အခန်း ၁၅၀ ဧကရာဇ်တို့ သစ္စာဖောက်၍ ကောင်းကင်ဘုံ ငိုကြွေးခြင်း

အဝါရောင်ဧကရာဇ်သည် တည်ငြိမ်စွာ ပြုံးလိုက်ပြီး သူ၏လက်ထဲမှ အမြင့်မြတ်ဆုံး နတ်ဘုရား အဆီအနှစ်ကို ထုတ်ပြလိုက်သည်။

နယ်ပယ်ကိုချိုးဖျက်နိုင်မယ့် လျှို့ဝှက်ချက်က ဒီထဲမှာ ရှိတယ်။

မရေမတွက်နိုင်သော ဧကရာဇ်တို့သည် ထိုအရာကို စူးစိုက်ကြည့်လိုက်ကြပြီး သူတို့၏ မျက်လုံးများတွင် လောဘဇောများ တောက်လောင်လာသည်။ ဤအရာကို မင်း ဘယ်လိုရခဲ့တာလဲ။

"ငါ ပုံပြင်တစ်ပုဒ် ပြောပြမယ်။"

ဟိုးအရင်က ဓားဧကရာဇ်ဟာ ထူးခြားတဲ့ ပါရမီနဲ့အတူ ငါတို့မသိဘဲ ဒီနည်းလမ်းကို သုံးပြီး မသေမျိုးဖြစ်ဖို့နဲ့ ပိုမြင့်တဲ့ ရည်မှန်းချက်တွေကို အကောင်အထည်ဖော်ဖို့ အခွင့်အရေး ရခဲ့တယ်။

ငါတို့အားလုံး ပေါင်းပြီး ဓားတာအိုဧကရာဇ်ကို သတ်ပြီးတဲ့နောက် ဒီနည်းလမ်းကို ချန်းရှန်းမဟာဧကရာဇ်က ရသွားခဲ့တာ။

မကြာခင်ကမှ ငါဟာ အဲဒီအနွယ်အထိ အမြစ်ကို လိုက်ရှာကြည့်ရင်း...။

လူတိုင်းက အသက်ပင် မရှူရဲဘဲ စကားတစ်လုံးချင်းစီကို သေချာနားထောင်နေကြသည်။ ဟင်းလင်းပြင်ဧကရာဇ် စုတုန်းဖန်းကတော့ လှောင်ပြုံးပြုံးနေရုံသာ။

ချိုးဖျက်မယ် ဟုတ်လား။ ဧကရာဇ်တစ်ပါး နယ်ပယ်ချိုးဖျက်ဖို့ဆိုတာ ဧကရာဇ်တို့၏ ဆုတ်ယုတ်ခြင်း ကာလငါးပါးကို ဖြတ်ကျော်ပြီး ကြီးမားတဲ့ ဘေးဒုက္ခကို ခံယူရမှာ ဖြစ်သည်။

ယခုစုတုန်းဖန်းသည် သူ၏နတ်ဘုရားစွမ်းအားများ ဆုတ်ယုတ်ခြင်းကို ကြုံတွေ့ခဲ့ပြီးနောက် သူသည် ယခုရောက်နေသော ဧကရာဇ်များနှင့် အဆင့်အတန်း မတူတော့ပေ။

အဖြေက ဒီမှာရှိသည်။ ကောင်းကင်တာအို၏ အလိုတော်က သူတို့ကို ကိုယ်စားလှယ်များအဖြစ် ရွေးချယ်ခဲ့ခြင်းဖြစ်ပြီး ဤအဆင့်မှာတင် ကန့်သတ်ထားခြင်း မဟုတ်ပေ။

ကောင်းကင်တာအို၏ အလိုတော်ကြောင့်ပင် မင်းတို့ ဘယ်လိုချိုးဖျက်ရမလဲဆိုတာ မသိကြခြင်းဖြစ်သည်။

ချူနင်တစ်ခါက ပြောဖူးသည်။ ကောင်းကင်တာအိုသည် ဖန်တီးမှုအတွက် မြေသြဇာကောင်းသော မြေဆီလွှာဖြစ်သော်လည်း ၎င်းသည် ဖန်တီးမှု၏ အမြင့်ဆုံးအဆင့် မဟုတ်ပေ။ မဟုတ်လျှင် ပိုမြင့်သော နယ်ပယ်တစ်ခုကို မုချထွက်ပေါ်စေလိမ့်မည်။

ကောင်းကင်တာအိုအောက်ရှိ သူများသည် ကောင်းကင်တာအို၏ ချုပ်နှောင်မှုကို ခံရပြီး ပျက်စီးသွားမည့် ကံကြမ္မာရှိသော်လည်း ဘာမှ မတတ်နိုင်ကြပေ။

အကြောင်းမှာ ကောင်းကင်တာအိုသည် မဟာဧကရာဇ်ထက် မြင့်မားသော ပြောင်းလဲမှုများကို ထပ်မံမဖန်တီးနိုင်တော့သောကြောင့် ဖြစ်သည်။

ကျင့်ကြံသူများ အနေဖြင့်မူ သူတို့၏ ကိုယ်ပိုင် အစွမ်းအစဖြင့် ချိုးဖျက်နိုင်သည်။ ၎င်းမှာ အဖြေတစ်ခုသာဖြစ်ပြီး ပိုမြင့်သော တည်ရှိမှုကသာ ၎င်းကို ဖယ်ရှားနိုင်သည်။

တစ်နည်းအားဖြင့် မဟာဧကရာဇ်၏ အရင်းအမြစ်နှင့် နိယာမစွမ်းအားများကို စွန့်လွှတ်နိုင်သရွေ့ တိုးတက်နိုင်သည်။ မဟာဧကရာဇ်၏ ခွန်အားကို ကောင်းကင်တာအိုက အသိအမှတ်ပြုထားခြင်း ဖြစ်သည်။

အကယ်၍ တစ်စုံတစ်ဦးက ပိုမြင့်သော နယ်ပယ်သို့ ချိုးဖျက်သွားပါကကောင်းကင်ဘုံသည် ဧကရာဇ်အသစ် တစ်ပါးကိုသာ ရွေးချယ်လိုက်မည် ဖြစ်သည်။

ဧကရာဇ်လောင်းလျာ အဆင့် ၈၁ ဆင့် ရောက်နေသူ ဘယ်နှစ်ယောက်ကများ ကောင်းကင်တာအို၏ အသိအမှတ်ပြုမှုကိုမရဘဲ ရှိပါသနည်း။

မိမိကိုယ်ပိုင် ခွန်အားကို အားကိုးသည် ဆိုရာတွင်လည်း မည်သည့်ကျင့်ကြံသူက မိမိခွန်အားကို အားမကိုးဘဲ ဤနေရာအထိ ရောက်လာပါသနည်း။

သို့သော် စုတုန်းဖန်းသည် သူ၏ရှေ့မှ လူတစ်စုကို တိတ်ဆိတ်စွာ ကြည့်နေမိသည်။

ယခုအခါ ပိုမြင့်သော နယ်ပယ်သို့ ချိုးဖျက်ရန် ထို အမြင့်မြတ်ဆုံးနတ်ဘုရား အဆီအနှစ်ကို အားကိုးရမည်ဟု ဆိုနေကြသည်လား သူ မမြင်ရသေးသော်လည်း ခန့်မှန်းနိုင်သည်။

ဤသည်မှာ အခြားဧကရာဇ်များကို ဆွဲဆောင်ရန် ထောင်ထားသော ထောင်ချောက်သာ ဖြစ်သည်။ ဒါကို တမင်တကာ လုပ်ခဲ့တာလား။

အဝါရောင်ဧကရာဇ်က ရယ်မောလိုက်သည်။

ဒီအမြင့်မြတ်ဆုံး စွမ်းအားက ဘယ်ကလာလဲဆိုတာ မင်းတို့ သိကြလား။

အို အဝါရောင်ဧကရာဇ်ရယ် ပြောသာပြောပါ ဖုံးမထားပါနဲ့။ ငါတို့အားလုံးက ဧကရာဇ်တွေပဲ တစ်ဖက်တည်းသားတွေပဲ။ ဘာကို ဖုံးကွယ်ထားစရာ လိုလို့လဲ။

ဟုတ်တယ် ဘာလို့ ဖုံးထားတာလဲ ပြောပြစမ်းပါ။ လူအုပ်က တိုက်တွန်းနေသဖြင့် အဝါရောင်ဧကရာဇ်က အနည်းငယ် ပြုံးလိုက်သည်။

မင်းတို့ အမှောင်ကပ်ဘေးအကြောင်း သိကြလား။ လူတိုင်း၏ မျက်နှာပေးမှာ အနည်းငယ် တင်းမာသွားသည်။

"ဒါပေါ့ သိတာပေါ့"

အမှောင်ဘက်ခြမ်းအကြောင်း ဘယ်သူမသိဘဲနေမလဲ ဧကရာဇ်ဆိုတာ အမှောင်ကပ်ဘေးကို တားဆီးဖို့ မွေးဖွားလာတာ မဟုတ်လား မရေမတွက်နိုင်သော ဧကရာဇ်တို့သည် အမှောင်ထုထဲတွင် ပျက်စီးခဲ့ရပြီး သူတို့၏ အသက်ကို အမှောင်ဘေးဒုက္ခထဲတွင် စတေးခဲ့ကြရသည်။

သူတို့သည်လည်း လူသားမျိုးနွယ်နှင့် ကောင်းကင်တာအိုအတွက် မွေးဖွားလာကြသူများ ဖြစ်သည်။

အဝါရောင်ဧကရာဇ်က ရုတ်တရက် အေးစက်စွာ ရယ်မောလိုက်သည်။ တကယ်တော့ ငါတို့အားလုံး မှားနေခဲ့တာ အမြဲတမ်း မှားနေခဲ့တာ။

ရှေးအကျဆုံးဖြစ်တဲ့ မသေမျိုးဧကရာဇ်ကို ခဏဖယ်ထားဦး။ ငါတို့ထဲမှာ ဧကရာဇ် ဖြစ်ပြီးကတည်းက ကျင့်ကြံမှု တိုးတက်လာတဲ့သူ ဘယ်နှစ်ယောက် ရှိလဲ။

ဒါကိုရှာတွေ့ခဲ့တဲ့ ဓားဧကရာဇ်နဲ့ ချန်းရှန်းဧကရာဇ်ကလွဲရင်ပေါ့။ လူအုပ်က ခဏမျှ တုံ့ဆိုင်းသွားသည်။ ၎င်းတို့နှစ်ဦးမှအပ မဟာဧကရာဇ်တို့၏ ခွန်အားမှာ အကြမ်းဖျင်းအားဖြင့် တူညီကြသည်။

စုတုန်းဖန်းကိုလည်း ချန်လှပ်ထားရမည်။ ထိုအဘိုးကြီးက မကြာသေးမီကမှ တော်တော်လေး ပြင်းထန်လာသဖြင့် တစ်ခုခု ရှာတွေ့ထားပုံရသည်။

"အကြောင်းရင်းကို သိကြလား"

"ပြောပါဦး အဝါရောင်ဧကရာဇ်"

အကြောင်းကတော့ ငါတို့ဟာ ကောင်းကင်တာအိုရဲ့ ကိုယ်စားလှယ်တွေ ဖြစ်နေလို့ပဲ ကောင်းကင်တာအိုရဲ့ ကိုယ်စားလှယ်တွေဟာ ကောင်းကင်တာအိုကို ကျော်လွန်လို့ မရဘူး။

အမှောင်ကပ်ဘေးရဲ့ အမှန်တရားကတော့ ကောင်းကင်တာအိုက ပိုမြင့်တဲ့အဆင့်တွေကို ငြင်းပယ်တာပဲ။ ဒါကြောင့် မဟာဧကရာဇ် မျိုးဆက်ပေါင်းများစွာကို သူတို့ရဲ့ ခန္ဓာကိုယ်တွေနဲ့ အမှောင်ထုကို ခုခံခိုင်းနေတာ။ အမြင့်မြတ်ဆုံး နယ်ပယ်ကို ရောက်နိုင်မယ့် စစ်မှန်တဲ့ နည်းလမ်းက အမှောင်နယ်မြေထဲမှာ ရှိတယ်။

လူတိုင်း၏ မျက်နှာမှာ ချက်ချင်း ပြောင်းလဲသွားသည်။ ထိုအချိန်တွင် ကောင်းကင်တာအို၏ စွမ်းအားများမှာ သူတို့၏ ခေါင်းပေါ်တွင် စုစည်းလာတော့သည်။ သူတို့၏ လုပ်ရပ်က ကောင်းကင်ဘုံ၏ အမျက်ဒေါသကို နှိုးဆွလိုက်ပြီ ဖြစ်သည်။

စုတုန်းဖန်းကလည်း ဒါကို သတိထားမိသော်လည်း တိတ်ဆိတ်နေသည်။ ကောင်းကင်ဘုံကတော့ ဒေါသကို ပြနေပြီ။သို့သော် အဝါရောင်ဧကရာဇ်ကတော့ ဂရုမစိုက်ပေ။

ဓားဧကရာဇ် ဒါကို ရှာတွေ့ပြီးနောက်မှာ သူက ချိုးဖျက်ပြီး တိုးတက်သွားခဲ့တယ်။

မသေမျိုးဧကရာဇ် ဒါကိုရှာတွေ့ပြီးနောက်မှာလည်း သူက ပိုမြင့်တဲ့ အဆင့်ကို ရောက်သွားခဲ့တယ်။

"အခု ငါလည်းဒါကို ရှာတွေ့ခဲ့ပြီ"

အမှောင်စွမ်းအားများက အဝါရောင်ဧကရာဇ်၏ ခန္ဓာကိုယ်တွင် ဝန်းရံလာရာ လူတိုင်း မသိမသာ နောက်ဆုတ်လိုက်ကြသည်။

"အဝါရောင်ဧကရာဇ် မင်းဘာတွေလုပ်လိုက်တာလဲ"

"မင်း အခု အမှောင်ထုထဲကျဆင်းသွားပြီ"

အဝါရောင်ဧကရာဇ်ကို အတူတူ သတ်ကြစို့။

လူတိုင်း၏ လက်ထဲတွင် ဧကရာဇ်လက်နက်များ ပေါ်လာပြီး တိုက်ခိုက်ရန် ပြင်လိုက်ကြသည်။

သို့သော် အဝါရောင်ဧကရာဇ်က တစ်ချက်ကြည့်လိုက်ရုံဖြင့် သူတို့လက်ထဲမှ ဧကရာဇ်လက်နက်များမှာ ဆွေးမြေ့သွားတော့သည်။

အမှောင်စွမ်းအားသည် ဤလောကရှိ တည်ရှိမှု အားလုံး၏အရင်းအမြစ်ဖြစ်သည် ၎င်းနှင့် ထိတွေ့သမျှ အရာအားလုံး ပုပ်သိုးပျက်စီးသွားမည် ဖြစ်သော်လည်း ကောင်းကင်ဘုံ၏ ရွေးချယ်ခံ မဟာဧကရာဇ်မှာမူ ထိုသို့ ဖြစ်မည်မဟုတ်ပေ။

ဤလုပ်ရပ်က လူတိုင်းကို မှင်တက်သွားစေသည် အဝါရောင်ဧကရာဇ်ဆီမှ ထွက်ပေါ်လာသော အရှိန်အဝါမှာ သူတို့ထက် များစွာ သာလွန်နေသည်။

ငါတို့ဟာ ကောင်းကင်တာအိုရဲ့ အလိုတော်အောက်မှာ မျက်စိကွယ်နေတာ ကြာလှပြီ။

ငါအမှောင်နယ်မြေကို သွားခဲ့တယ် ကောင်းကင်တာအိုထက်တောင် မြင့်မားတဲ့ အမြင့်မြတ်ဆုံးသော အရှင်နဲ့ တွေ့ခဲ့တယ်။

အရှင်က ငါ့ကိုပိုမြင့်တဲ့ တည်ရှိမှုတွေကို မြင်ခွင့်ပေးခဲ့တယ်။ သူက လူတိုင်းကို ကြည့်လိုက်သည်။

အားလုံးပဲ အခုထိ နားမလည်ကြသေးဘူးလား ငါတို့ဟာကောင်းကင်တာအိုရဲ့ မျက်လှည့်ပြတာကို ခံနေရတာ ကြာလှပြီ ဘာမှရှေ့မတိုးနိုင်ကြတော့ဘူး။

ငါတို့အားလုံးဟာ ကောင်းကင်တာအိုက ပိုမြင့်တဲ့ တည်ရှိမှုတွေကို ဖယ်ထုတ်ဖို့ သုံးနေတဲ့ကိရိယာတွေ အသုံးချခံတွေပဲ။ လူတိုင်း၏ ခန္ဓာကိုယ်များ တုန်ယင်နေကြသည်။

မင်းတို့ ပိုကြီးမားတဲ့ ခွန်အားကို မလိုချင်ကြဘူးလား။ ငါတို့ ဘာလို့ကောင်းကင်ရဲ့ နိယာမတွေကိုပဲ နားထောင်နေရမှာလဲ ငါတို့ဘာလို့ ရှေ့ဆက်လို့ မရမှာလဲ ငါ့ရဲ့တည်ရှိမှုက သက်သေပဲ။

ဧကရာဇ်တွေ အနေနဲ့ အရှင့်ရဲ့အမိန့်ကို နာခံမယ်ဆိုရင်တောင် ငါတို့ရသင့်ရထိုက်တဲ့ ဂုဏ်သိက္ခာကို ရမှာပဲ။

ငါတို့ ပိုမြင့်တဲ့ နယ်ပယ်ကို ချိုးဖျက်သွားတဲ့အခါ ပိုပြီးကျယ်ပြောတဲ့ ကမ္ဘာကြီးကို သိမ်းပိုက်ကြမယ်။

ပြောပြီးသည်နှင့် သူသည် အမှောင်အရှင်က သူ့အား ပေးသနားထားသော အမြင့်မြတ်ဆုံး စွမ်းအား အနည်းငယ်ကို ထုတ်လွှတ်လိုက်သည်။

ဒါက အရှင်က မင်းတို့ကို ပေးတဲ့ လက်ဆောင်ပဲ ပြီးတော့ ဒါကအကြီးမားဆုံးသော ရိုးသားမှုပဲ။

ထိုစွမ်းအားမှာ ပျံ့နှံ့သွားပြီး ခုနစ်ပိုင်းကွဲကာ လူတိုင်းထံသို့ ရောက်ရှိသွားသည်။ စုတုန်းဖန်းကတော့ ဂရုမစိုက်ဘဲ ဖယ်ထုတ်လိုက်သော်လည်း အခြားသူများကတော့ စမ်းသပ်ကာ ကျင့်ကြံကြည့်ကြသည်။

အရာအားလုံးမှာ အိပ်မက်တစ်ခုလိုပင် ကျင့်ကြံမှု အဆင့်များ တိုးတက်လာပြီး နောက်ထပ် ခြေတစ်လှမ်း ရှေ့တိုးနိုင်ခဲ့ကြသည်။ လူတိုင်း အံ့သြသွားကြပြီးမှ အူမြူးသွားကြတော့သည်။

ချန်းရှန်းမဟာဧကရာဇ်က ဒီနှစ်တွေမှာ ဘာလို့ ဒီလောက် သန်မာနေလဲဆိုတာ မဆန်းတော့ဘူး။ အဝါရောင်ဧကရာဇ် မင်းမှာဒီလို ခွန်အားမျိုး ရှိနေတာ မဆန်းတော့ဘူး။

ငါဒီအသုံးမကျတဲ့ ဧကရာဇ်ရာထူးကို မလိုချင်တော့ဘူး ငါပိုမြင့်တဲ့နယ်ပယ်ကို တက်လှမ်းတော့မယ်။

အဝါရောင်ဧကရာဇ် ငါတို့ကို အဲဒီအရှင်ဆီ ခေါ်သွားပေးပါ။

"ဟဲဟဲ... ကောင်းပြီလေ" အဝါရောင်ဧကရာဇ် ဝမ်းသာသွားသည်။ ဤလုပ်ရပ်ကြောင့် သူသည် အရှင်၏ ချီးမွမ်းခြင်းကို ရပေလိမ့်မည်။

လူသားဧကရာဇ် တစ်ပါးပြီးတစ်ပါးက အလုအယက် ပြောလာကြသည်။ စုတုန်းဖန်းကတော့ ထိုဧကရာဇ်များကို အံ့သြမှင်တက်စွာ ကြည့်နေမိသည်။

ဧကရာဇ် ဆယ်ပါးအနက် တစ်ပါးက အသတ်ခံရပြီး တစ်ပါးက အမှောင်ထုထဲ ကျဆင်းသွားပြီ။ ယခု ကျန်တဲ့သူတွေ အားလုံးကလည်း အမှောင်ထဲ ကျဆင်းတော့မည်။

မင်းတို့အားလုံး ရူးနေကြတာလား ဒါမှမဟုတ် ဧကရာဇ် ဖြစ်နေတာကြာလို့ အသိဉာဏ်တွေ ကင်းမဲ့ကုန်တာလား။

ကောင်းကင်ဘုံရဲ့ ကောင်းချီးမပေးဘဲ မင်းတို့ မဟာဧကရာဇ်တွေ ဘယ်လိုဖြစ်လာနိုင်မှာလဲ။

မင်းတို့ အရင်ကဆိုခဲ့တဲ့ သစ္စာတွေ ကောင်းကင်တာအိုက အသိအမှတ်ပြုခဲ့တာတွေကို အခုတော့....။

"စုတုန်းဖန်း"

ဝင်စားခြင်းဧကရာဇ်ရဲ့ လက်ထဲက ဝင်စားခြင်းမှန်က သူ့ဆီကို ချိန်ရွယ်လိုက်သည်။

မင်းရဲ့တိုးတက်မှုကကော ဒီအရာကြောင့် မဟုတ်ဘူးလား။ မင်းကျတော့ တိုးတက်လို့ရပြီး ငါတို့ကျတော့ ဘာလို့ မရရမှာလဲ။

မင်းက အရင်က မသေမျိုးဧကရာဇ်လိုပဲ လုပ်ချင်နေတာလား။ ရုတ်တရက် စုတုန်းဖန်း တစ်ခုခုကို သတိထားမိပြီး နောက်သို့ လှည့်ကြည့်လိုက်သည်။ အမှောင်စွမ်းအားများ ပြည့်နှက်နေသော အလောင်းတော်ဧကရာဇ်သည် သူ၏ နောက်ကွယ်တွင် ရပ်နေသည်။

ဧကရာဇ်များမှာ အံ့သြသွားပြီးမှ အူမြူးသွားကြပြန်သည်။ ချန်းရှန်းဧကရာဇ်မင်း မသေသေးဘူးပဲ။

မင်းလည်း အမှောင်ထုထဲ ကျဆင်းသွားတာပဲ တာအိုတွေ ဖျက်ဆီးခံလိုက်ရတာတောင် မင်း အသက်ရှင်နေသေးတယ်။ အလောင်းတော်ဧကရာဇ်က တည်ငြိမ်စွာ ပြောလိုက်သည်။

မင်းတို့အားလုံး ပိုမြင့်တဲ့ အဆင့်ကို တက်လှမ်းဖို့ ဆုံးဖြတ်ချက် ခိုင်မာတယ်ဆိုရင် မင်းတို့ရဲ့ ရိုးသားမှုကို ငါ့ကို ပြစမ်းပါ။

သူသည် ခြောက်ကပ်နေသော သူ၏ လက်ညှိုးကို စုတုန်းဖန်းထံသို့ ချိန်ရွယ်လိုက်သည်။

"ငါတို့နဲ့ မတူတဲ့သူ"

သူ့ရဲ့ ရည်ရွယ်ချက်က ခြားနားနေလိမ့်မယ်။

"ဒီလူကို သတ်ပစ်ကြ"

ဝုန်း

နားကွဲမတတ် ပြင်းထန်သော မိုးကြိုးသံကြီးက လောကတစ်ခုလုံးကို လှုပ်ခါသွားစေသည်။ အထက်ဘုံ၏ ကောင်းကင်နှင့် မြေကြီးမှာ စတင်၍ အက်ကြောင်းများ ပေါ်လာတော့သည်။

သွေးမိုးများ ရွာသွန်းလာပြီး ကောင်းကင်နှင့် မြေကြီး တစ်ခုလုံး တုန်ခါနေသည် ၎င်းမှာ ကောင်းကင်ဘုံ၏ ငိုကြွေးသံပင်ဖြစ်တော့သည်။