အခန်း ၁၅ ဝိညာဉ်ဆင့်ကဲပြောင်းလဲခြင်းလမ်းစဉ် - အဆုံးစွန်သော ဂုဏ်သတ္တိထပ်ဆင့်ခြင်း!
【 "အဆင့်၃၀ ဆိုတာ လူတစ်ယောက်ဘဝရဲ့ အကြီးမားဆုံး အတားအဆီးပဲ!" 】
【 မိမိရဲ့ အနာဂတ်အကြီးမားဆုံး အတားအဆီးကို သိမြင်ပြီးတဲ့နောက်မှာတော့ နောက်ထပ်ခြေလှမ်းက အဲဒါကို ဘယ်လိုကျော်ဖြတ်ရမလဲဆိုတဲ့ နည်းလမ်းရှာဖို့ပဲ ဖြစ်တယ်။ 】
【 ဒိုလော်တိုက်ကြီးပေါ်မှာ ပါရမီအလွန်နည်းတဲ့သူတွေက နောက်ဆုံးမှာ ထူးခြားပြောင်မြောက်တဲ့ အောင်မြင်မှုမျိုး ရရှိသွားတဲ့ ဖြစ်ရပ်တွေဟာ အလွန်ပဲ ရှားပါးလှပေမဲ့ လုံးဝမရှိတာတော့ မဟုတ်ပါဘူး။ 】
【 အပြာရောင်လျှပ်စီး နဂါးဂိုဏ်းရဲ့ စာကြည့်တိုက်ထဲက မှတ်တမ်းတွေကို ရှာဖွေကြည့်ရှုခြင်းဖြင့်၊ ဒီလိုကံကြမ္မာကို ပြောင်းလဲပစ်နိုင်ခဲ့တဲ့ ဖြစ်ရပ်တွေဟာ အဓိကအားဖြင့် အဲဒီလူတွေဟာ ကောင်းကင်ကိုဆန့်ကျင်တဲ့ အခွင့်အရေးထူးတွေကို ရရှိခဲ့ကြလို့ပဲဆိုတာ ယွီရှောင်ကန်း သိရှိခဲ့ရတယ်။ 】
【 ပြီးတော့ ဒီကောင်းကင်ကိုဆန့်ကျင်တဲ့ အခွင့်အရေးထူးတွေကို အမျိုးအစားနှစ်မျိုး ခွဲခြားထားပါတယ်။ 】
【 ပထမတစ်ခုကတော့ အားလုံးအသိဆုံးဖြစ်တဲ့ ရတနာ—ဝိညာဉ်အရိုး ပဲ ဖြစ်တယ်】
【 မှတ်တမ်းတစ်ခုအရ မွေးရာပါဝိညာဉ်စွမ်းအား အဆင့်တစ်ပဲရှိတဲ့ ကလေးတစ်ယောက်ဟာ ကြယ်တာရာတောအုပ်ကြီးထဲမှာ လမ်းပျောက်သွား ခဲ့တယ်။ဒါပေမဲ့ သူက ဘေးဒုက္ခကနေ ကံကောင်းခြင်းအဖြစ် ပြောင်းလဲသွားပြီး၊ တခြားဝိညာဉ်သားရဲတစ်ကောင်နဲ့ အသေအလဲ တိုက်ခိုက်ကာ သေဆုံးသွားခဲ့တဲ့ အနှစ်တစ်သောင်းသက်တမ်းရှိ ဝိညာဉ်သားရဲတစ်ကောင်ဆီကနေ အနှစ်တစ်သောင်း ဝိညာဉ်အရိုးတစ်ခုကို ရရှိခဲ့တယ်။ 】
【 အဲဒီဝိညာဉ်အရိုးကို စုပ်ယူလိုက်ခြင်းဖြင့် ကလေးရဲ့ဝိညာဉ်ဟာ အပြောင်းအလဲအချို့ ဖြစ်ပေါ်ခဲ့ပြီး၊ သူ့ရဲ့အချုပ်အနှောင်တွေကို ချိုးဖျက်ကာ ကံကြမ္မာကို ပြောင်းလဲပစ်နိုင်ခဲ့တယ်။ 】
【 ဒုတိယနည်းလမ်းကတော့ ကံကြမ္မာကို ပြောင်းလဲဖို့အတွက် ကောင်းကင်နဲ့မြေကြီးရဲ့ ရတနာ တွေကို အားကိုးတာပဲ ဖြစ်တယ်။ 】
【 ဒီမှတ်တမ်းမှာတော့ မွေးရာပါဝိညာဉ်စွမ်းအား အဆင့်တစ်ပဲရှိတဲ့ မှူးမတ်မျိုးနွယ်ဝင် ကလေးတစ်ယောက်အကြောင်း ပါရှိတယ်။ 】
【 အဲဒီကလေးဟာ လေလံပွဲတစ်ခုကတစ်ဆင့် ကြယ်တာရာတောအုပ်ကြီးထဲက ထွက်ပေါ်လာတဲ့ ကောင်းကင်နဲ့မြေကြီးရဲ့ ရတနာတစ်ခုကိုရရှိခဲ့တယ်။ 】
【 အဲဒီကောင်းကင်နဲ့မြေကြီးရဲ့ ရတနာကို စားသုံးလိုက် သော အဲဒီမှူးမတ်ကလေးရဲ့ ဝိညာဉ်ဟာ ဆင့်ကဲပြောင်းလဲသွားခဲ့ပြီး ကံကြမ္မာကို ပြောင်းပြန်လှန်ပစ်နိုင်ခဲ့တယ်။ 】
【 အမှန်အတိုင်းပြောရရင်တော့ ယွီရှောင်ကန်းက ဒီဖြေရှင်းချက်နှစ်ခုကို ပုံပြင်တွေလိုပဲ သဘောထားခဲ့တာပါ။ 】
【 ပထမဆုံး ဝိညာဉ်အရိုးအကြောင်းပြောရရင်၊ အထက်တန်းစား ဂိုဏ်းကြီးသုံးဂိုဏ်းထဲက တစ်ခုဖြစ်တဲ့ အပြာရောင်လျှပ်စီး နဂါးဂိုဏ်းမှာတောင် ဝိညာဉ်အရိုး အနည်းငယ်ပဲ ရှိတာလေ။ 】
【 ဥပမာ ယွီရှောင်ကန်းရဲ့အဖေ ယွီယွမ်ကျန့်ဟာ ဘွဲ့အမည်ရဒိုလော်တစ်ယောက် ဖြစ်သော်လည်း သူ့ရဲ့ ခန္ဓာကိုယ်ပေါ်မှာ ဝိညာဉ်အရိုးအစုံအလင် မရှိဘူး။ 】
【 ဒါကိုကြည့်ရင် ဝိညာဉ်အရိုးတွေ ဘယ်လောက်အထိ ရှားပါးလဲဆိုတာ သိနိုင်ပါတယ်။ 】
【 ဒါကြောင့် ဝိညာဉ်အရိုးတစ်ခုကတစ်ဆင့် ကံကြမ္မာကို ပြောင်းလဲချင်တယ်ဆိုတာ အပြာရောင်လျှပ်စီး နဂါးဂိုဏ်းက တခြားသူတွေကို ထားပါဦး၊ ယွီရှောင်ကန်းကိုယ်တိုင်တောင် ခွင့်ပြုမှာ မဟုတ်ပါဘူး။ 】
【 သူ့ရဲ့မရေရာမသေချာတဲ့ အနာဂတ်နဲ့ နှိုင်းယှဉ်ရင် ယွီယွမ်ကျန့်ရဲ့ လက်ရှိရှိပြီးသား ဘွဲ့အမည်ရဒိုလော် အင်အားက ပိုပြီးတော့ အားကိုးရတာကိုး။ 】
【 ကောင်းကင်နဲ့မြေကြီးရဲ့ ရတနာတွေကျတော့ ဝိညာဉ်အရိုးတွေထက်တောင် ပိုပြီး ရှားပါးပါသေးတယ်။ 】
【 ဘာပဲဖြစ်ဖြစ် ဒိုလော်တိုက်ကြီးပေါ်က လူတွေက ဝိညာဉ်အရိုးတွေ ဘယ်ကလာလဲဆိုတာ အနည်းဆုံးတော့ သိကြသေးတယ်၊ ကောင်းကင်နဲ့မြေကြီးရဲ့ ရတနာတွေကျတော့ လုံးဝကို ကံတရားအပေါ်မှာပဲ မူတည်နေတာ မဟုတ်လား။ 】
【 စာအုပ်တွေထဲမှာ ကံကြမ္မာကို ပြောင်းလဲပစ်နိုင်မယ့် နည်းလမ်းကို ရှာမတွေ့ခဲ့ပေမဲ့လည်း ယွီရှောင်ကန်းက စိတ်ဓာတ်မကျခဲ့ပါဘူး။ 】
【 ဘာမှရှာတွေ့မှာမဟုတ်ဘူးဆိုတာ သူ ကြိုတင်မျှော်လင့်ထားပြီးသားပါ။ ရှာတွေ့သွားရင်မှ ထူးဆန်းနေဦးမယ်။ 】
【 ဒါပေမဲ့လည်း ဒီနည်းလမ်းနှစ်ခုကတစ်ဆင့် ယွီရှောင်ကန်းက ကံကြမ္မာကို ပြောင်းလဲပစ်ဖို့အတွက် အတွေးအမြင်လမ်းစတစ်ခုကို ရှာတွေ့ခဲ့ပါတယ်။ 】
【 ဝိညာဉ်အရိုးကို စုပ်ယူတာပဲဖြစ်ဖြစ်၊ ကောင်းကင်နဲ့မြေကြီးရဲ့ ရတနာကို စားသုံးတာ ပဲဖြစ်ဖြစ်၊ ပါရမီညံ့ဖျင်းတဲ့သူတွေဆီမှာ နောက်ဆုံးဖြစ်ပေါ်လာတဲ့ ပြောင်းလဲမှုတွေအားလုံးက သူတို့ရဲ့ ဝိညာဉ်တွေဆီမှာပဲ သွားပြီး ထင်ဟပ်ပေါ်လွင်တာပါ။ 】
【 ဝိညာဉ်ကို ပြောင်းလဲစေတာပဲဖြစ်ဖြစ်၊ ဝိညာဉ်ကို ဆင့်ကဲပြောင်းလဲစေတာပဲဖြစ်ဖြစ်၊ နှစ်ခုလုံးက ပါရမီ အဆင့် ပြောင်းလဲမှုကို တွန်းအားပေးနိုင်ပါတယ်။ 】
【 "တစ်နည်းပြောရရင်... ဝိညာဉ်ကို ဆင့်ကဲပြောင်းလဲစေမယ့် နည်းလမ်းကို ရှာဖွေတွေ့ရှိတာက ငါ့ရဲ့ကံကြမ္မာကို ပြောင်းလဲပစ်နိုင်လိမ့်မယ်" 】
အမှောင်ကမ္ဘာ၊ ဘုံခုနစ်ဆင့်ပြာသာဒ်ဂိုဏ်းတွင်။
"အမှန်ပဲ၊ ဝိညာဉ်ကို ဆင့်ကဲပြောင်းလဲစေမယ့် နည်းလမ်းကို ရှာတွေ့ရင် ကံကြမ္မာကို ပြောင်းလဲနိုင်တာပေါ့၊ ဒါပေမဲ့ ဒီလိုနည်းလမ်းမျိုးကို ရှာဖွေဖို့က ဘယ်လောက်တောင် ခက်ခဲလိုက်မလဲ”
နင်ဖုန်းကျိက နဂါးနတ်ဘုရားဒိုလော် ယွီရှောင်ကန်းဟာ ဒီလောက်အသက်ငယ်ငယ်လေးနဲ့ ဖြစ်ရပ်အနည်းငယ်အပေါ်မှာတင် အခြေခံပြီး ကံကြမ္မာကို ပြောင်းလဲဖို့ ဘာလုပ်ရမလဲဆိုတာ ကွက်တိတွေးမိသွားတာကို အံ့ဩချီးကျူးမိနေတယ်။
တစ်ချိန်တည်းမှာပင် 'ကံကြမ္မာကို ပြောင်းလဲခြင်း' ဆိုတဲ့ စကားလေးလုံးက ပြောဖို့လွယ်သလောက် လုပ်ဖို့ ဘယ်လောက်ခက်ခဲလဲဆိုတာ သူသက်ပြင်းချမိပြန် တယ် ။
သူတို့ရဲ့ ဘုံခုနစ်ဆင့်ပြာသာဒ်ဂိုဏ်းရဲ့ ဘုံခုနစ်ဆင့်ပြာသာဒ်စေတီ ဝိညာဉ်ဆိုရင်လည်း ဂိုဏ်းရဲ့ မျိုးဆက်တစ်ခုပြီးတစ်ခုကို ဒုက္ခပေးလာခဲ့တာလို့ ပြောလို့ရပါတယ်။ ဝိညာဉ်ကွင်း ခုနစ်ကွင်းပဲ တပ်ဆင်နိုင်တဲ့ စွမ်းရည်လေးနဲ့တင် သူတို့ရဲ့ ဘုံခုနစ်ဆင့်ပြာသာဒ်ဂိုဏ်းဟာ ဒိုလော်တိုက်ကြီးပေါ်မှာ နံပါတ်တစ် အထောက်အကူပြုဝိညာဉ် ဖြစ်နေခဲ့ပြီ။
တကယ်သာ ဘုံခုနစ်ဆင့်ပြာသာဒ်စေတီကို ဆက်ပြီး မြှင့်တင်နိုင်ခဲ့မယ်ဆိုရင် သူတို့ရဲ့ အထောက်အကူပြုနိုင်စွမ်းက ဘယ်အဆင့်အထိ ရောက်ရှိသွားမလဲဆိုတာ သူတို့ မတွေးရဲအောင်ပါပင်။ ဒီအိမ်မက်ကြောင့် ဘုံခုနစ်ဆင့်ပြာသာဒ်ဂိုဏ်းရဲ့ မျိုးဆက်အလိုက် ဂိုဏ်းသားတွေဟာ ဘုံခုနစ်ဆင့်ပြာသာဒ်စေတီကို ဘုံကိုးဆင့်ပြာသာဒ်စေတီ အဖြစ် ဆင့်ကဲပြောင်းလဲနိုင်မယ့် နည်းလမ်းကို ရှာဖွေဖို့ ကြိုးစားခဲ့ကြတာ။ ဒါပေမဲ့ ဘယ်လောက်ပဲ ကြိုးစားကြပါစေ၊ ဘယ်တုန်းကမှ ရလဒ်မထွက်ခဲ့ပါ ချေ။
"ဒီနဂါးနတ်ဘုရားဒိုလော်က သူ့ရဲ့ကံကြမ္မာကို ဘယ်လိုနည်းနဲ့ အမှန်တကယ် ပြောင်းလဲပစ်ခဲ့လဲ ဆိုတာပဲ ငါ သိချင်တော့တယ်..."
"ပြီးတော့ သူ့ရဲ့နည်းလမ်းက ငါတို့ ဘုံခုနစ်ဆင့်ပြာသာဒ်ဂိုဏ်းနဲ့ကော ကိုက်ညီမှု ရှိပါ့မလား။" နင်ဖုန်းကျိရဲ့ နှလုံးသားထဲမှာ မျှော်လင့်ချက်တွေ ပြည့်နှက်နေခဲ့တယ်။
【 ဗီဒီယိုက ဆက်လက် ပြသနေဆဲ... 】
【 ဝိညာဉ်သာ ဆင့်ကဲပြောင်းလဲသွားရင် ကံကြမ္မာကို ပြောင်းလဲနိုင်မှန်း သိသွားပြီးတဲ့နောက်၊ နောက်ထပ်ခြေလှမ်းက ဝိညာဉ်ဆင့်ကဲပြောင်းလဲခြင်း ဖြစ်ရပ်တွေကို လိုက်လံရှာဖွေဖို့ပဲ ဖြစ်တယ်။ 】
【 ဒီလိုမှတ်တမ်းမျိုးတွေကတော့ တကယ်တမ်းကျတော့ အတော်လေးကို ပေါများလှပါတယ်။ 】
【 အချို့လူတွေက ဝိညာဉ်ကွင်းတစ်ကွင်းတည်းကို စုပ်ယူပြီးနောက်မှာတင် ဆင့်ကဲပြောင်းလဲသွားကြတယ်။ 】
【 အချို့လူတွေကျတော့ သူတို့ရဲ့အဆင့်က သတ်မှတ်ချက်တစ်ခုကို ရောက်ရှိသွားတဲ့အခါမှ ဆင့်ကဲပြောင်းလဲသွားကြတယ်။ 】
【 ဒီတိုင်း ကျင့်ကြံနေရင်းနဲ့မှ ရုတ်တရက်ကြီး ဆင့်ကဲ ပြောင်းလဲသွားတဲ့သူတွေလည်း ရှိပါသေးတယ်။ 】
【 ခြုံငုံကြည့်ရရင်တော့ ဝိညာဉ်ဆင့်ကဲပြောင်းလဲခြင်းဆိုတာ လုံးဝကို ခြေရာ လက်ရာ ရှာမရတဲ့အရာတစ်ခုလို ဖြစ်နေခဲ့တယ်။ 】
【 ဒါပေမဲ့လည်း ယွီရှောင်ကန်းကတော့ ဒါတွေအားလုံးဟာ တကယ်ပဲ ခြေရာလက်ရာမရှိတာမျိုး ဖြစ်လိမ့်မယ်လို့ မယုံကြည်ပါပေ။ 】
【 ဒါကြောင့် ယွီရှောင်ကန်းက စာရွက်နဲ့ဖောင်တိန်ကို ယူဆောင်လာပြီး၊ ဇယားတစ်ခု ဆွဲလိုက်ကာ မှတ်တမ်းတင်ထားသမျှ ဝိညာဉ်ဆင့်ကဲပြောင်းလဲခြင်း ဥပမာအားလုံးကို စာရင်းပြုစုလိုက်တယ်။ 】
【 ဒိုလော်တိုက်ကြီးရေ... မင်းတို့တွေ စာရင်းအင်းပညာရဲ့ စွမ်းပကားကို သက်သေပြရမယ့် အချိန်ရောက်ပြီ! 】
【 ဝိညာဉ်ဆင့်ကဲပြောင်းလဲခြင်း ဥပမာအားလုံးကို ဇယားထဲမှာ စာရင်းသွင်းပြီးတဲ့နောက်၊ ယွီရှောင်ကန်းက ဒီဆင့်ကဲပြောင်းလဲခြင်း နည်းလမ်းတွေကို အမျိုးအစားအချို့ ခွဲခြားလိုက်ပါတယ်။ 】
【 ပထမဆုံး အဓိကအမျိုးအစားကတော့ အရေအတွက်အများဆုံးလည်း ဖြစ်ပြီး၊ သတ်မှတ်ထားတဲ့ ဝိညာဉ်ကွင်းတစ်ခုကို စုပ်ယူပြီးနောက် ဆင့်ကဲပြောင်းလဲခြင်း ပြီးမြောက်သွားခဲ့တဲ့ မှတ်တမ်းများ ဖြစ်တယ်။ 】
【 ဒုတိယ အဓိကအမျိုးအစားကတော့ သတ်မှတ်ထားတဲ့ အဆင့်တစ်ခုအထိ ကျင့်ကြံပြီးနောက် သဘာဝအလျောက် ဆင့်ကဲပြောင်းလဲသွားခြင်း ဖြစ်တယ်။ 】
【 တတိယ အဓိကအမျိုးအစားကတော့ သွေးမျိုးဆက်နိုးထခြင်းလိုမျိုး အလွန်ရှားပါးတဲ့ ဖြစ်ရပ်တွေ ဖြစ်တယ်။ 】
【 စတုတ္ထ အဓိကအမျိုးအစားကတော့ အကြောင်းအရင်း အမျိုးမျိုး ကြောင့် ဖြစ်ပေါ်လာတဲ့ ဝိညာဉ်ဆင့်ကဲပြောင်းလဲခြင်းတွေ ဖြစ်တယ်။ 】
【 ဒီလို စာရင်းအင်းခွဲခြားမှုကို ပြီးမြောက်သွားပြီးနောက်၊ ယွီရှောင်ကန်းက ရိုးရိုးရှင်းရှင်းပဲ တစ်ချက်ကြည့်လိုက်ပြီး ပထမဆုံး အဓိကအမျိုးအစားကလွဲလို့ ကျန်တဲ့ပစ္စည်းအားလုံးကို ဖယ်ထုတ်လိုက်တယ်။ 】
【 သူ့အတွက်တော့ နောက်ပိုင်းအမျိုးအစားတွေက အသုံးချလို့မရပါဘူး။ သူ့အတွက် တကယ်တမ်း အလုပ်ဖြစ်နိုင်တာက ပထမဆုံးအမျိုးအစားဖြစ်တဲ့ ဝိညာဉ်ကွင်းကို စုပ်ယူပြီး ဝိညာဉ်ဆင့်ကဲပြောင်းလဲခြင်းကို အောင်မြင်အောင် လုပ်တာပဲ ဖြစ်တယ်။ 】
【 သူအသုံးပြုနိုင်မယ့် နည်းလမ်းကို စစ်ထုတ်ပြီးတဲ့နောက်၊ ယွီရှောင်ကန်းက ဒီအမျိုးအစားကို ပိုပြီးတော့ အသေးစိတ် ထပ်မံခွဲခြားပါတော့တယ်။ 】
【 ဥပမာအားဖြင့် ဝိညာဉ်ဆင့်ကဲပြောင်းလဲခြင်း ဖြစ်ခဲ့ရင်တောင်၊ အဲဒီလူရဲ့ဝိညာဉ်က လက်နက်ဝိ ညာဉ်လား ဒါမှမဟုတ် သားရဲဝိညာဉ်လား 】
【 သားရဲဝိညာဉ်ဆိုရင်ကော ဘယ်လိုဝိညာဉ်သားရဲရဲ့ ဝိညာဉ်ကွင်းကို စုပ်ယူခဲ့တာလဲ၊ အဲဒီဝိညာဉ်ကွင်းရဲ့ ဂုဏ်သတ္တိ က ဘာလဲ၊ အရင်က ဝိညာဉ်ကွင်းတွေရဲ့ အခြေအနေက ဘယ်လိုရှိခဲ့လဲ၊ ပြီးတော့ အဲဒီဝိညာဉ်ကွင်းတွေရဲ့ သက်တမ်းကော ဘယ်လောက်လဲ 】
【 လက်နက်ဝိညာဉ်ဆိုရင်ကော ဘယ်လိုဝိညာဉ် သားရဲကို စုပ်ယူခဲ့တာလဲ၊ အဲဒီဝိညာဉ် ကွင်းရဲ့ ဂုဏ်သတ္တိက ဘာလဲ စသဖြင့်ပေါ့။ 】
【 အတိုချုပ်ဖြင့် ယွီရှောင်ကန်းဟာ ဒီဖြစ်ရပ်တွေကို အလွန်အမင်း အသေးစိတ်ကျကျ အမျိုးအစားခွဲခြားမှု ပြုလုပ်ခဲ့ပြီး၊ သူ့မျက်စိထဲကနေ သဲလွန်စတစ်ခု လေး တောင်မှ လွတ်ထွက်မသွားစေဖို့ ကြိုးပမ်းခဲ့တယ်။ 】
【 ဒီလို အသေးစိတ်ကျကျ အမျိုးအစားခွဲခြား မှုအောက်မှာပဲ ယွီရှောင်ကန်းဟာ တကယ်ကို အသုံးဝင်တဲ့ အချက်အလက်များစွာကို ရှာဖွေတွေ့ရှိခဲ့ပါတော့တယ်။ 】
【 "မြွေစိမ်း - ပထမဝိညာဉ်ကွင်း ငါးကွင်းလုံးက အဆိပ်ဂုဏ်သတ္တိတွေချည်းပဲ။ ဆဋ္ဌမမြောက် ဝိညာဉ်ကွင်းကို ရရှိတဲ့အခါမှာတော့ ဝိညာဉ်က ကျောက်စိမ်းမြွေဆိုး အဖြစ် ဆင့်ကဲပြောင်းလဲ သွားခဲ့တယ်။" 】
【 "မီးလျှံခွေး - ပထမဝိညာဉ်ကွင်း သုံးကွင်းလုံးက မီးဂုဏ်သတ္တိတွေချည်းပဲ။ စတုတ္ထမြောက် ဝိညာဉ်ကွင်းကို ရရှိပြီးနောက်မှာတော့ ဝိညာဉ်က တောက်လောင်မီးလျှံခွေး အဖြစ် ဆင့်ကဲပြောင်းလဲ သွားခဲ့တယ်။" ]
【 "ရေခဲပလင်းငှက် - ပထမဝိညာဉ်ကွင်း လေးကွင်းလုံးက ရေခဲဂုဏ်သတ္တိတွေချည်းပဲ။ ပဉ္စမမြောက် ဝိညာဉ်ကွင်းကို ရရှိပြီးနောက်ဝိညာဉ်က အေးခဲရေခဲငှက် အဖြစ် ဆင့်ကဲပြောင်းလဲ သွားခဲ့တယ်။” 】
【 "ဆူးမြက် - ပထမဝိညာဉ်ကွင်း လေးကွင်းလုံးက အပင်အမျိုးအစား ဝိညာဉ်သားရဲတွေဆီက ဖြစ်တယ်။ ပဉ္စမမြောက် ဝိညာဉ်ကွင်းကို ရရှိတဲ့အခါမှာတော့ ဝိညာဉ်က ဆူးနွယ်ပင်အဖြစ် ဆင့်ကဲပြောင်းလဲ သွားခဲ့တယ်။" 】
【 "မြေဖွေဖွတ်ကောင် - ပထမဝိညာဉ်ကွင်း ခုနစ်ကွင်းလုံးက နဂါးအနွယ်ဝင် ဝိညာဉ်သားရဲတွေဆီက ဖြစ်တယ်။ အဋ္ဌမမြောက် ဝိညာဉ်ကွင်းကို ရရှိတဲ့အခါမှာတော့ ဝိညာဉ်က ကတ္တီပါသွေးနဂါးအဖြစ် ဆင့်ကဲပြောင်းလဲ သွားခဲ့တယ်။" 】
【 "..." 】
【 မရေမတွက်နိုင်တဲ့ ဥပမာတွေဟာ အသေးစိတ်ကျတဲ့ စာရင်းအင်းဇယားတွေကတစ်ဆင့် ယွီရှောင်ကန်းရဲ့ ရှေ့မှာ ပေါ်ထွက်လာခဲ့တယ်။ 】
【 ပြီးတော့ ဒီဥပမာတွေကတစ်ဆင့် ယွီရှောင်ကန်းဟာ ဝိညာဉ်ဆင့်ကဲပြောင်းလဲခြင်းအတွက် လမ်းစဉ်တစ်ခုကို အလွယ်တကူပဲ ရှာဖွေ
တွေ့ရှိသွားခဲ့ပါတော့တယ်။ 】
【 အဆုံးစွန်သော ဂုဏ်သတ္တိထပ်ဆင့်ခြင်း 】