အခန်း(၄)- ခွင့်ပြုချက်ရရှိခြင်းနှင့် ကြယ်တာရာတောအုပ်ကြီးဆီ သို့လောလျှို့ဝှက်စွာ ချီတက်ခြင်း

ဟူပိုင်၏ ရှင်းလင်းချက်ကို ကြားရပြီးနောက်တွင်မှ ရှဲ့ထျန်းနှင့် ဟူလျဲ့ယောင်တို့ ဇနီးမောင်နှံလည်း အခြေအနေမှန်ကို သဘောပေါက်သွားကြတော့သည်။ သူတို့၏သားသည် ဝိညာဉ်အတွင်းရှိ ဘိုးဘေးတို့၏ သွေးနှောမှု နိုးထလာခြင်းကြောင့် အမြီးကိုးချောင်းကောင်းကင်မြေခွေး၏ မွေးရာပါ စွမ်းရည်အချို့ကို အလိုအလျောက် ပိုင်ဆိုင်လာခဲ့ခြင်း ဖြစ်၏။

ထိုသို့ဆိုလျှင် စိတ်ဝိညာဉ်ထိန်းချုပ်မှု လမ်းစဉ်တစ်ခုတည်းကိုသာ ဇွတ်မှိတ်လျှောက်လှမ်းခိုင်းခြင်းမှာ အမှန်တကယ်ပင် ပညာရှိရာမကျချေ။

သို့သော်လည်း ဟူလျဲ့ယောင်ကမူ စိုးရိမ်စိတ် မကင်းသေးဘဲ တားမြစ်လိုနေသေးသည်.... "ပိုင်အာ.. မင်းရဲ့ စိတ်ကူးကို မေမေတို့ နားလည်ပါတယ်.. ဒါပေမဲ့ မင်းရွေးချယ်တဲ့ လမ်းက ဘက်မလိုက်သလို ဖြစ်ပြီး ဘာမှမဟုတ်ဘဲ နေလိမ့်မယ်.. ဘာလို့ သဘာဝဓာတ်ကြီး တစ်ခုတည်းကိုပဲ သီးသန့် အထူးပြုပြီး မကျင့်ကြံတာလဲ.."

ရှဲ့ထျန်းကလည်း ချက်ချင်းပင် ဝင်ရောက်ထောက်ခံလာ၏.... "ဟုတ်တယ်ညီလေး.. မင်းက သဘာဝဓာတ် အမြောက်အမြားကို ထိန်းချုပ်နိုင်တယ်ဆိုပေမဲ့ မီးဓာတ်နဲ့ အကိုက်ညီဆုံးပဲဥစ္စာ.. မီးဓာတ်တစ်ခုတည်းကိုပဲ အထူးပြု ကျင့်ကြံပါလား.. မီးဓာတ်က ပြင်းထန်တဲ့ တိုက်စစ်အတွက်လည်း သိပ်ကောင်းတာ.. ပြီးတော့ မင်းမှာ မွေးရာပါ ညှို့ယူဖမ်းစားနိုင်စွမ်း ရှိနေတော့ အဲဒါကို အကူအညီအနေနဲ့ သုံးလို့ရတာပေါ့.. တိုက်ခိုက်နေရင်းနဲ့ ပြိုင်ဘက်ကို ညှို့ယူဖမ်းစားလိုက်တာကလည်း အလွန်ကောင်းမွန်တဲ့ လမ်းစဉ်တစ်ခုပဲလေ.."

ဟူပိုင်အနေဖြင့် မိဘနှစ်ပါး၏ စိုးရိမ်ပူပန်မှုများကို မည်သို့လျှင် နားမလည်ဘဲ ရှိပါအံ့နည်း။

သို့သော် သူက ကမ္ဘာခြားမှ ကူးပြောင်းလာသူ.. ပြန်လည်မွေးဖွားလာသူ တစ်ဦး မဟုတ်ပါလော။ အကယ်၍ ယခုကဲ့သို့ သာမန်လမ်းစဉ်လေးတစ်ခုကိုသာ လျှောက်လှမ်းမည်ဆိုပါက သူ ဤကမ္ဘာသို့ ရောက်လာရခြင်းမှာ အဓိပ္ပာယ်ရှိပါတော့မည်လော။

သူ နိုးထလာခဲ့သော ဝိညာဉ်သည် နတ်ဘုရားသားရဲ အမြီးကိုးချောင်းကောင်းကင်မြေခွေး ဖြစ်သည်။ မည်မျှပင် ခက်ခဲပူပန်ရပါစေ.. သူသည် အမြီးကိုးချောင်းကောင်းကင်မြေခွေး၏ အမည်နာမကို တိုက်ပွဲများဖြင့် ကမ္ဘာတည်သရွေ့ ကျော်ကြားစေကာ ဤဒိုလော့တိုက်ကြီးတစ်ခုလုံးကို တောက်ပလင်းလက်စေရမည်။

"ဖေဖေ.. မေမေ.. သားကို ဒီတစ်ကြိမ်တော့ တစ်ကိုယ်ကောင်းဆန်ခွင့် ပြုပါ.. သားရဲ့ ကိုယ်ပိုင်စိတ်ကူးကို စမ်းသပ်ကြည့်ချင်လို့ပါ.. အကယ်၍ အောင်မြင်သွားရင်ကောဟင်.. ဝိညာဉ်က ပေးသနားထားတဲ့ ဉာဏ်ပညာကို သား ယုံကြည်တယ်.. ဝိညာဉ်ကွင်းတစ်ခုစီက ဓာတ်စွမ်းအင်တစ်ခုစီကို ကိုယ်စားပြုတယ်.. သား နောက်ဆုံးအဆင့်အထိ ကျင့်ကြံပြီးသွားတဲ့အခါ ဓာတ်စွမ်းအင်မျိုးစုံကို ပေါင်းစပ်ဖို့အထိ စမ်းသပ်နိုင်မှာပါ.."

"ဝိညာဉ်စွမ်းရည် လိုအပ်ချက်အတွက်ကတော့ သားရဲ့ ကိုယ်ပိုင်စွမ်းအားနဲ့ ဝိညာဉ်စွမ်းရည်အသစ်တွေကို ဖန်တီးနိုင်လိမ့်မယ်လို့ သား ယုံကြည်မှု ရှိပါတယ်.."

ဟူပိုင်သည် မိဘနှစ်ပါးကို လေးနက်တည်ကြည်စွာ ကြည့်လျက် တောင်းဆိုလိုက်သည်။ ရှဲ့ထျန်းနှင့် ဟူလျဲ့ယောင်တို့သည် သူ၏ ယခုဘဝ မိဘအရင်းအချာများ ဖြစ်ကြသဖြင့် မိသားစု၏ ထောက်ခံမှုကို သူ အလွန်တရာ အလိုရှိနေမိခြင်း ဖြစ်၏။

သူ၏ အရင်ဘဝတွင် ငယ်စဉ်ကတည်းက မိဘနှစ်ပါးစလုံး ကွယ်လွန်သွားခဲ့သဖြင့် အစိုးရ၏ ထောက်ပံ့ကြေးမျိုးစုံဖြင့်သာ တက္ကသိုလ်တက်ခဲ့ရရှာသည်။ သို့ဖြစ်ရာ ယခုဘဝတွင်မူ မိဘများ ဘေးကင်းရန်နှင့် မိမိရသင့်ရထိုက်သော မိသားစု၏ နွေးထွေးမှုကို ရရှိရန် သူ အလွန် မျှော်လင့်မိသည် မဟုတ်ပါလား။

"ဖေဖေ.. မေမေ.. ညီလေး (အစ်ကိုကြီး) ရဲ့ ဆန္ဒကို လိုက်လျောပေးလိုက်ပါဦး.." ရှဲ့ယွဲ့နှင့် ဟူလီနာတို့က တစ်ပြိုင်နက်တည်း ဝင်ရောက်ပြောဆိုပေးလာကြသည်။

ရှဲ့ယွဲ့က တည်ငြိမ်စွာဖြင့်.. "ညီလေး ရှုံးနိမ့်သွားရင်တောင် ဘာဖြစ်လဲ.. သူ့ရှေ့မှာ ကာကွယ်ပေးမယ့် အစ်ကိုကြီး ငါ ရှိနေတာပဲဥစ္စာ.. တို့မောင်နှမ သုံးယောက်လုံးရဲ့ ပါရမီကလည်း မညံ့ကြဘူး.. ဘာဝန်ထုပ်ဝန်ပိုးမှလည်း ရှိတာမဟုတ်ဘူး.. ညီလေး သွားချင်တဲ့ လမ်းကို ဘာလို့ လျှောက်ခွင့်မပေးနိုင်ရမှာလဲ.."

ရှဲ့ယွဲ့၏ လေးနက်တည်ကြည်သော မျက်နှာပေးကို ကြည့်ကာ ရှဲ့ထျန်းနှင့် ဟူလျဲ့ယောင်တို့ ဇနီးမောင်နှံမှာ ဆွံ့အသွားကြရရှာသည်။ ဟူပိုင်၏ မျက်ဝန်းအစုံသည်လည်း အလွန်တရာ လေးနက်ရှုပ်ထွေးသွားပြီး နောက်ဆုံးတွင် ရင်ထဲမှ လှိုက်လှိုက်လှဲလှဲ စကားလုံးများ ထွက်ပေါ်လာခဲ့တော့သည်.... "ကျေးဇူးတင်ပါတယ်.. အစ်ကိုကြီး.."

ရှဲ့ယွဲ့အနေဖြင့် ဟူပိုင်ထံမှ ယခုကဲ့သို့ စစ်မှန်သော သံယောဇဉ် ခံစားချက်မျိုးကို မြင်တွေ့ရသည်မှာ ဤတစ်ကြိမ်သည် ပထမဆုံး ဖြစ်၏။ သူသည် ဝမ်းသာမိသကဲ့သို့ စိတ်ပိုင်းဖြတ်မှုလည်း ပိုမိုပြင်းထန်သွားခဲ့သည်.... အစ်ကိုကြီးတစ်ယောက်ဖြစ်တဲ့အတွက် ညီလေးနဲ့ ညီမလေးရဲ့ ရှေ့မှာ သေချာပေါက် မတ်မတ်ရပ်ပြီး ကာကွယ်ပေးရမည်။

ဤသည်မှာ ယောကျာ်းကောင်းတို့၏ ကတိသစ္စာပင် ဖြစ်ချေတော့မည်။

အမှန်တကယ်တော့ ဤအရာမှာ ဟူပိုင်၏ အပြစ်မဟုတ်ပေ။ သူသည် မွေးကတည်းက အရင်ဘဝက အမှတ်သညာများကို သယ်ဆောင်လာခဲ့သဖြင့် သူ၏ အတွေးအခေါ်များသည် ရှဲ့ယွဲ့ထက် အနှစ်နှစ်ဆယ်ခန့် ပိုမိုရင့်ကျက်နေသည်။ ထို့ကြောင့် မိမိရှေ့မှ ကလေးငယ်လေးကို 'အစ်ကိုကြီး' ဟု ရင်ထဲကပါအောင် ခေါ်ဆိုရန် အနည်းငယ် ခက်ခဲနေခြင်းသာ ဖြစ်၏။

သို့သော် ယခုအချိန်တွင်မူ သူသည် ရှဲ့ယွဲ့ကို အစ်ကိုအရင်းအဖြစ် လုံးဝ အသိအမှတ်ပြုသွားခဲ့ပြီ ဖြစ်သည်။ မူရင်းဝတ္ထုထဲက ရှဲ့ယွဲ့ကိုကတည်းက သူ သဘောကျခဲ့ဖူးသည် မဟုတ်ပါလား။ သူသည် မည်သို့သော အခြေအနေမျိုးတွင်မဆို ဟူလီနာ့ရှေ့ကနေ မမှိတ်မသုန် ကာကွယ်ပေးတတ်သည့် အစ်ကိုကောင်းတစ်ဦး ဖြစ်ခဲ့သည်။ ဤကဲ့သို့သော အခြေအနေမရှိသည့် မိသားစု သံယောဇဉ်မှာ အမှန်တကယ်ပင် မြတ်နိုးဖွယ်ကောင်းလှချေသည်။

ရှဲ့ထျန်းသည် ရှေ့မှ ကလေးငယ် သုံးဦးကို ကြည့်ကာ သက်ပြင်းအရှည်ကြီး ချလိုက်မိသည်.... "ကဲ.. ဒါဆိုရင်တော့ မင်းမေမေနဲ့ငါ မနက်ဖြန်ပဲ ပိုင်အာကို ခေါ်ပြီး ဝိညာဉ်သားရဲတွေ ရှာဖို့ ကြယ်တာရာတောအုပ်ကြီးဆီ သွားကြမယ်.. ယွဲ့အာနဲ့ နာနာကတော့ တခြားသူတွေ သတိမထားမိအောင် အိမ်မှာပဲ နေရစ်ခဲ့ကြ.. အထူးသဖြင့် နာနာ.. ဒီရက်ပိုင်းအတွင်း အရှင်မင်းကြီးက မင်းကို လာရှာကောင်း လာရှာလိမ့်မယ်.. မင်းရဲ့ အစ်ကိုကြီးအတွက် တတ်နိုင်သလောက် ဖုံးဖုံးဖိဖိ လုပ်ပေးထားရမယ်နော်.."

ရှဲ့ထျန်း၏ အစီအစဉ်မှာ အရင်လုပ်ပြီးမှ နောက်မှ အစီရင်ခံမည့် ဗျူဟာ ဖြစ်သည်မှာ ထင်ရှားလှပေသည်။ ပီပီတုန်းထက် အလျင်ဦးအောင် ဟူပိုင်၏ ပထမဆုံး ဝိညာဉ်ကွင်းကို ရယူပေးထားလိုက်ပါက ပီပီတုန်းအနေဖြင့်လည်း ယင်းကို လက်ခံရုံမှတစ်ပါး အခြားမရှိဘဲ ဟူပိုင်၏ ကျင့်ကြံခြင်းလမ်းစဉ်ကို ပြန်လည်သုံးသပ်ရပေလိမ့်မည်။

ထိုအချိန်ကျမှ သူတို့လင်မယား နှစ်ဦးအနေဖြင့် တစ်စုံတစ်ရာ အပြစ်ပေးခံရမည် ဖြစ်သော်လည်း အလွန်အမင်း ပြင်းထန်လိမ့်မည် မဟုတ်ပေ။ အဆုံးစွန်၌ သူ၏သားသည် မွေးရာပါ ဝိညာဉ်စွမ်းအားအပြည့် သခင်ဖြစ်ပြီး လမ်းခုလတ်တွင် မသေဆုံးခဲ့ပါက အမည်ခံဒိုလော့အဆင့်သို့ ရောက်ရှိရန် သေချာပေါက် အာမခံချက် ရှိနေသည် မဟုတ်ပါလား။

ဤအချက်တစ်ခုတည်းဖြင့်ပင် ဟူပိုင်၏ မိဘများဖြစ်ကြသော သူတို့နှစ်ဦးမှာ ဘာမျှ စိုးရိမ်စရာ ရှိလိမ့်မည် မဟုတ်ပေ။

"ဒါဆို မင်းရဲ့ ပထမဆုံး ဝိညာဉ်ကွင်းအတွက် ဘယ်လိုဓာတ်သတ္တိရှိတဲ့ ဝိညာဉ်သားရဲကို စုပ်ယူချင်လဲသား.. မင်း အခုလောလောဆယ် စည်းစိမ်အပြုနိုင်ဆုံးက မီးဓာတ်ဆိုတော့ မီးဓာတ်ရှိတဲ့ ဝိညာဉ်သားရဲကိုပဲ ရှာကြမလား.." ရှဲ့ထျန်းက မေးမြန်းလိုက်၏။

ဟူပိုင်၏ ကိုယ်ပိုင်အာရုံခံစားချက်အရ မည်သည့်ဓာတ်သတ္တိရှိသော ဝိညာဉ်သားရဲကိုမဆို စုပ်ယူလိုက်ပါက ထိုဓာတ်စွမ်းအင်အပေါ် ထိန်းချုပ်နိုင်စွမ်းကို အတိုင်းအတာတစ်ခုအထိ မြှင့်တင်ပေးနိုင်မည် ဖြစ်သည်။ ရှဲ့ထျန်း၏ အမြင်တွင်မူ မီးဓာတ်စွမ်းအင်က အသင့်တော်ဆုံး ဖြစ်၏။

သို့သော် ဟူပိုင်သည် ခဏမျှ စဉ်းစားလိုက်ပြီးနောက် ခေါင်းကို ခါယမ်းလိုက်သည်.... "ဖြစ်နိုင်ရင် သား လျှပ်စီးဓာတ်သတ္တိရှိတဲ့ ဝိညာဉ်သားရဲကိုပဲ လိုချင်ပါတယ်.. သွေးနှောမှုအဆင့် ရှားပါးလေလေ ပိုကောင်းလေလေပါပဲ.."

ရှဲ့ထျန်းသည် မျက်မှောင်ကြုတ်သွားကာ.... "ဘာဖြစ်လို့လဲသား.. မင်း စောစောကပဲ လျှပ်စီးဓာတ်က ပြင်းထန်လွန်းလို့ ထိန်းချုပ်ရ ခက်တယ်လို့ ပြောခဲ့တယ် မဟုတ်လား.."

ဟူပိုင်က ပြန်လည်ဖြေကြားလိုက်သည်.... "ဟုတ်ပါတယ်.. ဒါပေမဲ့ ကောင်းကင်မြေခွေးနယ်ပယ်ရဲ့ မြှင့်တင်မှုနဲ့ဆိုရင် သား မနည်းထိန်းချုပ်လို့ ရပါတယ်.. အကယ်၍ ဝိညာဉ်ကွင်းတစ်ခုသာ ထပ်ပေါင်းလိုက်ရင် ဘာပြဿနာမှ ရှိမှာမဟုတ်တော့ပါဘူး.. သားရဲ့ ပထမဆုံး ဝိညာဉ်ကွင်းအတွက် လျှပ်စီးဓာတ်သတ္တိရှိတဲ့ ဝိညာဉ်သားရဲကို ရွေးချယ်ရတဲ့ စိတ်ကူးကတော့.... သား လျှပ်စီးဓာတ်နဲ့ ခန္ဓာကိုယ်ကို ပွတ်သပ်သန့်စင်ချင်လို့ပါ.."

"ဘာ.."

"မဖြစ်ဘူး.. မဖြစ်ဘူး.. အဲဒါက အန္တရာယ် အရမ်းများလွန်းတယ်.. မင်း ဘာတွေ ပြောနေတာလဲဆိုတာကိုရော သိရဲ့လား.. ဒီတိုက်ကြီးပေါ်မှာ လျှပ်စီးပြာရောင်နဂါးမင်းမျိုးနွယ်စုက လျှပ်စီးဓာတ်ကို အသုံးအများဆုံးပဲ.. ဒါပေမဲ့ သူတို့တွေ လျှပ်စီးနဲ့ ခန္ဓာကိုယ်ကို သန့်စင်တာ မင်း မြင်ဖူးလို့လား.. နည်းနည်းလေး မှားယွင်းသွားတာနဲ့ ဝိညာဉ်စွမ်းအား တန်ပြန်သက်ရောက်ပြီး အသက်အန္တရာယ် ရှိနိုင်တယ်နော်.."

ဟူပိုင်၏ မျက်ဝန်းအစုံတွင်မူ ရူးသွပ်ရဲရင့်သော အရိပ်အယောင်များ လင်းလက်နေတော့သည်.... "သူတို့တွေက လျှပ်စီးဓာတ်ကို တကယ် ထိန်းချုပ်နိုင်ကြလို့လား.. သူတို့က ဝိညာဉ်ကွင်းတွေအပေါ်မှာပဲ အားကိုးနေကြတာလေ.. သားမှာက မွေးရာပါ ဓာတ်စွမ်းအင် စည်းစိမ်ပြုနိုင်စွမ်းရှိသလို နယ်ပယ်ရဲ့ မြှင့်တင်မှုလည်း ရှိတယ်.. သူတို့တွေက သားကို ဘယ်လိုလုပ် ယှဉ်နိုင်မှာလဲ.."

ထိုစဉ်မှာပင် ဟူပိုင်၏ နယ်ပယ်သည် တစ်ဖန်ပြန်လည် ပြန့်ကားသွားခဲ့ပြီး သူ၏ ခန္ဓာကိုယ်ပတ်ပတ်လည်တွင် လျှပ်စီးအလင်းတန်းငယ် အချို့ တဖျတ်ဖျတ် လက်ကနဲ ပေါ်ထွက်လာခဲ့သည်။ သူ၏ ပုံစံမှာ အလွန်တရာ ယုံကြည်ချက် ပြည့်ဝနေပြီး ကောင်းကင်မှ ဆင်းသက်လာသော မိုးကြိုးနတ်ဘုရားတစ်ပါးအလား ထင်မှတ်ရတော့သည်။

နောက်တစ်နေ့ နံနက်အစောပိုင်းတွင် ရှဲ့ထျန်းသည် မြင်းရထားတစ်စီးကို ငှားရမ်းလိုက်ပြီး သူတို့ သုံးဦးလုံး အထဲတွင် ထိုင်ကာ မြို့ပြင်သို့ တိုက်ရိုက် ထွက်ခွာလာခဲ့ကြသည်။

ဤနေရာတွင် သူတို့ သုံးဦးလုံးသည် မျက်နှာကို အနည်းငယ် ရုပ်ဖျက်ထားကြပြီး ဟူလျဲ့ယောင်၏ သိမ်မွေ့သော ညှို့ယူမှု လမ်းညွှန်ချက်ကြောင့် မြို့တံခါးစောင့် စစ်သားများသည် မည်သည့် ထူးခြားမှုကိုမျှ သတိမပြုမိလိုက်ကြပေ။

ဝိညာဉ်မြို့တော်နှင့် အတန်ငယ် ဝေးကွာသွားသောအခါ ရှဲ့ထျန်းသည် အနီးအနားရှိ မြို့ငယ်လေးတစ်ခုတွင် မြင်းရထားကို မြန်နှုန်းမြင့်မြင်း သုံးကောင်နှင့် လဲလှယ်လိုက်သည်။ သူတို့ သုံးဦးလုံးသည် မြင်းများကို စီးနင်းလျက် ကြယ်တာရာတောအုပ်ကြီး၏ အစွန်အဖျားဆီသို့ တိုက်ရိုက် ဒုန်စိုင်း မောင်းနှင်ခဲ့ကြတော့သည်။

ရက်အနည်းငယ်ခန့် ခရီးနှင်ပြီးနောက် နောက်ဆုံးတွင် သူတို့ သုံးဦးစလုံး ကြယ်တာရာတောအုပ်ကြီး၏ အပြင်ဘက် ဝန်းကျင်သို့ ရောက်ရှိလာခဲ့ကြသည်။ သူတို့သည် အနီးအနားရှိ ဆိုင်တစ်ဆိုင်တွင် ခေတ္တရပ်နားကာ ခန္ဓာကိုယ်အမောအပန်းများကို ဖြေဖျောက်ရင်း နောက်တစ်နေ့တွင် သင့်တော်သော လျှပ်စီးဓာတ်သတ္တိရှိ ဝိညာဉ်သားရဲကို ဝင်ရောက်ရှာဖွေရန် အသင့်ပြင်ဆင်လိုက်ကြတော့သည်။

ဤပထမဆုံး ဝိညာဉ်ကွင်းသည် ဟူပိုင်အတွက် အလွန်တရာ အရေးကြီးလှပေသည်။ သူတို့သည် ရှားပါးသော သွေးနှောမှုရှိသည့် လျှပ်စီးဓာတ်သတ္တိရှိ ဝိညာဉ်သားရဲကို ရရှိရန် တတ်နိုင်သမျှ ကြိုးစားရှာဖွေကြရမည် ဖြစ်၏။ ဝိညာဉ်သားရဲအတွင်း ပါဝင်သော လျှပ်စီးဓာတ်သတ္တိ သန့်စင်လေလေ ဟူပိုင်အတွက် ရရှိမည့် အကျိုးကျေးဇူးက ကြီးမားလေလေ ဖြစ်ရော့မည်။

သို့သော် စိတ်မကောင်းစရာမှာ ဟူပိုင်၏ အမှတ်သညာထဲတွင် အထွတ်အထိပ် လျှပ်စီးဝိညာဉ်သားရဲဟူ၍ မရှိချေ။ သို့မဟုတ်ပါက ပထမဆုံး ဝိညာဉ်ကွင်း၏ အသက်သက်တမ်း ကန့်သတ်ချက်ကို လျှော့ချရလျှင်ပင် သူသည် ယင်းကို သေချာပေါက် စုပ်ယူလိုမိမည် ဖြစ်သည်။

သူ့အတွက်မူ ဝိညာဉ်သားရဲ၏ မွေးရာပါ ဓာတ်သတ္တိသန့်စင်မှုသည် ဝိညာဉ်သားရဲ၏ ကျင့်ကြံခြင်း အသက်သက်တမ်းထက် ပိုမိုအရေးကြီးလှပေသည်။

ဝိညာဉ်ကွင်း၏ သက်တမ်းကိုမူ နောင်တစ်ချိန်တွင် မြှင့်တင်နိုင်မည့် အခွင့်အရေး ရှိနိုင်သော်လည်း ဝိညာဉ်ကွင်းတစ်ခုကို စုပ်ယူပြီးသွားပါက ပြန်လည်ပြောင်းလဲရန်မှာမူ ထိုမျှ မလွယ်ကူလှသည် မဟုတ်ပါလော။

ဝိညာဉ်သားရဲများထဲတွင် လျှပ်စီးဓာတ်သတ္တိ အသင့်အတင့် သန့်စင်သော သတ္တဝါများမှာ လျှပ်စီးဓာတ်သတ္တိရှိပြီး အစစ်အမှန် နဂါးသွေးနှောမှု အနည်းငယ် ပါဝင်သော နဂါးမျိုးနွယ်ဝင် ဝိညာဉ်သားရဲငယ်များသာ ဖြစ်လိမ့်မည်။ သို့သော်လည်း ဟူပိုင်သည် ထိုအရာက လုံလောက်အောင် မကောင်းသေးဟု ခံစားနေရဆဲ ဖြစ်ပြီး သူ၏ အမှတ်သညာထဲတွင်မူ အလွန်တရာ သင့်တော်လှသော သစ်ပင်စနစ်သုံး ဝိညာဉ်သားရဲတစ်မျိုး ရှိနေခဲ့ချေတော့သည်။