အခန်း ၄၉ ဘိဘိတုန် - အထက်တန်းစားဂိုဏ်းကြီး သုံးဂိုဏ်းအကြောင်း ကောလာဟလတွေ အများကြီး သိထားတာပဲ

【မိမိရဲ့သားဖြစ်သူ ယွီရှောင်ကန်းရဲ့ ထူးခြားတဲ့ ခွန်အားတွေနဲ့ ပတ်သက်ပြီး ဖခင်ဖြစ်သူ ယွီယွမ်ကျန့်အနေနဲ့ အကုန်အစင် ဖွင့်ဟပြောဆိုဖို့ မဖြစ်နိုင်တာကတော့ သဘာဝကျပါတယ်။】

【ဘာပဲဖြစ်ဖြစ် ဒါက ဝေလငါးကော် နဲ့ ပတ်သက်ဆက်နွှဲနေတာလေ၊ တကယ်လို့ ဝိညာဉ်နန်းတော်ကလူတွေသာ သိသွားရင် နောက်ဆို သူတို့တွေ ဒါကို လွယ်လွယ်ကူကူ ဝယ်ယူနိုင်ကြတော့မှာ မဟုတ်ပါဘူး။】

【လက်ရှိအချိန်မှာ ဒိုလော်တိုက်ကြီးပေါ်က အင်အားစုအသီးသီးဟာ အပြင်ပန်းအားဖြင့် အင်မတန် သင့်မြတ်သဟဇာတ ဖြစ်နေကြတယ် ဆိုပေမယ့်လည်း... သူတို့ကြားထဲမှာ ပြိုင်ဆိုင်မှု ပြင်းထန်တဲ့ ဆက်ဆံရေးတွေကတော့ ရှိနေဆဲ ဖြစ်တယ်။】

【ဥပမာ အထက်တန်းစား ဂိုဏ်းကြီး သုံးဂိုဏ်းဟာ တစ်ဂိုဏ်းနဲ့တစ်ဂိုဏ်း အတော်လေး ဆက်ဆံရေး ကောင်းမွန်ကြပြီး ဝိညာဉ်နန်းတော်ကို အပြန်အလှန် ထိန်းညှိဖို့အတွက် အတူတူ လက်တွဲထားကြတာမျိုးပါ။】

【ဒါပေမဲ့ ဒီလို အခြေအနေ က ထာဝရ တည်တံ့နေလိမ့်မယ်လို့ ဘယ်သူမှ အာမမခံနိုင်တာကြောင့်... မိမိရဲ့ ဝှက်ဖဲတွေကို လျှို့ဝှက်ထားဖို့က အင်မတန် အရေးကြီးလှပါတယ်။】

【ဘွဲ့အမည်ရ ဒိုလော် သုံးပါး စကားပြောနေကြတဲ့ အချိန်မှာပဲ... ဘေးနားမှာရှိနေတဲ့ ဘိဘိတုန်ဟာလည်း ယွီရှောင်ကန်းရဲ့ အနားကို တိုးကပ်လာခဲ့တယ်။】

"စောစောက ကိစ္စအတွက် ကျေးဇူးတင်ပါတယ်နော်"

【ဘိဘိတုန်က ယွီရှောင်ကန်းကို ကျေးဇူးတင်စကား ဆိုလိုက်ပြီး သူမရဲ့ မျက်နှာထက်မှာ တကယ့်ကို ကျေးဇူးတင်တဲ့ အမူအရာတွေ ပေါ်ပေါက်နေခဲ့တယ်။】

【တကယ်လို့ စောစောက ပေါ်လာတဲ့ လေနဂါးမျောက်လွှဲကျော်ကို ယွီရှောင်ကန်းက ကြားကနေ ဝင်ပြီး မတားဆီးပေးခဲ့ဘူးဆိုရင်... သူမဟာ အဲဒီသားရဲရဲ့ လက်ချက်နဲ့တင် သေဆုံးသွားခဲ့ရနိုင်ပါတယ်။】

【ဝိညာဉ်နန်းတော် ပုပ်ရဟန်းမင်းကြီးရဲ့ တန်ဖိုးကြီးလှတဲ့ တိုက်ရိုက်တပည့်တစ်ယောက်က သက်တမ်း ဆယ်စုနှစ်ပဲ ရှိသေးတဲ့ လေနဂါးမျောက်လွှဲကျော်တစ်ကောင်ရဲ့ လက်ထဲမှာ သေသွားခဲ့ရတယ်ဆိုတဲ့ သတင်းသာ အပြင်ကို ပျံ့သွားရင်... လူတွေ ရယ်လို့ သေသွားကြလိမ့်မှာ သေချာတယ်လေ။】

"ဒါက ကူညီရတာ အပန်းမကြီးပါဘူး။ ဒါတင်မကဘဲ မိုးကြိုးဒိုလော်နဲ့ အခြားသူတွေကလည်း ဒီက အခြေအနေကို တစ်ချိန်လုံး အာရုံစိုက် စောင့်ကြည့်နေခဲ့ကြတာပဲ"

"ငါ ဝင်မကူညီခဲ့ရင်တောင်မှ သူတို့တွေက မင်းကို ဘေးကင်းအောင် ကယ်တင်နိုင်ကြမှာပါ"

【ယွီရှောင်ကန်းက အေးအေးဆေးဆေး တည်ငြိမ်စွာပဲ ပြန်လည်ပြောဆိုလိုက်တယ်။】

"ငါ့ကိုယ်ငါ မိတ်ဆက်ပါရစေဦး၊ ငါ့နာမည်က ဘိဘိတုန် လို့ ခေါ်တယ်၊ လက်ရှိ ဝိညာဉ်နန်းတော် ပုပ်ရဟန်းမင်းကြီးရဲ့ တပည့်ပါ"

"မင်းနဲ့ မိုးကြိုးဒိုလော် တို့ကော ဝိညာဉ်ကွင်း ရှာဖွေဖို့ လာခဲ့ကြတာလား အဲဒါ ဘယ်နှစ်ကွင်းမြောက် ဝိညာဉ်ကွင်းမို့လို့လဲဟင်"

【ကျေးဇူးတင်စကား ပြောကြားပြီးနောက် ဘိဘိတုန်ဟာ သူမကိုယ်သူမ မိတ်ဆက်လိုက်ပြီး စူးစမ်းလိုစိတ်နဲ့ ဆက်လက်မေးမြန်းလိုက်ပြန်တယ်။】

"ငါ့နာမည်က ယွီရှောင်ကန်း ပါ၊ ငါကတော့ ငါ့ရဲ့ ပထမဝိညာဉ်ကွင်း ကို ရှာဖွေဖို့ လာခဲ့တာ"

【ယွီရှောင်ကန်းက မျက်ခုံးတစ်ချက် ပင့်လိုက်ပြီး ဘိဘိတုန်ကို တစ်ချက် လှမ်းကြည့်လိုက်တယ်။】

【ဝိညာဉ်နန်းတော် ပုပ်ရဟန်းမင်းကြီးရဲ့ တပည့်ဖြစ်ပြီး အပြင်ထွက်တဲ့အခါမှာတင် ဘွဲ့အမည်ရ ဒိုလော် နှစ်ပါးရဲ့ ကာကွယ်စောင့်ရှောက်မှုကို ရရှိထားတာ...】

'ငါထင်တယ် ဝိညာဉ်နန်းတော်ထဲမှာဆိုရင်တောင် ဒီဘိဘိတုန်ရဲ့ အဆင့်အတန်းက အင်မတန် အံ့မခန်း ဖြစ်လိမ့်မယ်'

'ပြီးတော့ သူမက ငါနဲ့ အသက်အရွယ်ချင်း အတူတူလောက်ပဲ ရှိဦးမှာကို ဒုတိယဝိညာဉ်ကွင်းတောင် ရနေပြီ၊ သူမက ဘယ်လိုလုပ်ပြီး သာမန်လူတစ်ယောက် ဖြစ်နိုင်ပါ့မလဲ'

【ယွီရှောင်ကန်းဟာ စိတ်ထဲကနေ ကိုယ့်ကိုယ်ကိုယ် ရယ်မောလိုက်ရင်း စိတ်ဓာတ်ကို ပြန်လည်မြှင့်တင်လိုက်တယ်။】

【အခုအချိန်မှာ ငါက သူမထက် နောက်ကျနေတယ် ဆိုရင်ကော ဘာဖြစ်လဲ အနာဂတ်မှာ ဘာတွေဖြစ်လာမလဲဆိုတာ ပြောဖို့က စောလွန်းပါသေးတယ်။】

"ပထမဝိညာဉ်ကွင်း ဟုတ်လား ဒါဆို မင်းရဲ့ ဝိညာဉ် ကလည်း အပြာရောင်လျှပ်စီးနဂါး ပဲလားငါ ကြားဖူးတာတော့ မင်းတို့ အပြာရောင်လျှပ်စီး နဂါးဂိုဏ်းရဲ့ ဝိညာဉ်က ကမ္ဘာပေါ်မှာ နံပါတ်တစ် အမြင့်မားဆုံးအဆင့် သားရဲဝိညာဉ် လို့ ပြောကြတယ်၊ ငါ့ရဲ့ ဝိညာဉ်က မင်းတို့မိသားစုရဲ့ ဝိညာဉ်နဲ့ ယှဉ်ရင် ဘယ်လိုနေမလဲတော့ မသိဘူး"

"ဒါနဲ့... ငါ နောက်ထပ် ကောလာဟလတစ်ခု ကြားဖူးသေးတယ်၊ မင်းတို့ဂိုဏ်းရဲ့ ဝိညာဉ်က ကမ္ဘာပေါ်မှာ နံပါတ်တစ် သားရဲဝိညာဉ် ဖြစ်နေရတဲ့ အကြောင်းရင်းက မင်းတို့တွေက ဝိညာဉ်သားရဲတွေကို မကြာခဏ သတ်ဖြတ်ပြီး သူတို့ရဲ့ သွေးတွေကို သောက်တယ်၊ အသားစိမ်းတွေကို စားကြလို့ဆိုတာ ဟုတ်သလား"

"တကယ်လို့ အဲဒါသာ အမှန်ဆိုရင်... ငါ့မှာလည်း သားရဲဝိညာဉ် ရှိတာပဲ၊ ငါကော အဲဒီလိုမျိုး လိုက်လုပ်ရမှာလားဟင်"

【ဘိဘိတုန်ဟာ စကားဖောင်ဖွဲ့ခွင့် ရသွားသလိုမျိုး သူမရဲ့ တောက်ပဝိုင်းစက်လှတဲ့ မျက်လုံးကြီးတွေနဲ့ စိုက်ကြည့်ရင်း ယွီရှောင်ကန်းကို စူးစမ်းလိုစိတ် ပြင်းပြစွာ မေးမြန်းတော့တာပဲ။】

【ပြီးတော့ ဝိညာဉ်သားရဲတွေကို သတ်ဖြတ်ပြီး သွေးသောက်၊ အသားစိမ်းစားသလားလို့ မေးတဲ့အချိန်မှာ ဘိဘိတုန်ဟာ ယွီရှောင်ကန်းက အခုလိုမျိုး တကယ်ပဲ လုပ်ထားသလားဆိုတာကို အတည်ပြုချင်သလိုမျိုး သူ့ရဲ့ နှုတ်ခမ်းတွေကို မသိမသာ လှမ်းကြည့်နေခဲ့သေးတယ်။】

【နောက်ဆုံးမှာတော့ သူမကိုယ်တိုင်လည်း အဲဒီလို လိုက်လုပ်ရမလားလို့ တွေးမိတဲ့အခါမှာ သူမရဲ့ ချစ်စရာကောင်းလှတဲ့ မျက်နှာလေးက ရှုံ့မဲ့သွားခဲ့ရတယ်။】

【ဘိဘိတုန်ရဲ့ စကားတွေကို ကြားလိုက်ရတဲ့အခါမှာတော့ ယွီရှောင်ကန်းရဲ့ မျက်နှာထက်မှာ စိတ်ပျက်လက်ပျက် ဖြစ်သွားတဲ့ လက္ခဏာ အမည်းစင်းတွေ ပေါ်ပေါက်လာခဲ့တော့တယ်။】

"အဲဒီလို ထူးဆန်းတဲ့ ကောလာဟလတွေကို မင်း ဘယ်ကနေ သွားကြားလာတာလဲ သွေးသောက်ပြီး အသားစိမ်းစားရတယ် ဟုတ်လားတောင်းပန်ပါတယ်... ငါတို့ တကယ်လို့ ဝိညာဉ်သားရဲအသားကို စားချင်တယ်ဆိုရင်တောင် အရင်ဦးဆုံး ချက်ပြုတ်ပြီးမှ စားတာပါ"

"အသားစိမ်း ဟုတ်လား ထူးဆန်းတဲ့ အာရုံခံစားမှု အကြိုက် ရှိတဲ့သူတွေပဲ အဲဒါကို စားနိုင်ကြမှာ မဟုတ်ဘူးလား”

【ယွီရှောင်ကန်းက မျက်မှောင်ကြုတ်ရင်း ပြောလိုက်တယ်။】

【အထူးသဖြင့် ဝိညာဉ်သားရဲရဲ့ အသားစိမ်းကို စားရမယ့်အကြောင်း တွေးမိလိုက်တာနဲ့တင်... အော့အန်ချင်စိတ် ပေါက်သွားရတယ်လေ~】

【ယွီရှောင်ကန်းအနေနဲ့ အချို့သောလူတွေက အဲဒီလို စားရတာကို ကြိုက်နှစ်သက်ကြတယ်ဆိုတာ သိထားပေမယ့်လည်း သူကိုယ်တိုင်ကတော့ လုံးဝ မလုပ်နိုင်ပါဘူး။】

"အဲဒါ အမှန်မဟုတ်ဘူးလား မင်း သေချာလို့လား”

"ငါ ရာနှုန်းပြည့် အကြွင်းမဲ့ သေချာပါတယ်။ အနာဂတ်ကျရင် အပြင်က ကောလာဟလတွေကို လျှော့ပြီး နားထောင်စမ်းပါ၊ အရာအများစုက လုံးဝ ယုံကြည်လို့မရတဲ့ အရာတွေပဲ"

"ဒါပေမဲ့ လူအများကြီးက အဲဒီလို ပြောနေကြတာလေ၊ ဥပမာ... ဟောက်ထျန်းဂိုဏ်းက လူတွေအားလုံးက ညစ်ပတ်စုတ်ပြတ်ပြီး ချွေးနံ့တထောင်းထောင်း ထွက်နေတဲ့ လူသန်ကြီးတွေချည်းပဲ လို့ ပြောကြတယ်"

"ပြီးတော့ ဘုံခုနှစ်ဆင့်ပြဿဒ်ဂိုဏ်း က လူတွေအားလုံးကလည်း တစ်နေ့လုံး တစ်ဖက်လူကို ဘယ်လိုလှည့်စားရမလဲ ဆိုပြီး မျက်လုံး ကလယ်ကလယ်နဲ့ လှည့်ဖြားတတ်တဲ့ လူယုတ်မာတွေချည်းပဲ လို့လည်း ပြောကြသေးတယ်"

"..."

"ပြီးတော့... ပြီးတော့... မင်းတို့ အပြာရောင်လျှပ်စီး နဂါးဂိုဏ်းက လူတွေက သွေးသောက်၊ အသားစိမ်းစားတာအပြင်... ဝိညာဉ်ပေါင်းစပ်ခြင်း ကို အသုံးပြုပြီး သူတို့ကိုယ်ပေါ်မှာ ဝိညာဉ်သားရဲတွေရဲ့ မစင်တွေကို သုတ်လိမ်းကာ ဝိညာဉ်သားရဲတွေလို ဟန်ဆောင်ပြီး သားရဲတွေလိုပဲ နေထိုင်ကြတယ်ဆိုတာကော..."

"..."

"လွန်ခဲ့တဲ့ ရက်အနည်းငယ်တုန်းကဆိုရင် အပြင်က လမ်းမတွေပေါ်မှာ ကောလာဟလတစ်ခု ကြားမိသေးတယ်၊ အထက်တန်းစား ဂိုဏ်းကြီး သုံးဂိုဏ်းထဲက အချို့သော ဝိညာဉ်သခင်တွေက ဝိညာဉ်သားရဲတွေကိုတောင် လက်ထပ်ချင်နေကြတယ် တဲ့..."

"...၆ ၆ ၆…"

【ယွီရှောင်ကန်းဟာ ဘိဘိတုန်က အထက်တန်းစား ဂိုဏ်းကြီး သုံးဂိုဏ်းအကြောင်း ကောလာဟလတွေကို ရွတ်ပြနေတာကို ကြည့်ပြီး ဆွံ့အအံ့ဩလွန်းလို့ ကြည့်နေမိတော့တယ်။】

【သူ့အနေနဲ့ ဟောက်ထျန်းဂိုဏ်း သို့မဟုတ် ဘုံခုနှစ်ဆင့်ပြဿဒ် ဂိုဏ်းတို့နဲ့ အဆက်အသွယ် မရှိခဲ့ဖူးတာကြောင့် အဲဒီအကြောင်းတွေကိုတော့ သူ မှတ်ချက်မပေးလိုပါဘူး။】

【ဒါပေမဲ့ သူကိုယ်တိုင်က ဂိုဏ်းထဲမှာ ဒီနှစ်တွေအထိ အသက်ရှင် နေထိုင်လာခဲ့တာလေ... မိမိရဲ့ အပြာရောင်လျှပ်စီး နဂါးဂိုဏ်းဝင်တွေမှာ အခုလိုမျိုး ထူးဆန်းတဲ့ အာရုံခံစားမှု အကြိုက်တွေ ရှိနေတယ်ဆိုတာကို သူ ဘာလို့ တစ်ခါမှ မကြားဖူးရတာလဲ】

【ကိုယ်ပေါ်မှာ ဝိညာဉ်သားရဲရဲ့ မစင်တွေကို သုတ်လိမ်းပြီး ဝိညာဉ်သားရဲလို ဟန်ဆောင်နေထိုင်ကြတယ် ဟုတ်လား】

【ဘုရားရေ... အဲဒီလို ကောလာဟလတွေကို လျှောက်ဖြန့်နေတဲ့ လူတွေက အပြာရောင်လျှပ်စီး နဂါးဂိုဏ်းရဲ့ လိုက်လံသတ်ဖြတ်ခြင်းကို ခံရမှာ မကြောက်ကြဘူးလား】

【နောက်ပိုင်းမှာ ပြောသွားတဲ့ ဝိညာဉ်သားရဲကို လက်ထပ်တယ်ဆိုတဲ့ ကိစ္စကတော့ ပိုလို့တောင် ရယ်စရာကောင်းပါသေးတယ်၊ ဒါက လူသားတွေရဲ့ ကျင့်ဝတ်သိက္ခာကို ဆန့်ကျင်နေတာပဲလေ။ တိုက်ကြီးပေါ်က ဘယ်လိုဂိုဏ်းမျိုးက အခုလို အရာမျိုးကို လက်ခံနိုင်ပါ့မလဲ】

【ဒါပေမဲ့ ယွီရှောင်ကန်းအတွက် ပိုပြီး နားမလည်နိုင်စရာ အကောင်းဆုံးအရာကတော့... ဘိဘိတုန်က ဘာဖြစ်လို့ အခုလို ကောလာဟလတွေကို အများကြီး သိနေရတာလဲ ဆိုတာပါပဲ။】

【ညီမလေးရာ... မင်းက ဝိညာဉ်နန်းတော် ပုပ်ရဟန်းမင်းကြီးရဲ့ တိုက်ရိုက်တပည့် တစ်ယောက် လေ။ ဒီလို အကြောင်းအရာတွေက မင်းရဲ့ နားထဲကို ရောက်လာတယ်ဆိုတာက ထားပါတော့၊ ဒါပေမဲ့ မင်းက ဒါတွေကို တကယ်ကြီး ယုံနေရတာလား】

【ဒီလို အရာမျိုးတွေကို မင်းရဲ့ ဆရာဖြစ်တဲ့ ပုပ်ရဟန်းမင်းကြီးကို မေးမြန်းပြီး အလွယ်တကူ အတည်ပြုလို့ ရနိုင်တာပဲ မဟုတ်ဘူးလား】

"မင်းက အခုလိုမျိုး ရယ်စရာကောင်းလှတဲ့ ကောလာဟလတွေကို တကယ်ကြီး ယုံနေတာလား”

【ယွီရှောင်ကန်းဟာ စကားပင် ဆက်မပြောနိုင်တော့ဘဲ နောက်ဆုံးမှာတော့ အနည်းငယ် ပုံပျက်ပန်းပျက် ဖြစ်နေတဲ့ မျက်နှာထားနဲ့ မေးလိုက်မိတော့တယ်။】

"ဒါပေမဲ့ လမ်းပေါ်က လူတွေ ပြောတုန်းကတော့ အင်မတန် အတည်အပေါက်ကြီး ပြောနေကြတာလေ၊ သူတို့က ဒီသတင်းအချက်အလက်သာ အတုဆိုရင် သူတို့ရဲ့ နာမည်ကို ပြောင်းပြန်ပြန်ရေးပြပါ့မယ်လို့တောင် ပြောကြတာ"

"သူတို့တွေက ကျိန်ဆိုပြီးတော့တောင် ပြောခဲ့ကြတာဆိုတော့ ဒါက အတုတော့ မဖြစ်နိုင်ပါဘူးနော်"

【ဘိဘိတုန်က တည်ငြိမ်လေးနက်တဲ့ မျက်နှာလေးနဲ့ မေးလိုက်တယ်။】

【ဖြောင်း!】

【ယွီရှောင်ကန်းဟာ စကားပင် မဆိုနိုင်တော့ဘဲ သူ့ရဲ့ လက်ဝါးနဲ့ မျက်နှာကို ရိုက်လိုက်မိတော့တယ်။】

【ဒါက လမ်းမပေါ်က သာမန်အတင်းအဖျင်း စကားဝိုင်း သက်သက်ပဲ ရှိတာကို၊ တကယ်ကြီး ယုံကြည်နေတဲ့သူ ရှိနေလိမ့်မယ်လို့ မထင်ထားခဲ့ဘူး။ မင်းက ဘယ်လောက်တောင် ဖြူစင်ရိုးသားလွန်းနေရတာလဲ】

"ဒီသတင်းအချက်အလက်တွေ အားလုံးက အတုတွေချည်းပဲ... မဟုတ်သေးပါဘူး၊ ဟောက်ထျန်းဂိုဏ်းနဲ့ ဘုံခုနှစ်ဆင့်ပြဿဒ် ဂိုဏ်း အကြောင်းကိုတော့ ငါ အတည်မပြုပေးနိုင်ပေမယ့်၊ ငါတို့ အပြာရောင်လျှပ်စီး နဂါးဂိုဏ်းနဲ့ ပတ်သက်တဲ့ အချက်အလက်တွေကတော့ လုံးဝကို အမှားကြီးမှားပါတယ်"

"ငါတို့ သွေးမသောက်ဘူး၊ အသားစိမ်းမစားဘူး၊ ပြီးတော့ ကိုယ်ပေါ်မှာ သားရဲမစင်တွေ သုတ်လိမ်းပြီး သားရဲတွေနဲ့အတူ နေထိုင်ရတာကိုလည်း လုံးဝ မကြိုက်ပါဘူး"

"ဒါတင်မကဘဲ ငါတို့မှာ ဝိညာဉ်သားရဲတွေကို လက်ထပ်ဖို့ စိတ်ကူးလည်း လုံးဝ မရှိပါဘူး!"

"ဒါတွေအားလုံးက ငါတို့ အပြာရောင်လျှပ်စီး နဂါးဂိုဏ်းအပေါ် သက်သက်မဲ့ ဂုဏ်သိက္ခာညှိုးနွမ်းအောင် လုပ်ကြံထားကြတာ!"

【ယွီရှောင်ကန်းက စကားလုံးတိုင်းကို အင်မတန် တည်ငြိမ်လေးနက်စွာနဲ့ ရှင်းပြလိုက်တယ်။】

【ဘိဘိတုန် မိမိကို ယုံကြည်လာစေဖို့အတွက် ထင်ရှားတဲ့ သက်သေအဖြစ် ယွီရှောင်ကန်းဟာ သူ့ရဲ့ သိုလှောင်မှု ဝိညာဉ်အသုံးအဆောင် ထဲကနေ သူ ယူဆောင်လာတဲ့ မုန့်အချို့ကို ထုတ်ယူလိုက်တယ်။】

"ကြည့်စမ်း... ဒါက ငါတို့ နေ့စဉ်စားသောက်နေကျ အရာတွေပဲ၊ ဒါက အသားစိမ်း သို့မဟုတ် အခြားအရာတွေ မဟုတ်ဘူး မဟုတ်လား"

【မုန့်တွေကို ဘိဘိတုန်ရဲ့ ရှေ့ကို ကမ်းပေးလိုက်ရင်း ယွီရှောင်ကန်းဟာ သူမကို အသေအချာ မြင်တွေ့စေချင်ခဲ့တာပါ။】

【ဒါပေမဲ့လည်း ယွီရှောင်ကန်း လုံးဝ မမျှော်လင့်ထားတဲ့ အရာကတော့... ဘိဘိတုန်ဟာ သူ့ရဲ့လက်ထဲက မုန့်တွေကို ကြည့်လိုက်ပြီးနောက်မှာတော့ တကယ်ပဲ လက်ကို ဆန့်ထုတ်ပြီး မုန့်တစ်ဆုပ်ကို ယူလိုက်တာပဲ ဖြစ်တယ်။】

【မုန့်တစ်တုံးကို ကောက်ယူပြီး သူမရဲ့ ပါးစပ်ထဲကို ထည့်ကာ နှစ်ချက်၊ သုံးချက်လောက် ဝါးစားလိုက်ပြီးနောက်မှာတော့ ဘိဘိတုန်ရဲ့ မျက်လုံးလေးတွေဟာ ချက်ချင်း အရောင်တောက်သွားခဲ့ရတယ်။】

"အရသာရှိလိုက်တာ!"

【အဲဒီလို ပြောပြီးတာနဲ့ ဘိဘိတုန်ဟာ မုန့်အိတ်ရဲ့ အနားစွန်းကို ဆွဲကိုင်လိုက်ပြီး မုန့်တွေအားလုံးကို သူမရဲ့ လက်ထဲကို တိုက်ရိုက် ယူဆောင်သွားခဲ့တော့တယ်။】

【အဲဒီနောက်... အံ့ဩလွန်းလို့ ကြည့်နေတဲ့ ယွီရှောင်ကန်းရဲ့ မျက်ဝန်းတွေအောက်မှာတင် သူမက ကျေးဇူးတင်စကား ဆိုလိုက်ပါသေးတယ်။】

"မုန့်ကျွေးတဲ့အတွက် ကျေးဇူးတင်ပါတယ်နော်။ နောက်ကျရင် မင်း ဝိညာဉ်မြို့တော်ကို လာခဲ့တဲ့အခါကျရင်လည်း ငါက မင်းကို တကယ့် အရသာရှိတဲ့ အရာတွေနဲ့ ပြန်ပြီး ဧည့်ခံပါ့မယ်"