အခန်း ၁၆၂ အဝေးတစ်နေရာသို့ လွင့်မျောခြင်း

အမြင့်မြတ်ဆုံးဧကရာဇ်နန်းတော်အတွင်းဝယ်

ရဲ့ချန်းလျန်သည် ကြည့်လေလေ ပို၍ သဘောကျလေလေ ဖြစ်နေသည်။ မည်သည့်အမျိုးသမီးကမှ ဤကဲ့သို့ လှပခမ်းနားသော နေရာမျိုးကို မချစ်ဘဲ မနေနိုင်ပေ။ မိမိ၏ နန်းတော်နှင့် နှိုင်းယှဉ်လျှင် ကောင်းကင်နှင့် မြေကြီးကဲ့သို့ ကွာခြားလှသည်။

ယခင်က ချူနင်နှင့်အတူ ဟင်းလင်းပြင်နန်းတော်သို့ လိုက်သွားစဉ်ကလည်း သူမ အလွန်အံ့အားသင့်ခဲ့ရသည်။ ထိုစဉ်က နဂါးအစစ်များနှင့် ဖီးနစ်ငှက်များကို ရထားလုံးဆွဲရန်နှင့် အိမ်မွေးတိရစ္ဆာန်များအဖြစ် အသုံးပြုနေကြသည်ကို တွေ့ခဲ့ရသည်။

ရဲ့ချန်းလျန်၏ လက်ရှိအဆင့်အတန်းနှင့်ဆိုလျှင် နဂါးအစစ်တစ်ကောင်ကို သတ်ရန်မှာ ပြဿနာမဟုတ်ပေ။ သူမတွင် ဧကရာဇ်လက်နက်ရှိနေပြီး ဧကရာဇ်အရှိန်အဝါကိုလည်း အပြည့်အဝ ထိန်းချုပ်နိုင်စွမ်း ရှိလာပြီဖြစ်ရာ ဧကရာဇ်တစ်ပိုင်းတစ်ပါးကို သတ်ဖြတ်ရန်မှာ ခဲယဉ်းမည်မဟုတ်။ သို့သော် ထိုဧကရာဇ်တစ်ပိုင်းက ငြိမ်ခံနေမှသာ ဖြစ်ပေလိမ့်မည်။

မေမေ သဘောကျတယ်ဆိုရင် ဒီမှာပဲ ပြောင်းနေမယ်လို့ ဖေဖေ့ကို ပြောလိုက်လေ။ ယောင်ယောင်က ရယ်မောရင်း ပြောသည် ဖေဖေက ပြောတယ် ဒီနေရာက တို့မိသားစုပိုင်တာတဲ့ ကြိုက်တဲ့နေရာမှာ နေလို့ရတယ်။

ရဲ့ချန်းလျန်မှာ စိတ်လှုပ်ရှားသွားသော်လည်း ဝေခွဲမရ ဖြစ်နေပြန်သည်။ မိမိအိမ်ထက် ကောင်းသောနေရာမရှိဟု ဆိုရိုးရှိသည်မဟုတ်လား။ အောက်လောကတွင် ကျင့်ကြံရသည်မှာလည်း မြန်ဆန်လှပြီး ဝိညာဉ်စွမ်းအင်များမှာလည်း ဤနေရာထက် အဆပေါင်းများစွာ ပို၍သိပ်သည်းသည်။

နောင်ကျရင်တော့ ဒီကိုပြောင်းနေမယ်။ နေ့ဘက်မှာ ညီလာခံတက်ပြီး ညဘက်ကျရင် ဒီမှာ လာအိပ်မယ် အဲဒါ တကယ် ကောင်းမှာပဲ။ ရဲ့ချန်းလျန်သည် အနာဂတ်ကို မျှော်လင့်ချက်အပြည့်ဖြင့် တွေးနေမိသည်။

ဘေးတွင်ရပ်နေသော ချူမူကတော့ ရဲ့ချန်းလျန်လို အတွေးမများပေ။ ကျင့်ကြံရမယ် ဆက်ပြီး ကျင့်ကြံရမယ်။ အမြန်ဆုံး ဧကရာဇ်ဖြစ်အောင် လုပ်ရမယ်။

ဤနေရာသည် တာအို၏ မူလမြစ်ဖျားခံရာ ဖြစ်နေသဖြင့် သူမ၏ ကျင့်ကြံမှုကို များစွာ လှုံ့ဆော်ပေးနိုင်သည်။ ဤနေရာမှ ထူးကဲသောဝိညာဉ်စွမ်းအင်များကို စုစည်းကာ သူမ၏ ဧကရာဇ်ခန္ဓာကိုယ်အတွင်းသို့ သွတ်သွင်းရင်း ကျင့်ကြံမှုအဆင့်ကို မြှင့်တင်နေတော့သည်။

ယောင်ယောင် သမီးအမက ကျင့်ကြံနေပြန်ပြီ။ သမီးကော မကျင့်ကြံချင်ဘူးလား။ ဖေဖေက ပြောတယ် ကျင့်ကြံတာ မကျင့်ကြံတာ အရေးမကြီးပါဘူးတဲ့။ ယောင်ယောင်က မကျင့်ကြံချင်ဘူး။

ရဲ့ချန်းလျန် သက်ပြင်းချလိုက်မိသည်။ ချူနင်က ကလေးကို ထိုသို့သင်ထားလျှင် ကလေးက ဘယ်မှာကျင့်ကြံချင်စိတ် ရှိတော့မည်နည်း။ ဒါပေမဲ့လည်း သူမသမီးက တစ်နှစ်တောင် မပြည့်သေးရာ အတင်းအကျပ် လုပ်ရန်လည်း မလိုသေးပေ။

ထိုစဉ် ချူနင့သည် အနောက်မှ လျှောက်လာသည်။ ယောင်ယောင်သည် ရဲ့ချန်းလျန်၏ ရင်ခွင်ထဲမှ ရုန်းထွက်ကာ ချူနင်၏ ရင်ခွင်ထဲသို့ ခုန်ဝင်သွားတော့သည်။

"ဖေဖေ... နမ်းဦး"

အေးပါ ယောင်ယောင်းလေးကို ဖေဖေ နမ်းပါ့မယ်။ ချူနင်က ပါးလေးကို နမ်းလိုက်သောအခါ ယောင်ယောင်မှာ ပျော်ရွှင်သွားပြီး ချူနင်ကို အတင်းဖက်ထားတော့သည်။ ဤမြင်ကွင်းကို ကြည့်ပြီး ရဲ့ချန်းလျန်မှာ မနာလိုသလို ခံစားလိုက်ရသည်။

ဟင်း ငါမွေးပြီး ငါကျွေးလာတာကို ငါ့ကျတော့ မနမ်းဘူး။ ကြည့်ရတာ ဒီကလေးမလေးက ငါ့ယောင်္ကျားကို လာလုနေသလားလို့တောင် ထင်ရတယ်။ ရှင်ကတော့ သူ့ကို အလိုလိုက်လွန်းနေပြီ။ သူက ကျင့်ကြံဖို့တောင် စိတ်မဝင်စားတော့ဘူး။ ကြီးလာရင်တော့ ရှင့်မှာ ငိုရလိမ့်မယ်။

ရဲ့ချန်းလျန်၏ စကားထဲတွင် မနာလိုစိတ်များ ပါနေသည်မှာ သိသာလှသည်။ မိမိသမီးကို မနာလိုဖြစ်တာ မှားသော်လည်း ချူနင်ကိုတော့ သူမ မနာလိုဖြစ်ပိုင်ခွင့် ရှိသည်မဟုတ်လား။

ချူနင်က ရယ်မောရင်း ယောင်ယောင်၏ ဆံပင်လေးကို ဖွလိုက်သည်။

ယောင်ယောင် ကျင့်ကြံရတာကို သဘောကျလား။ ဖေဖေက ယောင်ယောင်လေးကို သဘောကျလား။ ယောင်ယောင် ကျင့်ကြံတာ မကျင့်ကြံတာထက် ဖေဖေက ယောင်ယောင်ဘေးကို အမြဲ သဘောကျမှာပေါ့။

အာ ဒါဆိုရင် ယောင်ယောင်လည်း မကျင့်ကြံတော့ဘူး။ ရဲ့ချန်းလျန် မျက်လုံးလှန်လိုက်မိသည်။

ဟင်း... ဒီကလေးက အခုကတည်းက အကွက်တွေ မြင်နေပြီ။ ရှင့်ရဲ့ သင်ကြားမှုတွေကြောင့်ပေါ့။ ဒါက ချန်းလျန်ရဲ့ သမီးလည်း ဖြစ်နေလို့လေ။

ဒါဆို ဘာလို့သမီးက ရှင့်ကျတော့ ကပ်ပြီး ကျွန်မကျတော့ မကပ်တာလဲ။ သမီးဆိုသည်မှာ ဖခင်၏ အတိတ်ဘဝက ချစ်သူဟု ဆိုရိုးရှိသည်မဟုတ်လား။

ရဲ့ချန်းလျန်က ပြုံးစစဖြင့် ဒါဆိုဒီဘဝမှာ ငါ့ယောင်္ကျားကို လာလုဦးမလို့လား သူကြီးလာရင် ဝေးဝေးကို ချက်ချင်း ယောက်ျားပေးစားပစ်မယ်။ ငါ့ယောင်္ကျားကို လာလုဖို့လား လုံးဝ မဖြစ်နိုင်ဘူး။

ဘေးတွင် ရပ်နေသော ရှောင်ပင်းမှာတော့ ခေါင်းကုတ်နေမိသည်။ ယောင်္ကျားလုတယ် ဒီလောကမှာရှိသမျှ ယောင်္ကျားတွေက အရှင် ပိုင်တာ မဟုတ်ဘူးလား ထားလိုက်ပါတော့။

အရှင်မတို့ စကားပြောတာကို သူမတို့လို လူတွေ နားလည်ဖို့ ခက်လှသည်။ ဤနေရာတွင် ဝိညာဉ်စွမ်းအင်များ ပေါများလှသဖြင့် သူမလည်း ကျင့်ကြံရန်သာ ဆုံးဖြတ်လိုက်သည်။

လူကြီးတစ်ယောက်နှင့် ကလေးတစ်ယောက် (ချူမူ) တို့ ကျင့်ကြံနေကြစဉ် နောက်ထပ် ကလေးတစ်ယောက် (ယောင်ယောင်) ကတော့ ချူနင်နှင့် ခဏကြာ ချွဲနွဲ့ပြီးနောက် အပြင်သို့ လွင့်မျောထွက်သွားတော့သည်။

ချူနင်ကတော့ သူ့သမီး ဘယ်ဆီ လွင့်သွားသည်ကို ဂရုမစိုက်ပေ။ ကောင်းကင်တာအိုအောက်တွင် သူ့သမီးကို မည်သူမျှ ရန်မပြုရဲသလို ယောင်ယောင်မှာလည်း အကာအကွယ်များ ရှိပြီးသားဖြစ်သည်။

သူ့အနေဖြင့် ဇနီးသည်ကိုသာ ချော့မြူရန် လိုအပ်သည်။ သမီးက အတိတ်ဘဝက ချစ်သူဖြစ်နိုင်သော်လည်း ဇနီးသည်ကတော့ လက်ရှိဘဝ၏ အချစ်စစ် ဖြစ်သည်မဟုတ်လား။ သူမ စိတ်ကောက်နေလျှင် ဒီည သူ ဖက်အိပ်ရမည် မဟုတ်ပေ။

ရဲ့ချန်းလျန်က စိတ်ကောက်နေသည်တော့ မဟုတ်သော်လည်း သူတို့ဘေးတွင်ရပ်နေရသည်မှာ သူမကိုယ်သူမ အပိုလူကြီးဟု ခံစားနေရသည်။

သွားကြစမ်းပါ ငါ့ဘာသာငါ နေနိုင်တယ်။ နို့တိုက်စရာ မလိုတော့တဲ့နောက်ပိုင်း လူတွေက ငါ့ကိုမချစ်ကြတော့ဘူး။

ယောင်ယောင်အတွက် ကျင့်ကြံခြင်း၏ အကြီးမားဆုံးသော တွန်းအားမှာ ပျံသန်းနိုင်ခြင်းဖြစ်သည်။ ယခုအခါ သူမသည် ကောင်းကင်ယံကို ဖြတ်ကျော်ကာ ဟင်းလင်းပြင်နန်းတော်ရှိရာသို့ ရောက်ရှိသွားတော့သည်။

ဟင်းလင်းပြင်နန်းတော်မှ တပည့်များမှာ ဟင်းလင်းပြင်ထဲတွင် ကျင့်ကြံနေကြစဉ် မိန်းကလေးငယ်တစ်ဦး ပျံသန်းလာသည်ကို တွေ့လိုက်ရသဖြင့် အံ့အားသင့်သွားကြသည်။

"ဟာ ဒီကလေးမလေးက ဘယ်ကပျံလာတာလဲ"

ဟင်းလင်းပြင်ထဲတွင် စွမ်းအင်များမှာ ကြမ်းတမ်းလှသဖြင့် ဆဋ္ဌမနယ်ပယ် ကျင့်ကြံသူတစ်ဦးပင်လျှင် သတိမထားပါက ထိခိုက်နိုင်သည်။ သူတို့က ကလေးမလေးကို ဆွဲယူရန် ကြိုးစားသော်လည်း ဖမ်း၍မရပေ။

ဟာ ဒီကလေးမလေးရဲ့ ကျင့်ကြံမှုက ငါ့ထက်တောင် မြင့်နေပါလား။ ငါသိပြီ... ဒါက ဘယ်သူ့သမီးလဲဆိုတာ ငါ တစ်ခါတွေ့ဖူးတယ်။

ယောင်ယောင်သည် မှောင်မည်းနေသော ဟင်းလင်းပြင်လောကကြီးကို စိတ်ဝင်တစား ကြည့်နေမိသည်။ ထိုစဉ် ဧကရာဇ်လောင်းလျာတစ်ပါးက ရောက်လာပြီး မေးလိုက်သည်။

"ဒါ မင်းသမီးလေး မဟုတ်လား ဒီကို ဘာလာလုပ်တာလဲ မင်းရဲ့ဖေဖေနဲ့ မေမေကော"

ယောင်ယောင်က ရိုးရိုးသားသား ပြန်ဖြေသည် ဖေဖေနဲ့ မေမေက ညီလေးလား ညီမလေးလား မသိဘူး တစ်ယောက်ယောက် ထပ်ယူဖို့ လုပ်နေကြတယ် အဲဒါနဲ့ယောင်ယောင်က ထွက်လာတာ။

ဧကရာဇ်တစ်ပိုင်းကြီးမှာ ခဏတာ တိတ်ဆိတ်သွားပြီးမှ ခေါင်းကုတ်လိုက်သည်။

"မင်းကို ပြန်လိုက်ပို့ပေးရမလား"

မလိုဘူးအဘိုး ယောင်ယောင် ဘာသာ ပြန်သွားနိုင်တယ် ပြောပြီးနောက် သူမသည် ထပ်မံ လွင့်မျောသွားပြန်သည်။

ထိုဧကရာဇ်လောင်းလျာမှာ မစိုးရိမ်ပေ။ ဤမိန်းကလေးမှာ ကောင်းကင်တာအို၏ ကောင်းချီးကို ရရှိထားသူဖြစ်ရာ ကောင်းကင်ဘုံအတွင်းရှိသရွေ့ ဘာပြဿနာမှ ရှိမည်မဟုတ်ပေ။

ယောင်ယောင်သည် သူမ၌ပါရှိသော ဖရိုဖရဲခန္ဓာကိုယ်ကြောင့် ဟင်းလင်းပြင်နှင့် ဖရိုဖရဲနယ်မြေများကြားတွင် လွတ်လပ်စွာ သွားလာနိုင်သည်။ ထို့ပြင် ယခင်က ကြယ်စင်ဝေလငါးပေးအပ်ထားသော စွမ်းအားများကြောင့်လည်း သူမကို မည်သည့်စွမ်းအင်ကမှ မထိခိုက်နိုင်ပေ။

သူမသည် အမြင့်သို့ လွင့်မျောရင်း ကောင်းကင်တာအို၏ ဥပဒေသများကို ကျော်လွန်သွားခဲ့သည်။ ထိုအခါ ကြယ်စင်ဝေလငါးကြီးများအုပ်စုလိုက် ရောက်လာကြသည်။ယောင်ယောင်ကို မြင်သည်နှင့် ဝေလငါးခေါင်းဆောင်ကြီးက သူမကို သူတို့၏ နယ်မြေသို့ ဧည့်သည်အဖြစ် ခေါ်ဆောင်သွားတော့သည်။

ယောင်ယောင် ပြန်လာသောအခါ ကြယ်စင်မြစ် မူလစွမ်းအင်များ ပြည့်နေသော အိတ်ကြီးတစ်အိတ်ကို သယ်လာခဲ့သည်။ ဤမြင်ကွင်းကို ကြည့်နေသော ကျင့်ကြံသူများမှာ ပါးစပ်အဟောင်းသား ဖြစ်သွားကြရသည်။

"ဟိုငါးကြီးက ဘာလဲ အကြီးကြီးပဲ"

ငါမဟာဧကရာဇ် ဖြစ်နေတာတောင် အဲဒီငါးကြီးကို နိုင်မယ် မထင်ဘူး ဟိုမှာ ကြည့်စမ်း အဲဒါ မင်းသမီးလေး မဟုတ်လား။

ကျင့်ကြံသူအချို့မှာ ယောင်ယောင်ကို ကယ်ရန် ကြိုးစားကြသော်လည်း ယောင်ယောင်က အိတ်ကြီးလွယ်ကာ ဝေလငါးခေါင်းဆောင်ကြီး၏ ခေါင်းကို ပွတ်ပေးနေသည်ကို မြင်လိုက်ရသည်။

ငါးကြီး ယောင်ယောင် အိမ်ပြန်တော့မယ်နော် နောက်မှ တွေ့မယ် ကြယ်စင်ဝေလငါးကြီးများမှာ ခေါင်းငြိမ့်ပြကာ ထွက်ခွာသွားကြသည်။

အခြားသော ကျင့်ကြံသူများမှာတော့ တိတ်ဆိတ်သွားကြသည်။

မအံ့သြပါဘူး ကောင်းကင်ဧကရာဇ်က ဒီကလေးမလေးကို ဘာလို့လွှတ်ထားရဲတာလဲ ဆိုတာ။

ကောင်းကင်အောက်မှာဆို ကောင်းကင်တာအိုက ကာကွယ်ပေးထားတယ် နဂါးငွေ့တန်းပြင်ပမှာဆိုရင်လည်း ကြယ်စင်ဝေလငါးကြီးတွေက ကာကွယ်ပေးထားတာပဲ။ ဒီလောကကြီး တစ်ခုလုံးက ဒီကလေးမလေးရဲ့ မိသားစုပိုင်ပဲကိုး။

ငါစဉ်းစားနေတာ ဧကရာဇ်က သားထပ်လိုချင်သေးလားလို့။

"မြေးဆိုရင်လည်း မဆိုးပါဘူး"

ဒါဆို ငါကမင်းအဖေပေါ့ သားလေးရေ ဖေဖေလို့ တစ်ချက်လောက် ခေါ်စမ်းပါဦး။

သေချင်နေတာလား မင်းသမီးလေး သွားရင် မင်းကို ငါအသေသတ်မယ်။