အခန်း ၁၁၄ မင်းကို ငါ့ရှေ့မှာ ဒီလိုစကားမျိုးပြောဖို့ ဘယ်သူက သတ္တိပေးလိုက်တာလဲ

ထိုစဉ် နန်းတော်မဟာရင်ပြင်အတွင်း၌ လေထုမှာ သတ်ဖြတ်ခြင်းအငွေ့အသက်များဖြင့် ဖုံးလွှမ်းနေသည်။ အမင်ချူပ်ကြီးချူးမရောက်လာခင်ကတည်းက ကူယွမ်ကို ဤလူများ၏ နောက်ခံအကြောင်း မေးမြန်းထားခဲ့ပြီးဖြစ်သည်။

ကူယွမ်၏ အဖြေမှာ ရိုးရှင်းပါသည်။ သူတို့၏ အစွမ်းမှာ ကောင်းကင်ယံအထိ ရှိသည်။

သူလုံးဝ ခန့်မှန်း၍မရသော ပုဂ္ဂိုလ်များဖြစ်ပြီး အထက်ဘုံ၏အနန္တဂိုဏ်းတစ်ခုဖြစ်သော နတ်ဘုရားတိမ်တိုက် ဂိုဏ်း၏ ဂိုဏ်းချုပ်ဟု ဆိုခြင်းကြောင့် အနည်းဆုံး ဧကရာဇ်တစ်ပိုင်းအဆင့် ဖြစ်ရမည်။

သူသည် ဧကရာဇ်တစ်ပိုင်းဆိုသည့် အဆင့်ကို သေချာနားမလည်သော်လည်း အနန္တဂိုဏ်းဆိုသည့် အဓိပ္ပာယ်ကိုတော့ သိသည်။ ဧကရာဇ်ဆိုသည့် စကားလုံးနှင့် ပတ်သက်လာလျှင် မည်သူမျှ အလွယ်တကူ ဆော့ကစား၍ မရနိုင်ပါ။

တစ်ဖက်လူ၏ ရည်ရွယ်ချက်မှာ မွေးရာပါ အစွန်းရောက်သူတော်စင်ခန္ဓာပိုင်ဆိုင်သည့် မင်းသမီးလေး နှစ်ပါးကို တပည့်အဖြစ် ခေါ်ယူရန် ဖြစ်သည်။ သို့သော် သူတို့၏ လေသံမှာ ရိုင်းပျလှပြီး မရိုးသားသည့် ရည်ရွယ်ချက်ရှိနေသည်မှာ သိသာလှသည်။

တကယ်တမ်း တပည့်အဖြစ်လက်ခံချင်လျှင် တပည့်လောင်း၏ မိသားစုနောက်ခံမှာ မည်မျှပင် နိမ့်ပါးပါစေ အနည်းဆုံးတော့ လေးစားမှုပြရမည်ဖြစ်သည်။ သို့သော် ဤအဘိုးကြီး သုံးယောက်မှာ လေးစားမှု လုံးဝမရှိပါ။ ထို့ကြောင့် ကူယွမ်က ချူနင်ကို အမြန်အကြောင်းကြားခိုင်းလိုက်ခြင်း ဖြစ်သည်။

ချူနင်သည် အဆင့်ကျော်ဖြတ် တိုက်ခိုက်နိုင်စွမ်းရှိပြီး နဂါးစစ်စစ်ကို သတ်ဖြတ်ခဲ့သည်ကို သူ မြင်ဖူးသော်လည်း ယခုရှေ့က အဘိုးကြီးများကို ယှဉ်နိုင်မလားဆိုသည်ကိုတော့ သူ မဝေခွဲနိုင်ပါ။

ထို့ကြောင့် ရှောင်ပင်းကို အမှာပါးလိုက်သည်မှာ တစ်ဖက်လူမှာ အထက်ဘုံမှဖြစ်ပြီး နောက်ခံ အလွန်ကြီးမားကြောင်း မည်သို့ ဆုံးဖြတ်မည်မှာ ဧကရာဇ် (ချူနင်) အပေါ်တွင်သာ မူတည်ကြောင်း ကောင်းသည်ဖြစ်စေ ဆိုးသည်ဖြစ်စေ အားလုံး အတူတူ ရင်ဆိုင်ကြမည်ဖြစ်ကြောင်းပင်။

ဪ ငါတို့မပြောရသေးဘူးလား ငါတို့က အနန္တဂိုဏ်းဖြစ်တဲ့ နတ်ဘုရားတိမ်တိုက်ဂိုဏ်းကပဲ။ မင်းတို့လို ရေတွင်းထဲက ဖားတွေကတော့ လကို မော့ကြည့်နေရသလိုမျိုး ငါတို့အကြောင်း ကြားဖူးမှာ မဟုတ်ပါဘူး။

အဘိုးကြီးတစ်ယောက်က ကူယွမ်ကို တစ်ချက်တောင် မကြည့်ဘဲ ဂုဏ်သရေရှိ ထိုင်ခုံပေါ်တွင် အေးအေးလူလူ ထိုင်ရင်း ပြောလိုက်သည်။ ခေါင်းဆောင်ဖြစ်သူ ချန်မူယာကတော့ ကူယွမ်ကို ကြည့်ရုံဖြင့် ကျင့်စဉ်အဆင့်ကို သိမြင်သွားသည်။

ကောင်းကင်ဖြစ်စဉ်အထွတ်အထိပ်ကိုး ဒီကို လာတဲ့လမ်းမှာ တာ့ချန်းအင်ပါယာနဲ့ ထိုက်ရွှမ်းမြင့်မြတ်နယ်မြေ တို့ ပတ်သက်မှုရှိတယ်လို့ ကြားခဲ့တယ် မင်းကထိုက်ရွှမ်းဂိုဏ်းမြတ်ကလား။

ကူယွမ်၏ ရင်ခုန်သံများ မြန်လာသည်။ သူတို့၏အဆင့်ကို သူမသိရသဖြင့် အားသာချက်မရဘဲ မေးခွန်းများကိုသာ အလိုက်သင့် ဖြေနေရသည်။ အဓိကမှာ ဧကရာဇ် (ချူနင်) ၏ အစွမ်းက ဤလူများထက် သာမသာ သူမသိခြင်းပင်။

"မှန်ပါတယ်ခင်ဗျာ။"

ဒါဆိုတိုက်ဆိုင်လိုက်တာ မင်းတို့ ထိုက်ရွှမ်းဂိုဏ်းမြတ်မှာ အရင်က ဖန်းစီယွမ်ဆိုတဲ့ ဘိုးဘေးတစ်ယောက် ရှိခဲ့ဖူးလား။

ကူယွမ် မျက်မှောင်ကြုတ်သွားသော်လည်း ချက်ချင်း ပြန်ဖြေလိုက်သည် ဟုတ်ကဲ့ သူကကျွန်တော့်ရဲ့ ဆရာ့ဆရာပါ ဒီလူကြီးမင်းက သူ့ကို သိလို့လား။ ချန်မူယာက ပြုံးပြီး ခေါင်းညိတ်လိုက်သည်။

သိတာပေါ့ သူ အထက်ဘုံတက်သွားတုန်းက နှစ်ပေါင်း တစ်ထောင်ပဲ ကျင့်ကြံရသေးတာ။ အသက်လည်း သိပ်မကြီးသေးဘူး အချိန်တိုအတွင်းမှာ တာအိုအဆင့်ကို ရောက်ခဲ့တာလေ။

သူက ငါတို့ဂိုဏ်းလက်အောက်မှာ ပါရမီရှင်တစ်ယောက် ဖြစ်ခဲ့တယ်။ အခုဆိုရင်တော့ အကြီးအကဲ တစ်ယောက်လောက် ဖြစ်နေလောက်ပြီ။ အဲဒီလို တွက်ကြည့်ရင် ငါတို့က အမျိုးတွေလို့တောင် ပြောလို့ရတာပေါ့။

အဘိုးကြီးက အေးအေးဆေးဆေး ပြောနေသော်လည်း ကူယွမ်၏ စိတ်အာရုံမှာ ပြင်းထန်စွာ တုန်ခါသွားရသည်။ အထက်ဘုံတက်သွားတဲ့ ဘိုးဘေးကြီးက နှစ်ပေါင်း တစ်သောင်းကြာပြီးတဲ့နောက်မှာ သူတို့ဂိုဏ်းရဲ့ အကြီးအကဲ တစ်ယောက်ပဲ ရှိသေးတယ်တဲ့လား။

ဘိုးဘေးကြီးမှာ ထိုစဉ်က ပါရမီအရှိဆုံး ပုဂ္ဂိုလ်ကြီးဖြစ်သော်လည်း အထက်ဘုံမှာတော့ အောက်ခြေ အကြီးအကဲလေး တစ်ယောက်သာ ဖြစ်နေသည်။ ဤလူများ၏ အဆင့်မှာ မြင့်မားလွန်းလှသည်။

ထျန်းရွှမ်းတိုက်ကြီး တစ်ခုလုံး ပေါင်းတိုက်လျှင်ပင် ဤအဘိုးကြီး တစ်ယောက်တည်းကို နိုင်မည်မဟုတ်ပါ။ သူတို့ကို လုံးဝ ရန်မစသင့်ပါ ဧကရာဇ်ကို အမြန် အသိပေးရမည်။

ချန်မူယာကတော့ ဒါကိုဂရုမစိုက်ပါ။ သူ စိတ်ဝင်စားသည်မှာ မွေးရာပါ အစွန်းရောက်သူတော်စင်ခန္ဓာ နှစ်ခုနှင့် နှစ်ပေါင်း တစ်ရာကျော်အတွင်း အနန္တအဆင့်သို့ ရောက်ခဲ့သည့် ဧကရီ (ရဲချန်းလျန်) သာ ဖြစ်သည်။ ယနေ့ သူ သုံးယောက်လုံးကို ခေါ်သွားရန် ကြံရွယ်ထားသည်။

ထိုစဉ် "ဧကရာဇ်မင်းမြတ် ကြွလာတော်မူပြီ" ဟု ဟစ်အော်သံ ထွက်ပေါ်လာသည်။

နန်းတွင်းမှ မှူးမတ်များနှင့် ကျင့်ကြံသူအားလုံး တုန်လှုပ်သွားကြပြီး တစ်ဖက်သို့ လှည့်ကြည့်လိုက်ကြသည်။ သူတို့ ယခု ခံစားနေရသည့် ဖိအားမှာ အလွန်ကြီးမားလှသည်။

အထက်ဘုံက လူများမှာ မင်းသမီးလေးများကို အတင်းအဓမ္မ လုယူရန် လာခြင်း ဖြစ်နေသည်။ ဒါကို ဧကရာဇ်က သဘောတူမည် မဟုတ်သည်မှာ သေချာသည်။

ချန်မူယာနှင့် အခြားသူများမှာ ထိုင်နေရာမှ မထကြပါ။ သူတို့က နဂါးပလ္လင်ဆီသို့ လျှောက်လာသည့် အမျိုးသားကို လှည့်ကြည့်ရုံသာ ကြည့်ကြသည်။ ချူနင်က နဂါးပလ္လင်ပေါ်တွင် ထိုင်လိုက်ပြီး သူတို့ကို သံသယဖြင့် ကြည့်လိုက်သည်။

အင်း... စူးတိန်ဖန်း မဟုတ်ဘူးလား။

ဟိုအဘိုးကြီးကတော့ ဒီကို အလွယ်တကူ လာရဲမှာ မဟုတ်ဘူး။ ဒါဆို ဒီလူတွေက ချူနင်က ကူယွမ်၏ စိတ်ချင်းဆက်သွယ်မှုကို ဖတ်ကြည့်လိုက်ပြီး အခြေအနေကို နားလည်သွားသည်။

နတ်ဘုရားတိမ်တိုက်ဂိုဏ်းက လူတွေလား မင်းတို့က ချန်းရှန်းဧကရာဇ်ရဲ့ လက်အောက်ခံတွေလား။

ချန်မူယာ အံ့သြသွားသည်။ အောက်ဘုံမှာ ချန်းရှန်းဧကရာဇ်ကို သိတဲ့လူ ရှိနေတာပဲ။ ဒါပေမဲ့ တစ်ဖက်လူဆီက ကျင့်စဉ်အနံ့အသက်ကို သူ မခံစားရပါ။ ဆိုလိုသည်မှာ တစ်ဖက်လူမှာ ကျင့်စဉ်မရှိခြင်း သို့မဟုတ် အောက်ဘုံက ဖြစ်သဖြင့် သူ စစ်ဆေးစရာ မလိုလောက်အောင် အဆင့်နိမ့်ခြင်းပင်။

"ဒီဘိုးဘေးက အဲဒီကပါပဲ"

ချူနင်က သူတို့ကို သိပ်ပြီး ဂရုမစိုက်ပါ။ သူလာရခြင်းမှာ စူးတိန်ဖန်း၏ မျက်နှာကို ထောက်ထား၍ လာခြင်းဖြစ်ပြီး တခြားလူဆိုလျှင် ဂရုစိုက်နေမည် မဟုတ်ပါ။

"ငါ့သမီးတွေကို တပည့်အဖြစ် ခေါ်ချင်တယ်လို့ ကြားတယ်"

ချန်မူယာက ပြုံးပြီး ခေါင်းညိတ်သည်။ မှန်ပါတယ် မွေးရာပါ အစွန်းရောက်သူတော်စင်ခန္ဓာက နောင်တစ်ချိန်မှာ ဧကရာဇ်ဖြစ်လာမှာ သေချာတယ်။ ဒါကြောင့် ငါတို့က အထူးတလည် လာခဲ့တာပါ။

မင်း သဘောတူမယ်ဆိုရင် နှစ်ဖက်စလုံးအတွက် အကျိုးရှိမှာပါ။ မင်းအတွက်လည်း ဆုလာဘ်တွေ ပေးမှာဖြစ်သလို ကလေးတွေအတွက်လည်း ဒီအောက်ဘုံမှာ မရနိုင်တဲ့ ကျင့်စဉ်အရင်းအမြစ်တွေကို ငါတို့ ပေးနိုင်ပါတယ် မင်း ဘယ်လို ထင်သလဲ။

ချူနင် ဘာထင်သလဲ။ ငရဲသွားလိုက်စမ်း ဧကရာဇ်တစ်ပိုင်း အဆင့်လေးနဲ့ ငါ့သမီးတွေကို သင်ပေးချင်တာလား။ ချူနင်က ယဉ်ကျဉ်းစွာ ငြင်းဆိုရန် ပြင်စဉ် အဘိုးကြီးက နောက်တစ်ခွန်း ထပ်ပြောလိုက်သည်။

နောက်တစ်ခု ငါ မေ့တော့မလို့။ တာ့ချန်းအင်ပါယာရဲ့ ဧကရီ(ရဲချန်းလျန်) က နှစ်ပေါင်း ၁၃၀ ကျင့်ကြံရုံနဲ့ အနန္တအဆင့်ကို ရောက်တယ်ဆိုတာ ဟုတ်လား။

"ဟုတ်တယ် ဘာဖြစ်လို့လဲ" ချူနင်က မျက်မှောင်ကြုတ်လိုက်သည်။

ဟားဟား နှစ်ပေါင်း တစ်ရာအတွင်း ဒီအဆင့်ကို ရောက်ဖို့ဆိုတာ ချန်းရှန်းဧကရာဇ်ရဲ့ လက်အောက်မှာတောင် ရှားပါးတဲ့ ပါရမီရှင်ပဲ ဒါကြောင့်။ အဘိုးကြီးက ချူနင်ကို စိုက်ကြည့်လိုက်သည်။

ဒါကြောင့် မင်းကိုတောင်းဆိုချင်တာ မင်းရဲ့သမီးတွေရော မင်းရဲ့ ဇနီးကိုပါ ငါနဲ့အတူ ခေါ်သွားခွင့်ပြုဖို့ပဲ။

စကားကတော့ နားဝင်မချိုဘူး ဖြစ်လိမ့်မယ်။ ဒါပေမဲ့ မင်းကအောက်ဘုံက လူတစ်ယောက်ပဲလေ။ မင်းရဲ့ ဇနီးနဲ့ သမီးတွေအတွက် ဒါကဧကရာဇ်ကြီးရဲ့ အနားမှာ နေရမယ့် အခွင့်အရေးကြီးပဲ။ ဒါကို မင်း သေချာ စဉ်းစားသင့်တယ်။

မင်းသဘောတူမယ်ဆိုရင် နစ်နာကြေးအနေနဲ့ ဝိညာဉ်ကျောက်တုံး တစ်သိန်း ပေးမယ် ဘယ်လိုလဲ။ ချူနင်၏ မျက်လုံးများ ကျဉ်းမြောင်းသွားသည်။ သူ ဆွံ့အသွားရသည်။ ဒီအဘိုးကြီးက ငါ့အိမ်ကို လာပြီး ငါ့မိန်းမနဲ့ သမီးတွေကို ခေါ်သွားမယ်တဲ့လား။

ပြီးတော့ ဝိညာဉ်ကျောက်တုံး တစ်သိန်းနဲ့ ငါ့ကို နှုတ်ပိတ်မယ်ပေါ့။ ငါက သူ့ကိုအရမ်း ပြုံးပြနေလို့လား ဒါမှမဟုတ် ငါ့ရဲ့ စိတ်ရှည်မှုက အရမ်း များသွားလို့လား။

သူက ရယ်မောလိုက်သည် နားလည်ပြီ မင်းတို့က တပည့်လာခေါ်တာ မဟုတ်ဘူး လူလာလုတာပဲ ငါ့သမီးတွေကိုတင်မကဘူး ငါ့မိန်းမကိုပါ ခေါ်သွားချင်တာပေါ့။

 "လူငယ်လေး ငါတို့ဂိုဏ်းက မင်းတို့လူတွေကို အထင်ကြီးလိုခေါ်တာက မင်းအတွက် ကံကောင်းခြင်းပဲ။ မင်းက အဆိုးအကောင်း နားမလည်ဘူးလား" အဘိုးကြီးနောက်က လူက အော်လိုက်သည်။

"နေပါဦး အကြီးအကဲလျူ" ချန်မူယာက တားလိုက်ပြီး ပြုံးပြပြန်သည်။ တကယ်တော့ ငါကအဲဒီလို မပြောချင်ပါဘူး ဒါပေမဲ့ မင်းကအဲဒီလို ထင်နေပြီဆိုတော့လည်း ငါဘာမှမတတ်နိုင်ဘူး။

စကားပြောပြီးနောက် သူက ဝိညာဉ်ကျောက်တုံး တစ်သိန်းကို ပစ်ပေးလိုက်သည်။ တစ်ပြိုင်နက်တည်းမှာပင် သူ့ဆီက ဖိအားအချို့ကို ထုတ်လွှတ်လိုက်သည်။ ကျင့်စဉ်မရှိသည့် ပုရွက်ဆိတ်တစ်ကောင်ကို သူ သတ်ဖို့တောင် ပျင်းနေသည်။ သူ ခေါ်သွားတဲ့အခါ အဲဒီလူရဲ့ ရုပ်ပျက်ဆင်းပျက် ဖြစ်သွားမယ့် မျက်နှာကိုပဲ သူ ကြည့်ချင်နေတာပါ။

သူ့စကားအဆုံးမှာ ပြင်းထန်တဲ့ ဖိအားတွေက ချူနင်ဆီကို တိုးဝင်သွားသည်။ ချူနင် ထိုင်နေတဲ့ နဂါးပလ္လင်ဟာ ချက်ချင်းပဲ ဖုန်မှုန့်အဖြစ် ပြောင်းလဲသွားပြီး ကြမ်းပြင်တွေလည်း အက်ကွဲကုန်သည်။ မှူးမတ်တွေ ကြောက်လန့်ကုန်သော်လည်း ကူယွမ်ကတော့ တစ်ခုခု မှားနေတာကို သတိထားမိလိုက်သည်။

ချူနင်က လေဟာနယ်ထဲကို ခြေလှမ်းလှမ်းလိုက်ပြီး ဖြည်းဖြည်းချင်း ကြွတက်လာသည်။ အရင်က နူးညံ့တည်ငြိမ်တဲ့ မျက်နှာထားဟာ အေးစက်တဲ့ အသွင်သို့ ပြောင်းလဲသွားသည်။ သူ ခြေတစ်လှမ်း လှမ်းလိုက်ရုံဖြင့် အဘိုးကြီး၏ လည်ပင်းကို ဖမ်းဆုပ်လိုက်ပြီးသား ဖြစ်သွားသည်။ အရိုးကျိုးသံမှာ နန်းတော်တစ်ခုလုံးကို ဟိန်းထွက်သွားပါတော့သည်။

ချူနင်က ထိတ်လန့်နေသော အဘိုးကြီးကို စိုက်ကြည့်ရင်း ပြောလိုက်သည် မင်းတို့ရဲ့ ဧကရာဇ်ကြီးတောင် ငါ့ကို ဒီလိုစကားမျိုး မပြောရဲဘူး။ မင်းကို ဒီလောက် သတ္တိရှိအောင် ဘယ်သူက လုပ်ပေးလိုက်တာလဲ။