အခန်း(၃)- သဘာဝဓာတ်ကြီးများအပေါ် အံ့မခန်း စည်းစိမ်ပြုနိုင်စွမ်းနှင့် မွေးရာပါ ကောင်းကင်မြေခွေးနယ်ပယ်

ထို့အပြင် သူ၏ ဝိညာဉ် ဗီဇပြောင်းလဲမှုသည် ထူးခြားဆန်းပြားလှသော စွမ်းဆောင်ရည်များကို သယ်ဆောင်လာပေးကြောင်း သူ အသေအချာ ခံစားနေရသည်။ သို့သော် လောလောဆယ်တွင်မူ ဝိညာဉ်စွမ်းအားကို ဦးစွာ စမ်းသပ်ရန် လိုအပ်ပေသေးသည်။

မျှော်လင့်ထားသည့်အတိုင်းပင်.. မွေးရာပါ ဝိညာဉ်စွမ်းအား အပြည့်အဝ ဖြစ်ချေတော့မည်။

"ရှဲ့ထျန်းရေ.. တို့မိသားစုကနေ မွေးရာပါ ဝိညာဉ်စွမ်းအားအပြည့် သခင်တစ်ယောက် တကယ် ထွက်ပေါ်လာပြီဟေ့.. ဒါတင်မကသေးဘူး.. ဝိညာဉ် ဗီဇပြောင်းလဲပြီး ဘိုးဘေးတွေရဲ့ သွေးနှောမှုပါ ပြန်နိုးထလာတာ.."

ဟူလျဲ့ယောင်သည် သူမ၏ မြေခွေးနတ်ဆိုးဝိညာဉ်အကြောင်းကို အသိဆုံး ဖြစ်သည်။ မြေခွေးတစ်ကောင်တွင် အမြီးအရေအတွက် များလေလေ သွေးနှောမှုအဆင့် မြင့်မားလေလေ သို့မဟုတ် စွမ်းအား ပိုမိုကြီးမားလေလေ ဖြစ်၏။

သူမ၏ မြေခွေးနတ်ဆိုးဝိညာဉ်၌ အမြီးတစ်ချောင်းသာ ပါရှိသော်လည်း အမြီးကိုးချောင်းမြေခွေး၏ သွေးနှောမှု အနည်းငယ်တော့ စီးဆင်းနေသည်သာ ဖြစ်သည်။ သို့သော် စိတ်မကောင်းစရာမှာ မြေခွေးနတ်ဆိုး၏ အမြီးများသည် သူမ၏ စွမ်းအား တိုးတက်လာသည်နှင့်အမျှ တိုးပွားလာခြင်း မရှိချေ။

ဟူမျိုးနွယ်စုမှ လက်ဆင့်ကမ်းလာခဲ့သော ရှေးဟောင်းမှတ်တမ်းများအရ သူတို့၏ ဝိညာဉ်တွင် အမြီးကိုးချောင်းမြေခွေး၏ သွေးနှောမှု အရိပ်အယောင်လေး ရှိနေသော်လည်း တစ်ကြိမ်တစ်ခါမျှ နိုးထလာခဲ့ဖူးခြင်း မရှိဟု ဆိုသည်။ သို့သော်ငြားလည်း ထိုမျှဖြင့်ပင် ညှို့ယူဖမ်းစားခြင်းအတတ်တွင် အတော်ပင် စွမ်းပကား ထက်မြက်လှချေပြီ။

ယခုမူ ဟူလျဲ့ယောင်သည် အကယ်၍ သူမ၏ သားဖြစ်သူသာ ညှို့ယူဖမ်းစားခြင်းလမ်းစဉ်ကို လျှောက်လှမ်းမည်ဆိုပါက သူတို့မျိုးနွယ်စု သမိုင်းတစ်လျှောက်တွင် အတုမရှိ အထူးချွန်ဆုံး ပါရမီရှင် ဖြစ်လာလိမ့်မည်ဟု တွေးတောနေမိတော့သည်။

မွေးရာပါ ဝိညာဉ်စွမ်းအားအပြည့် ဆိုသည်မှာ အနည်းဆုံးတော့ အမည်ခံဒိုလော့အဆင့်သို့ သေချာပေါက် ရောက်ရှိနိုင်သည် မဟုတ်ပါလော။

အစွန်းရောက် ညှို့ယူဖမ်းစားခြင်းအတတ်ကို အထူးပြုသည့် အမည်ခံဒိုလော့တစ်ဦးဟူ၍ ယခုလက်ရှိ ဒိုလော့တိုက်ကြီးပေါ်တွင် တစ်ဦးမျှ မရှိသေးချေ။

"မင်းတို့နှစ်ယောက်.. ငါ့ရဲ့ တိုက်ရိုက်တပည့်အဖြစ် ခံယူဖို့ ဆန္ဒရှိကြရဲ့လား.."

ထိုစဉ် ပီပီတုန်း၏ နှုတ်ခမ်းအစုံမှ ကြည်လင်အေးစက်သော စကားသံ ထွက်ပေါ်လာခဲ့သည်။

ဟူလီနာ့ထံမှ မွေးရာပါ ဝိညာဉ်စွမ်းအား ပေါ်ထွက်လာကတည်းက သူမ၌ ဤအတွေး ရှိနေခဲ့ပြီး ဖြစ်သည်။ ယခု ဟူပိုင်ဆိုလျှင် ပို၍ပင် သေချာသွားချေပြီ.... သူသည် လက်ရှိ ဝိညာဉ်ကျောင်းတော်တွင် တစ်ဦးတည်းသော မွေးရာပါ ဝိညာဉ်စွမ်းအားအပြည့် သခင် မဟုတ်ပါလော။

ရှဲ့ထျန်း၏ မိသားစုတစ်ခုလုံး အတိုင်းထက်အလွန် ဝမ်းမြောက်သွားကြပြီး ကလေးနှစ်ဦးကို အလျင်အမြန်ပင် တိုက်တွန်းလိုက်ကြသည်.... "အရှင်မင်းကြီးကို ချက်ချင်းပဲ အလေးပြုပြီး သဘောတူလိုက်ကြလေ.."

ဟူလီနာသည် ဦးစွာပထမ ဒူးတစ်ဖက်ထောက်ကာ ဝတ်ပြုလိုက်သည်.... "တပည့် ဟူလီနာ.. ဆရာ့ကို အရိုအသေပြုပါတယ်ရှင့်.."

ဟူပိုင်သည် ဇာတ်လမ်းအကြောင်းအရာများကို ကြိုတင်သိရှိထားသဖြင့် ပီပီတုန်းအပေါ် စိတ်ထဲတွင် အနည်းငယ် ပတ်သက်ရခက်နေသော်လည်း ယခုကဲ့သို့ အခြေအနေမျိုးတွင် ငြင်းပယ်၍ ရနိုင်ပါမည်လော။ ထို့အပြင် ပီပီတုန်း အသည်းစွဲ တပည့်အဖြစ် မွေးစားချင်နေသူမှာ ဟူလီနာ ဖြစ်ကြောင်း သူ ခန့်မှန်းမိသည်။ အကယ်၍ သူသာ မွေးရာပါ ဝိညာဉ်စွမ်းအားအပြည့် မဖြစ်ခဲ့ပါက သူမသည် ဟူလီနာတစ်ဦးတည်းကိုသာ တပည့်အဖြစ် လက်ခံပေလိမ့်မည်။

ဟူပိုင်သည် အနည်းငယ် တွန့်ဆုတ်သွားပြီးမှ ပြောလိုက်သည်.... "တပည့် ဟူပိုင်.. ဆရာ့ကို အရိုအသေပြုပါတယ်ဗျာ.."

သို့သော် ဟူပိုင်၏ အနည်းငယ် တွန့်ဆုတ်သွားသော အမူအရာမှာ ပီပီတုန်း၏ မျက်စိမှ လွတ်ကင်းမသွားခဲ့ပေ။ သူမသည် ဇဝေဇဝါ ဖြစ်သွားခဲ့သော်လည်း ဘာမျှ မပြောဘဲ မျက်ခုံးကိုသာ အနည်းငယ် တွန့်လိုက်မိသည်။

ထို့နောက် သူမက ဆက်လက်မိန့်ကြားလိုက်၏.... "မင်းတို့နှစ်ယောက်လုံးရဲ့ ဝိညာဉ်တွေက မြေခွေးတွေ ဖြစ်တဲ့အတွက် အစွန်းရောက် စိတ်ဝိညာဉ်ညှို့ယူခြင်း လမ်းစဉ်ကို လျှောက်လှမ်းတာက အသင့်တော်ဆုံးပဲ.. နာနာ့ရဲ့ ဝိညာဉ်စွမ်းအား အဆင့်တစ်ဆယ် ပြည့်တာနဲ့ မင်းတို့နှစ်ယောက်ရဲ့ ပထမဆုံး ဝိညာဉ်ကွင်းကို ရှာဖွေဖို့ ကြယ်တာရာတောအုပ်ကြီးဆီ ငါကိုယ်တိုင် လိုက်ပါခေါ်ဆောင်သွားပေးမယ်.."

ဟူပိုင်သည် မျက်နှာပြင်တွင် မည်သည့်အရိပ်အယောင်မျှ မပြသသော်လည်း ရင်ထဲ၌မူ သက်ပြင်းချမိလိုက်သည်.... ညှို့ယူဖမ်းစားခြင်း လမ်းစဉ်ကို လျှောက်လှမ်းရမယ် ဟုတ်လား.. ဒါဆို နောင်တစ်ချိန်မှာ ထန်ဆန်းရဲ့ နတ်ဆိုးခရမ်းရောင်မျက်ဝန်းနဲ့ တွေ့ရင် အကုန် အလဲလဲအကွဲကွဲ ဖြစ်ကုန်မှာပေါ့။

ဟူလီနာက မိန်းကလေးတစ်ဦး ဖြစ်သဖြင့် ညှို့ယူဖမ်းစားခြင်း လမ်းစဉ်ကို လျှောက်လှမ်းရန် ပြဿနာမရှိသော်လည်း သူက ယောကျာ်းလေးတစ်ဦး ဖြစ်နေပါလျက် ဘာကြောင့် ထိုလမ်းစဉ်ကို လျှောက်လှမ်းရမည်နည်း။

ထို့ပြင် သူ၏ အမြီးကိုးချောင်းကောင်းကင်မြေခွေးဝိညာဉ်သည် အခြားသော ထူးခြားသည့် အစွမ်းများကိုပါ ပေးစွမ်းထားကြောင်း သူ အသေအချာ ခံစားနေရသည်။ သို့သော် အိမ်ပြန်ရောက်မှသာ သေချာ စမ်းသပ်ကြည့်ရပေမည်။

မည်သို့ပင်ဖြစ်စေ ဟူလီနာတစ်ယောက် အဆင့်တစ်ဆယ်သို့ ရောက်ရှိရန် အနည်းဆုံး ရက်သတ္တပတ် နှစ်ပတ်ခန့် ကျင့်ကြံရဦးမည် ဖြစ်သည်။

"ဟုတ်ကဲ့ပါ.. ကျေးဇူးတင်ပါတယ် ဆရာ.." ဟူပိုင်သည် အပြင်ပန်းတွင် ဦးစွာ သဘောတူလိုက်ရတော့သည်။

ဝိညာဉ်နန်းတော်မှ ထွက်ခွာလာပြီးနောက်တွင်မှ ဟူပိုင်တစ်ယောက် အသက်ဝဝ ရှူနိုင်တော့သည်။ ထိုအခါ ဟူလီနာက အသံတိုးတိုးဖြင့် လှမ်းမေးလာ၏.... "အစ်ကို.. ဘာဖြစ်လို့လဲဟင်.. သိပ်ပြီး ပျော်ပုံမရဘူး.. နာနာ့ကို စောင့်ရမှာမို့လို့လား.. ငါ.. ငါ ဒီရက်ပိုင်းအတွင်း အသည်းအသန် ကျင့်ကြံပြီး အမြန်ဆုံး အဆင့်တစ်ဆယ် ပြည့်အောင် လုပ်ပါ့မယ်.."

ဟူလီနာသည် ဟူပိုင် စိတ်မသက်မသာ ဖြစ်နေရခြင်းမှာ သူမ၏ ပထမဆုံး ဝိညာဉ်ကွင်းအတွက် စောင့်ဆိုင်းနေရသောကြောင့်ဟု ထင်မှတ်နေရှာသည်။

သို့သော်လည်း ကြီးမားလှသည်မဟုတ်သော လက်တစ်ဖက်သည် ဟူလီနာ၏ ခေါင်းလုံးလေးပေါ်သို့ ရောက်ရှိလာပြီး သာသာယာယာ ပွတ်သပ်ပေးလိုက်ကာ.... "မဟုတ်ပါဘူး နာနာရယ်.. မင်း အများကြီး တွေးနေပြီ.. ဒီရက်သတ္တပတ် နှစ်ပတ်လောက်က ဘာမှ မဟုတ်ပါဘူး.. ဒါပေမဲ့.."

ရှဲ့ယွဲ့က တည်ငြိမ်စွာဖြင့် ကြားဖြတ်ပြောလိုက်သည်.... "ညီလေး.. မင်း အရှင်မင်းကြီး သတ်မှတ်ပေးထားတဲ့ ကျင့်ကြံခြင်းလမ်းစဉ်အတိုင်း မသွားချင်ဘူး မဟုတ်လား.."

ရှဲ့ယွဲ့သည် ဟူပိုင်၏ အစ်ကိုပီပီ သူ၏စိတ်ကို အမှန်ကန်ဆုံး ခန့်မှန်းနိုင်ခဲ့သည်။

ရှဲ့ယွဲ့က ဆက်ပြောသည်.... "မင်းမှာ ကိုယ်ပိုင်အတွေးအခေါ်တွေ ရှိတာကို အစ်ကို သိပါတယ်.. ဒါပေမဲ့ ရှေးပဝေသဏီကတည်းက မြေခွေးဝိညာဉ်ဆိုတာ ဖြားယောင်းခြင်းနဲ့ ညှို့ယူခြင်းရဲ့ ပြဒါးတိုင်ပဲလေ.. မင်းက ယောကျာ်းလေးတစ်ဦး ဖြစ်နေလို့ ဒီလမ်းစဉ်က ထူးဆန်းနေလိမ့်မယ်ဆိုပေမဲ့.. မင်းမှာ အခြား ပိုကောင်းတဲ့ ရွေးချယ်စရာ ရှိလို့လား.. တိုက်ခိုက်ရေးစနစ်ရော.. အမြန်နှုန်းစနစ်ရောက မင်းနဲ့ သိပ်ပြီး မကိုက်ညီဘူးလေ.."

ဟူပိုင်၏ လွှမ်းမိုးမှုကြောင့် ရှဲ့ယွဲ့သည်လည်း စာအုပ်စာပေ အမြောက်အမြားကို ဖတ်ရှုခဲ့ဖူးသည်။ သူသည် ယခုနှစ်တွင် အသက်ရှစ်နှစ် ရှိပြီဖြစ်ပြီး ဝိညာဉ်ကျောင်းတော် အကယ်ဒမီတွင် နှစ်နှစ်ခန့် တက်ရောက်သင်ကြားခဲ့ရသဖြင့် အတော်ပင် အသိအမြင် ကြွယ်ဝနေပြီ ဖြစ်၏။

"ရှူး.. အိမ်ပြန်ရောက်မှ အေးအေးဆေးဆေး ပြောကြတာပေါ့.." ရှဲ့ထျန်းက အသံတိုးတိုးဖြင့် သတိပေးလိုက်ပြီး သူတို့ကို အမြန် ခေါ်ဆောင်သွားတော့သည်။

ရှဲ့မျိုးနွယ်စု၏ နေအိမ်..

ရှဲ့ထျန်းသည် မျက်မှောင်ကြုတ်လျက် သူ၏ ဒုတိယမြောက်သားကို ကြည့်လိုက်သည်။ ဤကလေးငယ်သည် အမြဲတမ်း ကိုယ်ပိုင်အတွေးအခေါ် ရှိတတ်သည်ကို သူ သိထားသဖြင့် ချက်ချင်း ဆူပူကြိမ်းမောင်းခြင်း မပြုဘဲ စိတ်ရှည်လက်ရှည်ဖြင့် မေးမြန်းလိုက်၏.... "မင်းရဲ့ စိတ်ကူးက ဘာလဲ.. အကယ်၍ မင်းက မင်းရဲ့မိခင်နဲ့ ညီမလို စိတ်ဝိညာဉ်ထိန်းချုပ်ရေးလမ်းစဉ်ကို မလိုက်ဘူးဆိုရင် ဘယ်လမ်းစဉ်ကို လျှောက်လှမ်းမှာလဲ.."

ဟူပိုင်သည် ဖခင်ဖြစ်သူကို ချက်ချင်း ပြန်မဖြေဘဲ သူ၏ အမြီးကိုးချောင်းကောင်းကင်မြေခွေးဝိညာဉ်ကို ထုတ်ဖော်လိုက်ကာ ဝိညာဉ်မှ ပေးသနားထားသော အစွမ်းများကို အာရုံခံလိုက်သည်။ ထို့နောက် ချက်ချင်းဆိုသလိုပင် သူ၏ ခန္ဓာကိုယ်ပတ်ပတ်လည်တွင် အလင်းစက်လေးများ ပေါ်ထွက်လာပြီး ဟူပိုင်၏ ကိုယ်ထည်ဆီသို့ တရွေ့ရွေ့ စုစည်းလာကြတော့သည်.... နီရောင်.. ပြာရောင်.. စိမ်းရောင်.. ဝါရောင်.. ဖြူရောင်။

သဘာဝဓာတ်ကြီးများ၏ စွမ်းအင်...

ဤရုတ်တရက် ပြောင်းလဲမှုကို ရှဲ့ထျန်းနှင့် ဟူလျဲ့ယောင်တို့ နှစ်ဦးစလုံး ကောင်းစွာ မြင်တွေ့လိုက်ရသည်။ ဟူလျဲ့ယောင်သည် တစ်စုံတစ်ခုကို တွေးမိသွားကာ သူမ၏ မျက်ဝန်းများထဲတွင် စိတ်လှုပ်ရှားမှုများ ပြည့်လျှံလာခဲ့၏။

မကြာမီမှာပင် ဟူပိုင်၏ မျက်နှာလေးမှာ ဖြူဖျော့လာပြီး ခန္ဓာကိုယ်အတွင်းရှိ ဝိညာဉ်စွမ်းအားများမှာလည်း အလျင်အမြန် ခန်းခြောက်လာတော့သည်။ သူသည် ပြင်ပကမ္ဘာတွင် တည်ရှိနေသော မီးဓာတ်စွမ်းအင်များကို စုစည်းနေခြင်း ဖြစ်ပြီး ယင်းက ယခုအချိန်တွင် သူ့အတွက် အလွန်ကြီးမားသော စိန်ခေါ်မှုတစ်ရပ် ဖြစ်နေသည် မဟုတ်ပါလော။

ပြင်ပကမ္ဘာတွင် ဓာတ်စွမ်းအင်မျိုးစုံ ရှိနေသဖြင့် သူသည် ယင်းတို့ကို စစ်ထုတ်ရဦးမည် ဖြစ်သည်။ ဝိညာဉ်ကွင်း မရှိသေးဘဲနှင့် သဘာဝဓာတ်ကြီးများကို ယခုကဲ့သို့ ထိန်းချုပ်ရန် ကြိုးပမ်းခြင်းမှာ အမှန်တကယ်ပင် အကန့်အသတ် ရှိလှသည်။ ဆိုလိုသည်မှာ သူ၏ ကျွမ်းကျင်မှုအဆင့်က မလုံလောက်သေးခြင်း ဖြစ်၏။

ဟူပိုင်သည် မျက်မှောင်ကြုတ်လိုက်မိပြီး နဖူးပြင်ထက်တွင် ချွေးစေးများ စို့တက်လာသည်။ ရုတ်တရက်ဆိုသလို သူ၏ခန္ဓာကိုယ်မှ အရှိန်အဝါစွမ်းအင်တစ်ခု အပြင်သို့ လှိုင်းတံပိုးပမာ ဖြာထွက်သွားခဲ့ပြီး ဓာတ်စွမ်းအင်များကို စုစည်းမှုနှုန်းမှာလည်း သိသိသာသာ မြန်ဆန်လာခဲ့တော့သည်။

"နယ်ပယ်.." ရှဲ့ထျန်းနှင့် ဟူလျဲ့ယောင်တို့ တစ်ပြိုင်နက်တည်း အော်ဟစ်မိလိုက်ကြ၏။

သူတို့၏ မျက်စိရှေ့မှောက်တွင်ပင် ဟူပိုင်၏ လက်ဖဝါးထက်၌ သေးငယ်သော မီးတောက်လေးတစ်ခု ပေါ်ထွက်လာခဲ့သည်.... ၎င်းမှာ မြေခွေးဝိညာဉ်၏ စွမ်းရည်တစ်ခုဖြစ်သော မြေခွေးမီးတောက်ပင် ဖြစ်ချေတော့သည်။

ဟူပိုင်သည် တောက်ပနေသော မျက်ဝန်းအစုံကို ဖွင့်လိုက်ပြီး.... "ဖေဖေ.. မေမေ.. သား အောင်မြင်ပြီ.."

ဟူလျဲ့ယောင်က လှမ်းမေးသည်.... "ပိုင်အာ.. မင်းက.. ကောင်းကင်နဲ့ မြေကြီးကြားက သဘာဝဓာတ်စွမ်းအင်တွေကို ထိန်းချုပ်နိုင်တာလား.."

"အံ့သြဖို့ကောင်းလိုက်တာ အစ်ကိုကြီးရယ်.." ဟူလီနာ့၏ မျက်ဝန်းငယ်လေးများထဲတွင်လည်း ကြယ်ပွင့်လေးများ လင်းလက်သွားခဲ့သည်။ သူမ၏ အစ်ကိုကြီးမှာ အမှန်ပင် အစွမ်းထက်လှပေသည်။

ဟူပိုင်က ခေါင်းညိတ်ဝန်ခံလိုက်ပြီး ရှင်းပြလိုက်၏.... "အမြီးကိုးချောင်းကောင်းကင်မြေခွေးဝိညာဉ်က သားကို ညှို့ယူဖမ်းစားခြင်းစွမ်းရည် တင်ပေးခဲ့တာ မဟုတ်ဘူး.. မွေးရာပါ ဓာတ်စွမ်းအင်တွေအပေါ် စည်းစိမ်ပြုနိုင်စွမ်းနဲ့ ကိုယ်ပိုင် ကောင်းကင်မြေခွေးနယ်ပယ်ကိုပါ ပေးအပ်ခဲ့တာ.. အခြား အစွမ်းတွေ ကျန်သေးလားဆိုတာတော့ သားလည်း လောလောဆယ် မသိသေးဘူး.."

"ပြီးတော့ သား အခုလေးတင် အာရုံခံမိတဲ့ ဓာတ်စွမ်းအင်တွေထဲမှာ သတ္တု၊ သစ်သား၊ ရေ၊ မီး၊ ဟင်းလင်းပြင်၊ လျှပ်စီး၊ လေနဲ့ မြေဓာတ် စတာတွေ အကုန်ပါဝင်နေတယ်.. အဲဒီထဲမှာ မီးဓာတ်က စုစည်းရ အလွယ်ကူဆုံးပဲ.."

ဟူပိုင် ရှင်းပြနေရင်းဖြင့် သူ၏ နှုတ်ခမ်းအစုံမှာ အလိုလို ကွေးညွတ်ကာ ပြုံးမိသွားတော့သည်။ ဤအရာကသာ ဒဏ္ဍာရီလာ အမြီးကိုးချောင်းကောင်းကင်မြေခွေးနတ်ဘုရားတစ်ကောင် ပိုင်ဆိုင်သင့်သည့် အစွမ်းမျိုး ဖြစ်ချေသည်။ သူသည် သွေးချောင်းစီး တိုက်ခိုက်ရေးလမ်းစဉ်ကိုသာ လျှောက်လှမ်းလိုပြီး ညှို့ယူဖမ်းစားခြင်း လမ်းစဉ်ကို လုံးဝ မလိုလားပေ။

ရှေးပဝေသဏီကတည်းက အမြီးကိုးချောင်းမြေခွေးသည် နတ်ဘုရားသားရဲများထဲတွင် လျှို့ဝှက်ဆန်းကြယ်ပြီး အင်အားအကြီးမားဆုံး အဖြစ် တည်ရှိခဲ့ခြင်း ဖြစ်သည်။ သို့သော်လည်း ဒိုလော့ကမ္ဘာရှိ မြေခွေးဝိညာဉ်များ ဖြစ်ကြသော ဟူလီနာ၏ မြေခွေးနတ်ဆိုးဝိညာဉ် ဖြစ်စေ.. သို့မဟုတ် နှစ်ပေါင်းတစ်သောင်း ကြာပြီးနောက် ပေါ်ထွက်လာမည့် ဆွေယာ့ကျဲ၏ အမြီးကိုးချောင်းမြေခွေးဝိညာဉ် ဖြစ်စေ.. အားလုံးမှာ ချို့ယွင်းချက်များ ရှိနေကြပြီး နတ်ဘုရားသားရဲဟူသော အမည်နာမနှင့် ထိုက်တန်ခြင်း မရှိကြချေ။

ယခုမူ သူသည် အစစ်အမှန် အမြီးကိုးချောင်းကောင်းကင်မြေခွေးဝိညာဉ်ကို ပိုင်ဆိုင်ထားရပြီ ဖြစ်ရာ ထိုအမည်နာမ၏ သိက္ခာကို သေချာပေါက် ပြန်လည်ဆယ်တင်ပေးရပေလိမ့်မည်။ အမြီးကိုးချောင်းမြေခွေးဆိုသည်မှာ ဤလောကတွင် ညှို့ယူဖမ်းစားခြင်း တစ်ခုတည်းဖြင့်သာ ကျော်ကြားခဲ့သည် မဟုတ်ကြောင်း သက်သေပြရပေဦးမည်။