အခန်း ၄၂ ယွီယွမ်ကျန့် - ငါကပဲ ရှောင်ကန်းရဲ့ ဝိညာဉ်စွမ်းရည်ကို ထုတ်ဖော်ဖို့ ပစ်မှတ်လုပ်ပေးမယ်!

အမှောင်ကမ္ဘာ၊ အပြာရောင်လျှပ်စီး နဂါးဂိုဏ်းတွင်။

ကောင်းကင်စီရင်ချက်မျက်နှာပြင်ထက်က ယွီရှောင်ကန်းရဲ့ ယုံကြည်မှုလွန်ကဲနေတဲ့ မျက်နှာပေးကို ကြည့်ရင်း ယွီယွမ်ကျန့်တစ်ယောက် စကားလုံးမဲ့နေခဲ့ရတယ်။

အဲ့တုန်းက ယွီရှောင်ကန်း ပထမဆုံးအကြိမ် ဝိညာဉ်စွမ်းရည်ကို ထုတ်ဖော်ခဲ့စဉ်က သူ့ကို တကယ့်ကို ကြီးမားတဲ့ တုန်လှုပ်မှုတစ်ခု ပေးခဲ့တာအမှန်ပဲ။

အဲဒီမြင်ကွင်းက အခုအချိန်အထိ သူ ဘယ်လိုမှ မေ့ဖျောက်လို့မရနိုင်တဲ့ အရာတစ်ခု ဖြစ်နေတယ်။

သူကတော့ အဲ့အမှတ်တရဆိုးကို သူ့စိတ်ရဲ့ အနက်ရှိုင်းဆုံးနေရာမှာ ဝှက်ထားလိုက်ရင် နောက်ထပ် ပြန်တွေးမိမှာမဟုတ်ဘူးလို့ ထင်ခဲ့တာ၊ ဒါပေမဲ့ ကောင်းကင်စီရင်ချက်မျက်နှာပြင်ကြီးက ဒီနေ့မှာ အဲဒီမြင်ကွင်းကို တစ်ကမ္ဘာလုံးအလယ် ပြန်လည်ထုတ်လွှင့်ပြသလိမ့်မယ်လို့ ဘယ်သူက မျှော်လင့်ထားမှာလဲ။

ဒါကြောင့် ယွီယွမ်ကျန့်တစ်ယောက် တကယ်ပဲ သတိမေ့လဲကျသွားချင်စိတ် ပေါက်သွားရတယ်။

သူက သူ့ဘေးနားမှာရှိတဲ့ ဒုတိယအကြီးအကဲကို လှမ်းကြည့်လိုက်ပြီး -

"အကြီးအကဲ... ကျွန်တော့်ကို လက်သီးနဲ့တစ်ချက်လောက်ထိုးပြီး သတိမေ့သွားအောင် လုပ်ပေးလို့ရမလား”

ဒုတိယအကြီးအကဲက ယွီယွမ်ကျန့်ကို လှမ်းကြည့်လိုက်ပြီး သူ့ရဲ့နှုတ်ခမ်းတွေဟာ အနည်းငယ် တွန့်ကွေးသွားခဲ့ပေမယ့် နောက်ဆုံးမှာတော့ ဘာစကားမှ ပြန်မပြောခဲ့ပါဘူး။

'မင်းတစ်ယောက်တည်းပဲ အခုအချိန်မှာ သတိမေ့လဲချင်နေတာ ထင်လို့လား’

"ဂိုဏ်းချုပ်... လက်ရှိအခြေအနေကိုပဲ ရင်ဆိုင်လိုက်ရအောင်ဗျာ။ ယွီရှောင်ကန်းက ကျွန်တော်တို့ အပြာရောင်လျှပ်စီး နဂါးဂိုဏ်းအတွက်တော့ ဘယ်လိုမှ ဖျောက်ဖျက်လို့မရတဲ့ အရှက်ရစရာကြီးတစ်ခုပဲ"

"အရင်တုန်းကတော့ လူအနည်းငယ်ပဲ ဒါကို သိကြတာ။ အခုတော့ သိပ်ကောင်းသွားပြီ၊ ဒိုလော်တိုက်ကြီးတစ်ခုလုံး သိသွားတော့မယ်"

"ကျွန်တော်တို့ အပြာရောင်လျှပ်စီး နဂါးဂိုဏ်းဟာ နောင်အနာဂတ်မှာ ဘယ်သူ့မျက်နှာကိုမှ ကြည့်ဝံ့တော့မှာ မဟုတ်ဘူး"

အကြီးအကဲချုပ်က ကုလားထိုင်ပေါ် နောက်မှီထိုင်ရင်း လုံးဝ စိတ်ဓာတ်ကျနေတဲ့ အမူအရာ ရှိနေခဲ့တယ်။

ဂိုဏ်းအရေးကို အလေးအနက်ဆုံး ထားတတ်တဲ့ ဒီအကြီးအကဲကြီးဟာ အခုအချိန်မှာတော့ လုံးဝကို အားကိုးရာမဲ့သွားရပြီ။

"ဟူး... တကယ့် ကပ်ဘေးကြီးပါပဲ!"

သက်ပြင်းချသံတွေနဲ့အတူ လူတိုင်းဟာ ကုလားထိုင်ပေါ်ကို ပုံရက်သား လဲကျသွားကြတော့တယ်။

`ဖြစ်ချင်ရာဖြစ်လိုက်တော့`

【ဗီဒီယိုကတော့ ဆက်လက်ပြသနေဆဲ...】

【ဝိညာဉ်သားရဲမုဆိုးအဖွဲ့ရဲ့ လိုက်ပါပို့ဆောင်မှုအောက်မှာ အဖွဲ့ဟာ လျှပ်စီးတောအုပ်ကနေ အောင်အောင်မြင်မြင်နဲ့ ပြန်လည်ထွက်ခွာနိုင်ခဲ့တယ်။】

【တောအုပ်အပြင်ဘက်ကို ရောက်တဲ့အခါ ယွီရှောင်ကန်းရဲ့ အမူအရာဟာ ချက်ချင်းပဲ ပိုပြီးတော့ ထောင်လွှားလာခဲ့တယ်။ ဝိညာဉ်သားရဲမုဆိုးအဖွဲ့ရဲ့ ခေါင်းဆောင်က နောင်တစ်ချိန်မှာ သူ့ဆီကနေ ရွှေဒင်္ဂါးတွေ ထပ်ပြီး ရှာရလွယ်ကူအောင် ရင်းနှီးမှုရယူဖို့ ရှေ့ကိုတက်ပြီး စကားစမြည်ပြော ချင်ပေမယ့် ယွီရှောင်ကန်းရဲ့ တိုက်ရိုက် လျစ်လျူရှုခြင်းကို ခံလိုက်ရတယ်။】

【ယွီရှောင်ကန်းရဲ့ အပြုအမူကို ကြည့်ပြီး ဝိညာဉ်သားရဲမုဆိုးအဖွဲ့ဝင်တွေဟာ ဒေါသပုန်ထသွားကြတယ်။ တစ်ယောက်ကဆိုရင် ယွီရှောင်ကန်းလို လူမျိုးဟာ နောင်အနာဂတ်မှာ ဘယ်တော့မှ ကြီးပွားတိုးတက်မယ့်သူ မဟုတ်ဘူးလို့တောင် အပိုင်တွက်ပြီး ပြောဆိုလိုက်ကြတယ်။】

【ဒါပေမဲ့ စိတ်မကောင်းစရာက သူတို့ရဲ့စကားတွေကိုတော့ မိမိကိုယ်ကို သက်သေပြချင်ဇောနဲ့ စိတ်စောနေတဲ့ ယွီရှောင်ကန်းက လုံးဝ ဂရုမစိုက်ခဲ့ပါဘူး။】

【မြင်းရထားတစ်စီးကို ငှားရမ်းပြီးနောက် ယွီရှောင်ကန်းဟာ အပြာရောင်လျှပ်စီး နဂါးဂိုဏ်းဆီကို ပြန်လာခဲ့တယ်။ အဲဒီအခါကျမှပဲ သူ ပျောက်ဆုံးနေတာကြောင့် ဂိုဏ်းချုပ် ယွီယွမ်ကျန့်တစ်ယောက် အမျက်ဒေါသပြင်းထန်နေပြီး သူ့ကို လိုက်ရှာဖို့ နေရာအနှံ့ လူတွေ စေလွှတ်နေခဲ့ကြောင်း သိလိုက်ရတယ်။】

【"ဟွန်း... ဒါက ကျွန်တော့်ရဲ့ သီအိုရီတွေကို အသိအမှတ်မပြုခဲ့တဲ့အတွက် ထိုက်တန်တဲ့ ရလဒ်ပဲ"】

【သူ့အဖေက သူ့ကို လိုက်ရှာနေတယ်ဆိုတာ ကြားရတဲ့အခါ ယွီရှောင်ကန်းက ကျေနပ်အားရစွာ နှာခေါင်းရှုံ့လိုက်တယ်။】

【သူ့အဖေက သားတစ်ယောက်အနေနဲ့ သူ့အပေါ် ဂရုစိုက်တယ်ဆိုတာ သူသိပါတယ်၊ သူ့ရဲ့ ကိုယ်ပိုင် ကျင့်ကြံခြင်း အရင်းအမြစ်တွေကိုတောင် သူ့ကို ပေးသုံးချင်စိတ်ရှိတာကို ကြည့်ရင် သိနိုင်တာပဲ။】

【ဒါပေမဲ့ ယွီရှောင်ကန်းက ယွီယွမ်ကျန့်ရဲ့ ဒီလိုဂရုစိုက်မှုကို မလိုအပ်ပါဘူး။ သူ ပိုပြီးအလိုရှိတာက ယွီယွမ်ကျန့်ရှေ့မှာ၊ အပြာရောင်လျှပ်စီး နဂါးဂိုဏ်းရှေ့မှာ၊ ပြီးတော့ ဒိုလော်တိုက်ကြီးတစ်ခုလုံးရဲ့ ရှေ့မှောက်မှာ သူ့ကိုယ်သူ သက်သေပြဖို့ပဲ ဖြစ်တယ်။】

【သူ့ရဲ့ ပညာရပ်ဆိုင်ရာကို သက်သေပြဖို့၊ သူ့ရဲ့ စွမ်းဆောင်ရည်ကို သက်သေပြဖို့နဲ့ သူ့ရဲ့ ထူးခြားဆန်းပြားတဲ့ ပင်ကိုယ်သဘာဝကို သက်သေပြဖို့။】

【အခုအချိန်မှာတော့ သူ့ရဲ့ ဝိညာဉ်စွမ်းရည်ကို ထုတ်ဖော်ပြသခြင်းဟာ ပထမဆုံးခြေလှမ်းပဲ။】

【ဒါကြောင့် ယွီရှောင်ကန်းဟာ ခေါင်းကို မော့၊ ရင်ကိုကော့ပြီး ဝင့်ဝင့်ကြွားကြွား ခြေလှမ်းတွေနဲ့ သူ့ရဲ့အိမ်ကို ပြန်လာခဲ့တယ်။】

【"ရှောင်ကန်း... မင်း အဆင်ပြေရဲ့လား ဒီရက်ပိုင်း ဘယ်တွေ သွားနေတာလဲ"】

【အိမ်ထဲကို ဝင်ဝင်ချင်းမှာပဲ ယွီယွမ်ကျန့်ရဲ့ စိုးရိမ်ပူပန်နေတဲ့ လေသံက သူ့နားထဲ ရောက်ရှိလာခဲ့တယ်။】

【ဒါပေမဲ့ စိတ်ပျက်စရာကောင်းတာက ယွီရှောင်ကန်းက အဲဒီဂရုစိုက်မှုကို မခံစားမိခဲ့ပါဘူး။】

【"အဖေ... ကျွန်တော် ပထမဝိညာဉ်ကွင်းကို အောင်မြင်စွာ ရရှိခဲ့ပြီ!"】

【ယွီရှောင်ကန်းက လျှပ်စီးတောအုပ်ကို သွားခဲ့ပုံ၊ ဝိညာဉ်သားရဲမုဆိုးအဖွဲ့ကို ငှားရမ်းခဲ့ပုံနဲ့ နောက်ဆုံးမှာ ဝိညာဉ်ကွင်းကို အောင်အောင်မြင်မြင် ရရှိခဲ့ပုံ အတွေ့အကြုံတွေကို ဂုဏ်ယူဝင့်ကြွားစွာ အကျဉ်းချုပ် ပြောပြလိုက်တယ်။】

【"ဆိုလိုတာက မင်းက တကယ်ပဲ မိုးကြိုးစွယ်ဝက်ဝံရဲ့ ဝိညာဉ်ကွင်းကို မင်းရဲ့ ပထမဝိညာဉ်ကွင်းအဖြစ် ရယူခဲ့တာပေါ့”】

【ယွီရှောင်ကန်းရဲ့ စကားကို ကြားပြီးနောက် ယွီယွမ်ကျန့်က မေးလိုက်တယ်။】

【"မှန်ပါတယ်၊ ဒါက ကျွန်တော့်အတွက် အသင့်တော်ဆုံး ဝိညာဉ်ကွင်းပဲ"】

【ယွီရှောင်ကန်းကတော့ သူ့ရဲ့သီအိုရီ မမှားနိုင်ဘူးလို့ အခိုင်အမာ ယုံကြည်နေဆဲပဲ ဖြစ်တယ်။】

【"...ထားလိုက်ပါတော့၊ ထားလိုက်ပါတော့။ ဝိညာဉ်ကွင်းကိုလည်း စုပ်ယူပြီးသွားပြီဆိုတော့ အခုအချိန်မှာ ဘာပြောပြော နောက်ကျသွားပြီ"】

【"ဒါနဲ့... မင်းရဲ့ ပထမဝိညာဉ်စွမ်းရည်က ဘာလဲ”】

【ယွီယွမ်ကျန့်က သက်ပြင်းချလိုက်ပြီးနောက် သူ့ရဲ့ စိတ်ခံစားချက်ကို ပြန်လည်ထိန်းညှိကာ ရင်ထဲမှာ အနည်း ငယ် မျှော်လင့်ချက်ထားလျက် မေးလိုက်တယ်။】

【တစ်ခါတလေကျရင်... တစ်ခါတလေကျရင် သူ့သားပြောတာ တကယ်ပဲ မှန်နေနိုင်မလား။】

【သူ့ရဲ့ ဝိညာဉ်က ဝက်ပုံစံဝိညာဉ်ဖြစ်နေတာကြောင့် မိုးကြိုးစွယ်ဝက်ဝံဟာ သူ့အတွက် အသင့်တော်ဆုံး ဝိညာဉ်သားရဲ ဖြစ်နေနိုင်တာပဲ။】

【ပြီးတော့ သူ့သားက သီအိုရီပိုင်းဆိုင်ရာ သုတေသနမှာ တကယ်ပဲ ထူးခြားတဲ့ ပါရမီ ရှိနေတာလည်း ဖြစ်နိုင်တာပဲ။】

【"ဟွန်း ဟွန်း... ကျွန်တော့်ရဲ့ ဝိညာဉ်စွမ်းရည်က အင်မတန် ထူးခြားဆန်းပြားပါတယ်။ အဖေဖြစ်နေလို့သာ ကျွန်တော် ထုတ်ပြတာ၊ သာမန်လူတွေကိုဆိုရင် လွယ်လွယ်နဲ့ ထုတ်ပြမှာ မဟုတ်ဘူး"】

【ယွီရှောင်ကန်းက ပြုံးစိစိနဲ့ ပြောလိုက်တယ်။】

【ယွီရှောင်ကန်းရဲ့ စကားကြောင့် ယွီယွမ်ကျန့်ရဲ့ မျက်လုံးတွေ လင်းလက်သွားရတယ်။ သူ့သားရဲ့ ဒီလိုအမူအရာကို ကြည့်ရတာ သူ့ရဲ့ ဝိညာဉ်စွမ်းရည်က အသေအချာကို ထူးခြားနေပုံပဲ။】

【သူ့သားပြောတာ တကယ်ပဲ မှန်နေတာလား】

【"မြန်မြန်... မြန်မြန်သွားရအောင်၊ လေ့ကျင့်ရေးကွင်းပြင်ကို သွားရအောင်! မင်းရဲ့ ဝိညာဉ်စွမ်းရည်ကို ငါ့ကို ပြစမ်း!"】

【ယွီယွမ်ကျန့်က ယွီရှောင်ကန်းရဲ့ ဝိညာဉ်စွမ်းရည်က ဘယ်လိုပုံစံမျိုးလဲဆိုတာကို ကိုယ်တိုင်ကိုယ်ကျ မြင်တွေ့ချင်ဇောနဲ့ သူ့ရဲ့ နေအိမ်မှာရှိတဲ့ လေ့ကျင့်ရေးကွင်းပြင်ဆီကို ယွီရှောင်ကန်းကို စိတ်လှုပ်ရှားစွာ ဆွဲခေါ်သွားတော့တယ်။】

【အတိအကျ အဲဒီအချိန်မှာပဲ တံခါးအပြင်ဘက်ကနေ အသံတစ်သံ ထွက်ပေါ်လာခဲ့တယ်။】

【"ဂိုဏ်းချုပ်... ကျွန်တော်တို့မှာ ဆွေးနွေးစရာ ကိစ္စအချို့ ရှိလို့ပါ"】

【အသံနဲ့အတူ လူရိပ်အချို့ဟာ တစ်ယောက်ပြီးတစ်ယောက် အခန်းထဲကို လျှောက်လှမ်းဝင်ရောက်လာကြတယ်။】

【သူတို့ကတော့ အပြာရောင်လျှပ်စီး နဂါးဂိုဏ်းရဲ့ အကြီးအကဲ သုံးယောက်ပဲ ဖြစ်တယ်။】

【"အကြီးအကဲ သုံးယောက်ပါလား။ ဘာကိစ္စများ ရှိလို့လဲ?"】

【"ကျွန်တော်တို့မှာ ကိစ္စအချို့ ရှိတာတော့ မှန်ပါတယ်။ ဒါပေမဲ့ ဂိုဏ်းချုပ်ရဲ့ အခုလိုပုံစံကို ကြည့်ရတာ ဘာလုပ်ဖို့ ပြင်နေတာလဲ"】

【အကြီးအကဲချုပ်က ယွီရှောင်ကန်းကို တစ်ချက်လှမ်းကြည့်ရင်း မေးလိုက်တယ်။】

【"အရင်တုန်းက ရှောင်ကန်း ပျောက်သွားတယ်မဟုတ်လား။ အခုမှပဲ သိရတယ်၊ ဒီကလေးက သူ့ရဲ့ ပထမဝိညာဉ်ကွင်းကို သွားရောက်ရယူပြီး အခုတင်ပဲ ပြန်ရောက်လာတာ"】

【ယွီယွမ်ကျန့်က ရှင်းပြလိုက်တယ်။】

【"သူက ပထမဝိညာဉ်ကွင်းကို ရပြီးသွားပြီ ဟုတ်စ ဝိညာဉ်စွမ်းရည်ကကော ဘာလဲ"】

【အနားမှာရှိတဲ့ ဒုတိယအကြီးအကဲက ရှေ့ကိုတက်ပြီး မေးလိုက်တယ်။ သူက ယွီရှောင်ကန်းရဲ့ သီးခြားခွဲထွက်နိုင်သော သားရဲဝိညာဉ်အပေါ် အမြဲတမ်း စိတ်စွဲလန်းမှု ကြီးမားခဲ့တာ ဖြစ်တယ်။】

【"ကျွန်တော်တို့လည်း အခုပဲ လေ့ကျင့်ရေးကွင်းပြင်ကို သွားပြီး ထုတ်ဖော်ပြသမလို့ လုပ်နေတာ"】

【"ဒါဆိုရင် အတူတူ သွားကြတာပေါ့။ သူ့ရဲ့ ဝိညာဉ်က တကယ်ပဲ အလားအလာ ရှိ၊ မရှိဆိုတာကို ကျွန်တော် ထပ်မံ အကဲဖြတ်ဖို့ အခွင့်အရေးကောင်းပဲ"】

【ဒုတိယအကြီးအကဲက ယွီယွမ်ကျန့်တို့နဲ့အတူ လိုက်ပါသွားချင်ခဲ့တယ်။】

【လောလောဆယ်မှာ ယွီရှောင်ကန်းဟာ ယွီယွမ်ကျန့်ရဲ့ ကျင့်ကြံခြင်း အရင်းအမြစ်တွေကို သုံးစွဲနေခဲ့တာ ဖြစ်ပေမယ့် ဒါက တစ်သက်လုံး ဒီအတိုင်း ဆက်သွားလို့မရဘူးလေ။ ဒီနေ့က ယွီရှောင်ကန်းရဲ့ အလားအလာကို ထပ်မံ အကဲဖြတ်ဖို့ အချိန်ကောင်းပဲ။】

【ဒုတိယအကြီးအကဲကတော့ စိတ်ထဲကနေ ဆုံးဖြတ်ချက်ချပြီးသား ဖြစ်တယ် - ယွီရှောင်ကန်းသာ အလားအလာ အနည်းငယ်မျှ ပြသနိုင်ရင်တောင်မှ သူက မျက်စိတစ်ဖက်ပိတ်ပြီး သူ့အတွက် အရင်းအမြစ်တွေကို ခွင့်ပြုပေးသွားမှာ ဖြစ်တယ်။】

【"ရှောင်ကန်း... မင်း ဘယ်လိုထင်လဲ?"】

【ယွီယွမ်ကျန့်က ယွီရှောင်ကန်းကို လှမ်းကြည့်လိုက်ပြီး သူ့သားအနေနဲ့ ဂိုဏ်းအကြီးအကဲတွေရဲ့ စမ်းသပ်မှုကို ဖြတ်ကျော်နိုင်ဖို့ လုံလောက်တဲ့ ယုံကြည်မှု ရှိ၊ မရှိ အတည်ပြုချင်ဟန်နဲ့ မေးလိုက်တယ်။】

【"ဒါဆိုရင် အတူတူ သွားကြတာပေါ့။ လူတိုင်းရဲ့ ရှေ့မှောက်မှာ ကျွန်တော့်ကိုယ်ကျွန်တော် သက်သေပြဖို့ အကောင်းဆုံး အချိန်ပဲ!"】

【ယွီရှောင်ကန်းရဲ့ စိတ်ထဲမှာတော့ ကြောက်ရွံ့မှု အလျင်းမရှိခဲ့ပါဘူး။ သူ့အမြင်အရ သူ့ရဲ့ ပထမဝိညာဉ်စွမ်းရည်က အလွန်အမင်း အစွမ်းထက်မှာ အသေအချာဖြစ်ပြီး ကျရှုံးဖို့ အလားအလာ လုံးဝ မရှိဘူးလေ။】

【"ကောင်းပြီ!"】

【ယွီယွမ်ကျန့်က ဝမ်းသာအားရ အော်ဟစ်လိုက်ပြီးနောက် အကြီးအကဲများအဖွဲ့နဲ့အတူ လေ့ကျင့်ရေးကွင်းပြင်ဆီကို ဦးတည်သွားခဲ့ကြတယ်။】

【လေ့ကျင့်ရေးကွင်းပြင်ကို ရောက်တဲ့အခါ ယွီယွမ်ကျန့်က ယွီရှောင်ကန်း သူ့ရဲ့စွမ်းရည်ကို လွတ်လွတ်လပ်လပ် ထုတ်ဖော်နိုင်ဖို့အတွက် ကိုယ်တိုင်ကိုယ်ကျ ပြိုင်ဘက်အဖြစ် ခံယူပြီး ပစ်မှတ်လုပ်ပေးလိုက်တယ်။】

【ထို့နောက် လူတိုင်းရဲ့ စိုက်ကြည့်နေတဲ့ အကြည့်တွေအောက်မှာ ယွီရှောင်ကန်းဟာ သူ့ရဲ့ဝိညာဉ်ဖြစ်တဲ့ လော်ဆန်းဖောင်ကို ဆင့်ခေါ်လိုက်တယ်။】

【နောက်တစ်စက္ကန့်မှာတော့ ဝါးတားတား အဝါရောင် ဝိညာဉ်ကွင်းတစ်ခုက တောက်ပလာခဲ့တယ်။】

【"လာစမ်း... ငါ့ရဲ့ ပထမဆုံး ဝိညာဉ်စွမ်းရည်ကို ပြသစမ်း!"】

【ယွီရှောင်ကန်းက သူ့ရဲ့ဝိညာဉ်စွမ်းအားကို လှုံ့ဆော်လိုက်ပြီး ပထမဝိညာဉ်ကွင်းကို အသက်သွင်းလိုက်တယ်။】

【ဝိညာဉ်ကွင်းရဲ့ အလင်းရောင်က ပိုမိုတောက်ပလာခဲ့တယ်။ အဲဒီအချိန်မှာပဲ လော်ဆန်းဖောင်ရဲ့ မျက်လုံးတွေက လင်းလက်သွားပြီး ၎င်းက လေကို အဝအလင် ရှူသွင်းလိုက်တဲ့အခါ ၎င်းရဲ့ ခန္ဓာကိုယ်က လျင်မြန်စွာ ကြီးထွားလာပြီး လေထဲကို ပျံတက်သွားခဲ့တယ်။】

【ယွီယွမ်ကျန့်တစ်ယောက် လော်ဆန်းဖောင်က ဘယ်လို ဝိညာဉ်စွမ်းရည်မျိုး ထုတ်လွှတ်မလဲဆိုတာကို မျှော်လင့်တကြီး စောင့်စားနေတဲ့ အချိန်မှာပဲ... ရုတ်တရက် လော်ဆန်းဖောင်က ခန္ဓာကိုယ်ကို လှည့်လိုက်ပြီး ၎င်းရဲ့ တင်ပါးကို သူ့ဆီကို တည့်တည့် ချိန်ရွယ်လိုက်တယ်။】

【ဘူးးးးးးး!!!】

【အက်ကွဲကွဲ အသံအကျယ်ကြီးတစ်ခုနဲ့အတူ လော်ဆန်းဖောင်ရဲ့ တင်ပါးနောက်ဆီကနေ ဝါးတားတား ဓာတ်ငွေ့အရှိန်အဟုန်ကြီးတစ်ခု ပေါက်ကွဲထွက်ပေါ်လာပြီး မျှော်လင့်ချက်တွေ ပြည့်နှက်နေတဲ့ ယွီယွမ်ကျန့်ကို တစ်ကိုယ်လုံး လွှမ်းခြုံ ဝါးမြိုသွားခဲ့တော့တယ်။】

【မကြာခင်မှာပဲ လော်ဆန်းဖောင်ရဲ့ ဝိညာဉ်စွမ်းရည် ထုတ်လွှတ်မှုက ပြီးဆုံးသွားခဲ့ပေမယ့် လေ့ကျင့်ရေးကွင်းပြင်တစ်ခုလုံးကတော့ သေလူကဲ့သို့ ထူးဆန်းစွာ တိတ်ဆိတ်သွားခဲ့ရလေတော့သည်။】