အခန်း (၄၆) - အမှန်တရား

"ဒီကို ပြန်ရောက်ရတာ တကယ်ကောင်းတာပဲ... နောက်ဆုံးတော့ ပင်ပန်းစရာကောင်းတဲ့ နေ့တစ်နေ့ ပြီးဆုံးသွားခဲ့ပြီ၊ အခု အမေ့ဆီ အရင်သွားတွေ့ပြီးရင် ဒီယာနဲ့အတူ အချိန်အနည်းငယ်လောက် ကုန်ဆုံးရမယ်... သူတို့နှစ်ယောက်စလုံး ငါ့အတွက် သေချာပေါက် စိုးရိမ်နေကြလိမ့်မယ်" လင်မျိုးနွယ်စုစံအိမ်ကြီး၏ ရှေ့မှောက်တွင် ရပ်နေရင်း ယိုဟန်က စိတ်ထဲမှ တီးတိုးတွေးတောလိုက်မိသည်။

လင်မျိုးနွယ်စုသို့ ရောက်ရှိလာသည်နှင့် သူ၏ အဖိုးဖြစ်သူမှာ သူ့ကို တစ်ဦးတည်း ထားရစ်ခဲ့ကာ ထွက်ခွာသွားခဲ့ပြီ ဖြစ်သည်။ သူသည် ထိုနေရာ၌ ရပ်နေရင်း စက္ကန့်ပိုင်းအတွင်း မိမိထံသို့ ကျရောက်လာခဲ့သည့် အမျိုးမျိုးသော အဖြစ်အပျက်များကို ပြန်လည်တွေးတောနေမိ၏။

သူသည် အသက်ကို ပြင်းပြင်းရှူသွင်းလိုက်ပြီးနောက် မိခင်ဖြစ်သူနှင့် တွေ့ဆုံရန်အတွက် သူမ၏ အဆောင်ဆီသို့ ဦးတည်သွားရန် ပြင်လိုက်သည်။

သို့သော်လည်း ရုတ်တရက်ဆိုသလို သူ ခြေလှမ်းစလှမ်းမည့်အချိန်၌ပင် သူ၏ မျက်နှာအမူအရာမှာ ချက်ချင်း မှောင်မှောင်မည်းမည်း ဖြစ်သွားခဲ့ရ၏။ အဘယ်ကြောင့်ဆိုသော် သူ၏ စိတ်အာရုံထဲတွင် သတိပေးချက် အသံတစ်ခု ထွက်ပေါ်လာခဲ့ခြင်းကြောင့် ဖြစ်သည်။

ဒင်

[သတ်ဖြတ်လိုသော အငွေ့အသက်ကို အာရုံခံမိပါသည်။ အရှင်သခင်သည် အန္တရာယ်နှင့် ရင်ဆိုင်နေရပါသည်]

[အန္တရာယ်အဆင့် - အလယ်အလတ်၊ တိုက်ခိုက်ခံရနိုင်ခြေ အလားအလာ ၂၀ ရာခိုင်နှုန်း ရှိပါသည်]

ထိုသတိပေးချက်ကို ကြားလိုက်ရသည့်အခါ ယိုဟန် ပြာပြာသလဲ ဖြစ်သွားခဲ့ရပြီး... သတ်ဖြတ်လိုသော အငွေ့အသက်များ မည်သည့်နေရာမှ ထွက်ပေါ်လာသည်ကို ရှာဖွေရန် ပတ်ဝန်းကျင်ကို ဟိုဟိုဒီဒီ လှာန်၍ ကြည့်ရှုလိုက်တော့သည်။

ထိုအတောအတွင်း—

လင်မျိုးနွယ်စု စံအိမ်နှင့် မလှမ်းမကမ်းရှိ လူသူအများအပြား ရှိနေသော လမ်းမထက်တွင် ဝတ်ရုံနက် ဝတ်ဆင်ထားသည့် အမျိုးသားတစ်ဦး မတ်တတ်ရပ်နေသည်ကို မြင်တွေ့နိုင်သည်။ သူသည် မိမိကိုယ်ကိုယ် သာမန်အရပ်သားတစ်ဦးကဲ့သို့ ရုပ်ဖျက်ထားခဲ့ခြင်း ဖြစ်ပြီး... သူကား ယိုဟန်ကို လုပ်ကြံရန် ရောက်ရှိနေသည့် ရာပြည့်အဆိပ်သင့်ချိုင့်ဝှမ်း မှ လုပ်ကြံသတ်ဖြတ်သူတစ်ဦးပင် ဖြစ်သည်။

သူသည် ယခင်က ယိုဟန်ကို တိုက်ခိုက်လုပ်ကြံရန် ကြိုးပမ်းခဲ့ဖူးပြီး ထိုတိုက်ခိုက်မှုမှာ အောင်မြင်ခဲ့သော်လည်း... တစ်စုံတစ်ရာသော အကြောင်းပြချက်ကြောင့် ယိုဟန်မှာ သေဒဏ်မှ လွတ်မြောက်ကာ အသက်ရှင်ကျန်ရစ်ခဲ့ခြင်း ဖြစ်သည်။

သူသည် ထိုသတင်းကို ကြားလိုက်ရသည့်အခါ မိမိနားကိုမိမိ မယုံကြည်နိုင်လောက်အောင် ဖြစ်သွားခဲ့ရပြီး နီကိုးလပ်စ် မျိုးနွယ်စု၏ စကားများကို သံသယဝင်မိခဲ့သော်လည်း... မိမိမျက်စိဖြင့် ကိုယ်တိုင်ကိုယ်ကျ အတည်ပြုရန်မှတစ်ပါး အခြားရွေးချယ်စရာ မရှိခဲ့ချေ။ ထို့ကြောင့် သူသည် စိတ်ထဲ၌ ရှိနေသော သံသယများကို အဖြေရှာရန် လင်မျိုးနွယ်စုကို တိတ်တဆိတ် စောင့်ကြည့်နေခဲ့ခြင်း ဖြစ်သည်။

သို့သော်လည်း အဘိုးအိုတစ်ဦးနှင့် လူငယ်တစ်ဦးတို့ ကောင်းကင်ယံထက်မှနေ၍ လင်မျိုးနွယ်စုဆီသို့ ပျံသန်းလာခဲ့ကြပြီး... ခဏအကြာတွင် စံအိမ်တော်၏ ရှေ့မှောက်သို့ သက်ဆင်းလာခဲ့ကြသည်ကို မြင်တွေ့လိုက်ရသည့်အခါ သူ မှင်တက်သွားခဲ့ရရှာသည်။ အဘယ်ကြောင့်ဆိုသော် ထိုလူငယ်ကို ခေါ်ဆောင်လာခဲ့သည့် အဘိုးအိုမှာ အခြားသူမဟုတ်ဘဲ လင်မျိုးနွယ်စု၏ အကြီးအကဲ 'လင်စုဝမ်' ဖြစ်နေခဲ့ပြီး... ထိုလူငယ်မှာမူ လင်မျိုးနွယ်စု၏ တစ်ဦးတည်းသော အမွေခံ ယိုဟန် ဖြစ်နေခဲ့ခြင်းကြောင့်ပင်။

သူ အသက်ရှင်လျက် ရှိနေသည်ကို မြင်လိုက်ရသည့်အခါ လုပ်ကြံသူ၏ မျက်နှာမှာ ချက်ချင်း ညိုမည်းသွားခဲ့ရပြီး... သူသည် တံတွေးကို အားယူမြိုချလိုက်မိရင်း မိမိကိုယ်ကိုယ် အိပ်မက်မက်နေခြင်း ဟုတ်မဟုတ် အတည်ပြုရန် ညာဘက်ပါးပြင်ကို ဆွဲဆိတ်လိုက်မိတော့သည်။ "အား... ငါ အိပ်မက်မက်နေတာ မဟုတ်ဘူး၊ ဒါ တကယ်ပဲပဲ... အဲဒီ နီကိုးစ်မျိုးနွယ်စုက ခွေးကောင်တွေ ပြောတာ တကယ်အမှန်ပဲ၊ ဒီကောင်က အခုထိ အသက်ရှင်နေသေးတာပဲ"

ယိုဟန်တစ်ယောက် သူ၏ အဖိုးဖြစ်သူနှင့်အတူ မြို့ထဲ၌ အေးအေးလူလူ လှည့်လည်သွားလာနေသည်ကို သူ သွေးပျက်မတတ် ကြည့်ရှုနေမိရင်း— "ဘာဖြစ်တာလဲ... သူက အသက်ရှင်နေရုံတင်မကဘဲ ဘာတစ်ခုမှ မဖြစ်ခဲ့ဖူးတဲ့အတိုင်း တကယ့်ကို ကျန်းကျန်းမာမာ ရှိနေပါလား" ဟု ထိုလူက စိတ်ထဲမှ တီးတိုးတွေးတောလိုက်မိသည်။

သို့သော်လည်း သူသည် မိမိ၏ တည်ရှိမှုကို အမိခံရမည် စိုးသောကြောင့် အတတ်နိုင်ဆုံး တည်ငြိမ်အောင် နေထိုင်နေခဲ့၏။ တကယ်လို့ သူသာ ယခုအချိန်၌ ရန်လိုသောအငွေ့အသက်များကို ထုတ်ဖော်ပြသလိုက်ပါက ချက်ချင်း ဖမ်းဆီးခံရမည် ဖြစ်သည်။

ဘာပဲပြောပြော ထိုအဘိုးအိုကြီးမှာ ယခုထက်ထိ ထိုနေရာ၌ ရှိနေသေးသည် မဟုတ်ပါလား။ သို့သော်လည်း နောက်တစ်ခဏ၌ အဘိုးအိုကြီးက ယိုဟန်ကို တစ်ဦးတည်း ထားရစ်ခဲ့ကာ ရုတ်ချည်း ပျောက်ကွယ်သွားသည်ကို မြင်လိုက်ရသည့်အခါတွင်မူ လုပ်ကြံသူ၏ မျက်နှာထက်တွင် ယုတ်မာကောက်ကျစ်သော အပြုံးတစ်ခု ထွက်ပေါ်လာခဲ့တော့သည်။

သူသည် ယိုဟန်တစ်ဦးတည်း ရှိနေသည်ကို မြင်လိုက်ရသဖြင့် သတ်ဖြတ်လိုသော အငွေ့အသက်များဖြင့် စိုက်ကြည့်လိုက်မိရာ... ဤသည်မှာ သူ့အတွက် တကယ့်ကို အဖိုးတန်လှသော ရွှေရောင်အခွင့်အရေးတစ်ရပ်ပင် ဖြစ်သည်။

'ပြီးခဲ့တဲ့အကြိမ်တုန်းကတော့ ဒီကောင်က သူ့ရဲ့ အသက်ကို ကယ်တင်ဖို့အတွက် လျှို့ဝှက်ရတနာ တစ်ခုခုကို အသုံးပြုသွားခဲ့တာ ဖြစ်ရမယ်... ဒါပေမဲ့ ဒီတစ်ကြိမ်မှာတော့ ငါ ဘာအမှားအယွင်းမှ မရှိစေဘဲ သူ့ကို သေသေချာချာ အပြတ်ရှင်းပစ်မယ်' ဟု သူက စိတ်ထဲမှ ကြံစည်နေခဲ့မိသော်လည်း... ယိုဟန်ကမူ မိမိ၏ အသက်အန္တရာယ် ကျရောက်နေပြီဖြစ်ကြောင်း ကြိုတင်သိရှိနေခဲ့သည်ကို သူ လုံးဝ သတိမပြုမိခဲ့ပါချေ။

ဒင်

[အန္တရာယ်အဆင့် တိုးမြင့်လာပါသည်၊ တိုက်ခိုက်ခံရနိုင်ခြေ အလားအလာ ၄၀ ရာခိုင်နှုန်းအထိ မြင့်တက်သွားခဲ့ပြီး... အရှင်သခင်၏ အသက်အန္တရာယ် စိုးရိမ်ရသော အခြေအနေသို့ ရောက်ရှိနေပါသည်]

'တောက်... အဲဒီခွေးကောင်က ဘယ်နေရာမှာလဲ' ယိုဟန်က စိတ်ထဲမှ ကျိန်ဆဲလိုက်မိပြီး... နောက်တစ်စက္ကန့်တွင်မူ ဘာအန္တရာယ်မှ မရင်ဆိုင်လိုတော့သဖြင့် မျိုးနွယ်စုစံအိမ်တွင်းသို့ ခြေလှမ်းများကို အမြန်ဆုံး သွက်လိုက်တော့သည်။

ယိုဟန်က စံအိမ်တွင်းသို့ အလျင်စလို ပြေးဝင်သွားသည်ကို မြင်လိုက်ရသည့်အခါ လုပ်ကြံသူသည် သူ၏ လှုပ်ရှားမှုများကို ရုတ်တရက် ရပ်တန့်လိုက်မိရင်း— "သူ ဘာဖြစ်သွားတာလဲ... ဘာဖြစ်လို့ ရုတ်တရက်ကြီး ထွက်ပြေးသွားရတာလဲ၊ သူ ငါ့ရဲ့ တည်ရှိမှုကို ရိပ်မိသွားတာလား... မဟုတ်နိုင်တာ၊ ဒီလိုမျိုး အမှိုက်ကောင်က ငါ့ရဲ့ အငွေ့အသက်ကို ဘယ်လိုလုပ် အာရုံခံမိမှာလဲ... သေချာပေါက် တခြားအကြောင်းပြချက် တစ်ခုခု ရှိရမယ်" ဟု စိတ်ထဲမှ တွေးတောလိုက်မိသည်။

ဒင်

[အန္တရာယ်အဆင့် လျော့ကျသွားပါသည်၊ တိုက်ခိုက်ခံရနိုင်ခြေ အလားအလာ ၀ ရာခိုင်နှုန်းသို့ ရောက်ရှိသွားခဲ့ပြီး... အရှင်သခင်၏ အသက်အန္တရာယ် ဘေးကင်းသွားပါပြီ]

ထိုစကားလုံးများကို ကြားလိုက်ရသည့်အခါမှ ယိုဟန်သည် သက်ပြင်းအရှည်ကြီးတစ်ချက်ကို ချနိုင်တော့သည်။ သူသည် နောက်ဆုံးတွင် လင်မျိုးနွယ်စု၏ စံအိမ်တွင်းသို့ အောင်အောင်မြင်မြင် ဝင်ရောက်နိုင်ခဲ့ပြီ ဖြစ်သည်။

"ဟူး... ငါတော့ သေရတော့မယ်လို့ ထင်နေတာ၊ တစ်စုံတစ်ယောက်က ငါ့ကို သေစေချင်လွန်းလို့ ရူးသွပ်နေတာပဲ... သေချာပေါက် နီကိုးလပ်စ်မျိုးနွယ်စုက ကောင် ဖြစ်ရမယ်၊ မျိုးနွယ်စုရဲ့ အပြင်ဘက်ကို ထွက်ရတာ တကယ့်ကို အန္တရာယ်များလွန်းတယ်" ယိုဟန်က အသက်ကို ဝဝရှူရင်း တွေးလိုက်မိ၏။

"ငါ အေးအေးလူလူ ရှင်သန်ချင်တယ်ဆိုရင်... အဲဒီ ဓားသိုင်းနည်းစနစ်ကို အမြန်ဆုံး လေ့ကျင့်မှဖြစ်တော့မယ်။ အဲဒီကောင်က မကြာခင်မှာ ထပ်ပြီး တိုက်ခိုက်လာနိုင်တာမို့လို့... ငါ့ကိုယ်ငါ ကြိုတင်ပြင်ဆင်ထားရမယ်" သူက တိုးညှင်းစွာ ရေရွတ်လိုက်သည်။

ထိုအတောအတွင်း—

အခန်းတစ်ခန်းတွင်း၌ အမျိုးသမီးတစ်ဦးသည် ဟိုဟိုဒီဒီ လျှောက်လှမ်းနေခဲ့ပြီး... သူမသည် တစ်စုံတစ်ခုကို စိုးရိမ်ပူပန်စွာ စဉ်းစားနေမိရင်း ဂနာမငြိမ်ဖြစ်နေခဲ့သည်။ 'အပြင်မှာ မှောင်တောင် မှောင်တော့မယ်... သူ အခုထိ ပြန်မလာသေးဘူး၊ ငါ တကယ့်ကို စိတ်ထဲမှာ အဆင်မပြေလှဘူး... အပြင်ကို ထွက်ပြီး သခင်မကြီး အာလီနာကို သွားမေးကြည့်ရမလား၊ သူမဆိုရင် တစ်ခုခု သိနေနိုင်တာပဲ' ဒီယာက စိတ်ထဲမှ တွေးတောနေမိခြင်း ဖြစ်သည်။

သူမသည် ယိုဟန်ကို စောင့်ဆိုင်းနေခဲ့ခြင်း ဖြစ်ပြီး အခုဆိုလျှင် ညနေစောင်းနေပြီ ဖြစ်သော်လည်း သူ၏ ထူးခြားသော သတင်းတစ်စုံတစ်ရာကို မကြားသိရသေးပါချေ။ သူမ မျက်လုံးများကို မှိတ်လိုက်သည့် အချိန်တိုင်း၌လည်း... လွန်ခဲ့သော ရက်က ဖြစ်ပျက်ခဲ့သည့် ဘေးအန္တရာယ် အခြေအနေများက သူမ၏ မျက်စိရှေ့မှောက်တွင် ပြန်လည်ထွက်ပေါ်နေခဲ့သည်။

"ငါ သခင်မကြီး အလီနာကိုပဲ သွားမေးတော့မယ်... မဟုတ်ရင်တော့ ငါ စိုးရိမ်စိတ်တွေနဲ့တင် သေရလိမ့်မယ်" သူမက စိတ်ထဲမှ ဆုံးဖြတ်ချက်ချလိုက်ရင်း... နောက်တစ်စက္ကန့်တွင်မူ အခန်းထဲမှနေ၍ အလျင်စလို ထွက်ခွာသွားခဲ့တော့သည်။

ထိုအတောအတွင်း—

"ဒီမျိုးနွယ်စုစံအိမ်က ဖုန်းမျိုးနွယ်စုနဲ့ နှိုင်းယှဉ်ရင် နှစ်ဆလောက် ပိုပြီး ကြီးမားကျယ်ပြန့်တာပဲနော်" ရှောင်ဖန်းက အာနာကို လှမ်းကြည့်ရင်း ထိုစကားကို ဆိုလိုက်သည်။

အာနာကမူ ခါးသီးစွာ ပြုံးလိုက်မိရင်း ရှောင်ဖန်းကို ကြည့်ကာ ဦးခေါင်းညိတ်ပြလိုက်ရုံသာ တတ်နိုင်ခဲ့၏။ အာနာသည် တစ်ချိန်တည်းမှာပင် စိတ်လှုပ်ရှားနေခဲ့ရသလို ဇဝေဇဝါလည်း ဖြစ်နေခဲ့ရရှာသည်။

လွန်ခဲ့သော မိနစ်အနည်းငယ်ခန့်က မည်သည့်အကြောင်းပြချက်ကြောင့်မှန်းမသိဘဲ ရှောင်ဖန်းက သူမထံသို့ ရုတ်တရက် ချဉ်းကပ်လာခဲ့ပြီး... လင်မျိုးနွယ်စု၏ စံအိမ်တော်ကြီးကို လိုက်လံပြသရန် တောင်းဆိုခဲ့ခြင်း ဖြစ်သည်။ အာနာအနေဖြင့် အခြားရွေးချယ်စရာ မရှိခဲ့သဖြင့် ဦးခေါင်းညိတ်ကာ သဘောတူခဲ့ရသော်လည်း... ရှောင်ဖန်း၏ ရည်ရွယ်ချက်က အခြားတစ်ခု ဖြစ်နေခဲ့ကြောင်း သူမ ကောင်းကောင်းသိရှိနေခဲ့သည်။ ရှောင်ဖုန်းသည် လင်မျိုးနွယ်စုကို လေ့လာကြည့်ရှုရန် စိတ်ဝင်စားနေခြင်း မဟုတ်ဘဲ... တစ်စုံတစ်ခုကို ကြံစည်နေခြင်း ဖြစ်ရမည်။

သို့သော်လည်း ရုတ်တရက်ဆိုသလို ရှောင်ဖန်း၏ အကြည့်များက ဝတ်ရုံပြာကို ဝတ်ဆင်ထားပြီး အလွန်ပင် လှပချောမောလှသော အမျိုးသမီးတစ်ဦးထံသို့ ရောက်ရှိသွားခဲ့သည်။ ထိုအမျိုးသမီးသည် စင်္ကြံလမ်းအတိုင်း တစ်စုံတစ်ခုသော အရေးကြီးသည့် လမ်းကြောင်းဆီသို့ အလျင်စလို ခြေလှမ်းလှမ်းလျက် သွားလာနေခဲ့ခြင်း ဖြစ်သည်။

"အဲဒီအမျိုးသမီးက ဘယ်သူလဲ... သူမကလည်း တို့လိုမျိုး မွေးနေ့ပွဲကို ဆင်နွှဲဖို့ ရောက်လာတဲ့ ဧည့်သည်တစ်ယောက်ပဲလား" ရှောင်ဖန်းက အာနာကို လှမ်းကြည့်ကာ မေးမြန်းလိုက်၏။

သူမသည် ထိုအမျိုးသမီးထံမှ တစ်စုံတစ်ခုသော အငွေ့အသက်ကို အာရုံခံမိနေခဲ့ခြင်း ဖြစ်ပြီး... သူမကိုယ်တိုင်က ကျင့်ကြံသူတစ်ဦး ဖြစ်သဖြင့် သူမ၏ အာရုံခံစားမှုများမှာ သာမန်ထက် သိပ်ကို ထက်မြက်လွန်းနေခဲ့သည်။

အာနာသည် စကားမဆိုမီ ခဏမျှ တုံ့ဆိုင်းသွားခဲ့ပြီးမှ—

"သူမက သခင်မလေး ဒီယာပါ... သခင်လေး ယိုဟန်ရဲ့ ကျင့်ကြံခြင်းအဖော် တစ်ဦးပေါ့ရှင်"