အခန်း (၄၃) - လူမိုက်ကလေး
“တပ်မှူး ဟန်၊ ကျွန်တော့်ကို ရှာနေတယ်ဆိုလို့လားခင်ဗျာ”
ကျန်းဖုန်းအံ့ဩသွားရသည်။ဟန်ဒေါင်တစ်ယောက် သူအလုပ်လုပ်ရာနေရာအထိ ကိုယ်တိုင်ကိုယ်ကျ လာရှာသည်မှာ ယခုက ပထမဆုံးအကြိမ်ပင်။
“ဟုတ်တယ်၊ မင်းကို လူတစ်ယောက်နဲ့ မိတ်ဆက်ပေးမလို့”
ဟန်ဒေါင်သည် သူနှင့်အတူ ထောင်မှူးတစ်ယောက်ကို ခေါ်ဆောင်လာခဲ့သည်။ ထိုသူမှာ အသက်တစ်ဆယ့်ရှစ်၊ တစ်ဆယ့်ကိုးနှစ်ခန့်သာ ရှိဦးမည်။ ရုပ်ရည်မှာ အလွန်ချောမောလှပပြီး အသားအရေက ဖြူစင်နုနယ်သော်လည်း ယောက်ျားပီသသော အရှိန်အဝါမျိုးတော့ ကင်းမဲ့နေသည်။
“ဒါက ထောင်မှူးအသစ် ချောင် ပဲ၊ နာမည်က "ချောင်ကျိန်း" တဲ့။ သူက ဒီနေရာနဲ့ သိပ်မကျွမ်းကျင်သေးဘူး၊ ဒါကြောင့် မင်းကပဲ သူ့ကို ရက်အနည်းငယ်လောက် တာဝန်ယူပြီး လမ်းညွှန်ပြသပေးလိုက်ပါ။ ဘာအမှားအယွင်းမှ မရှိစေနဲ့ဦးနော်”
ဟန်ဒေါင်က လူသစ်ကို လက်ညှိုးထိုးပြရင်း ပြောလိုက်သည်။
“ဟုတ်ကဲ့၊ မှတ်သားထားပါ့မယ် ခင်ဗျာ”
ကျန်းဖုန်း ခေါင်းညိတ်ပြလိုက်သော်လည်း တစ်ခုခုတော့ မဟုတ်သေးဟု သူ အာရုံခံမိလိုက်သည်။
“ကျန်းဖုန်း ဆီကနေ သေချာသင်ယူ၊ ပြီးတော့ ငါ့ကို ပြဿနာတွေ လိုက်မရှာနဲ့ဦး၊ ကြားလား”
ဟန်ဒေါင်က ချောင်ကျိန်း ကိုလှည့်ပြောလိုက်သည်။
“ဟုတ်ကဲ့၊ အကုန်ကြားပြီးပါပြီ”
ချောင်ကျိန်း က စိတ်မရှည်သလို ပြန်ဖြေသည်။ ထောင်မှူးအဆင့်မျှသာ ရှိသေးသော်လည်း တပ်မှူးကို ထိုကဲ့သို့သော လေသံဖြင့် ရဲရဲဝံ့ဝံ့ ပြောဆိုရဲပုံထောက်လျှင် ဤကောင်လေးသည် လောကဓံ၏ အမှန်တရားကို မကြုံတွေ့ဖူးသေး၍သော်လည်းကောင်း၊ သို့မဟုတ်ပါက နောက်ခံအာဏာ အလွန်တောင့်တင်း၍သော်လည်းကောင်း ဖြစ်ရမည်။ ကျန်းဖုန်းကတော့ ဒုတိယအချက်ကိုသာ ပို၍ ယုံကြည်မိသည်။
ဟန်ဒေါင် ကတော့ စိတ်ဆိုးပုံမရဘဲ လှည့်ထွက်သွားလေသည်။ ခြေလှမ်းအနည်းငယ် လှမ်းပြီးခါမှ တစ်ခုခုကို သတိရသွားဟန်ဖြင့် ကျန်းဖုန်းကို လှည့်ပြောလိုက်ပြန်သည်။
“အခု နန်းတော်က နဂါးမြို့တော် တစ်ခွင်လုံးမှာရှိတဲ့ သူပုန်အဖွဲ့တွေကို လိုက်လံစစ်ဆေး နှိမ်နင်းနေတာဆိုတော့ အရင်ကထက် အများကြီး ပိုပြီး ဘေးကင်းသွားပြီ။ တစ်နေ့ကုန် ထောင်ထဲမှာပဲ အောင်းမနေနဲ့ဦး၊ သူများတွေ ရယ်စရာ ဖြစ်လိမ့်မယ်”
“ဟုတ်ကဲ့ပါ”
ကျန်းဖုန်းခေါင်းထပ်ညိတ်လိုက်သည်။ သူ ကျန်ပေ့ထောင်ထဲမှာ တစ်လ၊ နှစ်လခန့် အောင်းနေသည့် သတင်းများ ပျံ့နှံ့သွားမှန်း သူ သိလိုက်ရပြီ။
အစောပိုင်းက ယွမ်ထျန်းကန်းသေဆုံးပြီးနောက်ပိုင်း လူတိုင်းက သတိထားသင့်သည်ဟု ခံစားမိကြပြီး ကျန်းဖုန်းကဲ့သို့ပင် ကျန်ပေ့ထောင်ထဲ၌သာ အချိန်အတော်ကြာ နေထိုင်ခဲ့ကြကာ အပြင်သို့ စွန့်စားမထွက်ရဲကြချေ။ သို့သော် နေပြည်တော်တစ်မြို့လုံး၌ သူပုန်အဖွဲ့များကို စတင်အမဲလိုက် နှိမ်နင်းလာပြီး ထိုသူပုန်များကို အကြီးအကျယ် ခြောက်လှန့်နိုင်ခဲ့ချိန်တွင်မူ လူအများစုမှာ တဖြည်းဖြည်းနှင့် စိတ်အေးသွားကြကာ ထောင်ထဲ၌သာ အောင်းနေပြီး အပြင်မထွက်ဘဲ နေရန် မလိုအပ်တော့ဟု ခံစားလာကြသည်။
တဖြည်းဖြည်းနှင့် ကျန်းဖုန်း သည် ရယ်စရာတစ်ခု ဖြစ်လာခဲ့သည်။ လူအများက သူ့ကို သတ္တိကြောင်သူ၊ ကြောက်တတ်သူဟု ပြောဆိုကြပြီး ဘာမဟုတ်တာလေးကိုပင် ထိတ်လန့်နေသည်ဟု ဆိုကြသည်။ သို့သော် ဤသည်မှာ ကျန်းဖုန်း အလိုရှိသော ရလဒ်ပင် ဖြစ်၏။
သူသည် သံဆူးမြက် ခုခံကာကွယ်ရေးဝတ်စုံ ကို အမြဲတစေ ဝတ်ဆင်ထားကြောင်း၊ အမြဲတမ်း ဇွန်ဘီမှုန့် ထုပ်များစွာနှင့် မိုးကြိုးပေါက်ကွဲစေ့ နှစ်စေ့ကို ဆောင်ထားကြောင်းကိုပင် လူအများ သိရှိအောင် ရည်ရွယ်ချက်ရှိရှိ ပြုလုပ်ခဲ့သဖြင့် လူတိုင်းက ယွမ်ထျန်းကန်း နှင့် လေ လောင်ဟုတို့၏ သေဆုံးမှုကြောင့် သူ အလွန်အမင်း ထိတ်လန့်သွားခဲ့သည်ဟု ယုံကြည်သွားကြသည်။ ဤအတွက်ကြောင့်ပင် ဦးလေး ဟော့က သူ့ထံသို့ အထူးတလည်ပင် အကြိမ်အနည်းငယ် လာရောက်ကြည့်ရှုခဲ့သေးသည်။
...
“ထောင်ထဲမှာ ဘယ်လိုလူမျိုးတွေကို ပိတ်လှောင်ထားလဲ။ ကျွန်တော့်ကို လိုက်ပြပါဦး”
ဟန်ဒေါင် ထွက်သွားပြီးနောက် ချောင်ကျိန်းက ကျန်းဖုန်းကို ပြောလိုက်သည်။ သူ၏ လေသံမှာ အမိန့်ပေးသည့် သဘော ဆန်နေသည်။
“ထောင်မှူးချောင် ... အကျဉ်းသားတွေအကြောင်းကတော့ သိပ်ကြည့်စရာ မရှိပါဘူး။ အရင်ဆုံး တတိယအလွှာကို လိုက်ပြပါရစေ။ ခင်ဗျား နည်းနည်းအသားကျသွားမှ တခြားအရာတွေကို မိတ်ဆက်ပေးပါ့မယ်”
ကျန်းဖုန်း က ပြုံးလျက် ပြောလိုက်သည်။ ချောင်ကျိန်း ၏ နောက်ခံမှာ အမှန်တကယ်ပင် မရိုးရှင်းလှပေ။ ကျန်ပေ့ထောင်တွင် ထောင်မှူး လာလုပ်သည်မှာ အပျော်သဘော လာကစားသည်နှင့် ပိုတူနေသည်။ ဤကဲ့သို့သော လူမျိုးကို ပေါ့ဆစွာ ဆက်ဆံ၍မရသလို၊ တတိယအလွှာတွင် ပြဿနာ ရှာခွင့်လည်း ပေး၍မရချေ၊ အထူးသဖြင့် ငါ့ရှေ့မှောက်တွင် ဖြစ်သည်။
“ကောင်းပြီ၊ လမ်းပြစမ်းပါ”
ချောင်ကျိန်း က ခေါင်းညိတ်သည်။ သူက ဘေးနားကလူတွေကို အမိန့်ပေးရသည်ကို ကျင့်သားရနေပုံပေါ်သည်။
ထို့ကြောင့် ကျန်းဖုန်းသည် ချောင်ကျိန်း ကို ခေါ်ဆောင်ကာ တတိယအလွှာတစ်ခွင် လမ်းလျှောက်ပြသခဲ့ပြီး ဟန်ဒေါင် ၏ ခြံဝင်းဝင်ပေါက်နားသို့ပင် ဖြတ်လျှောက်ခဲ့ကြသည်။
“ထောင်ခန်းတွေထဲမှာ စိတ်ဝင်စားဖို့ကောင်းတဲ့ နေရာတွေ အများကြီး ရှိတယ်လို့ ကြားမိပါတယ်။ ဘာလို့ ကျွန်တော့်ကို အလုပ်လုပ်တဲ့ နေရာတွေပဲ လိုက်ပြနေတာလဲ”
လမ်းအတော်ဝေးဝေး လျှောက်ပြီးနောက်တွင် ချောင်ကျိန်း က စိတ်မဝင်စားဟန်ဖြင့် စိတ်မရှည်စွာ ပြောဆိုလာသည်။
“ထောင်မှူး ချောင်က ဘယ်လိုနေရာမျိုးကို ပိုပြီး စိတ်ဝင်စားဖို့ကောင်းတယ်လို့ ထင်လို့လဲဗျ၊ ဘယ်လိုမျိုး အပန်းဖြေချင်လို့လဲ”
ကျန်းဖုန်း က စူးစမ်းလိုစိတ်ဖြင့် မေးလိုက်သည်။
“ညှဉ်းပန်းနှိပ်စက်တဲ့ အခန်းပေါ့ဗျာ၊ အကျဉ်းသားတွေကို ရက်ရက်စက်စက် အပြစ်ပေးတဲ့နေရာ။ ညှဉ်းပန်းနှိပ်စက်တဲ့ အခန်းက ဘယ်လိုပုံစံမျိုးလဲဆိုတာ ကျွန်တော် တစ်ခါမှ မမြင်ဖူးဘူး၊ မြန်မြန် လိုက်ပြစမ်းပါ”
ချောင်ကျိန်း က ခဏမျှ စဉ်းစားပြီးနောက် စိတ်လှုပ်ရှားစွာဖြင့် ပြောလိုက်သည်။
“အာ... ကောင်းပါပြီ၊ ဒါဆို ကျွန်တော့်နောက်က လိုက်ခဲ့ပါ”
ကျန်းဖုန်းသည် ချောင်ကျိန်း ၏ တောက်ပနေသော မျက်ဝန်းများကို ကြည့်ကာ မကောင်းသော အတိတ်နိမိတ်တစ်ခုခုကို ခံစားလိုက်ရသော်လည်း ဤအချိန်တွင်မူ ဇွဲနပဲဖြင့်သာ ချောင်ကျိန်း ကို လိုက်လံပြသရန် သတ္တိမွေးလိုက်ရတော့သည်။ ကံကောင်းသည်မှာ ထောင်၏ အလွှာတိုင်းတွင် ညှဉ်းပန်းနှိပ်စက်သော အခန်းများစွာ ရှိနေခြင်းပင်။ တတိယအလွှာ၏ ညှဉ်းပန်းနှိပ်စက်သော အခန်းများမှာ အခန်းအများအပြား ရှိပြီး ၎င်းတို့ကို မကြာခဏ အသုံးပြုလေ့မရှိသဖြင့် ချောင်ကျိန်း ကို ပြသခြင်းက မည်သည့်ပြဿနာမျှ ဖြစ်လာစရာ အကြောင်းမရှိပေ။
မကြာမီပင် ကျန်းဖုန်းနှင့် ချောင်ကျိန်း တို့သည် သန့်ရှင်းရေး လုပ်ထားသော ညှဉ်းပန်းနှိပ်စက်ခန်းတစ်ခုထဲသို့ လမ်းလျှောက်ဝင်ခဲ့ကြသည်။ အကျဉ်းသားများကို နေ့စဉ်နှင့်အမျှ နှိပ်စက်လေ့ရှိသော ပထမနှင့် ဒုတိယအလွှာရှိ အခန်းများနှင့် နှိုင်းယှဉ်ပါက တတိယအလွှာ၏ ညှဉ်းပန်းနှိပ်စက်ခန်းမှာ သွေးညှီနံ့ အလွန်နည်းပါးပြီး ပိုမိုကျယ်ဝန်းလှသည်။ ဆန်းပြားသော ညှဉ်းပန်းနှိပ်စက်ရေး ကိရိယာအများအပြားမှာ အသုံးမပြုရသေးသဖြင့် အလွန်သစ်လွင်နေပုံရသည်။
ဤသည်မှာ အံ့ဩစရာတော့ မဟုတ်ပေ။ စကားပုံတစ်ခု ရှိသည်မဟုတ်ပါလား၊ ‘ရာဇဝတ်ဘေးသည် အရာရှိကြီးများထံ မသက်ရောက်စေရ’ ဟူ၍။ တတိယအလွှာအတွင်း ပိတ်လှောင်ခံရသူများသည် များသောအားဖြင့် တော်ဝင်မိသားစုဝင်များနှင့် ဆွေတော်မျိုးတော်များ၊ နန်းတော်၏ အဆင့်မြင့်အရာရှိကြီးများ သို့မဟုတ် အခြားနယ်ပယ်များမှ ထင်ရှားကျော်ကြားသော ပုဂ္ဂိုလ်များသာ ဖြစ်ကြသည်။ ယေဘုယျအားဖြင့် သေဒဏ်ထိုက်သော ရာဇဝတ်မှု ကျူးလွန်သူများ သို့မဟုတ် ဧကရာဇ်မင်းမြတ်ကို အမျက်ထွက်စေသူများသာလျှင် ဤနေရာ၌ အပြစ်ပေးခြင်းကို ခံရစမြဲ ဖြစ်သည်။
ထို့ပြင် တတိယအလွှာ၌ တစ်ကြိမ်မျှ ညှဉ်းပန်းနှိပ်စက်ခံရပြီဆိုလျှင် ထိုသူအတွက် တစ်ဖန်ပြန်လည် ရုန်းထွက်နိုင်ခွင့် မရှိတော့ပြီဟု ဆိုလိုခြင်း ဖြစ်သည်။ ယခင်က ရန်ချီ၏ ဖခင်ဖြစ်သူ ယန်ရုစုန်သည် တရားရုံးတော် အရာရှိများ၏ ပို့ဆောင်မှုဖြင့် ကျန်ပေ့ထောင်သို့ ရောက်ရှိလာပြီး တတိယအလွှာတွင် အကျဉ်းချခံထားရကာ ဤနေရာ၌ပင် အပြစ်ပေးခြင်းကို ခံခဲ့ရသည်။ ထို့နောက် မကြာမီမှာပင် သူ၏ တစ်မိသားစုလုံး ကွပ်မျက်ခြင်း ခံခဲ့ရလေသည်။
ထို့ကြောင့် တတိယအလွှာတွင် မပြောဘဲ နားလည်ထားကြသော စည်းကမ်းတစ်ခု ရှိသည်။ ဤနေရာ၌ ညှဉ်းပန်းနှိပ်စက်ခြင်းကို မခံရသရွေ့ တစ်နေ့နေ့တွင် ပြန်လည်ထွက်ခွာခွင့်ရမည့် အခွင့်အရေး ရှိနေသေးသည်။ သို့သော် တစ်ကြိမ်မျှ နှိပ်စက်ခံရပြီးပါက အသက်အန္တရာယ် ရှိသွားပြီပင် ဖြစ်၏။
“ဟာ... နံရံပေါ်က ဒါတွေက ဘာတွေလဲ၊ ဘယ်လို ကစားရတာလဲ။ ဒီလွှကြီးက ကြည့်ရတာ အရမ်းထူးဆန်းတာပဲ”
“ဟေး... ဒီနှာရိုက်ကြိုးတွေမှာ ဓားသွားတွေ အများကြီး တွဲချုပ်ထားတာပဲ။ ဒါနဲ့ လူတစ်ယောက်ကို ရိုက်လိုက်ရင် ဘယ်လို ခံစားချက်မျိုး ဖြစ်မလဲဟင်”
“ပြီးတော့ ဒီခုံတန်းကြီးက ကြည့်ရတာ အရမ်းထူးဆန်းတယ်၊ ဒါ သတင်းကြီးတဲ့ ကျားခုံတန်း ဆိုတာလား”
“ဒီပုဆိန်ကိုကျ ဘယ်လိုသုံးတာလဲ။ ဘာလို့ အက်ကြောင်းကြီး ဖြစ်နေတာလဲ။ ဒါနဲ့ လူတစ်ယောက်ကို ခုတ်လိုက်ရင် ဘာဖြစ်သွားမလဲ”
ညှဉ်းပန်းနှိပ်စက်ခန်းထဲသို့ ဝင်လာသည်နှင့် ချောင်ကျိန်း တစ်ယောက် ညှဉ်းပန်းနှိပ်စက်ရေး ကိရိယာများအကြောင်းကို မမေးဘဲ မနေနိုင်အောင် ဖြစ်နေတော့သည်။ ပစ္စည်းတစ်ခုချင်းစီကို ကောက်ကိုင်ကာ စူးစမ်းလေ့လာနေသည်။
ကျန်းဖုန်းသည် သူ၏ စိတ်လှုပ်ရှားမှုကို စောင့်ကြည့်ရင်း စိတ်ထဲတွင် စကားလုံးသုံးလုံး ပေါ်လာခဲ့သည်။
‘လူမိုက်ကလေး!’
ယခုခေတ်တွင် လူမိုက်ကလေးများသည် ကြီးမားသော အန္တရာယ်ကို ဖြစ်စေနိုင်သည်။ ဟန်ဒေါင်က ဤကဲ့သို့သော လူမျိုးကို သူ့ထံ အပ်နှံထားခဲ့ရာ ပြဿနာတစ်စုံတစ်ရာ ဖြစ်ပွားလာပါက မည်သို့လုပ်မည်နည်း။
“ထောင်မှူး ကျန်း ... ကျွန်တော် မေးနေတယ်လေ၊ ဒီပုဆိန်ကို ဘယ်လိုသုံးတာလဲ၊ ဘာလို့ အက်ကြောင်း ဖြစ်နေတာလဲလို့”
ချောင်ကျိန်း သည် ကျန်းဖုန်းတစ်ယောက် ဘာမှမပြောဘဲ ငေးငိုင်စွာ ရပ်နေသည်ကို သတိပြုမိသွားပြီး မကျေမနပ်ဖြင့် မေးလိုက်သည်။
“ဩော်... ဒီပုဆိန်ကို အရိုးချိုးပုဆိန် လို့ ခေါ်ပါတယ်၊ လူတစ်ယောက်ကို ထုရိုက်လိုက်တဲ့အခါ အသားအရေကို မပျက်စီးစေဘဲ အရိုးတွေကို ကြေမွသွားစေနိုင်ပါတယ်”
ကျန်းဖုန်းက ရှင်းပြလိုက်သည်။
“အဲဒီလောက်တောင် စိတ်ဝင်စားဖို့ကောင်းတာလား။ အစေခံတစ်ယောက်ရဲ့ အရိုးတွေကို အရိုက်ခံထားရတဲ့ ပုံစံမျိုး မပေါ်စေဘဲ ဘယ်လိုချိုးရမလဲဆိုတာ ကျွန်တော် အမြဲတမ်း စဉ်းစားနေခဲ့တာ။ ဒီမှာ ဒီလိုမျိုး ကိရိယာကောင်း ရှိနေလိမ့်မယ်လို့ မထင်ထားမိဘူး၊ ကျွန်တော် ပြန်ရင် ဒါကို ယူသွားပြီး ဆော့ကစားရမယ်”
ချောင်ကျိန်း က စိတ်လှုပ်ရှားစွာဖြင့် နားထောင်ပြီး ပြောလိုက်သည်။
“ဒီညှဉ်းပန်းနှိပ်စက်ရေး ကိရိယာတွေကို အပြင်ကို ယူသွားလို့ မရပါဘူး၊ ပျက်စီးအောင် လုပ်လို့လည်း မရပါဘူး။ အဲဒါကို ပြန်ထားလိုက်တာ ပိုကောင်းပါလိမ့်မယ်”
ကျန်းဖုန်း လန့်သွားပြီး အလျင်အမြန်ပင် သတိပေးလိုက်ရသည်။
ဤအခန်းထဲရှိ ညှဉ်းပန်းနှိပ်စက်ရေး ကိရိယာများကို မှတ်တမ်းတင် စာရင်းသွင်းထားခြင်း ဖြစ်သည်။ အကယ်၍ ကိရိယာများ ပျောက်ဆုံးသွားပါက ထောင်မှူးများတွင် တာဝန်ရှိသည်။ အထူးသဖြင့် တတိယအလွှာရှိ ကိရိယာများမှာ တစ်ခုမှ မရိုးရှင်းသဖြင့် အလွယ်တကူ ကစားစရာ မဟုတ်ချေ။ ကျန်းဖုန်းကိုယ်တိုင် ပထမအလွှာမှ တိတ်တဆိတ် ယူဆောင်လာခဲ့သော အရိုးထွင်းဓား ပင်လျှင် စွန့်ပစ်ထားသော ကိရိယာများထဲမှ ရွေးချယ်ကာ တိတ်တဆိတ် ခိုးထုတ်လာခဲ့ရခြင်း ဖြစ်သည်။
“မင်းကတော့ ကြောက်တတ်လိုက်တာ။ ထားလိုက်ပါတော့၊ ဒါဆိုရင် ဒီပုံစံအတိုင်း အိမ်ကလူတွေကို တစ်ခု လုပ်ခိုင်းလိုက်မယ်”
ချောင်ကျိန်း က ဂရုမစိုက်ဟန်ဖြင့် ပယ်ချလိုက်သည်။
သူသည် ခါးထောက်လျက် ရပ်ကာ ညှဉ်းပန်းနှိပ်စက်ရေး ကိရိယာများကို ပတ်ပတ်လည် ကြည့်ရှုရင်း မအောင့်နိုင်ဘဲ ရေရွတ်လိုက်မိသည်။
“ဒါတွေအကုန်လုံးက အပြစ်ပေးတဲ့ ကိရိယာတွေ ဖြစ်နေမှတော့၊ အာနိသင်ကို စမ်းသပ်မယ့်လူ မရှိရင် ဒီနေရာကို လာရတာ ဘာမှ အဓိပ္ပာယ် မရှိဘူးပဲ!”