အခန်း (၄၄) - မွန်းစတားအလောင်းများ ထပ်မံဝယ်ယူခြင်း

မိုက်ကယ်သည် အတွေးကိုယ်စီဖြင့် အသင်းအဖွဲ့ဝင်ပေါက်နားတွင် ရပ်နေစဉ် အိတ်ကပ်ထဲမှ ဖုန်းတုန်ခါသံကြောင့် လက်ရှိကမ္ဘာသို့ ပြန်လည်ရောက်ရှိလာခဲ့သည်။ ဖုန်းကို ထုတ်ကြည့်လိုက်သောအခါ အသင်းအဖွဲ့ထံမှ အီးမေးလ်တစ်စောင် ရောက်ရှိနေခြင်းပင်။

မိုက်ကယ်သည် ဖုန်းကို လော့ခ်ဖွင့်ကာ အီးမေးလ်ကို ဖတ်ကြည့်လိုက်သည်။ ထိုအထဲတွင် သူသွားရောက်ရမည့် 'အက်ကွဲကြောင်း' (Crack) ၏ တည်နေရာနှင့် အသေးစိတ်အချက်အလက်များစွာ ပါဝင်နေသည်။ လက်ထဲရှိ စာရွက်ပေါ်မှ အချက်အလက်များထက်ပင် ပိုမိုပြည့်စုံနေ၏။ ထို့အပြင် အီးမေးလ်တွင် စာရင်းတစ်ခုလည်း ပူးတွဲပါရှိသေးသည်။

"တော်တော်လေး အဆင်ပြေသားပဲ" ဟု မိုက်ကယ် မှတ်ချက်ချလိုက်သည်။ "ဒါက ဂေါ်ဗလင်လောကရဲ့ ပျက်စီးနေတဲ့ အက်ကွဲကြောင်းအကြောင်းပဲဆိုတော့ နောက်ပိုင်း တခြားအက်ကွဲကြောင်းတွေကို ပထမဆုံးအကြိမ် သွားချင်တဲ့အခါမျိုးမှာလည်း ဒီလိုမျိုး အီးမေးလ်တွေ ရနိုင်ခြေရှိတာပေါ့"

သို့သော် သူ၏အာရုံက ပူးတွဲပါစာရင်း၏ ပထမဆုံးအကြောင်းအရာထံသို့ ချက်ချင်းရောက်သွားသည်။

[၁။ ဂေါ်ဗလင်အလောင်း - ဒေါ်လာ ၅၀၀]

"ဒါက ပိုတောင်ကောင်းသေးတယ်" ဟု သူက တိုးတိုးလေး ရေရွတ်လိုက်သည်။ "ဒီမှာ သုံးသမျှ ပိုက်ဆံကို ပြန်ရှာလို့ရတာပဲ။ ဒါပေမဲ့... ဂေါ်ဗလင်အလောင်းတစ်လောင်း ဝယ်တဲ့ဈေး ပြန်ကျေဖို့ဆိုရင် ဂေါ်ဗလင်နှစ်ကောင်လောက်တော့ ပြန်သတ်ရမှာပဲ။ ဈေးနှုန်းက အတက်အကျရှိနိုင်တယ်လို့တောင် ရေးထားသေးတယ်။ ဟူး... အသင်းအဖွဲ့ကတော့ အတ္တကြီးသလို လောဘလည်း တော်တော်ကြီးတာပဲ"

သူလုပ်ရမည့် အဆင့်များကို ဆုံးဖြတ်ပြီးနောက် မိုက်ကယ်သည် ဝင်ပေါက်မှ ပြန်လှည့်လာကာ မွန်းစတားအလောင်းများ ဝယ်ယူရန် ကုန်သွယ်ရေးစင်တာဘက်သို့ ဦးတည်လိုက်သည်။

ကုန်သွယ်ရေးစင်တာသို့ ရောက်သောအခါ ကောင်တာတွင် မနေ့က မျက်နှာတွင် အမာရွတ်နှင့်လူ မဟုတ်ဘဲ တခြားလူတစ်ယောက် ဖြစ်နေသည်ကို သတိပြုမိသွားသည်။ ထိုလူ ဘယ်ရောက်နေသနည်းဟု ခဏမျှ တွေးတောမိသော်လည်း ထိုအတွေးကို ချက်ချင်းပင် ဖျောက်ဖျက်လိုက်သည်။ သူနှင့် ထိုအမာရွတ်နှင့်လူမှာ ရင်းနှီးသူများ မဟုတ်သဖြင့် အချိန်ကုန်ခံ တွေးနေစရာ မလိုပေ။

"မင်္ဂလာနံနက်ခင်းပါ" ဟု မိုက်ကယ်က ကောင်တာမှ လူလတ်ပိုင်းအရွယ် အမျိုးသားကို နှုတ်ဆက်လိုက်သည်။

"မင်္ဂလာပါဗျ။ ဘာများ ကူညီပေးရမလဲ" ဟု ထိုသူက နွေးထွေးသော အပြုံးဖြင့် ပြန်လည် နှုတ်ဆက်သည်။

"ဒီမှာ မွန်းစတားအလောင်းတွေ ရှိသေးလားခင်ဗျ"

"ဟုတ်ကဲ့ ရှိပါတယ်ခင်ဗျ။ ဝယ်ယူဖို့ ရှာနေတာလား"

"ဟုတ်ကဲ့ပါ"

မနေ့က အမာရွတ်နှင့်လူ၏ အေးစက်စက် အမူအရာနှင့် ယှဉ်လိုက်လျှင် ဤလူလတ်ပိုင်းအမျိုးသားမှာ ဆောင်းတွင်းမှ နေရောင်ခြည်လေးကဲ့သို့ပင်။ သူတို့နှစ်ဦးမှာ မျိုးစိတ်ပင် မတူသယောင် ထင်ရသည်။

လိုအပ်သည်များကို ပြောပြပြီးနောက် မိုက်ကယ်သည် မနေ့က သွားခဲ့သော အအေးခန်းထဲသို့ တစ်‌ခါ ထပ်မံရောက်ရှိလာခဲ့သည်။ သို့သော် ယခုတစ်ကြိမ်တွင် သူ 'တောဝံပုလွေ' (Forest Wolves) များကို လာဝယ်ခြင်း မဟုတ်ပေ။ အဘယ်ကြောင့်ဆိုသော် ၎င်းတို့မှာ သူနှင့် ယှဉ်လျှင် ဈေးအလွန်ကြီးလွန်းနေသောကြောင့် ဖြစ်သည်။ အလောင်းတစ်လောင်းလျှင် ဒေါ်လာ ၄,၀၀၀ ဆိုသည်မှာ မိုက်ကယ်၏ လက်ရှိဘတ်ဂျက်နှင့် လုံးဝမကိုက်ညီတော့ပေ။ သူ၏ ဘဏ်စာရင်းထဲရှိ ပိုက်ဆံမှာ သုံးလောင်းစာဝယ်ရန်သာ လုံလောက်ပြီး ၎င်းမှာ ရေရှည်အတွက် မကောင်းသော ရွေးချယ်မှု ဖြစ်သည်။

မိုက်ကယ်သာ သူ၏ 'ပါရမီ' (Talent) စွမ်းရည်အကြောင်းကို ကြိုတင်သိရှိခဲ့ပါက မနေ့က တောဝံပုလွေအလောင်းများအတွက် ဒေါ်လာ ၁၂,၀၀၀ ကို ဖြုန်းတီးပစ်မည် မဟုတ်ပေ။ ထိုပိုက်ဆံအားလုံးကို ဂေါ်ဗလင်အလောင်းများ ဝယ်ယူရာတွင်သာ အသုံးပြုခဲ့မည် ဖြစ်သည်။

မှန်ပါသည်... ဂေါ်ဗလင်များသည် အခြေခံစွမ်းရည် (Stats) နိမ့်ပါးကြပြီး ၎င်းတို့၏ ပင်ကိုယ်အားနည်းချက်များမှာ 'ဆင့်ကဲပြောင်းလဲခြင်း' (Evolve) ပြီးနောက်တွင်ပင် ပါလာနိုင်သဖြင့် အဆင့်တူ တောဝံပုလွေများလောက် သန်မာချင်မှ သန်မာလိမ့်မည်။ သို့သော် ၎င်းမှာ မိုက်ကယ်အတွက် အရေးမကြီးပေ။ မိုက်ကယ်သည် သူ့ကိုယ်သူ 'အရေအတွက်ဖြင့် တိုက်ခိုက်သော နခရိုမန်ဆာ' (Horde-type Necromancer) အဖြစ် သတ်မှတ်ထားသည်။ သူ၏ ဗျူဟာမှာ ရိုးရှင်းသည် - ရန်သူကို အရေအတွက်ဖြင့် ဖိနှိပ်ရန် ဖြစ်သည်။ သူသည် သာလွန်သော အရေအတွက်ဖြင့် အနိုင်ကျင့်ကာ အောင်ပွဲရယူရန် တိုက်ခိုက်သူ ဖြစ်သည်။

အရည်အသွေးမြင့် 'မသေကောင်' (Undead) အနည်းငယ်ရှိခြင်းမှာ ကောင်းသော်လည်း အရည်အသွေးသင့်တော်သော မသေကောင် အမြောက်အမြားရှိခြင်းလောက်တော့ မကောင်းနိုင်ပေ။ မည်သို့ပင်ဆိုစေ သူ၏ မသေကောင်များသည် အမြဲတမ်း ဆင့်ကဲပြောင်းလဲနိုင်သဖြင့် ၎င်းတို့၏ အားနည်းချက်မှာ ထာဝရ တည်ရှိနေမည် မဟုတ်ပေ။

ကံမကောင်းစွာဖြင့် မိုက်ကယ်သည် သူ၏ပါရမီစွမ်းရည်ကို သေချာမသိသေးဘဲ မနေ့က ဝယ်ထားသည်များကို တန်ဖိုးအရှိဆုံးဖြစ်အောင်သာ အာရုံစိုက်နေခဲ့သည်။ အစောပိုင်း ဆုံးဖြတ်ချက်များမှာ ဖြုန်းတီးမှုဖြစ်ခဲ့သည်ဟု ခံစားရသော်လည်း မိုက်ကယ် နောင်တမရမိပါ။ အနည်းဆုံးတော့ သူသည် 'လပ်ကီး' (Lucky) နှင့် 'ဘုရင်' (Prince) ဟုခေါ်သော အဆင့် ၁ မသေကောင် အားကောင်းမောင်းသန် နှစ်ကောင်ကို ရရှိခဲ့သည် မဟုတ်ပါလား။ ဂေါ်ဗလင်အလောင်းများ ဝယ်ခဲ့လျှင်လည်း အလားတူပင် ဖြစ်နိုင်သည်။ အဘယ်ကြောင့်ဆိုသော် မနေ့က သူရရှိထားသော ဆင့်ကဲပြောင်းလဲမှု အမှတ်များ (Evolution Points) မှာ အကန့်အသတ်ရှိသောကြောင့် ဖြစ်သည်။ ဂေါ်ဗလင်ကို ဆင့်ကဲပြောင်းလဲရန်မှာ ပို၍ပင် ကုန်ကျနိုင်သော်လည်း မိုက်ကယ်ကိုယ်တိုင် သေချာမသိသေးပေ။

သာမန်အဆင့် (Common-rank) မသေကောင်တစ်ကောင်ကို ကြယ်တစ်ပွင့် တိုးမြှင့်ရန် ဆင့်ကဲပြောင်းလဲမှု အမှတ် တစ်မှတ်စီ ကုန်သလား၊ သို့မဟုတ် မူလအခြေအနေကို မမူတည်ဘဲ ကြယ်တစ်ပွင့်မှ သုံးပွင့်အထိ တိုက်ရိုက်မြှင့်တင်ပေးနိုင်သလား ဆိုသည်ကို သိချင်နေမိသည်။ ယခု သူဝယ်ယူလိုက်သော ကြယ်တစ်ပွင့်အဆင့် ဂေါ်ဗလင်အလောင်းများဖြင့် မကြာမီ သူသိရတော့မည် ဖြစ်သည်။

မနေ့က တောဝံပုလွေများကို သတိထားဝယ်ယူခဲ့သလို မဟုတ်ဘဲ ယခုတစ်ကြိမ်တွင် မိုက်ကယ်သည် မွန်းစတားအလောင်းများ၏ အဆင့်ကိုပင် လှည့်မကြည့်တော့ပေ။ ရနိုင်သမျှ အဆင့်အမြင့်ဆုံး ဆယ်လောင်းကိုသာ ဝယ်ယူလိုက်သည်။ လောလောဆယ်တွင် မသေကောင် ဆင့်ခေါ်ရန် နေရာလွတ် ခုနစ်နေရာသာ ကျန်တော့သော်လည်း ရှုံးနိမ့်နိုင်ခြေကို ထည့်တွက်ကာ သုံးလောင်း ပိုဝယ်လိုက်ခြင်းဖြစ်သည်။ သူ၏ ကံတရားက သူ့ကို သစ္စာမဖောက်ရန်သာ မျှော်လင့်ရတော့မည်။ မည်သို့ပင်ဖြစ်စေ ဤအလောင်းများမှာ ဆင့်ကဲပြောင်းလဲမှု အမှတ်များ ပေးစွမ်းမည့် အရင်းအမြစ်များ မဟုတ်ပါလား။

ဤဝယ်ယူမှုအတွက် ဒေါ်လာ ၁၀,၀၀၀ ကုန်ကျသွားရာ သူ စွမ်းအားမနိုးထခင်ကကဲ့သို့ပင် ပြာကျလုနီးပါး ဖြစ်သွားသည်။ ဤမျှများပြားသော ပမာဏကို လက်လွှတ်လိုက်ရသည့် နာကျင်မှုမှာ ကမ္ဘာမြေပေါ်တွင် သူပထမဆုံး အသည်းကွဲခဲ့ရစဉ်ကထက်ပင် ပို၍ စူးရှနေသေးသည်။ သို့သော် မိုက်ကယ် သိပ်တော့ စိတ်ဓာတ်မကျပါ။ သူအခု သွားရောက်ရှာဖွေမည့် ဂေါ်ဗလင်များက ထိုဆုံးရှုံးမှုကို အဖတ်ဆယ်ပေးလိမ့်မည်။

ဝယ်ယူမှုကိစ္စများ အပြီးသတ်ကာ ငွေရှင်းပြီးနောက် မိုက်ကယ်သည် အသင်းအဖွဲ့မှ ချက်ချင်း ထွက်လာခဲ့သည်။ 'အက်ကွဲကြောင်း' အတွင်းသို့ ဝင်ရောက်ရန် သတ်မှတ်ထားသောနေရာဖြစ်သည့် 'ဆန်းပန်းခြံ' (Sun Park) သို့ တက္ကစီဖြင့် အပြေးနှင်ခဲ့သည်။ ဂေါ်ဗလင်လောက အက်ကွဲကြောင်းအတွင်း သူဝင်ရောက်ရမည့် အချိန်မှာ နံနက် ၁၁:၄၅ မှ မွန်းလွဲ ၁:၀၀ အထိဖြစ်ပြီး ယခုအချိန်မှာ ၁၁:၂၀ ရှိပြီဖြစ်သည်။

ကံကောင်းစွာဖြင့် အချိန်ရသေးသည်။ အက်ကွဲကြောင်းထဲသို့ အလျင်စလို ဝင်ရန် မလိုသေးဘဲ အချိန်မီရောက်ရှိကာ စာရင်းသွင်းနိုင်လျှင် အဆင်ပြေပြီဖြစ်သည်။ သို့သော်လည်း သူ အမြန်ဆုံးရောက်အောင် သွားနေဆဲပင်။

တက္ကစီပေါ်တွင် ထိုင်နေရင်း မိုက်ကယ်သည် အသင်းအဖွဲ့မှ ပို့ထားသော ဂေါ်ဗလင်လောက အက်ကွဲကြောင်းအကြောင်း အီးမေးလ်ကို တစ်ခေါက် ပြန်ဖတ်နေလိုက်သည်။ အီးမေးလ်တွင် အချက်အလက် သိပ်မများလှသဖြင့် ၁၀ မိနစ်အတွင်း ဖတ်ရှုပြီးသွားပြီး ကားပြတင်းပေါက်အပြင်ဘက်ကို ငေးကြည့်နေရုံမှလွဲ၍ ဘာမှလုပ်စရာ မရှိတော့ပေ။ အစွမ်းထက်သူများအသင်း (Supers Association) ၏ ဖိုရမ်တွင် ဝင်ရောက်ဖတ်ရှုနိုင်သော်လည်း မိုက်ကယ်မှာ စိတ်ငြိမ်လက်ငြိမ်ရှိမှသာ ထိုသို့လုပ်ချင်သည်။ လောလောဆယ်တွင်မူ သူ၏စိတ်မှာ အခြားအရာများဖြင့် ရှုပ်ထွေးနေလေသည်။