အခန်း ၄ - မဟာဆရာသခင်ကြီး ယွီရှောင်ကန်း - ဝိညာဉ်နိုးထခြင်း၊ ငါ့ရဲ့ ဝိညာဉ် ပေါ်ထွက်လာစမ်း
【ယွီရှောင်ကန်း အသက်ခြောက်နှစ်အရွယ်သို့ ရောက်ရှိကာ ဝိညာဉ်နိုးထခြင်းကို ခံယူမည့်နေ့ ရောက်ရှိလာခဲ့သည်။】
【ထိုနေ့တွင် အပြာရောင်လျှပ်စီး နဂါးဂိုဏ်းသည် အခမ်းအနားကို သက်သေအရာ တည်ရန်အတွက် ဧည့်သည်တော်များစွာကို ဖိတ်ကြားခဲ့သည်။ ထိုအထဲတွင် အပြာရောင်လျှပ်စီး နဂါးဂိုဏ်း၏ လက်အောက်ခံဂိုဏ်းများ၊ အထက်တန်းစား ဂိုဏ်းကြီးသုံးဂိုဏ်းထဲမှ ဘုံခုနစ်ဆင့်ပြာသာဒ်ဂိုဏ်းနှင့် ဟောက်ထျန်းဂိုဏ်းတို့မှ အဖွဲ့ဝင်များအပြင် အောက်တန်းစား ဂိုဏ်းလေးဂိုဏ်းမှ ဧည့်သည်တော်များလည်း ပါဝင်သည်။】
【ဝိညာဉ်နန်းတော်ကပင် ထိုဝိညာဉ်နိုးထခြင်း အခမ်းအနားကို စောင့်ကြည့်လေ့လာရန် ဘွဲ့အမည်ရဒိုလော်တစ်ဦးကို စေလွှတ်ခဲ့ရာ၊ လူတိုင်းက ထိုအခမ်းအနားအပေါ် ဘယ်လောက် အလေးထားသည်ကို သိသာစေသည်။】
【ထိုသို့ အာရုံစိုက်ခံရခြင်း၏ အဓိကအကြောင်းအရင်းမှာ အပြာရောင်လျှပ်စီး နဂါးဂိုဏ်းရဲ့ တစ်ဦးတည်းသော ဘွဲ့အမည်ရဒိုလော်ဖြစ်သည့် လျှပ်စီးဒိုလော် ယွီယွမ်ကျန့်၏ သား ယွီရှောင်ကန်းသည်လည်း ထိုဝိညာဉ်နိုးထခြင်း အစီအစဉ်တွင် ပါဝင်နေသောကြောင့် ဖြစ်သည်။】 အပြာရောင်လျှပ်စီး နဂါးဂိုဏ်း။ "ဟွန့်... အခုထိ ထိုနှစ်က မြင်ကွင်းကို ပြန်တွေးမိတိုင်း ရှက်စရာကောင်းနေတုန်းပဲ။" အပြာရောင်လျှပ်စီး နဂါးဂိုဏ်း၏ အကြီးအကဲချုပ်က နှာခေါင်းရှုံ့ကာ အေးစက်စွာ ပြောလိုက်သည်။ "မှန်တာပေါ့၊ ငါတို့က နောက်ထပ် ဂိုဏ်းချုပ်သစ်ရဲ့ ပွဲဦးထွက်မြင်ကွင်း ဖြစ်လိမ့်မယ်လို့ ထင်ခဲ့တာ၊ ဒါပေမဲ့ ဒီလိုကြီး ဖြစ်သွားလိမ့်မယ်လို့ ဘယ်သူထင်မှာလဲ။" ဒုတိယအကြီးအကဲက ခေါင်းခါလိုက်သည်။ "အဲဒီအချိန်ကစပြီး ငါတို့ အပြာရောင်လျှပ်စီး နဂါးဂိုဏ်းက ဒီလိုခမ်းနားတဲ့ ဝိညာဉ်နိုးထခြင်း အခမ်းအနားမျိုးကို ဘယ်တော့မှ ထပ်မလုပ်ဖြစ်တော့ဘူး ထင်တယ်။" "ဘယ်လိုလုပ် လုပ်ရဲတော့မှာလဲ။ ငါတို့မျက်နှာတွေ အကုန်ပျက်စီးသွားတာလေ။ ဘုံခုနစ်ဆင့်ပြာသာဒ်ဂိုဏ်းနဲ့ ဟောက်ထျန်းဂိုဏ်းတင်မကဘူး၊ ဝိညာဉ်နန်းတော်နဲ့ အောက်တန်းစား ဂိုဏ်းလေးဂိုဏ်းပါ ငါတို့ အရှက်ကွဲတာကို ထိုင်ကြည့်သွားကြတာ။ အခုအချိန်ထိ အဲဒီကိစ္စကို သုံးပြီး ငါတို့ကို လှောင်ပြောင်နေတဲ့သူတွေ ရှိနေတုန်းလို့ ငါရဲရဲကြီး ပြောရဲတယ်" "ဟူး... အခုတော့ ဒီကောင်းကင်စီရင်ချက်က ထိုနှစ်က မြင်ကွင်းတွေကို ပြန်လည်အသက်သွင်းပြနေပြီဆိုတော့ ငါတို့ တစ်ခါထပ်ပြီး လှောင်ပြောင်ခံရဦးမှာပဲ။" "..." အကြီးအကဲများ၏ ဒေါသတကြီး ပြောဆိုသံများနှင့် သက်ပြင်းချသံများကအလယ်တွင် ထိုင်နေသော ဂိုဏ်းချုပ်ဖြစ်သူ ယွီယွမ်ကျန့်ရဲ့နားထဲတွင် ပဲ့တင်ထပ်နေသည်။ထိုနှစ်က ဖြစ်ရပ်များသည် အပြာရောင်လျှပ်စီး နဂါးဂိုဏ်း၏ ဂုဏ်သိက္ခာကို တကယ်ပင် ပြင်းထန်စွာ ရိုက်ခတ်ခဲ့သည်။ ပိုအရေးကြီးတာက အဲဒီနောက်တွင် ဆုံးရှုံးသွားသော မျက်နှာကို ပြန်လည်ဆယ်ယူနိုင်မည့် နည်းလမ်း မရှိခြင်းပင် ဖြစ်သည်။ နှလုံးသားထဲမှ ဒေါသကို ဖိနှိပ်ရင်း ယွီယွမ်ကျန့်က ကောင်းကင်စီရင်ချက်မျက်နှာပြင်ကို စိုက်ကြည့်လိုက်သည်။ "နဂါးနတ်ဘုရားဒိုလော်... သူ ဘယ်လိုလုပ်ပြီး အဲဒီအဆင့်ကို ရောက်သွားတာလဲ..." 【ဧည့်သည်တော်အားလုံး စုံစုံလင်လင် ရောက်ရှိနေကြကာ လူတိုင်း၏ အကြည့်အောက်တွင် ယွီရှောင်ကန်းသည် ခေါင်းကို မော့၊ မျက်နှာတွင် မာနဝင့်ကြွားသော အပြုံးများ ပြည့်နှက်လျက် ရှိသည်။ သူသည် သူနှင့်အတူ ဝိညာဉ်နိုးထကြမည့် ကလေးများကို အထင်သေးသော အကြည့်ဖြင့် တစ်ချက်ကြည့်ကာ၊ ပထမဆုံးအဖြစ် ရှေ့သို့ လှမ်းထွက်ခဲ့သည်။】
【သူ့သား၏ တက်ကြွလှုပ်ရှားနေသော ပုံစံကိုကြည့်ပြီး ယွီယွမ်ကျန့်လည်း ကျေနပ်ကာ ပြုံးနေသည်။】
【"အစ်ကိုယွီ... အစ်ကို့ရဲ့သား ယွီရှောင်ကန်းက အသက်ငယ်ငယ်လေးကတည်းက ဝိညာဉ်တွေအပေါ် သုတေသနပြုနေပြီး ကိုယ်ပိုင် အမြင်အယူအဆတွေ ရှိနေတယ်လို့ ကြားတယ်၊ အဲဒါ ဟုတ်လား။"】
【ဘုံခုနစ်ဆင့်ပြာသာဒ်ဂိုဏ်း၏ ယခင်ဂိုဏ်းချုပ်က ယွီယွမ်ကျန့်ကို ကြည့်ကာ မေးလိုက်ရာ၊ သူ၏စကားများက မြှောက်ပင့်လိုခြင်း ဖြစ်ကြောင်း ထင်ရှားသည်။】
【"ဟားဟားဟား... သူက အမြင်လေးတွေ ရှိရုံပါပဲ၊ ဘာမှမဟုတ်ပါဘူး။ ငါတို့ ဝိညာဉ်သခင်တွေအတွက်တော့ တကယ့်အရေးကြီးဆုံးက ကိုယ်ပိုင်စွမ်းအားပဲ မဟုတ်လား။"】
【ယွီယွမ်ကျန့်က ပြုံးလျက် ပြန်လည်ဖြေကြားသည်။】
【"ပါရမီပိုင်းနဲ့ ပတ်သက်ရင်တော့ စိုးရိမ်စရာ မလိုပါဘူး။ ဘွဲ့အမည်ရဒိုလော်တစ်ဦးရဲ့ သားက ဘယ်လောက်အထိ ဆိုးရွားသွားနိုင်မှာမို့လို့လဲ။"】
【"ဥပမာ ဒီနေ့ ဟောက်ထျန်းဂိုဏ်းက ပါရမီရှင် လူငယ်နှစ်ယောက်ကို ကြည့်လေ။ သူတို့လည်း ဘွဲ့အမည်ရဒိုလော်ရဲ့ သားတွေပဲ၊ သူတို့ရဲ့ ပါရမီက အနာဂတ်မှာ သူတို့အဖေကို ကျော်လွန်ဖို့ ရည်မှန်းထားတာ။"】
【"ငါ့အမြင်အရတော့ အပြာရောင်လျှပ်စီး နဂါးဂိုဏ်းအတွက် ဒုတိယမြောက် ဘွဲ့အမည်ရဒိုလော်တစ်ဦး ထပ်မံဖြည့်ဆည်းပေးဖို့ တာဝန်က ဂိုဏ်းချုပ်ယွီရဲ့ သားအပေါ်ကို ကျရောက်လာနိုင်တာပေါ့။"】
【ဘုံခုနစ်ဆင့်ပြာသာဒ်ဂိုဏ်းချုပ်က အရှိတိုင်းပြောလိုက်ရင်း၊ ဟောက်ထျန်းဂိုဏ်းဘက်သို့လည်း ခေါင်းငြိတ်ပြလိုက်သည်။】
【ချီးကျူးခံရသော ယွီယွမ်ကျန့်နှင့် ဟောက်ထျန်းဂိုဏ်းသားများ အားလုံး၏မျက်နှာတွင် ပျော်ရွှင်မှုများ ထင်ဟပ်နေပြီး၊ ဘေးနားရှိ ဝိညာဉ်နန်းတော်မှ ဘွဲ့အမည်ရဒိုလော်မှာမူ မျက်နှာ သိပ်မကောင်းပေ။】
ဘုံခုနစ်ဆင့်ပြာသာဒ်ဂိုဏ်း။ "အဲဒီတုန်းက ကျွန်တော့်အဖေရဲ့ ချီးကျူးစကားတွေက တကယ်တော့ လွန်သွားတာ မဟုတ်ဘူး။ ထန်ဟောက်နဲ့ ထန်ရှောင် နှစ်ယောက်လုံးက ဘွဲ့အမည်ရဒိုလော်တွေ ဖြစ်လာခဲ့ကြပြီး၊ ထန်ဟောက်ဆိုရင် ‘ကောင်းကင်ဝှေ့ယမ်းဒိုလော်’ ဆိုတဲ့ ဘွဲ့ကိုတောင် ဆက်ခံနိုင်ခဲ့တာ။" "နှမြောစရာကောင်းတာကတော့ ဂုဏ်သရေရှိတဲ့ ဘွဲ့အမည်ရဒိုလော်တစ်ဦးရဲ့ သားက အဲဒီလိုပုံစံမျိုးနဲ့ ဝိညာဉ်နိုးထလာလိမ့်မယ်လို့ ကျွန်တော့်အဖေတောင် မျှော်လင့်မထားခဲ့တာပါပဲ။" နင်ဖုန်းကျိက ကောင်းကင်စီရင်ချက်မျက်နှာပြင်ပေါ်ရှိ သူ၏ဖခင်မျက်နှာကို ကြည့်ကာ အတိတ်ကို အမှတ်ရရင်း ခေါင်းခါလိုက်သည်။ "ကောင်းကင်ကြီးက သူတို့ရဲ့ အပြာရောင်လျှပ်စီး နဂါးဂိုဏ်းကို အင်အားကြီးမားမလာစေချင်ဘူးလို့ပဲ ပြောရမှာပေါ့။" အရိုးဒိုလော် ကူရုန်က အေးစက်စွာ ရယ်မောလိုက်သည်။ သူ့ဘေးက ဓားဒိုလော် ကျန့်ရှင်းကမူ ဘာမှမပြောပေ။ သာမန် မဟာဆရာသခင်ကြီး ယွီရှောင်ကန်းဆိုသည်မှာ သူ့အတွက် အနည်းငယ်မျှ စိတ်ဝင်စားစရာ မကောင်းပေ။ သူ့ကို တကယ် စူးစမ်းချင်စိတ် ဖြစ်ပေါ်စေသည်မှာ အပြိုင်ကမ္ဘာမှ ‘နဂါးနတ်ဘုရား’ ဟူသော ဘွဲ့အမည်ကို အပ်နှင်းခံထားရသော ယွီရှောင်ကန်းပင် ဖြစ်သည်။ နဂါးနတ်ဘုရား... နတ်ဘုရားတစ်ပါး၏ နာမတော်ကို အပ်နှင်းခံရခြင်းဖြစ်ရာ၊ လုံလောက်သော စွမ်းအား အကြွင်းမဲ့ မရှိဘဲ ထိုဘွဲ့အမည်ကို တည်ငြိမ်စွာ ဆုပ်ကိုင်ထားနိုင်ရန် လုံးဝ မဖြစ်နိုင်ပေ။ ကောင်းကင်စီရင်ချက်က ထိုဘွဲ့အမည်ကို အသိအမှတ်ပြုပြီး ထုတ်လွှင့်ပြသနေသည်ဆိုတည်းက၊ ထိုနဂါးနတ်ဘုရားဒိုလော် ယွီရှောင်ကန်းက အထွတ်အထိပ် စွမ်းအားရှင်တစ်ဦး ဖြစ်ကြောင်း သေချာလှသည်။ "ငါ့ကို စိတ်ပျက်အောင် မလုပ်နဲ့။" ကျန့်ရှင်းက တိုးညှင်းစွာ ရေရွတ်လိုက်သည်။
【ဝိညာဉ်နိုးထခြင်းအတွက် လူစာရင်း ရောက်ရှိလာကာဝိညာဉ်နိုးထခြင်း အခမ်းအနားကို တရားဝင် စတင်လိုက်သည်။】
【ဂိုဏ်းချုပ်ရဲ့ သားသော ယွီရှောင်ကန်းမှ သဘာဝအတိုင်း နောက်ဆုံးမှ ထွက်ပေါ်လာရမည် ဖြစ်သည်။】
【ထို့နောက် အပြာရောင်လျှပ်စီး နဂါးဂိုဏ်း၏ တပည့်များ၏ ဝိညာဉ်နိုးထခြင်း လုပ်ငန်းစဉ်များက ဆက်တိုက် ဖြစ်ပေါ်လာသည်။】
【"ယွီရှောင်ချွမ်း... ဝိညာဉ် လျှပ်စီးပုတ်သင်ညို၊ မွေးရာပါဝိညာဉ်စွမ်းအား အဆင့် ၃။"】
【"ယွီရှောင်ဖုန်း... ဝိညာဉ် လျှပ်စီးစပါးအုန်းမြွေ၊ မွေးရာပါဝိညာဉ်စွမ်းအား အဆင့် ၂။"】
【"ယွီရှောင်ယန်... ဝိညာဉ် လျှပ်စီးမီးမျောက်ဝံကြီး၊ မွေးရာပါဝိညာဉ်စွမ်းအား အဆင့် ၄။"】
【"ကောင်းတယ်... ယွီရှောင်ရွှဲ... ဝိညာဉ် အပြာရောင်လျှပ်စီး နဂါး၊ မွေးရာပါဝိညာဉ်စွမ်းအား အဆင့် ၇။"】
【လူငယ်တစ်ယောက်ပြီးတစ်ယောက် ဝိညာဉ်နိုးထခြင်းကို ပြီးမြောက်အောင်မြင်ခဲ့ကြသည်။ အချို့က အလွန်ဝမ်းသာနေကြပြီး၊ အချို့က စိတ်ပျက်အားငယ်နေကြကာ၊ အချို့ဆိုလျှင် အသံထွက်၍ ငိုကြွေးနေကြသည်။ စောင့်ကြည့်လေ့လာသူများသည် ငိုကြွေးနေကြသူများကို အကြည့်တစ်ချက်ပင် မပေးကြပေ။】
【လောကကြီးက ရက်စက်လှသည်။ ဝိညာဉ်နိုးထခြင်းဆိုသည်မှာ တစ်ချိန်က အတူတူဆော့ကစားခဲ့ကြသည့် သူငယ်ချင်းများကို မတူညီသော ကမ္ဘာနှစ်ခုအဖြစ် ပိုင်းခြားပစ်လိုက် တံတိုင်းတစ်ခုပင် ဖြစ်သည်။】
【နိုးထရန် ကျန်နေသေးသော လူငယ်များ နည်းပါးလာသောအခါ စောင့်ဆိုင်းနေကြသူများ၏ မျက်နှာတွင် စိတ်ပူပန်းနေသော အမူအရာများ ထွက်ပေါ်လာသည်။】
【ထိုအချိန်တွင် လူအုပ်ကြားထဲတွင် ခေါင်းကို မော့ကာ ယုံကြည်မှုအပြည့်ရှိသော မျက်နှာထားဖြင့် ရပ်နေသည့် ယွီရှောင်ကန်းက ထင်ရှားပေါ်လွင်နေသည်။】
【"တကယ်ကို မျိုးဆက်သစ်သူရဲကောင်းပဲ၊ ဘယ်လောက်တောင် ခန့်ညားတဲ့ ပုံစံလဲ။"】 【ဘုံခုနစ်ဆင့်ပြာသာဒ်ဂိုဏ်းချုပ်က နောက်တစ်ကြိမ် ထပ်မံချီးကျူးလိုက်သည်။】
【"ဟားဟားဟား... သူက သူများနဲ့ကွဲထွက်ပြီး မာနကြီးနေတာပဲ၊ ဒါ မကောင်းဘူး။"】
【ယွီယွမ်ကျန့်က ရယ်မောရင်းပြောလိုက်သည်။ သူက မကောင်းဘူးဟု ပြောသော်လည်း အနည်းငယ်ပင် ဂရုမစိုက်ပေ။ ပါရမီရှင်တစ်ယောက်အဖို့ မာနမကြီးပါက သူများ၏ အထင်သေးခြင်းကို ခံရမည် မဟုတ်လား။】
【 ယွီရှောင်ကန်းမှလွဲ၍ လူတိုင်း ဝိညာဉ်နိုးထခြင်း ပြီးဆုံးသွားခဲ့သည်။ ထိုအခါတွင် အခမ်းအနားကွင်းပြင်ရှိ လူတိုင်း၏ အကြည့်များက ယွီရှောင်ကန်းထံသို့သာ စုပြုံရောက်ရှိသွားသည်။】
【လူတိုင်းရဲ့ စိုက်ကြည့်မှုအောက်တွင် ယွီရှောင်ကန်းက ဝိညာဉ်နိုးထပြီးသား ကလေးများကို မာနတကြီးဖြင့် တစ်ချက်ကြည့်လိုက်ကာ၊ ဝိညာဉ်နိုးထခြင်း အစီအစဉ် အလယ်သို့လှမ်းလျှောက်သွားကာ ငြိမ်သက်စွာ ရပ်နေလိုက်သည်။】
【အခမ်းအနား စတင်သောအခါ ပြင်းထန်လှသော ရွှေရောင်အလင်းတန်းတစ်ခုက ယွီရှောင်ကန်းကို လွှမ်းခြုံသွားတော့သည်။ ထိုရွှေရောင်အလင်းတန်းကို ကြည့်ရုံမျှဖြင့် ယွီရှောင်ကန်းရဲ့ ဝိညာဉ်သည် အလွန်ပင် စွမ်းအားကြီးမားရမည်ကို လူတိုင်း နားလည်လိုက်ကြသည်။】
【"ကောင်းတယ်"】
【သူ့သားအပေါ် အမြဲတမ်း မျှော်လင့်ချက်ကြီးမားခဲ့သော ယွီယွမ်ကျန့်သည် အော်ဟစ်လိုက်ပြီး သူ့ထိုင်ခုံမှ ထရပ်လိုက်ကာ လက်ခုပ်တီးချီးကျူးရန်ပြင်လိုက်သည်】
【 ထိုအချိန်တွင် ယွီယွမ်ကျန့်၏ စိတ်ထဲတွင် အနာဂတ် အပြာရောင်လျှပ်စီး နဂါးဂိုဏ်း မိသားစုတစ်ခုတည်းမှ ဒိုလော်နှစ်ယောက် ထွက်ပေါ်လာသော မြင်ကွင်းကို စတင်စိတ်ကူးယဉ်နေမိပြီ ဖြစ်သည်။】
【ဝေါင်းးးးးး】
【ကြီးမားလှသော နဂါးကြီးတစ်ကောင်ရဲ့ဟိန်းဟောက်သံက လူတိုင်း နားထဲတွင် ပဲ့တင်ထပ်သွားသည်။ လူတိုင်းက ဝိညာဉ် ပေါ်ထွက်လာမည့် အခိုက်အတန့်ကို စောင့်ဆိုင်းနေကြသည်။】
【အလင်းတန်းများ လွှမ်းခြုံမှုအတွင်း ယွီရှောင်ကန်းက သူ၏ဝိညာဉ်ထံမှ စွမ်းအားကို ခံစားမိသဖြင့် သူသည် တက်ကြွစွာ သူ့လက်နှစ်ဖက်ကို မြှောက်ရင်း 】
【"ပေါ်လာစမ်း... ငါ့ရဲ့ ဝိညာဉ်"】
【ရုတ်တရက်... လူတိုင်းကို အံ့အားသင့်စေတာက၊ ယွီရှောင်ကန်းရဲ့ စကားသံအဆုံးတွင် သူ့ကို လွှမ်းခြုံထားသော အလင်းတန်းများက ဘုန်းခနဲ မြည်ဟည်းကာ အစိတ်စိတ်အမြွှာမြွှာ ကွဲအက်သွားသည်။】
【သေးငယ်သော သတ္တဝါလေးတစ်ကောင်က ယွီရှောင်ကန်း ရှေ့တွင် ပေါ်လာသည်။】
【တစ်ခန်းလုံးတိတ်ဆိတ်သွားသည်။】
【လူတိုင်း မျက်လုံးများ ပြူးကျယ်သွားကြကာ ဝက်ကလေးတစ်ကောင်နှင့် တူသော သတ္တဝါလေးကို မယုံကြည်နိုင်စွာ စိုက်ကြည့်နေကြသည်။】
【"လော်... လော်..."】
【ယွီရှောင်ကန်းရဲ့ ခြေရင်းတွင် ပေါ်လာသော ထိုသားရဲငယ်လေးသည် လူတိုင်း၏ အကြည့်များကြောင့် ထိတ်လန့်သွားကာ ယွီရှောင်ကန်း၏ နောက်သို့ မသိစိတ်အရ ဝင်ရောက်ပုန်းကွယ်လိုက်သည်။】