အခန်း (၁၂) ငွေပြာဧကရာဇ်နွယ်ပင်၏ ပထမဆုံး ဝိညာဉ်ကွင်း (အပိုင်း ၂)

‘နက်မှောင်အကြေးခွံ အဆိပ်မြွေနဂါး’ က အမဲလိုက်ခံရမည့် အခြေအနေကို အသာတကြည် လက်ခံမည့်အထဲတွင် မပါဝင်ချေ။ ရှဲရှဲမြည်သော အကြေးခွံချင်း ပွတ်တိုက်သံနှင့်အတူ ၎င်း၏ ဧရာမခန္ဓာကိုယ်ကြီးက မြေပြင်ပေါ်ရှိ ငွေပြာနွယ်ပင်များကို ကြိတ်ခြေလျက် အင်္ဂလိပ်အက္ခရာ ‘S’ ပုံသဏ္ဌာန်ဖြင့် ကွေ့ကောက်ကာ လျှပ်တစ်ပြက်အတွင်း ပြေးဝင်လာတော့သည်။ မျက်တောင်တဖြတ်စက္ကန့်အနည်းငယ်အတွင်းမှာပင် ပေသုံးရာနီးပါး ခရီးကို ဖြတ်ကျော်ကာ ကျူကျုံး၏ ရှေ့မှောက်သို့ ရောက်ရှိလာပြီး သွေးပျက်ဖွယ်ရာ ပါးစပ်ကြီးကို ဖြဲလျက် ငုံ့ခဲလိုက်တော့သည်။

"မြန်လိုက်တာ..."

ကျူကျုံးက စိုးစဉ်းမျှ မဆိုင်းမတွဘဲ မြေပြင်ပေါ်သို့ ပက်လက်လှန်လျက် လျှောတိုက်ဝင်ကာ မြွေနဂါးကြီး၏ သေမင်းတမန် မေးရိုးအောက်မှ သီသီလေး မတ်တတ်ထွက်လိုက်သည်။ ထို့နောက် နောက်ပြန် ဂျွမ်းထိုးဆားဗစ် အကြိမ်ကြိမ် ပစ်လိုက်ပြီးနောက် မြွေနဂါးကြီး၏ အနောက်ဘက်တွင် ခြေလှမ်းကို တည်ငြိမ်စွာ ချလိုက်သည်။

အချိန်ဆွဲနေ၍ မဖြစ်တော့သဖြင့် ကျူကျုံးသည် လက်နှစ်ဖက်ကို လျှပ်တပြက် ယှက်နွယ်ကာ မုဒြာတစ်ခု ဖော်ဆောင်ပြီး ငွေပြာဧကရာဇ်နွယ်ပင် ဝိညာဉ်ကို တစ်ပြိုင်နက် ဆင့်ခေါ်လိုက်တော့သည်။

"ငွေပြာဧကရာဇ်နွယ်ပင်... စတင်စေ"

"ငွေပြာဧကရာဇ်နွယ်ပင် —— ငွေပြာနယ်ပယ် ဖွင့်လှစ်ခြင်း... ငွေပြာရစ်ပတ်ခြင်း တုပ်နှောင်မှုသိုင်း"

ကျူကျုံးသည် ငွေပြာဧကရာဇ်နွယ်ပင် နိုးထလာသည့် အချိန်ကတည်းကပင် ‘ငွေပြာနယ်ပယ်’ ၏ အခြေခံ သဘောတရားကို နားလည်သဘောပေါက်ခဲ့ပြီး ဖြစ်သည်။

ထိုနယ်ပယ်သည် ကျူကျုံးအား ထူးခြားသော အသွင်ပြောင်း ကိုယ်ယောင်ဖျောက်ခြင်း စွမ်းရည်ကို ပေးစွမ်းနိုင်သည် (နယ်ပယ်အတွင်းရှိ စွမ်းအင်များကို ပြောင်းလဲခြင်းဖြင့် မိမိ၏ ဝိညာဉ်ကွင်း အရောင်ကို စိတ်ကြိုက်ပြောင်းလဲနိုင်ရုံတင်မက ရန်သူ့မျက်စိရှေ့တွင် ကွင်းကွင်းကွက်ကွက် ပျောက်ကွယ်သွားအောင်ပင် ဖန်တီးနိုင်ပေသည်)။

ထို့အပြင် ငွေပြာနယ်ပယ်သည် အဆင့်ဆင့် ဆင့်ကဲပြောင်းလဲမှု သုံးကြိမ် ပြုလုပ်နိုင်ပြီး တစ်ဆင့်ချင်းစီတိုင်းတွင် ထူးခြားသော သိုင်းကွက်တစ်ခုစီ ပေးစွမ်းနိုင်သေးသည်။

ပထမအဆင့် (ငွေပြာနယ်ပယ် ရစ်ပတ်ခြင်း) : နွယ်ပင်များကို ပိုမိုခိုင်မာစေပြီး ရန်သူကို ချုပ်နှောင်သည့် စွမ်းရည် ထွက်ပေါ်လာခြင်း။

ဒုတိယအဆင့် (သစ်တော၏ မရေတွက်နိုင်သော သရုပ်သကန်) : ပတ်ဝန်းကျင်ကို ပေါင်းစည်းစုပ်ယူပြီး ဖိနှိပ်ခြင်း။ ဤနယ်ပယ်အတွင်းရှိ ရန်သူများ၏ ဝိညာဉ်စွမ်းအား ထုတ်လွှတ်မှုအပါအဝင် အရည်အချင်းမှန်သမျှကို ဆယ်ရာခိုင်နှုန်းအထိ ဖိနှိပ်ချုပ်ချယ်ထားနိုင်သည်။ နယ်ပယ်အတွင်း ကြာကြာနေလေလေ ဖိနှိပ်မှုက ပိုပြင်းထန်လေလေ ဖြစ်မည့်အပြင် ‘ရွှေချည်မျှင်’ များကို ထုတ်လွှတ်၍ ရန်သူ့စွမ်းအင်ကိုပါ စုပ်ယူနိုင်သည်။

တတိယအဆင့် (ငွေပြာနယ်ပယ်၏ အထွတ်အထိပ် အသွင်ပြောင်းလဲခြင်း) : ပတ်ဝန်းကျင်ရှိ ငွေပြာနွယ်ပင်အားလုံး၏ သက်စောင့်စွမ်းအားကို ငွေပြာဧကရာဇ်နွယ်ပင် လိုအပ်သလို ပြောင်းလဲအသုံးပြုနိုင်ခြင်း ဖြစ်သည်။ ငွေပြာနွယ်ပင်များ ရှိနေသရွေ့ ဝိညာဉ်စွမ်းအား စိတ်ဝိညာဉ်စွမ်းအားနှင့် သက်စောင့်စွမ်းအားများကို အကန့်အသတ်မရှိ ဖြည့်တင်းနိုင်သဖြင့် သစ်တောအတွင်း၌ အဆင့်တူရန်သူများနှင့် ရင်ဆိုင်ရပါက လုံးဝ အရှုံးမရှိနိုင်တော့ချေ။

သုံးလတာမျှ အဆက်မပြတ် လေ့ကျင့်ခဲ့မှုနှင့် အီတချိထံမှ ရရှိထားသော ပြောင်မြောက်လှသည့် ဝိညာဉ်စွမ်းအား ထိန်းချုပ်မှုကြောင့်...

ကျူကျုံးသည် ကိုယ်ယောင်ဖျောက်ခြင်းကို အပြည့်အဝ တတ်မြောက်ထားရုံတင်မကဘဲ နယ်ပယ်ကို ပထမအဆင့်အထိပါ ဆင့်ကဲပြောင်းလဲနိုင်ခဲ့သဖြင့် ‘ငွေပြာနယ်ပယ် ရစ်ပတ်ခြင်း’ သိုင်းကို အသုံးပြုနိုင်ခဲ့ခြင်း ဖြစ်သည်။

သို့သော် ယခု ကျူကျုံး၏ ဝိညာဉ်စွမ်းအားက အဆင့် ၁၀ သာ ရှိသေးသဖြင့် အားကုန်သုံး၍ တိုက်ခိုက်ပါက မြွေနဂါးကြီး မသေခင် သူကိုယ်တိုင် ဝိညာဉ်စွမ်းအား ခန်းခြောက်ပြီး သေသွားနိုင်ပေသည်။ ထို့ကြောင့် သူက စွမ်းအား အနည်းငယ်ကိုသာ ခွဲထုတ်၍ သုံးစွဲလိုက်သည်။

ဂျွတ်... ဂျွတ်...

မြေပြင်ကြီး အက်ကွဲသွားပြီးနောက် တုတ်ခိုင်လှသော ငွေပြာနွယ်ပင် အခက်အလက် ဒါဇင်ပေါင်းများစွာသည် မြွေနဂါးကြီးဆီသို့ မြွေဟောက်များပမာ ပြိုင်တူ ပြေးဝင်ရစ်ပတ်တော့သည်။

ကျူကျုံး၏ လျင်မြန်လှသော တိုက်ကွက်ကြောင့် ၅၆၀ နှစ် သက်တမ်းရှိ နက်မှောင်အကြေးခွံ အဆိပ်မြွေနဂါးပင် ချက်ချင်း မရှောင်လွှဲနိုင်ဘဲ ခန္ဓာကိုယ်ကြီး တစ်ခုလုံး ချုပ်နှောင်ခြင်း ခံလိုက်ရသည်။

သို့သော်လည်း ဤသားရဲနက်ကြီးက အလွယ်တကူ အရှုံးပေးမည့်အထဲတွင် မပါဝင်ချေ။ သူ၏ ခွန်အားဗလကြီးမားမှုကြောင့် ပေနှစ်ဆယ်နီးပါး ရှည်လျားသော ခန္ဓာကိုယ်ကြီးကို တရစပ် ရုန်းကန်ရမ်းခါလိုက်ရာ...

ဖြတ်... ဖြတ်... ဂျွတ်... ခနဲ အသံများနှင့်အတူ ငွေပြာနွယ်ပင်များ တစ်ခုပြီးတစ်ခု ပြတ်တောက်ကုန်တော့သည်။

ကျူကျုံးက စိတ်ထဲမှနေ၍ သက်ပြင်းချလိုက်မိသည်။ 'ဝိညာဉ်ကွင်းရဲ့ ပံ့ပိုးမှု မရှိသေးတော့ ငွေပြာဧကရာဇ်နွယ်ပင်ရဲ့ အကြောအမျှင်တွေက တကယ်ပဲ ကြံ့ခိုင်မှုပိုင်းမှာ အားနည်းနေသေးတာပဲ။'

စက္ကန့်အနည်းငယ်အတွင်းမှာပင် မြွေနဂါးကြီးသည် ရုန်းကန်အနိုင်ရသွားပြီး ကျူကျုံးရှိရာသို့ ပိုမိုဆိုးရွားသော အရှိန်အဟုန်ဖြင့် ဒေါသတကြီး ပြေးဝင်လာပြန်သည်။

သို့သော် ကျူကျုံး၏ မျက်နှာထက်တွင် ထိတ်လန့်ခြင်း အလျင်းမရှိဘဲ ဆန်းကြယ်သော အပြုံးတစ်ခုသာ လွင့်ပျံနေခဲ့သည်။ ထိုစက္ကန့်အနည်းငယ်မျှသော အချိန်သည် သူ့အတွက် အစီအစဉ်တစ်ခု ဆွဲရန် လုံလောက်လှပေသည်။

သူသည် မြွေနဂါးကြီးနှင့် ထိပ်တိုက်မရင်ဆိုင်ဘဲ ထူးဆန်းသော ခြေလှမ်းများဖြင့် နောက်သို့ ခုန်ဆုတ်ကာ မူလရပ်နေခဲ့သော နေရာမှ လျင်မြန်စွာ ခွာလိုက်တော့သည်။

မြွေနဂါးကြီးက ပို၍ ပို၍ မြန်ဆန်လာပြီး ကျူကျုံးကို မှီလုနီးပါး ဖြစ်လာခဲ့သည်။ ၎င်းက ပါးစပ်ကြီးကို ဖြဲလျက် ကျူကျုံးကို ကိုက်ခဲရန် အားယူလိုက်စဉ်မှာပင်... တစ်စုံတစ်ခုသော အရာကြောင့် ရှေ့သို့ ဆက်တိုး၍ မရတော့ဘဲ တစ်ဆို့သွားရသည်။

ကြည့်လိုက်ရာ... မြွေနဂါးကြီး၏ ပတ်ပတ်လည်တွင် ‘ကူနိုင်’ ဓားမြှောင် ခုနစ်စင်း စိုက်ဝင်နေပြီး ၎င်းဓားမြှောင်များ၏ အဆုံးတွင် သေးငယ်လှသော ကတ္တီပါရောင် သံမဏိကြိုးမျှင်များ ချိတ်ဆက်ထားသည်ကို တွေ့ရမည် ဖြစ်သည်။ ထိုကြိုးမျှင်များသည် လရောင်အောက်တွင် အေးစက်စက် အလင်းတန်းများ ဖြာထွက်နေခဲ့သည်။

၎င်းတို့မှာ ကျူကျုံး မနေ့ကတင် နော့တင်းမြို့ဈေးကွက်မှ ဝယ်ယူခဲ့သော အလွန်ထက်မြက်ပြီး ခိုင်ခံ့လှသည့် သံမဏိနန်းကြိုးများ ဖြစ်ကြသည်။

သံမဏိကြိုးများကို ကူနိုင်ဓားမြှောင်၏ ကွင်းများတွင် ချိတ်ဆက်ထားပြီး ကျူကျုံး၏ ပြောင်မြောက်လှသော ဓားမြှောင်ပစ်ကွက်ကြောင့် မြွေနဂါးကြီး၏ ပတ်ပတ်လည်တွင် ပင့်ကူအိမ်သဖွယ် ထောင်ချောက်ကြီးတစ်ခု ဖြစ်တည်သွားရခြင်း ဖြစ်ပေသည်။

မြွေနဂါးကြီးက အားထည့်၍ ရုန်းကန်လေလေ... သံမဏိကြိုးများက ပိုမိုတင်းကျပ်လာလေလေ ဖြစ်ပြီး ၎င်း၏ မာကျောလှသော အကြေးခွံများနှင့် သံမဏိကြိုးများ ပွတ်တိုက်မိရာမှ မီးပွင့်များပင် တဖျတ်ဖျတ် ထွက်ပေါ်လာခဲ့သည်။

သို့သော် ထိုကြိုးများသည် သာမန်သံမဏိကြိုးများသာ ဖြစ်သဖြင့် မြွေနဂါးကြီး၏ ကာကွယ်ရေး အကြေးခွံများကို လျှော့တွက်၍ မရချေ။ ဆက်တိုက် ရုန်းကန်ပွတ်တိုက်မှုကြောင့် သံမဏိကြိုးများ ပြတ်တောက်လုနီးပါး ဖြစ်လာခဲ့ပြီ။

"ခံစစ်က တကယ်ကို မာကျောတာပဲ။ ဒါဆိုရင်တော့... ဒီကွက်ကိုပဲ သုံးရတော့မယ်။"

ကျိန်စာသင့်မျက်ဝန်းနှင့် သေမင်းတမန် ကူနိုင်ဓား

ကျူကျုံးသည် မျက်လုံးများကို အသာအယာ မှိတ်လိုက်ပြီးနောက် ပြန်လည် ဖွင့်ထုတ်လိုက်သည်။ ထိုအချိန်တွင် သူ၏ မျက်ဝန်းအစုံသည် သွေးကဲ့သို့ နီမြန်းသွားပြီး မျက်သူငယ်အိမ်အတွင်းရှိ ‘စကြာသုံးကွက်’ များသည် နာရီလက်တံပြောင်းပြန်အတိုင်း တရစပ် လည်ပတ်သွားတော့သည်။

"ထင်ယောင်ထင်မှား သိုင်းကွက် : ရှာရင်ဂန်"

လူတစ်ယောက်နှင့် မြွေတစ်ကောင်... မျက်ဝန်းချင်း ဆုံမိသွားကြသည်။ ခဏချင်းမှာပင် မြွေနဂါးကြီး၏ မျက်သူငယ်အိမ်များ စတင်ပြောင်းလဲလာပြီး ကျူကျုံး၏ မျက်ဝန်းထဲကအတိုင်း စကြာသုံးကွက်ပုံသဏ္ဌာန်များ ပေါ်ထွက်ကာ လည်ပတ်သွားတော့သည်။

"ကြည့်ရတာ... ရှာရင်ဂန်ဆိုတာ တကယ့်ကို မြွေအမျိုးအစားတွေရဲ့ ဂျာအေးပဲဟေ့။ ကျေးဇူးပါပဲ အန်ကယ်မြွေ (အိုရိုချီမာရူး) ရေ"

(ကျိန်စာခတ်နှိပ်ချက်အတွင်း ပုန်းအောင်းနေသော အိုရိုချီမာရူး : "ဟချိုး... ငါ့ကို တစ်ယောက်ယောက် လှမ်းဆဲနေပြန်ပြီလား မသိဘူး...")

ကျူကျုံးသည် အလွန် သတိကြီးသူပီပီ မြွေနဂါးကြီးအနားသို့ ဇွတ်အတင်း ကပ်မသွားချေ။ သူသည် ထင်ယောင်ထင်မှား ဖြစ်နေသော မြွေနဂါးကြီးကို စိတ်ဖြင့်ထိန်းချုပ်ကာ ပါးစပ်ကို ဟခိုင်းလိုက်ပြီး... ဝိညာဉ်စွမ်းအား အပြည့်ထည့်ထားသော ကူနိုင်ဓားမြှောင်တစ်စင်းကို မြွေနဂါးကြီး၏ အာခေါင်အတွင်းမှတစ်ဆင့် ဦးနှောက်ဆီသို့ တည့်တည့်မတ်မတ် ပစ်သွင်းလိုက်တော့သည်။

ဝစ်...

ပေနှစ်ဆယ်နီးပါး ရှည်လျားသော မြွေနဂါးကြီး၏ ခန္ဓာကိုယ်ကြီး တောင့်တင်းသွားပြီး အနက်ရောင် ကူနိုင်ဓားမြှောင်သည် ၎င်း၏ ဦးနှောက်အတွင်းသို့ တစ်ဆုံး မြုပ်ဝင်သွားခဲ့ပြီ ဖြစ်သည်။

ထိုနေရာတွင် မည်သည့် ခံစစ်အကြေးခွံမျှ မရှိဘဲ နုနယ်လှသော အသားစိုင်များသာ ရှိသည် မဟုတ်ပါလား။

နောက်တစ်စက္ကန့်တွင်... ပြင်းထန်လှသော နာကျင်မှုကြောင့် မြွေနဂါးကြီးသည် ထင်ယောင်ထင်မှား အခြေအနေမှ ရုတ်ချည်း နိုးထလာခဲ့သည်။

၎င်း၏ ခန္ဓာကိုယ်ကြီးသည် မခံမရပ်နိုင်လောက်အောင် လူးလွန့်မြည်တမ်းလာပြီး... ပြင်းပြလှသော အသက်ရှင်လိုစိတ်ကြောင့် သံမဏိပင့်ကူအိမ် ထောင်ချောက်ကို အတင်းအဓမ္မ ရုန်းခွဲပစ်လိုက်တော့သည်။ ဖုန်မှုန့်များနှင့် ကျောက်ခဲများ လေထဲသို့ လွင့်ပျံသွားကာ ၎င်း၏ ခန္ဓာကိုယ်ကြီး ရိုက်ခတ်မိသမျှ ချုံနွယ်ပိတ်ပေါင်းများနှင့် သစ်ပင်ငယ်လေးများသည် လေဆင်နှာမောင်းဒဏ် ခံလိုက်ရသည့်အလား ကျိုးပျက်ကြေမွကုန်တော့သည်။ သို့သော်လည်း... ဦးနှောက်အတွင်းသို့ ဓားမြှောင် အထိုးခံထားရသဖြင့် ၎င်း၏ သေဆုံးမှုမှာ အချိန်ကိစ္စသာ ဖြစ်ပေသည်။

အမွှေးတိုင်တစ်ဝက်ခန့် လောင်ကျွမ်းပြီးချိန်တွင်မူ မြွေနဂါးကြီး၏ ရုန်းကန်လှုပ်ရှားမှုများ တဖြည်းဖြည်း ငြိမ်သက်သွားတော့သည်။

မြွေနဂါးကြီး အသက်ဝိညာဉ် ချုပ်ငြိမ်းသွားသည်ကို မြင်မှသာ ကျူကျုံးသည် မြေပြင်ပေါ်သို့ ပစ်ထိုင်ချလိုက်ပြီး အသက်ကို လုရှူနေရတော့သည်။ သူသည် ဟန်ဆောင်နေခြင်း မဟုတ်ဘဲ တကယ့်ကို အားအင်ကုန်ခမ်းသွားခြင်း ဖြစ်သည်။

အဆင့်မြင့်လှသော ၅၆၀ နှစ် သက်တမ်းရှိ သားရဲကြီးကို အလွယ်တကူ အနိုင်ရခဲ့သည်ဟု ထင်ရသော်လည်း... အမှန်စင်စစ် သူသည် ရှိသမျှ စွမ်းအားအားလုံးကို ပုံအော သုံးစွဲခဲ့ရခြင်း ဖြစ်သည်။ ပထမဆုံး အသုံးပြုခဲ့သည့် ‘ငွေပြာရစ်ပတ်ခြင်း’ သိုင်းကြောင့် သူ၏ ဝိညာဉ်စွမ်းအား တစ်ဝက်နီးပါး ကုန်ဆုံးခဲ့ရပြီး... ခက်ခဲလှသော ကူနိုင်ထောင်ချောက် ဆင်မြန်းမှုကြောင့် ကိုယ်ခန္ဓာပိုင်းဆိုင်ရာ အားအင်များ ကုန်ခမ်းကာ ကြွက်သားများပင် အနည်းငယ် စုတ်ပြဲနာကျင်နေခဲ့ပြီ။

နောက်ဆုံးတွင် ရှာရင်ဂန်မျက်ဝန်းကိုပင် အသုံးပြုခဲ့ရသေးသည်။ အကယ်၍ ထိုထင်ယောင်ထင်မှား သိုင်းကွက်ဖြင့် မြွေနဂါးကြီးကို မထိန်းချုပ်နိုင်ခဲ့လျှင်... ဝိညာဉ်စွမ်းအား ခန်းခြောက်လုနီးပါး ဖြစ်နေသော ကျူကျုံးတစ်ယောက် ယခုအချိန်တွင် အမဲလိုက်ခြင်း ခံလိုက်ရပြီ ဖြစ်သည်။

"စနစ်... မင်း ကောင်စုတ် အခု ချက်ချင်း ထွက်ခဲ့စမ်း"

{ဒေါင် ပိုင်ရှင်က ကျွန်တော်မျိုးကို ဒီလောက်အလျင်အမြန် ခေါ်ရော့သလား။ ပြီးခဲ့တဲ့ အခန်းကမှ ကျွန်တော် ခဏလေး ဝင်ပါခဲ့ရတာဆိုတော့... နောက်ထပ် လေးငါးခန်းလောက် ကြာမှ ခေါ်မယ် ထင်နေတာ ဟိဟိ။}

"စကားမရှည်နဲ့တော့။ ငါ့ရဲ့ အခု ကိုယ်ခန္ဓာ အခြေအနေနဲ့ ဒီ ၅၆၀ နှစ် သက်တမ်းရှိတဲ့ ဝိညာဉ်ကွင်းကို စုပ်ယူလို့ ရပါ့မလား။"

{ဒေါင်... ဒီမေးခွန်းအတွက် ပိုင်ရှင်အနေနဲ့ မုန်းတီးမှုအမှတ် ၅၀၀ ပေးချေရပါမယ်}

"အေး... ပေးချေလိုက်တယ်"

{ဒေါင်... ကျွန်တော်မျိုးလည်း မသိဘူးခင် (ဟီးဟီး)... လစ်ပြီနော်...}

"သောက်ကျိုးနည်း... မင်း ငါ့ကို လာနောက်နေတာလား ဒီစနစ်စုတ်... မှတ်ထားလိုက်ဦး။"

ကျူကျုံးသည် မြေပြင်ပေါ်တွင် မလှုပ်မယှက် လဲလျောင်းနေသော မြွေနဂါးကြီးကို လှမ်းကြည့်ရင်း ညည်းတွားလိုက်မိသည်။ "ထားလိုက်ပါတော့... ဒီအဆင့်အထိ ရောက်လာမှတော့ မထူးတော့ဘူး စွန့်စားကြည့်တာပေါ့"

သူသည် ပိုမိုသေချာစေရန်အတွက် အခြား ကူနိုင်ဓားမြှောင်တစ်စင်းကို ဆွဲထုတ်ကာ မြွေနဂါးကြီး၏ မျက်လုံးဆီသို့ ပစ်သွင်းလိုက်ရာ...ဝစ်... ခနဲ အသံနှင့်အတူ သွေးများ ပန်းထွက်လာပြီး မျက်လုံးအတွင်းသို့ တစ်စွန်းတစ်စ မြုပ်ဝင်သွားသော်လည်း မြွေနဂါးကြီးက မလှုပ်ရှားတော့ချေ။

ထိုမှသာ ကျူကျုံး စိတ်အေးသွားပြီး အနားသို့ တိုးကပ်ကာ ဓားမြှောင်ကို ပိုမိုနက်ရှိုင်းစွာ ထိုးစိုက်ပစ်လိုက်တော့သည်။ မြွေနဂါးကြီး၏ သက်စောင့်စွမ်းအားများ လုံးဝ ချုပ်ငြိမ်းသွားခဲ့ပြီ။

ချက်ချင်းပင်... မြွေနဂါးကြီး၏ ခန္ဓာကိုယ်ထက်မှနေ၍ ဖျော့တော့သော ဝါကျင့်ကျင့် အလင်းစက်လေးများ စတင်စုစည်းလာခဲ့သည်။ ၎င်းသည် ဖရန့်ကလင်၏ ဒုတိယမြောက် ဝိညာဉ်ကွင်းထက် ပိုမိုနက်မှောင်သော်လည်း တတိယမြောက် ဝိညာဉ်ကွင်းလောက်မူ မရင့်ကျက်သေးချေ။ ကိုယ်ထိလက်ရောက် မထိတွေ့ရသေးခင်မှာပင် ၎င်းအတွင်း၌ ပါရှိသော ဧရာမ စွမ်းအင်လှိုင်းများကို အတိုင်းသား အာရုံခံမိနေသည်။

ကျူကျုံးသည် အနားသို့ တိုးကပ်ကာ ညာဘက်လက်ကို မြှောက်လိုက်ပြီး ခန်းခြောက်လုနီးပါး ဖြစ်နေသော ဝိညာဉ်စွမ်းအားများကို လက်ဖဝါးထက်သို့ အတင်းအဓမ္မ စုစည်းလိုက်သည် (ကျူကျုံး၏ ရင်တွင်းစကား : ဝိညာဉ်စွမ်းအား ကုန်ခမ်းသွားတဲ့ ခံစားချက်က တကယ်ကို နာကျင်ရက်စက်လွန်းတယ်)။

ဖျော့တော့သော အပြာရောင်အလင်းတန်းနှင့်အတူ ငွေပြာဧကရာဇ်နွယ်ပင်သည် သူ၏ လက်ဖဝါးထက်မှ ထွက်ပေါ်လာပြီး စွမ်းအင်လှိုင်းများနှင့်အတူ အသာအယာ လှုပ်ခါနေခဲ့သည်။

ထိုအပြာရောင် အလင်းတန်း၏ လမ်းညွှန်မှုအောက်တွင်... မြွေနဂါးကြီး၏ ဝိညာဉ်ကွင်းသည် ကျူကျုံးရှိရာသို့ တဖြည်းဖြည်းချင်း ပျံသန်းလာတော့သည်။

ဝိညာဉ်ကွင်း ကိုယ်ခန္ဓာအတွင်းသို့ စတင်ဝင်ရောက်လာချိန်တွင် ကျူကျုံး ပထမဆုံး ခံစားလိုက်ရသည့် ခံစားချက်မှာ နာကျင်မှုပင်... မခံမရပ်နိုင်လောက်အောင် ပြင်းထန်လှသော နာကျင်မှုကြီး ဖြစ်သည်။

ဤခံစားချက်သည် ယခင်ဘဝ ကမ္ဘာမြေပေါ်ရှိ အမျိုးသမီးများ ကလေးမွေးဖွားသည့် နာကျင်မှုထက်ပင် ပိုမိုဆိုးရွားလိမ့်မည်ဟု သူ ထင်မှတ်မိသည်။

ကျူကျုံးအနေဖြင့် အခြား ကမ္ဘာကူးလာသူ စီနီယာကြီးများက မည်သို့သော နည်းလမ်းဖြင့် ထောင်ချီ သောင်းချီသော သက်တမ်းရှိ ဝိညာဉ်ကွင်းများကို ပထမဆုံးအကြိမ်မှာတင် အေးအေးလူလူ စုပ်ယူနိုင်ခဲ့ကြသည်ကို လုံးဝ စဉ်းစား၍ မရတော့ချေ။

သူသည် အဆင့် ၅၀ အထိ ရောက်မှသာ နိုးထလာရမည့် ငွေပြာဧကရာဇ်နွယ်ပင် ဝိညာဉ်ကို ပိုင်ဆိုင်ထားသဖြင့် သူ၏ ကိုယ်ခံစွမ်းအားမှာ သာမန်လူများထက် အဆပေါင်းများစွာ သာလွန်လှသည့်အပြင်... ဒုတိယမြောက် ဝိညာဉ်အသွင်ဖြင့် စိတ်ဝိညာဉ်စွမ်းအားကို မြှင့်တင်ပေးသော ရှာရင်ဂန်ကိုပါ ရရှိထားသူ ဖြစ်သည်။ သို့သော်ငြားလည်း... ရာစုနှစ်ဝက်သက်တမ်းရှိ ဝိညာဉ်ကွင်းကို စုပ်ယူခြင်းက သူ၏ အသက်ကို နုတ်ယူလုနီးပါး ဖြစ်ခဲ့ရသည်။ ကံကောင်းထောက်မစွာဖြင့် သူ အသက်ရှင် လွတ်မြောက်ခဲ့ပြီ ဖြစ်သည်။

နှစ်နာရီခန့် ကြာမြင့်ပြီးနောက်... ကောင်းကင်ကြီး လင်းလာခဲ့ပြီ ဖြစ်သည်။ နံနက်ခင်း၏ နေရောင်ခြည်သည် ကျူကျုံး၏ ချောမောခန့်ညားသော မျက်နှာထက်သို့ ဖြာကျလာပြီး... လေပြေညင်း၏ တိုက်ခတ်မှုကြောင့် သူ၏ ရှည်လျားလှသော အပြာရောင်ဆံနွယ်များသည် လေထဲတွင် ဝဲပန်လွင့်မြောနေခဲ့သည်။

ကျူကျုံး အောင်မြင်သွားခဲ့ပြီ။

ဝိညာဉ်ကွင်းကို အပြည့်အဝ စုပ်ယူပြီးနောက် ခံစားလိုက်ရသည့် လန်းဆန်းအေးမြသော ခံစားချက်မှာ နှုတ်ဖြင့် ဖော်ပြရန်ပင် မစွမ်းသာချေ။

ကျူကျုံးသည် မိမိကိုယ်မိမိ ငုံ့ကြည့်လိုက်ရာ ဝိညာဉ်ကွင်းကြောင့် သူ၏ ခန္ဓာကိုယ် တည်ဆောက်ပုံပါ ပြောင်းလဲသွားကြောင်း တွေ့လိုက်ရသည်။ မူလက ပေ ၄ ဒသမ ၃ လက်မဝန်းကျင်သာ ရှိသော အရပ်အမောင်းမှာ ယခုအခါ ပိုမိုမြင့်မားသွားခဲ့ပြီး ပခုံးအိုးများမှာလည်း ပိုမိုကျယ်ပြန့်လာကာ ဖြူစင်ဝင်းပသော အရေပြားထက်၌ ဆန်းကြယ်သော အလင်းရောင်များ တောက်ပနေခဲ့သည်။

ထို့အပြင်... စုတ်ပြဲနာကျင်နေခဲ့သော ကြွက်သားများမှာလည်း အပြည့်အဝ ပြန်လည်ကောင်းမွန်သွားခဲ့ပြီ ဖြစ်သည်။

ကျူကျုံးသည် ကူနိုင်ဓားမြှောင်ကို ဆွဲထုတ်ကာ ၎င်း၏ ပြောင်လက်နေသော မျက်နှာပြင်မှတစ်ဆင့် မိမိ၏ လက်ရှိရုပ်ရည်ကို ကြည့်ရှုလိုက်ပြီးနောက် ရေရွတ်လိုက်မိသည်။

"သောက်ကျိုးနည်း... ငါ့ရုပ်က မိန်းကလေးတွေကို သတ်မယ့် ရုပ်မျိုး ဖြစ်လာတာပဲ"

{ဒေါင် ပိုင်ရှင်အား ဂုဏ်ပြုပါသည်... ဝိညာဉ်စွမ်းအား အဆင့် ၁၄ သို့ တက်လှမ်းသွားခဲ့ပြီ ဖြစ်သဖြင့်... လျှို့ဝှက်ခိုးယူခွင့် ၄ ကြိမ် ရရှိပါသည်}