အခန်း ၄၅ ယွီယွမ်ကျန့် - ငါ့သား ရှောင်ကန်းက ဘွဲ့အမည်ရ ဒိုလော်တစ်ယောက် ဖြစ်လာနိုင်တဲ့ ပါရမီ ရှိတယ်!
【ဒုတိယပိုင်း ထုတ်လွှင့်ပြသမှု ပြီးဆုံးသွားပါပြီ။ ခဏတာ အနားယူပါ၊ အပြိုင်နှိုင်းယှဉ်မှုရဲ့ အဓိကဇာတ်ကောင်ဖြစ်တဲ့ နဂါးနတ်ဘုရားဒိုလော် ယွီရှောင်ကန်းရဲ့ ဗီဒီယိုအပိုင်းကို စတင်ပြသတော့မည် ဖြစ်သည်။】
ကောင်းကင်စီရင်ချက်မျက်နှာပြင်ထက်က စာတန်းကို မြင်လိုက်ရတဲ့အခါမှာတော့ လူတိုင်းဟာ သက်ပြင်းတစ်ချက်ကို အဝအလင် ချလိုက်နိုင်ကြတော့တယ်။
"နောက်ဆုံးတော့ ပြီးသွားခဲ့ပြီပဲ"
လူတွေ အခုလို တွေးမိတာကိုလည်း အပြစ်ပြောလို့ မရပါဘူး။ ရှေ့က ယွီရှောင်ကန်းရဲ့ အတိတ်ဇာတ်လမ်းတွေထဲမှာ မိုးကြိုးဒိုလော် ယွီယွမ်ကျန့်နဲ့ အပြာရောင်လျှပ်စီး နဂါးဂိုဏ်းတို့ ပါဝင်ပတ်သက်နေပြီး...
အရင်တုန်းက ယွီယွမ်ကျန့်က ယွီရှောင်ကန်းကို အရူးအမူး ရိုက်နှက်ဆုံးမတဲ့ မြင်ကွင်းတွေက ကြည့်ရတာ လူထုအတွက် တကယ့်ကို အားရကျေနပ်စရာ ကောင်းလှတယ် ဆိုပေမယ့်လည်း...
ဒါပေမဲ့ သူတို့ရှိနေတာက ဒိုလော်တိုက်ကြီးမှာ ဖြစ်ပါတယ်။
အင်အားကြီးမားမှုကိုသာ အရာရာထက် ပိုပြီး ဦးစားပေးလေးစားတဲ့ ကမ္ဘာတစ်ခုလေ။
ဒီနေရာမှာ အင်အားကသာ လူတစ်ယောက်ရဲ့ တန်ဖိုးကို တိုင်းတာတဲ့ အခြေခံအကျဆုံး စံနှုန်းတစ်ခု ဖြစ်တယ်။
ဒါကြောင့်မို့ နောင်အနာဂတ်မှာ ဘာမှဖြစ်ထွန်းလာမှာမဟုတ်တဲ့ ယွီရှောင်ကန်းလို ကောင်မျိုးရဲ့ ဇာတ်လမ်းက လူတွေရဲ့ စိတ်ဝင်စားမှုကို ဆွဲဆောင်နိုင်ခြင်း မရှိတာ သဘာဝကျပါတယ်။
ဒါနဲ့ ဆန့်ကျင်ဘက်အနေနဲ့ နဂါးနတ်ဘုရားဒိုလော် ယွီရှောင်ကန်းကတော့ အမှောင်ကမ္ဘာက မဟာဆရာသခင် ယွီရှောင်ကန်းလိုပဲ တူညီတဲ့ နောက်ခံနောက်ကြောင်းနဲ့ တူညီတဲ့ မွေးရာပါပါရမီကို ပိုင်ဆိုင်ထားတာပါ။
ဒါပေမဲ့ နောက်ဆုံးမှာတော့ အဲဒီအလင်းကမ္ဘာက သူဟာ သူ့ရဲ့ ကံကြမ္မာကို ဆန့်ကျင်တိုက်ခိုက်ပြီး ဘွဲ့အမည်ရ ဒိုလော်တစ်ယောက် ဖြစ်လာခဲ့တယ် မဟုတ်လား။
ဒိုလော်တိုက်ကြီးပေါ်က မွေးရာပါဝိညာဉ်စွမ်းအား အဆင့် ၁ (သို့) အဆင့် ၂ သာရှိတဲ့ မရေမတွက်နိုင်တဲ့ ဝိညာဉ်သခင်တွေအတွက်တော့ သူဟာ တကယ့်ကို လမ်းပြမီးရှူးတန်ဆောင်ကြီးတစ်ခုလိုပါပဲ။
သူတို့ဟာ ယွီရှောင်ကန်းရဲ့ ကံကြမ္မာကို ပြောင်းပြန်လှန်ပစ်ခဲ့တဲ့ လုပ်ငန်းစဉ်ကို အသည်းအသန် သိချင်နေကြပြီး အဲဒီနည်းလမ်းတွေကို မိမိတို့ကိုယ်တိုင်အတွက် အသုံးချလို့ရမလားဆိုတာ လေ့လာချင်နေကြတာ ဖြစ်တယ်။
အမှောင်ကမ္ဘာ၊ ရှရက်ခ် အကယ်ဒမီတွင်။
ဘုံခုနှစ်ဆင့်ပြဿဒ်ဂိုဏ်းရဲ့ ဝတ်စုံတွေကို ဝတ်ဆင်ထားတဲ့ လူငယ်အချို့ဟာ အဲဒီနေရာကို ရောက်ရှိလာခဲ့ကြတယ်။
"အမျိုးသမီးငယ်... ဂိုဏ်းချုပ်နဲ့ အခြားသူတွေက သမီးတော်ကို ပြန်ခေါ်ဖို့ ကျွန်တော်တို့ကို စေလွှတ်လိုက်တာပါ"
ခေါင်းဆောင်ဖြစ်သူက နင်ရုန်ရုန်ရဲ့အနီးကို ချဉ်းကပ်လာပြီး လေးစားတဲ့ အမူအရာနဲ့ ပြောလိုက်တယ်။
နင်ရုန်ရုန်ဟာ အခုထိ အရွယ်မရောက်သေးတဲ့ ကလေးမလေးတစ်ယောက် ဖြစ်ပေမယ့် သူမရဲ့နောက်ကွယ်မှာ အရိုးဒိုလော်နဲ့ ဓားဒိုလော်ဆိုတဲ့ ဒိုလော်ကြီးနှစ်ပါးရဲ့ ကာကွယ်စောင့်ရှောက်မှုနဲ့ အချစ်တွေကို အပြည့်အဝ ရရှိထားတာလေ။
ဒါကြောင့် နင်ရုန်ရုန်ဟာ ဘုံခုနှစ်ဆင့်ပြဿဒ်ဂိုဏ်းထဲမှာ 'စုန်းမလေး' လို့ လူသိများပေမယ့် ဘယ်သူမှ သူမကို သွားပြီး မဆွရဲကြပါဘူး။
"သမီး မပြန်ချင်သေးဘူး! ဒီမှာပဲ နေပြီး ဆက်ကြည့်ချင်တယ်!"
နင်ရုန်ရုန်ဟာ သူမကို လာခေါ်တဲ့သူတွေကို တစ်ချက်လှမ်းကြည့်လိုက်ပြီး၊ အဝေးကနေ ကောင်းကင်စီရင်ချက်မျက်နှာပြင်ကို စောင့်ကြည့်နေကြတဲ့ ရှရက်ခ်အဖွဲ့သားတွေဘက်ကို မျက်စိကစားရင်း ပြောလိုက်တယ်။
သူမအနေနဲ့ ရှရက်ခ်အကယ်ဒမီကနေ မထွက်ခွာချင်ရတဲ့ အကြောင်းရင်းကတော့ ထူးခြားဆန်းပြားတဲ့ ပါရမီရှင်တွေ ရှိနေတာအပြင်... အခု ကောင်းကင်စီရင်ချက်မျက်နှာပြင်ရဲ့ အဓိကဇာတ်ကောင်ဖြစ်တဲ့ ယွီရှောင်ကန်းကိုယ်တိုင်ကလည်း ဒီနေရာမှာ ရှိနေလို့ပဲ ဖြစ်တယ်။
နင်ရုန်ရုန်ဟာ နှုတ်ကနေတော့ ဒီမဟာဆရာသခင်အပေါ် သိပ်ပြီး လေးစားမှု မပြသပေမယ့် သူမရဲ့ ရင်ထဲမှာတော့ အတွေးက တစ်မျိုးပါ။
ဘာပဲဖြစ်ဖြစ် သူက လက်ရှိကောင်းကင်စီရင်ချက်မျက်နှာပြင်ရဲ့ အဓိကဇာတ်ဆောင်တွေထဲက တစ်ယောက် ဖြစ်နေတာလေ။ ဒီဖြစ်စဉ်ကြီးက မရေရာမှုတွေ အများကြီး ရှိနေတာကြောင့် နောင်အနာဂတ်မှာ ဘယ်လိုအပြောင်းအလဲတွေ ဖြစ်လာမလဲဆိုတာ ဘယ်သူသိမှာလဲ
ဒါကြောင့် နင်ရုန်ရုန်က ယွီရှောင်ကန်းရဲ့ ဘေးနားမှာနေပြီး သူ့ကို မျက်ခြေမပြတ် စောင့်ကြည့်ဖို့ လိုအပ်တယ်လို့ ခံစားနေရတာ၊ အနည်းဆုံးတော့ လူလွှတ်ပြီး စောင့်ကြည့်ခိုင်းထားရမယ်လေ။
"ဒါက... ဒါပေမဲ့ အမျိုးသမီးငယ်၊ ကောင်းကင်စီရင်ချက်မျက်နှာပြင်ကြောင့် ဂိုဏ်းချုပ်က ဒိုလော်တိုက်ကြီးရဲ့ အနာဂတ်ဟာ အရမ်း အန္တရာယ်များလာနိုင်တယ်လို့ ခံစားနေရလို့ပါ"
"ဒါဆိုရင် ဖေဖေ၊ ဘိုးဘိုးဓားနဲ့ ဘိုးဘိုးအရိုးတို့ကိုပါ ဒီကို လာခဲ့ခိုင်းလိုက်လေ။ ဒီရှရက်ခ်အကယ်ဒမီမှာ ကောင်းကင်စီရင်ချက်မျက်နှာပြင်ရဲ့ အဓိကဇာတ်ဆောင်ဖြစ်တဲ့ ယွီရှောင်ကန်း ရှိနေသလို၊ ပါရမီရှင် အုပ်စုကြီးတစ်ခုလုံးလည်း ရှိနေတယ်လို့ သွားပြောလိုက်"
နင်ရုန်ရုန်က စိတ်မရှည်တဲ့ အမူအရာနဲ့ လက်ကို ဝှေ့ယမ်းပြလိုက်တယ်။
"မွေးရာပါ ဝိညာဉ်စွမ်းအားအပြည့် ပိုင်ဆိုင်ထားတဲ့ ပါရမီရှင်တွေကိုတင် ကြည့်ဦး၊ ဒီအကယ်ဒမီ အသေးလေးထဲမှာတင် သုံးယောက်တောင် ရှိတယ်။ အခြားသူတွေကလည်း အဆင့် ၇ နဲ့ အထက်ချည်းပဲ"
"ဒီလောက်အထိ အစွမ်းထက်တဲ့ 'အပြင်က' ပါရမီရှင် အုပ်စုကြီးကို မြင်နေရတာတောင် ဂိုဏ်းအနေနဲ့ တကယ်ပဲ မမြင်ချင်ယောင်ဆောင်နေတော့မှာလား”
နင်ရုန်ရုန်ရဲ့ စကားတွေကြောင့် အဲဒီလူတွေဟာ ဆွံ့အသွားခဲ့ရတယ်။ ဘာပဲဖြစ်ဖြစ် ပါရမီရှင်တွေကို စည်းရုံးသိမ်းသွင်းခြင်းက ဘုံခုနှစ်ဆင့်ပြဿဒ်ဂိုဏ်းရဲ့ အတွင်းလူတိုင်း မဖြစ်မနေ လုပ်ဆောင်ရမယ့် တာဝန်တစ်ခု ဖြစ်နေတာကိုး။
"ဒါဆိုရင် ကျွန်တော်တို့ ဂိုဏ်းချုပ်ထံ ပြန်လည်သတင်းပို့လိုက်ပါ့မယ်"
"သွားကြ၊ သွားကြ"
နင်ရုန်ရုန်ဟာ ဂိုဏ်းသားတွေကို နှုတ်ဆက်လိုက်ပြီးနောက် ရှရက်ခ်အဖွဲ့သားတွေဆီ ခုန်ဆွခုန်ဆွနဲ့ ပြန်လာကာ ကျူးကျူးချင်းနဲ့ ရှောင်ဝူတို့ရဲ့ ဘေးမှာ ဝင်ထိုင်လိုက်တယ်။
"ဂိုဏ်းက နင့်ကို ပြန်ခေါ်နေတာလား?"
"အင်း၊ ဒါပေမဲ့ ငါ ငြင်းလိုက်တယ်"
ကျူးကျူးချင်းရဲ့ မေးခွန်းကို နင်ရုန်ရုန်က တိုက်ရိုက်ပဲ ပြန်ဖြေလိုက်တယ်။
ကျူးကျူးချင်းကတော့ နင်ရုန်ရုန်ရဲ့ အဖြေကို မအံ့သြပါဘူး။ အင်အားကြီးအဖွဲ့အစည်းတစ်ခုခုက လာတဲ့သူဆိုရင် သတ္တရတနာ ဖန်စီမံသောဂိုဏ်းရဲ့ အခြေအနေကို ကောင်းကောင်းသိကြတာပဲ။
ဒီရှရက်ခ်အကယ်ဒမီက စုတ်ပြတ်သတ်နေတယ် ဆိုပေမယ့်လည်း အထဲက အဖွဲ့သားတွေကတော့ အားလုံး ထူးခြားဆန်းပြားလွန်းလှပါတယ်။ နင်ရုန်ရုန်သာ တကယ်ကြီး ထွက်သွားခဲ့ရင် အဲဒါကမှ ပိုပြီး ထူးဆန်းနေဦးမယ်။
"ငါ မနေ့ညက ကျောင်းအုပ်ကြီးနဲ့ အဲဒီမဟာဆရာသခင်တို့ ဆွေးနွေးနေတာကို မတော်တဆ ကြားခဲ့မိတယ်။ အကယ်ဒမီရဲ့ ရန်ပုံငွေက မလုံလောက်တော့လို့ သင့်တော်တဲ့ ပတ်ဝန်းကျင်တစ်ခု ပေးနိုင်ဖို့အတွက် နေရာပြောင်းရွှေ့ဖို့ ပြင်ဆင်နေကြတယ်"
"ထျန်းတောက်မြို့တော် ဘက်ကို သွားဖို့ ဖြစ်နိုင်ခြေ အရမ်းများတယ်"
ကျူးကျူးချင်းက မနေ့ညက သူမ မတော်တဆ ကြားခဲ့မိတဲ့ သတင်းအချက်အလက်ကို နင်ရုန်ရုန်နဲ့ မျှဝေလိုက်တယ်။
"ထျန်းတောက်မြို့တော်ကို သွားမှာလား အဲဒါဆိုကောင်းတာပေါ့!"
နင်ရုန်ရုန်ရဲ့ မျက်နှာမှာ ဝမ်းသာအားရ ဖြစ်သွားတဲ့ အရိပ်အယောင်တွေ ပေါ်လာခဲ့တယ်။ သူမဟာ ထျန်းတောက်မြို့တော်နဲ့ အင်မတန် ရင်းနှီးတာလေ၊ အဲဒီနေရာက ဘုံခုနှစ်ဆင်ပြဿဒ်ဂိုဏ်းနဲ့ အရမ်းနီးစပ်တာကိုး။
ဒါ့အပြင် ထျန်းတောက်အင်ပါယာရဲ့ ပထမဆုံးမင်းသား ရွှေချင်းဟယ်ကလည်း သူမအဖေရဲ့ တပည့်တစ်ယောက် ဖြစ်နေတာပဲ။
တကယ်လို့ သူတို့သာ ထျန်းတောက်မြို့တော်ကို တကယ်သွားဖြစ်ရင် ရှရက်ခ်အဖွဲ့သားတွေကို သူမတို့ဂိုဏ်းထဲ ဆွဲဆောင်ဖို့ ပိုပြီးတော့တောင် ယုံကြည်ချက် ရှိသွားတာပေါ့။
"ငါ အဖေတို့ဆီကို ဒီအကြောင်း ကြိုပြီး အကြောင်းကြားထားရမယ်"
နင်ရုန်ရုန်ဟာ စိတ်ထဲမှာ အနာဂတ်အတွက် အစီအစဉ်တွေ ချနေမိတယ်။
အဲဒီအချိန်မှာပဲ အနားယူချိန် ပြီးဆုံးသွားခဲ့ပြီး ကောင်းကင်စီရင်ချက်မျက်နှာပြင်ဟာ ပုံရိပ်တွေကို ထပ်မံ ထုတ်လွှင့်ပြသလာခဲ့တာကြောင့် နင်ရုန်ရုန်ဟာ အတွေးတွေကို ဘေးဖယ်ထားလိုက်ပြီး သူမရဲ့ ညီမတွေနဲ့အတူ မျက်နှာပြင်ကို အာရုံစိုက် ကြည့်ရှုလိုက်တော့တယ်။
【ဗီဒီယိုကတော့ ဆက်လက်ပြသနေဆဲ...】
【ဒါကတော့ နောက်ထပ် စောစောစီးစီး မနက်ခင်းတစ်ခုပါပဲ။ ယွီရှောင်ကန်းဟာ လေ့ကျင့်ရေးကွင်းပြင်မှာ သူ့အဖေ ယွီယွမ်ကျန့်နဲ့အတူ လေ့ကျင့်နေခဲ့တယ်။】
【ယွီရှောင်ကန်းရဲ့ လက်ရှိ လှုပ်ရှားမှုစွမ်းရည်တွေက ယွီယွမ်ကျန့်ရဲ့ မျက်စိထဲမှာတော့ အလွန် အားနည်းသေးတယ် ဆိုပေမယ့်လည်း ဘယ်လိုအင်အားကြီးပုဂ္ဂိုလ်မျိုးကမဆို ဒီလို အခြေခံတွေကနေပဲ စတင်ခဲ့ရတာ မဟုတ်ဘူးလား】
【ဒါတင်မကသေးပါဘူး၊ လက်ရှိ ယွီရှောင်ကန်း ပိုင်ဆိုင်ထားတဲ့ အခြေခံအုတ်မြစ်က ယွီယွမ်ကျန့်ကိုယ်တိုင်ပင်လျှင် မချီးကျူးဘဲ မနေနိုင် လောက်အောင် ထိတ်လန့်စရာ ကောင်းနေခဲ့ပြီ။】
【သူကိုယ်တိုင်နဲ့ ဂိုဏ်းရဲ့ အကြီးအကဲတွေရဲ့ ထပ်ခါတလဲလဲ အကဲဖြတ်ချက်တွေအရ... နှစ်ပေါင်းသောင်းချီ သက်တမ်းရှိတဲ့ ဝေလငါးကော် ကို စုပ်ယူပြီးနောက် ယွီရှောင်ကန်းရဲ့ ခန္ဓာကိုယ်ကြံ့ခိုင်မှုဟာ သာမန် အဆင့် ၂၀ ရှိတဲ့ ဝိညာဉ်သခင်တစ်ယောက်ရဲ့ ကြံ့ခိုင်မှုကိုတောင် ကျော်လွန်သွားခဲ့ပြီလို့ ဆုံးဖြတ်ခဲ့ကြတယ်။】
【ဒီလို ကြံ့ခိုင်မှုမျိုးဆိုရင် ယွီရှောင်ကန်းရဲ့ လက်ရှိ ခန္ဓာကိုယ်တည်ဆောက်ပုံအရ သူဟာ နှစ်ပေါင်း ရှစ်ရာကျော် သက်တမ်းရှိတဲ့ ပထမဝိညာဉ်ကွင်းကို တိုက်ရိုက် စုပ်ယူဖို့ ကြိုးစားနိုင်ပြီလို့ ဆိုလိုတာပဲ။】
【နှစ်ပေါင်း ရှစ်ရာသက်တမ်းရှိတဲ့ ပထမဝိညာဉ်ကွင်း!】
【ဒါက ဘာကို ဆိုသလဲဆိုရင် သူ့ရဲ့ ဒုတိယဝိညာဉ်ကွင်းကို နှစ်ထောင်ချီသက်တမ်းရှိတဲ့ အဆင့်ကို တိုက်ရိုက် စုပ်ယူနိုင်မှာ ဖြစ်ပြီး...】
【တတိယဝိညာဉ်ကွင်းကို နှစ်ငါးထောင်သက်တမ်း၊ စတုတ္ထဝိညာဉ်ကွင်းကိုတော့ နှစ်သောင်းချီသက်တမ်းအထိ စုပ်ယူနိုင်လိမ့်မယ်။】
【ဒီလို အခြေခံအုတ်မြစ်မျိုးနဲ့ဆိုရင် သူ့ရဲ့သားဟာ နောင်အနာဂတ်မှာ ဘယ်လိုအဆင့်အထိ ရောက်ရှိသွားမလဲဆိုတာကို ယွီယွမ်ကျန့်တစ်ယောက် စိတ်ကူးထဲတောင် မထည့်ဝံ့စရာပါပဲ။】
【အနည်းဆုံးတော့ သူ့ရဲ့ မွေးရာပါ ဝိညာဉ်စွမ်းအား အဆင့် ၁ ဆိုတဲ့ ပါရမီက သူ့ကို နောက်ထပ် ဟန့်တားပိတ်ဆို့ထားနိုင်တော့မှာ မဟုတ်ပါဘူး။】
【အခုဆိုရင် ယွီယွမ်ကျန့်ဟာ ဂုဏ်ယူဝင့်ကြွားစွာနဲ့တောင် ပြောနိုင်ခဲ့ပြီ -】
【"ငါ့သား ယွီရှောင်ကန်းက ဘွဲ့အမည်ရ ဒိုလော်တစ်ယောက် ဖြစ်လာနိုင်တဲ့ ပါရမီ ရှိတယ်!"】
【ဖြောင်း! ဒုန်း! ဘုန်း!】
【နောက်ထပ် တိုက်ခိုက်လေ့ကျင့်မှု တစ်ကြိမ်အပြီးမှာတော့ ယွီယွမ်ကျန့်ရဲ့ လက်တစ်ချက် ဝှေ့ယမ်းလိုက်မှုနဲ့အတူ ယွီရှောင်ကန်းဟာ မြေပြင်ပေါ်ကို လုံးဝ ပုံရက်သား လဲကျသွားခဲ့ပြီး အချိန်အတော်ကြာတဲ့အထိ မလှုပ်နိုင်ခဲ့ပါဘူး။】
【"ဟားဟားဟား... ကောင်းပြီ၊ ဒီနေ့အတွက် လေ့ကျင့်မှုကတော့ ဒီမှာတင် ပြီးပြီ။ ပြီးတော့ နောက်ရက်အနည်းငယ်အတွက် လေ့ကျင့်ခန်းတွေကိုလည်း ခေတ္တရပ်နားထားမယ်။"】
【"ဒီရက်ပိုင်းအတွင်းမှာ ခန္ဓာကိုယ်စွမ်းအင်နဲ့ စိတ်ဓာတ်ခွန်အားတွေကို ပြန်လည်ဖြည့်တင်းဖို့အတွက် ကောင်းကောင်း အနားယူထားလိုက်ဦး။ အဲဒီနောက်ပိုင်းကျရင်တော့ ငါတို့ မင်းရဲ့ ပထမဆုံး ဝိညာဉ်ကွင်းကို သွားရောက်ရှာဖွေရမယ့် အချိန်ပဲ ဖြစ်လိမ့်မယ်။"】
【ယွီယွမ်ကျန့်ဟာ မောပန်းနွမ်းနယ်နေတဲ့ ယွီရှောင်ကန်းကို ကြည့်ပြီး အားရပါးရ ရယ်မောလိုက်တယ်။】
【ဒီလို လေ့ကျင့်ခန်း လုပ်ပြီးတဲ့ အချိန်ကျမှပဲ သူဟာ အမြဲတမ်း ထက်မြက်ပြီး ကြံ့ခိုင်လွန်းတဲ့ သူ့ရဲ့သား ဖြစ်သူ ပုံပျက်ပန်းပျက် ဖြစ်နေတာကို မြင်တွေ့ရတာကိုး။】
【"နားလည်ပါပြီ!"】
【မြေပြင်ပေါ်မှာ လဲလျောင်းနေရင်း ယွီရှောင်ကန်းဟာ သူ နားလည်ကြောင်း ပြသတဲ့အနေနဲ့ လက်ကို နှစ်ချက်လောက်ပဲ ယမ်းပြနိုင်ခဲ့တယ်။ ဒါကလွဲရင် သူဟာ ခန္ဓာကိုယ်က ကြွက်သားတစ်ချက်ကိုတောင် မလှုပ်ရှားချင်တော့ပါဘူး။】
【"ဟားဟားဟား!"】
【ယွီရှောင်ကန်းရဲ့ အခြေအနေကို ကြည့်ပြီး ယွီယွမ်ကျန့်ဟာ ရယ်မောရင်း လေ့ကျင့်ရေးကွင်းပြင်ကနေ ထွက်ခွာသွားခဲ့ကာ ယွီရှောင်ကန်း တစ်ယောက်တည်းကိုသာ ခန္ဓာကိုယ်ပြန်လည် ကြံ့ခိုင်လာအောင် ချန်ထားရစ်ခဲ့တော့တယ်။】
【မြေပြင်ပေါ်မှာ လဲလျောင်းရင်း ကောင်းကင်ကြီးကို မော့ကြည့်နေတဲ့ ယွီရှောင်ကန်းရဲ့ ရင်ထဲမှာလည်း အတိုင်းထက်အလွန် ရင်ခုန်စိတ်လှုပ်ရှားနေမိတာပဲ။】
【ပထမဝိညာဉ်ကွင်းဆိုတာ... သူ ကောင်းကင်ဘုံကို ဆန့်ကျင်ပြီး သူ့ရဲ့ ကံကြမ္မာကို ပြောင်းလဲပစ်နိုင်မယ့် လမ်းစဉ်ရဲ့ အစပျိုးရာ နေရာ ဖြစ်တယ်။】
【ဒါက ဝိညာဉ်စနစ်လောကထဲကို သူ စတင်ဝင်ရောက်မယ့် အခြေခံအုတ်မြစ်လည်း ဖြစ်တာပေါ့။】
【သူဟာ စာအုပ်တွေထဲမှာ ဝိညာဉ်တွေနဲ့ ဝိညာဉ်စွမ်းရည်တွေအကြောင်း မရေမတွက်နိုင်တဲ့ အခြေအနေတွေကို ဖတ်ရှုဖူးတယ် ဆိုပေမယ့်လည်း... သူ့အလှည့် ရောက်လာတဲ့အခါမှာ စိတ်လှုပ်ရှား မိတာကတော့ ရှောင်လွှဲလို့ မရပါဘူး။】
【"ငါ့ရဲ့ ပထမဆုံး ဝိညာဉ်စွမ်းရည်က အတော်လေး အင်အားကြီးမားတဲ့အရာ တစ်ခု ဖြစ်ပါစေလို့ မျှော်လင့်မိတာပဲ!"】
【ယွီရှောင်ကန်းဟာ စိတ်ထဲကနေ တွေးလိုက်မိတယ်။】
【ဝိညာဉ်စွမ်းရည်တွေနဲ့ ပတ်သက်ပြီးတော့ သူ့မှာ ကိုယ်ပိုင် အတွေးအခေါ်တွေ ရှိထားပြီးသားပါ၊ ဒါပေမဲ့ အဲဒီအတွေးအခေါ်တွေကတော့ တကယ်တမ်း လက်တွေ့ကျင့်သုံးပြီး နားလည်သဘောပေါက်လာတဲ့ အချိန်အထိ စောင့်ဆိုင်းရဦးမှာပဲ ဖြစ်လေတော့သတည်း။】