အခန်း(၅)- မိုးကြိုးငရဲနွယ်ပင်နှင့် ကံတရား၏ စောင်မမှု

မိုးကြိုးငရဲနွယ်ပင်...

၎င်းသည် သစ်ပင်စနစ်သုံး ဝိညာဉ်သားရဲများထဲတွင် အထွတ်အထိပ် တည်ရှိမှုတစ်ခု ဖြစ်ပြီး မွေးရာပါ ထက်မြက်သော ဉာဏ်ပညာကို ပိုင်ဆိုင်ထားကြသည်။ လျှပ်စီးဓာတ် အားကောင်းသော နေရာများတွင်သာ ပေါက်ရောက်တတ်ပြီး သဘာဝ မိုးကြိုးလျှပ်စီးများ၏ စွမ်းအင်ကို စုပ်ယူရင်း ကြီးထွားလာရခြင်း ဖြစ်၏။ ကျင့်ကြံခြင်း သက်တမ်း နှစ်ပေါင်းတစ်သောင်းသို့ ရောက်ရှိပါက ရာသီဥတုကိုပင် ပြောင်းလဲနိုင်စွမ်း ရှိလာပြီး အရာခပ်သိမ်းကို ဖျက်ဆီးပစ်နိုင်သော မိုးကြိုးစွမ်းပကားကို စည်းစိမ်ပြုနိုင်ချေ ရှိသည်။

အဆိုပါ ဝိညာဉ်သားရဲတွင် မိုးကြိုးနတ်ဘုရား၏ သွေးနှောမှု စီးဆင်းနေသည်ဟု ဆိုကြသော်လည်း ကြီးထွားလာသည့် ဖြစ်စဉ်တစ်လျှောက်တွင် ကိုယ်ပိုင်စွမ်းအင် မထိန်းချုပ်နိုင်ဘဲ ပေါက်ကွဲပျက်စီးသွားတတ်သည့် အန္တရာယ်နှင့် အလွန်တရာ နီးစပ်လှသဖြင့် သက်တမ်း နှစ်ပေါင်းငါးသောင်း ကျော်လွန်သော မိုးကြိုးငရဲနွယ်ပင်ဟူ၍ အလွန် ရှားပါးလှပေသည်။ ဒဏ္ဍာရီများအရ ဤကမ္ဘာ၏ နိယာမတရားကပင် ၎င်းတို့အား သက်တမ်း ရှည်ကြာစွာ ရှင်သန်ခွင့် မပြုဟု ဆိုကြပြီး အကယ်၍ သက်တမ်း နှစ်ပေါင်းတစ်သိန်းအထိ ကျော်လွန်ရှင်သန်နိုင်ခဲ့ပါက အစစ်အမှန် မိုးကြိုးနတ်ဘုရား၏ သွေးနှောမှုကို အပြည့်အဝ နိုးထလာစေနိုင်လိမ့်မည် ဖြစ်၏။

သို့သော် ထိုနောက်ပိုင်းအချက်များသည် ဟူပိုင်အတွက် လောလောဆယ်တွင် အရေးမကြီးသေးပေ။ ပထမဆုံးအချက်ကသာ သူ၏အာရုံကို ဖမ်းစားထားခြင်း ဖြစ်သည်။ ၎င်းသည် သစ်ပင်စနစ်သုံး ဝိညာဉ်သားရဲ ဖြစ်သော်လည်း ၎င်း၏ စွမ်းဆောင်ရည် ကိုက်ညီမှုမှာ သူ့အတွက် အသင့်တော်ဆုံး ဖြစ်နေသည် မဟုတ်ပါလော။

ဤကဲ့သို့သော ဝိညာဉ်သားရဲမျိုးသည် ကြယ်တာရာတောအုပ်ကြီးထဲတွင် တည်ရှိနေနိုင်သော်လည်း ရှာဖွေရန်မှာမူ ဘယ်လိုမှ မလွယ်ကူနိုင်ချေ။

ထိုညက အိပ်မော်ကျနေစဉ်အတွင်း ဟူပိုင်သည် နှုတ်မှပင် ကြောင်တောင်တောင်ဖြင့် တိုးတိုးလေး ရေရွတ်နေမိရှာသည်.... "မိုးကြိုးငရဲနွယ်ပင်.."

သူ ကိုယ်တိုင်ပင် သတိမထားမိလိုက်သည်မှာ သူ၏ ခန္ဓာကိုယ်ထက်တွင် မထင်မရှားသော အဖြူရောင် အလင်းတန်းငယ်တစ်ခု တဖျတ်ဖျတ် လင်းလက်နေခဲ့ခြင်းပင် ဖြစ်၏။

နောက်တစ်နေ့ နံနက်ခင်းတွင်..

ရှဲ့ထျန်းနှင့် သူ၏ အဖွဲ့သည် ကြယ်တာရာတောအုပ်ကြီး၏ အပြင်ဘက် ဝန်းကျင်သို့ ဝင်ရောက်လာခဲ့ကြသည်။ တောထဲသို့ မဝင်မီ သူက ဟူပိုင်ကို မိမိ၏ ဘေးပတ်ပတ်လည် တစ်မီတာအကွာအဝေးထက် ပို၍ မခွာရန်နှင့် အချိန်ပြည့် သတိဝီရိယ ရှိနေရန် လေးနက်စွာ မှာကြားထားခဲ့၏။

ငါးရက်ဆက်တိုက် ခရီးနှင်ခဲ့ကြသော်လည်း ရှဲ့ထျန်းတို့ အဖွဲ့သည် သင့်တော်သော လျှပ်စီးဓာတ်သတ္တိရှိ ဝိညာဉ်သားရဲကို ရှာမတွေ့ခဲ့ကြချေ။ တွေ့ရှိသည့် သတ္တဝါအချို့မှာလည်း ကျင့်ကြံခြင်းသက်တမ်း မြင့်မားလွန်းနေခြင်း သို့မဟုတ် သွေးနှောမှုအဆင့် နိမ့်ကျလွန်းနေခြင်းတို့ကြောင့် ဖြစ်ပြီး နဂါးသွေးနှောမှု အဆင့်ပင် မရှိကြချေ။

ထိုညတွင်..

ရှဲ့ထျန်းက သက်ပြင်းတစ်ချက် ချလိုက်မိသည်.... "ဟူး.. လျှပ်စီးဓာတ်သတ္တိရှိတဲ့ ဝိညာဉ်သားရဲတွေက ဒီလောက်အထိ ရှာရခက်လိမ့်မယ်လို့ ငါ မထင်ထားမိဘူး.. ပိုင်အာ.. ငါတို့ အိမ်ကနေ ထွက်လာခဲ့တာ အခုဆို ဆယ်ရက်တောင် ရှိသွားပြီ.. နာနာက ကျင့်ကြံခြင်းကို အကြောင်းပြပြီး အခန်းအောင်းနေတယ်ဆိုပေမဲ့ အလွန်ဆုံး နောက်ထပ် ငါးရက်လောက်ပဲ အချိန်ဆွဲပေးနိုင်လိမ့်မယ်.. ငါတို့မှာ အချိန် အများကြီး မကျန်တော့ဘူးနော်.."

ဟူပိုင်ကမူ နှုတ်ဆိတ်နေခဲ့ပြီး သူ၏ မျက်နှာထက်တွင် အလွန်တရာ ခေါင်းမာသော အရိပ်အယောင်များ ပေါ်လွင်နေသည်.... "ဖေဖေ.. သားအနေနဲ့ ဖြစ်ကတတ်ဆန်း လျှပ်စီးဝိညာဉ်သားရဲတစ်ကောင်ကို စုပ်ယူမယ့်အစား ဘာမှရှာမတွေ့တာကမှ တော်ဦးမယ်.. အဲဒီလို ဖြစ်ကတတ်ဆန်း စုပ်ယူလိုက်တာက သားရဲ့ နောင်ရေးကျင့်ကြံမှုအတွက် ဘာမှ အကျိုးကျေးဇူး ရှိမှာမဟုတ်ဘူး.."

ဝုန်း..

ရှဲ့ထျန်း တစ်စုံတစ်ခု ပြန်လည်မပြောရသေးမီမှာပင် ကောင်းကင်ယံထက်မှ မိုးကြိုးပစ်သံ အုန်းအုန်းမြည်ဟည်း၍ ထွက်ပေါ်လာခဲ့သည်။ ရှဲ့ထျန်း မော့ကြည့်လိုက်ရာ ဤရက်ပိုင်းအတွင်း ရာသီဥတုက သိပ်မကောင်းလှဘဲ ကောင်းကင်ယံတွင် မည်းမှောင်သော မိုးတိမ်တောင်ကြီးများ စုဆုံနေသဖြင့် မကြာမီ မိုးသည်းထန်စွာ ရွာသွန်းတော့မည့် အရိပ်အယောင် ပြသနေ၏။

"ဟူး.. ဒီရာသီဥတုကလည်း တစ်မျိုးပဲ.." ဟူလျဲ့ယောင်ကလည်း ညည်းတွားလိုက်ရှာသည်။ သူမသည် မိုးရွာသော နေ့ရက်များကို အထူးတလည် မနှစ်သက်ချေ။

မိုးရွာသွန်းပါက ဝိညာဉ်သားရဲ အများအပြားမှာ ၎င်းတို့၏ အသိုက်အမြုံများထဲသို့ ပြန်လည်အောင်းနေတတ်ကြသဖြင့် သင့်တော်သော ဝိညာဉ်သားရဲကို ရှာဖွေရန် ပိုမိုခက်ခဲသွားမည် မဟုတ်ပါလော။

သို့သော် ဟူပိုင်ကမူ ထိုသူများနှင့် ကွဲပြားနေသည်။ သူသည် ကောင်းကင်ယံကို စိတ်လှုပ်ရှားတက်ကြွသော မျက်နှာပေးဖြင့် မော့ကြည့်လိုက်ပြီး နှုတ်ခမ်းအစုံမှာ အလိုလို ကွေးညွတ်သွားကာ တိုးတိုးလေး ရေရွတ်မိတော့သည်.... "မဖြစ်နိုင်တာ.. ဒီလောက်အထိ တိုက်ဆိုင် စရာတော့ မရှိပါဘူး.. ဟားဟားဟားဟား.."

ဟူပိုင် တစ်ဦးတည်း တဟားဟား ရယ်မောနေသည်ကို မြင်လိုက်ရသောအခါ ရှဲ့ထျန်းနှင့် သူ၏ဇနီးတို့မှာ အထင်လွဲသွားကြရှာသည်။ ရှဲ့ထျန်းက ချက်ချင်းပင် ချော့မော့အားပေးလာ၏.... "ပိုင်အာ.. ရပါတယ်သားရယ်.. ရှာရ ဘယ်လောက်ပဲ ခက်ခက်.. ဖေဖေတို့ နှစ်ယောက်စလုံး သားအတွက် အစွမ်းကုန် ကြိုးစားရှာဖွေပေးမှာပါ.."

"မဟုတ်ဘူး.. မဟုတ်ဘူး.. ဖေဖေ.. မေမေ.. ခပ်လွဲလွဲတွေ တွေးကုန်ကြပြီဗျာ.. သား ဆိုလိုတာက သားတို့တွေ တကယ့်ကို ကံကောင်းနေပြီလို့ ပြောတာပါ.. ကောင်းကင်ကြီးက သားကို ကူညီ စောင်မလိုက်တာပဲ.."

"ဟင်.."

ဟူပိုင်က ပြုံးလျက် ရှင်းပြလိုက်သည်.... "သား အရင်က ဝိညာဉ်သားရဲ စွယ်စုံကျမ်း စာအုပ်တစ်အုပ်ထဲမှာ လျှပ်စီးဓာတ်သတ္တိရှိတဲ့ သစ်ပင်စနစ်သုံး ဝိညာဉ်သားရဲတစ်မျိုးအကြောင်း ဖတ်ဖူးတယ်.. အဲဒါကို မိုးကြိုးငရဲနွယ်ပင်လို့ ခေါ်တယ်.. သူက သဘာဝ မိုးကြိုးလျှပ်စီးတွေရဲ့ စွမ်းအင်ကို စုပ်ယူပြီး ကြီးထွားလာတတ်တာမို့လို့ မိုးသက်မုန်တိုင်း အမြဲကျရောက်တတ်တဲ့ လျှိုမြောင်တွေ ဒါမှမဟုတ် လျှပ်စစ်သံလိုက်စွမ်းအင် မြင့်မားတဲ့ နေရာမျိုးတွေမှာ ပေါက်ရောက်ရတာကို အလွန်နှစ်သက်တယ်.."

"အခုက အခွင့်အရေးပဲဗျာ.. သားတို့ လုပ်ရမှာက မိုးကြိုးအလင်းတန်း သက်ဆင်းမယ့်နေရာကို စောင့်ကြည့်ဖို့ပဲ.. စောစောက မိုးကြိုးပစ်သံကို ကြားလိုက်ရတယ်ဆိုကတည်းက သားတို့က အဲဒီလို မိုးကြိုးသံလိုက်စွမ်းအင်စက်ကွင်းနဲ့ သိပ်မဝေးတဲ့ နေရာကို ရောက်နေပြီဆိုတာ သေချာတယ်.."

"ဖေဖေ.. ဒီအနီးအနားမှာ သစ်ပင်စနစ်သုံး ဝိညာဉ်သားရဲတွေ ပေါက်ရောက်ရှင်သန်ဖို့ သင့်တော်တဲ့ ကျယ်ပြန့်တဲ့ လျှိုမြောင် ဒါမှမဟုတ် မြေရိုင်းပြင်မျိုး ရှိလားဟင်.."

ကြယ်တာရာတောအုပ်ကြီးသည် အလွန်တရာ ကျယ်ဝန်းလှသဖြင့် ထိုကဲ့သို့သော နေရာမျိုး သေချာပေါက် ရှိရပေမည်။ သစ်ပင်ကြီးများချည်းသာ ပြည့်နှက်နေနိုင်စရာ အကြောင်းမရှိချေ။

မိုးကြိုးငရဲနွယ်ပင်... ဤဝိညာဉ်သားရဲ၏ အမည်ကို သူတို့ဇနီးမောင်နှံ တစ်ကြိမ်တစ်ခါမျှ မကြားဖူးကြသော်လည်း သူတို့၏ သားသည် ငယ်စဉ်ကတည်းကပင် အသိဉာဏ် ရင့်ကျက်ပြီး စာအုပ်စာပေ အမြောက်အမြားကို ဖတ်ရှုဖူးသူ ဖြစ်သဖြင့် ဤကဲ့သို့သော ဝိညာဉ်သားရဲမျိုး အမှန်တကယ် တည်ရှိနေနိုင်ကြောင်း ယုံကြည်မိကြသည်။

သူ၏ တောင်းဆိုချက်ကြောင့် ဝိညာဉ်ကျောင်းတော်မှ သူတို့အိမ်သို့ ပို့ဆောင်ပေးခဲ့ရသော စာအုပ်စာပေ အရေအတွက်မှာ မနည်းလှပေ။ ယင်းတို့ထဲက အများစုကို သူတို့ဇနီးမောင်နှံကိုယ်တိုင်ပင် လှန်လှောမကြည့်ဖူးကြချေ။

"ရှိရမယ်.. ရှိရမယ်သား.." ရှဲ့ထျန်းက ပြန်လည်ဖြေကြားရင်း ဟူလျဲ့ယောင်ကို လှမ်း၍ ကြည့်လိုက်သည်။

စိတ်ဝိညာဉ်ထိန်းချုပ်ရေး ဝိညာဉ်သူတော်စင်တစ်ဦး ဖြစ်သည့်အတွက် သူမ၏ စိတ်အာရုံစွမ်းအားမှာ ရှဲ့ထျန်းထက် ပိုမိုမြင့်မားနေမည်မှာ မြေကြီးလက်ခတ်မလွဲပင် ဖြစ်၏။ သူမသည် မျက်ဝန်းအစုံကို ပိတ်လိုက်ပြီး မိမိ၏ စိတ်အာရုံ စူးစမ်းမှုနယ်ပယ်ကို သေချာစွာ ဖြန့်ကျက်လိုက်သည်။ ခဏမျှ ကြာပြီးနောက် သူမသည် အရပ်မျက်နှာတစ်ခုသို့ လက်ညှိုးထိုးပြလိုက်ကာ.... "ဟိုးဘက်နေရာပဲ.."

နောက်ဆုံးတွင် သူတို့သည် ဟူလျဲ့ယောင်၏ စိတ်အာရုံ လမ်းညွှန်မှုဖြင့် ခရီးဆက်ခဲ့ကြပြီး လမ်းခုလတ်တွင် ဟူပိုင်ကလည်း ကူညီပေးနိုင်ရန် သူ၏ ကောင်းကင်မြေခွေးနယ်ပယ်ကို ဖြန့်ကျက်ထားခဲ့သည်။

ဤရက်ပိုင်းအတွင်း သူ ရှာဖွေတွေ့ရှိခဲ့သည်မှာ သူ၏ ကောင်းကင်မြေခွေးနယ်ပယ်သည် သဘာဝဓာတ်ကြီးများအပေါ် အာရုံခံနိုင်စွမ်းနှင့် ထိန်းချုပ်နိုင်စွမ်းကို မြှင့်တင်ပေးနိုင်ရုံတင်မကဘဲ စိတ်အာရုံစွမ်းအားကိုပါ အားကောင်းစေနိုင်ပြီး မိခင်ဖြစ်သူ ဟူလျဲ့ယောင်၏ စိတ်အာရုံစွမ်းအားကိုပင် ငါးရာခိုင်နှုန်းခန့်အထိ မြှင့်တင်ပေးနိုင်ခြင်း ဖြစ်သည်။

ဤမျှလောက်လေးဟု အထင်မသေးအပ်ပေ။ ဤသည်မှာ ဟူပိုင်၏ လက်ရှိအင်အား အလွန်နိမ့်ကျနေသေးသောကြောင့်သာ ဖြစ်၏။ အကယ်၍ သူကိုယ်တိုင်အတွက်ဆိုပါက ဆယ်ရာခိုင်နှုန်းခန့်အထိ မြှင့်တင်ပေးနိုင်စွမ်း ရှိသည်။

သို့သော် စိတ်မကောင်းစရာမှာ ဖေဖေရှဲ့ထျန်းမှာမူ ဤကဲ့သို့သော မြှင့်တင်မှုကို မရရှိနိုင်ချေ.... ဤအရာသည် သူ၏ ဝိညာဉ်အမျိုးအစားနှင့် သက်ဆိုင်နေပုံရသည်။

ယခင်က ဟူပိုင်သည် သူ၏ ဝိညာဉ်စွမ်းအားမှာ အဆင့်တစ်ဆယ်မျှသာ ရှိပြီး ခန္ဓာကိုယ်အတွင်းရှိ စွမ်းအားများမှာ အကန့်အသတ် ရှိနေသဖြင့် ဝိညာဉ်စွမ်းအားကို ဖြုန်းတီးရန် မဝံ့ရဲခဲ့ပေ။ သို့သော် ယခုမူ သူသည် သူ၏ နယ်ပယ်ကို အစွမ်းကုန် ဖွင့်ဟထားလိုက်ရတော့သည်။

မိခင်ဖြစ်သူ ဟူလျဲ့ယောင်ကို ကူညီပေးရင်း သူသည် မိမိ၏ နယ်ပယ်အတွင်းရှိ မိုးကြိုးဓာတ်စွမ်းအင်များထံမှ အခြေခံအချက်အလက်အချို့ကို ရရှိရန် တတ်နိုင်သမျှ ကြိုးစားအားထုတ်ခဲ့ရာ သူတို့သည် မိုးကြိုးပစ်ခတ်မှု၏ ဗဟိုချက်ဆီသို့ တရွေ့ရွေ့ ပိုမိုနီးကပ်လာခဲ့ကြပြီ ဖြစ်သည်။

ကောင်းကင်ယံမှ ကောင်းကင်မိုးကြိုးလျှပ်စီးတစ်ချက် အုန်းကနဲ သက်ဆင်းသွားသည်နှင့်အတူ သူတို့ သုံးဦးစလုံး မိုးကြိုးစက်ကွင်း၏ အစွန်အဖျားသို့ ရောက်ရှိလာခဲ့ကြတော့သည်။

သူတို့၏ မျက်စိရှေ့မှောက်တွင် မြင်တွေ့လိုက်ရသည်ကား.... မိုးကြိုးရေကန်ကြီးတစ်ခု၏ ဗဟိုချက်တွင် ပေါက်ရောက်နေပြီး ကောင်းကင်မိုးကြိုးများ၏ ဆေးကြောခြင်းကို ခံယူနေသော မျှစ်စို့လေးတစ်ခုနှင့် တူသည့် သစ်ပင်စနစ်သုံး ဝိညာဉ်သားရဲတစ်ပင်ပင် ဖြစ်ချေတော့သည်။

"ပိုင်အာ.. ဒါလား.. ဒီမျှစ်စို့လေးက မင်းပြောတဲ့ မိုးကြိုးငရဲနွယ်ပင် ဆိုတာလားသား.. သူ့ဆီကနေ မညံ့တဲ့ လျှပ်စီးဓာတ်သတ္တိကို ခံစားရတယ်ဆိုပေမဲ့ ပုံစံက နည်းနည်းလေး သေးငယ်လွန်းသလိုပဲ.. မင်း တကယ်ပဲ သူ့ကို စုပ်ယူချင်တာ သေချာရဲ့လား.."

ဟူပိုင်သည် ဝိညာဉ်စွမ်းအား တစ်ဝက်ကျော်ခန့် ကုန်ဆုံးသွားခဲ့သဖြင့် မျက်နှာလေးမှာ ဖြူဖျော့နေရှာသော်လည်း ဝမ်းသာအားရ ပြုံးလိုက်မိသည်.... သူ၏ ကံတရားက အမှန်တကယ်ပင် ကောင်းမွန်လွန်းလှပေသည်။

"ဟုတ်ပါတယ်.. သူပါပဲဗျာ.. သူက အခုလောလောဆယ် မိုးကြိုးငရဲနွယ်ပင်ရဲ့ ကလေးဘဝ ပုံစံပဲ ရှိသေးတာ.. ကြည့်ရတာ အဆစ် ငါးဆစ်ပဲ ရှိသေးတော့ သူ့ရဲ့ သက်တမ်းက နှစ်ပေါင်းငါးရာဝန်းကျင်ပဲ ရှိဦးမယ်.. သားရဲ့ ပထမဆုံး ဝိညာဉ်ကွင်းအတွက် အလွန်အမင်း ကွင်းကွင်းကွက်ကွက်ကို ကွက်တိပဲဗျာ.."

သူသည် အသက်သက်တမ်း ရှစ်ရာစုဝန်းကျင်အထိ ခံနိုင်ရည်ရှိကြောင်း စမ်းသပ်ထားခဲ့ဖူးသော်လည်း ထိုသက်တမ်းအကန့်အသတ်နှင့် ကွက်တိတူညီသော ဝိညာဉ်သားရဲကို ရှာဖွေရန်မှာမူ ဘယ်လိုမှ မဖြစ်နိုင်ချေ.... ဤကဲ့သို့သော ဝိညာဉ်သားရဲမျိုးက အလွန် ရှားပါးလွန်းလှသည် မဟုတ်ပါလော။

"ပြီးတော့ ကျွန်တော်တို့ ရှေ့က မိုးကြိုးငရဲနွယ်ပင်ရဲ့ သက်တမ်းက နှစ်ပေါင်းငါးရာဝန်းကျင်ပဲ ရှိသေးတယ်ဆိုပေမဲ့.. သူ ဆင့်ခေါ်နိုင်တဲ့ မိုးကြိုးလျှပ်စီးတွေက သာမန် နှစ်ပေါင်းရှစ်ရာသက်တမ်းရှိတဲ့ ဝိညာဉ်သားရဲတွေတောင် ခံနိုင်ရည်ရှိမှာ မဟုတ်ဘူးဗျ.."

"ကောင်းပြီ.. ဒါဆိုရင်တော့ သား.. မင်း ဒီမှာပဲ စောင့်နေဦး.. ဖေဖေ အခုချက်ချင်း သားအတွက် အဲဒီဝိညာဉ်သားရဲကို သွားပြီး နှိမ်နင်းပေးမယ်.."

နောက်တစ်ကိုယ်၌ ရှဲ့ထျန်းသည် သူ၏ လမင်းဓားမြှောင်ကို ကိုင်စွဲလိုက်ပြီး သူ၏ ခန္ဓာကိုယ်ထက်တွင် ဝိညာဉ်ကွင်း ခုနစ်ကွင်း ဖြစ်ကြသော.... အဝါ၊ အဝါ၊ ခရမ်း၊ ခရမ်း၊ အနက်၊ အနက်၊ အနက်.... တို့သည် တရွေ့ရွေ့ ထွက်ပေါ်လာခဲ့တော့သည်။ အသက်သုံးဆယ့်ခြောက်နှစ် အရွယ်တွင် သူသည် အဆင့်(၇၈)ရှိသော ဝိညာဉ်သူတော်စင်တစ်ဦး ဖြစ်နေပြီ ဖြစ်၏။

သူ ယခုကဲ့သို့ ကျင့်ကြံခြင်းအဆင့်ကို ရရှိခဲ့ခြင်းမှာ လွန်ခဲ့သော နှစ်နှစ်က ဝံပုလွေခိုးသားအုပ်စုကို သွားရောက်နှိမ်နင်းခဲ့သည့် အကျိုးကျေးဇူးကြောင့် ဖြစ်သည်။ ထိုစဉ်က အလွန် အန္တရာယ်ကြီးမားခဲ့ပြီး ဝံပုလွေခိုးသား ခေါင်းဆောင်မှာ တစ်ကောင်တည်း မဟုတ်ဘဲ အကြီးတစ်ကောင်နှင့် အငယ်တစ်ကောင် နှစ်ကောင်တောင် ရှိနေခဲ့ခြင်း ဖြစ်၏။ အကယ်၍ ထိုအချိန်တွင် ဂန္ဓာရဒိုလော့ ယွဲ့ကွမ်းသာ အတူပါမလာခဲ့ပါက သူတို့လင်မယား နှစ်ဦးမှာ အမှန်တကယ်ပင် သေတွင်းထဲ သက်ဆင်းရတော့မည် ဖြစ်သည်။

ဝံပုလွေခိုးသားခေါင်းဆောင် တစ်ကောင်ချင်းစီ၏ အင်အားမှာ သူ၏ပြိုင်ဘက် မဟုတ်သော်လည်း စိတ်ပျက်စရာကောင်းသည်မှာ ထိုစဉ်က သူတို့ ရင်ဆိုင်ခဲ့ရသော ဝံပုလွေခိုးသားအုပ်စု၏ အရေအတွက်မှာ အနည်းဆုံး အကောင်တစ်ရာကျော်ခန့် ရှိနေခြင်းပင် ဖြစ်၏။

အကယ်၍ ယွဲ့ကွမ်းသာ မရှိခဲ့ပါက သူတို့၏ ဝိညာဉ်စွမ်းအားများဖြင့်မူ အမှန်တကယ်ပင်။

သို့သော်လည်း ရရှိခဲ့သည့် အကျိုးအမြတ်မှာလည်း အလွန် ကောင်းမွန်လှပေသည်။ ထိုတစ်ကြိမ်တွင် သူတို့သည် ထိုဝံပုလွေခိုးသားခေါင်းဆောင် နှစ်ကောင်ထံမှ ဝိညာဉ်ရိုးတွင်းခြင်ဆီ အရိုးနှစ်ခုကို တကူးတက ရရှိခဲ့ကြသည် မဟုတ်ပါလော။