အခန်း (၃၉ )- တပ်မှူးဟန်၊ ခင်ဗျား ရှိလား။

​ယွမ်ထျန်းကန်း မေးခွန်းထုတ်လိုက်သည်။ သူ၏ ခါးနောက်ပိုင်းကို စမ်းကြည့်လိုက်ရာ သွေးအိုင်တစ်ခု ဖြစ်နေ၏။ ကျန်းဖုန်း ဘာမှပြန်မပြော။ လေးကြိုးကို ဆွဲကာ မြားကို တစ်ဖန် ပြန်ချိန်လိုက်ပြန်သည်။ ယွမ်ထျန်းကန်း တစ်ခုခု မှားနေပြီဟု ခံစားလိုက်ရသဖြင့် သူ၏ခန္ဓာကိုယ်ကို သစ်သားတိုင်တွင် ဆက်၍ မကပ်ရဲတော့ပေ။

"ဘုန်း!" ကျန်းဖုန်း မြားတစ်စင်း ပစ်ခတ်လိုက်သည်။ ပြင်းထန်သော စွမ်းအားကြောင့် မြားမှာ သစ်သားတိုင်ကို ဖောက်ထွက်သွားပြီး ယခုတစ်ကြိမ်တွင် မြားထိပ်ဖျားမှာ ခုနစ်စင်တီမီတာကျော်အထိ နက်ဝင်သွားခဲ့သည်။ သို့သော် အရင်တစ်ခေါက် သင်ခန်းစာကြောင့် ယွမ်ထျန်းကန်း သစ်သားတိုင်ကို မမှီရဲတော့။ သူ နောက်တစ်လှမ်းဆုတ်ကာ ကျန်းဖုန်း၏ အမြင်အာရုံကို ကွယ်ရန် တိုင်ကို အကာအကွယ်အဖြစ် သုံးလိုက်သည်။ ဒုတိယမြားမှာ တိုင်ကို ထိမှန်သွားပြီး တိုင်တစ်ခုလုံး အက်ကွဲသွားသည်ကို သူ မြင်လိုက်ရသည်။

နောက်ထပ် မြားအနည်းငယ်သာ ထပ်မှန်ပါက ဤတိုင်သည် လုံးဝ အစိတ်စိတ်အမွှာမွှာ ကွဲအက်သွားပြီး သူ့ကို အရှင်လတ်လတ် ပစ်မှတ်တစ်ခု ဖြစ်စေလိမ့်မည်။ ထို့ကြောင့် သူသည် ကျန်းဖုန်းဘက်သို့ မျက်နှာမူကာ ခန္ဓာကိုယ်ကို အမြန်ဆုံး နောက်ဆုတ်ရင်း ဆိုင်တံခါးဝဆီသို့ ပြေးဝင်သွားတော့သည်။ ဆိုင်ထဲသို့သာ ပုန်းကွယ်နိုင်ပါက ကျန်းဖုန်း သူ့ကို မြင်နိုင်တော့မည်မဟုတ်ဘဲ မည်မျှပင် လေးအတတ် ကျွမ်းကျင်ပါစေ အလကား ဖြစ်သွားလိမ့်မည်။

​"ရှုး!" "ရှုး!" "ရှုး!"

​ကျန်းဖုန်းက ဤအရာကို ကြိုတင်ခန့်မှန်းထားပုံရသည်။ သူသည် မြားသုံးစင်ကို အသာအယာပင် ဆက်တိုက် လွှတ်လိုက်၏။ မြားတစ်စင်းစီတိုင်းကို လပြည့်ဝန်းနီးပါး အပြည့်ဆွဲ၍ ပစ်ခတ်ထားခြင်း ဖြစ်သည်။ မြားများသည် လေထုကို ဖြတ်သန်းကာ အရှိန်အဟုန်ပြင်းစွာ ပျံသန်းသွားကြသည်။ မြားထိပ်ဖျားများတွင် ကြောက်မက်ဖွယ် စွမ်းအားများ ပါရှိနေသည်။

​"ချန်!" "ချန်!"

​ယွမ်ထျန်းကန်းသည် ဒါးမကြီးကို ဝေ့ယမ်းလိုက်ရာ သူ့ရှေ့တွင် ဒါးရိပ်များမှာ တံတိုင်းတစ်ခုကဲ့သို့ ပေါ်ပေါက်လာသည်။ သူသည် ပထမမြားနှစ်စင်ကို ပိတ်ဆို့နိုင်ခဲ့သော်လည်း တတိယမြားမှာမူ... အရင်အတိုင်းပင် ဖြစ်သည်။ သူ၏ ကာကွယ်ရေး အဖျက်ဆီးခံလိုက်ရသည်။ ထိုမြားမှာ သူ့ဝမ်းဗိုက်ကို ထိမှန်သွားခဲ့သည်။ သူ ဆိုင်ထဲသို့ တိုးဝင်ကာ အတင်းဝင်ရောက်နိုင်ခဲ့သော်လည်း ပုန်းကွယ်ရန် ဘေးသို့ မလှိမ့်ရသေးချေ။

​"ရှုး!" "ရှုး!" "ရှုး!"

​ကျန်းဖုန်းသည် နောက်ထပ် မြားသုံးစင်ကို ဆက်တိုက် ပစ်ခတ်လိုက်ပြန်သည်။ မြားတစ်စင်းစီတိုင်းမှာ စွမ်းအားအပြည့် ပေါက်ကွဲထွက်လာခြင်း ဖြစ်ပြီး လူနှင့်လေး တစ်သားတည်းကျနေသည့် အခြေအနေ ပင်။ လျှပ်စီးကဲ့သို့ မြန်ဆန်သော မြားများသည် ပြင်းထန်စွာ ဒဏ်ရာရနေသော ယွမ်ထျန်းကန်းကို ထိမှန်သွားပြီး သူ၏ ရင်ဘတ်နှင့် ဝမ်းဗိုက် ဘေးတစ်ဖက်တစ်ချက်စီကို ထပ်မံ စိုက်ဝင်သွားသည်။ မြားတစ်စင်စီတိုင်းက သူ့ခန္ဓာကိုယ်ကို ဖောက်ထွက်သွားပြီး သူ့ကို ကြမ်းပြင်ပေါ်တွင် ရိုက်နှက်ကပ်ထားသကဲ့သို့ ဖြစ်နေစေသည်။

​"မင်း..."

​ယွမ်ထျန်းကန်း နောက်ဆုံးတွင် ထိုလူပုံသဏ္ဍာန်ကို ရှင်းရှင်းလင်းလင်း မြင်လိုက်ရသည်။ ၎င်းမှာ အမိုးစွန်းနောက်ကွယ်တွင် ပုန်းကွယ်နေသော ညဝတ်အင်္ကျီဝတ်ထားသည့် အရိပ်တစ်ခု ဖြစ်သည်။ သူ၏ မျက်နှာတွင် မကျေနပ်မှုများ ပြည့်နှက်နေ၏။ အကယ်၍ ပြိုင်ဘက်က သူ့ကို စစ်မှန်သော ဓါးများ၊ လှံများနှင့် ယှဉ်ပြိုင်တိုက်ခိုက်ခဲ့ပါက သူ သေရကျိုးနပ်ပါသေးသည်။ သို့သော် ပြိုင်ဘက်က ထူးချွန်လှသော လေးအတတ်ကို အားကိုးကာ ချောင်းမြောင်းတိုက်ခိုက်ပြီး သူ့ကို ပစ်သတ်ခဲ့ခြင်းမှာ အလွန်ပင် ဒေါသထွက်စရာ ကောင်းလှသည်။

​"ရှုး!" "ရှုး!" "ရှုး!"

​ကျန်းဖုန်း ဘာမှမပြောဘဲ တိတ်ဆိတ်နေခဲ့သည်။ မြားသုံးစင်ပြီးနောက် နောက်ထပ် သုံးစင်၊ ဤသို့ဖြင့် သုံးလေးကြိမ်ခန့် ထပ်ခါတလဲလဲ ပစ်ခတ်လိုက်သည်။ မြားတစ်စင်းစီတိုင်းက ယွမ်ထျန်းကန်း၏ သေကွင်းသေကွက် နေရာများကိုသာ ထိမှန်ခဲ့သည်။ အထူးသဖြင့် နှလုံးဧရိယာ ဖြစ်သည်။ အချို့လူများ၏ နှလုံးမှာ ညာဘက်တွင် ရှိနေနိုင်ပြီး ကံကောင်းထောက်မစွာ အသက်ရှင်ကျန်ရစ်နိုင်သည်ကို ထည့်တွက်ကာ ကျန်းဖုန်းသည် သေချာစေရန် လုပ်ဆောင်ခဲ့သည်။ သူသည် ယွမ်ထျန်းကန်း၏ ဘယ်ဘက်နှင့် ညာဘက် ရင်ဘတ်ဧရိယာများထဲသို့ မြားခြောက်စင်း၊ ခုနစ်စင်းခန့် ပစ်သွင်းလိုက်ပြီး ယွမ်ထျန်းကန်း၏ နှလုံးကို ပျားအုံတစ်ခုကဲ့သို့ အပေါက်ပေါင်းများစွာ ဖြစ်သွားစေရန် သေချာအောင် လုပ်ဆောင်ခဲ့သည်။

ထို့နောက် သူ၏ မေးစေ့ဆီသို့ နောက်ထပ် မြားတစ်စင်း ထပ်မံ ပစ်လိုက်သည်။ ထိုမြားမှာ ယွမ်ထျန်းကန်း၏ မေးစေ့မှ ဝင်သွားကာ ခေါင်းနောက်ဘက်မှ ဖောက်ထွက်သွားပြီး မြားထိပ်ဖျားမှာ ကြမ်းပြင်တွင် စိုက်ဝင်သွားတော့သည်။ ထိုအခါမှသာ ကျန်ဖုန်းသည် မျောက်အသွင်လွတ်‌ မြောက်ခြင်းမှ"မျောက်ခိုးသော ကိုယ်ဖော့ပညာ" ကို အသုံးပြုကာ ညအမှောင်ထုထဲသို့ လျင်မြန်စွာ ပျောက်ကွယ်သွားတော့သည်။

​"အား... လူသတ်မှု ဖြစ်လို့ဗျို့!"

​မကြာမီမှာပင် ဆူညံသံကို ကြားရသဖြင့် ဆိုင်ပိုင်ရှင်မှာ နောက်ဖေးဝင်းထဲမှ ထွက်လာပြီး ဆိုင်ထဲတွင် ယွမ်ထျန်းကန်း၏ တုန်လှုပ်ချောက်ချားဖွယ် သေဆုံးနေမှုကို မြင်ကာ ထိတ်လန့်တကြား အော်ဟစ်လိုက်တော့သည်။ မကြာခင်မှာပင် နဂါးမြို့တော် အစိုးရရုံး မှ လူများ ဆူညံသံကို ကြားပြီး အပြေးအလွှား ရောက်ရှိလာကြသည်။

​ကျန်းဖုန်းသည် ယွမ်ထျန်းကန်းကို ပစ်သတ်ပြီးနောက် ချက်ချင်း ပြန်မသွားခဲ့ပေ။ ထိုအစား သူသည် လေလောင်ဟု၏ ခြံဝင်းဆီသို့ ဦးတည်ပြေးသွားခဲ့သည်။ ယွမ်ထျန်းကန်း သေဆုံးသွားပြီဖြစ်ရာ သူက လေလောင်ဟုကို မည်သို့ ချန်ထားပါမည်နည်း။ ပြိုင်ဘက်က သူ အခြေအနေမကောင်း ဖြစ်နေချိန်တွင် အခွင့်ကောင်းယူ နင်းခြေရဲခဲ့သဖြင့် ထိုသူ သေရမည်သာ ဖြစ်သည်။

​လေလောင်ဟု၏ ခြံဝင်းမှာ ဖုန်းယွဲ့အဆောက်အအုံနှင့် မလှမ်းမကမ်းတွင် ရှိပြီး သူ အိမ်သို့ စောစောစီးစီး ပြန်ရောက်နေခဲ့သည်။ ကျန်းဖုန်း ရောက်ရှိလာချိန်တွင် လေလောင်ဟုမှာ စာကြည့်ခန်းထဲ၌ ခြေထောက်ကို ရေနွေးစိမ်နေပြီး ကိုယ်လုပ်တော်တစ်ဦးက သူ့ပုခုံးများကို နှိပ်နယ်ပေးနေသည်။ ကျန်းဖုန်းသည် ဖယောင်းတိုင်မီးကြောင့် ထွက်ပေါ်လာသော အရိပ်ကို ကြည့်ကာ လေလောင်ဟု ရှိနေသည့် နေရာကို အကဲခတ်မိသွားသည်။

​"ရှုး!" "ရှုး!" "ရှုး!"

​သူသည် မြားသုံးစင်ကို ဆက်တိုက် လျင်မြန်စွာ ပစ်ခတ်လိုက်သည်။ ယခုတစ်ကြိမ်တွင်မူ သူသည် အခြားမြားအမျိုးအစားတစ်ခုသို့ ပြောင်းလဲအသုံးပြုခဲ့သည်။ မြားသုံးစင်မှာ ပြတင်းပေါက်၏ စက္ကူများကို ဖောက်ထွက်ကာ လေလောင်ဟုဆီသို့ တည့်တည့်မတ်မတ် ပျံသန်းသွားသည်။ ကြီးကြပ်ရေးမှူး တစ်ဦး ဖြစ်သည့်အတွက် လေလောင်ဟုတွင် အလယ်အလတ်အဆင့် အဆင့်သုံးဆင့် ၏ စွမ်းအား ရှိသည်။ "အဆင့်ခြောက် ကလီစာသန့်စင်ခြင်းနယ်ပယ်" ကို ကျင့်ကြံထားခြင်း ဖြစ်သည်။ ယခုအချိန်မှာ သူ အပန်းအဖြေဆုံး အချိန် ဖြစ်သည်။ စာအုပ်ဖတ်ရင်းနှင့် ကိုယ်လုပ်တော်၏ လက်ကို ပွတ်သပ်နေစဉ် အရေးကြီးသော အချိန်တွင် သူ အန္တရာယ်ကို အာရုံခံမိလိုက်သည်။

​"ဖျစ်!" "ဖျစ်!" "ဖျစ်!"

​သို့သော် သူ မတ်တပ်ရပ်ရုံသာ ရှိသေးသော်လည်း မြားသုံးစင်မှာ သူ့ရင်ဘတ်ထဲသို့ တစ်ပြိုင်နက်တည်း စိုက်ဝင်သွားခဲ့သည်။

​"အား..."

​လေလောင်ဟုအတွက် နှာဆေးဘူး သွားယူရန် လှည့်လိုက်ရုံသာ ရှိသေးသော ကိုယ်လုပ်တော်မှာ ဤမြင်ကွင်းကြောင့် အသိစိတ်များ လွတ်ထွက်မတတ် ထိတ်လန့်သွားခဲ့သည်။ သူမသည် တံခါးကို အမြန်တွန်းဖွင့်ကာ စာကြည့်ခန်းထဲမှ ပြေးထွက်သွားပြီး ခြံဝင်းထဲသို့ အော်ဟစ်ငိုယိုတော့သည်။ တံခါးမှာ ပွင့်ဟသွားသဖြင့် စာကြည့်ခန်းထဲမှ မြင်ကွင်းမှာ ပိုမို ရှင်းလင်းသွားသည်။ ကျန်းဖုန်း အခွင့်အရေးကို အရယူကာ နောက်ထပ် မြားသုံးစင်း ထပ်မံ ပစ်ခတ်လိုက်သည်။ မြားတစ်စင်းက လေလောင်ဟု၏ နဖူးကို ထိမှန်ပြီး ကျန်နှစ်စင်းက သူ၏ ရင်ဘတ် ဘယ်ညာကို ဖောက်ဝင်သွားရာ မြားသုံးစင်လုံးက သူ့ခန္ဓာကိုယ်ကို ဖောက်ထွက်သွားပြီး လေလောင်ဟုမှာ နောက်သို့ လဲကျကာ ထိုနေရာတွင်ပင် ပွဲချင်းပြီး သေဆုံးသွားတော့သည်။

​ကျန်းဖုန်း လှည့်ထွက်လာခဲ့ပြီး ကြီးကြပ် ရေးမှူးဟူ၏ ခြံဝင်းဆီသို့ ဦးတည်သွားသည်။ ရောက်ရှိလာသောအခါ ကျန်ဖုန်းသည် ကြီးကြပ် ရေးမှူးဟူ၏ စာကြည့်ခန်းဆီသို့ မြားသုံးစင် ပစ်ခတ်လိုက်သည်။

​"လူသတ်သမား!"

​မြားသုံးစင်း ပစ်ခတ်ပြီးသည်နှင့် ကြီးကြပ် ရမှူးဟူ၏ ခြံဝင်းထဲမှ ထိတ်လန့်တကြား အော်ဟစ်သံတစ်ခု ထွက်ပေါ်လာသည်။ ကျန်းဖုန်း အချိန်ဆွဲမနေဘဲ လှည့်ထွက်လာခဲ့သည်။ သူသည် ကြီးကြပ် ရေးမှူးဟူကို သတ်ရန် ရည်ရွယ်ချက်မရှိဘဲ အခြေအနေကို ရှုပ်ထွေးအောင် လုပ်ရန်သာ ရည်ရွယ်ခြင်း ဖြစ်သည်။

ထို့နောက် သူသည် ပျက်စီးယိုယွင်းနေသော ခြံဝင်းထဲသို့ ပြန်လာခဲ့သည်။ ဧကရာဇ်လေး ၊ ကျန်ရှိသော မြားများ၊ ညဝတ်အင်္ကျီများနှင့် အားလုံးကို ဝှက်မ်းလိုက်သည်။ အဝတ်အစားလဲပြီး မူလရုပ်သွင်သို့ ပြန်ပြောင်းပြီးနောက် ကျန်းဖုန်းသည် ဖုန်းယွဲ့အဆောက်အအုံမှ ဝယ်လာသော သျှန်အရက် တစ်အိုးကို သောက်လိုက်ပြီး ကျန့်ပေအကျဉ်းထောင် သို့ လျင်မြန်စွာ ရောက်ရှိသွားသည်။

အရက်နံ့ တထောင်ထောင်ဖြင့် သူသည် ဟန်ဒေါင်ခြံဝင်း တံခါးဝတွင် ရပ်လိုက်သည်။ ဟန်ဒေါင်သည် အကျဉ်းထောင်ထဲတွင် နေထိုင်လေ့ရှိသည်။ အကျဉ်းထောင်အတွင်းရှိ အခြားနေရာများနှင့် နှိုင်းယှဉ်ပါက ဟန်ဒေါင် နေထိုင်သော ခြံဝင်းမှာ တိတ်ဆိတ်ပြီး လင်းထိန်နေကာ အနှောင့်အယှက်ကင်းသော နေရာ၊ ကျင့်ကြံခြင်း အတွက် နေရာကောင်းတစ်ခု ဖြစ်သည်။

​"အဟမ်း... တပ်မှူးဟန်၊ ရှိလားဗျာ။ ကျွန်တော် တပ်မှူးယွမ်နဲ့ နားလည်မှုလွဲတာတွေကို ရှင်းလိုက်ပါပြီ၊ သူက အမှတ်အသားတံဆိပ် ကို ခင်ဗျားဆီ ပြန်ပေးဖို့ မမေ့နဲ့လို့ ပြောလို့၊ ကျွန်တော် အမှတ်အသားတံဆိပ် လာပြန်ပေးတာပါ" ကျန်းဖုန်း လေချဉ်တက်ရင်း ပြောလိုက်သည်။

​"အမှတ်အသားတံဆိပ်ကို တံခါးမှာ ချိတ်ထားခဲ့ပြီး ပြန်တော့!" ဟန်ဒေါင်အသံက အိမ်ထဲမှ ထွက်ပေါ်လာသည်။ ညသန်းခေါင်ယံတွင် အနှောင့်အယှက်ပေးခံရသဖြင့် သူမ စိတ်အနှောင့်အယှက်ဖြစ်ရသော်လည်း ကျန်းဖုန်းကို ဒုက္ခရောက်အောင် လုပ်ခဲ့မိသည်ကို သတိရသဖြင့် သူမ ဒေါသကို ထိန်းထားလိုက်သည်။

​"ကောင်းပါပြီ၊ ကျွန်တော် တံဆိပ်ကို ချိတ်ထားပေးပါ့မယ်၊ ယူဖို့မမေ့နဲ့ဦးနော်၊ ကျွန်တော် သွားပြီ" ကျန်းဖုန်းသည် တံဆိပ်ကို တံခါးတွင် ကပေါက်တိက‌ ပေါက်ချာပဲ ချိတ်လိုက်သည်။ ထိုသျှန်အရက်အိုးကို အတွင်းအားသွေးသား ဖြင့် မချေဖျက်ရသေးသဖြင့် အရက်ရှိန် တက်လာပြီး ကျန်းဖုန်း၏ လက်နှင့်ခြေထောက်များမှာ တကယ့်ကို သွက်လက်မှု မရှိတော့ပေ။ သို့သော် ၎င်းမှာ သူ လိုချင်သော ရလဒ်ပင် ဖြစ်သည်။

​"တပ်မှူးကြီးဟန်၊ မဟုတ်တော့ဘူးဗျ၊ တပ်မှူးယွမ် တစ်ခုခု ဖြစ်သွားပြီ"

​ကျန်းဖုန်း လှည့်ထွက်ခါနီးတွင်ပင် အကျဉ်းထောင်အစောင့်တစ်ဦး အပြေးအလွှား ဝင်ရောက်လာပြီး အပြင်မှ အော်ဟစ်ပြောဆိုလိုက်သည်။

​"ပါးစပ်ပိတ်စမ်း၊ တပ်မှူး ကြီးဟန် နားနေတုန်းပဲ၊ အသံလျှော့" ကျန်းဖုန်းက သူ့ကို တားလိုက်သည်။

​"ဖယ်စမ်း၊ တပ်မှူးယွမ် အသတ်ခံလိုက်ရပြီ၊ မင်း သိလား" ထိုအကျဉ်းထောင်အစောင့်က ကျန်ဖုန်းကို အကျဉ်းထောင်အရာရှိ တစ်ဦးမျှသာဟု သတ်မှတ်ပြီး ဂရုမစိုက်ပေ။

​"နင် ဘာပြောလိုက်တယ်၊ တပ်မှူးယွမ် ဘာဖြစ်တာလဲ" ဟန်ဒေါင် အိမ်ထဲမှ အပြေးအလွှား ထွက်လာခဲ့သည်။

​"တပ်မှူးကြီးဟန်ကို သတင်းပို့ပါတယ်၊ တပ်မှူးယွမ် မြားနဲ့ အပစ်ခံရပြီး သေဆုံးသွားပါပြီ၊ ထျန်းယွမ်လမ်း က ဆိုင်တစ်ဆိုင်ထဲမှာတင်ပါ၊ ဦးစီးမှူးဟွမ်က အခင်းဖြစ်ပွားရာနေရာကို ရောက်နေပါပြီ၊ သူက ကျွန်တော့်ကို တပ်မှူးကြီးဟန်ကို အကြောင်းကြားဖို့ လွှတ်လိုက်တာပါ" အကျဉ်းထောင်အစောင့်က ဒူးထောက်၍ သတင်းပို့သည်။

​"မဟဟုတ်တာ၊ တပ်မှူးယွမ်က အခုတင်ပဲ ကပ္ပတိန်တွေ၊ အရာရှိတွေနဲ့ အရက်အတူတူ သောက်ပြီးခါစပဲ၊ ကျွန်တော်တို့ သူ့ကို လိုက်ပို့သေးတယ်၊ ဝေါယာဉ်နဲ့ ပြန်သွားတာ၊ လျှောက်မပြောနဲ့" ကျန်းဖုန်းက အရက်နံ့တထောင်ထောင်ဖြင့် စွပ်စွဲလိုက်သည်။

​"သခင်မ၊ တပ်မှူးယွမ် အပြန်လမ်းမှာ ဓားပြတွေရဲ့ သတ်ဖြတ်ခြင်းကို ခံလိုက်ရတာပါ" အကျဉ်းထောင်အစောင့်က ရှင်းပြသည်။

​"ငါ့ကို အဲဒီကို အမြန်ခေါ်သွား" ဟန်ဒေါင်သည် ထိုအစောင့် သူမကို လိမ်ရဲမည်မဟုတ်ကြောင်း သိသည်။ သူမ ဘေးတွင် အရက်မူးပြီး ဝေဝေဝါးဝါး ဖြစ်နေသော ကျန်းဖုန်းကို မြင်သောအခါ ဒေါသတကြီး အော်ဟစ်လိုက်သည် - "မင်းလည်း ငါနဲ့အတူ လိုက်ခဲ့!"