အခန်း (၄၃) - ပင်ပန်းအောင်မလုပ်နဲ့၊ ဉာဏ်သုံးပြီးလုပ်

“ရော့ ဒီမှာပါရှင့်”

ဧည့်ကြိုဝန်ထမ်းမလေးက မိုက်ကယ်လ်ထံသို့ စာရွက်တစ်ရွက် ကမ်းပေးရင်း ဆက်ပြောလိုက်သည်။

“တာဝန်ခံဆီရောက်ရင် ဒီစာရွက်ကို ပေးလိုက်ပါရှင့်။ ပြီးတော့ အက်ကြောင်း (Crack) ထဲမှာ သတိထားရမယ့်အချက်တွေနဲ့ အခွင့်အရေး လက်လွတ်မဖြစ်စေဖို့ လိုက်နာရမယ့် စာရင်းကိုလည်း လူကြီးမင်းရဲ့ အီးမေးလ်ထဲကို ပို့ပေးထားပါတယ်၊ အကယ်၍ လူကြီးမင်းဆီမှာ မလိုအပ်တဲ့ ပစ္စည်းတွေရှိလို့ အသင်းဆီ ပြန်ရောင်းချင်တယ်ဆိုရင်လည်း ကျွန်မတို့ စိတ်ဝင်စားတဲ့ ပစ္စည်းစာရင်းနဲ့ ဈေးနှုန်းတွေကို အီးမေးလ်ထဲမှာပဲ တစ်ခါတည်း ကြည့်လို့ရပါတယ်ရှင့်။ အက်ကြောင်းရှိတဲ့ တည်နေရာအတိအကျကိုတော့ အဲဒီစာရွက်ပေါ်မှာ ရေးထားပေးပါတယ်၊ လိုအပ်ရင် ကြည့်လိုက်ပါဦး။ နောက်ဆုံးတစ်ခုအနေနဲ့ကတော့... အသင်းရဲ့ အတွင်းရေးကိစ္စတွေနဲ့ ထူးခြားဆန်းပြားဖြစ်ရပ် အတော်များများဟာ အများပြည်သူကို အသိပေးလို့မရဘူးဆိုတာကိုတော့ မှတ်ထားပေးပါရှင့်၊ ဒါက လူကြီးမင်း အသင်းဝင်အဖြစ် စာရင်းသွင်းတုန်းက လက်ခံခဲ့တဲ့ အီးမေးလ်ထဲမှာလည်း ပါပြီးသားပါ”

“အဲလိုမျိုး ပါသေးလို့လား...” မိုက်ကယ်လ်က ဝေခွဲမရစွာဖြင့် သူ့ဘာသာ တိုးတိုးလေး ရေရွတ်မိသည်။

“ရှင်...?”

ဧည့်ကြိုမလေးက ပြန်ထူးလိုက်သော်လည်း သူမ၏ အပြုံးက ရုတ်တရက် စူးရှသွားပြီး တစ်မျိုးကြီး ဖြစ်သွားသည်။

“ဟ... ဟားဟား၊ နောက်တာပါဗျာ! ဒါပေါ့... ကျွန်တော် သိတာပေါ့။ ဒါမျိုးက စာနဲ့ရေးထားဖို့တောင် မလိုပါဘူး။ ဘာပဲဖြစ်ဖြစ် ကူညီပေးတာ ကျေးဇူးတင်ပါတယ်ဗျ!”

မိုက်ကယ်လ်တစ်ယောက် ထစ်ထစ်ငေါ့ငေါ့ဖြင့် ကမန်းကတန်း ဖုံးဖိပြောဆိုပြီး ထွက်လာခဲ့သည်။ သူ့ကျောပြင်ဆီသို့ ဧည့်ကြိုမလေး၏ သံသယဝင်နေသော အကြည့်များ စိုက်ကြည့်နေဆဲဆိုတာ သူ ခံစားမိနေ၏။ ထိုအကြည့်များ ပျောက်သွားတော့မှသာ သူက နဖူးပေါ်က ချွေးအေးများကို သုတ်လိုက်နိုင်သည်။

သူ့ရဲ့ စွမ်းအားနိုးထမှု (Awakening) အီးမေးလ်ထဲမှာ ပါတယ်ဆိုတဲ့ အကြောင်းအရာတွေကို မိုက်ကယ်လ် တကယ်ပင် မသိခဲ့ပါ။ 'စွမ်းအားရှင်များအသင်း (Supers Association)' ရဲ့ ဖိုရမ်လင့်ခ်ပါတဲ့ အီးမေးလ်ကတော့ မဟုတ်လောက်ဘူး၊ အဲဒီမှာက အဲဒီလင့်ခ်တစ်ခုပဲ ပါတာကိုး။ ဒါဆိုရင်တော့ အသက်ရှူဝင်လေထွက်လေ ထိန်းချုပ်နည်းနဲ့ တရားမှတ်နည်းတွေ ပါတဲ့ အီးမေးလ်ထဲမှာပဲ ဖြစ်ရမယ်။ ဝန်ခံရရင် မိုက်ကယ်လ်က အဲဒီအချက်တွေကို သိပ်စိတ်မဝင်စားခဲ့တာကြောင့် သတိမထားမိဘဲ လွတ်သွားခဲ့ခြင်း ဖြစ်သည်။

ဒါပေမဲ့လည်း ပြီးခဲ့တဲ့ ရက်ပိုင်းအတွင်း သူသိခဲ့ရသမျှတွေကို တစ်ယောက်ယောက်ကို ပြောပြဖို့တောင် အချိန်မရှိခဲ့တာ အမှန်ပင်။ သူက မူလကမ္ဘာ (Land of Origin) နဲ့ လက်ရှိကမ္ဘာကြားမှာ ကူးချည်သန်းချည် လုပ်နေရသည်မှာ ပျားတစ်ကောင်ထက်တောင် အလုပ်များနေသေးသည်။

အသင်းအဆောက်အအုံထဲက ထွက်လာရင်း မိုက်ကယ်လ်က လက်ထဲက စာရွက်ကို ငုံ့ကြည့်လိုက်သည်။ အရေးမကြီးသည့် အချက်အလက်များကို အမြန်ကျော်ဖတ်လိုက်ပြီး အက်ကြောင်းရှိမည့် တည်နေရာကိုသာ အာရုံစိုက်လိုက်သည်။ ဧည့်ကြိုမလေး ပြောသွားသည်မှာ 'ဆန်းပန်းခြံ (Sun Park)' တဲ့။ ထိုနေရာက သူ ငယ်ငယ်က ခဏခဏရောက်ဖူးသည့်နေရာမို့ မိုက်ကယ်လ် ရင်းနှီးပြီးသားပင်။ သို့သော် ထိုနေရာမှာ 'ညစ်ညမ်းအက်ကြောင်း (Corrupted Crack)' တစ်ခု ရှိနေလိမ့်မည်ဟုတော့ သူ လုံးဝ ထင်မထားခဲ့မိပေ။

ဆန်းပန်းခြံက ပန်းခြံသက်သက်တင် မဟုတ်ဘဲ 'ဝုဒ်စတုန်းမြို့ (Woodstone City)' ရဲ့ အထင်ကရနေရာ တစ်ခုလည်း ဖြစ်သည်။ ၎င်းက နာမည်ကြီးနေသည်မှာ ပန်းခြံကြောင့်မဟုတ်ဘဲ ပတ်ဝန်းကျင်က အဆောက်အအုံတွေကြောင့် ဖြစ်သည်။ ထိုနေရာကို 'ဆေးခန်းဈေးတန်း' ဟု လူသိများကြပြီး ပတ်ဝန်းကျင်ရှိ အဆောက်အအုံ ဆယ်လုံးတွင် ခုနစ်လုံးခန့်မှာ ဆေးဘက်ဆိုင်ရာ အဆောက်အအုံများ ဖြစ်ကြသည်။ နည်းနည်းတော့ ကြက်သီးထစရာ ကောင်းသော်လည်း ဝုဒ်စတုန်းမြို့ခံ အများစုမှာတော့ ထိုအမည်ထူးထူးခြားခြားကို နေသားကျနေကြပြီ ဖြစ်သည်။

သို့သော်လည်း ထိုနေရာတွင် ညစ်ညမ်းအက်ကြောင်းတစ်ခု ရှိနေသည်ကို သိလိုက်ရချိန်တွင် မိုက်ကယ်လ် ခေတ္တမျှ တွေဝေသွားသည်။ ညစ်ညမ်းအက်ကြောင်းဆိုသည်မှာ အနုတ်လက္ခဏာစွမ်းအင် (Negative Energy) များကို စုပ်ယူပြီး ရှင်သန်ကြခြင်း ဖြစ်သည်။ စိတ်ပျက်အားငယ်မှု၊ နာကျင်မှုနှင့် ဝမ်းနည်းပူဆွေးမှုတွေ လွှမ်းမိုးနေတတ်သည့် ဆေးခန်း သို့မဟုတ် ဆေးရုံတွေထက် ပိုကောင်းတဲ့ အနုတ်လက္ခဏာစုပ်ယူရာနေရာ ဘယ်မှာ ရှိဦးမှာလဲ?

“ပြည်ထောင်စုအဖွဲ့ (The Federation) က ဒါကို တမင်တကာ လုပ်ထားတာ ဖြစ်ရမယ်”

ပြည်ထောင်စုအဖွဲ့အနေနဲ့ အကြောင်းပြချက်မရှိဘဲ အများပြည်သူရဲ့ ဘေးကင်းလုံခြုံရေးကို စတေးလိမ့်မည်ဟု မိုက်ကယ်လ် မထင်ပါ။ အက်ကြောင်းတစ်ခုကို အချိန်အကြာကြီး လစ်လျူရှုထားမိရင် 'အမှောင်ခေတ် (Dark Age)' တုန်းကလိုပဲ သတိပေးချက်မရှိဘဲ မွန်းစတားတွေ ပေါက်ထွက်လာပြီး ပရမ်းပတာတွေ ဖြစ်သွားနိုင်သည် မဟုတ်ပါလား။

'အက်ကြောင်းက အနုတ်လက္ခဏာစွမ်းအင်တွေ ပိုစုပ်ယူလေလေ၊ မွန်းစတားတွေကို ပိုမြန်မြန် ပြန်ထုတ်ပေးနိုင်လေလေပဲ။ ပန်းခြံကတော့ အကောင်းလက္ခဏာစွမ်းအင်တွေနဲ့ အနုတ်လက္ခဏာတွေကို ဓာတ်ပြယ်စေပြီး ထိန်းညှိပေးထားတာ ဖြစ်မယ်။ ဒါပေမဲ့ အကောင်းဘက်က အရမ်းများသွားရင်လည်း အက်ကြောင်းရဲ့ တန်ဖိုးကို အပြည့်အဝ အသုံးချလို့ မရတော့ပြန်ဘူး'

သူ့ရဲ့ အတွေးသာ မှန်မယ်ဆိုလျှင် ထိုဆုံးဖြတ်ချက်နောက်ကွယ်က ဗျူဟာမြောက် စဉ်းစားပုံကို မိုက်ကယ်လ် မချီးကျူးဘဲ မနေနိုင်တော့ပါ။ သို့သော်လည်း စိတ်ထဲမှာတော့ တစ်မျိုးကြီး ခံစားနေရသည်။ သူ ငယ်စဉ်က တွေးထင်ခဲ့သလို ပြည်ထောင်စုအဖွဲ့က သူရဲကောင်းဆန်တဲ့ အဖွဲ့အစည်းကြီးတော့ မဟုတ်ခဲ့ပေ။ သူတို့ရဲ့ လုပ်ရပ်တွေက လက်တွေ့ဆန်လွန်းပြီး တွက်ချက်မှုတွေ သိပ်များလွန်းသည်။ ဒါကို နားလည်ပေးလို့ ရသော်လည်း စိတ်ထဲမှာတော့ သိပ်ပြီး အဆင်မပြေလှ။

သို့သော်လည်း မိုက်ကယ်လ်က ပြည်ထောင်စုအဖွဲ့ကို မုန်းတီးမသွားခဲ့ပါ။ အဆုံးသတ်မှာတော့ သူတို့ရဲ့ ကြိုးပမ်းမှုတွေက လူထုအတွက် အကျိုးရှိစေတာမို့ လေးစားစရာတော့ ကောင်းပါသည်။ ဒါပေမဲ့လည်း ဒီလောက် လူအများကြီးရဲ့ နှာခေါင်းစိပ်စိပ်အောက်မှာ အက်ကြောင်းတစ်ခုက နှစ်ပေါင်းများစွာ ရှိနေခဲ့တာကိုတော့ သူ တကယ်ပဲ အံ့သြမိသည်။ ဒါမှမဟုတ် လူတိုင်း သတိမထားမိတာလည်း မဟုတ်နိုင်ဘူး။ လူကြီးပိုင်း မြို့ခံတချို့တော့ ရိပ်မိနိုင်ပေမဲ့ အရေအတွက်တော့ သိပ်မများလောက်ပါ။

မိုက်ကယ်လ်ကို ပိုပြီး အံ့အားသင့်စေသည်မှာ အက်ကြောင်းရဲ့ တည်နေရာအတိအကျပင်။ ဆေးဆိုင်တစ်ဆိုင်ရဲ့ အတွင်းထဲမှာတဲ့။ ဧည့်ကြိုမလေး ပြောပုံအရဆိုရင်တော့ သူက အဲဒီက တာဝန်ခံကို စာရွက်ပေးလိုက်ရုံပင်။

“ငါ့ကိုယ်ငါ လျှို့ဝှက်အဖွဲ့အစည်းတစ်ခုက အဖွဲ့ဝင် ဖြစ်နေသလိုပဲ... အင်းလေ၊ အမှန်တရားနဲ့လည်း သိပ်မဝေးပါဘူးလေ” မိုက်ကယ်လ်က တိုးတိုးလေး ရေရွတ်လိုက်သည်။

အမှန်အတိုင်းပြောရရင် ဒီလိုတွေးလိုက်ရတာက သူ့ကို အနည်းငယ် ရင်ခုန်စိတ်လှုပ်ရှားစေသည်။ အသင်းအဆောက်အအုံထဲက ထွက်လာချိန်မှာ သူ့ဆီမှာ စွမ်းအားတွေရှိနေပြီး 'လပ်ကီး (Lucky)' နဲ့ 'ပရင့်စ် (Prince)' လို တောင့်တင်းတဲ့ လူစာရင်းရှိနေပေမဲ့ ရင်ထဲမှာတော့ စိတ်လှုပ်ရှားမှုနဲ့ စိုးရိမ်မှုတွေ ရောပြွမ်းနေခဲ့သည်။

သို့သော်... သူ ရုတ်တရက် ခြေလှမ်းတွေ ရပ်လိုက်မိသည်။

ခေတ္တမျှ ငြိမ်ကျသွားပြီးနောက် သူ့မျက်နှာက ပျက်သွားတော့သည်။

“တောက်! ငါတော့ အတာပဲ!”

မိုက်ကယ်လ်က ရုတ်တရက် တစ်ခုခုကို သတိရသွားပြီး သူ့ကိုယ်သူ အော်ဟစ်လိုက်ချင်စိတ် ပေါက်သွားသည်။ သူ ဘာလို့ ညစ်ညမ်းအက်ကြောင်းဆီကို သွားနေတာလဲ? အဲဒီထဲမှာ ရှိတဲ့ မွန်းစတားတွေကြောင့် မဟုတ်လား? ပြီးတော့ သူက မွန်းစတားတွေကို ဘာလို့ စိတ်ဝင်စားနေရတာလဲ? အဲဒါက သူတို့ကို သူ့ရဲ့ မသေမျိုးစစ်တပ် (Undead Army) အဖြစ် ပြောင်းလဲပစ်ချင်လို့လေ။

ပြီးတော့ သူက ဘာဖြစ်လို့ အခုချက်ချင်းကြီး မသေမျိုးတွေကို ပိုပြီး စာချုပ်ချုပ်ချင်နေရတာလဲ? အကြောင်းကတော့ သူ့ရဲ့ နေ့စဉ်ရရှိတဲ့ 'ဆင့်ကဲပြောင်းလဲမှု အမှတ် (Evolution Points)' တွေက မကြာခင်မှာ အသစ်ပြန်ဖြစ် (Refresh) တော့မှာမို့လို့ပဲ။ အကယ်၍ နောက်ထပ် သုံးနာရီအတွင်းမှာ သူ့ရဲ့ မသေမျိုးအရေအတွက်ကို မတိုးနိုင်ဘူးဆိုရင် သူက ရနိုင်တဲ့ ဆင့်ကဲပြောင်းလဲမှု အမှတ် ၁၁ မှတ်ကို လက်လွတ်ရပြီး ၄ မှတ်ပဲ ရတော့မှာ ဖြစ်သည်။

မသေမျိုးတွေကို စာချုပ်ချုပ်ဖို့က အချိန်လည်းပေးရသလို မှော်စွမ်းအင် (Mana) လည်း ကုန်သည်။ ပြီးတော့ ရှုံးနိမ့်သွားနိုင်တဲ့ အခွင့်အရေးကလည်း အမြဲရှိနေသေးသည်။ သူက ခေါ်ယူမှု (Summon) တွေကြားထဲမှာ ခဏနားမယ်ဆိုရင်တောင် သုံးနာရီဆိုတာ လုံလောက်ရုံပဲ ရှိသေးသည်။ ဒါကို မွန်းစတားတွေကို အရင် လိုက်လံအမဲလိုက်ရဦးမယ်ဆိုရင် အဖိုးတန်တဲ့ အချိန်တွေ ကုန်ဆုံးသွားလိမ့်မည်။

လောဘကြီးနေတာလား? မိုက်ကယ်လ်လည်း သိသည်။ လူတိုင်းက လောဘရှိကြတာပဲ။ ဒါပေမဲ့ ၂၄ နာရီစာ တိုးတက်မှုနှုန်းကို အလဟဿ အဆုံးရှုံးခံဖို့ကိုတော့ မိုက်ကယ်လ် မလိုလားပါ။

ထိုအချိန်မှာပဲ အတွေးတစ်ခုက သူ့ခေါင်းထဲ ဝင်လာသည်။ အသင်းမှာ ဂေါ်ဘလင် (Goblin) အလောင်းတွေ ရောင်းတယ် မဟုတ်လား? အက်ကြောင်းထဲမှာ အမဲလိုက်ဖို့ အချိန်ဖြုန်းနေမယ့်အစား သူ တတ်နိုင်သလောက် ဝယ်လိုက်ရုံပဲလေ။ အက်ကြောင်းဆီ ရောက်တာနဲ့ {မသေမျိုး ထမြောက်ခြင်း - Undead Revival} ကို ချက်ချင်း သုံးလို့ရပြီ။ အဆင့်တက်ဖို့ကတော့ စောင့်လို့ရသေးတယ်၊ အခုလောလောဆယ် သူ့ရဲ့ အဓိကပန်းတိုင်က ဆင့်ကဲပြောင်းလဲမှု အမှတ်တွေကို အများဆုံးရအောင် ယူဖို့ပဲ။

ဒါဟာ ပင်ပန်းအောင်လုပ်တာမဟုတ်ဘဲ ဉာဏ်သုံးပြီး လုပ်ဆောင်ခြင်းပင်ဖြစ်သည်။