အခန်း(၂၈) - ချန်ကျွင်း - "ဟူပိုင်နဲ့ ရှောင်ရွှယ်ကြားထဲမှာ သိသိသာသာကြီးကို တစ်ခုခု မှားယွင်းနေတယ်"၊ လင်းလက်သောကုသခြင်း

ချန်ရန်ရွှယ်သည် သူမ၏အဖိုး ဖြစ်သူက လှမ်းကြည့်လာသည်ကို မြင်သောအခါ ချက်ချင်းပင် အနည်းငယ် ကြောင်တောင်တောင် ဖြစ်သွားရသည် -

"အဘိုး... ဘာဖြစ်လို့လဲဟင်"

"ရှောင်ရွှယ်... မင်းနဲ့ ရှောင်ပိုင်ကြားထဲက ကျင့်ကြံခြင်းအဆင့်က သိပ်ပြီးမကွာဟလှဘူး၊ ပြီးတော့ မင်းတို့နှစ်ယောက်ရဲ့ ဆက်ဆံရေးကလည်း အတော်လေး ကောင်းမွန်ကြတယ်လေ။ မင်းရဲ့ တတိယမြောက် ဝိညာဉ်စွမ်းရည် လှည့်ပတ်စီးဆင်းပုံ လမ်းကြောင်းကို လေ့လာနိုင်ဖို့အတွက် သူ့ရဲ့ စိတ်ဝိညာဉ်စွမ်းအားကို မင်းရဲ့ ခန္ဓာကိုယ်ထဲ ပေးဝင်ပြီး စမ်းသပ်ခွင့်ပြုဖို့ စိတ်လိုလက်ရ ရှိရဲ့လား။ ဒီလိုကိစ္စမျိုးက နှစ်ဦးနှစ်ဖက် အပြန်အလှန် အကြွင်းမဲ့ ယုံကြည်မှု ရှိမှသာ ဘေးကင်းကင်းနဲ့ လုပ်ဆောင်နိုင်တာမျိုး ဖြစ်တယ်... နားလည်တယ်မလား" ချန်တောက်လျိုက ချန်ရန်ရွှယ်အား ညင်သာစွာ ရှင်းပြလိုက်သည်။

တစ်နာရီကျော်မျှ အတူတူ လေ့ကျင့်ပြီးနောက်တွင် ဟူပိုင်နှင့် ပူဇော်သက္ကာနန်းဆောင် ရှိ ကြီးမြတ်လှသော အရာရှိကြီး အချို့တို့၏ ဆက်ဆံရေးမှာ ပိုမို ရင်းနှီးသဟဇာတ ဖြစ်လာခဲ့ကြပြီး၊ ဟူပိုင်အား 'ရှောင်ပိုင်' ဟုပင် ရင်းရင်းနှီးနှီး ပြောင်းလဲခေါ်ဆိုနေကြပြီ ဖြစ်သည်။

အမှန်အတိုင်း ပြောရလျှင် ဟူပိုင်အနေဖြင့် ဤအမည်ပြောင်နှင့် ပတ်သက်၍ အနည်းငယ် ဆွံ့အမိသည်။ ၎င်းက တိရစ္ဆာန်လေးတစ်ကောင်၏ နာမည်နှင့် သေချာပေါက် တူမနေဘူးလား။

သူ၏ ဝိညာဉ်မှာ အမြီးကိုးချောင်းကောင်းကင်မြေခွေး ဖြစ်သော်လည်း၊ သူက လူသားတစ်ယောက် ဖြစ်သည်မဟုတ်ပါလော။

ထိုစကားကို ကြားလိုက်ရသောအခါ ချန်ရန်ရွှယ်၏ မျက်နှာလေးမှာ အနည်းငယ် ရဲတက်သွားပြီး၊ နှလုံးခုန်နှုန်းများ မြန်ဆန်လာကာ မျက်တောင်လေးများ စင်းကျသွားလျက် အလွန်တရာ ရှက်သွေးဖြန်းသွားခဲ့ရသည်။ သူမသည် ဟူပိုင်ကို ကြည့်ကာ အသံလေး အနည်းငယ် တုန်ရင်လျက် -

"ရပါတယ်... သမီး မောင်လေးပိုင်ကို ယုံကြည်ပါတယ်"

ချန်ရန်ရွှယ်၏ ဤကဲ့သို့သော ပုံစံလေးက ဟူပိုင်ကို ခဏမျှ ကြောင်အသွားစေခဲ့သည်။ မိမိကသာ မြေခွေးဝိညာဉ်ပိုင်ရှင် ဖြစ်သော်လည်း၊ အဘယ်ကြောင့် ချန်ရန်ရွှယ်၏ ချစ်စရာကောင်းသော အမူအရာအောက်တွင် စွဲမက်သွားရသနည်း။

မပြောဘဲနေ၍မရချေ၊ ချန်ရန်ရွှယ်သည် ငယ်စဉ်အချိန်တွင် ကြွေရုပ်ကလေးတစ်ရုပ်ကဲ့သို့ အလွန်တရာ ချစ်စရာကောင်းပြီး ရင်သပ်ရှုမောဖွယ် ဖြစ်လှသည်။

ဟူပိုင်နှင့် ချန်ရန်ရွှယ်တို့သည် တစ်ဦးကိုတစ်ဦး ဤသို့ဖြင့် ခဏမျှ စိုက်ကြည့်နေမိကြသည်။

ချန်တောက်လျိုက ဘေးမှနေ၍ ပြုံးပြုံးကြီး ကြည့်နေသော်လည်း၊ ကျန်ရှိသော ကြီးမြတ်သည့် အရာရှိကြီး ၆ ဦးမှာမူ တစ်ခုခု ထူးခြားနေသည်ကို သတိပြုမိသွားကြသည်။

ချန်ကျွင်းက စိတ်ချင်းဆက်သွယ်ကာ လျှို့ဝှက်အသံလှမ်းပို့လိုက်သည်။

"အစ်ကိုကြီး... အဘိုးကြီးက ကြားထဲကနေ ဖူးစာစပ်ပေးဖို့တောင် လိုမယ်မထင်တော့ဘူး။ ဒီကလေးနှစ်ယောက်ကို ကြည့်ဦး၊ သိသိသာသာကြီးကို တစ်ခုခု ဖြစ်နေကြပြီလေ... ဟီးဟီး"

အကယ်၍ ပြင်ပလူများသာ တည်ကြည်ခန့်ညားလှသော အလယ်အလတ်အရွယ် အဆင့်မြင့်ဒိုလော့ ချန်ကျွင်းက ဤမျှအထိ အတင်းအဖျင်းပြောရန် စိတ်အားထက်သန်နေသည်ကို သိသွားပါက မျက်လုံးအပြူးသား ဖြစ်သွားကြပေလိမ့်မည်။

"အဟမ်း... ရှောင်ပိုင်၊ မင်းက ဘာလို့ လူအ လိုလို ရပ်နေရတာလဲ" အတော်ကြာပြီးနောက်တွင် ချန်တောက်လျိုက သတိပေးလိုက်ရသည်။

"မင်း ဒီနေ့ ပူဇော်သက္ကာနန်းဆောင်မှာ နေဖို့ ခွင့်ပြုချက်ရထားတဲ့အချိန်က မိနစ် ၃၀ ပဲ ကျန်တော့တယ်။ အချိန်မနှောင်းခင် မြန်မြန်သွားပြီး မင်းရဲ့ စိတ်ဝိညာဉ်စွမ်းအားနဲ့ သေချာ အာရုံခံကြည့်လိုက်ဦးလေ"

ချန်တောက်လျိုသည် အချိန်သိပ်မကျန်တော့သည်ကို မြင်သဖြင့် ဝင်ရောက်သတိပေးလိုက်ခြင်း ဖြစ်သည်။

မိနစ် ၃၀ သာ ကျန်ရှိတော့သည့် အခြေအနေတွင် ဟူပိုင်အနေဖြင့် သူ၏ပါရမီဖြင့် ဤဝိညာဉ်စွမ်းရည်၏ အသုံးချပုံကို အပြီးသတ် ဖန်တီးနိုင်ပါ့မလား။

ဟူပိုင် သတိပြန်ဝင်လာကာ ခေါင်းညိတ်ပြလိုက်ပြီး၊ သူ၏ တတိယမျက်လုံးကို ဖွင့်ဟလျက် ချန်ရန်ရွှယ်၏ ရှေ့သို့ လှမ်းလျှောက်သွားခဲ့သည်။ နဖူးချင်း အသာအယာ တိုက်မိလုနီးပါး အနေအထားဖြင့် သူက တိုးညင်းစွာ ဆိုလိုက်သည်...

"အစ်မရွှယ်... အစ်မရဲ့ တတိယမြောက် ဝိညာဉ်စွမ်းရည်ကို ထုတ်လိုက်ပါတော့၊ ကျွန်တော် စတော့မယ်"

ဒါဟာ သူတို့နှစ်ယောက် ဤမျှအထိ အနီးကပ်ဆုံး ရှိဖူးခြင်း ပထမဆုံးအကြိမ် ဖြစ်သည်။ ဟူပိုင်သည် ရင်ဘတ်ထဲမှ တဒုန်းဒုန်းနှင့် တိုးထွက်နေသော နှလုံးခုန်သံများကို ကြားနေရသလို ခံစားရပြီး၊ ၎င်းက ချန်ရန်ရွှယ်၏ နှလုံးခုန်သံလား သို့မဟုတ် မိမိကိုယ်ပိုင် နှလုံးခုန်သံလား ဆိုသည်ကိုပင် မသဲကွဲတော့ချေ။

ချန်ရန်ရွှယ်၏ နုနယ်လှသော မျက်တောင်လေးများမှာ မထိန်းချုပ်နိုင်ဘဲ တဖျတ်ဖျတ် လှုပ်ခတ်နေပြီး၊ သူမသည်လည်း အလွန် အမင်း အထိတ်တလန့် ဖြစ်နေပုံရသည်။

ဟူပိုင်က ချန်ရန်ရွှယ်ကို တိတ်တဆိတ် အကဲခတ်နေစဉ်မှာပင်၊ ချန်ရန်ရွှယ်ကလည်း သူ့ကို လျှို့ဝှက် အကဲခတ်နေမိသည်။

အေးမြသော နဖူးပြင်၊ ဆီးနှင်းကဲ့သို့ ဖြူစင်သော မျက်တောင်များ၊ ဖြူဝင်းဥနေသော အသားအရေ ဤမျှ အနီးကပ်ကြည့်လိုက်ရသည့် အခါတွင် ဟူပိုင်၏ အသားအရေက သူမထက်ပင် ပိုမိုကောင်းမွန်နေသလို ချန်ရန်ရွှယ် ခံစားရသည်။

ထို့အပြင် ဟူပိုင်၏ နွေးထွေးသော ထွက်သက်ဝင်သက်များက သူမ၏ မျက်နှာပေါ်သို့ တစ်ချက်တစ်ချက် ကျရောက်လာရာ... သူမ၏ ခန္ဓာကိုယ်တစ်ခုလုံး ပူလောင်အုံခဲလာသည့် ခံစားချက်ကို ပေးစွမ်းနေသည်။

ထို့နောက်တွင် နှစ်ယောက်စလုံး၏ မျက်ဝန်းချင်းက မရည်ရွယ်ဘဲ ဆုံစည်းသွားခဲ့ကြသည်။ ထိုသို့ ဆုံစည်းမိသည်နှင့် တစ်ပြိုင်နက် နှစ်ဦးစလုံးမှာ ရှက်ကိုးရှက်ကန်းဖြင့် မျက်လုံးများကို ပြိုင်တူ မှိတ်လိုက်ကြပြီး တစ်ဦးကိုတစ်ဦး ထပ်မကြည့်ရဲကြတော့ချေ။

ဟူပိုင်သည် ယခင်ဘဝက အမှတ်သညာများ နိုးထထားပြီး သက်တမ်းမှာ အသက် ၂၀ ကျော် ရှိနေပြီ ဖြစ်သော်လည်း... ယခင်ဘဝ ကောလိပ်တက်စဉ်က မိန်းကလေးတစ်ယောက်၏ လက်ကိုပင် မကိုင်ဖူးခဲ့ရာ၊ ဤကဲ့သို့ လှပချောမောလှသော မိန်းကလေးငယ်တစ်ဦးနှင့် ယခုကဲ့သို့ အနီးကပ် ထိတွေ့မှုမျိုးကို မည်သို့ ကြုံဖူးပါအံ့နည်း။

သူမကို မိန်းကလေးငယ်ဟု ခေါ်ဆိုရန်မှာလည်း လုံးဝကြီး မမှန်ကန်လှချေ၊ မည်သို့ဆိုစေ ကမ္ဘာနှစ်ခုလုံး၏ အရွယ်ရောက်ခြင်း သတ်မှတ်ချက် အသက်အရွယ်ချင်းက ကွာခြားလှသည်။ ဤကမ္ဘာတွင် ချန်ရန်ရွှယ်သည် နောက်ထပ် နှစ်နှစ်ခွဲပင် မပြည့်မီ အရွယ်ရောက်ပြီးသူ ဖြစ်လာတော့မည် ဖြစ်သည်။

ထို့အပြင် သူမတွင် ဝိညာဉ်ကွင်း သုံးကွင်း ရှိနှင့်ပြီးသား ဖြစ်သဖြင့် ချန်ရန်ရွှယ်၏ ခန္ဓာကိုယ် ဖွံ့ဖြိုးမှုမှာလည်း တော်တော်လေး ထင်ရှားနေပြီ ဖြစ်သည်။ 'ကျူးကျူးချင်း' ကဲ့သို့ အလွန်အမင်း ထွားကျိုင်းခြင်းမျိုး မဟုတ်သည့်တိုင်အောင် ပြီးပြည့်စုံသော ကောက်ကြောင်းအလှကို ပိုင်ဆိုင်ထားသည်။

ထို့နောက်တွင် ချန်ရန်ရွှယ်၏ တတိယမြောက် ဝိညာဉ်ကွင်းမှာ ဖြည်းညှင်းစွာ မြင့်တက်လာခဲ့ပြီး၊ 'သန့်စင်သောအလင်းကုသခြင်း' စွမ်းအားက သူတို့နှစ်ဦးစလုံးကို လွှမ်းခြုံသွားခဲ့သည်။

အနီးကပ် သေချာကြည့်မည်ဆိုပါက ချန်ရန်ရွှယ်၏ တတိယမြောက် ဝိညာဉ်ကွင်း အရောင်မှာ ပုံမှန် ခရမ်းနုရောင်ထက် ပိုမိုရင့်မှောင်နေပြီး... အလယ်အလတ် ခရမ်းရောင်အဆင့်သို့ ရောက်ရှိနေသည်ကို မြင်တွေ့နိုင်သည်။

ချန်ရန်ရွှယ်သည် မွေးရာပါ ဝိညာဉ်စွမ်းအား အဆင့် ၂၀ ရှိသူဖြစ်ရာ၊ ဝိညာဉ်နိုးထပြီးကတည်းက သူမ၏ ပထမ ဝိညာဉ်ကွင်း နှစ်ကွင်းကို သွားရောက်ရယူခဲ့ခြင်း ဖြစ်သည်။ ထိုအချိန်တုန်းက သူမသည် ဟူပိုင်နှင့် မဆုံတွေ့ရသေးသလို ဝေလငါးကော်၏ အာနိသင်ကိုလည်း မသိရှိသေးသဖြင့်... ဒုတိယဝိညာဉ်ကွင်းကို ဟူပိုင်နှင့် ရှဲ့ယွဲ့တို့ကဲ့သို့ သက်တမ်းထောင်ချီအဆင့်အထိ ရောက်အောင် မစွမ်းဆောင်နိုင်ခဲ့ခြင်း ဖြစ်သည်။

ဟူပိုင်သည် ချန်ရန်ရွှယ် အသက် ၇ နှစ်ကျော် အရွယ်ကျမှသာ စတင် ဆုံတွေ့ခဲ့ခြင်း ဖြစ်သည်။

ချန်ရန်ရွှယ်က တတိယမြောက် ဝိညာဉ်စွမ်းရည်ကို ထုတ်ဖော်နေစဉ်အတွင်း၊ ဟူပိုင်၏ စိတ်ဝိညာဉ်စွမ်းအားကလည်း ချန်ရန်ရွှယ်၏ ခန္ဓာကိုယ်အတွင်းသို့ စတင် စိမ့်ဝင်သွားခဲ့သည်။ ပြင်ပဝိညာဉ်အရိုး၏ ပံ့ပိုးမှုအကူအညီဖြင့် သူသည် မိမိ၏ စိတ်ဝိညာဉ်စွမ်းအားကို အလွယ်တကူ ထိန်းချုပ်ကာ ထိုဝိညာဉ်စွမ်းရည်၏ စွမ်းအားလှည့်ပတ်စီးဆင်းမှု လမ်းကြောင်းကို အသေးစိတ် ကြည့်ရှုလေ့လာနိုင်ခဲ့သည်။

မိနစ်တစ်ဆယ် ခန့် ကုန်လွန်သွားပြီးနောက်... ချန်ရန်ရွှယ်၏ ဝိညာဉ်စွမ်းအားများ ကုန်ခမ်းလုနီးပါး ဖြစ်လာချိန်တွင်မှ ဟူပိုင်က နောက်ဆုံး၌ နှုတ်ဟလိုက်တော့သည် -

"ရပြီ... အစ်မရွှယ်၊ ကျွန်တော် နားလည်သွားပြီ"

ဟူပိုင်၏ နဖူးပြင်က ချန်ရန်ရွှယ်၏ နဖူးမှ ခွာထုတ်လိုက်သည်။ ချန်ရန်ရွှယ်၏ မျက်နှာလေး အနည်းငယ် ဖြူဖျော့နေသည်ကို မြင်သောအခါ သူ ချက်ချင်းပင် စိတ်မကောင်းဖြစ်သွားရသည်။

"အစ်မရွှယ်... အဆင်ပြေရဲ့လားဟင်"

ချန်ရန်ရွှယ်က ခေါင်းခါပြရင်း ဆိုလိုက်သည် -

"အဆင်ပြေပါတယ်... ဝိညာဉ်စွမ်းအား နည်းနည်း ကုန်သွားရုံတင်ပါ။ မင်း အခု နားလည်သွားပြီလား"

လွန်ခဲ့သည့် တိုတောင်းလှသော ၁၀ မိနစ်အတွင်းမှာပင် သူမအနေဖြင့် အလွန်အမင်း ရင်တထိတ်ထိတ်ဖြင့် ဖြတ်သန်းခဲ့ရသည်။ ၎င်းမှာ ဝိညာဉ်စွမ်းအား ကုန်ခမ်းခြင်းကြောင့် မဟုတ်ဘဲ... ဟူပိုင်၏ စိတ်ဝိညာဉ်စွမ်းအားက သူမ၏ ခန္ဓာကိုယ်ထဲ စိမ့်ဝင်လာသည့် အခါတွင် ခန္ဓာကိုယ်တစ်ခုလုံး ထူးဆန်းသော စိမ့်ကနဲ ယားကျိကျိ ခံစားချက်မျိုး ပေးစွမ်းနေခြင်းကြောင့် ဖြစ်သည်။

ဟူပိုင်က စိတ်လှုပ်ရှားစွာ ခေါင်းညိတ်ပြပြီး -

"ကျွန်တော် ရပြီလို့ ထင်တာပဲ၊ စမ်းကြည့်ပါရစေ"

"လင်းလက်သောကုသခြင်း"

ချက်ချင်းပင် စူးရှတောက်ပလှသော ရွှေရောင်အလင်းတန်းတစ်ခုက ဟူပိုင်၊ ချန်ရန်ရွှယ် နှင့် ချန်တောက်လျို တို့ သုံးဦးစလုံး၏ ခန္ဓာကိုယ်များကို လွှမ်းခြုံသွားခဲ့သည်။

"အစ်မရွှယ်... အဘိုးချန်၊ ခံစားကြည့်လိုက်ကြပါဦး"

လင်းလက်သောကုသခြင်း စွမ်းအားက ချန်တောက်လျို၏ ခန္ဓာကိုယ်ပေါ်သို့ ကျရောက်လာသည့် ထိုခဏ၌ပင်... ဟူပိုင် သေချာပေါက် အောင်မြင်သွားခဲ့ပြီ ဖြစ်ကြောင်း ချန်တောက်လျို သိလိုက်ရသည်။

မူလက သူထင်ထားသည်မှာ ဟူပိုင်တွင် 'မြင့်မြတ်ခြင်း' သဘာဝ မရှိသဖြင့်... ဟူပိုင် အောင်မြင်သွားလျှင်တောင်မှ ကုသခြင်း အာနိသင်က မိမိ၏ 'သန့်စင်သောအလင်းကုသခြင်း' လောက် ကောင်းမွန်လိမ့်မည်မဟုတ်ဟု ဖြစ်သည်။

သို့သော်လည်း ကိုယ်ပိုင်တီထွင် ဝိညာဉ်စွမ်းရည်၏ ထူးခြားချက်ကြောင့် ဖြစ်လိမ့်မည်။ ဟူပိုင်၏ 'လင်းလက်သောကုသခြင်း' ၏ အာနိသင်မှာ 'သန့်စင်သောအလင်းကုသခြင်း' ထက် အားမနည်းရုံသာမက၊ သမိုင်းဝင်အဆင့်အထိပင် အနည်းငယ် သာလွန်နေသလို ခံစားရသည်။ ဒါဟာ သဘာဝဓာတ်စွမ်းအား ရင်းနှီးကျွမ်းဝင်မှုနှင့် အလင်းဓာတ်စွမ်းအား ၂၀၀% အားဖြည့်မှုတို့ ပေါင်းစပ်လိုက်ခြင်းကြောင့် ရရှိလာသော အကျိုးကျေးဇူး ဖြစ်လိမ့်မည်လား။

၎င်းက အမှန်တကယ်ပင် ကြောက်ခမန်းလိမ့် ရှိလှပေသည်။

သေချာသည်မှာ သူ့ကို အံ့ဩအရှိဆုံးဖြစ်စေသည့် အချက်မှာ ဟူပိုင်သည် ဤကိုယ်ပိုင်တီထွင် ဝိညာဉ်စွမ်းရည်ကို မယုံနိုင်စရာကောင်းလောက်အောင် နှစ်နာရီအတွင်းမှာတင် တတ်မြောက်သွားခဲ့ခြင်းပင်။

ထိုခေတ်အခါက ကြီးမြတ်လှသော 'ထန်ချန်' ပင်လျှင် ဤကဲ့သို့သော စွမ်းရည်မျိုး ရှိခဲ့လိမ့်မည် မဟုတ်ချေ။

ဤကိစ္စတွင် မိမိ၏ လမ်းညွှန်ပြသမှုများ ပါဝင်နေသည်မှာ အမှန်ပင် ဖြစ်သော်လည်း၊ ဟူပိုင် အောင်မြင်ရခြင်း၏ အဓိက အကြောင်းရင်းမှာ သူ၏ ထူးကဲလှသော ထိုးထွင်းသိမြင်နိုင်စွမ်း ကြောင့် ဖြစ်သည်ဟု ချန်တောက်လျို ခံစားရသည်။

အချို့သော ဝိညာဉ်စွမ်းရည်များကို မျိုးဆက်အလိုက် လက်ဆင့်ကမ်း သင်ကြားပေးနိုင်သော်လည်း၊ သင်ယူသူတွင် ဉာဏ်ပညာ ပါရမီ မရှိပါက မည်မျှပင် အပင်ပန်းခံ သင်ပြစေကာမူ တတ်မြောက်နိုင်လိမ့်မည် မဟုတ်ချေ။

ထို 'ထန်ဟောက်' ပင်လျှင် ထိုစဉ်က 'ဟောက်ထျန်လျှို့ဝှက်နည်းလမ်း' ကို လေ့လာရန် အချိန်အများကြီး ပေးခဲ့ရသည်ဖြစ်ရာ... ယနေ့ ဟူပိုင် ကဲ့သို့ လွယ်လွယ်ကူကူနှင့် တတ်မြောက်သွားခြင်းမျိုး မရှိနိုင်ခဲ့ချေ။

ယနေ့ ဟူပိုင် လေ့လာလိုက်ရသည်မှာ ကုသခြင်း ဝိညာဉ်စွမ်းရည်တစ်ခုသာ ဖြစ်သော်လည်း... 'သန့်စင်သောအလင်းကုသခြင်း' ဆိုသည်မှာ အခြေခံအားဖြင့် သက်တမ်းထောင်ချီ ဝိညာဉ်ကွင်းအဆင့်ရှိသော စွမ်းရည်တစ်ခု မဟုတ်ပါလော။

ထို့နောက် တစ်နာရီ၏ လေးပုံတစ်ပုံခန့် ကြာမြင့်ပြီးသောအခါ၊ ပီပီတုန်းသည် ပူဇော်သက္ကာနန်းဆောင်သို့ အချိန်တိကျစွာ အရောက်လှမ်းလာခဲ့သည်။

"ဟူပိုင်... လေ့လာရတာ ဘယ်လိုလဲ" ပီပီတုန်း၏ အသံမှာ အေးစက်နေသော်လည်း၊ စူးစမ်းလိုစိတ် အရိပ်အယောင် အနည်းငယ် ပါဝင်နေခဲ့ပေသည်။