အခန်း ၁၁ - ယွီယွမ်ကျန့် - နှစ်ယောက်လုံးက ယွီယွမ်ကျန့်ပဲကို၊ ဘာဖြစ်လို့ သူ့သားကျမှ ဒီလောက်အထိ တော်နေရတာလဲ။

【 အရာအားလုံးက ထင်သလောက်တော့ မလွယ်ကူခဲ့ဘူး။】

【ဝိညာဉ်ကူးပြောင်းခြင်း ပြီးနောက်၊ ယွီရှောင်ကန်းအနေနဲ့ နောင်လာမယ့် ဒိုလော်တိုက်ကြီးရဲ့ အနာဂတ် ဖြစ်ပျက်ပုံတွေကို အသေးစိတ် ရှင်းရှင်းလင်းလင်း မသိရှိခဲ့ဘူး။】

【သူသိထားတဲ့ အချက်တွေထဲက တစ်ခုကတော့ သူ့ရဲ့ပါရမီက အလွန်ပဲ ညံ့ဖျင်းလှတယ်ဆိုတာ ဖြစ်နေပါတယ်။】

【မွေးဖွားချိန်ကနေ အခုအချိန်အထိ ငါးနှစ်တာ ကာလပတ်လုံး လူအဖြစ် ဖြတ်သန်းခဲ့ရတာကတင် ယွီယွမ်ကျန့်ကို လူတိုင်းရဲ့ လှောင်ပြောင်စရာ ဖြစ်စေခဲ့ပြီးပါပြီ။】

【အကယ်လို့ ဝိညာဉ်နိုးထခြင်း အခမ်းအနားသာ ပြီးဆုံးသွားခဲ့ရင်၊ သူဟာ နောင် နှစ်ပေါင်းများစွာအထိ ယွီယွမ်ကျန့်ရဲ့ ဘဝအတွက် အမည်းစက်တစ်ခုအဖြစ် ဆက်ရှိနေဦးမှာလား။】

【ဒီနှစ်တွေအတွင်းမှာ ယွီယွမ်ကျန့်က သူ့အပေါ် ဘယ်လောက်တောင် ဂရုစိုက်ခဲ့လဲဆိုတာကို ယွီရှောင်ကန်း ပြန်တွေးမိတိုင်း၊ ဒီလိုအခြေအနေမျိုး ဖြစ်ပျက်လာမှာကို သူ ဘယ်လိုမှ အဖြစ်မခံနိုင်ပါဘူး။】

【သူ သေသွားရရင်တောင်မှ ဒီလိုအဖြစ်မခံနိုင်ပါဘူး】

【ဒါကြောင့် အသိဉာဏ်ပညာ ပြန်ပွင့်လာပြီး နောက် ယွီရှောင်ကန်းဟာ ကျင့်ကြံခြင်းကို စတင်ချင်တယ်ဆိုတဲ့ အကြံဉာဏ်ကို ယွီယွမ်ကျန့်ထံ တင်ပြခဲ့တာ ဖြစ်ပါတယ်။】

အပြိုင်ကမ္ဘာ (အမှောင်ကမ္ဘာ)၊ ဘုံခုနစ်ဆင့်ပြာသာဒ်ဂိုဏ်းတွင်။

"ဖုန်းကျိ... ဝိညာဉ်နိုးထခြင်းမတိုင်ခင် ကျင့်ကြံခြင်းကို စတင်တာက တကယ်ပဲ အသုံးဝင်လို့လား။"

အရိုးဒိုလော် (ဦးလေးကူ) က အံ့ဩခြင်းနှင့် သံသယများနေသော လေသံဖြင့် ပြောလိုက်သည်။

အကယ်လို့ ထိုအရာကို အခြားသူတစ်ယောက်ယောက်ကသာ ပြောလာခဲ့လျှင်၊ ဝိညာဉ်မနိုးထခင် ကျင့်ကြံခြင်းက အလဟဿပဲဟု သူ ဧကန်မုချ ပြောဆိုမိလိမ့်မည်။

ဒါက ဒိုလော်တိုက်ကြီးရဲ့ သမိုင်းအစဉ်အဆက် လက်ဆင့်ကမ်းလာခဲ့တဲ့ ဘယ်သူမှ မချိုးဖောက်ဖူးတဲ့ စည်းမျဉ်းတစ်ခု မဟုတ်ပါလား။

ဒါပေမဲ့ နဂါးနတ်ဘုရားဒိုလော် ယွီရှောင်ကန်းကတော့ မတူညီဘူး။

သူက မဟာဆရာသခင်ကြီး ယွီရှောင်ကန်းရဲ့ ပုံရိပ်တူအပြိုင် ဖြစ်တယ်၊ မဟာဆရာသခင်ကြီး ယွီရှောင်ကန်းရဲ့ လက်ရှိအခြေအနေကိုတော့ သူတို့လို လူမျိုးတွေက မသိဘဲ နေပါ့မလား။

ကောင်းကင်စီရင်ချက် မျက်နှာပြင်ပေါ်မှာ ပြသနေတဲ့ နဂါးနတ်ဘုရားဒိုလော် ယွီရှောင်ကန်းရဲ့ ဗီဒီယိုအရဆိုရင်၊ သူ မွေးဖွားကတည်းက အခုအထိ ဖြတ်သန်းခဲ့ရတဲ့ ဘဝက အမှန်တော့ မဟာဆရာသခင်ကြီး ယွီရှောင်ကန်းနဲ့ ဘာမှမထူးခြားဘဲ ပိုတောင် ဆိုးရွားနေခဲ့သည်။

ပြီးတော့ ဒီနှိုင်းယှဉ်ချက်က လူတစ်ယောက်တည်းကနေ မတူညီတဲ့ ရွေးချယ်မှုတွေ လုပ်ဆောင်ခြင်းဖြင့် ဖြစ်ပေါ်လာတဲ့ ကွာဟချက် ဖြစ်သည်။

ဒါကြောင့် သူတို့အနေနဲ့ မတွေးဘဲ မနေနိုင်တော့ပေ၊ နဂါးနတ်ဘုရားဒိုလော် ယွီရှောင်ကန်း လုပ်ဆောင်ခဲ့သော သာမန်လူတွေနဲ့ မတူညီတဲ့ ရွေးချယ်မှုတိုင်းဟာ သူ့ကို ကောင်းကင်ဘုံကို ဆန့်ကျင်ပြီး ကံကြမ္မာပြောင်းလဲစေမည့် အဓိက သော့ချက်များ ဖြစ်နေမလားဆိုတာကိုပင်။

"ဒါကတော့..."

နင်ဖုန်းကျိလည်း ယခုအချိန်တွင် ချက်ချင်း ကောက်ချက်မချရဲသေးပေ။

ဘာပဲဖြစ်ဖြစ် ဒါက နောင်တစ်ချိန်မှာ ဘွဲ့အမည်ရဒိုလော် ဖြစ်လာမယ့်သူတစ်ဦးက သူ့ရဲ့ ကလေးဘဝတုန်းက တင်ပြခဲ့တဲ့ အကြံဉာဏ် ဖြစ်နေသောကြောင့်ပင်။

"ငါတို့ ဆက်ကြည့်ကြတာပေါ့၊ ခဏနေရင် အဖြေကို သိရမှာပါ။"

ဓားဒိုလော် (ဦးလေးကျန့်) က ပြောလိုက်သည်။

ဘုံခုနစ်ဆင့်ပြာသာဒ်ဂိုဏ်းတင်မကဘဲ ဝိညာဉ်နန်းတော်၊ ဟောက်ထျန်းဂိုဏ်းနဲ့ ဒိုလော်တိုက်ကြီးပေါ်ရှိ အင်အားစုအသီးသီးတို့ဟာ ယခုအချိန်တွင် ကောင်းကင်စီရင်ချက် ဆီသို့သာ အာရုံအပြည့် ရောက်ရှိနေကြသည်။

ဝိညာဉ်မနိုးထခင် ကျင့်ကြံခြင်းက တကယ်ပဲ အသုံးဝင်သလားဆိုတာကို လူတိုင်း သိချင်နေကြသည်၊ ဘာလို့ဆို အဲဒါက သူတို့အားလုံးရဲ့ နောင်လာမည့် ကျင့်ကြံခြင်းအတတ်ပညာများနှင့် သက်ဆိုင်နေသောကြောင့် ဖြစ်သည်။

【ဗီဒီယိုက ဆက်လက်ပြသနေသည်...】

【ယွီရှောင်ကန်းရဲ့ စကားတွေနဲ့ သူ့ရဲ့ စိတ်ပျက်အားငယ်နေတဲ့ မျက်နှာအမူအရာကြောင့် ယွီယွမ်ကျန့်က ရှေ့သို့ လှမ်းလာပြီး၊ ဆောင့်ကြောင့်ထိုင်ကာ ယွီရှောင်ကန်းရဲ့ ခေါင်းပေါ်သို့ လက်တင်လိုက်ပါတယ်။】

【"ငတုံးလေး ရဲ့၊ စိတ်မပူစမ်းပါနဲ့၊ မင်းက ငါ့ဘဝအတွက် ဘယ်တော့မှ အမည်းစက်တစ်ခု ဖြစ်လာမှာ မဟုတ်ဘူး။"】

【ယွီယွမ်ကျန့်က စကားပြောနေစဉ်မှာ ပြုံးနေသော်လည်း၊ သူ့ စကားလုံးများက ခိုင်မာပြီး ဟိန်းထွက်နေသည်။】

【အကယ်လို့ သူသာ ယွီရှောင်ကန်းကို အမည်းစက်တစ်ခုအဖြစ် တကယ် သတ်မှတ်ခဲ့မယ်ဆိုရင်၊ ယွီရှောင်ကန်း မွေးဖွားပြီး မကြာခင်မှာတင် ဝေးရာသို့ မောင်းထုတ်ပစ်ခဲ့မှာ အသေအချာပါပဲ။】

【ယွီယွမ်ကျန့်ရဲ့ စကားတွေက ယွီရှောင်ကန်းရဲ့ နှလုံးသားကို နွေးထွေးသွားစေခဲ့ပါတယ်။ သူ့ ခေါင်းပေါ်ရှိ လက်ဖဝါးရဲ့ ခိုင်မာတဲ့ အားအင်ကို ခံစားရင်း၊ ယွီရှောင်ကန်းက ခေါင်းခါလိုက်ပြီး ထိုလက်ကို ဖယ်ရှားလိုက်ပါတယ်။】

【"အဖေက ဂရုမစိုက်ရင်တောင်မှ ကျွန်တော်က ဂရုစိုက်တယ်။ ဒါကြောင့် ဒါက အသုံးမဝင်ဘူးဆိုရင်တောင်မှ ကျွန်တော် ကြိုးစားကြည့်ချင်ပါတယ်။"】

【ယွီရှောင်ကန်းရဲ့ စကားသံက အလွန်ပဲ ပြတ်သားလှပါတယ်။】

【သူ့သားရဲ့ မျက်ဝန်းတွေကို ကြည့်ရင်း ယွီယွမ်ကျန့်က သူ့သား တကယ် လေးလေးနက်နက် ပြောနေတာကို နားလည်လိုက်ပါတယ်။】

【ယွီရှောင်ကန်းရဲ့ သိတတ်မှုကို မြင်ရတဲ့အခါ ယွီယွမ်ကျန့် အလွန်ပဲ ကြည်နူးမိသွားပါတယ်၊ ဒီသားအပေါ်မှာ သူ အချည်းနှီး သံယောဇဉ် တွဲခဲ့တာ မဟုတ်ပါဘူးတကား။】

【"ကျင့်ကြံခြင်းဆိုတာ အလွန်နာကျင်ရတာနော်။ မင်း တကယ်ပဲ အောင့်အီးသည်းခံနိုင်မှာ သေချာရဲ့လား။"】

【"သေချာတာပေါ့!"】

【ဒီလိုနဲ့ပဲ နောက်တစ်နေ့မှာတော့...】

【"ပြေးစမ်း! ဒီလောက် နှေးကွေးတဲ့ အရှိန်အဟုန်နဲ့ မင်းက အားကောင်းတဲ့သူ ဖြစ်ချင်သေးတာလား။"】

【အပြာရောင်လျှပ်စီး နဂါးဂိုဏ်းထဲက ယွီယွမ်ကျန့် တစ်ဦးတည်းအတွက် သီးသန့်ရှိတဲ့ လေ့ကျင့်ရေးကွင်းပြင် ကျယ်ကြီးထဲမှာ၊ အသက်ငါးနှစ်အရွယ် ယွီရှောင်ကန်းဟာ တည်ကြည်လေးနက်လှတဲ့ ယွီယွမ်ကျန့်ရဲ့ စောင့်ကြည့်မှုအောက်မှာ အပြေးလေ့ကျင့်ခန်းကို စတင်ခဲ့ပါတယ်။】

【ယွီယွမ်ကျန့်ရဲ့ အဆိုအရတော့ အပြေးလေ့ကျင့်ခန်းကနေ အရင်စရမယ်၊ အကယ်လို့ သူသာ အောင့်အီးသည်းခံနိုင်ရင် အခြားသော လေ့ကျင့်ခန်းတွေကို ဆက်လက် ကြိုးစားခွင့်ပေးမယ် ဖြစ်ပါတယ်။】

【တစ်ပတ်ပြီးတစ်ပတ်... ဆက်တိုက်ပြေးနေရတာကြောင့် ယွီရှောင်ကန်းရဲ့ လည်ချောင်းဟာ ခြောက်သွေ့ပြီး ကျဉ်းမြောင်းလာသလို ခံစားရလာသည်။ ရှူသွင်းလိုက်တဲ့ လေတွေက လည်ချောင်းကို ရေခဲစတွေနဲ့ ခြစ်မိနေသလို ခံစားရပြီး၊ ရှူထုတ်လိုက်တဲ့ လေတွေကတော့ ပူလောင်တဲ့ ခံစားမှုကို ဆောင်ကြဉ်းပေးနေပါတယ်။】

【ချွေးတွေက နဖူးပေါ်ကနေ တရစပ် စီးကျလာပြီး အဝတ်အစားတွေကလည်း ခန္ဓာကိုယ်မှာ ချွေးများဖြင့် ကပ်ညှိနေခဲ့ပါပြီ။ လေတိုက်ခတ်လာတဲ့အခါ အေးစိမ့်သွားသလို ခံစားရပေမဲ့၊ ခန္ဓာကိုယ်အတွင်းပိုင်းကတော့ ဆက်လက် ပူလောင်နေဆဲ ဖြစ်ပါတယ်။ ဒီလို အအေးနဲ့ အပူ အလှည့်ကျ ဖြစ်ပေါ်နေမှုက တကယ်ကို ခံနိုင်ရည်ရှိဖို့ ခက်ခဲလှပါတယ်။】

【သူ့ရဲ့ ခြေလှမ်းတွေက တဖြည်းဖြည်း အားနည်းလာပြီး ခန္ဓာကိုယ်ကလည်း လေးလံလာခဲ့တယ်၊ ခြေထောက်နှစ်ဖက်လုံးက ခဲဆွဲထားသလိုပဲ။ ခြေလှမ်းတစ်ချက် လှမ်းလိုက်တိုင်းမှာ နာကျင်နေတဲ့ ကြွက်သားတွေကို ပိုပြီး တင်းအားဖြစ်စေပါတယ်။】

【ယခုအချိိန်တွင် ယွီရှောင်ကန်းအနေနဲ့ ပြေးတာကို ရပ်တန့်ပြီး အနားယူလိုက်ချင်တာ၊ နွေးထွေးတဲ့ အိပ်ရာထဲကို ပြန်ဝင်ပြီး ကောင်းကောင်း အိပ်စက်လိုက်ချင်တာ ဆိုသောစိတ်များ ဘယ်လောက်တောင် ရှိနေမလဲ။】

【ဒါပေမဲ့ သူ့ရဲ့အနာဂတ်ကို ပြန်တွေးမိပြီး၊ အခြားသူတွေရဲ့ လှောင်ပြောင်စရာ ဖြစ်လာမယ့်အရေးကို...】

【အခြားသူတွေက မိမိကို အသုံးချပြီး ယွီယွမ်ကျန့်ကို လှောင်ပြောင်ကြမယ့်အရေးကို တွေးမိတဲ့အခါ၊ ယွီရှောင်ကန်းဟာ အံကို ကြိတ်ကာ သူရဲ့စိတ်ဓာတ်ခွန်အားသက်သက်ဖြင့်သာ အားတင်းကာ ဆက်လက် သည်းခံခဲ့ပါတယ်။】

【"ရပြီ"】

【ယွီရှောင်ကန်းရဲ့ လှုပ်ရှားမှုတွေကို စောင့်ကြည့်နေတဲ့ ယွီယွမ်ကျန့်က သူ့သား အကန့်အသတ်ကို ရောက်ရှိသွားပြီဖြစ်တာကို မြင်တဲ့အခါ ယနေ့မနက်ခင်းရဲ့ အပြေးလေ့ကျင့်ခန်းကို ရပ်တန့်ဖို့ လှမ်းအော်လိုက်ပါတယ်။】

【ယွီယွမ်ကျန့်ရဲ့ အသံကို ကြားလိုက်ရတာနဲ့ ယွီရှောင်ကန်းဟာ လက်ချောင်းတစ်ချောင်းတောင် မလှုပ်နိုင်တော့ဘဲ မြေပြင်ပေါ်သို့ ချက်ချင်း လဲပြိုကျသွားခဲ့ရတော့တယ်။】

【"မဆိူးဘူး"】

【ယွီယွမ်ကျန့်က သူ့ကို ချီးကျူးလိုက်သော်လည်း၊ အမှန်တော့ သူ့နှလုံးသားထဲတွင် အလွန်ပင် အံ့ဩသွားခဲ့ရခြင်း ဖြစ်သည်။】

【သူက အစတုန်းက ယွီရှောင်ကန်း မနေ့ကပြောခဲ့တဲ့ စကားတွေက နှုတ်ပြောသက်သက်ပဲဖြစ်ပြီး၊ ဒီနေ့ လေ့ကျင့်ခန်းက သူ့ကို ချက်ချင်း ခြောက်လှန့် မောင်းထုတ်ပစ်နိုင်လိမ့်မယ်လို့ ထင်ခဲ့တာပါ။】

【ဒါပေမဲ့ ရလဒ်ကတော့ ယွီရှောင်ကန်းက တကယ်ပဲ အဆုံးထိ သည်းခံနိုင်ခဲ့ပါတယ်။】

【သာမန်မိသားစုတွေက အသက်ငါးနှစ်အရွယ် ကလေးတွေ၊ ဒီထက်ကြီးတဲ့ ကလေးတွေကိုသာ လေ့ကျင့်ပေးမယ်ဆိုရင်၊ သူတို့ဟာ မိဘတွေဆီကို ငိုယိုပြီး အပြေးသွားကြတာ ကြာလှပါပြီ။】

【ဒါပေမဲ့ အစကနေ အဆုံးအထိ ယွီရှောင်ကန်းဟာ စွန့်လွှတ်မယ်ဆိုတဲ့ စကားတစ်လုံးမှ မပြောခဲ့ပါဘူး။ အပြေးလွန်လို့ သူ့ရဲ့ ခြေသလုံးကြွက်သားတွေ တုန်ခါနေရင်တောင်မှ သူ မရပ်တန့်ခဲ့ပါဘူး။】

【ယခုအချိိန်မှာ ယွီယွမ်ကျန့်အနေနဲ့ သူသိထားတဲ့ အင်အားကြီး ပုဂ္ဂိုလ်တွေရဲ့ ရင်သွေးငယ်တွေကို မတွေးဘဲ မနေနိုင်တော့ပါဘူး၊ ဥပမာ ဟောက်ထျန်းဂိုဏ်း ဂိုဏ်းချုပ်ရဲ့ သားနှစ်ယောက်လိုမျိုးပေါ့။】

【ထိုနှစ်ယောက်က သာမန်မျက်စိနဲ့ မြင်နိုင်လောက်တဲ့အထိ ပါရမီရှိကြပေမဲ့၊ သူရဲ့အတွေ့အကြုံရင့်ကျက်တဲ့ မျက်လုံးတွေနဲ့ ကြည့်ရင်တော့၊ ထိုညီအစ်ကိုနှစ်ယောက်ဟာ အခြားသူတွေရဲ့ မြှောက်ပင့်ပေးမှုတွေကြောင့် စိတ်ဓာတ်ပိုင်းဆိုင်ရာ အတန်ငယ် အားနည်းချက် ရှိနေတာကို မမြင်ဘဲ နေပါမလဲ။】

【အကယ်လို့ အချိန်မီ မပြင်ဆင်ဘူးဆိုရင်တော့ အနှေးနဲ့အမြန် ထိုနှစ်ယောက်အတွက် ပြဿနာ တက်လာမှာ အသေအချာပါပဲ။】

【ဒါကို တွေးမိရင်း၊ မောပန်းနွမ်းနယ်လွန်းလို့ မြေပြင်ပေါ်မှာ ပုံကျနေတဲ့ သူ့သားကို ငုံ့ကြည့်လိုက်တဲ့အခါ ယွီယွမ်ကျန့်ရဲ့ စိတ်ထဲမှာ ရုတ်တရက် ဂုဏ်ယူဝင့်ကြွားမှု အာရုံတစ်ခု ထွက်ပေါ်လာခဲ့ပါတယ်။】

【ဟောက်ထျန်းဂိုဏ်းရဲ့ အမြွှာညီနောင် ဟုတ်လား၊ဟွန့်... ငါ့သားက သူတို့ထက် ဘာမှ မညံ့ပါဘူးကွာ!】

အပြိုင်ကမ္ဘာ (အမှောင်ကမ္ဘာ)၊

အပြာရောင်လျှပ်စီး နဂါးဂိုဏ်းတွင်။

ယွီယွမ်ကျန့်သည် ကောင်းကင်စီရင်ချက် ပေါ်ရှိ မိမိကိုယ်မိမိ ငေးမှိုင်စွာ စိုက်ကြည့်နေမိသည်။

ဟိုဘက်က ကမ္ဘာက မိမိမျက်နှာထက်မှ ဂုဏ်ယူဝင့်ကြွားမှုများမှာ လုံးဝ ဖုံးကွယ်ထားခြင်း မရှိပေ။ သူက အဲဒါကို ရှင်းရှင်းလင်းလင်း မြင်တွေ့ရပြီး သူ ဘာအတွက် ဂုဏ်ယူနေသည်ကိုလည်း အပြည့်အဝ နားလည်သည်။

အကယ်လို့ သူသာ ထိုနေရာတွင် ရှိနေခဲ့မည်ဆိုလျှင်လည်း ထိုလောက်ပင် ဂုဏ်ယူမိလိမ့်မည်။

နှစ်ယောက်လုံးက ယွီယွမ်ကျန့်ဖြစ်ပြီး၊ တူညီတဲ့သား ယွီရှောင်ကန်းကို ပိုင်ဆိုင်ထားတာချင်း အတူတူ၊ ဟိုဘက်ကလူရဲ့ သားကတော့ အသက်ငါးနှစ်အရွယ်မှာတင် သူ့ဖခင်အတွက် တွေးတောပေးတတ်နေပြီ ဖြစ်သည်။

သူ့ဖခင်ရဲ့ ဘဝမှာ အမည်းစက်တစ်ခု မဖြစ်လာစေဖို့အတွက်၊ ဟိုဘက်က ကလေးက အသက်ငါးနှစ်အရွယ်မှာတင် ကျင့်ကြံခြင်းကို ဦးဦးဖျားဖျား စတင်ခဲ့သည်။

ပြီးတော့ ကျင့်ကြံခြင်း လုပ်ငန်းစဉ်တစ်လျှောက်လုံးမှာ သူ ငိုယိုတာ၊ ဂျီကျတာမျိုး လုံးဝမရှိခဲ့သလို စွန့်လွှတ်ဖို့လည်း မတွေးခဲ့ဘူး။ ဘယ်လောက်ပဲ နာကျင်ပါစေ၊ သူ အံကြိတ်ပြီး အဆုံးထိ အားတင်းခဲ့သည်။

ဒီလို ဇွဲလုံ့လနဲ့ စိတ်ဓာတ်ကြံ့ခိုင်မှုက သူ့ရဲ့ ယခင်စကားတွေဟာ နောက်ပြောင်နေတာ မဟုတ်ဘဲ၊ ထိုကမ္ဘာက ယွီယွမ်ကျန့်ရဲ့ အမည်းစက်ကို ဆေးကြောပေးချင်တဲ့ ဆန္ဒအစစ်အမှန် ဖြစ်ကြောင်း သက်သေပြနေခဲ့သည်။

ဟိုဘက်ကလူရဲ့ သားကို ကြည့်ပြီး၊ မိမိကိုယ်ပိုင်သားကို ပြန်လည်တွေးတောမိတဲ့အခါ၊ ယွီယွမ်ကျန့်ရဲ့ ခံတွင်းထဲမှာ ခါးသက်သက် အရသာတစ်ခု ပျံ့နှံ့သွားခဲ့ရသည်။

ယွီယွမ်ကျန့်အနေနဲ့ တစ်နေ့မှာ မိမိရဲ့ မနာလိုဖြစ်ရမယ့် အရာဟာ အခြားအပြိုင်ကမ္ဘာက မိမိကိုယ်တိုင် ပြန်ဖြစ်လာလိမ့်မယ်လို့ အိမ်မက်ပင် မက်ဖူးခဲ့ခြင်း မရှိပေ။

နှစ်ယောက်လုံးက သားတွေပဲဥစ္စာ၊ ဘာဖြစ်လို့ သူ့သားကျမှ ဒီလောက်အထိ တော်နေရတာလဲ။