အခန်း ၄၁ ယွီရှောင်ကန်း - ပထမဆုံးအကြိမ် ဝိညာဉ်စွမ်းရည်ကို ထုတ်ဖော်ပြသခြင်းဟာ သဘာဝကျကျပဲ ခမ်းနားထည်ဝါတဲ့ အခမ်းအနားတစ်ခု လိုအပ်တာပေါ့

【"ငါ ဒီကောင်ကိုပဲ ရွေးတယ်!"】

【ယွီရှောင်ကန်းရဲ့ ရွေးချယ်မှုကြောင့် ဝိညာဉ်သားရဲမုဆိုးအဖွဲ့ဝင်တွေဟာ အံ့ဩမှင်သက်ပြီး တစ်ယောက်ကိုတစ်ယောက် ကြည့်လိုက်မိကြတယ်။】

【"ဟို... ဧည့်သည်တော်၊ ခင်ဗျားရဲ့ ခန္ဓာကိုယ်ကြံ့ခိုင်မှုအရဆိုရင် နှစ်လေးရာသက်တမ်း ဝိညာဉ်ကွင်းကို လုံးဝ စမ်းသပ်စုပ်ယူကြည့်လို့ ရပါတယ်ဗျာ။ ခင်ဗျားက စောစောက ခန္ဓာကိုယ်ပေါက်ကွဲပြီး သေသွားတဲ့ ဝိညာဉ်သခင်လို မဟုတ်ပါဘူး။"】

【ဝိညာဉ်သားရဲမုဆိုးအဖွဲ့ရဲ့ ခေါင်းဆောင်ဟာ ယွီရှောင်ကန်းဆီကနေ အခကြေးငွေအများကြီး ရထားတာကြောင့် အကြံပြုစကား ခပ်ရှားရှား ပြောဆိုလိုက်ခြင်းဖြစ်တယ်။】

【ဒါပေမဲ့ စိတ်ပျက်စရာကောင်းတာက အခုအချိန်မှာ နှစ်လေးရာသက်တမ်းရှိတဲ့ မိုးကြိုးစွယ်ဝက်ဝံ ကို တစ်ချက်ကြည့်လိုက်ရုံနဲ့တင် ယွီရှောင်ကန်းရဲ့ စိတ်ထဲမှာ စောစောက ဝိညာဉ်သခင်ရဲ့ ခန္ဓာကိုယ် ပေါက်ကွဲသွားတဲ့ မြင်ကွင်းကို ပြန်လည်အမှတ်ရ စေတာပဲ ဖြစ်တယ်။】

【သူ သေလို့မဖြစ်ဘူး။ တကယ်လို့ သူ သေသွားရင် နောင်မှာ ဘယ်လိုလုပ်ပြီး အင်အားကြီး ပုဂ္ဂိုလ်တစ်ယောက် ဖြစ်လာနိုင်မှာလဲ၊ သူ့ကိုယ်သူ သက်သေပြပြီး သူ့ကို လှောင်ပြောင်ခဲ့ကြတဲ့သူတွေရဲ့ ပါးကို ဘယ်လိုလုပ်ပြီး ပြန်ရိုက်နိုင်တော့မှာလဲ】

【ဘာပဲဖြစ်ဖြစ် သူရွေးချယ်ခဲ့တဲ့ မိုးကြိုးစွယ်ဝက်ဝံဟာလည်း သက်တမ်း နှစ်သုံးရာနီးပါး ရှိနေတာပဲ။】

【ဝိညာဉ်သခင် ဘယ်နှစ်ယောက်တောင်မှ ပထမဝိညာဉ်ကွင်းက နှစ်တစ်ရာတောင်မပြည့်ဘဲ နောက်ဆုံးမှာ အင်အားကြီးပုဂ္ဂိုလ်တွေ ဖြစ်လာခဲ့ကြလို့လဲ။】

【နှစ်သုံးရာသက်တမ်း ဝိညာဉ်ကွင်းက မဆိုးပါဘူး!】

【ဒါကြောင့် ယွီရှောင်ကန်းဟာ နှစ်သုံးရာ မပြည့်တပြည့်ဖြစ်နေတဲ့ မိုးကြိုးစွယ်ဝက်ဝံကို မပြတ်သားတဲ့ လက္ခဏာ အလျင်းမရှိတဲ့ လေသံနဲ့ အခိုင်အမာ ညွှန်ပြလိုက်တယ်။】

【"ဒီတစ်ကောင်ပဲ!"】

အလင်းကမ္ဘာ၊ ဝိညာဉ်နန်းတော်တွင်။

"အိုဘုရားသခင်... သေရမှာကို ဒီလောက်တောင် ကြောက်နေရလား... ဒီလိုလူမျိုးကတော့ ဝိညာဉ်သခင် မဖြစ်လာတာပဲ ကောင်းပါတယ်။ သူ့အဖေရဲ့ အကာအကွယ်အောက်မှာပဲ အိမ်မှာနေပြီး စားသောက် ပြီး သေမယ့်ရက်ကိုပဲ စောင့်နေတဲ့ ကပ်ပါးကောင် တစ်ကောင်ပဲ လုပ်နေသင့်တာ"

ရွှေမိကျောင်းဒိုလော်ဟာ ကောင်းကင်စီရင်ချက် မျက်နှာပြင်ထက်က ယွီရှောင်ကန်းကို အထင်သေးကာ ကြည့်ရင်း ကဲ့ရဲ့ရှုတ်ချတဲ့လေသံနဲ့ ပြောလိုက်တယ်။

သူတို့လို ဘွဲ့အမည်ရ ဒိုလော်တွေ ဖြစ်လာနိုင်တဲ့သူတွေထဲမှာ ဘယ်သူကများ သူတို့ရရှိမယ့် ဝိညာဉ်ကွင်းတွေရဲ့ သက်တမ်းကန့်သတ်ချက်ကို အစွမ်းကုန် မတွန်းအားခဲ့ကြလို့လဲ၊ဝိညာဉ်သာရဲတွေကို ရှာဖွေတဲ့အခါ သူတို့ဟာ သူတို့ရဲ့ ကန့်သတ်ချက်နဲ့ အနီးစပ်ဆုံး သက်တမ်းရှိတဲ့ ကောင်တွေ၊ ဒါမှမဟုတ် ကန့်သတ်ချက်ထက် နည်းနည်းတောင် ကျော်လွန်နေတဲ့ ကောင်တွေကိုပဲ အမြဲတမ်း ရွေးချယ်ခဲ့ကြတာ။

ယွီရှောင်ကန်းလို ကောင်ကတော့ နှစ်လေးရာသက်တမ်း ဝိညာဉ်ကွင်းကို လုံးဝစုပ်ယူနိုင်စွမ်း ရှိပါလျက်နဲ့ သေမှာကြောက်လို့ နှစ်သုံးရာအောက် သက်တမ်းရှိတဲ့ ကောင်ကို ရွေးချယ်ခဲ့တာဟာ ရွှေမိကျောင်းဒိုလော် အတွက်တော့ တကယ်ကို ပထမဆုံးအကြိမ် မြင်ဖူးခြင်းပဲ ဖြစ်တယ်။

“ဒီလိုလူမျိုးက အင်အားကြီးပုဂ္ဂိုလ်တစ်ယောက် ဖြစ်လာဖို့အကြောင်း ပြောနေသေးတယ် ဟုတ်စ”

တကယ်လို့ ယွီရှောင်ကန်းလို လူမျိုးကသာ အင်အားကြီးပုဂ္ဂိုလ် ဖြစ်လာနိုင်မယ်ဆိုရင် သူတို့လို ပင်ပန်းကြီးစွာ ကျင့်ကြံခဲ့ကြတဲ့သူတွေက ဘာဖြစ်သွားရမှာလဲ

အနီးနားမှာရှိတဲ့ အခြား ဝတ်ပြုအကြီးအကဲများလည်း ရွှေမိကျောင်းဒိုလော်ရဲ့ စကားကို ကြားရတဲ့အခါ ထောက်ခံတဲ့ အမူအရာတွေ ပြသကြတယ်။

ဒီလောက်တောင် သေမှာကြောက်နေရင် ဘာဖြစ်လို့ ကျင့်ကြံခြင်းလမ်းစဉ်ကို လျှောက်လှမ်းနေဦးမှာလဲ

သာမန်လူတစ်ယောက် လုပ်နေတာကမှ ပိုပြီးကောင်းဦးမယ်။ ယွီယွမ်ကျန့်ရဲ့ အဆင့်အတန်းနဲ့ဆိုရင် သူ့ကို တစ်သက်လုံး သက်တောင့်သက်သာ နေထိုင်သွားစေဖို့က အလွန်လွယ်ကူတဲ့ ကိစ္စပဲ။

အခြားတစ်ဖက်မှာတော့ ဟူလျဲ့နာနဲ့ ကျူးကျူချင်တို့ဟာ ယွီရှောင်ကန်းကို ဂရုတစိုက် လှမ်းကြည့်လိုက်ကြပြီး သူ စိတ်အနှောင့်အယှက်မဖြစ်တာကို မြင်မှပဲ သက်ပြင်းချနိုင်တော့တယ်။

"ဒီလိုအပြိုင်ကမ္ဘာက ကိုယ့်ပုံစံတူတစ်ယောက် ရှိနေတာဟာ ရှောင်ကန်း... ရှင့်အတွက် တကယ်ကို အရှက်ရစရာပဲ"

"ကျွန်မအမြင်အရဆိုရင်တော့ သူ စောစောသေသွားတာကမှ ပိုကောင်းဦးမယ်။ သူ့ရဲ့ ပင်ကိုယ်စရိုက်နဲ့ဆိုရင် နောင်အနာဂတ်မှာ ဘယ်လောက်တောင် အရှက်ကွဲစရာတွေ ထပ်လုပ်ဦးမလဲဆိုတာ ကောင်းကင်ဘုံပဲ သိလိမ့်မယ်"

ဘိဘိတုန်ဟာ မျက်နှာတစ်ခုလုံး ရေခဲလိုအေးစက်နေရင်း ကောင်းကင်စီရင်ချက် မျက်နှာပြင်ပေါ်က ယွီရှောင်ကန်းကို စိုက်ကြည့်နေခဲ့တယ်။

သူမသာ တတ်နိုင်မယ်ဆိုရင် အပြိုင်ကမ္ဘာကို ဝိညာဉ်ကူးပြောင်းသွားပြီး အဲဒီယွီရှောင်ကန်းကို သတ်ပစ်ချင်စိတ် ပေါက်နေမိပြီ။

သူမရဲ့ ခင်ပွန်းကို သိက္ခာချနေတဲ့ ဒီလိုကောင်မျိုးက အပြိုင်ကမ္ဘာမှာ အကောင်းပကတိအတိုင်း အသက်ရှင်နေရတယ်လို့ တွေးမိရုံနဲ့တင် ဘိဘိတုန်ရဲ့ လူသတ်လိုတဲ့ စိတ်အာရုံတွေဟာ လှိုင်းထလာရတယ်။

"ရပါတယ်၊ ရပါတယ် တုန်အာ ရဲ့။ သူ အရှက်ကွဲတာက ကိုယ့်ကိုမှ မထိခိုက်တာ။ ဘာပဲဖြစ်ဖြစ် ကိုယ့်ရဲ့ဗီဒီယိုက နောက်မှ ပြသမှာပဲဥစ္စာ"

"ဒါမှမဟုတ် မင်းက ကိုယ့်အပေါ် ယုံကြည်မှုမရှိလို့လား"

ယွီရှောင်ကန်းက ပြုံးလိုက်ပြီး မျက်နှာတင်းမာနေတဲ့ ဘိဘိတုန်ကို သူ့ရဲ့ရင်ခွင်ထဲ ဆွဲသွင်းကာ နှစ်သိမ့်ပေးလိုက်တယ်။

ဒါပေမဲ့ ကောင်းကင်စီရင်ချက်မျက်နှာပြင်ပေါ်က ပုံရိပ်တွေကို ကြည့်နေရင်းနဲ့ ယွီရှောင်ကန်းရဲ့ မျက်လုံးတွေဟာ အလိုအလျောက် ကျဉ်းမြောင်းသွားခဲ့ရတယ်။

သူက မဟာဆရာသခင်ကြီး (အပြိုင်ကမ္ဘာကသူ) အရှက်ကွဲလိမ့်မယ်လို့ မျှော်လင့်ထားခဲ့ပေမယ့် ဒီလောက်တောင် သနားစရာကောင်းတဲ့အဆင့် ဖြစ်နေလိမ့်မယ်လို့တော့ မထင်ထားခဲ့မိဘူး။

"ဒါက တကယ် အလကားဖြစ်မနေဘူးပဲ၊ ငါ ဝိညာဉ်မကူးပြောင်းခင်တုန်းက တွေ့ခဲ့ရတဲ့ ကလစ်ဗီဒီယိုတွေထဲမှာ သူ့ကို လှောင်ပြောင်နေကြတဲ့ ကျည်ဆန်မှတ်ချက်များ နဲ့ ပြည့်နှက်နေတာ မဆန်းတော့ပါဘူး"

【ဗီဒီယိုကတော့ ဆက်လက်ပြသနေဆဲ...】

【ယွီရှောင်ကန်းရဲ့ ဇွတ်တရွတ်နိုင်မှုအောက်မှာ ဝိညာဉ်သားရဲမုဆိုးအဖွဲ့ဝင်တွေဟာ နောက်ဆုံးတော့ ဘာမှမပြောတော့ဘဲ ယွီရှောင်ကန်းကို မိုးကြိုးစွယ်ဝက်ဝံကို အဆုံးစီရင်ခွင့်ပြုလိုက်ပြီး သက်တမ်း နှစ်သုံးရာနီးပါးရှိတဲ့ ဝိညာဉ်ကွင်းကို စုပ်ယူစေခဲ့တယ်။】

【ယွီရှောင်ကန်း ဝိညာဉ်ကွင်းကို စုပ်ယူနေတဲ့အချိန်မှာ အနီးနားမှာရှိတဲ့ ဝိညာဉ်သားရဲမုဆိုးအဖွဲ့ဝင်တွေဟာ သူ့ကို အထင်သေးတဲ့ အရိပ်အယောင်တွေ မျက်ဝန်းထဲ ဖြတ်သန်းလျက် ကြည့်နေကြတယ်။】

【"ဂိုဏ်းကြီး မိသားစုကြီးက လာတဲ့သူဆိုတော့ မျှော်လင့်ထားတဲ့အတိုင်းပဲ၊ တကယ်ကို နုနယ်လွန်းတယ်"】

【"ဟွန်း... ဂိုဏ်းကြီးတွေထဲမှာလည်း ထူးခြားတဲ့သူတွေ ရှိတာပါပဲ။ ဒါပေမဲ့ သူလို သေရမှာကို ဒီလောက်တောင် ကြောက်တဲ့သူမျိုးတော့ ငါလည်း ပထမဆုံး မြင်ဖူးတာပဲ"】

【"သူ့ရဲ့ ကောင်းမွန်တဲ့ ခန္ဓာကိုယ်ကြံ့ခိုင်မှုကို နှမြောဖို့ကောင်းလိုက်တာ။ ငါသာ အဲဒီတုန်းက သူ့လို ခန္ဓာကိုယ်မျိုး ရှိခဲ့ရင် ပထမဝိညာဉ်ကွင်းကို နှစ်လေးရာအထက် ရှိတဲ့ကောင်ကိုပဲ အသေအချာ ရွေးချယ်မှာ!"】

【"နှမြောစရာပဲ... သူက သေမှာကြောက်လို့ သက်တမ်းနိမ့်တာကို ရွေးချယ်ခဲ့ရင်တောင်မှ အဲဒါက နှစ်သုံးရာနီးပါး ရှိနေသေးတာပဲ။ ငါတို့ထက်စာရင်တော့ ဘယ်လောက်တောင် ပိုကောင်းနေလဲ မသိဘူး"】

【"ကောင်းကင်ဘုံက တရားမျှတမှု မရှိဘူးလို့ပဲ ပြောရမှာပေါ့၊ ဒီလိုလူမျိုးကို ငါတို့ထက် အဆပေါင်းများစွာ သာလွန်တဲ့ အစပျိုးမှုကို ပေးထားရတယ်လို့"】

【"..."】

【ဝိညာဉ်သားရဲမုဆိုးအဖွဲ့ဝင်တွေဟာ အားတက်သရော ဆွေးနွေးနေကြပြီး သူတို့ပြောတဲ့ စကားအများစုဟာ ယွီရှောင်ကန်းအပေါ် အထင်သေးမှုတွေနဲ့ ကောင်းကင်ဘုံရဲ့ မတရားမှုကို ကျိန်ဆဲနေတာတွေပဲ ဖြစ်တယ်။】

【မကြာခင်မှာပဲ ယွီရှောင်ကန်းဟာ ဝိညာဉ်ကွင်းစုပ်ယူမှုကို အောင်မြင်စွာ အဆုံးသတ်လိုက်နိုင်တယ်။ သူဟာ လော်ဆန်းဖောင်ကို ဆင့်ခေါ်လိုက်ပြီး သူ့ရဲ့ ဝိညာဉ်ကွင်းကိုပါ ထွက်ပေါ်လာစေခဲ့တယ်။】

【ဝါးတားတား အဝါရောင် ဝိညာဉ်ကွင်းတစ်ခုက သူ့ရဲ့ခန္ဓာကိုယ်ဘေးမှာ ဝန်းရံပေါ်ပေါက်လာခဲ့တယ်။ ဒီဝိညာဉ်ကွင်းကို ကြည့်ရင်း ယွီရှောင်ကန်းရဲ့ မျက်နှာပေါ်မှာ ကျေနပ် အားရတဲ့ အမူအရာတစ်ခု ပေါ်ပေါက်လာခဲ့တယ်။】

【"အင်မတန်ကောင်းတယ်၊ ပထမခြေလှမ်းကတော့ အောင်မြင်သွားပြီ။ နောက်တစ်ဆင့်ကတော့ ဆက်လက်ကျင့်ကြံပြီး သုတေသနပြုလုပ်ဖို့ပဲ"】

【"ငါ့ရဲ့ ဉာဏ်ပညာနဲ့ဆိုရင် တောက်ပတဲ့ လမ်းစဉ်တစ်ခုကို အသေအချာ ထုဆစ်နိုင်လိမ့်မယ်လို့ ငါယုံကြည်တယ်!"】

【ယွီရှောင်ကန်းဟာ လက်သီးကို တင်းတင်းဆုပ်လိုက်ပြီး သူ့ရဲ့မျက်ဝန်းတွေထဲမှာ ရည်မှန်းချက်ကြီးမှုတွေ ပြည့်နှက်နေခဲ့တယ်။】

【"ဧည့်သည်တော်... ခင်ဗျားက ပထမဝိညာဉ်ကွင်းကို ရရှိသွားပြီဆိုတော့ ခင်ဗျားရဲ့ ပထမဝိညာဉ်စွမ်းရည်ကို စမ်းသပ်ကြည့်ချင်လားဗျ"】

【ဝိညာဉ်သားရဲမုဆိုးအဖွဲ့ရဲ့ ခေါင်းဆောင်က ရှေ့ကို တက်လာပြီး စုစုစပ်စပ်မျက်နှာနဲ့ မေးလိုက်တယ်။】

【ဒါက ယွီရှောင်ကန်းရဲ့ ဝိညာဉ်ကို သူပထမဆုံးအကြိမ် မြင်ဖူးခြင်းဖြစ်ပြီး ဒီလိုအကောင်မျိုးက ဝိညာဉ်တစ်ခု ဖြစ်နေရတာကို သူအတန်ငယ် အံ့ဩမိသွားတယ်။ ဒါ့အပြင် ဒီလိုဝိညာဉ်မျိုးက ဘယ်လို ဝိညာဉ်စွမ်းရည်မျိုး ပိုင်ဆိုင်ထားမလဲဆိုတာကိုလည်း သူစူးစမ်းချင်စိတ် ပြင်းပြနေမိတာ ဖြစ်တယ်။】

【"ပထမဝိညာဉ်စွမ်းရည်ကို စမ်းသပ်ရမယ် ဟုတ်စ”】

【အဖွဲ့ခေါင်းဆောင်ရဲ့ စကားကြောင့် ယွီရှောင်ကန်းရဲ့ စိတ်လှုပ်ရှားသွားရတယ်၊ ဝိညာဉ်စွမ်းရည်တစ်ခုရဲ့ အာနိသင်ကို သိရှိဖို့ဆိုရင် ကိုယ်တိုင် အသုံးပြုကြည့်မှပဲ ရမှာလေ။】

【ဒီအချိန်မှာ ယွီရှောင်ကန်းကိုယ်တိုင်လည်း သူ့ရဲ့ ပထမဝိညာဉ်စွမ်းရည်က ဘာဖြစ်မလဲဆိုတာကို အရမ်း စိတ်ဝင်စားနေမိတာ။】

【ဒါပေမဲ့ ပတ်ဝန်းကျင်ကို လှည့်ပတ်ကြည့်လိုက်တဲ့အခါ၊ ဝိညာဉ်သားရဲမုဆိုးအဖွဲ့ရဲ့ မျက်ဝန်းတွေထဲက မထင်မရှား အထင်သေးတဲ့ အကြည့်တွေကို မြင်လိုက်ရတော့ ယွီရှောင်ကန်းဟာ သူ့ရဲ့ ပထမဝိညာဉ်စွမ်းရည်ကို ထုတ်ပြချင်တဲ့ စိတ်ဆန္ဒတွေ ချက်ချင်း ပျောက်ဆုံးသွားခဲ့ရတယ်။】

【"မလိုပါဘူး၊ ငါ ပြန်ရောက်မှပဲ ဖြည်းဖြည်းချင်း သုတေသနလုပ်တော့မယ်"】

【ယွီရှောင်ကန်းက အဖွဲ့ခေါင်းဆောင်ကို ငြင်းပယ်လိုက်ပြီး လူတိုင်းကို ထောင်လွှားတဲ့ အကြည့်တစ်ချက် ပြန်ပေးလိုက်တယ်။】

【"ဒါက ငါ ယွီရှောင်ကန်းရဲ့ ပထမဆုံး ဝိညာဉ်စွမ်းရည်ပဲ။ သူ့ရဲ့ ပထမဆုံး ထုတ်ဖော်ပြသမှုက သဘာဝကျကျပဲ လုံလောက်တဲ့ ခမ်းနားထည်ဝါတဲ့ အခမ်းအနားတစ်ခု လိုအပ်တာပေါ့"】

【"အဲဒီအချိန်ကျရင် ငါ့အဖေကိုပါ အတူခေါ်လာရမယ်။ သူက လော်ဆန်းဖောင်ကို အရင်တုန်းက နဂါးမျိုးနွယ်စု ဝိညာဉ်တစ်ခုလို့ပဲ အမြဲတမ်း ထင်ခဲ့တာ"】

【"ဟွန်း... ဒီတစ်ကြိမ်တော့ ငါ ယွီရှောင်ကန်းရဲ့ အတွေးအခေါ်တွေကသာ မှန်ကန်ကြောင်း သက်သေပြရမယ်။ ငါ့ရဲ့ အမြင်ကသာ လော်ဆန်းဖောင်ကို တကယ်တိုးတက်စေမယ့် လမ်းစဉ်ပဲ"】

【ယွီရှောင်ကန်းက စိတ်ထဲကနေ အေးစက်စွာ နှာခေါင်းရှုံ့လိုက်တယ်။】

【သူက သူ့အဖေရဲ့ ရှေ့မှောက်မှာ ပထမဝိညာဉ်စွမ်းရည်ကို ထုတ်ဖော်ပြသပြီး သူ့အဖေကို ကြီးမားတဲ့ တုန်လှုပ်မှုတစ်ခု ပေးဖို့ စိတ်ပိုင်းဖြတ်ထားပြီးသား ဖြစ်တယ်။】

【သူ့ရဲ့ လော်ဆန်းဖောင်အပေါ် သုတေသနပြုချက်တွေက မှန်ကန်ကြောင်းကို အချက်အလက်တွေနဲ့ ပြောပြဖို့ပဲ!】

【သူ့မှာ သာမန်လူတွေရဲ့ စိတ်ကူးစိတ်သန်းထက် ကျော်လွန်တဲ့ ဝိညာဉ်သုတေသန ပါရမီ ရှိနေတယ်ဆိုတာကို ပြသဖို့ပဲ!】

【ယွီရှောင်ကန်းဟာ သူ့အဖေရဲ့ ရှေ့မှောက်မှာ ပထမဝိညာဉ်စွမ်းရည်ကို ထုတ်ဖော်ပြသလိုက်တဲ့အခါ သူ့အဖေရဲ့ မျက်နှာက မှင်သက်အံ့ဩသွားပြီးနောက် စိတ်လှုပ်ရှားမှုကြောင့် နီရဲသွားမယ့် မြင်ကွင်းကိုတောင် စိတ်ကူးယဉ်နေမိတယ်။】

【အဲဒီအချိန်ကျရင် သူ့အဖေက ဂိုဏ်းထဲက လူတိုင်းကို သူ့ရဲ့အကြောင်း အသေအချာ ပြောပြလိမ့်မယ်။】

【အဲဒီလိုနည်းနဲ့ လူတိုင်းကလည်း သူဟာ အမှိုက်တစ်စ မဟုတ်တော့ဘဲ အနာဂတ်ရဲ့ ဝိညာဉ်သုတေသန မဟာဆရာသခင်ကြီး ဖြစ်လာတော့မယ်ဆိုတာကို နားလည်သွားကြလိမ့်မယ်။】

【သူ့ကို တစ်ချိန်က လှောင်ပြောင်ခဲ့ကြတဲ့သူတွေဟာ သူ့ကို ပြစ်မှားမိခဲ့တဲ့အတွက် အသေအချာ နောင်တရကြလိမ့်မယ်။】

【ဒီလိုမြင်ကွင်းမျိုး မကြာခင် ဖြစ်ပျက်တော့မယ်လို့ တွေးမိရုံနဲ့တင် ယွီရှောင်ကန်းဟာ ရင်ထဲမှာ စိတ်လှုပ်ရှားမှုတွေ လှိုင်းထလို့လာရတယ်။】

【"အဲဒီအချိန်ကျရင် လူတိုင်းက ဘယ်လိုမျက်နှာပေးမျိုးတွေ ရှိနေကြမလဲဆိုတာကို ငါ တကယ်ကို မျှော်လင့်မိနေပြီ"】