အခန်း (၂၃) - လေးအတတ် တိုးတက်လာခြင်း

​"ရှူး!" "ရှူး!" ထိုလူအား အောင်မြင်စွာ သတ်ဖြတ်ပြီးနောက်ကျန်းဖုန်းသည် ရင်ဘတ်ကို မြားမှန်ကာ ခေါင်မိုးပေါ်မှ ဝင်းခြံထဲသို့ ပြုတ်ကျသွားသော အခြား ဆဋ္ဌမအဆင့် ကိုယ်ခံပညာရှင်ကို မြင်လိုက်ရသည်။

ဂျီဟွေ့ကျုံးအတု၏ အစောပိုင်းက ကောက်ကျစ်သော လှည့်ကွက်များကို သတိရမိသဖြင့် ကျန်းဖုန်းသည် စိတ်မချနိုင်ဘဲ ထိုလူ၏ နောက်ကျောသို့ မြားနှစ်စင်း ထပ်မံပစ်ထည့်လိုက်သည်။ ထိုအချိန်တွင်ပင် ဘယ်ဘက်မှ လူရိပ်တစ်ခု လျင်မြန်စွာ ချဉ်းကပ်လာသည်ကို သူ ခံစားလိုက်ရသည်။

၎င်းမှာ အခြားသူမဟုတ်၊ ဂျီဟွေ့ကျုံး အတုပင် ဖြစ်သည်။ "ရှူး ရှူး!" ကျန်းဖုန်းသည် ညာဘက်သို့ အမြန်ခုန်ရှောင်လိုက်ပြီး လေထဲတွင် ကိုယ်ကိုလိမ်ကာ မြားနှစ်စင်းကို ဆက်တိုက်ပစ်ခတ်လိုက်သည်။

"တောက်!" ဂျီဟွေ့ကျုံးအတုသည် အနီးကပ် ချဉ်းကပ်ရန် ကြိုးစားသော်လည်း ကျန်းဖုန်း၏ မြားနှစ်စင်းကြောင့် နောက်သို့ ပြန်ဆုတ်သွားရပြီး အမိုးစွန်းအောက်တွင် ပြန်လည်ပုန်းကွယ်လိုက်ရသည်။ ဂျီဟွေ့ကျုံးအတု ၏ အစွမ်းမှာ မိမိထက် သာလွန်ကြောင်း ကျန်းဖုန်းသိရှိသည်။

သူ၏ မျောက်အသွင်လွတ်မြောက်ခြင်းကိုအသုံးချမှသာလျှင် ဂျီဟွေ့ကျုံးကို ယှဉ်နိုင်မည်ဖြစ်သည်။ အကယ်၍ ဂျီဟွေ့ကျုံးအတုသာ အနီးကပ် ချဉ်းကပ်နိုင်သွားပါက ကျန်းဖုန်း ဧကန်မုချ အန္တရာယ်ရှိသွားပေမည်။ ထို့ကြောင့် သူသည်ဂျီဟွေ့ကျုံးအတု နှင့် အကွာအဝေးကို တစ်ဖန် ပြန်ခွာလိုက်သည်။

​အဝေးမှ လိုက်ပါလာသော သတ္တမအဆင့် ကိုယ်ခံပညာရှင် သုံးဦးကို မြင်သောအခါကျန်းဖုန်းသည် ၎င်းတို့ထံသို့ တွေဝေမနေဘဲ ပြေးဝင်သွားသည်။ "ဒီဘက်ကို မလာနဲ့၊ အမြန်ပြေးကြ!" ဂျီဟွေ့ကျုံးအတု က လှမ်းအော်လိုက်သည်။ ဆဋ္ဌမအဆင့် ကိုယ်ခံပညာရှင် နှစ်ဦးပင် ကျန်းဖုန်း၏ လက်ချက်ဖြင့် သေဆုံးသွားခဲ့ပြီ ဖြစ်သည်။အကယ်၍ ထိုသတ္တမအဆင့် သုံးဦးသာ ကျန်းဖုန်းနှင့် တိုးပါက ၎င်းတို့၏ အမည်များမှာလည်း သေစာရင်းထဲသို့ ပါသွားပေလိမ့်မည်။

"ဟင်? ဘာဖြစ်လို့လဲ?" ထိုသုံးဦးမှာ အခြေအနေကို မရိပ်မိသေးပေ။ "ရှူး!" "ရှူး!" "ရှူး!"

ကျန်းဖုန်းသည် အခွင့်အရေးကို အရယူကာ မျက်စိတစ်မှိတ်အတွင်း ၎င်းတို့ တစ်ဦးချင်းစီထံသို့ မြားတစ်စင်းစီ ပစ်ခတ်လိုက်သည်။ အရှိန်အဟုန်ပြင်းလှသော မြားများမှာ လေထုကို ဖြတ်သန်းသွားစဉ် တိုးဝှေ့သံများ ထွက်ပေါ်လာသည်။ ထိုသုံးဦးမှာ လုံးဝ မပြင်ဆင်ထားမိကြပေ။ ၎င်းတို့မှာ မီတာ ၅၀ ပင် မဝေးတော့သလို ကျန်းဖုန်း ထက်လည်း အစွမ်းနိမ့်လှရာ ရှောင်တိမ်းနိုင်စွမ်း မရှိကြချေ။ ဗုန်းဗုန်းလဲသံများနှင့်အတူ ၎င်းတို့အားလုံး မြေပြင်ပေါ်သို့ ပြုတ်ကျသွားကြသည်။

သို့သော် ကျန်းဖုန်းက အမှားမခံပေ။ သူသည် မီတာ ၃၀ အကွာအဝေးမှနေ၍ တစ်ဦးချင်းစီ၏ ကိုယ်ပေါ်သို့ မြားတစ်စင်းစီ ထပ်မံစိုက်ဝင်စေခဲ့သည်။ သူသည် ဧကရာဇ် လေးကို လပြည့်ဝန်းသဏ္ဌာန်ဖြစ်အောင် အစွမ်းကုန် ဆွဲပစ်လိုက်ခြင်း ဖြစ်သည်။ ထိုမြားများ၏ အရှိန်နှင့် အားမာန်မှာ ဂျီဟွေ့ကျုံးအတုကိုပင် စိတ်မသက်မသာ ဖြစ်စေခဲ့သည်။ ထိုသုံးဦးစလုံး မြေပြင်ပေါ်တွင် မြားဖြင့် တွဲလောင်းစိုက်လျက် သေဆုံးသွားကြသည်။ ၎င်းတို့မှာ အသက်ပင် ကောင်းကောင်း မရှူနိုင်လိုက်ဘဲ ငြိမ်သက်သွားကြ၏။

​ကျန်းဖုန်း သည် ဝမ်းသာအားရဖြင့် ဂျီဟွေ့ကျုံးထံသို့ လှမ်းကြည့်လိုက်ပြီး ဤအချိန်တွင် ဂျီဟွေ့ကျုံးအတု က ကလဲ့စားချေရန် လာလိမ့်မည်ဟု ထင်မှတ်ထားခဲ့သည်။ သို့သော် မထင်မှတ်ဘဲ ဂျီဟွေ့ကျုံးသည် လမ်းကြားများထဲသို့ ပြေးဝင်ကာ ဝင်းခြံများကို ဖြတ်ကျော်ပြီး သူ့ထံမှ အဝေးသို့ အရှိန်အဟုန်ဖြင့် ထွက်ပြေးသွားလေသည်။ သူသည် အမှန်တကယ်ပင် ထွက်ပြေးသွားခြင်း ဖြစ်သည်။

"ရှူး!" "ရှူး!" ကျန်းဖုန်းသည် ဂျီဟွေ့ကျုံးအတုထံသို့ မြားနှစ်စင်းကို လျင်မြန်စွာ ပစ်ခတ်လိုက်သော်လည်း ဂျီဟွေ့ကျုံးအတုက ရှောင်တိမ်းသွားသဖြင့် လမ်းကြားနံရံများတွင်သာ စိုက်ဝင်သွားသည်။ "သူ့ကို အလွတ်မပေးနိုင်ဘူး။"ကျန်းဖုန်းသည် နောင်ရေးကို စိုးရိမ်သဖြင့် ထပ်ကြပ်မကွာ လိုက်လေသည်။ အကယ်၍ ယနေ့ ဂျီဟွေ့ကျုံးအတု ကို အပြတ်မရှင်းနိုင်ပါက ကြာနီဂိုဏ်း က ရူးသွပ်စွာ ကလဲ့စားချေလာလိမ့်မည်ကို သူ စိုးရိမ်နေသည်။

ထိုသို့ဆိုလျှင် သူသည် ကျန်ပေ့ အကျဉ်းထောင်ထဲတွင် အချိန်အတော်ကြာ ပုန်းအောင်းနေရပေလိမ့်မည်။

​"ကောင်စုတ်။"ဂျီဟွေ့ကျုံးအတုက ကျိန်ဆဲလိုက်သည်။ မိမိနောက်ကျောဘက်မှ မြားများ၏ လေတိုးသံကို အဆက်မပြတ် ကြားနေရသဖြင့် သူ၏ အတွင်းအားနှင့် သွေးသားများမှာ ဒေါသကြောင့် ဆူပွက်နေသည်။ သူသည် ဇစ်ဇက် ပုံစံဖြင့် တစ်ခါတစ်ရံ လမ်းကြားထဲမှ၊ တစ်ခါတစ်ရံ အမိုးစွန်းများပေါ်မှ လျင်မြန်စွာ ပြေးလွှားရင်း ပတ်ဝန်းကျင်ရှိ အကာအကွယ်များကို အသုံးချကာကျန်းဖုန်း ၏ မြားများကို ရှောင်တိမ်းနေသည်။

သူ၏ စိတ်ထဲတွင် နာကျည်းမှုနှင့် စိတ်ပျက်မှုတို့ ရောပြွမ်းနေသည်။ သူသည် ဂုဏ်သိက္ခာရှိသော ပဉ္စမအဆင့် သွေးသန့်စင် ကိုယ်ခံပညာရှင် တစ်ဦးဖြစ်ပါလျက် ယခုအခါ ဆဋ္ဌမအဆင့် ကိုယ်တွင်းအင်္ဂါ သန့်စင်ခြင်းအဆင့် လောက်သာ ရှိသူ၏ လိုက်လံပစ်ခတ်ခြင်းကို ခံနေရသည်။ ဤအကြောင်းသာ အပြင်သို့ ပေါက်ကြားသွားပါက လူတကာ၏ လှောင်ပြောင်ခြင်းကို ခံရပေလိမ့်မည်။ ထို့အပြင် သူ၏ လူငါးဦးဖြစ်သော ဆဋ္ဌမအဆင့် နှစ်ဦးနှင့် သတ္တမအဆင့် သုံးဦးစလုံးကို ဆုံးရှုံးလိုက်ရပြီ ဖြစ်သည်။ ၎င်းမှာ အလွန် အရှက်ရဖွယ် ကောင်းလှသည်။

သို့သော် ကျန်းဖုန်း၏ ခြေလှမ်းတစ်ရာအတွင်း မိုးမခရွက်ကို ဖောက်ထွင်းခြင်းနှင့် ရင်ဆိုင်ရချိန်တွင် သူ‌ဆုတ်ခွာ ရန်မှတစ်ပါး အခြားမရှိပေ။

​ထွက်ပြေးနေစဉ်အတွင်း သူသည် အကာအကွယ်များနောက်တွင် ပုန်းအောင်းကာ ကျန်းဖုန်း ကို အနီးကပ် ခြုံခိုတိုက်ခိုက်ရန် ကြိုးစားခဲ့သော်လည်း ကျန်းဖုန်း က သူ့ထက် ပို၍ လည်ပေသည်။

ကျန်းဖုန်းသည် အမြဲတမ်း ဘေးကင်းသော အကွာအဝေးတွင်သာ နေသည်။ သူ ပြေးလျှင် ကျန်းဖုန်းက လိုက်ပစ်သည်။ သူ ရပ်လျှင် ကျန်းဖုန်းကလည်း ရပ်ပြီး မြားဖြင့် လှမ်းချိန်သည်။ သူ ပြန်လိုက်လျှင် ကျန်းဖုန်း က အကာအကွယ်ယူ၍ နောက်ဆုတ်သွားသည်။

ဤကဲ့သို့ စိတ်အနှောင့်အယှက်ဖြစ်ဖွယ် နည်းလမ်းများကြောင့် ဂျီဟွေ့ကျုံးအတုမှာ ရူးမတတ် ဖြစ်နေရသည်။ နောက်ဆုံးတွင် သူ၏ ထူးခြားသော အဆင့်အတန်းနှင့် ဆက်လက် ရှိနေပါက အန္တရာယ်ရှိနိုင်သည်ကို ထည့်တွက်ကာ ကျန်းဖုန်းကို ဖြတ်ထုတ်နိုင်ရန်သာ ရှေ့သို့ ဆက်ပြေးနေတော့သည်။

​"ဒုက္ခပဲ၊ မြားကုန်တော့မယ်။ ဒီအတိုင်းသာဆို သူ လွတ်သွားတော့မှာပဲ။" ကျန်းဖုန်း သည် သူ၏ မြားတောင်းကို စမ်းကြည့်လိုက်ရာ မြား ၆ စင်းသာ ကျန်တော့သည်ကို တွေ့လိုက်ရသည်။ သူသည် အမှောင်ဈေး တွင် မြားအစင်း ၆၀ ကို အသစ်ဝယ်ယူခဲ့ခြင်း ဖြစ်သည်။ စောစောက ဂျီဟွေ့ကျုံးအတုနောက်မှ လိုက်လာစဉ် ခုနစ်စင်း ရှစ်စင်းခန့် ပစ်ခတ်ခဲ့ရသလို၊ ဂျီဟွေ့ကျုံးအတု၏ လူ ၅ ဦးကို အပြတ်ရှင်းရာတွင်လည်း ၁၀ စင်းကျော် သုံးခဲ့ရသည်။

ယခု လိုက်လံပစ်ခတ်ရာတွင် ၃၀ နီးပါး သုံးစွဲခဲ့သော်လည်း ဂျီဟွေ့ကျုံးအတုကို အပြင်းအထန် ဒဏ်ရာရအောင် မလုပ်နိုင်ခဲ့ဘဲ အနည်းငယ် ပြတ်ရှရုံသာ တတ်နိုင်ခဲ့သည်။ မြားကုန်သွားပါကဂျီဟွေ့ကျုံးအတုကို ခြိမ်းခြောက်နိုင်တော့မည် မဟုတ်ပေ။ သို့သော် ကျန်းဖုန်းသည်ဂျီဟွေ့ကျုံးအတု ၏ ပြန်လည်သတ်ဖြတ်ခြင်းကို မစိုးရိမ်ပေ။ သူ့တွင် ကိုယ်ဖော့ပညာ ရှိနေသေးသည်။ အစောပိုင်းကဂျီဟွေ့ကျုံးအတု၏ ဝိုင်းရံမှုကို ခံရစဉ်မှာပင် သူသည် အခြေအနေကို ပြောင်းပြန်လှန်နိုင်ခဲ့သည်။ သူသာ လျင်မြန်စွာ ပြေးနိုင်နေသရွေ့ ဂျီဟွေ့ကျုံးအတုတစ်ယောက်တည်းကို မကြောက်ပေ။ သို့သော် ဂျီဟွေ့ကျုံးအတုသာ လွတ်သွားပါက နောင်တွင် ပြဿနာကြီးလာနိုင်ပေသည်။

​ထို့ကြောင့် ကျန်းဖုန်းသည် သူ၏ အချက်အလက်‌ ပြ ဘောင်ကို အမြန်ဖွင့်ကြည့်လိုက်သည်။

​အမည် - ကျန်းဖုန်း

ကံတရားအမှတ် - ၁၄၂၄

ကျင့်စဉ် - ထောင်စောင့်ကျန်းမာရေး စောင့်ရှောက်မှု (အသေးစား အောင်မြင်မှု)

ကျွမ်းကျင်မှုများ - ထောင် စောင့်လက်သီရှည်သိုင်း (ကျွမ်းကျင်), နတ် မြား(ကျွမ်းကျင်+)မျောက်အသွင်လွတ်မြောက်ခြင်း (ကျွမ်းကျင်)

အဆင့် - ဆဋ္ဌမအဆင့် (ကိုယ်တွင်းအင်္ဂါ သန့်စင်ခြင်း)

နတ်ဘုရားစွမ်းအင် - ထာဝရအသက်

​သူ၏ ကံတရားအမှတ်မှာ ၆၀၀ အောက်မှ ၁၄၀၀ ကျော်အထိ ခုန်တက်သွားသည်ကို မြင်ရသော်လည်း ကျန်းဖုန်းသိပ်မအံ့သြမိပေ။ အစောပိုင်းက လမ်းကြားထဲတွင်ဂျီဟွေ့ကျုံးအတုကို တွေ့စဉ်က သူသာ ချက်ချင်း မပြေးခဲ့ပါက အကြီးအကျယ် ဒုက္ခရောက်သွားနိုင်သည်မှာ အမှန်ပင်။ ဆဋ္ဌမအဆင့် နှစ်ဦးနှင့် သတ္တမအဆင့် သုံးဦးကို သတ်ဖြတ်နိုင်ခဲ့ခြင်း၊ ဂျီဟွေ့ကျုံးအတုကို တစ်ယောက်တည်း ထွက်ပြေးအောင် လုပ်နိုင်ခြင်းနှင့် အန္တရာယ်များစွာမှ လွတ်မြောက်လာခြင်းတို့ကြောင့် ကံတရားအမှတ် ၇၀၀ ကျော် ရရှိလာခြင်းမှာ ကျန်းဖုန်း ၏ အမြင်တွင် သိပ်မများလှပေ။

ဂျီဟွေ့ကျုံးအတုကို လိုက်လံဖမ်းဆီးနေစဉ်တွင် ထို ကံတရားအမှတ် ၁၄၀၀ ကို မည်သည့်နေရာတွင် အသုံးပြုရမလဲဟု သူ စဉ်းစားနေမိသည်။ ထောင် စောင့်လက်သီးမှာ အနီးကပ်တိုက်ခိုက်ရေးအတွက် ဖြစ်ပြီး ၎င်းကို ကျွမ်းကျင်မှုအဆင့်အထိ မြှင့်တင်လျှင်ပင် ဆဋ္ဌမအဆင့် ကျင့်ကြံသူဖြစ်သော ကျန်းဖုန်းအနေဖြင့် ဂျီဟွေ့ကျုံးကို ထိပ်တိုက်ရင်ဆိုင်ရန် မဝံ့သေးပေ။ ထို့ကြောင့် ၎င်းကို ဦးစွာ ပယ်ဖျက်လိုက်သည်။ ကျန်ရှိသည်မှာ နတ်မြား နှင့် မျောက်အသွင်လွတ် မြောက်ခြင်း တို့ဖြစ်သည်။

လောလောဆယ်တွင် သူ၏ ကိုယ်ဖော့ပညာမှာ ဂျီဟွေ့ကျုံးအတု ထက် အနည်းငယ်သာ သာသော်လည်း သူ့ကို အပြတ်ရှင်းရန် မလုံလောက်သေးပေ။ ၎င်းကို အသေးစားအောင်မြင်မှုအဆင့်အထိ မြှင့်တင်လိုက်လျှင်ပင် ဂျီဟွေ့ကျုံးအတုထက် အဆပေါင်းများစွာ ပိုမြန်သွားမည် ဖြစ်သော်လည်း ဂျီဟွေ့ကျုံးအတုကို အန္တရာယ်ပေးနိုင်မည် မဟုတ်ဘဲ ကျီစယ်ရုံသာ တတ်နိုင်ပေလိမ့်မည်။

နောက်ဆုံးတွင် ရင်းနှီးမြှုပ်နှံရန် အသင့်တော်ဆုံးနေရာမှာ နတ်မြားပင် ဖြစ်သည်။ အစောပိုင်းက သူ၏ ကံတရားအမှတ် ၁၂၀၀ ရောက်ရှိစဉ်ကပင် နတ်မြား ၏ နောက်တွင် အပေါင်းလက္ခဏာ ပေါ်လာခဲ့သည်ကို သူ သတိရလိုက်သည်။

​ကျန်းဖုန်းသည် ကံတရားအမှတ် ၁၂၀၀ ကို နတ်မြား ထဲသို့ တိုက်ရိုက် ထည့်သွင်းလိုက်သည်။ဘောင်မှာ ပြောင်းလဲသွားသည်။

​အမည် - ကျန်းဖုန်း

ကံတရား - ၂၂၄

ကျင့်စဉ် - ထောင်စောင့်ကျန်းမာရေး စောင့်‌ ရှောက်မှု( အသေးစား အောင်မြင်မှု)

ကျွမ်းကျင်မှုများ - ထောင်စောင့်လက်သီး (ကျွမ်းကျင်), နတ်မြား (ဆရာအဆင့်),မျောက်အသွင်လွတ်မြောက်ခြင်း (ကျွမ်းကျင်)

အဆင့် - ဆဋ္ဌမအဆင့် (ကိုယ်တွင်းအင်္ဂါ သန့်စင်ခြင်း)

နတ်ဘုရားစွမ်းအင် - ထာဝရအသက်

​ကျန်းဖုန်းသည်ဧကရာဇ်လေးကို ကိုင်ဆွဲလိုက်သောအခါ သူ၏ သွေးသားများသည် လေးရှည်ကြီးနှင့် တစ်သားတည်း ဖြစ်သွားသလို ခံစားလိုက်ရပြီး ၎င်းမှာ သူ၏ ခန္ဓာကိုယ်အစိတ်အပိုင်းတစ်ခုကဲ့သို့ပင် ဖြစ်နေသည်။ သူကိုယ်တိုင်ပင် သတိမထားမိဘဲ သူ၏ လေးအတတ်မှာ သိသိသာသာ တိုးတက်လာခဲ့သည်။

​"ဟားဟားဟား! မင်း မြားကုန်တော့မယ် မဟုတ်လား! သတ္တိရှိရင် ဆက်လိုက်ခဲ့စမ်းပါ!" ဂျီဟွေ့ကျုံးအတု၏ လှောင်ပြောင်သံမှာ ရှေ့မှ ထွက်ပေါ်လာသည်။ ကျန်းဖုန်း၏ မြားပစ်ခတ်မှုမှာ သိသိသာသာ ကျဲသွားသည်ကို သူ သတိပြုမိသွားပြီး ကျန်းဖုန်း တွင် မြားများစွာ မကျန်တော့ကြောင်း ခန့်မှန်းလိုက်မိသည်။ ဝမ်းသာအားရ ဖြစ်သွားမှုကြောင့် ဂျီဟွေ့ကျုံးအတု ၏ ခြေလှမ်းများမှာလည်း မသိမသာ နှေးကွေးသွားတော့သည်။