အပိုင်း (၃၉) လဝန်းအောက်က လျှို့ဝှက်ဆန်းကြယ်သူ

"ဝိုး... ကျုံးကလေးရေ... ဒီနေ့ ပွဲကတော့ တကယ့်ကို အလန်းစားပဲဟေ့။ မနက်ဖြန်လည်း ထပ်လာကြစို့နော်။ ငါ မင်းနဲ့အတူ နှစ်ယောက်တွဲပွဲစဉ်တွေ တွဲတိုက်ချင်တယ်"

ပြောစရာပင် မလိုတော့ချေ။ ဤမျှအထိ တိုက်ခိုက်လိုစိတ် ပြင်းထန်လွန်းလှသောသူမှာ ထိုအနှစ်တစ်သိန်းသက်တမ်းရှိ ယုန်မလေး ရှောင်ဝူမှတစ်ပါး အခြားသူ မရှိနိုင်ပေ။

"အေးပါ... ငါသိပါတယ်" ကျူကျုံးက သက်ပြင်းတိုးတိုးချရင်း မတတ်သာသလို ပြန်ထူးလိုက်သည်။

ကျူကျုံးတို့ သူငယ်ချင်းသုံးဦးသည် ဆော့တိုမြို့တော်၏ ဝိညာဉ်တိုက်ခိုက်ရေးကွင်းကြီးအတွင်းသို့ ဝင်ရောက်ပြီးသည်နှင့် တစ်ပြိုင်နက် ဝိညာဉ်အဆင့်ပြိုင်ပွဲအတွက် ချက်ချင်းပင် စာရင်းပေးသွင်းခဲ့ကြသည်။

ရဲ့လင်လင်မှာ အထောက်အကူပြုအမျိုးအစား ဝိညာဉ်ဆရာသခင်တစ်ဦး ဖြစ်ခြင်းကြောင့် ကျူကျုံးသည် တစ်ဦးချင်းပွဲစဉ်များတွင်သာမက သူမနှင့်အတူ ‘ကြိုးကြာပြာမောင်နှံ’ဟူသောအမည်ဖြင့် အထူးနှစ်ယောက်တွဲအဖွဲ့ ဖွဲ့စည်းကာ ပြိုင်ပွဲဝင်ခဲ့ခြင်း ဖြစ်သည်။

တစ်ဦးချင်းပွဲစဉ်တွင် ကျူကျုံး၏ပြိုင်ဘက်မှာ ‘ဝက်ဝံနက်’ သားရဲဝိညာဉ်ကို ပိုင်ဆိုင်ထားသည့် အဆင့် ၃၅ ရှိသော ဝိညာဉ်အကြီးအကဲတစ်ဦးဖြစ်ပြီး သူ၏ဝိညာဉ်ကွင်းများမှာ အဖြူတစ်ကွင်းနှင့် အဝါနှစ်ကွင်း ဖြစ်သည်။ ရလဒ်ကား မြင်သာထင်သာ ရှိလွန်းလှ၏။ အပြန်အလှန် အကွက်အနည်းငယ် ဖလှယ်ပြီးနောက် ကျူကျုံးသည် သူ၏မီးပြင်းအဆိပ် သို့မဟုတ် အပူရှိန်ပြင်းပြင်းများကိုပင် ထုတ်သုံးရန်မလိုဘဲ ပထမဝိညာဉ်စွမ်းရည်ကို ထုတ်ဖော်ကာ ထိုဝက်ဝံကြီးကို ကောက်ညှင်းထုပ်ကြီးတစ်ထုပ်အလား အမိအရ တုတ်နှောင်ကာ အောင်ပွဲခံလိုက်သည်။

ထိုသို့ အချုပ်အနှောင်ခံထားရစဉ်အတွင်း ဝက်ဝံနက်ဝိညာဉ်အကြီးအကဲသည် သူ၏ခွန်အားကြီးမားမှုကို အားကိုး၍ ‘အပြာရောင်ငွေဧကရာဇ်’ နွယ်ရှင်များကို ရုန်းကန်ဖြတ်တောက်ရန် ကြိုးစားခဲ့သေးသည်။

သို့သော် ကျူကျုံး၏ဝိညာဉ်မှာ သာမန်မျှမဟုတ်ဘဲ အပင်အမျိုးအစားဝိညာဉ်များထဲတွင် အားအကောင်းဆုံးဟု သတ်မှတ်ရမည့် ‘အပြာရောင်ငွေဧကရာဇ်’ ဖြစ်နေသည်ကို မမေ့သင့်ချေ။ ၎င်းသည် အဆမတန် ခိုင်မာကျစ်လျစ်ရုံသာမက ရာစုနှစ်ချီသက်တမ်းရှိ ‘မြွေဟောက်အကြေးခွံနက်’ ၏ အစွမ်းထက်အကြေးခွံခုခံအား ခွန်အား အရှိန်နှင့် ရုန်းကန်နိုင်စွမ်းတို့ကိုပါ စုပ်ယူထားသဖြင့် သာမန်ဝက်ဝံရိုင်းတစ်ကောင်၏ အရှိန်အဝါဖြင့် ရုန်းထွက်နိုင်ရန် ဘယ်လိုမှ မဖြစ်နိုင်ချေ။

ထို့ကြောင့် ထိုပွဲစဉ်တွင် ကျူကျုံးက အေးအေးလူလူပင် အနိုင်ရရှိသွားခဲ့သည်။

နှစ်ယောက်တွဲပွဲစဉ်တွင်မူ ကျူကျုံးနှင့် ရဲ့လင်လင်တို့၏ ‘ကြိုးကြာပြာမောင်နှံ’ သည် မူရင်းဇာတ်လမ်းထဲတွင် ထည့်သွင်းဖော်ပြထားခြင်းမရှိသော ‘ဝိညာဉ်သူရဲကောင်းမောင်နှံ’ နှင့် ရင်ဆိုင်ခဲ့ရသည်။

ထိုအဖွဲ့၏ အဖွဲ့ဝင်နှစ်ဦးစလုံးမှာ အဆင့် ၃၈ အထိ ရှိကြသဖြင့် အဆင့်အတန်း မြင့်မားကြသည်။ ခေါင်းဆောင်ဖြစ်သူ၏ ဝိညာဉ်မှာ ‘ပုဆိန်ကြီး’ ဖြစ်ပြီး အဝါရောင်ဝိညာဉ်ကွင်း သုံးကွင်းရှိကာ ဒုတိယခေါင်းဆောင်၏ ဝိညာဉ်မှာ ‘သံဒိုင်းကွင်း’ ဖြစ်ပြီး အဖြူတစ်ကွင်းနှင့် အဝါနှစ်ကွင်း ရှိသည်။ တစ်ဦးက တိုက်စစ် တစ်ဦးက ခံစစ်ဖြင့် အချိတ်အဆက်မိလွန်းလှသဖြင့် တိုက်ခိုက်ရခက်ခဲလှသောအဖွဲ့ဖြစ်ပြီး ပြိုင်ပွဲကွင်းတွင် ခုနစ်ပွဲဆက်တိုက် အနိုင်ရလဒ်ကို ပိုင်ဆိုင်ထားကြသူများ ဖြစ်သည်။

‘ဝိညာဉ်သူရဲကောင်းမောင်နှံ’ သည် ကျူကျုံး၏ တိုက်ပွဲများကို ကြိုတင်လေ့လာထားပုံရသဖြင့် ကွင်းထဲသို့ တက်လာသည်နှင့် သူတို့၏မျက်နှာများမှာ လွန်စွာတည်ကြည်လေးနက်သွားကြသည်။ ကျူကျုံးသည် တကယ့်ကို အစွမ်းထက်လွန်းလှပြီး သူ၏ ပထမဝိညာဉ်စွမ်းရည်တစ်ခုတည်းနှင့်ပင် တိုက်စစ်အမျိုးအစား ဝိညာဉ်ဆရာသခင်တစ်ဦးကို အလွယ်တကူ ချုပ်ကိုင်နိုင်ခဲ့သည်က သက်သေပင် မဟုတ်ပါလား။

ထို့ကြောင့် ထိုနှစ်ဦးသည် ကျူကျုံးနှင့် တိုက်ရိုက်ရင်ဆိုင်ခြင်းကို တတ်နိုင်သမျှရှောင်ကွင်းကာ အားနည်းသော အထောက်အကူပြုဝိညာဉ်ဆရာသခင် ရဲ့လင်လင်ကိုသာ ပစ်မှတ်ထား၍ ဂရုတစိုက် ခုခံတိုက်စစ်ဆင်သည့် နည်းဗျူဟာကို အသုံးပြုခဲ့ကြသည်။

သို့သော် ကျူကျုံးက ၎င်းကို ရိပ်မိပြီးသား ဖြစ်သည်။ သူသည် အကွက်ကြည့်၍ တုံ့ပြန်မည့်အစား ‘ဦးသူက အသာစီးရစေရမည်’ ဟူသော သဘောဖြင့် ပြင်းထန်သော တိုက်စစ်ကို စတင်လိုက်တော့သည်။

သူ၏ ပထမဝိညာဉ်စွမ်းရည်ဖြင့် ရဲ့လင်လင်ကို လုံခြုံစွာ အကာအကွယ်ပေးလိုက်ပြီး ‘ဝိညာဉ်သူရဲကောင်းမောင်နှံ’ ၏ တိုက်စစ်လမ်းကြောင်းကို ပိတ်ဆို့လိုက်သည်။ ပုဆိန်ဝိညာဉ်ဆရာသခင်က အကြေးခွံများဖုံးလွှမ်းနေသော အပြာရောင်ငွေဧကရာဇ်နွယ်ရှင်များကို ခုတ်ပိုင်းပစ်လိုက်သည့်တိုင် ပိုမိုများပြားလှသော နွယ်ရှင်များက ထိုနေရာတွင် ချက်ချင်း အစားထိုးဝင်ရောက်လာခဲ့သည်။

နောက်ဆုံးတွင် ဒိုင်းကွင်းဝိညာဉ်ဆရာသခင်သည် သူ၏ ‘တတိယဝိညာဉ်စွမ်းရည် ရွှေခေါင်းလောင်းဒိုင်း’ ကို ထုတ်ဖော်လိုက်ရပြီး သူတို့နှစ်ဦးစလုံး၏ ဘေးပတ်လည်တွင် ကြီးမားလှသော ဝိညာဉ်စွမ်းအားအကာအကွယ်တစ်ခုကို ဖန်တီးကာ ကျူကျုံး၏ ‘အဆိပ်နဂါးတွန့်လိမ်ခြင်း’ စွမ်းရည်ကို အသည်းအသန် ခုခံလိုက်ရတော့သည်။

ကျူကျုံးသည်လည်း အချိန်ဆွဲမနေတော့ဘဲ သူ၏ ‘ဒုတိယဝိညာဉ်စွမ်းရည် အပြာရောင်ငွေဓားသွား’ ၏ အစွမ်းကို စမ်းသပ်ရန် အခွင့်ကောင်းဟု သတ်မှတ်လိုက်သည်။

နှစ်တစ်ထောင်ဝိညာဉ်စွမ်းရည်ဟူသည် မှာစားစရာမရှိပေ။ ဒိုင်းကွင်းဝိညာဉ်ဆရာသခင်၏ ခံစစ်စွမ်းရည်မှာ နှစ်တစ်ထောင်အဆင့်နီးပါး ရှိနေလင့်ကစား အပြာရောင်ငွေဓားသွား၏ ထိုးဖောက်ဖျက်ဆီးခြင်းကို မခံနိုင်ဘဲ ဒိုင်းကွင်းအက်ကွဲကာ ပွဲစဉ်ကို ရှုံးနိမ့်သွားခဲ့ရတော့သည်။

ရှောင်ဝူကမူ နှစ်ယောက်တွဲပွဲစဉ်တွင် ပါဝင်ချင်သော်လည်း အသင်းဖော်မရှိသဖြင့် တစ်ဦးချင်းပွဲစဉ်တွင်သာ ပါဝင်ခဲ့ရသည်။ ကံကောင်းထောက်မစွာဖြင့် သူမ၏ပြိုင်ဘက်မှာ ခွန်အားချင်း မတိမ်းမယိမ်းရှိသူဖြစ်၍ အကွက်ပေါင်းများစွာ အကြိတ်အနယ် ယှဉ်ပြိုင်ပြီးနောက် သူမ၏ ထူးခြားလှသော ‘တတိယဝိညာဉ်စွမ်းရည် အာကာသရွေ့လျားခြင်း’ ကို အသုံးပြုကာ ကောင်းကောင်းမွန်မွန် အနိုင်ရရှိခဲ့သည်။

ထို့နောက် သုံးဦးသားသည် တိုက်ခိုက်ရေးကွင်းကြီးထဲမှ ထွက်လာခဲ့ကြပြီး ဆော့တိုမြို့၏ လမ်းမများအတိုင်း လမ်းလျှောက်ရင်း နှင်းဆီဟိုတယ်ဆီသို့ ဦးတည်လျှောက်လှမ်းလာခဲ့ကြသည်။

လမ်းတစ်လျှောက်လုံးတွင် ရဲ့လင်လင်သည် ကျူကျုံးကို မကြာခဏဆိုသလို ခိုးခိုးကြည့်နေပြီး တစ်စုံတစ်ခုကို ပြောချင်သော်လည်း တွန့်ဆုတ်နေသည့်ပုံစံ ဖြစ်နေသည်။

အကဲခတ်မြန်လှသော ကျူကျုံးက ၎င်းကို သတိပြုမိသွားပြီး ရဲ့လင်လင်ကို ကြည့်ကာ "လင်လင်... တစ်ခုခု ဖြစ်လို့လား" ဟု လှမ်းမေးလိုက်သည်။

"ငါ... ငါက..."

ကျူကျုံးက သဘောကျစွာ ရယ်မောလိုက်ပြီး "ငါတို့က အတန်းဖော်တွေပဲလေ ဒါ့အပြင် အသင်းဖော်တွေလည်း ဖြစ်ကြသေးတာပဲ။ နောက်နောင် နှစ်ပေါင်းများစွာမှာ သေအတူရှင်မကွာ အတူတူ ဖြတ်သန်းရမယ့် သူငယ်ချင်းတွေမို့လို့ ဒီလောက်အထိ အားနာမနေပါနဲ့"

ရှောင်ဝူသည် တစ်ခါတစ်ရံ အူကြောင်ကြောင်နိုင်တတ်သော်လည်း ရဲ့လင်လင်ကို တကယ့်သူငယ်ချင်းစစ်အဖြစ် သတ်မှတ်ထားသဖြင့် စိုးရိမ်တကြီးဖြင့် ဝင်မေးလိုက်သည်။ "လင်လင်... ဘာဖြစ်လို့လဲဟင်။ ကျုံးကလေးကို အားနာမနေပါနဲ့။ အကယ်၍ မင်းက သူ့ကို အကူအညီတောင်းဖို့ ရှက်နေရင်..."

"ငါ့ကိုသာ ပြောလိုက်စမ်းပါ။ ငါ ရှောင်ဝူက သူ့ကိုယ်စား ကတိပေးလိုက်မယ်"

ပြောပြောဆိုဆိုဖြင့် ရှောင်ဝူက သူမ၏ ရင်ညွန့်လေးကို ပုတ်ပြလိုက်သည်။ ထို့နောက် ကျူကျုံးကို တစ်ချက် ကြည့်လိုက်ရာတွင်မူ ရှောင်ဝူ၏ မျက်နှာပေးက ‘အပိုင်ပဲ’ ဆိုသည့် ပုံစံဖြစ်နေပြီး ကျူကျုံးကမူ စိတ်ထဲကနေ မျက်လုံးအပြူးသားဖြင့်သာ ကြည့်နေမိတော့သည်။

ကျူကျုံး (စိတ်ထဲကနေ မျက်လုံးလှန်ပြလိုက်ရင်း) ‘မင်းက ငါ့ရဲ့ ဘာမို့လို့ ငါ့ကိုယ်စား ကတိတွေ လျှောက်ပေးနေရတာလဲ’

ရှောင်ဝူ (ရှက်ကိုးရှက်ကန်းဖြင့်) ‘ငါ... ငါက မင်းရဲ့ ရည်းစားလေ’

ကျူကျုံး (မကျေနပ်ချင်ယောင်ဆောင်ရင်း) ‘မင်းလို ယုန်အိုမလေးကို ဘယ်သူက သဘောကျမှာလဲဟ’

ရှောင်ဝူ (စိတ်တိုသွားရင်း) ‘ဂရုမစိုက်ဘူး... မင်းက သဘောတူမှာလား မတူဘူးလား’

ကျူကျုံး (ခပ်ပြုံးပြုံးဖြင့်) ‘အကယ်၍ ရဲ့လင်လင်က ငါ့ကို လက်ထပ်ခွင့်တောင်းရင်ရော မင်းက ငါ့ကိုယ်စား သဘောတူပေးဦးမှာလား’

ရှောင်ဝူ (မျက်နှာလေး ဖြူလျော်သွားရင်း) ‘............’

ရဲ့လင်လင်သည် အသက်ကို ပြင်းပြင်းတစ်ချက်ရှူလိုက်ပြီး ခေါင်းညိတ်ကာ ကျူကျုံးကို တည်ကြည်စွာ စိုက်ကြည့်လျက် ဆိုလိုက်သည်။ "ကျူကျုံး... ဒီနေ့ တိုက်ပွဲတွေထဲမှာ မင်းက မင်းရဲ့ ဝိညာဉ်ကိုမသုံးဘဲနဲ့ အလွန်အစွမ်းထက်တဲ့ လက်ဝှေ့လက်ရုံးပညာတွေနဲ့ အဆင့်မြင့် ဝိညာဉ်စွမ်းအားထိန်းချုပ်မှုတွေကို သုံးသွားတာ ငါတွေ့လိုက်ရတယ်။ ငါက အထောက်အကူပြု ဝိညာဉ်ဆရာသခင်တစ်ဦး ဖြစ်တဲ့အတွက် ကိုယ်တိုင် တိုက်ခိုက်နိုင်စွမ်း မရှိဘူး။ ဒါကြောင့်မို့လို့ မင်းက ငါ့ကို..."

ဤနေရာသို့ ရောက်သောအခါ ရဲ့လင်လင်သည် သူမ၏ဂါဝန်စလေးကို လက်နှစ်ဖက်ဖြင့် တင်းတင်းဆုပ်ကိုင်ကာ ခေါင်းလေးငုံ့သွားခဲ့သည်။ သူမ၏ အမြဲတစေ အေးစက်လှသော အမူအရာများနှင့်မတူဘဲ အမှားတစ်ခုခုလုပ်ထားမိသည့် ကလေးမလေးတစ်ဦးအလား ချစ်စရာကောင်းနေတော့သည်။

ဤသည်ကို ကြားရသောအခါ ရှောင်ဝူက ရဲ့လင်လင်၏ နူးညံ့လှသော ပခုံးလေးကို ပေါ့ပေါ့ပါးပါး ပုတ်ပေးလိုက်ရင်း ရယ်မောလိုက်သည်။ "ဟီးဟီး... လင်လင်ရယ် ဒါက ဘာဆန်းလို့လဲ။ မင်းက သင်ချင်ရင် စောစောကတည်းက ပြောပါတော့လား"

ထို့နောက် ရှောင်ဝူက ရဲ့လင်လင်၏ နားအနားသို့ တိုးကပ်သွားကာ တိုးတိုးလေး ကုန်းတိုက်လိုက်သည်။ "ငါ မင်းကို လျှို့ဝှက်ချက်တစ်ခု ပြောပြမယ်။ ကျုံးကလေးက ကိုယ်ခံပညာတင် တော်တာမဟုတ်ဘူးနော် သူက ဓားသိုင်းတွေ လက်နက်ပုန်းပစ်တာတွေနဲ့ တခြား တိုက်ခိုက်ရေးပညာတွေကိုလည်း တတ်သေးတယ်။ သူက ဘယ်လို ပညာရပ်မျိုးကိုမဆို တစ်ချက်ကြည့်လိုက်ရုံနဲ့ အကုန်တတ်တာ။ ဒါကြောင့် သူက မင်းကို အစွမ်းထက်တဲ့ တိုက်ခိုက်ရေး အထောက်အကူပြု ဝိညာဉ်ဆရာသခင်တစ်ယောက် ဖြစ်အောင် သေချာပေါက် လုပ်ပေးနိုင်လိမ့်မယ်"

ကျူကျုံး (စိတ်ထဲကနေ) ‘ဟေ့... မင်းတို့က ငါ့ကွယ်ရာမှာ အတင်းပြောနေကြတာလား။ ငါ အကုန်ကြားရတယ်ဟေ့’

ရှောင်ဝူ၏ စကားကြောင့် ရဲ့လင်လင်က အံ့အားသင့်စွာဖြင့် "ဒါဆို... ကျူကျုံးက မင်းကို အဲဒီပညာတွေ မသင်ပေးဘူးလား" ဟု လှမ်းမေးလိုက်သည်။

အဘယ်ကြောင့်ဆိုသော် ရှောင်ဝူ၏ တိုက်ခိုက်ရေးပုံစံမှာ လွန်စွာ ရဲရဲတောက်နှင့် ကြမ်းတမ်းလွန်းလှပြီး ကျူကျုံး၏ ပုံစံမျိုး လုံးဝမရှိသည်ကို သူမ သတိပြုမိထားသောကြောင့် ကျူကျုံး၏ ပညာရပ်များမှာ လျှို့ဝှက်ထိန်းသိမ်းထားရသော ဂိုဏ်းတွင်းပညာရပ်များ ဖြစ်လိမ့်မည်ဟု ထင်မှတ်နေခြင်း ဖြစ်သည်။

ရဲ့လင်လင်၏ မေးခွန်းကြောင့် ရှောင်ဝူ၏ ရယ်သံမှာ ချက်ချင်းပင် ရပ်တန့်သွားရတော့သည်။ မိမိက ပျင်းလွန်းလို့ မသင်ခဲ့တာပါဟု တစ်ဖက်လူကို ဘယ်လိုလုပ် ပြောပြရပါမည်နည်း။

ထို့ကြောင့် သူမက စကားအထစ်ထစ်ဖြင့် "ငါ... ငါ့မှာက ပျော့ပျောင်းကိုယ်ခံပညာရှိတာပဲလေ ဟုတ်တယ်... ငါ့မှာ အဲဒီပညာရှိလို့ ဒါတွေ ထပ်သင်စရာ မလိုတော့တာ..."

ကျူကျုံးသည် ရှောင်ဝူ၏ ဗူးပေါ်သီးပေါ် လိမ်ညာမှုကို မဖော်ကောင်တော့ဘဲ ရဲ့လင်လင်ကို တည်ငြိမ်စွာ စိုက်ကြည့်ရင်း ဆိုလိုက်သည်။ "ငါ မင်းကို သင်ပေးလို့ရပါတယ်။ ဒါပေမဲ့ အဆမတန် ပင်ပန်းဆင်းရဲလိမ့်မယ် မင်း တကယ် ခံနိုင်ရည်ရှိရဲ့လား"

"အင်း... ရှိပါတယ်"

......

မကြာမီအချိန်အတွင်းမှာပင် သူတို့သုံးဦးသည် နှင်းဆီဟိုတယ်၏ အဝင်ဝသို့ ရောက်ရှိလာခဲ့ကြသည်။

ရုတ်တရက် ကျူကျုံးသည် မိမိတို့နောက်သို့ တစ်စုံတစ်ယောက် လိုက်လံချောင်းမြောင်းနေကြောင်း သတိပြုမိလိုက်သည်။ စောစောကမူ ထိုသူ၏ ရန်ငြိုးရန်စ အငွေ့အသက်ကို မခံစားရသဖြင့် သူ သိပ်ပြီး ဂရုမစိုက်မိခဲ့ခြင်း ဖြစ်သည်။

သို့သော် ယခုလေးတင် ထိုသူ၏ ဝိညာဉ်စွမ်းအားမှာ ရုတ်ချည်း ထက်သန်ပြင်းထန်လာခဲ့ပြီး သတ်ဖြတ်လိုစိတ်မျိုး မဟုတ်သည့်တိုင် တိုက်ခိုက်လိုသော အာဃာတအငွေ့အသက်ကမူ သိသာထင်ရှားလွန်းလှပေသည်။

ရှောင်ဝူနှင့် ရဲ့လင်လင်တို့ ဟိုတယ်ခန်းအတွင်းသို့ ဝင်ရောက်သွားသည်ကို စောင့်ကြည့်ပြီးနောက် ကျူကျုံးသည် အပြင်ဘက်သို့ ပြန်လည်လှည့်ထွက်လာခဲ့သည်။

သူသည် ဆိတ်ငြိမ်လှသော လမ်းကြားလေးတစ်ခုအတွင်းသို့ ဝင်ရောက်လိုက်ပြီး တည်ငြိမ်သော လေသံဖြင့် "ငါ့နောက်ကို ဒီလောက်အကြာကြီး လိုက်လာခဲ့တာ... အခုတော့ ထွက်လာခဲ့တော့လေ" ဟု ဆိုလိုက်သည်။

စကားသံ ဆုံးသည်နှင့်တစ်ပြိုင်နက် မှောင်ရိပ်ထဲမှနေ၍ နက်မှောင်သော လူရိပ်တစ်ခုက လျှပ်စီးအလား လျင်မြန်စွာ ပြေးထွက်လာပြီး ကျူကျုံး၏ ဆီးခုံ (သို့မဟုတ်) မျိုးပွားအင်္ဂါတည်ရှိရာနေရာဆီသို့ တည့်တည့်မတ်မတ် ပစ်မှတ်ထား၍ တိုက်ခိုက်လိုက်တော့သည်။

ဤကဲ့သို့သော အောက်လမ်းနည်း တိုက်ကွက်က ကျူကျုံးကို လွန်စွာ အံ့အားသင့်သွားစေသည်။ သူသည် နောက်ပြန်ဆားတိုးကျွမ်းတစ်ချက်ဖြင့် ထိုတိုက်ကွက်ကို သီသီလေး ရှောင်ကွင်းလိုက်ရင်း "တောက်... ဟေ့လူ မင်းက ငါ့ကို သားသမီးမထွန်းကားအောင် လုပ်မလို့လားကွ" ဟု အော်လိုက်မိသည်။

သို့သော် ကျူကျုံး၏ စကားကြောင့် တစ်ဖက်လူက ရပ်တန့်မသွားဘဲ တိုက်ကွက်များက ပိုမိုမြန်ဆန်ကာ တိကျပြတ်သားလာခဲ့သည်။

ယခုအကြိမ်တွင်မူ ကျူကျုံး သေသေချာချာ မြင်လိုက်ရပြီ ဖြစ်သည်။ ထိုသူမှာ မိန်းကလေးတစ်ဦး ဖြစ်ပြီး တကယ့်ကို ရက်ရက်စက်စက်နှင့် တိုက်ခိုက်လိုစိတ် ပြင်းထန်နေသောသူ ဖြစ်သည်။ ထို့ပြင် ဤမိန်းကလေးကို သူ ယနေ့တွင် မြင်တွေ့ခဲ့ဖူးသည်။

ကျူကျုံးသည် သူ၏ လက်နက်ပုန်းကို ပြန်လည်သိမ်းဆည်းလိုက်ရင်း လှမ်းမေးလိုက်သည်။ "မင်းက... ကျူးကျူးချင်း မလား"