အခန်း (၂၉) - အရှက်မရှိသော မြေးဖြစ်သူ

အဘိုးအို လင်သည် ပြုံးလိုက်ရင်း တံတွေးတစ်ချက်ကို မြိုချလိုက်မိသည်။ "ရှင် သူ့အကြောင်း တစ်ခုခုကို ဖုံးကွယ်ထားတယ် မဟုတ်လား" အီဗလင်းက အေးစက်သော လေသံဖြင့် ဆိုလိုက်၏။ ထိုစကားများကို ကြားလိုက်ရသည့်အခါ သူသည် ဦးခေါင်းညိတ်ပြလိုက်ပြီး အသက်ကို ပြင်းပြင်းရှူသွင်းလိုက်ရင်း "ကျွန်တော့်ဘက်က သခင်မကြီး အီဗလင်းကို တမင်တကာ ဖုံးကွယ်ဖို့ ရည်ရွယ်ချက်မရှိပါဘူးဗျာ၊ သူက မဟာနယ်ပယ်တစ်ခုလုံးကို ကျော်လွန်ပြီး အဆင့်ချိုးဖျက် ကျင့်ကြံနိုင်ခဲ့တယ်ဆိုတာကို... ကျွန်တော် ဘယ်လိုပြောရမှန်း မသိခဲ့လို့ပါ" ဟု အဘိုးအို လင်၏ မျက်နှာထက်တွင် ခါးသီးသော အပြုံးတစ်ခု ထွက်ပေါ်လာခဲ့သည်။

"ဘာ..." အီဗလင်းသည် အံ့ဩလွန်းသဖြင့် ပါးစပ်အဟောင်းသား ဖြစ်သွားခဲ့ရ၏။ သူမ၏ တစ်ဘဝတာ သက်တမ်းအတွင်း ဤကဲ့သို့သော အရာမျိုးကို တစ်ခါမျှ မကြားဖူးခဲ့ချေ။ သူမသည် ကာလရှည်ကြာစွာ ရှင်သန်ခဲ့ပြီး ကောင်းကင်ဝိညာဉ်နယ်ပယ်၏ အထွတ်အထိပ်သို့ ရောက်ရှိရန်အတွက် နှစ်ပေါင်းရာချီသော ကြိုးပမ်းအားထုတ်မှုများနှင့် ကျင့်ကြံခြင်းလမ်းစဉ်ကို ဖြတ်သန်းခဲ့ရခြင်း ဖြစ်သည်။

သူမသည် ကောင်းကင်ဝိညာဉ်နယ်ပယ်၏ အထွတ်အထိပ်အဆင့်သို့ ရောက်ရှိခဲ့သော ဤနိုင်ငံ၏ လက်ချိုးရေတွက်နိုင်သည့် ကျင့်ကြံသူများထဲမှ တစ်ဦးဖြစ်ပြီး ဤနယ်ပယ်အတွင်း၌ပင် နှစ်ပေါင်းရာချီ၍ အဆင့်မတက်ဘဲ ပိတ်မိနေခဲ့ရခြင်း ဖြစ်၏။ သူမ၏ မျက်နှာလေးမှာ ဖြူလျော်သွားခဲ့ပြီး နှလုံးခုန်သံပင် ရပ်တန့်လုနီးပါး ဖြစ်သွားခဲ့ရကာ... တည်ငြိမ်အေးဆေးမှုများ စတင်ပျောက်ဆုံးလာခဲ့ရသည်။

"သူက ဘယ်လိုလုပ်ပြီး ဒီလိုမျိုး စွမ်းဆောင်ရည်အဆင့်ကို ရောက်ရှိနိုင်ရတာလဲ၊ ဒါက တကယ့်ကို မယုံနိုင်စရာပဲ... တကယ်လို့ ရှင်သာ ဒါကို တို့ကို စောစောက ပြောခဲ့ရင် တို့ ရှင့်ကို သတ်ပစ်မိမှာ သေချာတယ်" ဟု သူမက သူ့ကို ဆိုလိုက်သည်။

ထိုစကားများကို ကြားလိုက်ရသည့်အခါ အဘိုးအို၏ နဖူးထက်တွင် ချွေးစေးများ စီးကျလာခဲ့ရ၏။ သူမသည် နောက်ပြောင်နေခြင်း မဟုတ်ဘဲ တကယ်အလေးအနက် ပြောဆိုနေခြင်းဖြစ်ကြောင်း သူ သိရှိသည်။ တကယ်လို့ လွန်ခဲ့သည့် နာရီအနည်းငယ်ကသာ မိမိ၏မြေးဖြစ်သူ မဟာနယ်ပယ်ကို ကျော်လွန်၍ အဆင့်ချိုးဖျက်နိုင်ခဲ့ကြောင်း သူမကို ဖွင့်ဟခဲ့လျှင်... သူမသည် သူ့ကို တကယ်ပင် သတ်ပစ်လိမ့်မည် ဖြစ်၏။

အဘိုးအိုသည် ထိတ်လန့်တုန်လှုပ်စွာဖြင့် တံတွေးကို အားယူမြိုချလိုက်ရင်း ဆက်လက်၍— "သူက လွန်ခဲ့တဲ့ ရက်ပိုင်းလောက်အထိ အမှိုက်တစ်ယောက် ဖြစ်ခဲ့တာပါ၊ ဒါပေမဲ့ သူ့ကို မိုးကြိုးပစ်ခတ်ခဲ့ပြီးတဲ့နောက်မှာတော့ အရာအားလုံးက ပြောင်းလဲသွားခဲ့ပါတယ်။ ကံကောင်းထောက်မစွာနဲ့ပဲ သူ့အပေါ်မှာ ကြီးကြီးမားမား ထိခိုက်ပျက်စီးတာမျိုး မရှိခဲ့ပါဘူး... ပြီးတော့ အံ့ဩစရာ အကောင်းဆုံးအချက်က အဲဒီမိုးကြိုးပစ်ခတ်မှုက ကမ္ဘာမြေဝိညာဉ်နယ်ပယ် ကျင့်ကြံသူတစ်ယောက်ကိုတောင် လွယ်လွယ်ကူကူ သတ်ပစ်နိုင်လောက်အောင် ပြင်းထန်ခဲ့တာပါ။

ဒါပေမဲ့ ကျွန်တော် အံ့ဩသွားရတာက သူ့မှာ ဘာဒဏ်ရာမှ မရရှိခဲ့ဘဲ... အဲဒီမိုးကြိုးကြောင့်ပဲ သူက အခုလိုမျိုး စွမ်းဆောင်ရည်အဆင့်ကို ရောက်ရှိနိုင်ခဲ့တာလို့ ကျွန်တော် ထင်ပါတယ်" ဟု အဘိုးအိုက သူမကို ပြန်လည်ဖြေကြားလိုက်သည်။

"မိုးကြိုးပစ်ခတ်တာ ဟုတ်လား... ဒီလိုမျိုးအရာကို တစ်ခါမှမကြားဖူးပါဘူး၊ ကောင်းကင်ဘုံရဲ့ ကမောက်ကမဖြစ်မှု အကြောင်းကိုပဲ တို့ ကြားဖူးတာ... တစ်စုံတစ်ယောက်က ကောင်းကင်ဝိညာဉ်နယ်ပယ်ကို အဆင့်ချိုးဖျက်တော့မယ်ဆိုရင် ကောင်းကင်ဘုံရဲ့ ကမောက်ကမဖြစ်မှုကို ဖြတ်သန်းရတယ်၊ ဒါကတော့ တကယ့်ကို ထူးဆန်းတဲ့ အသစ်အဆန်းပဲ" သူမက ထိုစကားကို ဆိုလိုက်ရင်း အံ့ဩတုန်လှုပ်သွားခဲ့ရသည်။

သို့သော် သူမသည် အဘိုးအို၏ မျက်နှာထက်မှ အမူအရာတစ်ခုကို သတိပြုမိလိုက်ပြန်သဖြင့်— "ရှင် တစ်ခုခုကို ထပ်ပြီး ပြောချင်နေသေးတယ်... တို့ သူ့နဲ့ပတ်သက်တဲ့ အရာအားလုံးကို သိချင်တယ်၊ ဘာတစ်ခုကိုမှ ဖုံးကွယ်ထားဖို့ မကြိုးစားနဲ့။ ဒါက သိပ်ကို အရေးကြီးတဲ့ ကိစ္စပဲ... တကယ်လို့ တစ်စုံတစ်ယောက်ကသာ သူ့ရဲ့ တည်ရှိမှုကို သိသွားခဲ့ရင် အရာအားလုံးက အလွန်တရာ ရှုပ်ထွေးသွားလိမ့်မယ်၊ ဒါက နိုင်ငံတော်အတွက် သေရေးရှင်ရေး အခြေအနေမျိုး ဖြစ်သွားနိုင်တယ်ဆိုတာ ရှင် သတိပြုသင့်တယ်" ဟု အီဗလင်းက သူ့ကို ဆိုလိုက်သည်။

ထိုစကားများကို ကြားလိုက်ရသည့်အခါ အဘိုးအိုသည် အသက်ကို ပြင်းပြင်းရှူသွင်းလိုက်ရင်း "ဟုတ်ကဲ့... ကျွန်တော် နားလည်ပါတယ် သခင်မကြီး၊ သူ့နဲ့ပတ်သက်ပြီး သခင်မကြီးကို မပြောရသေးတဲ့ နောက်ထပ်အကြောင်းအရာတစ်ခု ရှိပါသေးတယ်။ သူ့မှာ အဖော်တစ်ယောက် ရှိနေတယ်... သူမရဲ့ နာမည်က ဒီယာ တဲ့။ လွန်ခဲ့တဲ့ ရက်ပိုင်းလောက်က သူက သူမကို နီကိုးလ်စ် မျိုးနွယ်စုရဲ့ လက်ထဲကနေ ကယ်တင်ခဲ့ပြီးတော့ အဖော်အဖြစ် သိမ်းပိုက်ခဲ့တာပါ။

ကျွန်တော် အဲဒီကလေးမကို ပထမဆုံး မြင်ဖူးတုန်းက သူမမှာ ကျင့်ကြံခြင်းလမ်းစဉ်အတွက် ဘာပါရမီအရည်အချင်းမှ မရှိခဲ့ပါဘူး... ဒါပေမဲ့ ဘယ်လိုမျိုး ဖြစ်သွားတယ်မသိရဘဲ တစ်ကြိမ်တည်း ကျင့်ကြံပြီးရုံနဲ့တင်... သူမက ခန္ဓာကိုယ်နိုးထခြင်းဝိညာဉ်နယ်ပယ် ရဲ့ စတုတ္ထအဆင့်ကို ရောက်ရှိသွားခဲ့ပါတယ်။ သူမကလည်း အဆင့်ငယ် လေးဆင့်အထိ အဆင့်ချိုးဖျက်နိုင်ခဲ့တာပါ" ဟု အဘိုးအိုက အီဗလင်းကို ဖွင့်ဟလိုက်လေသည်။

"သောက်ကျိုးနည်း... ကျင့်ကြံခြင်း ပါရမီမရှိတဲ့သူက ကျင့်ကြံခြင်း ပါရမီကို နိုးထစေခဲ့ရုံတင်မကဘဲ အဆင့်ငယ် လေးဆင့်အထိတောင် အဆင့်ချိုးဖျက်နိုင်ခဲ့တယ် ဟုတ်လား၊ ရှင် ရူးသွားပြီလား စုဝမ်" အီဗလင်းသည် နောက်ဆုံး၌ တည်ငြိမ်မှုများ လုံးဝဥဿုံ ပျက်ပြားသွားခဲ့ရပြီး ထိုစကားကို ဒေါသတကြီး အော်ဟစ်လိုက်မိတော့သည်။ သူမ၏ တစ်ကိုယ်လုံးတွင် စိမ့်ခနဲ အအေးဓာတ်တစ်ခု ဖြတ်သန်းသွားခဲ့ရပြီး ခန္ဓာကိုယ်မှာလည်း ခဏမျှ တောင့်တင်းသွားခဲ့ရ၏။

"ကျွန်တော် အဲဒီကလေးမရဲ့ ပါရမီ နိုးထလာတာကို မြင်လိုက်ရတုန်းကလည်း အခုလိုမျိုးပဲ ဖြစ်ခဲ့ရတာပါ... အဲဒါကြောင့်မို့လို့ပဲ ကျွန်တော့်အနေနဲ့ သခင်မကြီး အခုလိုမျိုး တုံ့ပြန်လာလိမ့်မယ်ဆိုတာ ကြိုတင်သိရှိနေခဲ့လို့ ဒီအသေးစိတ် အချက်အလက်တွေကို တမင်တကာ ဖုံးကွယ်ထားခဲ့မိတာပါ သခင်မကြီး" ဟု အဘိုးအိုက ပြန်လည်ဖြေကြားလိုက်သည်။

အီဗလင်းသည် သူမ၏ လှပသော မျက်လုံးအစုံကို ပိတ်လိုက်ပြီး အသက်ကို ပြင်းပြင်းရှူသွင်းကာ စိတ်ကို ပြန်လည်တည်ငြိမ်အောင် ကြိုးစားလိုက်သော်လည်း... သူမ၏ နှလုံးခုန်သံမှာမူ ပိုမိုမြန်ဆန်ကာ ကျယ်လောင်လာခဲ့ရသည်။ သူသည် သူမ၏ မျှော်လင့်ချက်အားလုံးကို ကျော်လွန်နေခဲ့ပြီ ဖြစ်၏။ သူမသည် လှပသော မျက်လုံးများကို ပြန်လည်ဖွင့်လှစ်လိုက်ပြီး အဘိုးအိုကို စိုက်ကြည့်လိုက်ရင်း— "သူ့ရဲ့ အဖော်က အသက် ဘယ်လောက်ရှိပြီလဲ... သူမရဲ့ နာမည်က ဒီယာ ဟုတ်တယ်မလား" ဟု အီဗလင်းက အဘိုးအိုကို လှမ်း၍ မေးမြန်းလိုက်သည်။

ထိုစကားများကို ကြားလိုက်ရသည့်အခါ အဘိုးအို၏ မျက်နှာလေးမှာ ခရမ်းချဉ်သီးတစ်လုံးကဲ့သို့ နီရဲတက်သွားခဲ့ရပြီး... ပါးစပ်ဖျားမှ စကားလုံးများပင် ထွက်မလာတော့ချေ။ သူ၏ မျက်နှာထက်မှ ဝေခွဲမရဖြစ်နေသော အမူအရာကို မြင်လိုက်ရသည့်အခါ သူမ စိတ်ရှုပ်ထွေးသွားခဲ့ရပြီး— "တစ်ခုခု မှားယွင်းနေလို့လား" ဟု ထပ်မံမေးမြန်းလိုက်ပြန်သည်။

"သူမက အသက် ၂၃ နှစ် ရှိပါပြီ... သူမက သူ့ထက် ပိုပြီး အသက်ကြီးပါတယ်" အဘိုးအိုက ထိတ်လန့်တုန်လှုပ်စွာဖြင့် ထိုစကားကို ဆိုလိုက်မိပြီး... မိမိ၏မြေးဖြစ်သူက အသက်ကြီးပိုင်း အမျိုးသမီးတစ်ဦးကို သိမ်းပိုက်လိုက်ခြင်းအပေါ် သူ အလွန်ပင် အရှက်ရနေမိတော့သည်။

"သူက အသက် ၂၃ နှစ်အရွယ် မိန်းကလေးတစ်ယောက်နဲ့ ကျင့်ကြံနေတာ ဟုတ်လား... ဘာတွေလဲဟယ်" ထိုစကားကို ကြားလိုက်ရသည့်အခါ သူမ၏ မျက်နှာလေးမှာ ရဲတက်သွားခဲ့ရ၏။ သူမ၏ မျက်နှာအမူအရာကို မြင်လိုက်ရသည့်အခါ အဘိုးအိုက ခါးသီးစွာ ပြုံးလိုက်မိပြီး... မိမိ၏မြေးဖြစ်သူအား အရှက်မရှိသောကောင်ဟူ၍ စိတ်ထဲမှနေ၍ အားရပါးရ ဆဲရေးတိုင်းထွာနေမိတော့သည်။

ထိုအတောအတွင်း—

ယိုဟန်သည် အာနား၊ ကာနာတို့နှင့်အတူ ရတနာသိုက်ခန်းမဆောင်အတွင်းသို့ ဝင်ရောက်လာခဲ့ပြီ ဖြစ်သည်။ ရတနာသိုက်ခန်းမဆောင်ကြီးကို မြင်လိုက်ရသည့်အခါ သူ အံ့ဩလွန်းသဖြင့် ပါးစပ်အဟောင်းသား ဖြစ်သွားခဲ့ရ၏။ ခန်းမဆောင်ကြီးမှာ ဘောလုံးကွင်းတစ်ကွင်းစာခန့် အလွန်တရာ ကြီးမားလှပြီး... ထိုနေရာတွင် ရာနှင့်ချီသော၊ သောင်းနှင့်ချီသော လက်နက်များ၊ ချပ်ဝတ်တန်ဆာများနှင့် ရတနာများကို မြင်တွေ့နေရသဖြင့် သူသည် တံတွေးကို အားယူ၍ မြိုချလိုက်မိတော့သည်။

"မင်းအနေနဲ့ ဒီရတနာသိုက်ခန်းမဆောင်ထဲကနေ ရတနာတစ်ခုတည်းကိုပဲ ရွေးချယ်ခွင့်ရှိတယ်" အာနားနှင့် ကာနာတို့က သူ့ကို ဆိုလိုက်သည်။

သူက ထိုအမျိုးသမီးနှစ်ဦးကို လှမ်းကြည့်လိုက်ပြီးနောက် ဦးခေါင်းကို အသာအယာ ညိတ်ပြလိုက်လေတော့သည်။