည်လည်း ဤကိစ္စကြောင့် သူတို့နှစ်ဦး၏ ဆက်ဆံရေးကိုမထိခိုက်စေချင်သည်မှာ သိသာလှသည်။

"ဒါဆို အရှင်မ ဒီရက်ပိုင်း ထမင်းကောင်းကောင်း မစားဘူးဆို"

"အင်း" ရဲ့ချန်းလျန်က တိုတိုတုတ်တုတ်ပင် ပြန်ဖြေသည်။

"ဒါဆို ဘာလို့ မစားတာလဲ"

"မစားချင်လို့"

ချူနင် ခေါင်းကုတ်လိုက်မိသည်။ အခု အခြေအနေက အရင်ကထက်တောင် ပိုပြီး အနေရခက်နေသလိုပဲ။

"ဒါဆို ကလေးလေးကရော အခြေအနေ ဘယ်လိုလဲ"

"ငါ မသိဘူး"

ဒီလိုနဲ့ဆို စကားက ဆက်လို့မရတော့ဘူး။

တကယ်လို့ ဒါက အလုပ်မဖြစ်ရင် "ငါ ကလေးလေးကို စမ်းကြည့်လို့ ရမလား"

သူတို့နှစ်ဦး၏ဆက်ဆံရေးမှာ သူမ ဗိုက်ထဲက ရင်သွေးလေးကြောင့် စတင်ခဲ့ခြင်း ဖြစ်သည်။ လက်ရှိ အနေရခက်နေသော အခြေအနေကို ပြောင်းလဲရန် ဤနည်းလမ်းက အကောင်းဆုံး ဖြစ်ပေလိမည်။

ရဲ့ချန်းလျန်သည် ထိုစကားကို ကြားသောအခါ အနည်းငယ် အံ့အားသင့်သွားသော်လည်း ခေါင်းညိတ်ပြလိုက်သည်။ "နင် လုပ်ချင်တယ်ဆိုရင်လည်း လာခဲ့လေ နင်က ဧကရာဇ်ပဲလေ"

ချူနင် ခေါင်းညိတ်ပြီး သူမအနားသို့ လျှောက်သွားလိုက်သည်။ သူတို့နှစ်ဦးကြား ဆက်ဆံရေး ပြန်ကောင်းလာရန် ခိုင်မာသော အကြောင်းပြချက်တစ်ခုလိုအပ်ပြီး ထိုအရာမှာ ကလေးပင်ဖြစ်သည်။

သူက သူမ၏ ရှေ့တွင် ဆောင့်ကြောင့်ထိုင်လိုက်ပြီး ရဲ့ချန်းလျန်၏ ဗိုက်နားတွင် နားကပ်လိုက်သည်။

"အင်း... ငါ ခံစားရတာကတော့"

ချူနင်သည် စကားစရန် တစ်ခုခုကို လုပ်ကြံပြောဆိုတော့မည့် ဆဲဆဲတွင် ရုတ်တရက် ရဲ့ချန်းလျန်က သူ့ကို လှမ်းဖက်လိုက်သည်။

သူမ၏ ကိုယ်ငွေ့နှင့် သင်းပျံ့သော ရနံ့မှာ သူ့နှာခေါင်းထဲသို့ တိုးဝင်လာသည်။

သူ ချက်ချင်း ကြောင်အမ်းသွားပြီး ရုတ်တရက် အလိုက်သိလာသော ရဲ့ချန်းလျန်ကို အံ့သြစွာ ကြည့်လိုက်မိသည်။ သူမ၏ အသံမှာ တုန်ယင်နေသည်။

"အဲဒီနေ့က နင်ငါ့ရဲ့ လျှို့ဝှက်ခန်းထဲမှာ ပေါ်လာတုန်းက ငါကိုယ့်ကိုယ်ကိုယ် မထိန်းချုပ်နိုင်ခဲ့ဘူး အဲဒီတုန်းက နင့်ကို ငါ သတ်ပစ်ခဲ့သင့်တာ"

ဒါပေမဲ့ နင်အဲဒီမှာ ပေါ်လာနိုင်တာက ငါတို့ရဲ့ ကံကြမ္မာဖြစ်မှာပါ။ ငါ့ဘဝတစ်ခုလုံးကို အင်ပါယာတိုးတက်ဖို့အတွက်ပဲ ပေးဆပ်ခဲ့တာ။

နင်က သာမန်လူတစ်ယောက် ဖြစ်ပေမဲ့ နင်ပြောပြခဲ့တဲ့ စကားတွေက ငါ့အတွက် အခက်အခဲများစွာကို ဖြေရှင်းပေးနိုင်ခဲ့တယ်။

ငါ နင့်ကို သံသယဝင်မိတာက သဘာဝကျပါတယ်။ ငါက ဘယ်သူ့ကိုမှ မယုံတတ်ဘူး အထူးသဖြင့် အင်ပါယာနဲ့ ပတ်သက်လာရင်ပေါ့။

ဒါပေမဲ့ နင့်မှာဒီဘက်မှာ ပါရမီရှိတာ သိသာတယ်။ နင်က အရာရှိတစ်ယောက်သာဆိုရင် ငါ ဘာမှမပြောပေမဲ့ နင်က ငါ့ရဲ့အနာဂတ် ဧကရာဇ် ဖြစ်နေတာလေ။ ဒါကြောင့် နင် အာဏာလုမှာကို ငါ ထည့်တွက်ခဲ့ရတယ်။

"ဒါပေမဲ့ ဒီရက်ပိုင်းမှာ ငါ စဉ်းစားနေမိတာက ငါ့ရဲ့အနာဂတ် ခင်ပွန်း ငါ့ကလေးရဲ့ဖခင်ကိုတောင် ငါကမယုံကြည်နိုင်ဘဲ ရင်မဖွင့်နိုင်ဘူးဆိုရင် ဒါဟာ ဘယ်လောက်တောင် ဝမ်းနည်းစရာ ကောင်းမလဲဆိုတာပဲ။

သူမက ချူနင့်ကို တင်းတင်းကျပ်ကျပ် ဖက်ထားရင်း ဆက်ပြောသည် "ဒါကြောင့် ငါပေးတဲ့အရာကို ဘာမှမငြင်းနဲ့ နင်လက်ခံလိုက်မှ ငါ စိတ်အေးရမှာ။ ဒီရာထူးမှာ နင့်ရဲ့ပါရမီတွေကို ပိုပြီး ပြသနိုင်လိမ့်မယ် အားမနာဘဲ ရဲရဲဝံ့ဝံ့သာ လုပ်စမ်းပါ"

ငါ နင့်ကို ယုံကြည်လိုက်ပြီမို့ ငါ့ကို စိတ်မပျက်စေနဲ့။ ငါတို့ အတူတူ အင်ပါယာကို အုပ်ချုပ်ကြမယ် ဒီလောကကြီးက ငါတို့နှစ်ယောက်လုံး ပိုင်တာပါ။

ဒါပေမဲ့ တစ်နေ့ကျရင် နင့်ကို ငါက ရန်သူလိုမျိုး ပြန်ပြီး တိုက်ခိုက်ရတာမျိုးတော့ မဖြစ်ပါစေနဲ့၊ ဟုတ်ပြီလား။

ချူနင်သည် ထိုစကားများကို ကြားရသောအခါ တိတ်ဆိတ်သွားပြီး ရဲ့ချန်းလျန်ကို ပြန်လည် ဖက်ထားလိုက်သည်။ သူမ၏ ကိုယ်လေးမှာ တုန်ယင်သွားသော်လည်း မကြာခင်မှာပင် ပြန်လည် တည်ငြိမ်သွားသည်။

"တကယ်တော့ ငါ့မှာအဲဒီလို ရည်ရွယ်ချက်တွေ အစကတည်းက မရှိပါဘူး"

"ငါ သိပါတယ် ဒါပေမဲ့ ငါတို့ကြားက အတားအဆီးကို ဖျက်ဆီးဖို့ ဒီနည်းလမ်းပဲ ရှိတာလေ"

"ကလေးလေးကလည်း မင်းရဲ့ကလေးပဲလေ ငါတို့ အတူတူ စောင့်ရှောက်ကြတာပေါ့"

ထိုသို့ပြောပြီးနောက် သူတို့နှစ်ဦးသား ကြာမြင့်စွာ တိတ်ဆိတ်သွားကြသည်။

"အင်း... ငါ့ကို သံသယဝင်ခဲ့တာအတွက် အပြစ်မတင်ပါနဲ့။ ငါကဧကရာဇ်တစ်ပါး လုပ်သင့်လုပ်ထိုက်တာကို လုပ်ခဲ့တာပါ"

"ငါက သာမန်အမျိုးသမီးတစ်ယောက် မဟုတ်ဘူး ငါ့ရဲ့ အဆင့်အတန်းကြောင့် နင့်ကို အပြည့်အဝမယုံကြည်နိုင်ခဲ့တာပါ။ ဒါပေမဲ့ အခုတော့ ဒီရာထူးက နင့်အတွက်ပဲမို့ ရဲရဲဝံ့ဝံ့သာ လုပ်ပါ ဘာမှ ဖုံးကွယ်မထားနဲ့တော့"

ချူနင်က ခေါင်းမညိတ်သလို ခေါင်းလည်း မခါပါ။ "ဒါဆို ဧကရာဇ်လုပ်ရတာ တော်တော် စိတ်ဖိစီးစရာ ကောင်းမှာပဲနော်"

"အရင်က ပြောဖူးသလိုပဲပေါ့ နင်က သာမန်လူတစ်ယောက်ဆိုရင် နန်းတွင်းထဲမှာ အေးအေးဆေးဆေး နေလို့ရပေမဲ့ အခုတော့ မရတော့ဘူး"

သူတို့နှစ်ဦး ပြန်လည် တိတ်ဆိတ်သွားပြီးနောက် ချူနင်က ရဲ့ချန်းလျန်ကို လွှတ်ပေးလိုက်ကာ ဖြည်းဖြည်းချင်း မတ်တပ်ရပ်လိုက်သည်။

"ဒါဆိုရင် အခု ငါတို့ကြားမှာ စိတ်ခုစရာ ဘာမှမကျန်တော့ဘူး မဟုတ်လား"

ရဲ့ချန်းလျန်က မျက်မှောင် အနည်းငယ် ကြုတ်ကာ "ငါကတောင် ဒီကိစ္စတွေကို မတွေးတော့တာ နင်က ထပ်ပြီးတွေးနေဦးမယ်ဆိုရင်တော့ နင့်ကိုမိန်းမပဲ လုပ်ခိုင်းလိုက်တော့မယ်။ ဘာလို့ ဒီလောက်တောင် ဝေခွဲမရ ဖြစ်နေတာလဲ" ဟု ပြောလိုက်သည်။

ချူနင်က ခပ်ပြုံးပြုံးဖြင့် "ငါက ဘာမှ မဖြစ်ပါဘူး မင်းကသာ..."

ရဲ့ချန်းလျန်က နှာမှုတ်လိုက်သည်။ "ငါလည်း ဘာမှ မဖြစ်ဘူး"

"အင်း... ဒါဆို ခေါက်ဆွဲ စားလို့ ရပြီလား"

ရဲ့ချန်းလျန်က ခေါက်ဆွဲပန်းကန်ကို ကြည့်ကာ "ဒီနေ့ဟာက အရမ်း ရိုးရှင်းလွန်းတယ် ငါ မစားချင်ဘူး" ဟု ခပ်တည်တည် ပြောလိုက်သည်။

"ရိုးရှင်းပေမဲ့ သူ့နည်းသူ့ဟန်နဲ့သူ အရသာရှိပါတယ်။ ဗိုက်ဝအောင် စားလို့ ရတာပဲ မဟုတ်လား အရသာက တကယ် ကောင်းပါတယ်"

"မစားဘူး"

ချူနင်က ပြုံးပြီး ရဲ့ချန်းလျန်၏ လက်ကို လှမ်းကိုင်လိုက်သည်။ သူမက အလိုအလျောက် ပြန်ရုပ်ချင်သော်လည်း နောက်မှ စိတ်ထိန်းကာ ချူနင့်ကို ကိုင်ခွင့်ပြုလိုက်သည်။

"မင်း ပြောတော့ အင်ပါယာရဲ့ အရေးကိစ္စတွေကို ငါနဲ့ မျှဝေခံစားမယ်ဆို အခုကျတော့ ငါတို့ရဲ့ ကိစ္စလေးကိုတောင် မျှဝေဖို့ဝန်လေးနေတာလား"

ရဲ့ချန်းလျန်၏ လက်ချောင်းလေးများ အနည်းငယ် တုန်ယင်သွားသည်။ "ငါတို့ရဲ့ ဘယ်ကိစ္စလဲ"

"အနည်းဆုံးတော့ မင်းရဲ့ ကျန်းမာရေးကို ဂရုစိုက်ဖို့ပေါ့"

ရဲ့ချန်းလျန် ခေတ္တမျှ ငြိမ်သက်သွားသည်။ ယခုမှသာ ချူနင် သူမကို ပေးခဲ့သည့် ဂရုစိုက်မှုမျိုးကို ပြန်လည်ခံစားလိုက်ရသည်။

ဤဂရုစိုက်မှုနှင့် တာဝန်ယူတတ်မှုကြောင့်သာ ရဲ့ချန်းလျန်သည် အစကတည်းက ချူနင့်ကို စည်းကမ်းတွေ အထပ်ထပ် ချိုးဖောက်ခွင့် ပေးခဲ့ခြင်း ဖြစ်ပေလိမည်။

သူမ သတိပြန်ဝင်လာပြီး မျက်နှာလေး အနည်းငယ် နီမြန်းကာ လက်ကို ပြန်ရုပ်လိုက်သည်။ "အရသာ မရှိရင်တော့ နင် ပြန်ချက်ပေးရမယ်နော်။ ဒါ နင် ပြောတာနော်"

ချူနင်က ပြုံးပြီး ပန်းကန်နှင့် တူကို ကမ်းပေးလိုက်သည်။ "အရင်ဆုံး တစ်လုပ်လောက် မြည်းကြည့်ပါလား"

"တစ်လုပ်ပဲ မြည်းမှာနော်"

"ဟုတ်ကဲ့ပါ"

ရဲ့ချန်းလျန်သည် ခေါက်ဆွဲကို တစ်လုပ် မြည်းကြည့်လိုက်ရာ အံ့သြဖွယ်ကောင်းလောက်အောင် အရသာရှိနေသည်ကို တွေ့ရသည်။

သူမ၏ စိတ်အခြေအနေ ကောင်းမွန်လာသည်နှင့်အမျှ စားချင်စိတ်လည်း ပြန်လည် ပေါ်ပေါက်လာသည်။

"စားလို့တော့ ရပါတယ် အဆင်ပြေပါတယ်"

ချူနင်က ပြုံးလိုက်သည်။ ဤတစ်ကြိမ်တွင် သူ ဘာမှ ထပ်မပြောဘဲ သူမ စားနေသည်ကိုသာ တိတ်တဆိတ် ကြည့်နေလိုက်သည်။

"နောက်ခါဆိုရင် နှစ်ပန်းကန် ယူခဲ့ပေးမလား"

"တစ်ပန်းကန်တည်းနဲ့ ဗိုက်မဝလို့လား"

"အဲဒီလို မဟုတ်ပါဘူး နင်က စိုက်ကြည့်နေတော့ ငါက နေရခက်လို့လေ ပြီးတော့ နင်ရော စားပြီးပြီလား"

ချူနင်က သူမကို ပြုံးကြည့်ရင်း "ငါ စားပြီးပါပြီ။ ဒါက မင်းအတွက်ပဲ သီးသန့် ချက်လာတာလေ" ဟု ပြောလိုက်သည်။

ရဲ့ချန်းလျန်က နှုတ်ခမ်းလေး စူလိုက်ပြီး "နောက်ခါဆိုရင် နင်စားပြီးရင်တောင် နောက်ထပ် တစ်ပန်းကန် ထပ်စားရမယ် သိလား" ဟု မကျေမနပ် ပြောလိုက်သည်။

"ဒါပေမဲ့ မင်း စားတာကို ကြည့်နေရုံနဲ့တင် ငါ ဗိုက်ဝနေပြီလေ"

ရဲ့ချန်းလျန်က ဇဝေဇဝါဖြင့် "အဲဒါက ဘာလို့လဲ" ဟု မေးလိုက်သည်။

"ဘာလို့လဲဆိုတော့ ချန်းလျန်က ကြည့်ရတာ အရမ်းကို အဆာပြေလို့လေ"

ရဲ့ချန်းလျန်၏ မျက်နှာမှာ ချက်ချင်းပင် နီရဲသွားတော့သည်။ သူမ ထိုခေါက်ဆွဲပန်းကန်နှင့် သူ့မျက်နှာကို ကပ်ပစ်ချင်စိတ် ပေါက်သွားသည်။

နင့်ခေါင်းပဲအဆာပြေ ဘာတွေလာပြောနေတာလဲ သို့သော်လည်း သူမ၏ စိတ်အခြေအနေမှာ ယခုအခါ များစွာ ကောင်းမွန်သွားပြီ ဖြစ်သည်။ ဤသည်မှာ သူမ သိသော ချူနင်ပင် ဖြစ်သည်။

ပြီးတော့သူမထိုခေါက်ဆွဲပန်းကန်ကိုမကပ်ရက်တော့ပါ။ဒီခေါက်ဆွဲကပိုပြီးအရသာရှိသွားသလိုပါပဲ။