အခန်း(၃၀) - ဟူပိုင်၏ ဖျောင်းဖျမှု၊ ဒုတိယမြောက် အလင်းဝိညာဉ်စွမ်းရည်

ထိုစဉ်အချိန်၌ ချန်တောက်လျိုသည် အလွန်အပြုသဘောဆောင်ကာ တွေးတောနေခဲ့သည်။ သူနှင့် ပိုဆိုင်ရှီးတို့သည် 'ကောင်းကင်တမန်နတ်ဘုရား' နှင့် 'ပင်လယ်နတ်ဘုရား' တို့၏ လက်အောက်ခံ နန်းတော်ချုပ်များ ဖြစ်ကြသည့်အတွက်... တစ်နေ့နေ့တွင် မိမိတို့၏ ဆက်ခံသူများအတွက် ကိုယ်စီအသက်စတေး ကြရမည်မှာ မလွဲဧကန်ပင်။

ဤဘဝတွင် သူ ချန်တောက်လျိုအနေဖြင့် ပိုဆိုင်ရှီးနှင့် ဆုံဆည်းခွင့် မရနိုင်တော့သည့်တိုင်အောင်... နောင်ကျရင် အတူတူ အသက်စတေးခွင့်ရဖို့ဆိုတာ မဖြစ်နိုင်စရာ မရှိဘူးမဟုတ်ပါလား။

သို့သော်လည်း သူ၏ ထိုအတွေးမှာ အနည်းငယ် လွန်ကဲပြီး ရယ်စရာကောင်းနေသည်ဟု သူ ပြန်လည် ခံစားလိုက်ရသည်။

ချန်ရန်ရွှယ်က သူ၏ မြေးအရင်းဖြစ်သဖြင့် သူမအတွက် အသက်စတေးရန် အလွန်တရာ အသင့်ရှိသော်လည်း... တကယ်လို့ ဟူပိုင်သာ ပင်လယ်နတ်ဘုရားရဲ့ ကိုးပါးသောစမ်းသပ်ချက် ကို ရရှိခဲ့ရင် ပိုဆိုင်ရှီးကကော သူ့အတွက် အသက်စတေးပေးပါ့မလား။

မဖြစ်နိုင်လောက်ပါချေ။ ဘယ်သူကမှ သူစိမ်းတစ်ယောက်အတွက် အသေခံပေးချင်ကြမှာ မဟုတ်ဘူးလေ။

ဤကိစ္စမှာ လက်ရှိတွင် အတွေးတစ်ခုမျှသာ ရှိသေးပြီး... အနည်းဆုံးတော့ နတ်ဘုရားစမ်းသပ်ချက်အတွက် အရန်အစီအစဉ်တစ်ခု ဖြစ်ပေသည်။

ပီပီတုန်းသည် ဟူပိုင်အား ပူဇော်သက္ကာနန်းဆောင်မှ ခေါ်ဆောင်လာခဲ့ပြီးနောက်... နန်းတော်ချုပ်သို့ တိုက်ရိုက် ရွှေ့ပြောင်းမသွားဘဲ တောင်ကုန်းပေါ်၌ သူနှင့်အတူ လမ်းလျှောက်ခဲ့သည်။

နှစ်ဦးစလုံး ဆိတ်ဆိတ်ငြိမ်သက်နေကြသည်။ ဟူပိုင် ခဏမျှ တုံ့ဆိုင်းနေပြီးမှ သတ္တိမွေးကာ ဆိုလိုက်သည် ။

"ဆရာ... ဆရာနဲ့ အစ်မရွှယ်တို့ရဲ့ ဆက်ဆံရေးက ဒီထက် ပိုကောင်းအောင် လုပ်လို့မရဘူးလားဟင်။ ပူဇော်သက္ကာနန်းဆောင်က အဘိုးတွေကော အစ်မရွှယ်ကော ကျွန်တော့်အပေါ် အများကြီး ကောင်းကြပါတယ်။ ဆရာ့ရဲ့ တပည့်တစ်ယောက်အနေနဲ့ ဆရာတို့ သားအမိနှစ်ယောက် ဒီလိုမျိုး စိမ်းကားနေကြတာကို ကျွန်တော် မမြင်ချင်ဘူးဗျာ"

ဟူပိုင်သည် ဤကိစ္စ၏ အကြောင်းတရားနှင့် အကျိုးဆက်အားလုံးကို ကောင်းကောင်း သိရှိထားသည်။ သို့သော် ကိစ္စရပ်တွေက ဖြစ်ပျက်ပြီးသွားခဲ့ပြီမို့ ဘာတတ်နိုင်တော့မည်နည်း။

ပီပီတုန်း၏ ရင်ထဲတွင် ချန်ရန်ရွှယ်အပေါ် ချစ်ခြင်းမေတ္တာ ရှိနေသေးသည်မှာ ထင်ရှားလှပြီး... မူလဇာတ်လမ်းထဲတွင်လည်း နောက်ဆုံး၌ သူမတို့ သားအမိနှစ်ဦး နားလည်မှုလွဲတာတွေ ရှင်းလင်းသွားခဲ့ကြသည်။ ယခုသူ မျှော်လင့်မိသည်မှာ ဤပြန်လည်သင့်မြတ်ရေးအရှိန်အဟုန်ကို အနည်းငယ် ပိုမိုမြန်ဆန်လာစေရန်သာ ဖြစ်သည်။

မဟုတ်လျှင် နောင်ကျရင် ကြားညှပ်ပြီး ဘေးကျပ်နံကျပ် ဖြစ်ရမည့်သူမှာ သေချာပေါက် သူကိုယ်တိုင်သာ ဖြစ်လိမ့်မည်။

ပီပီတုန်းက သူ၏ ဆရာဖြစ်ပြီး၊ ချန်ရန်ရွှယ်ကလည်း သူနှင့် အလွန်ခင်မင်ရသည့် မိတ်ဆွေဖြစ်ရာ... ၎င်းတို့နှစ်ဦးအကြား ကြီးမားသော ပဋိပက္ခတစ်ခုခု ဖြစ်ပွားလာပါက သူ မည်သူ့ဘက်က ကူညီရမည်နည်း။

ပီပီတုန်းက ဘာမှ ပြန်မပြောသေးချေ။ ပုံမှန်အားဖြင့် အခြားသူတစ်ဦးဦးက သူမကို ဤကဲ့သို့ လာရောက်ပြောဆိုပါက သေချာပေါက် ပါးစပ်ပိတ်ခိုင်းခြင်း သို့မဟုတ် တိုက်ခိုက်ခြင်း ခံရလိမ့်မည် ဖြစ်သော်လည်း... ဟူပိုင်အပေါ်တွင်မူ သူမ ထိုသို့ မလုပ်ရက်ပါချေ။

အစပိုင်းတွင် ဟူပိုင်အား တပည့်အဖြစ် လက်ခံခဲ့ခြင်းမှာ သူ၏ ပါရမီကြောင့် ဖြစ်သော်လည်း... ဤကာလအတောအတွင်း အနီးကပ် ထိတွေ့ဆက်ဆံခဲ့ပြီးနောက်တွင် သူမရင်ထဲ၌ ငြင်းဆန်လိုစိတ်များ မရှိတော့ဘဲ သူ့အပေါ် သံယောဇဉ်ပင် အနည်းငယ် တွယ်တာလာခဲ့ရသည်။

ထို့အပြင် ဟူပိုင်နှင့် ဟူလီနာတို့မှာ အမြွှာမောင်နှမများ ဖြစ်ကြသဖြင့် ရုပ်ရည်ချင်းလည်း တော်တော်လေး ဆင်တူကြသည်။ ဟူပိုင်က ဆံပင်ရှည် နှင်းပွင့်ရောင်ဖြစ်ပြီး ဟူလီနာက ဆံပင်တို အညိုရောင်ဖြစ်နေ၍ ပုံစံချင်း ကွဲပြားနေခြင်းသာ ဖြစ်၏။

မူလက ထိုကိစ္စ ဖြစ်ပျက်ခဲ့ပြီးနောက်တွင် သူမသည် ယောက်ျားသားဟူသမျှကို အလွန်အမင်း ရွံရှာမုန်းတီးခဲ့သော်လည်း... ယခု ဟူပိုင်နှင့် ပတ်သက်လာလျှင်မူ၊ သူ၏ ဝိညာဉ်ထူးခြားချက်ကြောင့်လား သို့မဟုတ် အခြားအကြောင်းရင်းကြောင့်လားမသိ၊ ဟူပိုင်ကတော့... ခြွင်းချက်တစ်ခု ဖြစ်နိုင်သည်ဟု သူမ ခံစားလိုက်ရသည်။

ဟူပိုင် ပြောဆိုသည့် စကားများကို သူမ နားလည်ပြီး... သူ ဘာကို စိုးရိမ်နေသလဲဆိုသည်ကိုလည်း သဘောပေါက်ပါသည်။

ပီပီတုန်းက ဟူပိုင်၏ နှင်းပွင့်ရောင် ဆံနွယ်ရှည်လေးများကို အသာအယာ ပွတ်သပ်ပေးရင်း ခေါင်းငုံ့ကာ ပြုံး၍ ဆိုလိုက်သည်။

"စိတ်ချပါ... ငါနဲ့ သူမကြားက ဆက်ဆံရေးအတွက် မင်း စိုးရိမ်မနေပါနဲ့၊ ငါ့ကို အချိန်နည်းနည်းလောက်ပဲ ပိုပေးပါ"

ဟူပိုင်သည် ပီပီတုန်းထံမှ အဆူခံရလိမ့်မည်ဟု ထင်မှတ်ထားခဲ့သော်လည်း ရလဒ်က ဤသို့ ဖြစ်လာလိမ့်မည်ဟု မမျှော်လင့်ထားခဲ့ချေ။

ဒါဟာ တကယ်ပဲ ပီပီတုန်း ဟုတ်ရဲ့လား။

သူမ အတော်လေး နူးညံ့သိမ်မွေ့သွားသလိုပဲ။

အကြောင်းရင်းကို အတိအကျ မသိရသော်လည်း ပီပီတုန်းကိုယ်တိုင်က ထိုသို့ ပြောလာကတည်းက သူမဘက်က တစ်ခုခု လုပ်ဆောင်တော့မည်ဟု ဆိုလိုခြင်း ဖြစ်သည်။ သူမကို အချိန် ထပ်ပေးလိုက်ရုံပေါ့။

သို့သော်... နောင်ကျရင် ချန်ရန်ရွှယ်တစ်ယောက် သူမဖခင် 'ချန်ရွှင်ကျီး' သေဆုံးရခြင်းရဲ့ အမှန်တရားကို သိရှိသွားတဲ့အခါ စိတ်ဒဏ်ရာအကြီးအကျယ် ရသွားမလား။

ဤကိစ္စကို ဘဝတစ်လျှောက်လုံး လျှို့ဝှက်ထားပြီး ချန်ရွှင်ကျီး သေဆုံးမှုကို 'ထန်ဟောက်' အပေါ်မှာပဲ ပုံချထားဖို့ ဆိုတာကတော့ စိတ်ကူးယဉ်သက်သက်သာ ဖြစ်လိမ့်မည်။

ချန်ရန်ရွှယ် ကောင်းကင်တမန် ကိုးပါးသောစမ်းသပ်ချက်ကို ရင်ဆိုင်ရမည့်အချိန်တွင် အမှန်တရားက သေချာပေါက် ပေါ်ထွက်လာလိမ့်မည်။ ထိုစဉ် ကိုးခုမြောက် စမ်းသပ်ချက်အတွင်း အရာရာကို တတ်စွမ်းနိုင်သော ချန်တောက်လျိုသာ ဝင်ရောက်မစွက်ဖက်ခဲ့လျှင်၊ ချန်ရန်ရွှယ်နှင့် ပီပီတုန်းတို့၏ သွေးသားတော်စပ်မှုနှင့် ပေါင်းစပ်ပြီး ပီပီတုန်းနှင့် ပတ်သက်သည့် စမ်းသပ်ချက်အဆင့်ကို ချန်ရန်ရွှယ် ကျော်ဖြတ်နိုင်ခဲ့မည် မဟုတ်ချေ။

နောက်တစ်ပတ်လုံးလုံးတွင်... သူတို့ သုံးယောက်စလုံး နေ့ခင်းဘက်၌ နန်းတော်ချုပ်အတွင်းရှိ အခန်းတစ်ခုတွင် သီအိုရီဆိုင်ရာ ဗဟုသုတများကို လေ့လာကြသည်။ စောစောစီးစီး လေ့လာပြီးပါက ကိုယ်ပိုင်အချိန်အဖြစ် ဖတ်ရှုကြ၏။ ဘာပဲဖြစ်ဖြစ် ဝိညာဉ်နန်းတော်ထဲတွင် စာအုပ်ပုံကြီးများ ရှိနေသဖြင့် မိမိတို့ စိတ်ဝင်စားရာကို ရှာဖွေဖတ်ရှုနိုင်သည်။

သို့သော် သတိပြုရမည့်အချက်မှာ... စာဖတ်လေ့လာမှု စောစောပြီးသွားလျှင်ပင် ဝိညာဉ်စွမ်းအားကို မကျင့်ကြံဘဲ စိတ်ဝင်စားစရာ စာအုပ်များကိုသာ ဆက်လက်ရှာဖွေရန် ပီပီတုန်းက အကြံပြုထားခြင်း ဖြစ်သည်။

ဝိညာဉ်စွမ်းအား ကျင့်ကြံခြင်း သင်ခန်းစာများကိုမူ ယေဘုယျအားဖြင့် ညဘက်တွင်သာ ထားရှိသည်။

ဗဟုသုတ ရှာဖွေခြင်းက အနာဂတ်တွင် မစ်ရှင်များ သွားရောက်လုပ်ဆောင်သည့်အခါ အောင်မြင်မှုနှုန်းကို မြင့်မားစေနိုင်သဖြင့် သူတို့အတွက် အလွန်အရေးကြီးလှသည်။

ပြင်ပကမ္ဘာရှိ ဝိညာဉ်သခင်များ၏ ဝိညာဉ်များမှာ အမျိုးမျိုးအဖုံဖုံ ရှိကြသလို၊ ဝိညာဉ်သားရဲများမှာလည်း မျိုးစုံလှသည်။ မစ်ရှင်သွားသည့်အခါတိုင်း အမြဲတမ်း အတူပါလာမည့် ပညာရှိဒိုလော့ တွေကပဲ လိုက်လံပြောပြနေလိမ့်မည်ဟု မျှော်လင့်ထား၍ မရပါချေ။

ထို့အပြင် အတူပါလာသည့် ပညာရှိဒိုလော့ သို့မဟုတ် ဆရာတိုင်းတွင် ကျွမ်းကျင်သည့် နယ်ပယ်ချင်း မတူညီကြချေ။ အခြားသူများကို အားကိုးနေမည့်အစား မိမိကိုယ်ကိုယ် မြှင့်တင်ထားခြင်းက အကောင်းဆုံး ဖြစ်ပေသည်။

ဤကိစ္စအပေါ် သူတို့ သုံးယောက်လုံး မည်သည့်ကန့်ကွက်မှုမျှ မရှိကြဘဲ၊ အထူးသဖြင့် ဟူပိုင်သည် ဤကမ္ဘာရှိ အမျိုးမျိုးသော ဝိညာဉ်များနှင့် ဝိညာဉ်သားရဲများအကြောင်းကို အလွန် စိတ်ဝင်စားနေခဲ့သည်။

သူသည် မူလဇာတ်လမ်းကို သိရှိထားသော်လည်း၊ မူလဇာတ်လမ်းထဲတွင် ထန်ဆန်းတို့ လေ့လာခဲ့သမျှ အရာအားလုံးကို အသေးစိတ် ဖော်ပြမထားဘဲ အကျဉ်းချုပ်သာ ပြထားခြင်း ဖြစ်သည်။

'ရေခဲနှင့်မီး ယင်ယန်ရေကန်' ထဲက မသေဆေးမြက်နုများအကြောင်း ဆိုလျှင်ပင်... ဇာတ်လမ်းထဲတွင် ပါဝင်ခဲ့သည့် အရာများကိုသာ သူ သိရှိခြင်း ဖြစ်သည်။ တကယ်လို့ ဇာတ်လမ်းထဲ မပါခဲ့တဲ့ အရာတွေ ရှိနေရင်ကော။

၎င်းကို အတွေ့အကြုံအပေါ် မူတည်ပြီး ဆုံးဖြတ်ရမည်ဖြစ်ကာ... ဤကိစ္စနှင့် ပတ်သက်၍ သုတေသန ပိုမိုပြုလုပ်ထားသည့် 'ဂန္ဓာရဒိုလော့' ထံတွင် သွားရောက်လမ်းညွှန်မှု တောင်းခံခြင်းက အကောင်းဆုံး ဖြစ်လိမ့်မည်။

ဂန္ဓာရဒိုလော့သည် ထိုမသေဆေးမြက်နုများအကြောင်း ဗဟုသုတကို ဘယ်ကရခဲ့တာလဲ။ သေချာပေါက် အရင်းအမြစ်တစ်ခု ရှိရမည်!

သူ့ရဲ့ ဝိညာဉ်က 'ထူးကဲလှတဲ့ ကောင်းကင်ဂန္ဓမာပန်း' ဖြစ်နေရုံနဲ့တင် ဒါတွေကို အလိုအလျောက် သိနေတယ်ဆိုရင်တော့ အဓိပ္ပာယ်မရှိလွန်းရာ ကျလိမ့်မည်။

ထို့ကြောင့် ဟူပိုင်က ဂန္ဓာရဒိုလော့၏ မသေဆေးမြက်နု သုတေသနများမှာ ဝိညာဉ်နန်းတော်မှ လာခြင်းဖြစ်နိုင်သည်ဟု ကောက်ချက်ချလိုက်ပြီး၊ မဟုတ်ရင်လည်း သူကိုယ်တိုင် သွားရောက်မေးမြန်းကြည့်ရုံပင်။

သူသည် အချိန်အားလုံးကို အဆင့် တက်ဖို့ တစ်ခုတည်းမှာတင် အလောတကြီး မသုံးချင်ဘဲ... သူ၏ အခြေခံအုတ်မြစ် အားလုံးကို ခိုင်မာအောင် အရင်လုပ်လိုသည်။

ဘာပဲဖြစ်ဖြစ် အဆင့်မြင့်နေရုံမျှနှင့် အရာရာကို ကိုယ်စားမပြုနိုင်ပါချေ။ စစ်မှန်သော ပါရမီရှင်များ ဆိုသည်မှာ မိမိထက် အဆင့်မြင့်သည့် ပြိုင်ဘက်များကို ကျော်ဖြတ်တိုက်ခိုက်နိုင်စွမ်း ရှိကြသည် မဟုတ်ပါလား။

မိမိထက် အဆင့်မြင့်သူကို ကျော်ဖြတ်တိုက်ခိုက်နိုင်ရန်အတွက်... မိမိတွင် အစဉ်အမြဲ အားကိုးရမည့် ဝှက်ဖဲ များ ရှိနေရန် လိုအပ်သည်။ ယခု သူ့မှာ ရှိနေပြီလား...

သုံးယောက်ပေါင်း ဝိညာဉ်ပေါင်းစပ်စွမ်းရည် နှင့် 'ကောင်းကင်မြေခွေးနယ်ပယ်' တို့ကို ဖယ်ထုတ်လိုက်လျှင်... လက်ရှိတွင် သူ့၌ အားကိုးလောက်စရာ ဝှက်ဖဲကောင်းကောင်း မရှိသေးချေ။

မိုးကြိုးဓာတ်သဘာဝဖြင့် ကိုယ်ပိုင်ဖန်တီးထားသော ဝိညာဉ်စွမ်းရည် ထဲတွင်မူ... လက်ရှိ၌ သူသည် မိုးကြိုးတောအုပ် (နယ်ပယ်ထိန်းချုပ်ခြင်း)၊ မိုးကြိုးခြေလှမ်း နှင့် မိုးကြိုးလုံး အတတ်တို့ကိုသာ တတ်မြောက်ထားသေးသည်။

အလင်းဓာတ်သဘာဝဖြင့် ကိုယ်ပိုင်ဖန်တီးထားသော စွမ်းရည်ထဲတွင်မူ... လင်းလက်သောလုံး နှင့် လင်းလက်သောကုသခြင်း တို့ကိုသာ သိရှိထားသည်။

ဒါတွေက လုံးဝ မလုံလောက်သေးပါချေ ..သူသည် ဆက်လက်လေ့လာသင်ယူပြီး အားကိုးရမည့် ဝှက်ဖဲများကို ပိုမိုတိုးပွားအောင် လုပ်ဆောင်ရမည် ဖြစ်သည်။

မွန်းလွဲပိုင်းအချိန်တွင်... သူတို့ သုံးယောက်စလုံး ပီပီတုန်း၏ အနီးအနား၌ ပညာသင်ယူရမည့် အချိန်ဖြစ်သည်။ ပီပီတုန်းက သူတို့ သုံးဦးကို တစ်ဦးချင်းစီ စနစ်တကျ လမ်းညွှန်ပြသပေးသည်။

ရှဲ့ယွဲ့အတွက်မူ သူ၏ 'လမင်းဓားမြှောင်' တိုက်ခိုက်ရေးနည်းလမ်းများကို ပိုမိုတိုးတက်အောင် လုပ်ဆောင်စေပြီး၊ ဟူလီနာကိုမူ သူမ၏ ပထမဆုံး ဝိညာဉ်စွမ်းရည်ကို အခြေခံကာ စိတ်ဝိညာဉ်စွမ်းအား အသုံးချပုံများကို တီထွင်ဖန်တီးစေလျက် တိုက်ခိုက်ရေးနည်းလမ်းများ တစ်သမတ်တည်း မဖြစ်နေစေရန် လေ့ကျင့်ပေးသည်။

ဟူပိုင်အတွက်မူ... ပီပီတုန်းအနေဖြင့် သူမ၏ အမြင်အမြော်အပေါ် အခြေခံကာ ကိုယ်ပိုင်ဖန်တီး ဝိညာဉ်စွမ်းရည်များနှင့် ပတ်သက်၍ အမျိုးမျိုးသော အကြံဉာဏ်များကိုသာ ပေးနိုင်ပြီး၊ ဟူပိုင်အား စိတ်ကူးစိတ်သန်းအချို့ ရရှိစေကာ ၎င်းကို ဟူပိုင်ကိုယ်တိုင် လက်တွေ့လေ့ကျင့်ယူရခြင်း ဖြစ်သည်။

ဤခုနစ်ရက်တာကာလအတွင်း... ချန်တောက်လျို၊ ချန်ရန်ရွှယ်တို့နှင့်အတူ လေ့လာသင်ယူရင်းဖြင့် ဟူပိုင်သည် နောက်ထပ် အလင်းသဘာဝ ဝိညာဉ်စွမ်းရည်တစ်ခုကို ထပ်မံတတ်မြောက်ခဲ့သည်။ ၎င်းမှာ ခြောက်တောင်ပံကောင်းကင်တမန်၏ ပထမဆုံး ဝိညာဉ်စွမ်းရည်ဖြစ်သော 'ကောင်းကင်တမန် အင်အားသုံးတိုက်ခိုက်ခြင်း' ပင် ဖြစ်သည်။

၎င်းသည် အလင်းဓာတ်စွမ်းအားကို လက်သီးဆုပ်အတွင်း သိပ်သည်းစုစည်းစေပြီး တိုက်ခိုက်ရေးနှင့် ကာကွယ်ရေး နှစ်မျိုးလုံးအတွက် အလင်းဒိုင်းတစ်ခုကို ဖန်တီးကာ... အနီးကပ်တိုက်ပွဲတွင် ရန်သူများကို နောက်သို့ လွင့်စင်သွားစေသည့်အပြင် သန့်စင်ခြင်းအာနိသင် ပါဝင်သည်။

ယခင်က သန့်စင်သောအလင်းကုသခြင်းကဲ့သို့ပင်... ဟူပိုင် သင်ယူခဲ့သော ဤစွမ်းရည်တွင် နတ်ဘုရားစွမ်းအား မပါဝင်ဘဲ၊ သူသည် ဤကိုယ်ပိုင်ဖန်တီး ဝိညာဉ်စွမ်းရည်၏ အမည်ကို အနည်းငယ် ပြောင်းလဲကာ **'မြေခွေးကောင်းကင် ဝင်ရောက်တိုက်ခိုက်ခြင်း' ** ဟု အမည်ပေးလိုက်တော့သည်။