အခန်း ၁၄၅ အိပ်မက်ဆိုးမှ နိုးထလာခြင်း

ချန်ရှင်းနန်းဆောင်၏ အိပ်ဆောင်အတွင်း၌ ကလေးငယ်နှစ်ဦးမှာ စောင်ပုံထဲတွင် ကွေးနေကြပြီး ယောင်ယောင်ကတော့ ရဲ့ချန်းလျန်အရင်က ထားခဲ့သည့် ကိုယ်ပွားလေးကို ဖက်ထားဆဲပင်။

မေမေ ခဏနေရင် ပြန်လာလိမ့်မည် ဤအရာမှာ မေမေအထူးချန်ထားခဲ့ခြင်းဖြစ်ပြီး ၎င်းကိုဖက်ထားခြင်းက မေမေ့ကို ဖက်ထားရသလိုမျိုး ခံစားရစေသည်ဟု ချူနင်က ပြောထားခဲ့သည်။

ယောင်ယောင်ကတော့ ထိုစကားကို အဟုတ်မှတ်ကာ ယုံကြည်နေသည်။ ဘာပဲဖြစ်ဖြစ် မေမေ ပြန်လာမှာပဲ စိတ်ပူစရာမလိုဘူး ဆက်အိပ်တော့မယ်။

တစ်ဖက်တွင်မူ သူမဘေးနားရှိ ချူမူမှာမူ တကိုယ်လုံး ချွေးစေးများ ထွက်နေပြီး မျက်နှာမှာ ဖြူလျော်နေသည်။ ချန်းရှန်မဟာဧကရာဇ်သေဆုံးသွားခဲ့ပြီ ၎င်းကို သူမ၏ အဖေကိုယ်တိုင် သတ်ဖြတ်ခဲ့ခြင်း ဖြစ်သဖြင့် သူမ နောက်ထပ် စိုးရိမ်စရာ မရှိသင့်တော့ပေ။

သို့သော် အိပ်မက်ထဲတွင်မူ ထိုသတ်ဖြတ်မှုကြီးက ပြန်လည်ပေါ်ပေါက်လာပြန်သည် မဟာဧကရာဇ်ရှစ်ပါး၏ ဝိုင်းရံတိုက်ခိုက်ခြင်းကို ခံရစဉ် မူလချန်းရှန်မဟာဧကရာဇ်မှာ အရိုးစုကဲ့သို့ ပုံစံပြောင်းလဲသွားပြီး အစွမ်းသတ္တိများ ပိုမိုကြီးမားလာကာ သူမကို ဓားတစ်ချက်တည်းဖြင့် ပိုင်းချလိုက်သည်။

ထိတ်လန့်တကြား နိုးလာသော ချူမူ၏ စိတ်ထဲတွင် ကြောက်စိတ်များ လွှမ်းမိုးနေဆဲပင်။ သက်ရှည်တာအို ကွယ်ပျောက်သွားပြီ သက်ရှည်တာအို မျိုးနွယ်စုလည်း ပျက်သုဥ်းသွားပြီ ဖြစ်သဖြင့် ချန်းရှန်းမဟာဧကရာဇ်မှာ သေဆုံးသွားခဲ့သင့်သည်။

သို့ဆိုလျှင် သူမ ဘာကြောင့် သူ့အကြောင်း အိပ်မက်မက်နေရသေးသနည်း။

ကျွိကနဲ အသံနှင့်အတူ ချူနင်က တံခါးကို တွန်းဖွင့်ဝင်လာသည်။ သူသည် အလုပ်ကိစ္စများကို အခုမှ အပြီးသတ်နိုင်ခဲ့ခြင်း ဖြစ်သည်။ သမီးဖြစ်သူကို မနှိုးမိစေရန် ခြေလှမ်းကို အသာဖွဖွနင်း၍ ဝင်လာသော်လည်း ကုတင်ပေါ်တွင် ထိုင်နေသော မူမူကို မြင်လိုက်ရသည့်အခါ အနည်းငယ် အနေရခက်သွားရသည်။

ဟဲဟဲ အဖေ့အသံက တော်တော်လေး တိုးပါတယ် သမီး နိုးသွားလိမ့်မယ်လို့ မထင်ထားဘူး။ သို့သော် ချူမူ၏ နဖူးပေါ်မှ ချွေးစေးများနှင့် တည်ငြိမ်မှုမရှိသော အမူအရာကို မြင်လိုက်ရသည့်အခါ တစ်ခုခု မှားနေပြီဟု သူ ချက်ချင်း အာရုံခံမိသွားပြီး သမီးဖြစ်သူအနီးသို့ အမြန်သွားကာ စစ်ဆေးလိုက်သည်။ ဤသည်မှာ အိပ်ရာမှ အခုမှ နိုးလာသူတစ်ဦး၏ပုံစံမျိုး မဟုတ်ပေ။

စစ်ဆေးကြည့်ပြီးနောက် သမီးဖြစ်သူ၏ ခန္ဓာကိုယ်တွင် စိတ်ပိုင်းဆိုင်ရာ ပြဿနာ မရှိသော်လည်း သူမ၏ ဝိညာဥ်ပင်လယ်မှာ အနည်းငယ် တုန်ခါနေသည်ကို တွေ့ရသည်။

"ဘာဖြစ်လို့လဲမူမူ အိပ်မက်ဆိုးတွေ မက်လို့လား"

ချူမူသည် ပင်ကိုယ်သိစိတ်အရ ချူနင်ကို ဖက်ထားလိုက်မိမှသာ အနည်းငယ် စိတ်အေးသွားရသော်လည်း ဘာစကားမှတော့ မပြောပေ။ ချန်းရှန်းမဟာဧကရာဇ်မှာ သေဆုံးသွားခဲ့သင့်သည်။

အဖေက သူမအတွက် ကူညီလက်စားချေပေးခဲ့ပြီးပြီ၊ သူမလည်း အတိတ်နှင့် ငြိမ်းချမ်းရေး ယူခဲ့ပြီးပြီ။

ဒါပေမဲ့ ဘာလို့ ဒီလို အိပ်မက်မျိုး မက်နေရတာလဲ။ သမီးဖြစ်သူ၏ ပုံမှန်မဟုတ်မှုကို သတိထားမိသဖြင့် ချူးနဥ်ကလည်း ဇဝေဇဝါဖြစ်ကာ ထပ်မေးလိုက်သည်။

ကြောက်စရာကောင်းတာတွေ အိပ်မက်မက်လို့လား ရပါတယ်အဖေ ရှိတယ်လေ ဘယ်လို ပြဿနာမျိုးမဆို အဖေ ဖြေရှင်းပေးနိုင်ပါတယ်။ ချူမူက ဘာမှ အများကြီး မပြောခဲ့ပေ။ ဘာပဲဖြစ်ဖြစ် ဒါက သူမနဲ့ မသက်ဆိုင်တော့ဘဲ အိပ်မက်တစ်ခုသာ ဖြစ်သဖြင့် သူမကို ထိခိုက်နိုင်မည် မဟုတ်ပေ။

သို့သော် သူမ ဘာကြောင့် ဤအရာကို အိပ်မက်မက်ရသနည်း ဒါကနိမိတ်တစ်ခုခုလား။ သို့သော် အဖေ့၏ ကျင့်စဥ်နယ်ပယ်မှာ မဟာဧကရာဇ်ထက် ပိုမို အစွမ်းထက်သင့်သည်။ ချန်းရှန်းမဟာဧကရာဇ် လွတ်မြောက်သွားနိုင်စရာ အကြောင်းမရှိဘူး မဟုတ်လား။

"ဘာမှမဟုတ်ပါဘူးအဖေ မေမေ့ကို သတိရလို့ပါ။"

ချူနင်က နားလည်ပေးလိုက်ပြီး ထပ်မမေးတော့ဘဲ သမီးဖြစ်သူကို ပွေ့ချီကာ ရယ်မောလိုက်သည်။

"မေမေ့ကိုသတိရရင် မနက်ဖြန် အဖေသမီးကို မေမေ့ဆီ ခေါ်သွားပေးရမလား"

ထိုစကားကို ကြားသောအခါ ချူမူက မော့ကြည့်ပြီး တိုးတိုးလေး မေးရှာသည် မေမေက တိုက်ပွဲဝင်နေတာ မဟုတ်ဘူးလား ဘယ်လိုလုပ် သွားတွေ့လို့ရမှာလဲ။

"သူတို့ မတိုက်တော့တဲ့ အချိန်ကျရင် သွားလို့ရတာပဲ မဟုတ်လား"

ချူမူ ခဏမျှ စဥ်းစားကြည့်လိုက်ပြီးနောက် ဒါကလည်း ကျိုးကြောင်းဆီလျော်သည်ဟု ထင်မိသည်။ သူမသည် ချူနသ်၏ ရင်ခွင်ထဲတွင်သာ ဆက်နေလိုက်ပြီးမှ စိတ်အေးချမ်းမှုကို ခံစားလိုက်ရသည်။ ချူနင်၏ အင်အားမှာ အလွန်ကြီးမားလှသည် သူသည် အလွန်ခိုင်ခံ့သော အကာအကွယ်ထီးကြီး တစ်ခုနှင့် တူသည်။

ဒီအကာအကွယ်ထီးကြီးက သူမမဟာဧကရာဇ်နယ်ပယ်ကို ပြန်ရောက်တဲ့အထိ စောင့်ရှောက်ပေးနိုင်မလား ဘယ်သူသိမှာလဲ ထိုသို့ဆိုလျှင် စိုးရိမ်နေစရာ မလိုတော့ပေ။

သူမ အခုလောလောဆယ် သူ့ကို ခဏလောက် ပိုဖက်ထားချင်ရုံသာ။ သူမ ကျေးဇူးတင်ပါတယ်ဟု အမှန်တကယ် ပြောချင်သော်လည်း ယခုအခါ သူမသည် ဓားတာအိုမဟာဧကရာဇ်မဟုတ်တော့သဖြင့် မည်သည့် ဂုဏ်ပုဒ်ဖြင့် ချူးနဥ်ကို ကျေးဇူးတင်ရမည်နည်း။

ဖြစ်နိုင်သည်မှာ ချန်းရှန်းမဟာဧကရာဇ်၏သေဆုံးမှုမှာ တခြားအကြောင်းပြချက်များကြောင့် ဖြစ်နိုင်ပြီး သူမအတွက် လက်စားချေပေးခြင်း မဟုတ်လောက်ပေ။ သို့သော် သူသေသွားလျှင်ပဲ လုံလောက်ပါပြီ။

သမီးဖြစ်သူက ကပ်ချွဲနေသည်ကို မြင်ရသဖြင့် ချူနင်မှာ တဟားဟား ရယ်မောရင်း သမီးဖြစ်သူ၏ ခေါင်းလေးကို ပွတ်သပ်ပေးလိုက်သည်။

မေမေ့ကိုတွေ့တဲ့အခါကျရင်လည်း အခုလိုမျိုး ဖက်လိုက်ဦးနော်။ မေမေက အမြဲပြောတယ် သမီးက မုန့်စားချင်မှပဲ သူ့ကို လာဖက်တယ်တဲ့ မေမေ့ကိုလည်း သမီးရဲ့ အချစ်တွေကို ခံစားခွင့်ပေးလိုက်ဦးလေ။

"အင်း ဟုတ်ကဲ့ပါ"

တကယ်တော့ အူကြောင်ကြောင်နိုင်လှသည့် ယောင်ယောင်နှင့် ယှဥ်လျှင် သူမက ပိုပြီး အေးစက်သလိုရှိနေသည်။ ကလေးတစ်ယောက်အနေဖြင့် ကြည့်လျှင် ဒါက သိပ်ပြီးတော့ မပြည့်စုံလှပေ။ ယခုမူ စိတ်ထဲတွင် ဘာမှ မရှိတော့ခြင်းက အကောင်းဆုံးပင်။

ဘာမှ အများကြီး မတွေးဘဲ ပေါ့ပေါ့ပါးပါး ကလေးတစ်ယောက်လို နေထိုင်ခြင်းက အဆင်ပြေပါသည်။ ဘာပဲဖြစ်ဖြစ် သူမက ချူနင်၏ အဆင့်အတန်းကို သိထားပြီးသားပဲ။ မေမေက အောက်ဘုံက ဖြစ်ပေမယ့် ချူနင်ကတော့ မဟုတ်ဘူး။

မဟာဧကရာဇ်နယ်ပယ်ထက် မြင့်မားတဲ့ကျင့်စဥ် အဆင့်အတန်း ပိုမို မြင့်မားတဲ့ တည်ရှိမှုတစ်ခု သူက ချန်းရှန်းမဟာဧကရာဇ်ကို ဘာလှုပ်ရှားမှုမှ မရှိစေဘဲ အသာလေး သတ်ပစ်နိုင်ခဲ့တာ။

ဒီလိ တည်ရှိမှုမျိုးက တကယ်ကို ကြောက်စရာကောင်းလွန်းတယ် ဒါကသူမကိုကျင့်စဥ် ဆက်မကျင့်ချင်တော့အောင်ကို လုပ်နိုင်စွမ်းရှိတယ်။ ချန်းရှန်းမဟာဧကရာဇ် အသတ်ခံလိုက်ရပြီ ပြီးတော့ အဖေရဲ့ ကျင့်စဥ်နယ်ပယ်ကလည်း အတော်လေးမြင့်တယ်။

သူက ထျန်းရွှမ်တိုက်ကြီးကို သိမ်းပိုက်ဖို့ ကူညီမပေးတာက မေမေ့ရဲ့ ဆန္ဒကို လေးစားလို့ပဲ ဘာလို့လဲဆိုတော့ ဒါက မေမေ ကိုယ်တိုင်လုပ်ချင်တဲ့ အရာဖြစ်နေလို့။ ဒီလို တည်ရှိမှုမျိုး ရှိနေမှတော့ သူမအတွက် ဘာကိုမှ အလောတကြီး လုပ်နေစရာ မလိုတော့ဘူး။ မိသားစုရဲ့ နွေးထွေးမှုနဲ့ ဂရုစိုက်မှုကို ခံယူရတာကလည်း ရွေးချယ်မှုကောင်း တစ်ခုပါပဲ။

ဒါပေမဲ့ ဘာလို့ စိတ်ထဲမှာ တစ်ခုခုကိုစိုးရိမ်နေသလို ခံစားနေရတာလဲ အရာအားလုံးက ဒီလောက် ရိုးရှင်းမှာ မဟုတ်ဘူးလို့ ခံစားနေရတယ်။ ချူနင်ကတော့ ဤအကြောင်းအရာများကို သမီးဖြစ်သူအား အသိပေးမည် မဟုတ်ပေ။

ရဲ့ချန်းလျန်ကိုတောင် ပြောပြမည် မဟုတ်ပါ။ သူ၏ ဇနီးနှင့် သားသမီးများမှာ ဤနေရာတွင် အေးအေးချမ်းချမ်း နေထိုင်ကြရန်သာ လိုအပ်သည်။ သေသွားပြီဖြစ်သော ချန်းရှန်းမဟာဧကရာဇ်က အခု ပြန်လည် အသက်ဝင်လာသည်ပေါ့ ထိုသို့ဆိုလျှင် ချူနင်အနေဖြင့် သူ့ကိုအပြီးတိုင် သေဆုံးသွားအောင် လုပ်ပေးရန် ဝန်မလေးပေ။

သို့သော် သူသည် အထက်ဘုံရှိ ဟင်းလင်းပြင်တာအို မျိုးနွယ်စု၏ လေထုကို အရင်ရှင်းလင်းချင်သည် မင်းတို့က လူသားမျိုးနွယ်ရဲ့ မဟာဧကရာဇ်တွေဖြစ်ပြီး လူသားမျိုးနွယ်ကို ဆန့်ကျင်ရဲတယ်ပေါ့။

ကောင်းကင်တာအိုက အရေးမယူဘူးဆိုရင် ငါကပဲကောင်းကင်တာအို ကိုယ်စား အရေးယူပြီး အားလုံးကို ရှင်းပစ်မယ် အမှောင်ကပ်ဘေးရဲ့ နောက်ကွယ်က ကြိုးကိုင်သူက မသေမျိုးဧကရာဇ်လား။

သူတို့က မသေမျိုးဧကရာဇ်ဖြစ်ရုံနဲ့ ငါ့ကိုအနိုင်ယူနိုင်မယ်လို့ ထင်နေကြတာလား ဒါကရယ်စရာကြီးပဲ။

တာအိုနယ်ပယ်၊ မဟာဧကရာဇ်တာအိုနယ်ပယ်၊ ရှစ်ဆယ့်တစ်ကြိမ်မြောက် တာအိုဖန်တီးခြင်း ဘေးဒုက္ခများ၊ မဟာဧကရာဇ်တစ်ပိုင်း၊ မဟာဧကရာဇ်လောင်းလျာ၊ မဟာဧကရာဇ်။

မဟာဧကရာဇ် တစ်ပါးဟာ ဆုတ်ယုတ်ခြင်းငါးပါးကို ကြုံတွေ့ရပြီး ဘေးဒုက္ခကို ကျော်လွှားနိုင်မှသာ ဤလောကမှ လွန်မြောက်နိုင်မည်။ ထိုအခါမှသာ မသေမျိုးဧကရာဇ် အဆင့်ကို ရရှိရန် အခွင့်အရေး ရှိမည်။ သို့သော် မသေမျိုးဧကရာဇ ဆိုသည်မှာ အဆုံးသတ်မဟုတ်ပေ။

ထိုစဉ်က ရဲ့ချန်းလျန်က ချူနင်၏ ကျင့်စဥ်နယ်ပယ်အကြောင်း မေးမြန်းခဲ့ဖူးသည်။ သူက ခပ်ပေါ့ပေါ့ပဲ အနည်းငယ် ရှင်းပြခဲ့သည်။ သို့သော် ထိုအချိန်တွင် ချူနင်ပြောစရာ ကျန်နေသေးသည့် အချက်အလက်များမှာ အရှည်ကြီး ရှိနေသေးသည်။

သူက သူတို့ကို ပစ်မှတ်ထားလိုက်ပြီဖြစ်သဖြင့် ကောင်းကင်တာအိုအတွက် မည်သူက ယုံကြည်ချက် မခိုင်မာသနည်း မည်သူကကိုယ်ကျင့်တရား ပျက်ပြားနေသနည်း ဆိုသည်ကို ကူညီရွေးထုတ်ပေးမည်။

အဆုံးမှာတော့ ဤမရေမတွက်နိုင်သော နယ်ပယ်များသည် သူ၏ဇနီးနှင့် သားသမီးများ နောင်တွင် ပျော်ပျော်ပါးပါး လည်ပတ်ကြမည့် နေရာများဖြစ်လာမည် မဟုတ်လား။ အကယ်၍ မနာခံသောသူတစ်ဦးဦးက သူ၏ ဇနီးနှင့် သားသမီးများကို ထိခိုက်စေမည်ဆိုလျှင် ဒါက မကောင်းနိုင်ပေ။

သူတို့ လှုပ်လှုပ်ရှားရှား ဖြစ်နေသဖြင့် ဘေးနားရှိ ယောင်ယောင် နိုးလာသည်။ ကောင်မလေးမှာ မျက်လုံးကို ပွတ်ရင်း ငိုက်မြည်းစွာ ထိုင်လာပြီး အဖေက အစ်မကိုပဲ ဖက်ထားသည်ကို မြင်သည့်အခါ မတရားဘူးဟု ချက်ချင်း ခံစားလိုက်ရသည်။

အဖေ သမီးကိုကျမဖက်ဘဲ အစ်မကိုပဲ ခိုးဖက်ထားတယ် ယောင်ယောင်လည်း အဖက်ခံချင်တယ်။ ချူနင်တဟားဟား ရယ်ကာ လှဲချလိုက်ပြီး တစ်ဖက်တစ်ချက်စီတွင် ကလေးမလေး တစ်ဦးစီကို ဖက်ကာ စောင်ခြုံပေးလိုက်မှ ယောင်ယောင်က ကျေနပ်သွားတော့သည်။

"အဖေက မျက်နှာလိုက်တယ် မေမေ့ကိုတွေ့ရင် တိုင်ပြောမယ် ဟွန့်"

ကောင်မလေးက ရန်တွေ့သလို ပြောသဖြင့် ချူနင်လည်း ရယ်မောလိုက်သည်။

"ဟင် ဘယ်လိုလုပ် ခိုးပြီးတိုင်ပြောမှာလဲ အဖေ သမီးကိုလည်း ဖက်ထားပေးတယ်လေ"

ယောင်ယောင်က ခဏမျှ စဥ်းစားပြီးနောက် ခေါင်းကို အပြင်းအထန် ခါလိုက်သည်။

ဒါပေမဲ့ စောစောက အဖေက အစ်မကိုပဲ ဖက်ထားတာလေ သမီးကို မဖက်ဘူး အစ်မကို ပိုကြာကြာ ဖက်ထားတယ်။ ဒါဆို အဖေက ယောင်ယောင် တစ်ယောက်တည်းကိုပဲ ဖက်ထားရမလား။

"ဟင့်အင်း အစ်မကိုလည်း ဖက်ထားရမယ်။ အစ်မက အဖက်မခံရဘူးဆိုရင် သနားစရာကြီး"

ဘေးနားရှိ ချူမူမှာမူ မျက်လုံးလှန်လိုက်မိသည်။ ဒီအူကြောင်ကြောင်မလေး ဒီဧကရာဇ်က အဖက်ခံဖို့ လိုလို့လား နင်ပဲ မေမေနဲ့ အဖေကို နေ့တိုင်း အတင်းလာဖက်ခိုင်းနေတာ မဟုတ်လား။

"ကဲပါ နှစ်ယောက်လုံးကို ဖက်ထားပေးပါမယ်။ မူမူ၊ ယောင်ယောင် နောက်ကျနေပြီ။ ကောင်းကောင်း အနားယူကြဦး မနက်ဖြန်ကျရင်အဖေ မေမေ့ဆီ ခေါ်သွားပေးမယ် ဟုတ်ပြီလား။

ဒါပေမဲ့ အဖေ သမီး အိပ်မပျော်ဘူး။ မေမေ့ကို ပြောပြသလိုမျိုး သမီးကို ပုံပြင်ပြောပြပါလား အရင်ကအဖေ မေမေ့ကို ခိုးပြီးပုံပြင်ပြောပြတာ သမီးတွေ့တယ်နော်။ ယောင်ယောင်ကလည်း အဖေ့ကို  ယောကျာ်းလို့ ခေါ်လို့ရမလား။

မရပါဘူး မင်းရဲ့မေမေ တစ်ယောက်တည်းပဲအဖေ့ကို အဲဒီလို ခေါ်လို့ရတာ။ သမီးတို့ကတော့ အဖေလို့ပဲ ခေါ်ရမယ် ဒါပေမဲ့ စိတ်ဝင်စားဖို့ကောင်းတဲ့ ပုံပြင်တစ်ပုဒ်တော့ ပြောပြနိုင်ပါတယ်။

"ဟေး အဖေ မြန်မြန် ပြောပြပါ"

ချူမူလည်း စိတ်ဝင်တစား နားစွင့်လိုက်သည်။ သူမသည် မွေးကတည်းက မှတ်ဉာဏ်နှင့် အသိတရား ရှိခဲ့သူဖြစ်သည်။ အရင်က စကားမပြောနိုင်သေးခင်တွင် ချူနင်ပုံပြင်ပြောသည်ကို သူမ ကြားဖူးသည်။

အမြဲတမ်း အရေးကြီးတဲ့အပိုင်း ရောက်ခါနီးပြီဆိုရင် မေမေက အဖေ့စောင်ထဲကို တိုးဝင်သွားတတ်ပြီး အဲဒီမှာတင် ပုံပြင်က ရပ်သွားတတ်တာ ထို့ကြောင့် သူမလည်း သိချင်နေမိသည်။ ချူနင်က ရယ်မောရင်း စပြောလိုက်သည်။

"ဟိုးရှေးရှေးတုန်းက ပန်းသီးသစ်သီးတောင်ဆိုတာ ရှိသတဲ့။"

"အင်း... ပန်းသီးသစ်သီးတောင်"

"အဲဒီ ပန်းသီးသစ်သီးတောင်ပေါ်မှာ ကျောက်တုံးကြီးတစ်တုံး ရှိတယ်လေ။"

"ကျောက်တုံးကြီး"

"အဲဒီ ကျောက်တုံးကြီးထဲကနေ မျောက်ကလေး တစ်ကောင် ထွက်လာသတဲ့"

"မျောက်ကလေး"

ချူမူ တစ်ယောက် လူကိုရိုက်ချင်စိတ် ပေါက်သွားရသည် ပုံပြင်ကိုပဲငြိမ်ငြိမ်နားထောင်စမ်းပါ ဘာလို့ ကြားဖြတ်ပြောနေတာလဲ။

သို့သော် ချူနင်ကတော့ စိတ်မရှိဘဲ ဆက်ပြောပြနေသည်။ နားထောင်ရင်းနှင့် သူမလည်း တဖြည်းဖြည်း အသားကျလာသည်။ ချူမူ၏ စိတ်ထဲတွင် တစ်ခုခု ပြောင်းလဲသွားသည်။

ဖြစ်နိုင်သည်မှာ ဤသည်မှာ အိမ်၏အဓိပ္ပာယ် မိသားစုသံယောဇဥ်၏အဓိပ္ပာယ် သူမတစ်ခါမှ မခံစားဖူးခဲ့သည့် ပျော်ရွှင်မှုမျိုး ဖြစ်ရမည်။ ဒါက တကယ်ကို ကောင်းလှပါလား။