အခန်း (၆၂) - ရူးသွပ်မှု

ညဉ့်နက်သန်းခေါင်ယံအချိန်တွင် လူရိပ်သုံးခုသည် တစ်စုံတစ်ခုသော ဦးတည်ရာဆီသို့ အတူတကွ လျှောက်လှမ်းနေကြသည်ကို မြင်တွေ့ရသည်။ ၎င်းတို့သည် မည်သူတစ်ဦးတစ်ယောက်၏ သတိပြုမိခြင်းကိုမျှ မခံရစေရန်အတွက် ပတ်ဝန်းကျင်ကို ဟိုဟိုဒီဒီ အကဲခတ်နေကြ၏။ ယခုအချိန်မှာ တော်တော်လေး ညဉ့်နက်နေပြီ ဖြစ်သဖြင့် ကင်းလှည့်နေသော ညစောင့်အချို့မှတစ်ပါး လူအများစုမှာ အိပ်ပျော်နေကြပြီ ဖြစ်သည်။ သို့သော်လည်း ထိုလူများမှာ ကင်းစောင့်များကို အလွယ်တကူ ကိုင်တွယ်နိုင်သည်ဟု မိမိကိုယ်ကိုယ် ယုံကြည်ထားကြသဖြင့် ၎င်းတို့ကို လုံးဝ အရေးတယူ မလုပ်ကြပါချေ။

အတန်ကြာပြီးနောက်... အမျိုးသားတစ်ဦးက သူ၏ လှုပ်ရှားမှုများကို ရုတ်တရက် ရပ်တန့်လိုက်ပြီး မိမိဘေးနားတွင် လျှောက်လှမ်းနေသော အမျိုးသားကို လှမ်းကြည့်လိုက်မိကာ၊ နောက်တစ်စက္ကန့်၌ သူ၏ အကြည့်များမှာ ၎င်းတို့ကို ရှေ့မှ ဦးဆောင်ခေါ်သွားပေးနေသည့် လူဆီသို့ ရောက်ရှိသွားခဲ့သည်။ မိမိ၏ အဖော်ဖြစ်သူ လှုပ်ရှားမှု ရပ်တန့်သွားသည်ကို မြင်တွေ့လိုက်ရသည့်အခါ ဘေးနားရှိ အမျိုးသားသည်လည်း လိုက်လံရပ်တန့်လိုက်မိပြီး ဇဝေဇဝါဖြစ်စွာဖြင့် လှမ်းကြည့်လိုက်၏။

၎င်းတို့နှစ်ဦးစလုံး လှုပ်ရှားမှု ရပ်တန့်သွားသည်ကို မြင်တွေ့လိုက်ရသည့်အခါ ရှေ့မှ ဦးဆောင်နေသော အမျိုးသားသည်လည်း လိုက်လံရပ်တန့်လိုက်ရပြီး ထိုလူနှစ်ဦးကို လှည့်ကြည့်လိုက်သည်။ သို့သော်လည်း သူတို့ ဘာဖြစ်လို့ မိမိနောက်သို့ ဆက်မလိုက်ဘဲ ရပ်တန့်သွားရသလဲဆိုသည့် အကြောင်းပြချက်ကို မမေးမြန်းရသေးမီမှာပင်... နောက်မှ လိုက်ပါလာသော အမျိုးသားတစ်ဦးက သူ့ကို ပြင်းထန်လှသော ဒေါသမျက်လုံးများဖြင့် စိုက်ကြည့်လိုက်ကာ......

"မင်း... အမှိုက်ကောင်၊ ငါတို့ကို ဘယ်နေရာကို ခေါ်သွားနေတာလဲ... သူနေတဲ့ အိပ်ဆောင်က ဘယ်နားမှာလဲဆိုတာ မင်း သေသေချာချာ သိလို့လား၊ ဒါမှမဟုတ် ငါတို့ကို လှည့်စားနေတာလား... တကယ်လို့ မင်း တစ်စုံတစ်ခုကို မိုက်မိုက်ကန်းကန်း ကစားဖို့ ကြိုးစားလာခဲ့ရင် မင်းရဲ့ အရေပြားကို အရိုးအထိ ရောက်အောင် ငါကိုယ်တိုင် ခွာပစ်မယ်" ဝတ်စုံနက် ဆင်မြန်းထားသော မျက်နှာဖုံးစွပ် အမျိုးသားက ထိုလူကို စိုက်ကြည့်ရင်း ထိုစကားလုံးများကို ခပ်ပြတ်ပြတ် ဆိုလိုက်ခြင်း ဖြစ်သည်။

ထိုစကားလုံးများကို ကြားလိုက်ရသည့်ခဏ၌ ထိုအမျိုးသားသည် အလွန်ပင် တုန်လှုပ်သွားခဲ့ရပြီး တံတွေးကို အားယူမြိုချလိုက်ရသော်လည်း... နောက်တစ်စက္ကန့်တွင်မူ သူက ဦးခေါင်းညိတ်ပြလိုက်မိရင်း ထိုလူနှစ်ဦးကို ကြည့်ကာ ပြုံးပြလိုက်သည်။

"ဟုတ်ကဲ့ပါ သခင်ကြီးတို့ရယ်... ဒါဟာ သခင်လေးရဲ့ အိပ်ဆောင်ဆီကို ရောက်မယ့် လမ်းမှန်ပါပဲ၊ ကျွန်တော် ဒီနေရာနဲ့ ပတ်သက်သမျှ အရာအားလုံးကို သေသေချာချာ စုံစမ်းထားပြီးသားမို့လို့... ဘာကိုမှ စိုးရိမ်မနေပါနဲ့၊ ကျွန်တော့်အနေနဲ့ သခင်ကြီးတို့ကို ဘယ်လိုလှည့်ကွက်မျိုးနဲ့မှ မလှည့်စားပါဘူး... ကျွန်တော့်ကို ယုံကြည်ပေးပါလို့ ကျိန်ဆိုဝံ့ပါတယ်" ထိုအမျိုးသားက ထိုလူနှစ်ဦးကို ကြည့်ကာ ပြုံးရင်း ဆိုလိုက်သည်။

သူ၏ ပါးစပ်ဖျားမှ ထိုစကားလုံးများကို ကြားလိုက်ရသည့်အခါ ၎င်းတို့နှစ်ဦးစလုံးသည် တစ်ဦး၏ မျက်နှာကိုတစ်ဦး လှမ်းကြည့်လိုက်ကြပြီး... အမျိုးသားတစ်ဦးမှာမူ တစ်စုံတစ်ခု မှားယွင်းနေပြီဟု စတင်ခံစားလိုက်ရသည်။

ထိုလူများမှာ ယိုဟန်ကို လုပ်ကြံသတ်ဖြတ်ရန်အတွက် သူ၏ အိပ်ဆောင်ရှိရာဆီသို့ ဦးတည်လျှောက်လှမ်းနေကြခြင်း ဖြစ်၏။ ၎င်းတို့ကို ရှေ့မှ ဦးဆောင်ခေါ်ရွေလာပေးနေသူမှာ ချိုင့်ဝှမ်းတစ်ရာ အဆိပ်ဂိုဏ်းမှ လုပ်ကြံသတ်ဖြတ်သူ ဖြစ်ပြီး... ၎င်းဂိုဏ်းမှ လုပ်ကြံသတ်ဖြတ်သူများမှာ အဆိပ်များကို ကျွမ်းကျင်စွာ အသုံးပြုနိုင်ခြင်းကြောင့် အလွန်ပင် ကျော်ကြားလှသည်။

၎င်းတို့သည် အဆိပ်များကို မိမိတို့၏ လက်နက်သဖွယ် ဆန်းပြားစွာ အသုံးပြုနိုင်ရန် သေသေချာချာ လေ့ကျင့်ထားကြသည့် လုပ်ကြံသတ်ဖြတ်သူများ ဖြစ်ကြပြီး... ၎င်းတို့ ပိုင်ဆိုင်ထားသော အဆိပ်များမှာလည်း အလွန်ပင် ပြင်းထန်လှသဖြင့်၊ ချိုင့်ဝှမ်းတစ်ရာ အဆိပ်ဂိုဏ်း၏ အဆိပ်သင့်ခြင်းကို ခံရပြီးနောက် မည်သူတစ်ဦးတစ်ယောက်မျှ အသက်ရှင်သန်နိုင်ခြင်း မရှိခဲ့ပါချေ။

ဤအမျိုးသားနှစ်ဦးမှာမူ သခင်ကြီး နီကိုးလပ်စ်က မည်သည့်သဲလွန်စမျှ ကျန်ရစ်မနေစေရန်အတွက် ထိုလုပ်ကြံသတ်ဖြတ်သူကို စောင့်ကြည့်ရန် စေလွှတ်လိုက်ခြင်း ဖြစ်သော်လည်း... ၎င်းလုပ်ကြံသတ်ဖြတ်သူမှာမူ မိမိ၏ တာဝန်ဝတ္တရားများ ပြီးဆုံးသွားသည့်အခါ သေဆုံးရတော့မည်ဖြစ်ကြောင်းနှင့် လင်မျိုးနွယ်စုအနေဖြင့် မိမိတို့၏ လုပ်ရပ်များအတွက် နီကိုးစ်မျိုးနွယ်စုကို လုံးဝ အပြစ်တင်နိုင်တော့မည် မဟုတ်ကြောင်းကို လုံးဝ သိရှိမနေခဲ့ပါချေ။

သူသည် သခင်ကြီး နီကိုးလပ်စ်က မိမိအတွက် သေဒဏ်ပေးစာချွန်လွှာကို အသင့်ပြင်ဆင်ထားပြီးသား ဖြစ်ကြောင်းနှင့်... တကယ်လို့ သူ လင်မျိုးနွယ်စုအတွင်းမှနေ၍ တစ်နည်းတစ်ဖုံအားဖြင့် အသက်ရှင်လျက် ထွက်ခွာနိုင်ခဲ့လျှင်တောင်မှ သူ့ကို လုံးဝ အသက်ချမ်းသာပေးမည် မဟုတ်ကြောင်းကို လုံးဝ သတိမပြုမိခဲ့ရှာပေ။

ထိုအမျိုးသားနှစ်ဦးသည် လုပ်ကြံသတ်ဖြတ်သူ၏ စကားကို ကြားလိုက်ရသည့်အခါ အကြည့်ချင်း ဖလှယ်လိုက်ကြပြီး— "ကောင်းပြီ... ငါတို့ရဲ့ အချိန်တွေကို ဖြုန်းတီးမနေနဲ့တော့၊ တစ်စုံတစ်ယောက်က ငါတို့ကို မမြင်ခင်မှာ အမြန်သွားကြရအောင်" ဟု ထိုအမျိုးသားတစ်ဦးက လုပ်ကြံသတ်ဖြတ်သူကို စိုက်ကြည့်ရင်း ဆိုလိုက်သည်။

လုပ်ကြံသတ်ဖြတ်သူက ဦးခေါင်းညိတ်ပြလိုက်မိရင်း ထိုလူနှစ်ဦးကို ယိုဟန်၏ အိပ်ခန်းရှိရာဆီသို့ ဆက်လက်ဦးဆောင်ခေါ်သွားခဲ့တော့သည်။ အဘယ်ကြောင့်ဆိုသော် သူသည် ယိုဟန်၏ အိပ်ခန်း မည်သည့်နေရာ၌ ရှိသလဲဆိုသည်ကို ကြိုတင်သိရှိထားပြီးသား ဖြစ်သလို... ဒီယာဟု အမည်ရသော အမျိုးသမီးသည်လည်း သူနှင့်အတူ တစ်ခန်းတည်း နေထိုင်နေကြောင်း ကြားသိထားသောကြောင့် ၎င်းမှာ မိမိတို့အတွက် တကယ့်ကို လွယ်ကူလှသော တာဝန်တစ်ခု ဖြစ်နေခဲ့သည်။ သို့သော်လည်း ထိုလူသုံးဦးစလုံးမှာမူ မိမိတို့သည် ယခုအခါ ဤနေရာ၌ လုံးဝ ဘေးကင်းလုံခြုံမှု မရှိတော့သည့် လက်ရှိ အခြေအနေမှန်ကို လုံးဝ သတိမပြုမိကြပါချေ။

အချို့သော လူအနည်းငယ်မှာ ၎င်းတို့ကို ဘေးကင်းလှသော အကွာအဝေးတစ်ခုမှနေ၍ ကြိုတင်စောင့်ကြည့်နေကြပြီ ဖြစ်သည်။ ထိုလူများသည် အဆောက်အဦးတစ်ခုမှ တစ်ခုဆီသို့ လျှပ်စီးလက်သကဲ့သို့ လျင်မြန်လှသော အရှိန်အဝါများဖြင့် လှုပ်ရှားသွားလာရင်း ထိုလူသုံးဦးကို စောင့်ကြည့်နေကြခြင်း ဖြစ်ပြီး... ကောင်းကင်ယံထက်တွင်မူ အဖိုးအိုတစ်ဦးနှင့် သူ၏ ဘေးနား၌ မတ်တတ်ရပ်နေသော အမျိုးသားတစ်ဦးတို့ကို မြင်တွေ့ရသည်။ ၎င်းတို့နှစ်ဦးစလုံးသည် အောက်ခြေရှိ ထိုလူသုံးဦးကို စိုက်ကြည့်နေကြခြင်း ဖြစ်၏။

"သခင်ကြီး... ကျွန်တော် နားမလည်နိုင်ဘူး ဖြစ်နေတယ်၊ ဘာဖြစ်လို့ သူတို့ကို မျိုးနွယ်စုထဲကို အလွယ်တကူ ပေးဝင်လိုက်ရတာလဲ... အဲဒီလူတွေက တကယ့်ကို ထုံအလွန်းပြီး သူတို့ရဲ့ ကန့်သတ်ချက်ကို သူတို့ကိုယ်တိုင် မသိကြဘူး၊ ပြီးတော့ သူတို့ကို ရှေ့ကနေ ဦးဆောင်ခေါ်လာပေးတဲ့လူက ချိုင့်ဝှမ်းတစ်ရာ အဆိပ်ဂိုဏ်းကကောင်ပဲ... သူဟာ အတိတ်တုန်းက သခင်လေး ယိုဟန်ကို တိတ်တဆိတ် လုပ်ကြံဖို့ ကြိုးစားခဲ့တဲ့ကောင် ဖြစ်ရမယ်လို့ ကျွန်တော် သေချာပေါက် ယုံကြည်ပါတယ်" အာဂျွန်က အဖိုးအိုကို လှမ်းကြည့်ရင်း ထိုစကားလုံးများကို ဆိုလိုက်သည်။

အဖိုးအိုလင်က အာဂျွန်ကို လှမ်းကြည့်ကာ ပြုံးလိုက်မိရင်း— "မင်း လေ့လာရဦးမယ့်အရာတွေ အများကြီး ရှိပါသေးတယ် အာဂျွန်ရယ်... တကယ်လို့ ငါက သူတို့ကို အပြတ်သတ်ချင်တယ်ဆိုရင် ဘာဖြစ်လို့ လင်မျိုးနွယ်စုအတွင်းထဲမှာ လွတ်လွတ်လပ်လပ် သွားလာခွင့်ပေးပြီး သူတို့ စိတ်တိုင်းကျ လုပ်ခွင့်ပေးထားမှာလဲ၊ ငါ့မှာ အတည်ပြုချင်တဲ့ သံသယအချို့ ရှိနေလို့ပါ... ယိုဟန်က သူတို့ရဲ့ ပထမဦးစားပေး ပစ်မှတ် ဟုတ်မဟုတ်ဆိုတာကို ငါကိုယ်တိုင် သေသေချာချာ သိချင်လို့ပဲ" အဖိုးအိုလင်က ထိုစကားလုံးများကို ဆိုလိုက်သည်။

အာဂျွန်က အဖိုးအိုလင်၏ ပါးစပ်ဖျားမှ ထိုစကားလုံးများကို ကြားလိုက်ရသည့်အခါ သဘောကျစွာ ပြုံးလိုက်မိရင်း ဦးခေါင်းညိတ်ပြလိုက်ကာ— "ဟုတ်ကဲ့ပါ သခင်ကြီး... အခုမှပဲ ကျွန်တော် ကောင်းကောင်း နားလည်ပါတော့တယ်၊ ကျွန်တော်လည်း ကျွန်တော်တို့ရဲ့ လူတွေကို သေသေချာချာ ညွှန်ကြားထားပြီးပါပြီ... သူတို့တွေက မျိုးနွယ်စုရဲ့ နေရာအနှံ့အပြားမှာ လူစုခွဲပြီး အသင့်စောင့်နေကြသလို၊ အချို့လူတွေကတော့ သခင်မလေး ဒီယာ့ရဲ့ အခန်းနဲ့ သခင်လေး ယိုဟန် သွားရောက်ခဲ့တဲ့ ကျင့်ကြံခြင်းခန်းမတို့ရဲ့ ဘေးပတ်ဝန်းကျင်မှာ စောင့်ကြည့်နေကြပါတယ်" အာဂျွန်က အသက်ကို ပြင်းပြင်းရှူလိုက်ရင်း အဖိုးအိုလင်အား အခြေအနေ အလုံးစုံကို ရှင်းပြလိုက်သည်။

သို့သော်လည်း အဖိုးအိုမှာမူ အခြားသောအရာတစ်ခုကို တွေးတောနေမိသကဲ့သို့ ပြင်းထန်စွာ အတွေးလွန်နေခဲ့ပြီး... အာဂျွန်၏ ရှင်းပြချက်များကို ကြားရပြီးနောက်တွင်မူ တိတ်ဆိတ်စွာသာ နေနေခဲ့တော့သည်။

ထိုအတောအတွင်း—

ခြောက်သွေ့သွေ့ ချိုင့်ဝှမ်းကြီးတစ်ခု၏ အတွင်းပိုင်း၌ အမျိုးသားတစ်ဦး ထိုင်နေသည်ကို မြင်တွေ့ရပြီး... ၎င်းချိုင့်ဝှမ်းကြီးမှာ ကြီးမားလှသော တောင်တန်းကြီးများက ဝန်းရံထားခြင်း ဖြစ်ကာ၊ ထိုအမျိုးသားမှာမူ တင်ပလ္လင်ခွေ ကြာပန်းပုံစံ အနေအထားဖြင့် ထိုင်နေရင်း မိမိ၏ ခန္ဓာကိုယ်အတွင်းသို့ ချီစွမ်းအားများကို စုဆောင်းနေခြင်း ဖြစ်သည်။

သူ၏ အပေါ်ပိုင်း ခန္ဓာကိုယ်မှာ အဝတ်မဲ့နေခဲ့သဖြင့် သူ၏ တောင့်တင်းခိုင်မာလှသော ကြွက်သားအမြှောင်းမြှောင်းကို ကောင်းစွာ မြင်တွေ့နိုင်ပြီး... သူသည် မိမိ၏ ပတ်ဝန်းကျင်မှ ချီစွမ်းအားများကို စုစည်းနေသည့်အချိန်၌ အလွန်ပင် တည်ငြိမ်အေးဆေးနေခဲ့သည်။ ယိုဟန် ဤနေရာသို့ ရောက်ရှိလာခဲ့သည်မှာ ခြောက်ရက်ခန့်ပင် ရှိသွားခဲ့ပြီ ဖြစ်၏။

တုံ

[ဂုဏ်ယူပါသည် အရှင်... သင်သည် ခန္ဓာကိုယ်သန်မာခြင်းအဆင့် ၏ ပဉ္စမအဆင့်သို့ အောင်မြင်စွာ အဆင့်တက်လှမ်းနိုင်ခဲ့ပြီ ဖြစ်သည်]

.

.

.

.

[ဂုဏ်ယူပါသည် အရှင်... သင်သည် ခန္ဓာကိုယ်သန်မာခြင်းအဆင့်၏ ဆဋ္ဌမအဆင့်သို့ အောင်မြင်စွာ အဆင့်တက်လှမ်းနိုင်ခဲ့ပြီ ဖြစ်သည်]

.

.

.

.

.

[ဂုဏ်ယူပါသည် အရှင်... သင်သည် ခန္ဓာကိုယ်သန်မာခြင်းအဆင့်၏ သတ္တမအဆင့်သို့ အောင်မြင်စွာ အဆင့်တက်လှမ်းနိုင်ခဲ့ပြီ ဖြစ်သည်]

"မလုံလောက်သေးဘူး..." ယိုဟန်က တီးတိုးရေရွတ်လိုက်မိရင်း မိမိ၏ ပတ်ဝန်းကျင်မှ ချီစွမ်းအားများကို ပိုမို၍ စတင်စုစည်းလိုက်သည်။ သူသည် မိမိ၏ ပတ်ဝန်းကျင်မှ ချီစွမ်းအားများကို စုစည်းနေခဲ့သည်မှာ တစ်ရက်ခန့်ပင် ရှိသွားခဲ့ပြီ ဖြစ်ရာ... မည်သည့်အနားယူခြင်းမျှ မပြုလုပ်ဘဲ ဆက်တိုက်ဆိုသလို ချီစွမ်းအားများကို စုစည်းခဲ့ခြင်းကြောင့်၊ ကံကောင်းထောက်မစွာဖြင့် သေးငယ်သော အဆင့်ငယ် သုံးဆင့်ကို တစ်ခုပြီးတစ်ခု အောင်မြင်စွာ ကျော်ဖြတ်နိုင်ခဲ့ခြင်း ဖြစ်သည်။ သို့သော်လည်း သူသည် မိမိ၏ တိုးတက်မှုများအပေါ် လုံးဝ စိတ်ကျေနပ်မှု မရှိသေးဘဲ ပိုမို၍ တိုးတက်လိုနေခဲ့သည်။

သူသည် မိမိ၏ ဦးခေါင်းအတွင်း၌ ပဲ့တင်ထပ်နေသော အကြောင်းကြားစာများကို လျစ်လျူရှုထားလိုက်မိရင်း ပတ်ဝန်းကျင်မှ ချီစွမ်းအားများကို ထပ်မံ၍ အစွမ်းကုန် စုစည်းနေခဲ့တော့သည်။ ဤဝိညာဉ်အာကာသငယ်မှာ သူ့အတွက် တကယ့်ကို တန်ဖိုးမဖြတ်နိုင်သော ဆုလာဘ်ကြီးတစ်ခု ဖြစ်၏။

အတန်ကြာပြီးနောက်... ယိုဟန်သည် မိမိ၏ ခန္ဓာကိုယ်အတွင်းမှ စီးဆင်းလာသော ပြင်းထန်လှသည့် စွမ်းအားလှိုင်းများကို ခံစားလိုက်ရသည့်အခါတွင်မှ နောက်ဆုံး၌ မျက်ဝန်းအစုံကို ဖွင့်လှစ်လိုက်သည်။ ခဏမျှ ကြာပြီးနောက်တွင်မူ သူ၏ စိတ်အာရုံထဲ၌ အကြောင်းကြားစာတစ်ခု ထပ်မံထွက်ပေါ်လာခဲ့ပြန်၏။

[ဂုဏ်ယူပါသည် အိမ်ရှင်... သင်သည် ခန္ဓာကိုယ်သန်မာခြင်းအဆင့်၏ အဋ္ဌမအဆင့်သို့ အောင်မြင်စွာ အဆင့်တက်လှမ်းနိုင်ခဲ့ပြီ ဖြစ်သည်]

တုံ

အမည် - လင်ယိုဟန်

ကျင့်ကြံခြင်းအဆင့် - ခန္ဓာကိုယ်သန်မာခြင်းအဆင့် (အဋ္ဌမအဆင့်)

ကျင့်ကြံခြင်းအမျိုးအစား - စုံတွဲကျင့်ကြံသူ / ချီကျင့်ကြံသူ

အမွေအနှစ် - မရှိပါ

သွေးမျိုးဆက် - မရှိပါ

မှော်စွမ်းအင် - ၁၅၀၀

ညှို့ဓာတ် - ၂၈၀

အရှိန်နှုန်း - ၉၈၀

ကာယခွန်အား - ၁၆၀၀

ဝိညာဉ်လက်နက် - အသူရာ ဓါး[ကောင်းကင်ဘုံ ကျိန်စာသင့်ဓား]

ယိုဟန်၏ မျက်စိရှေ့မှောက်တွင် ပြာလွင်သော စနစ်စာမျက်နှာတစ်ခု ထွက်ပေါ်လာခဲ့သည်။ ယိုဟန်သည် အသက်ကို ပြင်းပြင်းရှူလိုက်မိရင်း မိမိ၏ အခြေအနေပြ ပြတင်းပေါက်ကို စိုက်ကြည့်လိုက်၏။

'ငါ ခန္ဓာကိုယ်သန်မာခြင်းအဆင့်ရဲ့ အဋ္ဌမအဆင့်ကို ရောက်ရှိသွားခဲ့ပြီ... ဒါပေမဲ့ ငါ့ရဲ့ အခြေအနေတွေကတော့ ကာယခွန်အားကလွဲလို့ ကျန်တဲ့အရာတွေက သိသိသာသာကြီး တိုးတက်မလာခဲ့ဘူးပဲ၊ ငါ အတိတ်တုန်းက ငါ့ရဲ့ ကာယခွန်အားကို တစ်ကြိမ်မှ မစမ်းသပ်ဖူးခဲ့ဘူး... ဒါဟာ ငါ့ရဲ့ အလုံးစုံသော ခွန်အားတွေကို စမ်းသပ်ဖို့ အကောင်းဆုံးနေရာပဲ' ယိုဟန်သည် စိတ်ထဲမှ အတွေးပွားလိုက်မိရင်း... နောက်တစ်စက္ကန့်၌ ကြီးမားလှသော သစ်ပင်ကြီးတစ်ပင်အနီးသို့ ချဉ်းကပ်လိုက်ကာ အသက်ကို ပြင်းပြင်းရှူသွင်းလိုက်သည်။

"ဒါဟာ ငါ့ရဲ့ ခွန်အားကို စမ်းသပ်ဖို့ အကောင်းဆုံးနည်းလမ်းပဲ..." သူက ပြုံးလိုက်မိရင်းမှ နောက်တစ်စက္ကန့်၌ လက်သီးကို တင်းကျပ်စွာ ဆုပ်ကိုင်လိုက်ကာ... မိမိတွင် ရှိသမျှ ခွန်အားရှိသမျှကို ညာဘက်လက်ဖဝါးအတွင်းသို့ စုစည်းလိုက်ပြီး၊ ခဏမျှ ကြာပြီးနောက်တွင်မူ မိမိ၏ ညာဘက်လက် ဘေးကင်းလုံခြုံမှု ရှိမရှိကိုပင် ထည့်သွင်းစဉ်းစားခြင်း မပြုတော့ဘဲ... ၎င်းကြီးမားလှသော သစ်ပင်ကြီးထက်သို့ သူ၏ ခွန်အားရှိသမျှ အသုံးပြု၍ ပြင်းထန်စွာ ထိုးနှက်လိုက်တော့သည်။

သို့သော်လည်း သူ၏ လက်သီးချက် သစ်ပင်ကြီးထက်သို့ ကျရောက်သွားသည့်ခဏ၌ မမျှော်လင့်ထားသော အရာတစ်ခု ချက်ချင်း ဖြစ်ပျက်သွားခဲ့တော့သည်။

ဝူးးး ဒုန်း

"ဘာ... ဘာကြီးလဲဟ..." ယိုဟန်သည် မိမိ၏ အဆုတ်အတွင်းမှ ရှိသမျှ အားအင်များကို အသုံးပြု၍ အကျယ်လောင်ဆုံး အော်ဟစ်လိုက်မိသည်။ သူ၏ လက်သီးချက် သစ်ပင်ကြီးထက်သို့ ကျရောက်သွားသည့်ခဏ၌... ၎င်းသစ်ပင်ကြီးမှာ မျက်စိတစ်မှိတ်အတွင်း၌ပင် မီတာငါးရာကျော်ခန့်အထိ ပြင်းထန်စွာ လွင့်စင်ထွက်ခွာသွားခဲ့ရပြီး၊ လမ်းခရီးတစ်လျှောက်ရှိ အရာအားလုံးကိုပါ တစ်ခါတည်း ရိုက်ခွဲဖျက်ဆီးသွားခဲ့သဖြင့် ယိုဟန်၏ မျက်စိရှေ့မှောက်တွင် ဖြောင့်တန်းလှသော လမ်းကြောင်းကြီးတစ်ခု ချက်ချင်း ထွက်ပေါ်လာခဲ့ရတော့သည်။

ယိုဟန်သည် ဤအခြင်းအရာကို မြင်တွေ့လိုက်ရသဖြင့် အလွန်ပင် တုန်လှုပ်အံ့ဩသွားခဲ့ရပြီး... သူသည် မိမိ၏ ခန္ဓာကိုယ်အတွင်း၌ ဤကဲ့သို့သော ခွန်အားမျိုး ရှိနေလိမ့်မည်ဟု တစ်ခါမျှ မတွေးတောဖူးခဲ့ပါချေ။ အဘယ်ကြောင့်ဆိုသော် သူသည် ၎င်းကို တစ်ကြိမ်တစ်ခါမျှ မစမ်းသပ်ဖူးခဲ့သောကြောင့် ဖြစ်သော်လည်း... ၎င်းမှာ သူ ဘယ်သောအခါမှ မမျှော်လင့်ထားခဲ့ဖူးသော စွမ်းအားမျိုး ဖြစ်နေခဲ့သည်။

ယိုဟန်၏ အကြည့်များမှာ မိမိ၏ လက်ဖဝါးထက်သို့ ရောက်ရှိသွားခဲ့ရပြီး... သူ၏ လက်ဖဝါးမှာ တစ်စုံတစ်ခုမျှ ထိခိုက်ဒဏ်ရာရခြင်း မရှိဘဲ လုံးဝ အဆင်ပြေနေခဲ့သလို အတိတ်တုန်းက ဒဏ်ရာဟောင်းများမှာလည်း အကုန်လုံး ပြန်လည်ပျောက်ကင်းသွားခဲ့ပြီ ဖြစ်သဖြင့် သက်ပြင်းတစ်ချက်ချလိုက်မိသည်။

"ကဲ... အခုဆိုရင် လွန်ခဲ့တဲ့ ရက်အနည်းငယ်အတွင်းက ဒီဝိညာဉ်အာကာသငယ်ထဲမှာ ငါ ဘာတွေ လေ့လာခဲ့သလဲဆိုတာကို စမ်းသပ်ရမယ့် အချိန်ပဲ" ယိုဟန်က တီးတိုးရေရွတ်လိုက်မိရင်း... နောက်တစ်စက္ကန့်တွင် သူ၏ လက်ဖဝါးအတွင်း၌ နက်မှောင်လှသော ဓားတစ်စင်း ချက်ချင်း ထွက်ပေါ်လာခဲ့ပြန်သည်။

[ခြေလှမ်းတစ်ထောင် ဓားသိုင်းနည်းစနစ် - ပထမအဆင့်]

ယိုဟန်က တီးတိုးရေရွတ်လိုက်မိရင်း အသူရာ၏ ဓားရိုးကို ပိုမိုတင်းကျပ်စွာ ဆုပ်ကိုင်လိုက်ရာ... သူ၏ လက်ထဲရှိ ဓားသည် သူ၏ စကားလုံးများကို တုံ့ပြန်သည့်အလား နက်မှောင်လှသော မီးလျှံများနှင့်အတူ စတင်တောက်လောင်လာခဲ့ပြီး၊ မျက်စိတစ်မှိတ်အတွင်း၌ပင် ယိုဟန်သည် တစ်ချက်တည်းသော လှုပ်ရှားမှုဖြင့် ဓားချက်ပေါင်း သုံးဆယ်ကျော်ကို ဆက်တိုက်ဆင့်ကာ တိုက်ခိုက်လိုက်တော့သည်။ သူသည် လျှပ်စီးလက်သကဲ့သို့ လျင်မြန်လှသော အရှိန်နှုန်းများဖြင့် လှုပ်ရှားသွားလာနေခဲ့ခြင်း ဖြစ်သဖြင့်... သူ ဤဓားသိုင်းလှုပ်ရှားမှုများကို ပြုလုပ်နေသည့်အချိန်၌ ပတ်ဝန်းကျင်ရှိ အရာအားလုံးမှာ နှေးကွေးသွားခဲ့ရသကဲ့သို့ ခံစားလိုက်ရသည်။

မျက်စိတစ်မှိတ်အတွင်း၌ပင်... ကြီးမားလှသော သစ်ပင်ကြီးပေါင်း ထောင်သောင်းချီ၍ ဓားချက်ဖြင့် အပိုင်းပိုင်းပြတ်တောက်ကာ မြေပြင်ထက်သို့ ပြင်းထန်စွာ လဲကျသွားခဲ့ကြတော့သည်။ သူ၏ တစ်ချက်တည်းသော တိုက်ခိုက်မှုကြောင့် ပတ်ဝန်းကျင် မီတာရာချီသော ဧရိယာဝန်းကျင်တစ်ခုလုံးမှာ ချက်ချင်းပင် ကန္တာရပြင်ကြီးသဖွယ် ပြုန်းတီးသွားခဲ့ရပြီး... သူ၏ လမ်းကြောင်းပေါ်ရှိ အရာအားလုံး လုံးဝ ပျက်စီးဆဲလ်ပြားသွားခဲ့ရသည်။

သူသည် အသူရာကို အသုံးပြုနေသည့် အချိန်၌ သူ၏ မျက်ဝန်းအစုံအတွင်း၌ ရူးသွပ်မှု အရှိန်အဝါများကို အထင်အရှား မြင်တွေ့နေရ၏။ ခြေလှမ်းတစ်ထောင် ဓားသိုင်းနည်းစနစ်ကို အဆုံးတိုင် ပြသပြီးနောက်တွင်မူ ယိုဟန်သည် တည်ငြိမ်စွာဖြင့် ကောင်းကင်ယံထက်သို့ မော့ကြည့်လိုက်မိရင်း— "ဒါဟာဒီနေရာကနေ ထွက်ခွာရမယ့် အချိန်ပဲ..." ဟု တီးတိုးရေရွတ်လိုက်တော့သည်။