အခန်း ၂ - မူရင်းကမ္ဘာ၏ တုံ့ပြန်မှု နှင့် ယွီရှောင်ကန်း၏ စိတ်ဓာတ်ပျက်ပြားသွားခြင်း

အမှောင်ကမ္ဘာ၊ လေထုထဲတွင် အလင်းမျက်နှာပြင်တစ်ခု ချိတ်ဆွဲနေပြီး၊ အပြိုင်ကမ္ဘာများနှင့် ပတ်သက်သော အချက်အလက်များသည် လူတိုင်း၏ စိတ်ထဲတွင် ပေါ်လာသည်။ ဝိညာဉ်နန်းတော်တွင် "ဆရာ... အပြိုင်ကမ္ဘာမှာဆိုရင် ကျွန်မ ဝိညာဉ်နန်းတော်ကို မဝင်ဖြစ်တဲ့ အခြေအနေမျိုး ရှိနေနိုင်မလားဟင်။" ဝိညာဉ်နန်းတော်၏ ရွှေရောင်မျိုးဆက် အဖွဲ့ဝင်တစ်ဦးအဖြစ် ချီးကျူးခံရသောဟူလျဲ့နာက သူမ၏ ဆရာဖြစ်သူဘိဘိတုန်ကို ကြည့်ကာ မေးလိုက်သည်။ "ဖြစ်နိုင်တာပေါ့။" ဘိဘိတုန်က ပြန်လည်ဖြေကြားသော်လည်း ဆရာဖြစ်သူ၏ စိတ်မပါတပါ ဖြစ်နေပြီး အာရုံလွင့်နေခြင်းကို ဟူလျဲ့နာက ရှင်းလင်းစွာ ခံစားသိရှိသောကြောင့် ဟူလျဲ့နာသည် သူမဆရာ ဘာတွေးနေသလဲကို သိချင်နေမိသည်။ အမှန်စင်စစ် ဘိဘိတုန်က အကြောင်းအရာများစွာကို တွေးတောနေခြင်း ဖြစ်သည်။ သူမသည် လက်ရှိအခြေအနေသို့ တစ်လှမ်းချင်း ရောက်ရှိလာအောင် တွန်းပို့ခဲ့ငသာအကြောင်းအရာများကို တွေးတောနေမိသည်။ "တကယ်လို့ အဲဒီတုန်းက ငါ ယွီရှောင်ကန်းနဲ့အတူ ဝိညာဉ်နန်းတော်ကနေ အောင်အောင်မြင်မြင် ထွက်သွားနိုင်ခဲ့ရင်၊ ဒါမှမဟုတ် ဝိညာဉ်နန်းတော်ကို မဝင်ခဲ့ရင်..." ဘိဘိတုန်သည် ထိုအရာများကို သူမနှလုံးသားထဲတွင် စိတ်ကူးယဉ်နေခဲ့သည်။ အခြားတစ်ဖက်ရှိ၊ ဘုံခုနစ်ဆင့်ပြာသာဒ်ဂိုဏ်းတွင် "ဦးလေးကျန့်... ဦးလေးကူ... အဲဒီအပြိုင်ကမ္ဘာမှာ ကျွန်တော်က ဘုံခုနစ်ဆင့်ပြာသာဒ်စေတီကို ဘုံကိုးဆင့်ပြာသာဒ်စေတီအဖြစ် အောင်မြင်စွာ ဆင့်ကဲပြောင်းလဲနိုင်မလား။" နင်ဖုန်းကျိက သူ၏ဘေးတွင်ရှိသော ဓားဒိုလော်နှင့် အရိုးဒိုလော်တို့ကို ကြည့်ကာ မေးလိုက်သည်။ နင်ဖုန်းကျိသည် ဘုံကိုးဆင့်ပြာသာဒ်စေတီအပေါ် စွဲလန်းမှု အလွန်ပြင်းထန်လှသည်။ ကောင်းကင်စီရင်ချက်က အပြိုင်ကမ္ဘာများအကြောင်း ပြောသည်ကို ကြားရသောအခါ သူ့စိတ်ထဲ ပထမဆုံး ရောက်လာသည့်အရာမှာ ထိုအချက်ပင် ဖြစ်သည်။ "ဖြစ်နိုင်ပါတယ် အဲလိုအခြေအနေမျိုး တကယ်ရှိခဲ့ရင် ဖုန်းကျိ... မင်းအနေနဲ့ တစ်ဖက်လူရဲ့ အခြေအနေကို ကိုးကားချက်အဖြစ် အသုံးပြုလို့ရတာပေါ့။" အရိုးဒိုလော်က ခဏမျှ စဉ်းစားပြီးနောက် ပြောလိုက်သည်။ "မှန်တယ်၊ တကယ်လို့ အောင်မြင်တဲ့ ဆင့်ကဲပြောင်းလဲမှုတစ်ခု ဆိုရင် ကျွန်တော်တို့ အဲဒါကို ကိုးကားလို့ရတယ်။" နင်ဖုန်းကျိ၏ မျက်ဝန်းများ တောက်ပသွားသည်။ သူက မကြာမီ ပြသတော့မည့် နှိုင်းယှဉ်မှုဗီဒီယိုကို ရုတ်တရက် အလွန်ပင် မျှော်လင့်တကြီး ဖြစ်သွားမိသည်။ အခြားတစ်ဖက်ရှိ ရှရက်ခ် အကယ်ဒမီတွင်၊ "မဟာဆရာသခင်ကြီး... တကယ်လို့ နှိုင်းယှဉ်မှုတစ်ခု ရှိလာရင် ဆရာက ဘယ်လိုမျိုးကို မြင်ချင်လဲဟင်။" ထန်စန်းက သူ့ဘေးတွင်ရှိသော ယွီရှောင်ကန်းကို ကြည့်လိုက်သည်။ ယခုအခါ ရှရက်ခ် နတ်ဆိုးခုနစ်ဖော် စုစည်းမိပြီဖြစ်ပြီး၊ ဆရာဖြစ်သူ ရောက်ရှိလာမှုနှင့်ပါ ပေါင်းစပ်လိုက်သောအခါ ထန်စန်းသည် ယခုတွင် အနာဂတ်အတွက် ယုံကြည်ချက် အပြည့်ရှိနေသည်။ သူကိုယ်တိုင်လည်း ဒီထက်ပိုကောင်းသော ရွေးချယ်မှုမျိုး ပြုလုပ်နိုင်မည်ဟု မထင်ပေ။ ထို့ကြောင့် သူကိုယ်တိုင်ထက် အခြားသူများအခြေအနေကိုသာ သိချင်နေမိသည်။ "ငါကတော့ မြင်ချင်တာ ဘာမှမရှိဘူး၊ ဘဝဆိုတာ မတူညီတဲ့ ရွေးချယ်မှုတွေအပေါ် မူတည်ပြီး ပြောင်းလဲသွားတာပဲ၊ ဒီလိုနှိုင်းယှဉ်မှုမျိုးက လုံးဝ အဓိပ္ပာယ်မရှိဘူး။" ယွီရှောင်ကန်းက ဂရုမစိုက်ဟန်ဖြင့် ခေါင်းခါလိုက်သည်။ အမှန်တော့ အပြိုင်ကမ္ဘာဟူသော အယူအဆကို သိလိုက်ရသည့် ခဏတွင် ယွီရှောင်ကန်းသည် မိမိကိုယ်ကိုယ် ပြန်တွေးမိသည်။ သူ့ကိုယ်ပိုင်ဘဝကို အနိဋ္ဌာရုံတစ်ခုဟု ခေါ်ဆိုနိုင်သည်။ အထက်တန်းစား ဂိုဏ်းကြီးသုံးဂိုဏ်းထဲမှ တစ်ခုဖြစ်သော အပြာရောင်လျှပ်စီး နဂါးဂိုဏ်း၏ ဂိုဏ်းချုပ်ကြီးဖြစ်သူ လျှပ်စီးဒိုလော် ယွီယွမ်ကျန့်၏ သားဖြစ်သောကြောင့် သူရာထူးအဆင့်အတန်းမှာ အလွန်ပင် ခမ်းနားထည်ဝါခဲ့သည်။ ဒါပေမယ့် သူ၏ထူးခြားထင်ရှားမှုမှာ ဝိညာဉ်နိုးထခြင်းနေ့အထိသာ ခံခဲ့သည်။ အဲဒီနေ့တွင် ဆိုးရွားစွာ ဗီဇပြောင်းလဲသွားသော ဝိညာဉ် လော်ဆန်းဖောင်နှင့် အဆင့်ဝက်သာရှိသော မွေးရာပါဝိညာဉ်စွမ်းအားတို့က သူပိုင်ဆိုင်သမျှ ကို ဖျက်ဆီးပစ်ခဲ့သည်။ သူသည် ဂိုဏ်းရဲ့ အရှက်ရစရာ ဖြစ်လာခဲ့ပြီး အခြားသူများ၏ လှောင်ပြောင်ခြင်းကို ခံရကာ ဖခင်ဖြစ်သူ၏ ဂုဏ်သိက္ခာအတွက် တစ်သက်တာ အမည်းစက်တစ်ခု ဖြစ်လာခဲ့သည်။ ထို့နောက်တွင် ယွီရှောင်ကန်းသည် စဉ်ဆက်မပြတ် သုတေသနပြုမှုများမှတစ်ဆင့် လော်ဆန်းဖောင်၏ အလားအလာကို ဖော်ထုတ်ရန် ကြိုးစားခဲ့သော်လည်း၊ သူ့ပါရမီက နည်းပါးသောကြောင့် နောက်ဆုံးတွင် တစ်သက်လုံး အဆင့် ၂၉ တွင် ပိတ်မိနေခဲ့သည်။ သူ့ဘဝ ပထမပိုင်းတွင် သူပြုလုပ်ခဲ့သော ကြိုးစားအားထုတ်မှုများကို ပြန်ပြောင်းတွေးကြည့်လျှင် ယွီရှောင်ကန်းသည် သူ့ရွေးချယ်မှုများက ပြီးပြည့်စုံခဲ့သော်လည်း သူ့ပါရမီကသာ သူ့ကို ကန့်သတ်ထားခဲ့ခြင်း ဖြစ်ရာ မဟုတ်ပါက သူသည် ယခုလို အခြေအနေတွင် ရှိနေမည်မဟုတ်ပေ။ သူသည် အပြိုင်ကမ္ဘာများတွင်ပင် သူ၏အခြားဗားရှင်းတိုင်းက သူ၏အဆင့်သို့ ရောက်ရှိနိုင်မည်မဟုတ်ကြောင်း ယုံကြည်နေသည်။ အခြားကမ္ဘာမှ ယွီရှောင်ကန်းများသည် အဆင့် ၉ သို့မဟုတ် ၁၉တွင် ပိတ်မိနေဆဲ ဖြစ်နိုင်သည်။ အဆင့် ၂၉ သို့ ရောက်ရှိနိုင်ခြင်းကပင် လော်ဆန်းဖောင်အတွက် ကံကြမ္မာကို ဆန့်ကျင်ပြောင်းလဲနိုင်ခဲ့ခြင်း ဖြစ်သည်ဟု ပြောနိုင်သည်။ "ကဲ... ဒီမှာ ကြည့်စရာ ရှိပါဘူး၊ မင်းတို့ရဲ့ လေ့ကျင့်ရေးအစီအစဉ်တွေကို ငါကိုယ်တိုင် ရေးဆွဲထားတာမို့ မင်းတို့ရဲ့ အနာဂတ်ရွေးချယ်မှုတွေက လွဲချော်မှာမဟုတ်ဘူး။" "ငါ့လိုပဲ၊ ငါ့ဘဝရဲ့ အချိုးအကွေ့တိုင်းမှာ ငါလုပ်ခဲ့တဲ့ ရွေးချယ်မှုတွေက ပြီးပြည့်စုံခဲ့တယ်၊ ငါ့ကိုသာ နှိုင်းယှဉ်ပြမယ်ဆိုရင် ပိုဆိုးတဲ့ အခြေအနေတွေပဲ ထွက်လာလိမ့်မယ်။" ယွီရှောင်ကန်းက ရှရက်ခ် နတ်ဆိုးခုနစ်ဖော် ရှေ့တွင် ယုံကြည်မှုအပြည့်ဖြင့် မတ်မတ်ရပ်ကာ ပါရမီရှင် လူငယ်များကို ကြည့်လိုက်သည်။ အထူးသဖြင့် သူ၏တပည့် ထန်စန်းကို ဖြစ်သည်။ သူ အစွမ်းကုန် ကြိုးစားခဲ့သော်လည်း လူတိုင်း၏ အမှိုက်ဟု သတ်မှတ်ခြင်း ခံရသောအဆင့်သာ ရောက်နိုင်ခဲ့သည်။ ထို့ကြောင့် သူသည် လူတိုင်းကို မိမိကိုယ်ကိုယ် သက်သေပြရန်အတွက် ပါရမီရှင် တပည့်တစ်ဦးကို ပြုစုပျိုးထောင်ပေးမည် ဖြစ်သည်။ ဒါပေမယ့် ယွီရှောင်ကန်း မျှော်လင့်မထားသောအရာမှာ နောက်တစ်စက္ကန့်တွင် ပထမဆုံး နှိုင်းယှဉ်မည့်အရာ ပေါ်လာခြင်းပင် ဖြစ်သည်။

【ပထမဆုံး နှိုင်းယှဉ်မည့် အရာများ - အမှောင်ကမ္ဘာ၏ မဟာဆရာသခင်ကြီး ယွီရှောင်ကန်း VS အလင်းကမ္ဘာ၏ နဂါးနတ်ဘုရားဒိုလော် ယွီရှောင်ကန်း] (မူရင်းကမ္ဘာကိုအမှောင်ကမ္ဘာဟုသုံးပါမည်)

ကောင်းကင်စီရင်ချက်မျက်နှာပြင်ပေါ်ရှိ စာသားများကို မြင်သောအခါ ရှရက်ခ် နတ်ဆိုးခုနစ်ဖော်နှင့်အတူ ဘေးတွင်စောင့်ကြည်နေသော ဖလန်းဒါး၊ ကျောက်ဝူကျီနှင့် ရှရက်ခ် အကယ်ဒမီမှ အခြားဆရာများအားလုံးသည် ထိုအချိန်တွင် ယွီရှောင်ကန်းစီ အကြည့်များ စုပြုံရောက်ရှိသွားကြသည်။

မဟာဆရာသခင်ကြီး ယွီရှောင်ကန်း VS နဂါးနတ်ဘုရားဒိုလော် ယွီရှောင်ကန်း။ မဟာဆရာသခင်ကြီး ယွီရှောင်ကန်းမှာ သူတို့ကမ္ဘာမှဖြစ်ကြောင်း သံသယရှိစရာမလိုပေ၊ အခြားကမ္ဘာမှ ယွီရှောင်ကန်းမှာမူ ‘နဂါးနတ်ဘုရား’ ဟူသော လွှမ်းမိုးချုပ်ကိုင်နိုင်သည့် ဘွဲ့အမည်ဖြင့် ဘွဲ့အမည်ရဒိုလော်တစ်ဦး ဖြစ်လာခဲ့ရာသူ့စွမ်းအားကို စိတ်ကူးကြည့်ရုံဖြင့် သိနိုင်သည်။ ခုနက ယွီရှောင်ကန်း ပြောခဲ့သည့် စကားကို ပြန်ပြောင်းတွေးမိကြသည်။ "ငါ့ဘဝရဲ့ အချိုးအကွေ့တိုင်းမှာ လုပ်ခဲ့တဲ့ ရွေးချယ်မှုတွေက ပြီးပြည့်စုံခဲ့တယ်။ ငါ့ကိုသာ နှိုင်းယှဉ်ပြမယ်ဆိုရင် ပိုဆိုးတဲ့ အခြေအနေတွေပဲ ထွက်လာလိမ့်မယ်။" ဖြတ်ရိုက်လိုက်သော ပါးရိုက်ချက်က မြန်ဆန်လွန်းလှသဖြင့် ဘယ်သူမှ အချိန်မီ တုံ့ပြန်နိုင်ခြင်း မရှိခဲ့ချေ၊ လေ့ကျင့်ရေးကွင်းပြင်တစ်ခုလုံးတွင် သေမင်းတမန် တိတ်ဆိတ်မှုက လွှမ်းမိုးသွားပြီး ဘယ်လို တုံ့ပြန်ရမည်ကို ဘယ်သူမှ မသိတော့ချေ။ "ဖူး..." ရှရက်ခ် နတ်ဆိုးခုနစ်ဖော်ကြားမှ အလွန်တိုးညှင်းသော ရယ်သံတစ်ခု ထွက်ပေါ်လာရာ လူတိုင်းအာရုံကို ချက်ချင်း ဆွဲဆောင်သွားရာ ဘုံခုနစ်ဆင့်ပြာသာဒ်ဂိုဏ်းရဲ့ သမီးတော်လေး နင်ရုန်ရုန် ဖြစ်နေသည်ကိုမြင်သောအခါ လူတိုင်း နားလည်သွားကြသည်။ထိုအချိန်မျိုးတွင် သူမတစ်ဦးတည်းသာ ရယ်ရဲမည် ဖြစ်သည်။ ထိုရယ်သံကို ကြားလိုက်သောအခါ ထန်စန်းက မျက်မှောင်ကုတ်ပြီး နင်ရုန်ရုန်ကို မကြေမနပ် စိုက်ကြည့်လိုက်ကာသူဆရာကို လှောင်ပြောင်ရဲသော သူမသည်သူ၏ လက်ရှိအဖော်တစ်ယောက် မဟုတ်ပါက သေကြောင်းကြံစည်ဖို့ နည်းလမ်းတစ်ခု ရှာနေတာ ဖြစ်နိုင်သည်။ "မဖြစ်နိုင်ဘူး" နင်ရုန်ရုန်၏ ရယ်သံသည် တိတ်ဆိတ်နေသော လေ့ကျင့်ရေးကွင်းပြင်၏ ခလုတ်ကို နှိပ်လိုက်သလို ဖြစ်သွားသည်။ ပထမဆုံး အော်ဟစ်ပြီး သံသယဝင်လာသူမှာ ယွီရှောင်ကန်းပင် ဖြစ်သည်။ "နဂါးနတ်ဘုရားဒိုလော် ယွီရှောင်ကန်း အဲဒါ ဘယ်လိုလုပ် ဖြစ်နိုင်မှာလဲ၊ ငါ့ရဲ့ ရွေးချယ်မှုတွေက ပြည့်စုံပြီး ငါ့ရဲ့ ဝိညာဉ်အပေါ် သုတေသနပြုချက်တွေက ဒိုလော်တိုက်ကြီးမှာ အနှိုင်းမဲ့ပဲ။ ငါတောင် အဆင့် ၃၀ ကို မကျော်ဖြတ်နိုင်တာ၊ ငါ့ရဲ့ ဘယ်ဗားရှင်းကများ ဘွဲ့အမည်ရဒိုလော်အဖြစ် ကျော်ဖြတ်နိုင်မှာလဲ။" "ဒါ လိမ်ညာမှုပဲ ဖြစ်ရမယ်။" ယွီရှောင်ကန်းသည် မျက်လုံးများ နီမြန်းပြီး နွားသိုးတစ်ကောင်လို ပြင်းထန်စွာ အသက်ရှူရင်း ကောင်းကင်စီရင်ချက်မျက်နှာပြင်ကို လက်ညှိုးထိုးကာ "မဖြစ်နိုင်ဘူး" ဟု အဆက်မပြတ် အော်ဟစ်နေတော့သည်။ ထိုအခိုက်အတန့်တွင် သူသည် ကောင်းကင်စီရင်ချက်ကို သူ၏နှလုံးသားတွင် လှည့်စားတတ်သော အမှိုက်တစ်ခုအဖြစ် သတ်မှတ်လိုက်ပြီး၊ ထိုဟာက သူ့ကို သိက္ခာချရန်အတွက်အသုံးပြုထားသော ဝိညာဉ်သခင်တစ်ဦး၏ ဝိညာဉ်စွမ်းရည် ဖြစ်မည်ဟုပင် ခံစားနေမိသည်။ "ရှောင်ကန်း စိတ်အေးအေးထားပါဦး။" ဖလန်းဒါးက ယွီရှောင်ကန်း၏ ဘေးသို့ ရောက်လာပြီး သူ၏သူငယ်ချင်းကို တွဲကူပေးလိုက်သည်။ "ဒီအတိုင်း နာမည်တူတဲ့သူတစ်ယောက် ဖြစ်နေတာလည်း ဖြစ်နိုင်တာပဲလေ ဒါမှမဟုတ် အခြားအကြောင်းရင်းတစ်ခုခု ရှိလို့နေမှာပါ။" "ဟုတ်တယ် ဆရာ... ကျွန်တော်တို့ ဆရာ့ရဲ့ ပါရမီကို သိပါတယ်။ ဆရာတောင် မလုပ်နိုင်တာကို တခြားဘယ်သူက လုပ်နိုင်မှာလဲ။" ထန်စန်းကလည်း ယွီရှောင်ကန်းကို နှစ်သိမ့်ရန် အနားသို့ ရောက်လာသည်။ ထန်စန်း၏ နှစ်သိမ့်မှုက အလွန်ထိရောက်ပြီး ယွီရှောင်ကန်းသည် မကြာမီ တည်ငြိမ်သွားသော်လည်း သူ၏အကြည့်များက ပိုမှောင်မှောက်သွားသည်။ ထန်စန်းက တစ်စုံတစ်ခုကို တွေးမိပြီး သူ၏မျက်ဝန်းများ လှုပ်ရှားကာ ပြောလိုက်သည် "ဆရာ... ကောင်းကင်စီရင်ချက်က တစ်စုံတစ်ယောက်ရဲ့ ရွေးချယ်မှုကြောင့် အားလုံး ပြောင်းလဲသွားတာလို့ ပြောခဲ့တယ်မလား၊ ဖြစ်နိုင်တာက ဆရာ ပြောင်းလဲသွားတာမဟုတ်ဘဲ ဆရာ့ရဲ့ မိဘတွေ ပြောင်းလဲသွားတာ ဖြစ်နိုင်တယ်။ သူတို့ တစ်ခုခုကို စားမိတာ ဒါမှမဟုတ် အဲဒီကမ္ဘာမှာ ဆရာ့ရဲ့ ပါရမီကို ပြောင်းလဲစေနိုင်တဲ့ အရာကို လုပ်ခဲ့တာ ဖြစ်ရမယ်။" "ဟုတ်တယ်... ဖြစ်နိုင်တာက ငါ့ရဲ့ အဖေနဲ့အမေ ပြောင်းလဲသွားတာ ဖြစ်ရမယ်။ အဲဒီကမ္ဘာမှာ ငါ့ရဲ့ ဝိညာဉ်က လော်ဆန်းဖောင် မဟုတ်ဘဲ၊မွေးရာပါဝိညာဉ်စွမ်းအားကလည်း အဆင့်ဝက် မဟုတ်တာ ဖြစ်မယ်၊ ဟုတ်တယ်... အဲဒါ အသေအချာပဲ။" ထန်စန်း၏ စကားကို ကြားရသောအခါ ယွီရှောင်ကန်းသည် ထိုတွေးဆချက်ကို ချက်ချင်း လက်ခံလိုက်သည်။ သူသည် အပြိုင်ကမ္ဘာမှ နဂါးနတ်ဘုရားဒိုလော် ယွီရှောင်ကန်းသည် အစကတည်းက မွေးရာပါဝိညာဉ်စွမ်းအားအပြည့် ပိုင်ဆိုင်ထားခဲ့ခြင်း ဖြစ်မည်ဟုပင် ယုံကြည်သွားသည်။ ထိုမှသာ ဘွဲ့အမည်ရဒိုလော် အဆင့်သို့ ရောက်ရှိနိုင်မည် ဖြစ်သည်။ ထိုသို့တွေးမိသောအခါ ထိုကမ္ဘာအပေါ် မကျေနပ်မှုများက သူ၏နှလုံးသားထဲတွင် ချက်ချင်း ဆူဝေလာခဲ့သည်။ "ကျိန်စာသင့်တဲ့ ကောင်းကင်ကြီး၊ ငါတို့က လူတစ်ယောက်တည်း ဖြစ်နေတာတောင်၊ ဘာလို့ တခြားတစ်ယောက်ကကျတော့ မွေးရာပါဝိညာဉ်စွမ်းအားအပြည့် ပိုင်ဆိုင်နိုင်ပြီး ငါကျမှ ဒီလိုဖြစ်ရတာလဲ။"