အခန်း ၁၁၉ ငါ့ယောင်္ကျားကသိပ်တော်တာပဲ

နောက်ရက်များမှာ အေးချမ်းပြီး ပြည့်စုံလှသည်။

ရဲချန်းလျန်က ကလေးပြုစုပြီး ချူနင်ကတော့ ကလေးကို ချော့မြူကစားပေးသည်။ ထိုက်ရွှမ်းမြင့်မြတ်နယ်မြေမှ ကျင့်ကြံသူများသည်လည်း တာအိုအဆင့်သို့ အဆက်မပြတ် အဆင့်တက်လှမ်းနိုင်ခဲ့ကြရာ ယခုအခါ ထိုသို့သော ကျင့်ကြံသူသုံးဦးအထိ ရှိလာပြီဖြစ်သည်။

နေရာအနှံ့အပြားတွင် ပါရမီထူးချွန်သော ကျင့်ကြံသူသစ်များကို ရှာဖွေတွေ့ရှိခြင်း ဝိညာဉ်ကျောက်တုံးမှော်တွင်းသစ်များ ပေါ်ထွက်လာခြင်းတို့နှင့်အတူ ပြီးခဲ့သည့် ဆောင်းရာသီ၏ နှင်းထုများကြားတွင် တာချန်းအင်ပါယာအတွင်း၌ ကောင်းသောကိစ္စအဝဝတို့သာ ဖြစ်ထွန်းနေတော့သည်။

ခုနစ်ရက် ကြာပြီးနောက် ရဲချန်းလျန်သည် နဂါးဝတ်ရုံကို ပြန်လည် ဝတ်ဆင်လိုက်ပြီဖြစ်သည်။

"ချူနင် အင်ပါယာရဲ့ အရေးအရာတွေကိုတော့ ငါပဲ ကိုင်တွယ်တော့မယ်။

"ကလေးထိန်းဖို့ကတော့ နင်တာဝန်ပဲနော်"

သူမ၏ မျက်ဝန်းထဲတွင် ကြီးမားသော ရည်မှန်းချက်များဖြင့် ပြည့်နှက်နေသည်။ ကျင့်ကြံခြင်း၊ နယ်မြေစည်းလုံးခြင်းနှင့် တစ်နိုင်ငံလုံး အထက်ဘုံသို့တက်လှမ်းနိုင်ရန် ကြိုးပမ်းပြီး ပိုမိုကျယ်ပြောသော ကမ္ဘာသစ်ကို လိုက်လံရှာဖွေရန်ပင်။

ပုခက်ထဲရှိ ယောင်ယောင်လေးမှာ ရဲချန်းလျန်၏ စကားကို ကြားသည်နှင့် ငြိမ်မနေတော့ဘဲ လက်ကလေးများကို ဝှေ့ယမ်းကာ လှုပ်ရှားလာတော့သည်။ အကယ်၍ မေမေသာ ထွက်သွားလျှင် သူမ စားစရာ (နို့) မရှိတော့မှာကို စိုးရိမ်နေပုံရသည်။

ရဲချန်းလျန်သည် ထိုလှုပ်ရှားမှုကို မြင်သည်နှင့် သူမ၏ ဧကရာဇ်အရှိန်အဝါများ ချက်ချင်းပျောက်ကွယ်သွားပြီး ကလေးနားသို့ အပြေးအလွှားသွားကာ ချော့မြူလိုက်သည်။

မေမေက ကိစ္စလေးတွေ သွားရှင်းမလို့ပါ။ သမီးလေး ဗိုက်ဆာရင် ဖေဖေက မေမေ့ဆီ ခေါ်လာလိမ့်မယ်။ အခုတော့ ဖေဖေနဲ့အတူတူ ဆော့နေနော် ဟုတ်ပြီလား။

ထိုအခါမှ ကလေးမလေးမှာ ပါးစပ်လေးဟကာ တခစ်ခစ်နှင့် သဘောကျရယ်မောတော့သည်။ ရဲချန်းလျန်က မတ်တပ်ရပ်ပြီး သက်ပြင်းချကာ မတတ်သာဘဲ ညည်းညူလိုက်သည်။

သူက ငါထွက်သွားမှာကို ကြောက်နေတာ မဟုတ်ဘူး စားစရာမရှိမှာကို ကြောက်နေတာ။ ဖေဖေနဲ့ ဆော့ရမယ်ဆိုတော့မှ ပျော်သွားတာ ကြည့်ဦး။

ဒါပေမဲ့ ဒီမွေးရာပါ အစွန်းရောက်သူတော်စင်ခန္ဓာက တကယ်ကို ထူးခြားတာပဲ။ မွေးပြီး ခုနစ်ရက်ပဲ ရှိသေးတာကို ငါပြောတာတွေကို နားလည်နေပြီလား။ ချူနင်က တခစ်ခစ် ရယ်မောရင်း ပုခက်ဘေးမှာ ဆောင့်ကြောင့်ထိုင်ကာ ကလေးကို ကစားပေးနေသည်။

ဒါကပုံမှန်ပါပဲ နောက်တစ်နှစ်ဆိုရင် သူကမင်းနဲ့ ပုံမှန်အတိုင်း စကားပြောနိုင်လိမ့်မယ်။ အဲဒီအချိန်ကျရင် ပိုပျော်ဖို့ကောင်းမှာ စောင့်ကြည့်နေလိုက်။ ရဲချန်းလျန်က ခေါင်းညိတ်လိုက်သည်။

"ဟုတ်တာပေါ့"

ဒါဆို ငါမင်းတက်နန်းဆောင်ကို သွားတော့မယ်။ ကလေးကိစ္စကလွဲရင် မလာခဲ့နဲ့ဦး။ အရှင်မဘာသာ ကိုယ်တိုင် ကိုင်တွယ်ကြည့်မယ် ဒီအရှင်မ လုပ်နိုင်ပါတယ်။

"ဟုတ်ပါပြီဗျာ ဟုတ်ပါပြီ"

ထိုအခါမှ ရဲချန်းလျန်သည် ကျေနပ်စွာဖြင့် ထွက်ခွာသွားတော့သည်။ သူမသည် ရှောင်ပင်းနှင့်အတူ မင်းတက်နန်းဆောင်သို့ သွားလိုက်သည်။

ယနေ့တွင် ညီလာခံ မရှိသော်လည်း သူမ ကိုယ်တိုင်လုပ်စရာရှိသည်များကို တစ်ခုချင်း ကိုင်တွယ်ရမည်ဖြစ်သည်။

ဝတ္တရားများကို မကိုင်တွယ်ရသည်မှာ နီးပါး တစ်နှစ်ခွဲခန့် ရှိပြီဖြစ်ရာ အနည်းငယ်တော့ လက်ယဉ်မှု မရှိတော့ပေ။ အမတ်ချုပ်ကြီးချူးသည် ယနေ့ ဆောင်ရွက်ရန်ရှိသော အစီရင်ခံစာအချို့ကို ကိုယ်တိုင် လာရောက် ပို့ဆောင်သည်။ သူ နန်းဆောင်ထဲသို့ ဝင်လာပြီး ချူနင်အစား ရဲချန်းလျန်ကို မြင်လိုက်ရသောအခါ အနည်းငယ် အံ့အားသင့်သွားသည်။

သူ နည်းနည်းတော့ မနေတတ်သလို ဖြစ်သွားသည်။ ဧကရာဇ် (ချူနင်) မဟုတ်ဘူးလား အရှင်မရဲ့ ခန္ဓာကိုယ်က ပြန်ကျန်းမာလာပြီလား။

အမတ်ချုပ်ကြီးချူး အဲဒီအကြည့်က ဘာကို ဆိုလိုတာလဲ။ ရဲချန်းလျန်က အနည်းငယ် စိတ်မကြည်သလို မေးလိုက်သည်။ ချူနင် မဟုတ်လို့ မင်းကသိပ်မကျေနပ်ဘူးပေါ့ ဟုတ်လား။

"ချူနင်က အနောက်မှာ ကလေးထိန်းနေတယ် အဲဒါ သူလုပ်ရမယ့် အလုပ်လေ"

အမတ်ချုပ်ကြီးချူးက အနေခက်စွာ ပြုံးလိုက်ပြီး ခေါင်းယမ်းပြသည်။

ဒီအမှုထမ်းဟောင်းကြီးက အရှင်မဒီလောက်မြန်မြန် ပြန်ကျန်းမာလာတာကို မြင်ရလို့ အံ့သြသွားတာပါ။ အရှင်မညီလာခံကို ပြန်လည် အုပ်ချုပ်နိုင်တာကို ဂုဏ်ယူဝမ်းမြောက်မိပါတယ်။

သူတို့နှစ်ဦး အာဏာလုကြမှာကိုတော့ သူစိုးရိမ်စရာ မရှိပါ။ လွန်ခဲ့သည့် ရက်အနည်းငယ်က ဧကရာဇ် (ချူနင်) သည် ပြဿနာရှာသူသုံးဦးကို အလွယ်တကူ သတ်ပစ်ခဲ့သည်။

သူ၏ အစွမ်းဖြင့်ဆိုလျှင် ဤအာဏာဆိုသည်ကို သူလုံးဝဂရုစိုက်မည် မဟုတ်ပါ။ သူသည် အရှင်မအတွက်သာ စဉ်းစားပေးပြီး ဝန်ထုပ်ဝန်ပိုးများကို ကူညီထမ်းပိုးပေးနေခြင်း ဖြစ်သည်။

ယခု အရှင်မကျန်းမာလာပြီဖြစ်ရာ အာဏာကိုပြန်လည် လွှဲပြောင်းပေးခြင်းမှာ ချူနင်ကဲ့သို့သော လူမျိုးသာ လုပ်မည့် အပြုအမူဖြစ်သည်။ ထိုသို့သော ဧကရာဇ်မျိုးက အမတ်ချုပ်ကြီးချူးကဲ့သို့သော အဘိုးကြီး၏ စိတ်ကိုပင် လှုပ်ခတ်စေသည်။ အကယ်၍ သူသာ မိန်းမတစ်ယောက် ဖြစ်ခဲ့လျှင် သေချာပေါက်။

မဟုတ်ဘူး မဟုတ်ဘူး။ သူအတွေးချော်သွားပြီ။

အမတ်ချုပ်ကြီးချူးက ပြုံးလျက် အရှင်မကိုယ်တိုင် မအုပ်ချုပ်တာ နီးပါး တစ်နှစ်ခွဲ ရှိပြီဆိုတော့ ဒီကာလအတွင်းမှာ ဧကရာဇ် (ချူနင်) ကိုင်တွယ်ခဲ့တဲ့ ကိစ္စအချို့ကို ဒီအမှုထမ်းက ယူလာခဲ့ပါတယ်။

အရှင်မ အရင်ဖတ်ကြည့်ပြီးမှ အသစ်တွေကို ကိုင်တွယ်ရင် ပိုကောင်းမယ် ထင်ပါတယ်။ သူသည် ရဲချန်းလျန်အတွက် တကယ် စေတနာဖြင့် စဉ်းစားပေးခြင်း ဖြစ်သည်။

အကြောင်းမှာ ချူနင် ဤကာလအတွင်း ဘာတွေလုပ်ခဲ့သည်ကို ရဲချန်းလျန် အကုန်သိ မသိ သူ မသေချာသောကြောင့်ဖြစ်သည်။ အချို့သော ကိစ္စများမှာ အကြောင်းရင်းနှင့် ရလဒ်ကို ရှင်းရှင်းလင်းလင်း မသိဘဲ ကိုင်တွယ်လျှင် မှားယွင်းသွားနိုင်သောကြောင့် ဖြစ်သည်။

ရဲချန်းလျန်က ငြင်းဆန်ခြင်း မပြုဘဲ အမတ်ချုပ်ကြီးချူးက အစီရင်ခံစာ တစ်ရာကျော်ကို ယူလာပေးသည်။

ဒါတွေကတော့ ဧကရာဇ် (ချူနင်) ကိုင်တွယ်ခဲ့တဲ့ အရေးကြီးတဲ့ အစိုးရရေးရာတွေပါ။

နယ်စပ်စစ်ရေး ကျင့်ကြံသူများဖွံ့ဖြိုးတိုးတက်ရေး ပြည်သူများပြန်လည်နေရာချထားရေး စတဲ့ ကိစ္စရပ်ပေါင်း တစ်ရာကျော်ပါဝင်ပါတယ်။

အရှင်မအရင် လေ့လာကြည့်ပါ။ မရှင်းလင်းတာရှိရင် ဒီအမှုထမ်းက ရှင်းပြပေးပါ့မယ်။ ပုံမှန်အားဖြင့်ဆိုလျှင် ဧကရာဇ်တစ်ပါးက မိမိတိုင်းပြည်ရဲ့ အရေးအရာတွေကို မသိတာမျိုး မရှိသင့်ပါ။ 

သို့သော် အရှင်မမှာ ကိုယ်ဝန်ဆောင်ပြီး နားနေရသောကြောင့် ချူနင်ကို လုံးဝယုံကြည်ပြီး လွှဲထားခဲ့ခြင်း ဖြစ်သည်။ အကယ်၍ ချူနင်သာ အာဏာလုချင်လျှင် ရဲချန်းလျန်မှာ ဘေးရောက်နေပြီဖြစ်သည်။

သို့သော် ယခုအခါ အင်ပါယာ၏ ယန္တရားတစ်ခုလုံးမှာ လုံးဝ ပုံမှန်အတိုင်း လည်ပတ်နေပြီဖြစ်သည်။

အပေါ်ဆုံးက အုပ်ချုပ်သူ ဘယ်သူလဲဆိုတာက အရေးမကြီးတော့ပါ။ ကိစ္စသေးလေးများကို နန်းတွင်းအကြံပေးအဖွဲ့က ကိုင်တွယ်သည်။ ရာထူးတိုးခြင်းနှင့် ကျင့်ကြံသူ အဆင့်သတ်မှတ်ခြင်းများကိုလည်း နန်းတွင်းအကြံပေးအဖွဲ့က စစ်ဆေးပြီးမှ စာရင်းတင်ပြသည်။

ဤကဲ့သို့သော နိုင်ငံရေးစနစ်မျိုးသည် ဧကရာဇ်မရှိလျှင်ပင် လည်ပတ်နိုင်စွမ်း ရှိသည်။ အားနည်းချက်မှာ အဂတိလိုက်စားမှု ဖြစ်နိုင်ခြေရှိခြင်းဖြစ်သော်လည်း ၎င်းကိုချူနင်က ရဲချန်းလျန်ကို ကြိုတင် ပြောပြဖူးသည်။ သို့သော် တာချန်းအင်ပါယာအတွက်တော့ စိုးရိမ်စရာ မရှိပါ။ အကြောင်းမှာ အုပ်ချုပ်သူများမှာ ကျင့်ကြံသူများ ဖြစ်ကြသည်။

မင်းအဂတိလိုက်စားရဲလား ပုန်ကန်ရဲလား အဲဒီလိုအတွေးလေး စိုးစဉ်းမျှရှိရဲလား။ ဒါဆိုရင်တော့ မင်း သေတွင်းတူးတာပဲ။ ရဲချန်းလျန်သည် အုပ်ချုပ်ရေးနှင့် အလှမ်းဝေးနေသည်မှာ ကြာပြီဖြစ်၍ အချို့အချက်များကို မေးမြန်းကြည့်သည်။

"ဒီနယ်စပ်ဒေသက ကျင့်ကြံသူ အရင်းအမြစ်တွေကို ဘာလို့ ပြောင်းရွှေ့လိုက်တာလဲ"

အဖြေကတော့ ပြီးခဲ့တဲ့ ဆောင်းရာသီမှာ အိမ်နီးချင်း လော့ချန်းအင်ပါယာက ကျွန်တော်တို့ရဲ့ နှင်းတွေကို ခဏခဏ ခိုးယူခဲ့ပါတယ်။ နယ်စပ်စောင့်ကျင့်ကြံသူ ဖန်းဟောက်ရန်တစ်ယောက်တည်း မခုခံနိုင်တာကြောင့် စစ်ကူတောင်းခဲ့တာပါ။ ဒါကြောင့် ကျင့်ကြံသူသုံးထောင်ကို စေလွှတ်ခဲ့ပြီး ဒီအရင်းအမြစ်တွေက အဲဒီအတွက် သုံးတာပါ။

"နှင်းခိုးတယ် တိုင်းပြည်ရဲ့ ကံကြမ္မာကို ကိုယ်စားပြုတဲ့ နှင်းတွေလား"

"မှန်ပါတယ် အရှင်မ"

အင်း ဒါဆိုဒါကရော အင်ပါယာအတွင်းက ဂိုဏ်းအားလုံးကို အစိုးရလက်အောက်ခံအဖြစ် သွတ်သွင်းတာလား။ ဒါက သူတို့ကိုဝိညာဉ်ကျောက်တုံး အရင်းအမြစ်တွေ ပေးရမှာမဟုတ်လား အဲဒီအစား ပါရမီရှင်ကျင့်ကြံသူတွေကိုပဲ တိုက်ရိုက်ရွေးချယ်ပြီး အမှုထမ်းခန့်လိုက်တာက ပိုမလွယ်ဘူးလား။

ဧကရာဇ် (ချူနင်) ပြောခဲ့တာကတော့ အရင်းအမြစ်ဆိုတာ အသေးအဖွဲပါ အင်ပါယာရဲ့ အရေးအရာတွေကသာ အဓိကပါ။ ဒီဂိုဏ်းတွေကို ပေါင်းစည်းလိုက်ခြင်းကတစ်ဖက်မှာ တာချန်းရဲ့ အင်အားကို တိုးစေသလို နောက်တစ်ဖက်မှာလည်း သူတို့ကိုအကျိုးခံစားခွင့်တွေပေးပြီး သစ္စာရှိအောင် လုပ်နိုင်ပါတယ်။

အခုဆိုရင် အဲဒီပြင်ပဂိုဏ်းတွေက သူတို့နယ်မြေထဲက ဝိညာဉ်ကျောက်တုံးတွေကို ခိုးဝှက်ခြင်းမရှိဘဲ အင်ပါယာဆီ အကုန်ပို့ကြပါတယ်။ ဒါဟာအင်ပါယာက သူတို့ကို မိသားစုဝင်လို သဘောထားပြီး ကျင့်စဉ်တွေ အရင်းအမြစ်တွေ ပံ့ပိုးပေးထားလို့ပဲဖြစ်ပါတယ် အရှင်မ။

ရဲချန်းလျန် မျက်လုံးလေး မှေးလိုက်သည်။ အကျိုးအကြောင်း ခိုင်လုံလှသည်။ သူမသည် အခြားသော ကိစ္စရပ်များစွာကို ထပ်မေးကြည့်ရာ အရာအားလုံးက ရှင်းလင်းသွားတော့သည်။ ကောင်းတယ် တကယ်ကို ကောင်းလွန်းတယ်။

သူမမရှိတဲ့ တစ်နှစ်ခွဲအတွင်းမှာ ဧကရာဇ်(ချူနင်)ရဲ့ နာမည်က တစ်ကမ္ဘာလုံးကို ပျံ့နှံ့နေပြီဖြစ်သည်။

တိုင်းပြည်ရဲ့ ဘဏ္ဍာရေး၊ တည်ဆောက်ရေး၊ အုပ်ချုပ်ရေးနှင့် ကျင့်ကြံသူများအတွက် ထောက်ပံ့ကြေးစနစ် စသည်တို့ကို ချူနင်က ကိုယ်တိုင် စနစ်တကျ ပြင်ဆင်ပေးခဲ့သည်။ စာပေတင်မကဘဲ အတတ်ပညာမျိုးစုံကို အခြေခံသည့် စာမေးပွဲစနစ်သစ်ကိုတောင် သူမိတ်ဆက်ပေးခဲ့သေးသည်။

ဒေသအသီးသီးတွင် ကျင့်ကြံသူလေ့ကျင့်ရေးကျောင်းများကို တည်ထောင်ခဲ့သည်။ ပါရမီရှင်တစ်ယောက်ကို ရှာတွေ့လျှင်ဖြစ်စေ သတင်းပေးလျှင်ဖြစ်စေ ရွှေ၊ ငွေ၊ ရာထူး သို့မဟုတ် ကျင့်ကြံခြင်း အရင်းအမြစ်များဖြင့် ဆုချသည်။ ထို့ကြောင့် နှစ်စဉ်ရှာဖွေတွေ့ရှိရသော ပါရမီရှင် အရေအတွက်မှာ အံ့သြစရာကောင်းလောက်အောင် တိုးတက်လာခဲ့သည်။

သူသည် ကိစ္စအဝဝကို အသေးစိတ် ကိုင်တွယ်ပေးခဲ့သည်။ ဒါပေမဲ့ ချူနင်က နန်းဆောင်ကို ပြန်လာတဲ့အခါတိုင်း ဘာမှမဖြစ်သလို ပေါ့ပေါ့ပါးပါးပဲနေခဲ့ပြီး သူမနဲ့ ကလေးကိုပဲ အမြဲ ဂရုစိုက်ပေးခဲ့တာ မဟုတ်လား။

သူမ တိုင်းပြည်ကို စီမံခန့်ခွဲပေးဖို့ ဒီလောက်အထိ ကြိုးစားပေးခဲ့တာတောင်မှ သူမကိုလည်း လိုလေသေးမရှိ ပြုစုပေးခဲ့သည်။ ကိုယ်ဝန်ဆောင်နေစဉ်အတွင်း သူမက ချူနင်ကို ခဏခဏဂျီကျခဲ့သည် အနားက မခွာခိုင်းခဲ့ဘူး ငိုယိုပြီးချော့ခိုင်းခဲ့သည်။ ဒါတောင်မှ ချူနင်က တစ်ခွန်းတည်းသော ညည်းညူသံတောင် မထုတ်ခဲ့ဘူးလား။

ချူနင်အပေါ် အကြွေးတင်နေပြီဟု ခံစားနေရသော ရဲချန်းလျန်သည် ပြီးခဲ့သည့် ခြောက်လအတွင်း ချူနင် လုပ်ဆောင်ပေးခဲ့သည်များကို သိလိုက်ရသောအခါ ရင်ထဲတွင် လှိုက်တက်လာတော့သည်။ သူမ၏ မျက်ဝန်းများ နီမြန်းလာပြီး အမတ်ချုပ်ကြီးချူးကို ပြန်လွှတ်ပြီးနောက် မအောင့်နိုင်ဘဲ မျက်ရည်များကို ခိုးသုတ်လိုက်မိသည်။

ချူနင်ကိုတော့ သူမအမြင်မခံနိုင်ပါ။ သူက သူမအပေါ် ဒီလောက်ထိ ကောင်းပေးနေတာ သူမ ရုတ်တရက် ငိုနေတာကို မြင်ရင် ချူနင် စိုးရိမ်သွားလိမ့်မည်။

ဤအရာများမှာ မူလကသူမ၏ တာဝန်များသာ ဖြစ်သည်။ သူမသည် တိုးတိုးတိတ်တိတ် ငိုပြီးနောက် ထိုအစီရင်ခံစာများကို ထပ်ခါထပ်ခါ ပြန်လည်လေ့လာပြီး ချူနင်၏ အုပ်ချုပ်ပုံ အတတ်ပညာကို နားလည်အောင် ကြိုးစားသည်။

သူ့ရဲ့ နည်းလမ်းတွေက သိပ်ကိုပါးနပ်လွန်းသည်။ သူက ဧကရာဇ်တစ်ခါမှ မလုပ်ဖူးသော်လည်း သူမထက် အဆပေါင်းများစွာ ပိုတော်နေသည်။ ဤမျှ ထူးချွန်သော ပါရမီနှင့် အစွမ်းရှိပါလျက်နှင့် သူမအနားမှာပဲ နေပေးခဲ့သည်။

သူမ၏ နှလုံးသားမှာ နက်နက်ရှိုင်းရှိုင်း လှုပ်ခတ်သွားသည်။ ချူနင်ကို ပြေးဖက်ပြီး ဒီစကားတွေကို မျက်နှာချင်းဆိုင် ပြောပြချင်မိသည်။

သို့သော် ယခုက ထိုသို့လုပ်ရမည့်အချိန် မဟုတ်သေးပါ။ ညဘက်ကျမှ သူမ ပြောပြပါမည်။ ယခုတော့ သူမ အရာအားလုံးကို ပြန်လည် တာဝန်ယူရမည့် အလှည့်ဖြစ်သည်။ ချူနင်ကတော့ ကလေးလေးကိုပဲ အေးအေးဆေးဆေး ပြုစုစောင့်ရှောက်ပါစေ ကျန်တာတွေကို သူမ ကိုင်တွယ်ပါ့မည်။