အခန်း( ၃၄) - တပ်မှူးလီ... ကျွန်တော့်လက်သီးအစွမ်းကို မြည်းစမ်းကြည့်စမ်း
“အော်... ကျန်းဖုန်းကိုး။ မင်းကို ထောင် စောင့်တပ်မှူးကြီးဟန်က ရာထူးတိုးပေးလိုက်တယ်လို့ ငါကြားမိသား။”
လီမင်ဟယ်က နောက်ဆုံးတွင် နှုတ်ဟလာခဲ့သည်။
“တပ်မှူးမင်းကြီးရဲ့ ချီးမြှောက်မှုကြောင့်သာ ကျွန်တော် တတိယအဆင့်မှာ လက်ထောက်အဖြစ် တာဝန်ထမ်းဆောင်ခွင့် ရခဲ့တာပါခင်ဗျာ။”
ကျန်းဖုန်းက လီမင်ဟယ်ကို မပြစ်မှားမိစေရန် အထူးသတိထားရင်း ရိုရိုသေသေ ပြောလိုက်သည်။
“ငါတို့အားလုံးက နန်းတွင်းအတွက် အမှုထမ်းနေကြတာပဲ။ အထင်မလွဲစမ်းနဲ့ အကျဉ်းထောင်မှူးကျန်း။”
လီမင်ဟယ်က အေးစက်စက် နှာခေါင်းရှုံ့လိုက်၏။
“ကျွန်တော့်အမှားပါခင်ဗျာ... သခင်ကြီး မိန့်ဆိုတာ မှန်လှပါတယ်တကား။”
ကျန်းဖုန်းက နောက်တစ်ကြိမ် ခါးကို ညွတ်ကိုင်း၍ အလေးပြုလိုက်ပြန်သည်။
“မင်း သွားနိုင်ပြီ၊ လိုအပ်ရင် ငါ ပြန်ခေါ်လိုက်မယ်။”
လီမင်ဟယ်၏ သဘောထားက အလွန်ပင် အေးစက်လှသည်။
ကျန်းဖုန်းသည် လက်ဗလာဖြင့် လာခဲ့ခြင်း ဖြစ်သည်။ ၎င်းမှာ လက်အောက်ငယ်သားတစ်ဦးက အထက်လူကြီးနှင့် ပထမဆုံးအကြိမ် တွေ့ဆုံရမည့် ပုံစံမျိုး မဟုတ်ပေ။ သူ၏ အမူအရာက လက်ခံနိုင်လောက်သည် ဆိုရသော်လည်း လက်ဆောင်မပါဘဲနှင့်မူ မည်မျှပင် ရိုသေပြပြ အပေါ်ယံဟန်ဆောင်မှုသက်သက်ဟုသာ မြင်ကြပေလိမ့်မည်။
“ငယ်သား ခွင့်ပြုပါဦးခင်ဗျာ။”
ကျန်းဖုန်းသည် လှည့်ထွက်ခဲ့တော့သည်။
“သခင်ကြီး... ကြည့်ရတာ ကျန်းဖုန်းက သခင်ကြီးကို မရိုသေဘူး ထင်တယ်ဗျ။”
“သူက တကယ်ပဲ လက်ဗလာနဲ့ လာရဲတယ်ပေါ့။”
“အကယ်၍ သခင်ကြီးဘက်က သူ့ကို ပညာလေးဘာလေး မပြထားရင် နောင်ကျရင် သခင်ကြီးကို ရိုသေခန့်ညားကြတော့မှာ မဟုတ်ဘူး။”
လီမင်ဟယ်၏ ဘေးတွင်ရှိသော ကျန်ထောင်မှူးအချို့က ဆွပေးကြတော့သည်။
“ဟွန်း...”
လီမင်ဟယ်က လက်ဖက်ရည်ခွက်ကို စားပွဲပေါ် ဆောင့်ချလိုက်ရင်း မလိုမုန်းထားစိတ်ဖြင့် ပြောလိုက်သည်။
“မလောကြနဲ့ဦး။ ထောင် စောင့်တပ်မှူးကြီးဟန်က ငါ့ကို ခေါ်ထားတယ်။ သူ့ကို နောက်မှ ငါ ရှင်းမယ်။”
“ငါ သွားတော့မယ်။”
သွေးသန့်စင်ခြင်းနယ်ပယ် ၏ ပဉ္စမအဆင့် ကျင့်ကြံခြင်း ရှိသဖြင့် ကျန်းဖုန်း၏ အာရုံခံစားမှုက အလွန်ပင် ထက်မြက်လှရာ လီမင်ဟယ်နှင့် အကျဥ်းထောင်မှူးဆွန်းတို့၏ စကားဝိုင်းကို အတိုင်းသား ကြားနေရသည်။ မိမိ၏ ဗလာဖြစ်နေသော လက်နှစ်ဖက်ကို ပြန်ကြည့်မိမှသာ လီမင်ဟယ်၏ သဘောထား အဘယ်ကြောင့် ဤမျှ အေးစက်နေရသည်ကို ကျန်းဖုန်း သဘောပေါက်သွားတော့သည်။ သူ စိုးရိမ်ပူပန်သွားမိပြီး ဤအကျန်းထောင်မှူး ရာထူးက ဒုက္ခတစ်ခု ဖြစ်လာတော့မည်ဟု ခံစားလိုက်ရသည်။
...
လီမင်ဟယ်သည် ဟန် ဒေါင်း၏ အိမ်ရာဝင်းလေးသို့ ရောက်ရှိလာခဲ့သည်။ တံခါးကို ခေါက်ရင်း—
“ငယ်သား တပ်မှူးမင်းကြီးကို ဂါရဝပြုပါတယ်ခင်ဗျာ။” ဟု ဆိုလိုက်သည်။
“ထပါ။ ငါ မင်းကို စောင့်ကြည့်ခိုင်းထားတဲ့ ပြုပြင်မွမ်းမံရေး အစီအစဉ်က ဘယ်လောက်အထိ ခရီးပေါက်နေပြီလဲ။”
ဟန် ဒေါင်သည် သူမ၏ သီးသန့်အိမ်ရာဝင်းထဲတွင် ထိုင်ကာ အသက်ရှူသွင်းရှူထုတ်လုပ်ရင်း (ချီ) စွမ်းအင်များကို စုပ်ယူနေသည်။ သူမသည် သိုင်းပညာကို အလွန်ရူးသွပ်သူ ဖြစ်၏။ သူမ၏ နောက်ခံအသိုင်းအဝိုင်းအရ ဆိုလျှင် ဤထက် ပိုမိုကောင်းမွန်သော နန်းတွင်းရာထူးကို ရရှိနိုင်သော်လည်း ကျန့်ပေ့အကျန်းထောင်တွင် နေထိုင်ခြင်းက အလုပ်တာဝန် ပေါ့ပါးပြီး ကျင့်ကြံရန် အချိန်အလုံအလောက် ရရှိစေသည်။
“ဒီပြုပြင်မွမ်းမံရေး အစီအစဉ်က အဓိကအားဖြင့် ပထမအဆင့်ကို ရည်ရွယ်တာပါ။ သခင်ကြီးရဲ့ ညွှန်ကြားချက်အတိုင်း လုရှန်ဟိုင်းကို တာဝန်ပေးပြီး ကိုင်တွယ်ခိုင်းထားပါတယ်၊ လက်ရှိမှာတော့ သုံးပုံတစ်ပုံလောက် ပြီးစီးနေပါပြီ။ နောက်တစ်လဆိုရင်တော့ လုံးဝ ပြီးစီးသွားမှာပါခင်ဗျာ။”
လီမင်ဟယ်က သတင်းပို့လိုက်သည်။
“အင်း... သေချာ စောင့်ကြည့်စမ်း။ အကယ်၍ တခြားသူပုန်ဂိုဏ်းတွေက ထောင်ကို လာစီးနင်းဖို့ ထပ်ကြိုးစားရင်တောင် အဝင်လမ်းကြောင်းကို လွယ်လွယ်နဲ့ မဖောက်ဖျက်နိုင်စေရဘူး။”
ဟန် ဒေါင်က မျက်လုံးမှိတ်ထားလျက်ပင် မြွက်ဆိုလိုက်သည်။ သူမ၏ ခန္ဓာကိုယ်ပတ်လည်တွင် မြင်တွေ့နိုင်သော လေပွေလှိုင်းစွမ်းအင်များ ဝဲပျံနေပြီး ၎င်းတို့သည် ပါးစပ်၊ နှာခေါင်းနှင့် ချွေးပေါက်များမှတစ်ဆင့် အတွင်းသို့ စီးဝင်သွားကြသည်။ သူမ၏ ဝမ်းဗိုက်က နိမ့်ချည်မြင့်ချည် ဖြစ်နေစဉ်တွင် သွေးကြောများအတွင်း၌ နူးညံ့သော စမ်းရေအလား စွမ်းအင်များ စီးဆင်းနေပုံရသည်။
“... နားလည်ပါပြီ သခင်ကြီး။”
လီမင်ဟယ်သည် လှည့်ထွက်တော့မည့်ဆဲဆဲတွင် တစ်ခုခုကို သတိရသွားသည်။ စမ်းသပ်သည့်အနေဖြင့် သူက—
“ဒါနဲ့... သခင်ကြီးကိုယ်တိုင် ပထမအဆင့်ကနေ တတိယအဆင့်ထောင်မှူးအဖြစ် ပြောင်းရွှေ့ပေးလိုက်တဲ့ ကျန်းဖုန်းက ဒီနေ့ပဲ တတိယအဆင့်မှာ တာဝန်စထမ်းဆောင်နေပါပြီခင်ဗျာ။” ဟု ထည့်ပြောလိုက်သည်။
ဟန် ဒေါင်က ဘာမျှ ပြန်မပြောဘဲ အတွင်းအသက်ရှူခြင်းကျင့်စဉ်၏ အရေးကြီးသော အခိုက်အတန့်သို့ ရောက်ရှိနေပုံရသည်။ လီမင်ဟယ်လည်း ချက်ချင်းပင် ဆုတ်ခွာခဲ့တော့သည်။
ဟန် ဒေါင်၏ သီးသန့်အိမ်ရာဝင်းမှ ထွက်လာပြီးနောက် သူက ပြုံးလိုက်ရင်း စိတ်ထဲမှ တွေးမိလိုက်သည်—
“တပ်မှူးဟန်က မင်းရဲ့ နောက်ခံလို့ တကယ်ထင်နေတာလား၊ ငါ မင်းကို မကိုင်တွယ်နိုင်ဘူးလို့ အောက်မေ့နေတာလား။”
ဟန် ဒေါင်က ဘာမျှ တုံ့ပြန်ခြင်းမရှိခဲ့ပေ။ လီမင်ဟယ်အနေဖြင့် ဟန် ဒေါင်က ကျန်းဖုန်းအကြောင်းကို သာမန်ကာလျှံကာ တွေးရုံမျှသာ ပြောခဲ့ခြင်းဖြစ်သည်ဟု ယူဆသွားစေသည်။
ထို့နောက် သူသည် ဆွန်းအပါအဝင် အကျန်းထောင်မှူးအချို့ကို ခေါ်ဆောင်ကာ ကျန်းဖုန်းကို သွားရောက်ရှာဖွေခဲ့သော်လည်း အလုပ်ခန်းထဲတွင် မတွေ့ရပေ။ ပတ်ဝန်းကျင်ကို မေးမြန်းကြည့်ပြီးနောက် ကျန်းဖုန်းသည် နောက်ဖေးဝင်းထဲတွင် ရှိနေကြောင်း သိလိုက်ရသည်။
ကျန့်ပေ့အကျန်းထောင်သည် တော်တော်ပင် ကျယ်ဝန်းလှသည်။ အထူးသဖြင့် တတိယအဆင့်မှာ ပိုမိုကျယ်ဝန်းလှ၏။ အကျဉ်းခန်းများ၏ နောက်ကွယ်တွင် ကျယ်ဝန်းသော အိမ်ရာဝင်းတစ်ခု ရှိသည်။ ထိုအိမ်ရာဝင်းမှ ကောင်းကင်ပြာကို မမြင်ရသလောက်ဖြစ်ပြီး အပေါ်ဘက်ရှိ လေဝင်လေထွက် အပေါက်ငယ်များမှတစ်ဆင့် အလင်းရောင် အနည်းငယ်သာ ဖြာကျနေသော်လည်း အကျဉ်းထောင်ထဲတွင် အချိန်အတော်ကြာ အလုပ်လုပ်ခဲ့ရသော ဝန်ထမ်းများအတွက်မူ ဤဝင်းလေးထဲတွင် အနားယူရခြင်းက အလွန်ပင် ဇိမ်ကျလှသည်။
“အကျဉ်းထောင်မှူးကျန်း... မင်း အလုပ်စဝင်တဲ့ ပထမဆုံးနေ့မှာ ရုံးခန်းထဲမှာ အလုပ်မလုပ်ဘဲ ဒီမှာ ဘာလုပ်နေတာလဲ။”
လီမင်ဟယ်က စစ်ကြောမေးမြန်းလိုက်သည်။
“သခင်ကြီး... ကျွန်တော်က သခင်ကြီးနဲ့ ဆွေးနွေးစရာ ကိစ္စလေးတစ်ခု ရှိနေလို့ တိုက်တိုက်ဆိုင်ဆိုင် ဖြစ်သွားတာပါ။”
ကျန်းဖုန်း လန့်သွားခဲ့သည်၊ လီမင်ဟယ်က သူ့ကို ဤဝင်းထဲအထိ လိုက်ရှာလိမ့်မည်ဟု မမျှော်လင့်ထားခဲ့ပေ။ သူသည် ဤနေရာသို့ လာခဲ့ခြင်းမှာ စိတ်အေးအေးထားပြီး လီမင်ဟယ်နှင့် ဆက်ဆံရေး မည်သို့ပြန်လည် ပြုပြင်ရမည်ကို စဉ်းစားရန် ဖြစ်သည်။ ယခု လီမင်ဟယ် ကိုယ်တိုင် ရောက်လာပြီဖြစ်ရာ သူသည် လီမင်ဟယ်ကို ငွေဖြင့် လာဘ်ထိုးရန် အိတ်ကပ်ထဲသို့ လက်နှိုက်လိုက်သည်။ ဤသည်မှာ သူ စဉ်းစားမိသမျှ အကောင်းဆုံး နည်းလမ်းဖြစ်သည်။
ဟန် ဒေါင်၏ အမည်ကို အသုံးချရန်လော။ ကျန်းဖုန်း ပို၍ သိပါသည်၊ သူသည် ဟန် ဒေါင်နှင့် တစ်ကြိမ်သာ တွေ့ဖူးခြင်းဖြစ်ပြီး သူမက သူ့ကို မေ့တောင်မေ့နေလောက်ပြီ ဖြစ်သည်။ လီမင်ဟယ်ကို ခြိမ်းခြောက်ရန် သူမ၏အမည်ကို အသုံးချဖို့ ကြိုးစားပြီးမှ အကယ်၍ ဟန် ဒေါင်သိသွားပါက လီမင်ဟယ်ကို ပြစ်မှားမိသည်ထက် ပို၍ ဒုက္ခရောက်နိုင်သည်။ ငွေဒင်္ဂါးအချို့နှင့်သာ ပွင့်ပွင့်လင်းလင်း ရှင်းလိုက်ခြင်းက ပိုကောင်းပေလိမ့်မည်။
“သူပုန်တွေ ထောင်ကို စီးနင်းတုန်းက အကျဉ်းထောင်မှူးကျန်းက ပထမအဆင့်မှာ ဦးဆောင်ပြီး အသက်ရှင်ကျန်ရစ်ခဲ့ရုံတင်မကဘဲ သူပုန်တွေကိုပါ ဖမ်းဆီးနိုင်ခဲ့တာဆိုတော့ အကျဉ်းထောင်မှူးကျန်းရဲ့ အရည်အချင်းက တော်တော်လေး ကောင်းမွန်တာပဲ။”
လီမင်ဟယ်က တဟားဟား ရယ်မောလိုက်သည်။
“သခင်ကြီးက ကျွန်တော့်ကို အမွှန်းတင်လွန်းနေပါပြီ။ သခင်ကြီးနဲ့ ယှဉ်ရင် ကျွန်တော့်ရဲ့ အရည်အချင်းအသေးအဖွဲလေးက ဘာမှမဟုတ်ပါဘူး။”
ကျန်းဖုန်း တစ်ခုခု မှားယွင်းနေပြီဟု ခံစားလိုက်ရသည်။
“အကျဉ်းထောင်မှူးကျန်း... မနှိမ့်ချပါနဲ့။ အကျဉ်းထောင်မှူးဆွန်းနဲ့ တခြားလူတွေလည်း ဒီမှာ ရှိနေတာပဲ၊ သူတို့ကို မင်းဆီကနေ ပညာအချို့ သင်ယူခွင့် ပေးလိုက်စမ်းပါ။”
လီမင်ဟယ်သည် ကျန်းဖုန်းကို အလွယ်တကူ လွှတ်ပေးရန် ရည်ရွယ်ချက်မရှိပေ။ သူသည် ကျန်းဖုန်းအပေါ် ကိုယ်ရေးကိုယ်တာ ရန်ငြိုးမရှိသော်လည်း ကျန်းဖုန်း တတိယအဆင့်သို့ စရောက်ခြင်းတွင် မိမိထံ လာရောက်ဂါရဝမပြုခဲ့ဘဲ နောက်ဆုံး လာတွေ့သည့်တိုင် လက်ဗလာဖြင့် လာခဲ့သည်။ အကယ်၍ သူသာ ကျန်းဖုန်းကို သင်ခန်းစာ မပေးခဲ့လျှင် နောင်တွင် မည်သို့ အာဏာစက် တည်ဆောက်နိုင်ပါတော့မည်နည်း။
“ကျွန်တော်မျိုးလို လူက အကျဉ်းထောင်မှူးဆွန်းတို့နဲ့ ယှဉ်ပြိုင်နိုင်စွမ်း မရှိပါဘူးခင်ဗျာ။”
ကျန်းဖုန်းက စိတ်မသက်မသာဖြင့် ပြောလိုက်သည်။
“ဆွန်းအိုကြီး...”
လီမင်ဟယ်က သူ့စကားကို လျစ်လျူရှုကာ အော်ခေါ်လိုက်သည်။
“ဆွန်းက အကျဉ်းထောင်မှူးကျန်းဆီကနေ လမ်းညွှန်မှုကို ခံယူပါရစေ။”
လီမင်ဟယ်၏ ရည်ရွယ်ချက်ကို ချက်ချင်း သဘောပေါက်သွားသော အကျဉ်းထောင်မှူးဆွန်းသည် သူ၏ လက်ပါးစေပီပီ ကျန်းဖုန်းဘက်သို့ လက်သီးဆုပ်ပြကာ ထောင်စောင့်လက်သီးရှည်ကျင့်စဉ် ကို ထုတ်ဖော်၍ ကျန်းဖုန်း၏ ဝမ်းဗိုက်ဆီသို့ တည့်တည့် ထိုးနှက်လိုက်တော့သည်။
ကျန်းဖုန်း ရှောင်တိမ်းလိုက်၏။ ထောင်မှူးဆွန်းက နောက်က လိုက်လာပြီး သူ့မျက်နှာဆီသို့ နောက်ထပ် လက်သီးတစ်ချက် ထိုးလိုက်ပြန်သည်။ ကျန်းဖုန်း ထပ်မံ ရှောင်တိမ်းလိုက်ပြန်သည်။
“မင်း ဘယ်လောက်အထိ လိုက်ရှောင်နိုင်မလဲ ကြည့်ကြသေးတာပေါ့။”
အကျန်းထောင်မှူးဆွန်း ဒေါသထွက်သွားခဲ့သည်၊ လက်သီးနှစ်ချက်စလုံးကို ရှောင်တိမ်းခံလိုက်ရသဖြင့် သူ မျက်နှာပျက်သွားခဲ့ရသည်။
ကျန်းဖုန်းလည်း ဤသို့ ရှောင်နေခြင်းက အဖြေမဟုတ်မှန်း သိသည်၊ လီမင်ဟယ်သည် အကျဉ်းထောင်မှူးဆွန်းကို သုံးပြီး သူ့ကို သင်ခန်းစာပေးရန် ရည်ရွယ်ထားခြင်း ဖြစ်သည်။ အကယ်၍ သူသာ ဆက်တိုက် ရှောင်နေပါက လီမင်ဟယ်၏ မုန်းတီးမှုကို ပိုမို ပြင်းထန်စေလိမ့်မည်။ ယခုအချိန်တွင်မူ သူ သည်းခံရုံသာ ရှိတော့သည်။
ထို့ကြောင့် သူသည် အကျဉ်းထောင်မှူးဆွန်း၏ လက်သီးတစ်ချက်ကို ‘ညံ့ဖျင်းစွာ’ ခံယူလိုက်တော့သည်။
“အား...”
ကျန်းဖုန်း မြေကြီးပေါ်တွင် လူးလိမ့်သွားပြီး ရင်ဘတ်ကို ဖိကာ မနည်းရုန်းကန်၍ ထရပ်လိုက်ရင်း အားကျသလို မျက်နှာပေးဖြင့်—
“အကျဉ်းထောင်မှူးဆွန်း... ကျွန်တော် အရှုံးပေးပါတယ်၊ ခင်ဗျားရဲ့ လက်သီးပညာက တကယ့်ကို ကြောက်စရာကောင်းတာပဲ။” ဟု ဆိုလိုက်သည်။
“ဟွန်း... ငါက ထောင်စောင့်လက်သီးရှည်ကျင့်စဉ်ကို အနှစ်နှစ်ဆယ်ပတ်လုံး ကျင့်ကြံလာခဲ့တာ၊ ဆယ်စုနှစ်နှစ်ခုစာ စွမ်းအားပါတဲ့ လက်သီးကို ဘယ်သူမှ တောင့်ခံနိုင်မှာ မဟုတ်ဘူး။”
အကျန်းထောင်မှူးဆွန်းက လီမင်ဟယ်ကို စိတ်ကျေနပ်မှု ပေးနိုင်ခဲ့ပြီဟု ယူဆကာ ဂုဏ်ယူဝင့်ကြွားစွာ ပြောလိုက်သည်။
သို့သော်လည်း သတ္တမအဆင့်နယ်ပယ် ကျင့်ကြံခြင်းရှိသော လီမင်ဟယ်ကမူ ကျန်းဖုန်း ဟန်ဆောင်နေခြင်းဖြစ်ကြောင်း ခံစားမိလိုက်သည်။ သူသည် အေးအေးလူလူ တိုးကပ်လာခဲ့သည်။ ထို့နောက် ပြုံးလိုက်ရင်း—
“အကျဉ်းထောင်မှူးကျန်း... စိတ်ထဲမထားပါနဲ့။ အကျဉ်းထောင်မှူးဆွန်းက မင်းနဲ့ သိုင်းပညာ ဖလှယ်ရုံ သက်သက်ပါ၊ နောင်ကျရင် မင်းတို့တွေ ပူးပေါင်းဆောင်ရွက်ကြရဦးမှာ။”
“တပ်မှူးလီ မိန့်ဆိုတာ မှန်ပါတယ်၊ ကျွန်တော် နားလည်ပါတယ်။”
ကျန်းဖုန်း ခေါင်းညိတ်လိုက်သည်။
“ဝုန်း...”
သို့သော် သူ ခေါင်းငုံ့လိုက်သည့် အခိုက်အတန့်တွင်ပင် လီမင်ဟယ်က သူ့ရင်ဘတ်ကို လက်သီးဖြင့် လှမ်းထိုးလိုက်တော့သည်။
ကျန်းဖုန်းသည် တုံ့ပြန်မှုအသိဖြင့် သူ၏လက်ကို သုံး၍ ကာကွယ်လိုက်ရာ လီမင်ဟယ်၏ ခန္ဓာကိုယ်သည် နောက်သို့ ယိုင်ထွက်သွားခဲ့သည်။
“သခင်ကြီး...”
ကျန်းဖုန်း၏ မျက်နှာအမူအရာ ပျက်သွားခဲ့သည်၊ လီမင်ဟယ်က ဤကဲ့သို့ လှည့်ကွက် သုံးလိမ့်မည်ဟု သူ မမျှော်လင့်ထားခဲ့မိချေ၊ ယခုမူ လီမင်ဟယ်ကို လူပုံအလယ်တွင် မျက်နှာပျက်စေခဲ့ပြီဖြစ်ရာ နောင်တွင် အခြေအနေများ ပိုမို ခက်ခဲလာပေတော့မည်။
အကျန်းထောင်မှူးဆွန်းနှင့် တခြားလူများမှာမူ ကြောင်အသွားကြသည်။
“အကျဉ်းထောင်မှူးကျန်း... ထူးခြားတဲ့ အရည်အချင်းပဲ၊ ငါ မင်းကို အထင်သေးမိသွားတယ်။ ဒါကို ခံစားကြည့်စမ်း။”
လီမင်ဟယ်၏ မျက်နှာအမူအရာက ကြောက်မက်ဖွယ် ပြောင်းလဲသွားခဲ့သည်၊ သူ ခိုးကြောင်ခိုးဝှက် တိုက်ခိုက်ခဲ့သော်လည်း ကျန်းဖုန်း၏ ပိတ်ဆို့ခြင်းကို ခံလိုက်ရပြီး ၎င်းကို လက်အောက်ငယ်သားများက မြင်တွေ့သွားခဲ့သဖြင့် သူ၏ ဂုဏ်သိက္ခာကို ထိခိုက်သွားစေသည်။ ချက်ချင်းပင် သူသည် အရှိန်အကုန်မြှင့်ကာ ကျန်းဖုန်းဆီသို့ ပြေးဝင်သွားတော့သည်။ သတ္တမအဆင့်နယ်ပယ်၏ သွေးစွမ်းအင် များ အပြည့်အဝ ပေါက်ကွဲထွက်လာပြီး သူသည် နဂါးလက်သည်းရိပ်တိုက်ကွက် ကို သုံးကာ ကျန်းဖုန်း၏ မျက်နှာဆီသို့ တိုက်ခိုက်လိုက်တော့သည်။
ကျန်းဖုန်း၏ ဦးနှောက်က အလျင်အမြန်ပင် အလုပ်လုပ်လိုက်သည်။ အကျိုးနှင့် အပြစ်ကို ချိန်ဆကြည့်ပြီးနောက် သူ ဆုတ်ခွာ၍ မရတော့ကြောင်း သဘောပေါက်သွားခဲ့သည်။ ထိုအရာကို တွေးမိသည်နှင့် ပဉ္စမအဆင့် သွေးသန့်စင်ခြင်းနယ်ပယ်၏ သွေးစွမ်းအင်ကို ထုတ်ဖော်ကာ အောင်မြင်မှုအဆင့်အနည်းငယ် ရှိသော ထောင်စောင့်လက်သီးရှည်ကျင့်စဉ်ကို အသက်သွင်းလိုက်တော့သည်။
ဝုန်း...
ကျန်းဖုန်း လက်သီးတစ်ချက် ထိုးနှက်လိုက်သည်။ ၎င်းသည် ကျားနှင့်နဂါးတို့ ဟိန်းဟောက်သံကဲ့သို့ မြည်ဟည်းသွားခဲ့၏။
သီးသန့်အိမ်ရာဝင်းထဲတွင် တရားထိုင်နေသော ဟန် ဒေါင်သည် မျက်လုံးများကို ဖွင့်လိုက်ပြီး ထိုလှုပ်ရှားမှုကို သတိထားမိသွားခဲ့သည်။
“ဒါက...”
လီမင်ဟယ်သည် ကြောက်မက်ဖွယ်ကောင်းသော သွေးစွမ်းအင် လှိုင်းလုံးကြီး တိုးဝင်လာသည်ကို ခံစားလိုက်ရပြီး၊ သူ၏ မည်းမှောင်နေသော မျက်နှာသည် အထူးပင် ထိတ်လန့်တုန်လှုပ်သွားခဲ့ရသည်။ သူသည် ကျန်းဖုန်း၏ လက်သီးဖြင့် လွင့်ထွက်သွားတော့မည်ဟု ထင်မှတ်လိုက်မိသည်။ မသေလျှင်ပင် အနည်းဆုံးတော့ ဒုက္ခိတ ဖြစ်သွားပေလိမ့်မည်။
သို့သော် အရေးကြီးသော အခိုက်အတန့်တွင် ကျန်းဖုန်း၏ လက်သီးသည် သူ၏လက်သည်းကွက်များကို ကျော်ဖြတ်ကာ ရင်ဘတ်ကို ရှောင်ကွင်းလျက် မြေကြီးပေါ်သို့သာ ကျရောက်သွားခဲ့သည်။ လက်သီး၏ စွမ်းအားလှိုင်းက ပြေးထွက်သွားရာ မြေကြီးပေါ်ရှိ အပြာရောင်အုတ်ချပ်များမှာ အနည်းငယ် တုန်ခါသွားခဲ့၏။
“အကျဉ်း... အကျဉ်းထောင်မှူးကျန်း။”
လီမင်ဟယ်သည် ကျောက်ရုပ်ကဲ့သို့ မတ်တတ်ရပ်လျက် ဆွံ့အေနမိသည်၊ သူ၏ နဖူးတွင် ချွေးစေးများ ပြန်လာခဲ့ပြီး သူ၏ လက်သည်းများမှာ ကျန်းဖုန်း၏ ပုခုံးပေါ်တွင် ရှိနေသော်လည်း သံမဏိအုတ်ချပ်များကို ထိတွေ့ထားရသကဲ့သို့ ခံစားနေရသည်။ ကျန်းဖုန်းက သူ့အပေါ် သနားညှာတာမှု ပြသခဲ့ကြောင်း သူ သဘောပေါက်လိုက်သည်။ ထိုလက်သီးမှ ထွက်ပေါ်လာသော စွမ်းအားမှာ သူ့ထက် အဆမတန် သာလွန်နေသည်မှာ ထင်ရှားလှပြီး ၎င်းမှာ အလယ်အလတ် တတိယအဆင့် သိုင်းပညာရှင်များ သာ ပိုင်ဆိုင်နိုင်သော စွမ်းအားမျိုး ဖြစ်သည်။
သူ ရုတ်တရက် သဘောပေါက်သွားခဲ့တော့သည်။ ကျန်းဖုန်းသည် ဟန် ဒေါင်ကို နောက်ခံအဖြစ် အသုံးချရန် မလိုအပ်ပေ။ သူကိုယ်တိုင်ကသာ အကြီးမားဆုံးသော နောက်ခံအင်အား ဖြစ်ပေတော့သည်။