အခန်း (၄၂ )- အဆင့်လေး

​"မဖြစ်ခင်က ကြိုတင်ကာကွယ်ခြင်းက ဖြစ်ပြီးမှ နောင်တရခြင်းထက် ပိုကောင်းသည်" ဟူသော စကားအတိုင်း ဟန်ဒေါင်သည် အလွန်အမင်း ထက်မြက်လွန်းသူ ဖြစ်သဖြင့် ကျန်းဖုန်းသည် ပို၍ သတိထားရန် လိုအပ်သည်။

အကယ်၍ တစ်စုံတစ်ခုကို စွန့်လွှတ်ရမည်ဆိုလျှင် သူသည် မနှမြောဘဲ စွန့်လွှတ်ရပေမည်။

​နောက်တစ်နေ့ မနက်မိုးလင်းစတွင်ပင် သတင်းများမှာ လျင်မြန်စွာ ပျံ့နှံ့သွားတော့သည်။ ကျန်ပေ့အကျဉ်းထောင်၏ ရာထူးတိုးခါစတပ်မှူး ယွမ်ထျန်းကန်းမှာ လမ်းမပေါ်တွင် မြားဖြင့် အပစ်ခံရ၍ သေဆုံးသွားကြောင်းနှင့် စစ်ကဲလေး(ကြီးကြပ် ရေးမှူး)မှာလည်း ၎င်း၏အိမ်၌ပင် အသတ်ခံလိုက်ရကြောင်း သတင်းများကြောင့် နန်းတော်တစ်ခုလုံး တုန်လှုပ်ချောက်ချားသွားခဲ့သည်။ နဂါးမြို့တော် အစိုးရရုံးမှာ ပြင်းထန်စွာ ပြစ်တင်ရှုတ်ချခြင်းနှင့် အပြစ်ပေးခြင်းကို ခံလိုက်ရသည်။

​ဧကရာဇ်မင်းမြတ်က အမိန့်တော်ထုတ်ပြန်ခဲ့သည်— နဂါးမြို့တော် အစိုးရရုံးသည် တရားခံအစစ်အမှန်ကို တစ်လအတွင်း ဖော်ထုတ်ရမည်။ ထို့ပြင် နဂါးမြို့တော်အတွင်း ပုန်းကွယ်နေသော သူပုန်အုပ်စုအားလုံးကို အမြစ်ပြတ် ရှင်းလင်းရမည်။ ထိုအခါ နဂါးမြို့တော် အစိုးရရုံးအပေါ် ကျရောက်လာသော ဖိအားမှာ အဆပေါင်းများစွာ တိုးလာတော့သည်။ မြို့တော်ဝန်သည် လက်နက်ကိုင်တပ်ဖွဲ့များနှင့် ပူးပေါင်းရှာဖွေခွင့်ကို လျှောက်ထားခဲ့ပြီး ဧကရာဇ်၏ ခွင့်ပြုချက်ကို ရရှိခဲ့သည်။

​ထို့ကြောင့် နောက်ရက်များတွင် နဂါးမြို့တော်ရှိ အကျဉ်းထောင်ကြီးများထဲသို့ လူအမြောက်အမြား နေ့စဉ်နှင့်အမျှ ပို့ဆောင်ခြင်း ခံခဲ့ရသည်။ အချို့မှာ တကယ့်သူပုန်များဖြစ်ပြီး အချို့မှာမူ မတရားစွန့်ချက်ခံရသူများ သို့မဟုတ် ဆက်နွှယ်မှုရှိသည်ဟု ယူဆခံရသူများ ဖြစ်သည်။ သို့သော် အပြစ်ရှိမရှိ မသေချာဘဲ သံသယဖြင့် ဖမ်းဆီးခံရသူများမှာ ပို၍ များပြားလှသည်။

​ပထမထပ်တွင် အလုပ်လုပ်နေသော ဦးလေးဟော့နှင့် တခြားသူများမှာ မနက်မိုးလင်းကတည်းက မိုးချုပ်သည့်အထိ အလုပ်များလွန်းသဖြင့် ရေတစ်ငုံသောက်ရန်ပင် အချိန်မရှိကြချေ။ သံသယရှိသူများကြောင့် ပထမထပ်မှာ ပြည့်လျှံနေတော့သည်။ ပထမထပ်ရှိ ဝန်ထမ်းများသည် အကျဉ်းသားများကို ငတ်ပြတ်မသွားစေရန် ဂရုစိုက်ရသလို၊ သူတို့ကို အချုပ်ခန်းနှင့် ညှဉ်းပန်းနှိပ်စက်ခန်းများအကြား ရွှေ့ပြောင်းပေးရန်လည်း ကူညီပေးရသည်။

ခဏအတွင်းမှာပင် ကျန်ပေ့အကျဉ်းထောင်တစ်ခုလုံး၌ ညည်းတွားသံများနှင့် မကျေနပ်သံများ ပြည့်နှက်သွားတော့သည်။

​ဤရှုပ်ထွေးမှုထဲသို့ မတရားဆွဲသွင်းခံရသော အပြစ်မဲ့ပြည်သူများ၏ နာကျင်စွာ အော်ဟစ်သံများ၊ သူပုန်အဖွဲ့ဝင်များ၏ လှောင်ပြောင်ရယ်မောသံများ၊ လေလွင့်သိုင်းသမားများနှင့် သူခိုးများ၏ အသနားခံသံများ၊ ထို့ထက်ပို၍ ထောင်စောင့်လေးများ၏ ညည်းညူသံများဖြင့် ဆူညံနေတော့သည်။

​ထိုအတောအတွင်း တတိယထပ်တွင် အလုပ်လုပ်နေသော ကျန်းဖုန်းမှာမူ အမြဲတမ်းအတိုင်း သူ၏အလုပ်ကိုသာ ဆက်လုပ်နေခဲ့သည်။ သံသယဖြင့် ဖမ်းဆီးလာသူအများစုမှာ အင်အားမရှိသော သာမန်လူများသာ ဖြစ်သဖြင့် တတိယထပ်ရှိ အကျဉ်းသားအရေအတွက်မှာ သိသိသာသာ ပြောင်းလဲခြင်း မရှိချေ။ ကျန်းဖုန်း၏ အလုပ်မှာ တစ်လျှောက်လုံး အေးအေးဆေးဆေးပင် ရှိနေခဲ့သည်။

​မျက်စိတစ်မှိတ်အတွင်းမှာပင် ဆယ်ရက် ကုန်ဆုံးသွားသည်။ ကျန်ပေ့အကျဉ်းထောင်၏ ပထမထပ်မှာ ဆန့်သလောက် ပြည့်နှက်နေပြီ ဖြစ်သည်။ နေ့စဉ်နှင့်အမျှ နဂါးမြို့တော် အစိုးရရုံးမှ လူများ ရောက်ရှိလာပြီး အကျဉ်းသားများကို စစ်ဆေးမေးမြန်းကြသည်။ ညှဉ်းပန်းနှိပ်စက်ခန်းတွင် သွေးအိုင်များ ဖြစ်ထွန်းနေပြီး အကျဉ်းသားများမှာလည်း တစ်သုတ်ပြီးတစ်သုတ် ဝင်လိုက်ထွက်လိုက်နှင့် နေ့စဉ်နေ့တိုင်း ဖြစ်ပျက်နေတော့သည်။

​ဤမျှလောက် ပြင်းထန်သော ဖိစီးမှုများကြောင့် အကျဉ်းသားများကို ထားပါဦး၊ ဦးလေးဟော့နှင့် တခြားသူများပင် ပိန်ချော်သွားကြပြီး အော်ဟစ်လွန်းသဖြင့် အသံများပင် ဝင်ကုန်ကြသည်။ သူတို့ တကယ်ပဲ မခံစားနိုင်တော့သည့်အခါ အော်ဟစ်နေရုံနှင့် မရတော့သဖြင့် ဦးလေးဟော့နှင့် သူ၏လူများသည် အသစ်ရောက်လာသော သံသယရှိသူများကို ကြိမ်လုံးဖြင့်သာ ဆော်ပလော်တီးတော့သည်— သူပုန်ဟု စွပ်စွဲခံရသူမှန်သမျှ ငြိမ်ဝပ်ပုဝပ်သွားစေရန် ရိုက်နှက်ဆုံးမခြင်းပင်။ ထိုအခါမှသာ ပထမထပ်မှ ဆဲဆိုသံများနှင့် အော်ဟစ်သံများ အနည်းငယ် တိတ်ဆိတ်သွားခဲ့သည်။ သို့သော် အချုပ်ခန်းများမှာမူ ပြည့်မြဲအတိုင်း ပြည့်နေဆဲပင်။

​နောက်ထပ် ဆယ်ရက် ကုန်ဆုံးသွားပြန်သည်။ ပထမထပ်ရှိ ထောင်စောင့်တိုင်းမှာ ဒေါသတကြီး မျက်နှာထားများ ဖြစ်နေကြပြီ။ ထမင်းဝေသော ထောင်စောင့်လေးများပင်လျှင် အကျဉ်းသားများ၏ အော်ဟစ်သံကို မခံနိုင်တော့ဘဲ တစ်ခါတစ်ရံ ဒေါသထွက်လာလျှင် ဆန်ပြုတ်များကို အချုပ်ခန်းထဲသို့ ဒီအတိုင်း ပစ်ထည့်လိုက်သဖြင့် အကျဉ်းသားများမှာ လုယက်စားသောက်ကြရင်း ဆဲဆိုရန်ဖြစ်ကြတော့သည်။

​ကျန်းဖုန်းမှာမူ တတိယထပ်တွင်သာ လိမ္မာယဉ်ကျေးစွာ နေထိုင်ခဲ့သည်။ သူသည် ရက်ပေါင်းနှစ်ဆယ် တိတိ အပြင်သို့ မထွက်ဘဲ ကျန်ပေ့အကျဉ်းထောင်ထဲမှာပင် စားသောက်နေထိုင်ခဲ့သည်။ တစ်ခါတစ်ရံတွင်မူ သူသည် ပထမထပ်သို့ ဆင်းသွားပြီး ဦးလေးဟော့ကို သွားရောက်နှုတ်ဆက်လေ့ရှိသည်။ လီမင်းဟယ်ကို အရက်တစ်အိုး သယ်ခိုင်းကာ ဦးလေးဟော့ စိတ်ပြေလက်ပျောက်ဖြစ်စေရန် ပေးကမ်းတတ်သည်။

အရက်သောက်ပြီးနောက် ဦးလေးဟော့မှာ စိတ်ဓာတ်များ တက်ကြွလာပြီး သားရေကြိမ်လုံးကို ဘေးဖယ်ကာ သံကြိမ်လုံးကို အသုံးပြု၍ အကျဉ်းသားများကို ရိုက်နှက်တော့သည်။ ထိုအခါမှစ၍ ကျန်းဖုန်းသည် အရက်ကို ဝှက်ထားလိုက်ပြီး သူ့ကို သွားတွေ့ရန် ခဲယဉ်းသွားတော့သည်။

​နောက်ထပ် ဆယ်ရက် ကုန်ဆုံးသွားပြန်သည်။ ဧကရာဇ်မင်းမြတ် သတ်မှတ်ထားသော နဂါးမြို့တော် အစိုးရရုံးအတွက် အချိန်ကန့်သတ်ချက်မှာ ကုန်ဆုံးသွားပြီ ဖြစ်သည်။ ကံကောင်းစွာဖြင့် တစ်လကြာ ရှာဖွေမှုအပြီးတွင် နဂါးမြို့တော် အစိုးရရုံးသည် ကြာနီဂိုဏ်း သူပုန်အချို့ကို ဖမ်းမိခဲ့ပြီး ၎င်းတို့နောက်သို့ လိုက်လံစုံစမ်းရာမှ နဂါးမြို့တော်အတွင်းရှိ သူပုန်စခန်းငယ်တစ်ခုကို ဖျက်ဆီးနိုင်ခဲ့သည်။

သို့သော်လည်း ဖမ်းဆီးရေးဆင်နွှဲနေစဉ်အတွင်း အရေးကြီးသော တရားခံအချို့မှာ လွတ်မြောက်သွားခဲ့ကြသည်။ နဂါးမြို့တော် အစိုးရရုံးသည် ယွမ်ထျန်းကန်းနှင့် လေလောင်ဟုတို့ကို သတ်ဖြတ်မှုအတွက် ထိုလွတ်မြောက်သွားသော သူပုန်များကိုသာ အပြစ်ပုံချလိုက်တော့သည်။

​ယနေ့နံနက် နန်းတွင်းညီလာခံတွင်—

မြို့တော်ဝန်နှင့် ဦးစီးမှူးဟွမ်တို့သည် တစ်လတာအတွင်း ဆောင်ရွက်ချက်များကို ဧကရာဇ်မင်းမြတ်ထံ အသေးစိတ် တင်ပြခဲ့ကြသည်။ အဓိကတရားခံများ လွတ်မြောက်သွားသဖြင့် ဧကရာဇ်မှာ မကျေမနပ် ဖြစ်နေသည်မှာ ထင်ရှားလှသည်။ မြို့တော်ဝန်သည် သုံးနှစ်စာ လစာဖြတ်တောက်ခံရပြီး ရာထူးတစ်ဆင့် လျှော့ချခံလိုက်ရသည်။

ဦးစီးမှူးဟွမ်မှာမူ ပို၍ ဆိုးရွားသည်။

သူသည်ဦးစီးမှူးအဆင့်မှ လက်ထောက်စစ်ကဲဒုဦးစီးမှူးအဆင့်သို့ ရာထူးလျှော့ချခံရပြီး ရာထူးအဆင့်မှာ ထောင်စောင့်တပ်ဖွဲ့မှူးလေးများနှင့် တန်းတူ ဖြစ်သွားခဲ့သည်။ ထို့ပြင် ကြိမ်ဒဏ် အချက်သုံးဆယ်ပါ ရိုက်နှက်ခံလိုက်ရသည်။ နဂါးမြို့တော် အစိုးရရုံးသို့ ပြန်လည်ရောက်ရှိလာသောအခါ သူသည် လူ့လောက၏ မတည်မြဲမှုကို အမှန်တကယ် သဘောပေါက်သွားတော့သည်။

​ရန်ချီ အမှုကြောင့် သူသည် နဂါးမြို့တော်၏ စစ်ကဲချုပ် ဖြစ်လာခဲ့ပြီး ဟန်ဒေါင်နှင့် ရာထူးတူခဲ့သူ ဖြစ်သည်။ ခဏတာအတွင်းမှာပင် သူသည် မြို့တော်ဝန် လိုင်အာရှန့် ၏ ညာလက်ရုံးအဖြစ် အစောင့်အကြပ်များ၊ အခြံအရံများဖြင့် ခမ်းနားစွာ သွားလာနိုင်ခဲ့ပြီး လအနည်းငယ်အတွင်း ငွေကြေးများစွာလည်း စုဆောင်းနိုင်ခဲ့သည်။ ယခုအခါ ဒုဦးစီးမှူး အဖြစ် ရာထူးကျသွားချိန်တွင် သူ အရင်က အနိုင်ကျင့်ခဲ့သူများမှာ ကလဲ့စားချေရန် ပြင်ဆင်နေကြပြီ ဖြစ်သည်။ အထူးသဖြင့် ဝန်ကြီးယန် ၏ လူဟောင်းများမှာ ဟွမ်ကို မည်သို့ အပြီးတိုင် ဖျက်ဆီးပစ်ရမလဲဆိုသည်ကို ကြံစည်နေကြတော့သည်။

​အပြင်လောကတွင် လှိုင်းတံပိုးများ ထန်နေသော်လည်း ကျန်းဖုန်းမှာမူ ကျန်ပေ့အကျဉ်းထောင်ထဲတွင်သာ တစ်လျှောက်လုံး ရှိနေခဲ့သည်။ တစ်လလုံးလုံး သူ အပြင်သို့ ခြေတစ်လှမ်းမျှ မချခဲ့ချေ။ နေရောင်ခြည်နှင့် ဝေးကွာနေသဖြင့် သူ၏ မျက်နှာမှာ အနည်းငယ် ဖြူဖျော့သွားခဲ့သည်။

​ယနေ့နံနက်စောစောတွင် နဂါးမြို့တော် အစိုးရရုံးကို ဧကရာဇ်က အပြစ်ပေးလိုက်သည့် သတင်းနှင့် တစ်လကြာ စုံစမ်းစစ်ဆေးမှု ရလဒ်များမှာ ကျန်ပေ့အကျဉ်းထောင်သို့ ရောက်ရှိလာသည်။ ပထမထပ်မှ အကျဉ်းသားအများစုကို ပြန်လွှတ်ပေးခဲ့သော်လည်း အများအပြား ကျန်ရှိနေသေးသည်။

​ကျန်းဖုန်းသည် သူ၏ အလုပ်ခန်းတွင် ထိုင်နေရင်း သူ၏ အချက်အလက်ပြစာမျက်နှာကို စစ်ဆေးလိုက်သည်။

​နာမည် - ကျန်ဖုန်း

​ကံကြမ္မာအမှတ် - ၅၉၉၇

​ကျင့်စဉ်ပညာ - ထောင်စောင့်ကျန်းမာရေးစောင့်ရှောက်မှုပညာ အဆင့်မြင့်အောင်မြင်မှု+

​ကျွမ်းကျင်မှုများ - ထောင်စောင့်လက်သီးရှည် အလယ်အလတ်အောင်မြင်မှု+ ၊ နတ်မြားအတတ် ဆရာအဆင့်+ ၊ မျောက်အသွင်ကိုယ်ဖော့ပညာ အဆင့်မြင့်အောင်မြင်မှု+

​နယ်ပယ်- အဆင့်ငါး သွေးသန့်စင်ခြင်းနယ်ပယ်

​နတ်စွမ်းအား - ထာဝရအသက်

​ကျန်းဖုန်းသည် အလွန်ပင် ဝမ်းသာသွားခဲ့သည်။ နဂါးမြို့တော် အစိုးရရုံးက ယွမ်ထျန်းကန်းနှင့် လေလောင်ဟုတို့ကို သတ်ဖြတ်မှုအတွက် လွတ်မြောက်သွားသော ကြာနီဂိုဏ်းသူပုန်များကိုသာ အပြစ်ပုံချလိုက်သဖြင့် တရားခံအစစ်အမှန်ဖြစ်သော သူ၏ အန္တရာယ်မှာ ကင်းစင်သွားခဲ့ပြီ ဖြစ်သည်။ သူ၏ ကံကြမ္မာအမှတ်မှာ နှစ်ထောင်ကျော်ခန့် ရုတ်တရက် တိုးလာခဲ့သည်။ ယခုအခါ ၅၉၉၇ ရှိနေပြီ ဖြစ်သည်။

​"ထောင်စောင့်ကျန်းမာရေးစောင့်ရှောက်မှုပညာ" ၏ ဘေးတွင် အပေါင်းလက္ခဏာ ပေါ်လာခဲ့ပြီ။ နောက်ဆုံးတွင် သူသည် သူ၏ နယ်ပယ်နှင့် အင်အားကို ထပ်မံ မြှင့်တင်နိုင်တော့မည် ဖြစ်သည်။

​ကျန်းဖုန်းသည် မည်သို့မျှ တွန့်ဆုတ်မနေဘဲ ကံကြမ္မာအမှတ် ငါးထောင်ကို "ထောင်စောင့်ကျန်းမာရေးစောင့်ရှောက်မှုပညာ" ထဲသို့ ချက်ချင်းပင် ထည့်သွင်းလိုက်သည်။ စာမျက်နှာပေါ်ရှိ အချက်အလက်များ ပြောင်းလဲသွားတော့သည်။

​နာမည် - ကျန်ဖုန်း

​ကံကြမ္မာအမှတ် - ၉၉၇

​ကျင့်စဉ်ပညာ - ထောင်စောင့်ကျန်းမာရေးစောင့်ရှောက်မှုပညာ ပြီးပြည့်စုံခြင်း

​ကျွမ်းကျင်မှုများ - ထောင်စောင့်လက်သီးရှည် အဆင့်မြင့်အောင်မြင်မှု ၊ နတ်မြားအတတ် အဆင့်မြင့်အောင်မြင်မှု ၊ မျောက်အသွင်ကိုယ်ဖော့ပညာ အဆင့်မြင့်အောင်မြင်မှု

​နယ်ပယ် - အဆင့်လေး အနှစ်သာရသန့်စင်ခြင်းနယ်ပယ်

​နတ်စွမ်းအား - ထာဝရအသက်

​"နောက်ဆုံးတော့ အဆင့်လေးကို ရောက်ပြီ!"

​ကျန်းဖုန်းသည် အလွန်ပင် ဝမ်းမြောက်သွားခဲ့သည်။ အဆင့်လေး အနှစ်သာရသန့်စင်ခြင်းနယ်ပယ်တွင် သူ၏ အတွင်းအား မှာ ပိုမို သန်မာလာရုံတင်မကဘဲ သူ၏ စိတ်ထဲတွင် နတ်ပင်လယ် တစ်ခု ပေါ်ပေါက်လာသည်ကို တွေ့ရှိလိုက်ရသည်။

​သူ၏ အမြင်အာရုံမှာ ပို၍ ဝေးဝေးကို မြင်နိုင်လာပြီး အကြားအာရုံမှာလည်း ပို၍ ကျယ်ပြန့်လာသည်။ မျက်လုံးများကို မှိတ်ထားလျှင်ပင် အနီးနားရှိ လူများ၏ အငွေ့အသက် အတက်အကျများကို အာရုံခံနိုင်လာသည်။ လူများ နီးကပ်လာခြင်းကို သိရှိနိုင်သလို အနီးအနားရှိ အန္တရာယ်များကိုလည်း ကြိုတင်အာရုံခံနိုင်သည်။

​ယွမ်ထျန်းကန်းသည် ဝေါယာဉ်ထဲတွင် ထိုင်နေစဉ် ကျန်းဖုန်း၏ ပထမဆုံးမြားကို အဘယ်ကြောင့် အာရုံခံမိပြီး အချိန်မီ ရှောင်တိမ်းနိုင်ခဲ့သည်ကို သူ ယခုမှ သဘောပေါက်သွားတော့သည်။ အကယ်၍ သူ၏ လေးအတတ်မှာ "နတ်ဘုရားနှင့် ဆက်သွယ်ခြင်း" နှင့် "လူနှင့်မြား တစ်သားတည်းကျခြင်း" အဆင့်သို့ ရောက်မနေဘဲ မြားများကို ဆက်တိုက် မပစ်ခတ်နိုင်ခဲ့ပါက ယွမ်ထျန်းကန်းသည် ထိုအာရုံခံနိုင်စွမ်းကို အသုံးပြုပြီး သူ့ကို အသေအလဲ ပြန်လည် တိုက်ခိုက်နိုင်ပေလိမ့်မည်။

​ပြန်စဉ်းစားကြည့်လျှင် သူ့ကို အောင်မြင်စွာ သတ်နိုင်ခဲ့ခြင်းမှာ ကံကောင်းလွန်းခြင်းကြောင့်ပင် ဖြစ်သည်။ သူ့ကို သတ်ပြီးနောက် သူ၏ ကံကြမ္မာအမှတ်မှာ သုံးထောင်ကျော်ခန့် တစ်ခါတည်း ခုန်တက်သွားခြင်းမှာ မဆန်းတော့ချေ။

​အခြုံပြောရလျှင် ကျန်းဖုန်း၏ စိတ်ထဲတွင် ထိတ်လန့်မှုများ ကျန်ရှိနေသေးသည်။ အင်အား မြင့်မားလာလေလေ၊ အဆင့်တစ်ခုနှင့်တစ်ခုအကြား ကွာဟချက်မှာ ပို၍ ကြီးမားလာလေလေပင်။ နောင်တွင် သူသည် ပို၍ပင် သတိထားရမည်၊ ပြဿနာထဲ မဝင်မိအောင် နေရမည်ဖြစ်ပြီး အထူးသဖြင့် မိမိအင်အားထက် ကျော်လွန်သော သတ်ဖြတ်မှုမျိုးကို မည်သည့်အခါမျှ ထပ်မံ မပြုလုပ်တော့ရန် ဆုံးဖြတ်လိုက်သည်။

အဆင့်မြင့် အဆင့်သုံးအဆင့် သိုင်းပညာရှင်တစ်ယောက်မှာ မည်မျှတောင် ကြောက်စရာကောင်းမည့် မိစ္ဆာတစ်ကောင် ဖြစ်နေမည်ကို မည်သူ သိနိုင်ပါမည်နည်း။

​"ကျန်းဖုန်း!"

​ရုတ်တရက် ဟန်ဒေါင်အသံ ထွက်ပေါ်လာသည်။