အခန်း ၁၄၂ အလောင်းကောင်ဧကရာဇ်

ဂူအတွင်း၌ အဝါရောင်ဧကရာဇ် သည် သူ၏ရှေ့မှ ကျွင်းရှဲ့ ကို ကြည့်ရင်း ရင်ထဲတွင် ထိတ်လန့်တုန်လှုပ်မှုများဖြင့်သာ ပြည့်နှက်နေတော့သည်။

ဧကရာဇ်၏ အမှတ်အသားများ ဖျက်ဆီးခံထားရသည်။ သက်ရှည်ကျင့်စဉ် လမ်းကြောင်းလည်း ပြတ်တောက်သွားပြီ။ သူက ဘယ်လိုလုပ် အသက်ရှင်နေနိုင်ရတာလဲ သူသေသွားပြီ မဟုတ်လား။

သို့သော် ယခုအချိန်တွင် ခံစားနေရသော ထိုစွမ်းအင်မှာ သူ၏အထွတ်အထိပ် ရောက်ခဲ့စဉ်က စွမ်းအားနှင့်ပင် ယှဉ်နိုင်နေသည်။

ထူးဆန်းသော စွမ်းအင်တစ်ခုသည် ခြောက်ကပ်နေသော အလောင်းကောင်တစ်ခုကို ရစ်ပတ်ထားရာ ထိတွေ့လိုက်သည်နှင့် ဝါးမြိုခံရတော့မည့်အလားပင်။

ဂူအတွင်းရှိများပြားလှသော ဝိညာဉ်ရတနာများနှင့် တန်ဖိုးကြီးရှေးဟောင်းပစ္စည်းများသည် ထိုစွမ်းအင်နှင့် ထိတွေ့မိသည်နှင့်တပြိုင်နက် ခြောက်သွေ့ဆွေးမြည့်ကာ ဖုန်မှုန့်အဖြစ်ကြေမွသွားကြသည်။

"အမှောင်ထု စွမ်းအင်"

ရွှမ်ယွမ်သည် ထိုစွမ်းအင်ကို မြင်သည်နှင့် တပြိုင်နက် မှတ်မိသွားသည်။

နှစ်ပေါင်းတစ်သိန်းလျှင် တစ်ကြိမ်သံသရာအသစ် စတင်လေ့ရှိပြီး အမှောင်ကပ်ဘေးပေါ်ပေါက်ကာ လောက၏ အရပ်ရပ်ကို ဝါးမြိုလေ့ရှိသည်။ ထိုအမှောင်ကပ်ဘေးတွင် ဧကရာဇ်များပင် သေဆုံးနိုင်သည်။

ဤခန္ဓာကိုယ်မှာ အလောင်းကောင်များဖြင့် ဖုံးလွှမ်းနေသည် ရွှမ်ယွမ်သည် ထိုစွမ်းအင်ကို ကြည့်ပြီး ချက်ချင်းပင် ကောက်ချက်ချလိုက်သည်။

"မင်းက အမှောင်သက်ရှိတစ်ယောက် ဖြစ်သွားတာလား ဘာလို့လဲ"

ခန္ဓာကိုယ်မှာ အလောင်းကောင်ဖြစ်သော်လည်း မဟာဧကရာဇ်၏ မူလအရင်းအမြစ်ကမူ အတွင်း၌ ဝှက်ကာ တည်ရှိနေသည်။ တစ်စုံတစ်ယောက်က ချန်းရှန်းဧကရာဇ်၏ မူလအရင်းအမြစ်ကို ခိုးယူပြီး ဤအလောင်းကောင်အတွင်းသို့ ပေါင်းစပ်ပေးလိုက်ခြင်းပင်။

အလောင်းကောင်ဧကရာဇ် (အမှောင်ကပ်ဘေးတွင် အကြွင်းမဲ့ အစွမ်းထက်သော ပုဂ္ဂိုလ်တစ်ဦး။)

သို့သော် ဤအရာက မဖြစ်နိုင်ပေ။ ကုန်လွန်ခဲ့သော နှစ်ပေါင်းတစ်သိန်းတွင် ခုနစ်သောင်းခန့်သာ ရှိသေးသည်။ အမှောင်ကပ်ဘေးက ဘယ်လိုလုပ် ပြန်ရောက်လာနိုင်မှာလဲ သူမသိသော်လည်း ရှေ့မှ အလောင်းကောင် ဧကရာဇ်က သူ၏အသိတရားကို အစဉ်တစိုက် စိန်ခေါ်နေသည်။

လူသားမျိုးနွယ်၏ဧကရာဇ်သည် အမှောင်ထုထဲသို့ ကျဆင်းသွားပြီး အလောင်းကောင် ဧကရာဇ်ဖြစ်လာခဲ့ပြီ

ကျွင်းရှဲ့သည် မည်သည့် ခံစားချက်မျှမပြဘဲ သူ၏နီရဲသော မျက်လုံးများဖြင့် ရှေ့မှဧကရာဇ်ရွှမ်ယွမ်ကို စိုက်ကြည့်နေသည်။

ငါ့ကိုအောက်ဘုံက အဲဒီလူသတ်ခဲ့ပေမဲ့ အရှင်သခင်က ငါ့ကိုနောက်ထပ် အခွင့်အရေးတစ်ခု ပေးခဲ့တယ်။

ဒါပေမဲ့ မင်းက ဒီလောက်ထိ နိမ့်ကျမသွားသင့်ဘူး။ လူသားမျိုးနွယ်က မင်းကိုဧကရာဇ်ဖြစ်ဖို့ အခွင့်အရေး ပေးခဲ့တယ် ကောင်းကင်တာအိုကလည်း မင်းရဲ့ အဆင့်အတန်းကို အသိအမှတ်ပြုခဲ့တယ်။

မင်းဟာ လူသားမျိုးနွယ်ရဲ့ တာဝန်တွေနဲ့ မျှော်လင့်ချက်တွေကို မျိုးဆက်တစ်ခုပြီးတစ်ခု ထမ်းပိုးခဲ့ပြီး လောကကြီးက ပေးသမျှကို ခံစားခဲ့တာလေ။

အခုတော့ မင်းက တာအိုကိုသစ္စာဖောက်လိုက်ပြီပေါ့။ အဝါရောင်ဧကရာဇ်သည် ချက်ချင်းပင် သူ၏ဧကရာဇ်လက်နက်ကို ထုတ်ကာ ကျွင်းရှဲ့ကို တည့်တည့်ချိန်လိုက်သည်။

လူသားမျိုးနွယ်အတွင်း အငြင်းပွားမှုတွေမှာ ငါမင်းဘက်က ရပ်တည်ပေးနိုင်ပေမဲ့ မဟာဧကရာဇ်တစ်ပါးရဲ့ ရပ်တည်ချက်နဲ့ ပတ်သက်လာရင်တော့ ငါမင်းကိုဘယ်တော့မှ ခွင့်မလွှတ်နိုင်ဘူး။

"အခုချက်ချင်း ထွက်သွားစမ်း မဟုတ်ရင် ငါအခြားမဟာဧကရာဇ်ရှစ်ပါးကိုဆင့်ခေါပြီး ဒီနေ့ပဲ မင်းကို သတ်ပစ်မယ်"

မဟာဧကရာဇ်သည် ကောင်းကင်နှင့် မြေကြီး၏ အလေးချိန်ကို ထမ်းပိုးထားပြီး လူသားမျိုးနွယ်၏ ကောင်းချီးများကို ခံစားနေသောကောင်းကင်တာအို၏ ကိုယ်စားလှယ်ဖြစ်သည်။

ယခုအခါ သူသည် လူသားမျိုးနွယ်ကို သစ္စာဖောက်ခဲ့ပြီဖြစ်ရာ မည်သည့်အကြောင်းကြောင့်ဖြစ်စေ လူတိုင်းတွင် သူ့ကို သတ်ပိုင်ခွင့်ရှိသည်။

ကျွင်းရှဲ့က လှောင်ပြုံးပြုံးကာ ရှေ့သို့ တစ်လှမ်းတိုးလိုက်ရာ ထိုအခိုက်အတန့်တွင် လောကကြီးတစ်ခုလုံး ပိတ်ဆို့သွားပြီး နောက်တစ်လှမ်းတွင်မူ အချိန်မြစ်ကိုပင် ရပ်တန့်သွားစေသည်။

လုံးဝ ရပ်တန့်သွားသည်ဟု မဆိုနိုင်ပေ ကောင်းကင်နှင့် မြေကြီးပင် အချိန်မြစ်၏ စီးဆင်းမှုကို မတားဆီးနိုင်ပါ။ ၎င်းသည် အဆမတန် နှေးကွေးသွားခြင်းသာ ဖြစ်သည်။

အမှောင်စွမ်းအင်များက ဧကရာဇ်ရွှမ်ယွမ်၏ ခန္ဓာကိုယ်ကို ချက်ချင်းပင် ဖုံးလွှမ်းသွားသည်။ သေခြင်းရနံ့များ ပျံ့နှံ့သွားပြီး သူ၏ ဧကရာဇ်အဆင့်ခွဲလက်နက်မှာ ဆက်တိုက် ဆွေးမြည့်သွားကာ နောက်ဆုံးတွင် ဝါးမြိုခံလိုက်ရပြီး မြေပြင်၏ အမှောင်မူလအရင်းအမြစ်အဖြစ် ပြောင်းလဲသွားသည်။

မဟာဧကရာဇ်ပင် အချိန်မြစ်ကို မလွှမ်းမိုးနိုင်ပါဘဲနှင့် ဤသူက

"မင်း ဘာတွေလုပ်လိုက်တာလဲ ဘယ်လိုလုပ်ဒီလောက် အစွမ်းထက်နေရတာလဲ" ကျွင်းရှဲ့က လှောင်ရယ်ရင်း သူ၏ပုခုံးကို ပုတ်လိုက်သည်။

အောက်ဘုံက အဲဒီသတ္တဝါတွေက ငါ့ရဲ့ ကျင့်ကြံသူမျိုးနွယ်စုကို စော်ကားပြီး ငါ့ကိုခြိမ်းခြောက်ခဲ့တယ်။ သူတို့က အင်အားကြီးရုံနဲ့ ငါတို့ကိုအနိုင်ကျင့်ခဲ့တာ။ ဒီလောကမှာ အဲဒီလိုစည်းမျဉ်းတွေဘယ်ရှိမလဲ။

"ကောင်းကင်နဲ့ မြေကြီးက ငါ့ဘက်မှာ မရှိမှတော့ ငါဘာလို့တခြားလမ်းကို မရှာနိုင်ရမှာလဲ"

ဒါတွေအားလုံးက အရှင်သခင်က ငါ့ကို ပေးသနားခဲ့တာပဲ။ အရှင်သခင့်ရဲ့တည်ရှိမှုက ငါ့ကိုသတ်ခဲ့တဲ့ ကျင့်ကြံသူထက် အဆပေါင်းများစွာ ပိုအစွမ်းထက်တယ်။ ဒါပေမဲ့ အရှင်သခင်က ဒီလောကရဲ့ အကာအကွယ် အတားအဆီးတွေကို ချိုးဖျက်ဖို့ အခွင့်အရေးတစ်ခုလိုအပ်နေတာ။

ကျွင်းရှဲ့သည် ချူနင်၏ သတ်ဖြတ်ခြင်းကို ခံခဲ့ရပြီး ခန္ဓာကိုယ်ကြေမွကာ မျိုးနွယ်စုလည်း ပျက်စီးခဲ့ရသည်။ သူ၏ ဝိညာဉ်မှာလည်း လုံးဝကြေမွသွားခဲ့သဖြင့် ပြန်လည်ရှင်သန်ရန် မဖြစ်နိုင်တော့ပေ။ သို့သော် ထိုမျှော်လင့်ချက်မဲ့နေသောအချိန်တွင် ကြီးမားလှသော စွမ်းအားတစ်ခုက သူ၏အနှစ်သာရ အကြွင်းအကျန်လေးတစ်ခုကို ကြားဖြတ် ဖမ်းယူနိုင်ခဲ့သည်။

သူ၏မူလအရင်းအမြစ်မပျက်စီးသရွေ့ သူသည်ပြန်လည်ရှင်သန်နိုင်သည် ထို့ကြောင့်ပင် သူသည် အခြားဧကရာဇ်များထက် ပိုမို အသက်ရှည်ခဲ့ခြင်း ဖြစ်သည်။

မဟာဧကရာဇ်ပင်ဤသို့ မလုပ်နိုင်ပေ။ သူသည် ဝေခွဲမရသောခံစားချက်ဖြင့် လမ်းညွှန်မှုနောက်သို့ လိုက်ပါရင်း တစ်ခါမျှ မရောက်ဖူးသော်လည်း ရှင်းရှင်းလင်းလင်း သိနေသည့် နေရာတစ်ခုသို့ ခြေချခဲ့သည်။

အမှောင်နယ်မြေ (အမှောင်ကပ်ဘေး၏ မြစ်ဖျားခံရာနေရာ)

ထိုနေရာတွင် မဟာဧကရာဇ်တို့ထက် သာလွန်သော ထိုအထွတ်အထိပ်ပုဂ္ဂိုလ်ကို သူ မြင်တွေ့ခဲ့ရသည်။ ထိုသူက ကျွင်းရှဲ့ကို ထာဝရရှင်သန်နိုင်သော စွမ်းအားကို ပေးသနားခဲ့ပြီး သူ၏အထွတ်အထိပ် စွမ်းအားများကို ပြန်လည်ရရှိစေကာ ရှေ့သို့ ဆက်လှမ်းနိုင်ရန် ကူညီပေးခဲ့သည်။

ယခုအခါ သူသည် ထိုအဆင့်ကို မြင်နိုင်နေပြီ ထိုအဆင့်ကိုမြင်နိုင်ခြင်းဆိုသည်မှာ သူ၏စွမ်းအားသည် နောက်ထပ် အဆင့်တစ်ခုသို့ တက်လှမ်းသွားပြီဟု ဆိုလိုခြင်းပင် သို့သော် အရှင်သခင်က သူသည် ချူနင်ကို ယှဉ်နိုင်ဦးမည် မဟုတ်သေးကြောင်း ပြောခဲ့သည်။

သို့သော် အရှင်သခင်ကမူ ယှဉ်နိုင်သည်။ ထို့ကြောင့်ပင် ကျွင်းရှဲ့ ဤနေရာသို့ လာခဲ့ခြင်းဖြစ်သည်။ သူ၏ အကြည့်မှာ ရှေ့မှအဝါရောင်ဧကရာဇ်ဆီသို့ ရောက်နေသည်။ ဧကရာဇ်ချင်း အတူတူပင် ဖြစ်သော်လည်း သူ၏ စွမ်းအားမှာ များစွာ သာလွန်နေပြီ အကယ်၍အခြားဧကရာဇ် ရှစ်ပါး ပူးပေါင်းလျှင်ပင် သူ့ကို အနိုင်ယူနိုင်လိမ့်မည် မဟုတ်ပေ။

သူ၏ စွမ်းအားကို မြင်လိုက်ရပြီးနောက် ဧကရာဇ်ရွှမ်ယွမ်သည် စိတ်ပျက်အားငယ်မှုများကိုသာ ခံစားလိုက်ရသည် ရှေ့မှအလောင်းကောင်ဧကရာဇ်သည် သူမကျဆုံးမီကထက်ပင် ပိုမို အစွမ်းထက်နေပါလား ဤအရာက ဘယ်လိုဖြစ်နိုင်မှာလဲ ပြီးတော့ဧကရာဇ်တစ်ပါးက ဘာကြောင့် အမှောင်ထုထဲ ကျဆင်းသွားရတာလဲ။

"ရွှမ်ယွမ် ငါ ဒီကိုလာတာ မင်းနဲ့ ရန်သူဖြစ်ဖို့ မဟုတ်ဘူး။"

သူက အေးစက်စက် အသံဖြင့် ညင်ညင်သာသာ ပြောလိုက်သည်။

"မင်း ငါ့ကိုတစ်ခုခုကူညီပေးဖို့ လိုတယ်။"

နှစ်ပေါင်းတစ်သိန်းမှာ တစ်ကြိမ်ကပ်ဘေးတစ်ခု ကျရောက်တတ်တယ် အဲဒီအချိန်မှာလောကရဲ့ သက်ရှိအားလုံး တစ်ဦးပြီးတစ်ဦး သေဆုံးကြရပြီး အသစ်တဖန် ပြန်လည်မွေးဖွားကြရတယ်။ ဒါက နှစ်ပေါင်းများစွာ ရှိခဲ့တဲ့ အစဉ်အလာပဲ မဟာဧကရာဇ်ဟာ ကောင်းကင်တာအိုရဲ့ ကိုယ်စားလှယ်ဖြစ်တဲ့အတွက် ပထမဆုံး သေဆုံးရသူ ဖြစ်တတ်တယ်။

ဒါပေမဲ့ ကျင့်ကြံသူတွေအနေနဲ့ ငါတို့ဟာ ကောင်းကင်ကို ဆန့်ကျင်နေကြတာပဲ ဒါကြောင့် ပိုပြီးအစွမ်းထက်တဲ့ နယ်ပယ်ကို သဘာဝကျကျပဲ လိုလားကြရမယ်။

ကောင်းကင်ရဲ့အလိုဆန္ဒအတွက် ငါတို့ဘာလို့အလကား သေပေးရမှာလဲ ပိုမြင့်တဲ့နယ်ပယ်ကို ဘာလို့ မတက်လှမ်းနိုင်ရမှာလဲ မဟာဧကရာဇ်ဖြစ်လာပြီးနောက်မှာ မင်းရဲ့ စွမ်းအားက ရှေ့ဆက် တိုးတက်လာခဲ့လို့လား။

အဝါရောင်ဧကရာဇ်၏ အကြည့်မှာ စူးရှသွားပြီး သူ နှုတ်ဆိတ်သွားသည်။

ဘာလို့လဲဆိုတော့ မဟာဧကရာဇ်ဟာ ရှေ့ဆက်တိုးတက်နိုင်စွမ်း မရှိလို့ပဲ ကောင်းကင်တာအိုက သူ့ထက်သာလွန်တဲ့ တည်ရှိမှုကို ပေါ်ထွက်ခွင့်မပေးဘူး။ ကောင်းကင်တာအိုရဲ့ ပြောရေးဆိုခွင့်ရှိသူ အနေနဲ့ မင်းဟာ ကောင်းကင်တာအိုရဲ့ အောက်မှာပဲ ဖိနှိပ်ခံထားရတာ။ အမှောင်ကပ်ဘေး ရောက်လာတဲ့အခါ မင်းဟာ ဒီလို ပုရွက်ဆိတ်တွေအတွက်နဲ့ သေဆုံးရလိမ့်မယ်။

"ဒါပေမဲ့ လူသားမျိုးနွယ်ရဲ့ မဟာဧကရာဇ် တစ်ဦးအနေနဲ့ ငါကတော့"

ကျွင်းရှဲ့က လှောင်ရယ်လိုက်သည်။ အပိုတွေပါ အဲဒီအရင်းအမြစ်တွေအားလုံးက ငါတို့ နှစ်ပေါင်းများစွာ ကြိုးစားကျင့်ကြံပြီး ရလာတာတွေပဲ။ ဒီပုရွက်ဆိတ်တွေနဲ့ ဘာဆိုင်လို့လဲ။

"လောကမှာ ရှိသမျှ အရာအားလုံးဟာ အားကြီးတဲ့သူတွေပဲ ပိုင်ဆိုင်သင့်တယ် အားကြီးတဲ့သူတွေက ဘာလို့ ဒီပုရွက်ဆိတ်တွေကို ကာကွယ်ပေးနေရမှာလဲ"

"မင်း ပိုမြင့်တဲ့ နယ်ပယ်ကို မတောင့်တဘူးလား"

"စစ်မှန်တဲ့ ထာဝရရှင်သန်ခြင်းကို မလိုချင်ဘူးလား"

"ငါ့ရဲ့ စွမ်းရည်တွေနဲ့ဆိုရင် မင်းအတွက် ဘာလိုနေသေးလို့လဲ"

အဝါရောင်ဧကရာဇ်၏ မျက်နှာမှာ ရှုပ်ထွေးနေသည်။ ရှေ့မှ အလောင်းကောင် ဧကရာဇ်ကို ကြည့်ရင်း သူ၏ နှလုံးသားမှာ တုန်လှုပ်နေမိသည်။ သို့သော် ထိုအချိန်တွင် မဟာဧကရာဇ်၏ နယ်မြေမှာ ရုတ်တရက် တုန်ခါလာသည်။

"ရွှမ်ယွမ် အပြင်ကို ထွက်ခဲ့စမ်း"

"မင်းရဲ့ နယ်မြေထဲမှာ ပုန်းနေတဲ့ တစ်ခုခုကို ငါခြေရာခံမိတယ် မင်း တွေ့ပြီလား"

ကျွင်းရှဲ့က ရုတ်တရက် လှောင်ရယ်လိုက်သည်။ စိတ်မပူနဲ့ သူ ငါ့ကိုခြေရာမခံနိုင်ပါဘူး ငါကဒီလောကရဲ့ ဥပဒေသတွေထဲမှာမရှိတော့ဘူးကောင်းကင်တာအိုတောင် ငါ့ကိုမသိနိုင်ဘူး။ အဲဒီလူတောင် ငါ့ကို ရှာမတွေ့နိုင်ဘူး။

"ဒါပေမဲ့ ငါဒါကို တစ်ခါပဲ ပြောမယ် အတိတ်က ဧကရာဇ်တွေလိုပဲ ဒီအောက်တန်းစား ပုရွက်ဆိတ်တွေအတွက် သေပေးမလား ဒါမှမဟုတ် စစ်မှန်တဲ့ထာဝရရှင်သန်ခြင်းနဲ့ ပိုအစွမ်းထက်တဲ့ နယ်ပယ်ကို လျှောက်လှမ်းမလား။

"ဒါက မင်းရဲ့ ဆုံးဖြတ်ချက်ပဲ"

ထိုအချိန်တွင် မဟာဧကရာဇ်၏ တာအိုကျောင်းဆောင် အပြင်ဘက်၌ စုတိန်ဖန်းသည် ထိုနေရာကို လုံးဝ ပိတ်ဆို့ထားပြီး ဟင်းလင်းပြင်ထဲသို့ ဝင်ရောက်လာရာ ကျင့်ကြံသူ အများအပြားလည်း ကောင်းကင်သို့ ပျံတက်လာကြသည်။

ဟင်းလင်းပြင်ဧကရာဇ် ခင်ဗျား ဘာလုပ်တာလဲ ဒါကကျွန်တော်တို့ ဧကရာဇ်ရွှမ်ယွမ်ရဲ့ တာအိုကျောင်းဆောင်လေ။

စုတိန်ဖန်းသည် အောက်မှ လူများကို အေးစက်စွာ ကြည့်ရင်း ကျယ်လောင်စွာ ပြောလိုက်သည်။ ငါ ဒီနေ့ ကိစ္စတစ်ခုကို လာစုံစမ်းတာ။ တစ်ယောက်ယောက်က ဆူဆူညံညံ လုပ်ရဲရင် အသေပဲ။

"ဧကရာဇ်ရဲ့ နယ်မြေထဲမှာ ခင်ဗျားက ငါတို့ကို သတ်ရဲတယ်ပေါ့သတ္တိရှိလှချည်လား"

ဖွတ်

စကားပြောလိုက်သော ကျင့်ကြံသူမှာ ထိုနေရာတင် ပြင်းထန်စွာ ဒဏ်ရာရသွားသည်။ စုတိန်ဖန်းက အေးစက်စွာ ပြောလိုက်သည်။ မင်းတို့ရဲ့ ဧကရာဇ်ကို ထွက်လာခိုင်းလိုက် ငါနဲ့အတူ ဒီကိစ္စကို စုံစမ်းရမယ်။ ဒါက လူသားမျိုးနွယ် တစ်ရပ်လုံးရဲ့ ဘေးကင်းလုံခြုံရေးနဲ့ ပတ်သက်နေတယ်။

ထိုအရာသည် ချန်းရှန်းဧကရာဇ်၏တည်ရှိမှု ဖြစ်နိုင်သည်ဟု သူ တွေးနေမိသည်။ စီနီယာက ဂရုမစိုက်နိုင်သော်လည်း သူကမူဂရုစိုက်ရမည်။ အဘယ်ကြောင့်ဆိုသော် ထိုအရာမှာ အလွန်ထူးဆန်းပြီး ဤနယ်ပယ်၏အပြင်ဘက်မှ လာသောကြောင့်ပင်။

"စုတိန်ဖန်း"

လှံရှည်တစ်စင်းမှာ ရုတ်တရက် ထိုးထွက်လာသည်။

"ငါ့နယ်မြေထဲမှာ လူကို ဒဏ်ရာရအောင် လုပ်ရဲတယ်ပေါ့"