အခန်း (၁၃) - ပထမဆုံး ကျင့်ကြံဖော်

"အဖေ... အခု တိုက်ခိုက်မှုရဲ့ နောက်ကွယ်မှာ 'ချိုင့်ဝှမ်းရာပြည့်အဆိပ်ဂိုဏ်း' ရှိနေတယ်လို့ ပြောချင်တာလား"

စုလင်သည် ကျယ်ဝန်းလှသော ခန်းမဆောင်ကြီး၏ အလယ်တွင် မိမိရှေ့မှောက်၌ ထိုင်နေသော ခမည်းတော် စုဝမ်ကို စိုက်ကြည့်ရင်း မေးမြန်းလိုက်သည်။ ခန်းမဆောင်ကြီး၏ ထောင့်စွန်းတိုင်းတွင် ကင်းစောင့်အနည်းငယ်သာ မတ်တတ်ရပ်နေကြပြီး သူတို့အားလုံးသည် စက်ရုပ်များကဲ့သို့ ဆတ်ခနဲ တောင့်တင်းစွာ ရပ်တန့်နေကြ၏။

"အေး ဟုတ်တယ်... ယိုဟန်က ကံကောင်းလို့သာ ချိုင့်ဝှမ်းရာပြည့်အဆိပ် မိပြီးတော့တောင် အသက်ရှင်ကျန်ရစ်ခဲ့တာ"

စုဝမ်က သူ၏ မျက်လုံးများကို ပိတ်လိုက်ရင်း ရှည်လျားဖြူစွတ်သော မုတ်ဆိတ်မွှေးများကို သုံးသပ်ကာ ဆိုလိုက်သည်။

ထိုစကားကို ကြားလိုက်ရသည့်အခါ လင်စုသည် သူ၏လက်သီးကို တင်းတင်းဆုပ်လိုက်မိပြီး—

"အဲဒီ တိရစ္ဆာန်ထက် ယုတ်ညံ့တဲ့ကောင်တွေ... ငါ သူတို့ရဲ့ ဂိုဏ်းတစ်ခုလုံးကို အမြစ်ပြတ် ဖျက်ဆီးပစ်မယ်။ သူတို့က ဘယ်လိုသတ္တိနဲ့ ငါ့သား ယိုဟန်ကို သတ်ဖို့ ကြိုးစားရဲတာလဲ။ သူတို့ဂိုဏ်း ဘေးဒုက္ခကြုံတွေ့တုန်းက ငါကိုယ်တိုင် တစ်ကြိမ် ကယ်တင်ပေးခဲ့ဖူးတဲ့ ကျေးဇူးတရားတွေကို သူတို့ မေ့လျော့သွားကြပြီ ထင်တယ်"

လင်စုသည် ဒေါသအမျက်ချောင်းချောင်း ထွက်လာခဲ့ပြီး သွားကြိတ်လျက် ဆိုလိုက်၏။

"စိတ်လိုက်မာန်ပါ မလုပ်ပါနဲ့ဦး... အရာရာက ထင်သလောက် မလွယ်ကူဘူး။ နီကိုးလပ်စ်နဲ့ နီကိုးလ်မျိုးနွယ်စုက ဒီကိစ္စအားလုံးရဲ့ နောက်ကွယ်မှာ ရှိနေတာ။ ချိုင့်ဝှမ်းရာပြည့်အဆိပ်ဂိုဏ်းက သူတို့ရဲ့ အစီအစဉ်ထဲက နယ်ရုပ်လေးတစ်ရုပ်မျှသာပဲ။ အဲဒီကိစ္စတွေကို ငါကိုယ်တိုင် ကိုင်တွယ်ဖြေရှင်းပေးမယ်၊ မင်း ဘာမှ စိုးရိမ်မနေနဲ့"

စုဝမ်က သားဖြစ်သူကို ပြန်လည်ဖြေကြားလိုက်ရင်း သူ၏ ပုခုံးကို အသာအယာ ပုတ်ပေးလိုက်သည်။

"ဒါပေမဲ့ အဖေ..."

စုလင် လက်သီးကို တင်းတင်းဆုပ်ထားဆဲ ဖြစ်သော်လည်း စုဝမ်၏ မျက်နှာထက်မှ ဒေါသတကြီး စိုက်ကြည့်လာသော အကြည့်များကို မြင်ရသောအခါ မိမိကိုယ်ကိုယ် ပြန်လည်ထိန်းချုပ်လိုက်ပြီး ခေါင်းညိတ်ပြလိုက်တော့သည်။

ထိုအတောအတွင်း...

ယိုဟန်နှင့် ဒီယာတို့သည် ကုတင်ထက်တွင် ပူးတွဲထိုင်နေကြပြီး ဒီယာ့၏ မျက်နှာလေးမှာ မှည့်ဝင်းနေသော ခရမ်းချဉ်သီးတစ်လုံးကဲ့သို့ ရဲရဲနီမြန်းနေခဲ့ကာ ယိုဟန်သည်လည်း ရှက်စနိုး ဖြစ်နေမိသည်။ လွန်ခဲ့သော မိနစ်ပိုင်းခန့်ကတင် သူတို့နှစ်ဦးစလုံး စိတ်အာရုံနောက်သို့ ပါးလျက် အရှိန်အဟုန်ဖြင့် နမ်းရှိုက်ခဲ့ကြသည်မဟုတ်ပါလား။

"ကျွန်မ တောင်းပန်ပါတယ်..."

ဒီယာက ခေါင်းကို ယိုဟန်ဘက်သို့ အသာအယာ စောင်းလိုက်ရင်း ထိုစကားလုံးများကို ဆိုလိုက်ရာ သူမ၏ စကားကြောင့် သူက ပြုံးပြလိုက်ပြီး—

"ဒါက စိတ်အာရုံနောက်ကို ပါသွားလို့ ဖြစ်ပျက်ခဲ့တာပဲလေ။ ဒါပေမဲ့ ငါ အမှန်အတိုင်း ပြောရရင်... ငါ အဲဒီအတွက် စိုးစဉ်းမျှ နောင်တမရပါဘူး" ဟု သူမကို ပြန်လည်ဖြေကြားလိုက်၏။

ထိုစကားကို ကြားရသောအခါ သူမက ခါးသီးစွာ ပြုံးလိုက်မိပြီး—

"ဒါပေမဲ့ ကျွန်မက သာမန် အရပ်သူတစ်ယောက်ပဲဥစ္စာ... အဲဒါကြောင့် ယိုဟန်က ကျွန်မရဲ့ ထိတွေ့မှုကို ခံလိုက်ရတဲ့အတွက် နောင်တရနေလိမ့်မယ်လို့ ထင်နေမိတာ"

သူမက သူ၏ ခန့်ညားလှသော မျက်နှာလေးကို စိုက်ကြည့်ရင်း ဆိုရှာသည်။

"ဟူး... ငါ မင်းနဲ့အတူ ရှိနေရတဲ့အတွက် ဘယ်တော့မှ နောင်တရမှာ မဟုတ်ပါဘူး"

သူက သူမ၏ ခေါင်းကို အသာအယာ ပွတ်သပ်ပေးလိုက်ပြီး နောက်တစ်စက္ကန့်တွင် သူ၏ နူးညံ့သော လက်ချောင်းလေးများဖြင့် သူမ၏ ပန်းသွေးရောင် နှုတ်ခမ်းလွှာလေးကို ထပ်မံ၍ အသာအယာ ထိတွေ့ကိုင်တွယ်လိုက်ပြန်သည်။

နောက်တစ်စက္ကန့်တွင်... သူ၏ ခန္ဓာကိုယ်သည် သူမ၏ ခန္ဓာကိုယ်အနားသို့ ဖြည်းညှင်းစွာ ချဉ်းကပ်လာခဲ့သည်။ ယခုမူ သူသည် သူမနှင့် အလွန်အမင်း နီးကပ်နေခဲ့ပြီ ဖြစ်ရာ သူမသည် သူ၏ ယောက်ျားပီသသော အနံ့အသက်များကို ရရှိနေရပြီး သူမ၏ အသားအရေကို လာရောက်ထိတွေ့နေသော သူ၏ နွေးထွေးသည့် အသက်ရှူသံများကို ခံစားနေရကာ မိမိ၏ နှလုံးခုန်သံနှင့်အတူ ထပ်တူကျစွာ တုန်ခါနေသော သူ၏ နှလုံးခုန်သံများကိုပါ ကြားနေရတော့သည်။

နောက်တစ်စက္ကန့်တွင်မူ... သူတို့၏ နှုတ်ခမ်းအစုံမှာ ထပ်မံ၍ ဆုံစည်းသွားခဲ့ကြပြန်သည်။ ခေတ္တမျှ ကြာပြီးနောက် ယိုဟန်က သူမ၏ ခေါင်းကို အသာအယာ ပွတ်သပ်ပေးလိုက်ရင်း—

"တွေ့လား... ငါ မင်းကို သာမန်အရပ်သူတစ်ယောက်လို သဘောမထားပါဘူး၊ ငါ မင်းနဲ့အတူ ရှိနေရတာကို နှစ်သက်တယ်" ဟု သူမ၏ ပန်းသွေးရောင် နှုတ်ခမ်းလွှာလေးကို ထိတွေ့ကိုင်တွယ်ရင်း ပြန်လည်ဖြေကြားလိုက်၏။

ဒီယာ့၏ နှလုံးခုန်သံများမှာ ပိုမိုမြန်ဆန်ပြီး ပြင်းထန်လာခဲ့ရသည်။ သူမ၏ ခန္ဓာကိုယ်အတွင်း၌လည်း အေးမြသော စွမ်းအင်လှိုင်းတစ်ခု စီးဆင်းသွားသလို ခံစားလိုက်ရ၏။

ထိုအတောအတွင်း...

ဒီယာနှင့် ယိုဟန်တို့သည် မိမိတို့ အိပ်ဆောင်တံခါးကို လာရောက်ခေါက်သည့် အသံကို ကြားလိုက်ရသဖြင့် နောက်တစ်စက္ကန့်တွင် အချင်းချင်း အမြန်ဆုံး ခွာလိုက်ကြသည်။ ထို့နောက် ဒီယာက တံခါးကို သွားရောက်ဖွင့်လှစ်ပေးလိုက်ရာ တံခါးချပ် ပွင့်သွားသည့် တစ်စက္ကန့်တွင် သူမ အံ့အားသင့်သွားခဲ့ရ၏။ အဘယ်ကြောင့်ဆိုသော် ယိုဟန်၏ အိပ်ဆောင်ပြင်ပတွင် သခင်မကြီး အလီနာ မတ်တတ်ရပ်နေသောကြောင့်ပင်။

"သခင်မကြီး..."

ဒီယာက သူမကို အရိုအသေပြု ဦးညွှတ်လိုက်ရာ ဒီယာ ဤကဲ့သို့ ပြုမူသည်ကို မြင်ရသော အလီနာက သဘောကျစွာ ရယ်မောလိုက်မိပြီး သူမ၏ ခေါင်းကို အသာအယာ ပွတ်သပ်ပေးလိုက်သည်။

"ငါ့သားလေး ဘယ်လိုနေသေးလဲ... သူ သက်သာရဲ့လား"

အလီနာက ဒီယာကို လှမ်းကြည့်ကာ မေးမြန်းလိုက်၏။

"ဟုတ်ကဲ့... သခင်လေးယိုဟန် အဆင်ပြေပါတယ်၊ သူ သတိပြန်လည်ရရှိနေပါပြီ"

ဒီယာက ပြုံးလျက် ပြန်လည်ဖြေကြားလိုက်ပြီး သခင်မကြီး အလီနာကို အခန်းတွင်းသို့ ပင့်ဖိတ်လိုက်သည်။

"အမေ..."

သူက အလီနာကို ကြည့်ကာ ဆိုလိုက်ရာ ယိုဟန်ကို မြင်လိုက်ရသော အလီနာသည် သူ့ကို ဖက်လဲတကင်း ပွေ့ဖက်လိုက်မိပြီး ယိုဟန်၏ ခေါင်းကို အသာအယာ ပွတ်သပ်ပေးတော့သည်။

"ငါ့သားလေး... အမေ မင်းကို ဆုံးရှုံးရတော့မယ်လို့ ထင်နေမိတာ"

သူမက ယိုဟန်ကို ပြန်လည်ပြောကြားရင်း သူမ၏ နက်ပြာရောင် မျက်ဝန်းအစုံမှ မျက်ရည်များ တလိမ့်လိမ့် စီးကျလာပြန်သည်။

"အမေ... ကျွန်တော် အဆင်ပြေပါတယ်၊ ကျွန်တော့်ကြောင့် အမေ စိုးရိမ်သွားရတဲ့အတွက် တောင်းပန်ပါတယ်ဗျာ"

သူက မိခင်ဖြစ်သူ၏ မျက်ရည်များကို အသာအယာ သုတ်ပေးလိုက်ပြီး အလီနာ၏ နဖူးပြင်ကို နူးညံ့စွာ နမ်းရှိုက်လိုက်၏။

အလီနာက ပြုံးလျက် ခေါင်းညိတ်ပြလိုက်ပြီးနောက် ယိုဟန်၏ ဘေးတွင် မတ်တတ်ရပ်နေသော ဒီယာ့ထံသို့ အကြည့်ကို ရွှေ့လိုက်ကာ—

"ဒီနားကို လာပြီး ထိုင်ပါဦး ကလေးမရယ်... ငါ မင်းကို တစ်ခုခု မေးချင်လို့ပါ"

အလီနာက ဒီယာ့ကို ကြည့်ကာ ဆိုလိုက်ရာ ထိုစကားကို ကြားရသောအခါ သူမက ခေါင်းညိတ်ပြလိုက်ပြီး အလီနာ၏ ဘေးတွင် ဝင်ထိုင်လိုက်သည်။ ထို့နောက် နောက်တစ်စက္ကန့်တွင် သူမသည် ယိုဟန်ထံသို့ လှမ်းကြည့်လိုက်မိ၏။

"ယိုဟန်... သူမက တကယ်ကို မိန်းကလေးကောင်းတစ်ယောက်ပဲ၊ မင်း အဲဒီလူယုတ်မာတွေရဲ့ တိုက်ခိုက်ခြင်းကို ခံရတုန်းက သူမက မင်းအတွက် တကယ်ကို စိုးရိမ်ပူပန်နေခဲ့တာ။ မင်း ဘာဖြစ်လို့ ဒီယာ့ကို မင်းရဲ့ ကျင့်ကြံဖော် အဖြစ် မခန့်အပ်လိုက်တာလဲ။ အဲဒီလိုဆိုရင် ဘယ်သူမှ သူမကို မလေးမစား ကြည့်ရဲကြတော့မှာ မဟုတ်ဘူး၊ မင်းရဲ့ ကျင့်ကြံဖော် ဖြစ်လာတာနဲ့အမျှ သူမလည်း ဘေးကင်းလုံခြုံသွားလိမ့်မယ်။ ပြီးတော့ မင်းမှာလည်း အခုထက်ထိ ဘယ်လိုကျင့်ကြံဖော်မှ မရှိသေးဘူးမဟုတ်လား"

အလီနာက လေကို ဝဝရှူသွင်းလိုက်ရင်း ယိုဟန်ကို စိုက်ကြည့်ကာ ဆိုလိုက်သည်။

ထိုစကားကို ကြားလိုက်ရသည့်အခါ ဒီယာ တစ်ယောက် ဆွံ့အမှင်သက်သွားခဲ့ရ၏။ လင်မျိုးနွယ်စု၏ ဆက်ခံသူတစ်ဦး၏ ကျင့်ကြံဖော် ဖြစ်လာရခြင်းဟူသည် အလွယ်တကူ ရရှိနိုင်သော အောင်မြင်မှုမျိုး မဟုတ်ချေ။ သို့သော် သူမ၏ မျက်နှာလေး ချက်ချင်းပင် ဖြူလျော်သွားခဲ့ရပြန်သည်၊ အဘယ်ကြောင့်ဆိုသော် သူမသည် မည်သည့်ဂိုဏ်း၊ မည်သည့် ကျော်ကြားလှသော မျိုးနွယ်စုဝင်မျှ မဟုတ်သဖြင့် ယိုဟန်အနေဖြင့် မိမိကဲ့သို့သော မိန်းကလေးကို ဘာဖြစ်လို့ ကျင့်ကြံဖော်အဖြစ် ခန့်အပ်ရန် စိတ်ကူးပါ့မလဲဟု တွေးတောမိသောကြောင့် ဖြစ်၏။

"ဟုတ်ကဲ့ အမေ... ကျွန်တော့်ဘက်ကတော့ အဲဒါကို ဘယ်လိုမှ သဘောမတူစရာ မရှိပါဘူး"

နောက်တစ်စက္ကန့်တွင် ယိုဟန်၏ နှုတ်မှ ထွက်ပေါ်လာသော ထိုစကားလုံးများကြောင့် သူမသည် သူ့ကို အံ့အားသင့်စွာ လှမ်းကြည့်လိုက်မိရာ မိမိကို ကြည့်ပြီး ပြုံးနေသော ယိုဟန်ကို တွေ့မြင်လိုက်ရသဖြင့် နောက်တစ်စက္ကန့်တွင် သူမ၏ မျက်ဝန်းအစုံမှာ မျက်ရည်များဖြင့် ဝေစီသွားခဲ့ရတော့သည်။ အခြားတစ်ဖက်တွင်မူ အလီနာသည် ယိုဟန်၏ တုံ့ပြန်မှုကို ကြားရသဖြင့် ကျေနပ်စွာ ပြုံးလိုက်မိ၏။

"သူမကို သေချာ ဂရုစိုက်ပေးလိုက်ပါဦး"

သူမက ယိုဟန်၏ ခေါင်းကို အသာအယာ ပွတ်သပ်ပေးလိုက်ပြီး ဒီယာ့ထံသို့ အကြည့်ကို ပြန်လည်ရွှေ့လိုက်သည်။

"အခုကစပြီး မင်းက လင်မျိုးနွယ်စုရဲ့ အဖွဲ့ဝင်တစ်ယောက် ဖြစ်သွားပြီ... ပြီးတော့ ယိုဟန်ရဲ့ ပထမဆုံး ကျင့်ကြံဖော်လည်း ဖြစ်သွားပြီပေါ့။ ငါ့သားက မင်းကို ရွေးချယ်ခဲ့တာမို့လို့ မင်း တကယ်ကို ကံကောင်းလှပါတယ်"

အလီနာက ပြုံးလျက် ဆိုလိုက်ရင်း သူမ၏ ဟင်းလင်းပြင်လက်စွပ် ထဲမှ လက်စွပ်တစ်ကွင်းကို ထုတ်ယူကာ ဒီယာ့ထံသို့ ပေးအပ်လိုက်သည်။

"ဒါက အခုကစပြီး မင်းက ငါတို့ရဲ့ လူတစ်ယောက် ဖြစ်သွားပြီဆိုတဲ့ သက်သေပဲ"

အလီနာက ဒီယာ့ကို ပြန်လည်ပြောကြားလိုက်ရင်း ထိုလက်စွပ်ကို သူမ၏ လက်ချောင်းလေးထဲသို့ စွပ်ပေးလိုက်၏။

"ကျွန်မ... သခင်လေးကို ကျွန်မရဲ့ နှလုံးသားတစ်ခုလုံးနဲ့ စစ်မှန်စွာ အလုပ်အကျွေးပြုပါ့မယ်"

ဒီယာက အလီနာ၏ မျက်ဝန်းများကို စိုက်ကြည့်ရင်း ဆိုလိုက်ရာ ထိုစကားကို ကြားရသော အလီနာက ကျေနပ်စွာ ပြုံးလိုက်မိသည်။

"အေးပေါ့... မင်းက ယိုဟန်အတွက် တကယ်ကို ကောင်းမွန်တဲ့ ရွေးချယ်မှုတစ်ခုပါပဲ"

သူမက သူမကို ပြန်လည်ပြောကြားလိုက်ပြီး မိနစ်အနည်းငယ် ကြာပြီးနောက် ထိုလူသားနှစ်ဦးစလုံးကိုသာ ချန်ထားခဲ့ကာ အခန်းထဲမှ ထွက်ခွာသွားခဲ့တော့သည်။

"မင်း ပျော်ရဲ့လား... မင်းက သာမန်အရပ်သူတစ်ယောက် မဟုတ်တော့ဘူး၊ အခုကစပြီး မင်းက ငါ့ရဲ့ ကျင့်ကြံဖော် ဖြစ်သွားပြီလေ"

သူက ပြုံးလျက် ဒီယာ့၏ ညာဘက်ပါးပြင်လေးကို ဖွဖွလေး ထိတွေ့ကိုင်တွယ်ကာ ပြန်လည်ပြောကြားလိုက်သည်။

"ဒီနေ့ ယိုဟန် ကျွန်မအပေါ် ထားရှိပေးခဲ့တဲ့ ကျေးဇူးတရားတွေကို ကျွန်မ ဘယ်တော့မှ မေ့မှာ မဟုတ်ပါဘူး။ ကျွန်မ တကယ်ကို ပျော်ရွှင်မိပါတယ်။ ယိုဟန်က ကျွန်မကို အဲဒီလူယုတ်မာတွေရဲ့ လက်ထဲက ကယ်တင်ပေးခဲ့ရုံတင်မကဘူး... မိမိရဲ့ မျိုးနွယ်စုထဲကိုပါ သွတ်သွင်းပေးခဲ့တာ။ ယိုဟန်အပေါ် ကျွန်မ အလွန်ပဲ ကျေးဇူးတင်မိပါတယ်"

ဒီယာ့၏ မျက်နှာထက်တွင် တောက်ပသော အပြုံးကြီးတစ်ခု ပေါ်ထွက်လာခဲ့ပြီး သူ့ကို တင်းတင်းကြပ်ကြပ် ပွေ့ဖက်လိုက်တော့သည်။

[ဂုဏ်ယူပါသည် အရှင်... သင်၏ ပထမဆုံး ကျင့်ကြံဖော်ကို အောင်မြင်စွာ ရရှိခဲ့ပြီ ဖြစ်ပါသည်]

[အခြေအနေ အညွှန်းကိန်းအားလုံး +၂၀၀]

အမည် - လင်ယိုဟန်

ကျင့်ကြံခြင်းအဆင့် - ခန္ဓာကိုယ်နိုးထခြင်းနယ်ပယ် စတုတ္ထအဆင့်

ကျင့်ကြံခြင်းအမျိုးအစား - ဖိုမပူးတွဲကျင့်ကြံသူ / ချီကျင့်ကြံသူ

အမွေအနှစ် - မရှိပါ

သွေးမျိုးဆက် - မရှိပါ

အရှိန်နှုန်း - ၂၆၀

ခံနိုင်ရည်စွမ်းအား - ၂၀၀

ဆွဲဆောင်မှုစွမ်းအား - ၂၅၀

ခန္ဓာကိုယ်ကြံ့ခိုင်မှုစွမ်းအား - ၂၈၀

ပိုင်ဆိုင်မှုအချိုးအစား - ၁/၅