အခန်း (၅) - နိုးထသူအဖြစ် မှတ်ပုံတင်ခြင်း (၁)
ဆရာမတွေ ထွက်သွားပြီးနောက် ကျောင်းသားတွေဟာ ဘာလုပ်ရမှန်းမသိ ဝေခွဲမရ ဖြစ်နေကြပေမဲ့ မိုက်ကယ်ကတော့ ထိုသို့မဟုတ်ပေ။ နောက်ထပ် ဘာဆက်လုပ်ရမလဲဆိုတာကို သူ ကောင်းကောင်းသိထားပြီးသား ဖြစ်သည်။ အရေးကြီးဆုံးအလုပ်က 'စွမ်းအားရှင်များအသင်း' မှာ မှတ်ပုံတင်ဖို့ဖြစ်ပြီး ဒုတိယအချက်ကတော့ သူ နိုးထသူတစ်ယောက် ဖြစ်သွားပြီဆိုတဲ့အကြောင်း သူ့ဒေါ်လေးကို အသိပေးဖို့ပင်။
မိုက်ကယ်သည် စွမ်းအားရှင်များအသင်းနှင့် ရင်းနှီးပြီးသားဖြစ်သည်။ ဤကမ္ဘာထဲသို့ သူ ဝိညာဉ်ကူးပြောင်းမလာခင်ကတည်းက ခန္ဓာကိုယ်ပိုင်ရှင်ဟောင်းမှာလည်း အသင်းအကြောင်း အခြေခံဗဟုသုတ ရှိထားသည်။ ဤသည်မှာ ဒေသခံတွေကြားတွင် အများသိ အခြေခံအချက်အလက်တစ်ခုပင်။ စွမ်းအားရှင်များအသင်းသည် ကမ္ဘာပျက်ကပ်အပြီး ပေါ်ပေါက်လာသည့် အစိုးရသစ်ဖြစ်သော
'ပြည်ထောာင်စု' လက်အောက်ခံ အဖွဲ့အစည်းတစ်ခု ဖြစ်သည်။
ယခုအခါ ကမ္ဘာပေါ်တွင် အုပ်ချုပ်မှုအာဏာ တစ်ခုတည်းသာရှိပြီး ၎င်းမှာ ပြည်ထောင်စုပင် ဖြစ်သည်။ ထိုအောက်တွင်မှ နိုင်ငံများ၊ ပြည်နယ်များနှင့် မြို့များဟူ၍ ခွဲခြားထားသည်။ စွမ်းအားရှင်များအသင်းသည် 'အော်ရိုရာနယ်မြေ' အတွင်းရှိ ထူးခြားဆန်းပြားစွမ်းအားရှင် အားလုံးကို စီမံခန့်ခွဲသည်။ သာမန်လူသားများအနေဖြင့် 'အဆင့် (၁) ကျင့်ကြံသူ' ဖြစ်လာမှသာ မှတ်ပုံတင်ခွင့်ရှိသော်လည်း၊ နိုးထသူများမှာမူ နိုးထလာသည်နှင့်တစ်ပြိုင်နက် စွမ်းအားရှင်များ ဖြစ်လာသောကြောင့် ချက်ချင်းမှတ်ပုံတင်ရန် လိုအပ်သည်။ ဤအသင်း၏ ရည်ရွယ်ချက်မှာ အများပြည်သူကို ကာကွယ်ရန်၊ စွမ်းအားရှင်များကို စီမံခန့်ခွဲရန်နှင့် ၎င်းတို့ကို ခံစားခွင့်အမျိုးမျိုး ပေးအပ်ရန်ဖြစ်သည်။
မိုက်ကယ်သည် ကျောင်းဝင်းထဲမှ ထွက်လာခဲ့သည်။ အပြင်ရောက်သည်နှင့် လမ်းပေါ်တွင် ဖြတ်မောင်းလာသော တက္ကစီအလွတ်တစ်စီးကို လှမ်းတားလိုက်သည်။
"စွမ်းအားရှင်များအသင်းကို သွားမယ်!" ဟု သူက ပြောလိုက်သည်။
"တစ်ဒေါ်လာ ကျပါမယ်" ဟု ယာဉ်မောင်းက ပြန်ဖြေသည်။
"ကောင်းပါပြီ"
စွမ်းအားရှင်များအသင်းသည် ဝုဒ်စတုန်း အစိုးရအထက်တန်းကျောင်းနှင့် အနည်းငယ် ဝေးသည်။ လမ်းလျှောက်သွားလျှင် ၃၅ မိနစ်ခန့် ကြာမြင့်မည်ဖြစ်သော်လည်း တက္ကစီနှင့်ဆိုပါက မိနစ် ၂၀ ထက် မပိုပေ။ ရှေ့ခန်းတွင် အခြေချထိုင်လိုက်ပြီးနောက် မိုက်ကယ်သည် အိတ်ကပ်ထဲမှ ဖုန်းကို ထုတ်လိုက်သည်။ ပုံမှန်ဆိုလျှင် ကျောင်းတက်နေရချိန်ဖြစ်၍ ဖုန်းမှာ ကျောပိုးအိတ်ထဲတွင် ရှိနေရမည် ဖြစ်သော်လည်း တက္ကသိုလ်ဝင်စာမေးပွဲ နီးကပ်လာနေပြီဖြစ်ရာ အတန်းတက်ရန် မလိုတော့ပေ။ ထို့ကြောင့် ကျောင်းဝတ်စုံမှအပ ကျန်ရှိသည်များမှာ ပေါ့ပေါ့ပါးပါးပင်။
ယနေ့ကျောင်းလာသည့် နောက်ဆုံးနှစ်ကျောင်းသားတိုင်းသည် အဓိကအားဖြင့် 'နိုးထခြင်းအခမ်းအနား' အတွက် လာကြခြင်းဖြစ်သည်။ ဒီနေ့ပြီးလျှင် ကျောင်းတော်ကြီးသည် သိသိသာသာ ခြောက်ကပ်သွားတော့မည်။
ဤကမ္ဘာ၏ နည်းပညာသည် ကမ္ဘာမြေထက် ပိုမိုမြင့်မားသော်လည်း ရင်းနှီးပြီးသား နည်းပညာအချို့ ရှိနေဆဲဖြစ်သည်။ ချမ်းသာသူများက လေပေါ်ပျံကားများကို စီးကြပြီး မချမ်းသာသူများကတော့ ဘီးတပ်ယာဉ်များကိုသာ အားကိုးကြရသည်။ သူဌေးများက ဖုန်းအစား 'ဟိုလိုဂရမ်' - ရုပ်လုံးကြွပုံရိပ် ပြသနိုင်သည့် လက်ပတ်နာရီများကို သုံးကြသော်လည်း အခြားသူများကတော့ ရိုးရိုးဖုန်းများဖြင့်သာ ကျေနပ်နေကြရသည်။ ဤကမ္ဘာသည် နည်းပညာ အဟောင်းနှင့် အသစ်တို့ ရောယှက်နေသော်လည်း တစ်မျိုးတစ်ဖုံ ထူးခြားစွာ လိုက်ဖက်ညီနေသည်။
မိုက်ကယ်သည် သူ့ဒေါ်လေးဆီ ဖုန်းဆက်မည့်အစား စာတိုပို့ရန် ဆုံးဖြတ်လိုက်သည်။ သူမက အထက်တန်းစား စားသောက်ဆိုင်တစ်ဆိုင်တွင် ထမင်းချက်အဖြစ် လုပ်ကိုင်နေသူဖြစ်ရာ အလုပ်ရှုပ်နေလောက်မည်ဟု သူတွေးမိသည်။ သူ နိုးထသူတစ်ယောက် ဖြစ်သွားပြီဖြစ်ကြောင်း စာတိုလေးတစ်စောင် ပို့လိုက်သည်။
ဖုန်းကို ပြန်သိမ်းမည်အပြုတွင် ဖန်သားပြင်ပေါ်၌ ဖုန်းဝင်လာသည့် အချက်ပေးချက်လေး ပေါ်လာသည်။ ဒေါ်လေးဆီကပင်။ မိုက်ကယ် ချက်ချင်း ဖုန်းကိုင်လိုက်သည်။
"ဒေါ်လေး အလုပ်မှာ မဟုတ်ဘူးလား?" ဟု မိုက်ကယ်က ချက်ချင်းမေးလိုက်သည်။ ဒေါ်လေးသည် အလုပ်နားရက်များတွင်ပင် ဖုန်းကို ဤမျှမြန်မြန် ကိုင်လေ့မရှိပေ။
"အလုပ်မှာပါပဲ၊ မင်းဆီက စာဝင်လာတော့ ခဏနားနေတုန်းနဲ့ ကြုံသွားလို့ပါ" ဟု ဒေါ်လေးဖြစ်သူ ဒေါ်မြ က ပြန်ဖြေသည်။
နောက်ခံမှ ဆူညံသံများကို ကြားနေရသဖြင့် မိုက်ကယ် သူမစကားကို ယုံကြည်လိုက်သည်။
"မစ်..." ဒေါ်လေးက တစ်ခုခုပြောချင်သော်လည်း ဝေခွဲမရဖြစ်နေသည့် လေသံဖြင့် ခေါ်လိုက်သည်။
"ဗျာ ဒေါ်လေး?" မိုက်ကယ် ပြုံးလိုက်မိသည်။ သူမ ဘာတွေးနေသည်ကို သူ ခန့်မှန်းမိပြီးသားဖြစ်သည်။ မိဘအများစုသည် သူတို့သားသမီးများ ပထမအကြိမ်မှာတင် နိုးထသူဖြစ်သွားလျှင် အံ့အားသင့်တတ်ကြရာ၊ အခွင့်အလမ်း နည်းပါးလှသည့် မိုက်ကယ်အတွက်ဆိုလျှင် ပို၍ပင် အံ့သြသွားမည်မှာ အမှန်ပင်။
"မင်းပို့တဲ့စာက..." ဒေါ်မြက စကားကို ခပ်နှေးနှေးစတင်ပြီးမှ ခေတ္တရပ်ကာ ဆက်ပြောသည် "တကယ်ပဲလား?"
"တကယ်ပါ ဒေါ်လေးရဲ့၊ ဒီနေ့က ကျွန်တော့်အတွက် ကံကောင်းတဲ့နေ့ပဲ ဟားဟား" ဟု မိုက်ကယ်က ရယ်မောရင်း ပြန်ပြောလိုက်သည်။
ဒေါ်မြသည် စိတ်လှုပ်ရှားမှုကို ထိန်းချုပ်ထားသော်လည်း အပျော်လွန်ပြီး အသံအနည်း
ငယ် ထွက်လာသည်။ သူမ အလုပ်လုပ်နေဆဲဖြစ်သည်ကို သိသောကြောင့် မိုက်ကယ်က စကားဖြတ်လိုက်သည်။
"ကျွန်တော် စွမ်းအားရှင်များအသင်းကို သွားနေပြီ ဒေါ်လေး၊ ဒေါ်လေး အိမ်ပြန်ရောက်မှပဲ အေးအေးဆေးဆေး စကားပြောကြတာပေါ့"
"အေးအေး၊ ဟုတ်ပြီ! အခု ဒေါ်လေး ပိုက်ဆံအချို့ လွှဲပေးလိုက်မယ်။ တစ်ခုခု ဝယ်စားလိုက်ဦး၊ ပြီးတော့ 'လီလီ' ကျောင်းကပြန်လာရင် စားဖို့အတွက်လည်း နည်းနည်းချန်ထားဦးနော်။ ဒေါ်လေး ဒီနေ့ အိမ်ပြန်နည်းနည်း နောက်ကျမယ်"
"ဟုတ်ကဲ့ပါ ဒေါ်လေး"
စကားအနည်းငယ် ထပ်ပြောပြီးနောက် ဖုန်းချလိုက်သည်။ မိုက်ကယ်သည် ရင်ထဲတွင် ပျော်ရွှင်မှုများ လှိုက်တက်လာကာ သက်ပြင်းတစ်ချက် ချလိုက်မိသည်။ မူလက ကမ္ဘာမြေမှ လာသူဖြစ်သော်လည်း သူသည် ဤကမ္ဘာမှ မိုက်ကယ်အဖြစ် အပြည့်အဝ ခံယူထားပြီးသားဖြစ်ကာ ဤနေရာက မိသားစုကိုလည်း အလွန်ပင် တန်ဖိုးထားသည်။ ကမ္ဘာမြေမှာတုန်းကလည်း မိဘနှစ်ပါးကို စောစောစီးစီး ဆုံးရှုံးခဲ့ရခြင်းကြောင့်လည်း ဖြစ်နိုင်ပေသည်။ တစ်နည်းအားဖြင့် မိုက်ကယ်နှစ်ယောက်စလုံးသည် ခက်ခဲကြမ်းတမ်းသော ကလေးဘဝများကို ဖြတ်သန်းခဲ့ကြရသည်။
ဖုန်းချပြီးနောက် မိုက်ကယ်သည် မျက်လုံးမှိတ်ကာ ခေတ္တအနားယူလိုက်သည်။ တစ်ခုခုမေးချင်နေပုံရသော ယာဉ်မောင်း၏ အကြည့်ကိုလည်း လျစ်လျူရှုထားလိုက်သည်။ နိုးထခြင်းခန်းမထဲတွင် သူ ဘယ်လောက်တောင် စိတ်လှုပ်ရှား တင်းမာနေခဲ့သလဲဆိုတာ ယခုမှ သတိထားမိတော့သည်။ စိတ်ဓာတ်များလည်း အနည်းငယ် ပင်ပန်းနွမ်းနယ်နေခဲ့သည်။
မိုက်ကယ် အနားယူနေသည်မှာ မိနစ်အနည်းငယ်သာ ရှိသေးသော်လည်း ယာဉ်မောင်းက သူ့ကို ပုတ်နှိုးလိုက်သည်။
"ရောက်ပါပြီ" ဟု ယာဉ်မောင်းက ဆိုသည်။
မိုက်ကယ်သည် ဝေဝေဝါးဝါးဖြင့် မျက်လုံးကို အားယူဖွင့်လိုက်သော်လည်း မလှမ်းမကမ်းရှိ နှစ်ထပ်အဆောက်အအုံကို မြင်လိုက်ရသောအခါ စိတ်ကြည်သွားပြီး ချက်ချင်း မတ်မတ်ထိုင်လိုက်သည်။
"ငွေပေးချေဖို့ ကုဒ်လေး ပေးပါဦး" ဟု မိုက်ကယ်က တောင်းလိုက်သည်။
"ဒီမှာပါ" ယာဉ်မောင်းက သူ့ဖုန်းထဲမှ ကုဒ်ကို ပြလိုက်ရာ မိုက်ကယ်က သူ့ဖုန်းဖြင့် စကင်ဖတ်ကာ ကားခကို လွှဲပေးလိုက်သည်။
"ကျေးဇူးတင်ပါတယ်!" ဟု မိုက်ကယ်က ပြောလိုက်သည်။
"ရပါတယ်ဗျာ! ဒါနဲ့ နိုးထသူတစ်ယောက် ဖြစ်သွားတဲ့အတွက် ဂုဏ်ယူပါတယ်နော်!"
ကားမောင်းထွက်သွားသည့် ယာဉ်မောင်း၏ နောက်ဆုံးစကားကြောင့် မိုက်ကယ် ပြုံးလိုက်မိသည်။ စောစောက ဒေါ်လေးနှင့် ပြောခဲ့သည့် စကားကို ကြားပြီး ယာဉ်မောင်းမှာ သံသယဖြစ်နေခဲ့သော်လည်း၊ ယခု မိုက်ကယ်က စွမ်းအားရှင်များအသင်း ခွဲတစ်ခုရှေ့တွင် စိတ်အားထက်သန်စွာ ဆင်းသွားသည်ကို မြင်လိုက်ရသောအခါ အတည်ဖြစ်သွားပုံရသည်။
မိုက်ကယ်သည် ခေါင်းကို ခါယမ်းကာ အာရုံပြန်စုလိုက်သည်။ အသက်ပြင်းပြင်းတစ်ချက် ရှူလိုက်ပြီးနောက် စွမ်းအားရှင်များအသင်း၏ ဝင်ပေါက်ဆီသို့ ခြေလှမ်းကျကျ လျှောက်လှမ်းသွားပါတော့သည်။