"ဟားဟား... သိပ်တော်တယ်၊ အဲဒီကောင်စုတ်ကတော့ ဘယ်တုန်းကမှ မျှော်လင့်မထားတဲ့ ရက်စက်လွန်းတဲ့ သေခြင်းတရားနဲ့ မရှုမလှ သေရတော့မှာပဲ"
နီကိုးလပ်စ် သည် မိမိရှေ့မှောက်တွင် မတ်တတ်ရပ်နေသော အမျိုးသားကို ကြည့်ကာ ဆိုလိုက်သည်။ ထိုသူမှာ ယိုဟန်ကို ပစ်မှတ်ထားကာ လုပ်ကြံတိုက်ခိုက်ခဲ့သည့် သူပင် ဖြစ်၏။
"သူ မကြာခင် သေရတော့မှာပါ အရှင်... ဒါပေမဲ့ အဲဒီအောက်တန်းစားမကတော့ ကျွန်တော့်ရဲ့ တိုက်ခိုက်မှုအောက်ကနေ လွတ်မြောက်သွားခဲ့တယ်"
သူက သွားကြိတ်လျက် နီကိုးလပ်စ်ကို ပြန်လည်ဖြေကြားလိုက်သည်။
"စိတ်မပူပါနဲ့... အဲဒါက ဘာမှအရေးမကြီးပါဘူး၊ လင်မျိုးနွယ်စုက ဒီကိစ္စအပေါ် ဘယ်လိုတုံ့ပြန်မလဲဆိုတာကိုပဲ ငါ စောင့်ကြည့်ချင်တာ"
နီကိုးလပ်စ်က ပြုံးလျက် ထိုလူ၏ရှေ့သို့ ငွေအိတ်တစ်အိတ် လွှင့်ပစ်ပေးလိုက်၏။
"ကျေးဇူးတင်ပါတယ် အရှင်... အရှင်က တကယ်ကို သဘောထားကြီးလှပါတယ်"
ထိုလူက နီကိုးလပ်စ်ကို ရိုသေစွာ ပြန်လည်ပြောကြားလိုက်သည်။
"လောလောဆယ်တော့ တစ်နေရာရာမှာ သွားပြီး ပုန်းကွယ်နေလိုက်ဦး။ သူတို့ရဲ့ တစ်ဦးတည်းသော ဆက်ခံသူက လုပ်ကြံသူတစ်ယောက်ရဲ့ လက်ချက်နဲ့ အသတ်ခံလိုက်ရပြီဆိုတော့ လင်မျိုးနွယ်စုကတော့ လှုပ်လှုပ်ရှားရှား ဖြစ်နေလောက်ပြီ"
နီကိုးလပ်စ်က မဲ့ပြုံးပြုံးရင်း မိမိကို စိုက်ကြည့်နေသော လုပ်ကြံသူကို သတိပေးလိုက်၏။
"ဟုတ်ကဲ့ပါ အရှင်"
သူက ပြန်လည်ဖြေကြားလိုက်ပြီး နောက်တစ်စက္ကန့်တွင် နီကိုးလပ်စ်တစ်ဦးတည်းကိုသာ ထိုနေရာ၌ ချန်ထားခဲ့ကာ ရုတ်တရက် ပျောက်ကွယ်သွားခဲ့တော့သည်။
"ဟားဟား... ငါ့ကို ဆန့်ကျင်ရဲတဲ့ အမှိုက်ကောင်မှန်သမျှ သေရမှာပဲ"
နီကိုးလပ်စ်သည် ကျေနပ်အားရစွာ ရယ်မောလိုက်ရင်း လက်သီးကို တင်းတင်းဆုပ်လိုက်မိသည်။
ထိုအတောအတွင်း...
"ယိုဟန်... ဒဏ်ရာရထားသေးတာမို့လို့ အနားယူလိုက်ပါဦး"
ဒီယာက ယိုဟန်၏ မျက်ဝန်းများကို စိုက်ကြည့်ရင်း ဆိုလိုက်ပြီး ကုတင်ထက်မှ ထိုင်နိုင်ရန် သူ့ကို အသာအယာ တွဲထူပေးလိုက်သည်။ သူမသည် သူ့ကို တွဲဖက်ကူညီရင်း အိပ်ဆောင်၏ ပြတင်းပေါက်နားသို့ ခေါ်ဆောင်လာခဲ့ရာ နောက်တစ်စက္ကန့်တွင်ပင် ပြင်းထန်သော လေညင်းတစ်ချက်က သူတို့ကို လာရောက်ဆီးကြိုလိုက်၏။
"ငါ အဆင်ပြေပါတယ် ဒီယာ... ငါ တစ်ခုခုကို ဆုံးဖြတ်လိုက်ပြီ"
သူက ဒီယာ့၏ ဖြူစင်လှပသော မျက်နှာလေးကို ကြည့်ကာ ပြုံးလျက် ဆိုလိုက်ရာ ထိုစကားကြောင့် ဒီယာ့မျက်နှာတွင် ဇဝေဇဝါ ဖြစ်သွားခဲ့ရသည်။
"ယိုဟန် ဘာကို ဆိုလိုတာလဲဟင်... ဘာကို ဆုံးဖြတ်လိုက်တာလဲ"
သူမက သူ၏လက်ကို မိမိ၏ လက်မောင်းများကြားတွင် ထွေးပိုက်ထားရင်း လှမ်းမေးလိုက်မိပြီး ပြာလွင်လှပသော ကောင်းကင်ယံကြီးဆီသို့ အကြည့်ကို ရွှေ့လိုက်သည်။
"ငါ နတ်ဘုရားပွင့်လန်းခြင်းဂိုဏ်းကို မသွားတော့ဘူး... လောလောဆယ်တော့ မသွားသေးဘူးပေါ့။ ဒီနေရာမှာပဲ ခေတ္တမျှ ဆက်ပြီး နေထိုင်သွားဖို့ ဆုံးဖြတ်လိုက်တယ်။ ငါ့ရဲ့ ဒီဆုံးဖြတ်ချက်ကြောင့် ခမည်းတော် ဒေါသထွက်ကောင်း ထွက်နိုင်ပေမဲ့... ငါ့နည်းငါ့ဟန်နဲ့ပဲ အရာရာကို အဆင်ပြေအောင် ကိုင်တွယ်ဖြေရှင်းသွားမှာပါ"
ယိုဟန်က မိမိ လုပ်ဆောင်လိုသည့် အစီအစဉ်များကို ဒီယာ့အား ရှင်းပြလိုက်သည်။
ထိုစကားကို ကြားရသောအခါ ဒီယာက ပြုံးလိုက်မိပြီး—
"ယိုဟန် ပျော်ရွှင်နေသရွေ့ ကျွန်မကတော့ ဝမ်းသာပါတယ်ရှင်။ သခင်ကြီး လင်စုကလည်း ယိုဟန်ရဲ့ ဆန္ဒကို နားလည်ပေးနိုင်လိမ့်မယ်လို့ မျှော်လင့်ပါတယ်"
"ကျေးဇူးတင်ပါတယ်... မင်း ငါ့ကို နားလည်ပေးတာ ဝမ်းသာရတယ်"
သူမကို ကြည့်ကာ ပြုံးလျက် ပြန်လည်ဖြေကြားလိုက်ရင်း သူမ၏ ခေါင်းကို အသာအယာ ပွတ်သပ်ပေးလိုက်သည်။ ထိုစကားကြောင့် သူမက ခေါင်းယမ်းပြလိုက်ပြီး သူ၏ မျက်ဝန်းများကို စိုက်ကြည့်ကာ—
"ကျွန်မလည်း ကိုယ်တိုင် ကျင့်ကြံခြင်း ကို စတင်ပြုလုပ်ဖို့ ဆုံးဖြတ်လိုက်ပြီ။ အဲဒီမြားချက်က ယိုဟန်ကို ထိမှန်သွားပြီး... ယိုဟန်ကို ဆုံးရှုံးရတော့မယ်လို့ ထင်မှတ်ခဲ့ရတဲ့ အချိန်တုန်းက ခံစားခဲ့ရတဲ့ သောကမျိုးကို နောက်ထပ် မခံစားချင်တော့ဘူး။ အဲဒါကြောင့် မိမိကိုယ်ကိုယ် ကာကွယ်နိုင်ဖို့နဲ့ မိမိချစ်ရတဲ့သူတွေကို စောင့်ရှောက်နိုင်ဖို့အတွက် လုံလောက်တဲ့ အင်အားရှိအောင် ကြိုးစားသွားဖို့ ဆုံးဖြတ်လိုက်တာပါ" ဟု သူမက မျက်နှာထက်တွင် အပြုံးလေးတစ်ခုဖြင့် ဆိုလိုက်၏။
"မင်းရဲ့ ဘဝမှာ မင်းလုပ်ချင်တဲ့ အရာကို ပြတ်ပြတ်သားသား ဆုံးဖြတ်နိုင်ခဲ့တာ မြင်ရတာ ဝမ်းသာပါတယ်၊ ဒါနဲ့... မင်းက ဘယ်လိုကျင့်ကြံခြင်း လမ်းစဉ်မျိုးကို လိုက်နာကျင့်သုံးသွားမှာလဲ" ဟု သူက မေးမြန်းလိုက်သည်။
ထိုစကားကြောင့် ဒီယာ့၏ မျက်နှာလေး ရဲရဲနီမြန်းသွားခဲ့ရပြီး ယိုဟန်ကို ဆွဲဆောင်မှုရှိသော အကြည့်တစ်ခုဖြင့် စိုက်ကြည့်ကာ—
"ကျွန်မ ဖိုမကျင့်စဉ်လမ်းစဉ် ကိုပဲ လိုက်နာဖို့ ဆုံးဖြတ်လိုက်တယ်။ ပြီးတော့ ယိုဟန်ကလည်း ကျွန်မရဲ့ ကျင့်ကြံဖော် ဖြစ်နေပြီဆိုတော့... ဖိုမကျင့်စဉ်ကို ပူးတွဲကျင့်ကြံဖို့ ပိုပြီးတော့ လွယ်ကူသွားတာပေါ့" ဟု သူမက ပြန်လည်ဖြေကြားလိုက်၏။
"ဒါဆိုရင်... ဒီနေ့ည ငါတို့အတူတူ အိပ်ကြတာပေါ့။ အမေက မင်းအတွက် ငါ့အိပ်ဆောင်ရဲ့ ဘေးကပ်လျက်အခန်းကို စီစဉ်ပေးထားတာဆိုတော့... ဘာကိုမှ စိုးရိမ်စရာမလိုတော့ဘူးလေ"
ယိုဟန်က သူမကို ကြည့်ကာ ပြုံးပြလိုက်ရာ ဒီယာကလည်း ပြုံးလျက် သူ၏ မျက်ဝန်းများကို စိုက်ကြည့်လိုက်သည်။
"ဟုတ်ကဲ့... ကျွန်မလည်း တစ်ယောက်တည်း မအိပ်ချင်ဘူး။ ယိုဟန်ရဲ့အနားမှာပဲ ရှိနေမှ... မဟုတ်ရင် ကျွန်မ စိတ်အေးအေးနဲ့ အိပ်ပျော်နိုင်မှာ မဟုတ်ဘူး"
ထိုစကားကို ဆိုနေရင်း သူမ၏ မျက်နှာလေး ဖြူလျော်သွားရှာ၏။
"ငါ့အတွက် စိတ်မပူပါနဲ့... ငါ လုံးဝ အဆင်ပြေပါတယ်။ အဲဒီလူယုတ်မာက ငါတို့ကို အလစ်အငိုက် တိုက်ခိုက်ခဲ့လို့သာ ငါ့ဘက်က တုံ့ပြန်ဖို့ အချိန်မရလိုက်တာ၊ ဒါပေမဲ့ ကံကောင်းထောက်မစွာနဲ့ ငါတို့နှစ်ယောက်စလုံး ဘေးကင်းခဲ့ကြတယ်မဟုတ်လား"
သူက ဆိုကာ မိမိ၏ မျက်နှာကို အသာအယာ ထိတွေ့ကိုင်တွယ်လိုက်မိသည်။
"ဒါပေမဲ့လည်း... ကျွန်မ ယိုဟန်ကို တစ်ယောက်တည်း မထားခဲ့ချင်ဘူး" ဟု သူမက ပြန်လည်ပြောကြားလိုက်၏။
ထိုအတောအတွင်း...
"အဲဒီကိစ္စနဲ့ ပတ်သက်ပြီး တစ်ခုခု စုံစမ်းသိရှိရပြီလား"
စုလင်သည် မိမိရှေ့မှောက်တွင် ဒူးထောက်နေသော မျက်နှာဖုံးစွတ်၊ ဝတ်ရုံနက်ဝတ်ဆင်ထားသည့် အမျိုးသားကို ကြည့်ကာ မေးမြန်းလိုက်သည်။
"ဟုတ်ကဲ့... သခင်ကြီး၊ သူက ချိုင့်ဝှမ်းရာပြည့်အဆိပ်ဂိုဏ်းက လုပ်ကြံသူတစ်ယောက် ဖြစ်ပါတယ်။ သခင်လေးယိုဟန်နဲ့အတူ သူတို့ရဲ့ လက်ထဲကနေ ထွက်ပြေးလွတ်မြောက်သွားခဲ့တဲ့ အဲဒီမိန်းကလေး ဒီယာ့ကိုပါ တစ်ပါတည်း သတ်ပစ်ဖို့အတွက် နီကိုးလပ်စ်က ငှားရမ်းခဲ့တာ ဖြစ်ပါတယ်။
သခင်လေးယိုဟန်က နီကိုးလ်မျိုးနွယ်စုရဲ့ လူတွေကို ရိုက်နှက်ဆုံးမခဲ့လို့ သူတို့က အငြိုးအတေး ထားရှိခဲ့ကြပြီး... မိမိရဲ့ ပစ်မှတ်ကို အဆိပ်နဲ့ ရက်ရက်စက်စက် သတ်ဖြတ်တတ်တာကြောင့် ကျော်ကြားလှတဲ့၊ သူအဆိပ်ခတ်ပြီးရင် ဘယ်သူမှ အသက်မရှင်နိုင်တော့တဲ့ အဆိုးဝါးဆုံး လုပ်ကြံသူတစ်ယောက်ကို ငှားရမ်းခဲ့ခြင်း ဖြစ်ပါတယ်ခင်ဗျာ"
ထိုသူက သခင်ကြီး စုလင်အား အကြောင်းအရာအားလုံးကို အသေးစိတ် ရှင်းလင်းတင်ပြလိုက်သည်။
"အဲဒီ တိရစ္ဆာန်ထက် ယုတ်ညံ့တဲ့ကောင်တွေ... တကယ်ကို အတင့်ရဲလွန်းနေကြပြီပဲ။ ငါ့ရဲ့သားကို သတ်ဖို့အတွက် လုပ်ကြံသူတစ်ယောက်ကို စေလွှတ်ရဲတဲ့အထိတောင်ပဲလား။ ငါ ချိုင့်ဝှမ်းရာပြည့်အဆိပ်ဂိုဏ်းတစ်ခုလုံးကို အမြစ်ပါမကျန် ချေမှုန်းဖျက်ဆီးပစ်မယ်။ ဟိုးယခင်တုန်းက ငါတို့ရဲ့ ဘိုးဘေးတွေက ချိုင့်ဝှမ်းရာပြည့်အဆိပ်ဂိုဏ်းကို အမြစ်ပြတ် ဖျက်ဆီးခြင်းကနေ လွတ်မြောက်အောင် ကူညီကယ်တင်ပေးခဲ့ဖူးတဲ့ ကျေးဇူးတရားတွေကို သူတို့ မေ့လျော့သွားကြပြီ ထင်တယ်။ အခုတော့ နီကိုးလပ်စ်ရဲ့ အကူအညီနဲ့ ငါတို့ကို ပြန်လည်ဆန့်ကျင်ဖို့ ကြံစည်နေကြတာပေါ့လေ"
မျိုးနွယ်စုခေါင်းဆောင် စုလင်သည် လက်သီးကို တင်းတင်းဆုပ်လိုက်မိရင်း သက်ပြင်းရှည်ကြီးတစ်ချက်ကို ချလိုက်မိသည်။
"ငါ့သား အသက်ရှင်ကျန်ရစ်သေးတယ်ဆိုတဲ့ သတင်းကို ငါတို့ မျိုးနွယ်စုဝန်းအတွင်းမှာပဲ လျှို့ဝှက်ထားရှိဖို့ သေချာအောင် လုပ်ပါ။ ပြီးတော့ ငါ့သားရဲ့ အိပ်ဆောင်ပတ်ပတ်လည်မှာ ကာကွယ်ရေးလုံခြုံရေးတွေကို ပိုမိုတိုးမြှင့်လိုက်ပါ"
စုလင်က မျက်နှာဖုံးစွတ်အမျိုးသားကို ကြည့်ကာ ပြတ်သားစွာ အမိန့်ပေးလိုက်ရာ လင်စု၏ နှုတ်မှ ထိုအမိန့်ကို ကြားရသောအခါ သူက ခေါင်းညိတ်ပြလိုက်ပြီးနောက် ထိုအခန်းအတွင်းမှ ရုတ်တရက် ပျောက်ကွယ်သွားခဲ့တော့သည်။
"မင်းက ဒီဝတ်ရုံပြာလေးနဲ့ တကယ်ကို လှပလွန်းပါတယ်"
ယိုဟန်က မိမိ၏ ကုတင်ထက်တွင် ဘေးချင်းယှဉ်လျက် လဲလျောင်းနေသော ဒီယာ့ကို ကြည့်ကာ ဆိုလိုက်ပြီးနောက် သူမကို နူးညံ့စွာ ပြုံးပြလိုက်သည်။
"ဟုတ်ကဲ့... သခင်မကြီး အလီနာက ကျွန်မအတွက် အဝတ်အစားအချို့ စီစဉ်ပေးခဲ့တာပါ။ ဒါက တကယ်ကို လှပပါတယ်"
ဒီယာက ပြန်လည်ဖြေကြားလိုက်ရင်း သဘောကျစွာ တဟားဟား ရယ်မောလိုက်မိပါတော့သည်။