အခန်း(၂၆) - ပီပီတုန်း၏ ကတိကဝတ်နှင့် အပြောင်းအလဲ၊ သန့်စင်သောအလင်း ကုသခြင်း

အသက် ၁၄ နှစ် မပြည့်ခင်မှာ ခရမ်းရောင်မှတ်တမ်းတံဆိပ်ကို အရောက်လှမ်း ရယူရမယ် ဟုတ်လား။

ဒါဟာ သူတို့ သုံးယောက်စလုံးအနေနဲ့ အသက် ၁၄ နှစ်မတိုင်ခင်မှာ ဝိညာဉ်စွမ်းအား အနည်းဆုံး အဆင့် ၄၀ ကို ရောက်ရှိရမည့်အပြင်၊ မစ်ရှင်ပေါင်းများစွာကို ပြီးမြောက်အောင်မြင်ခဲ့သည့် အတွေ့အကြုံနှင့် မိမိထက် အဆင့်မြင့်သည့် ပြိုင်ဘက်များကို ကျော်ဖြတ်အနိုင်ယူဖူးသည့် တိုက်ပွဲအတွေ့အကြုံများပါ ရှိရမယ်လို့ ဆိုလိုတာ မဟုတ်ပါလား။

ဟူပိုင် ရင်ထဲတွင် တွေးတောလိုက်မိသည်။ မူလဇာတ်လမ်းထဲတွင်မူ 'ရွှေရောင်မျိုးဆက်' သည် အသက် ၁၅ နှစ်အရွယ်ကျမှသာ ခရမ်းရောင်မှတ်တမ်းတံဆိပ်ကို ရရှိခဲ့ကြခြင်းဖြစ်ပြီး ၎င်းကပင် စံချိန်တင်အဆင့် ဖြစ်ခဲ့သည်။ ယခုမူ သူ ရောက်ရှိလာခြင်းကြောင့် ဖြစ်ပေါ်လာသော လိပ်ပြာအတောင်ပံခတ် အကျိုးသက်ရောက်မှု ကြောင့် သတ်မှတ်ချက် စံနှုန်းများက ပိုမိုမြင့်မားသွားခဲ့ရပြီလား။

သူတို့ သုံးယောက်စလုံး ဆိတ်ဆိတ်ငြိမ်သက်နေကြသည်ကို မြင်သောအခါ ပီပီတုန်း၏ အသံက အေးစက်စွာ ထွက်ပေါ်လာခဲ့သည်။

"ဘာလဲ... ငါ့ရဲ့ တပည့်ရင်းတွေ ဖြစ်နေပြီးတော့ ဒီလောက် သတ်မှတ်ချက်အသေးအဖွဲလေးကိုတောင် မင်းတို့ မပြည့်မီနိုင်ကြဘူးလား"

အမှန်အတိုင်းပြောရလျှင် သူမအနေဖြင့် မူလက ဤကဲ့သို့ တင်းကျပ်သော သတ်မှတ်ချက်မျိုး ထားရှိရန် အစီအစဉ်မရှိခဲ့ပါချေ။ သို့သော်လည်း ဟူပိုင်၏ ထူးကဲလှသော ပါရမီကို မြင်တွေ့ခဲ့ရပြီးနောက်တွင် သူ့အပေါ်၌ ဖိအားအနည်းငယ် ပိုမိုပေးရန် ဆုံးဖြတ်လိုက်ခြင်း ဖြစ်သည်။

ဟူပိုင်သည် ဝိညာဉ်နိုးထခြင်းကို ပြီးမြောက်ခဲ့သည်မှာ တစ်လကျော်ရုံသာ ရှိသေးသော်လည်း၊ သူ၏ ဝိညာဉ်စွမ်းအားမှာ ၁၃ ဆင့်အထိ ခုန်တက်သွားခဲ့ပြီး အဆင့် ၂၃ သို့ ရောက်ရှိနေပြီ ဖြစ်သည်။ အဆင့် ၄၀ သို့ ရောက်ရန် ၁၇ ဆင့်သာ လိုတော့သဖြင့်... နောက်ထပ် ရှစ်နှစ်ဆိုသည့် အချိန်ကာလမှာ လုံလောက်သည်ထက်ပင် ပိုနေသေးသည်။

အကယ်၍ ရှဲ့ယွဲ့နှင့် ဟူလီနာတို့ကို ထည့်သွင်းစဉ်းစားမပေးခဲ့လျှင်... သူမအနေဖြင့် ဟူပိုင်အား အသက် ၁၂ နှစ်မတိုင်ခင်မှာတင် ခရမ်းရောင်မှတ်တမ်းတံဆိပ်ကို ရယူခိုင်းရန် စိတ်ကူးမိလိမ့်မည် ဖြစ်သည်။

ဟူပိုင်ဘက်ကမူ ဤကိစ္စအပေါ် မည်သည့်ကန့်ကွက်မှုမျှ မရှိသော်လည်း၊ ရှဲ့ယွဲ့နှင့် ဟူလီနာတို့အတွက်မူ ဖိအားက အလွန်တရာ ကြီးမားလှသည်။ ပီပီတုန်းက ထိုအခြေအနေကို သတိပြုမိသွားပြီးနောက် မီးလောင်ရာလေပင့်သည့်အနေဖြင့် ထပ်လောင်းပြောဆိုလိုက်သည်။

"ရှဲ့ယွဲ့... နာနာ၊ အကယ်၍ မင်းတို့နှစ်ယောက်သာ အသက် ၁၄ နှစ်မပြည့်ခင် ခရမ်းရောင်မှတ်တမ်းတံဆိပ်ကို ရယူနိုင်မယ်ဆိုရင်... ငါ့ရဲ့ အခွင့်အာဏာနဲ့ မင်းတို့နှစ်ယောက်လုံးအတွက် ကိုက်ညီမယ့် ဝိညာဉ်အရိုး တစ်ခုစီကို ရွေးချယ်ပေးမယ်။ သက်တမ်းပိုင်းကိုတော့... အနည်းဆုံး နှစ်ပေါင်း တစ်သောင်းအထက် လို့ ငါ အာမခံတယ်"

ဝိညာဉ်အရိုး တဲ့လား။

ထိုစကားကို ကြားလိုက်ရသည့် ခဏ၌ပင် ရှဲ့ယွဲ့နှင့် ဟူလီနာတို့သည် ၎င်းကို မဖြစ်နိုင်တော့သည့်အရာဟု လုံးဝ မထင်ကြတော့ချေ။ သူတို့၏ မျက်ဝန်းများ ဝင်းပသွားကြပြီး ချက်ချင်းပင် ပြိုင်တူ ဆိုလိုက်ကြတော့သည်-

"ဟုတ်ကဲ့ပါ ဆရာ.. သမီးတို့ မောင်နှမနှစ်ယောက်စလုံး အသက် ၁၄ နှစ်မတိုင်ခင် ခရမ်းရောင်မှတ်တမ်းတံဆိပ်ကို သေချာပေါက် ရအောင်ယူပါ့မယ်လို့ အာမခံပါတယ်။ ဆရာ့ကို စိတ်ပျက်စေရမှာ မဟုတ်ပါဘူး"

ဟူပိုင်က ပီပီတုန်းကို ကြည့်ကာ မျက်တောင်လေး တဖျတ်ဖျတ်ခတ်ရင်း မိမိကိုယ်ကိုယ် ပြန်ညွှန်ပြလိုက်သည်-

"ဆရာ... ဒါဆို ကျွန်တော်ကော။ ကျွန်တော့်အတွက် မရှိဘူးလား"

ပီပီတုန်း၏ နှုတ်ခမ်းအစုံက အနည်းငယ် ကွေးညွတ်သွားပြီး -

"အဲဒီနှစ်ယောက်အတွက်တော့ အသက် ၁၄ နှစ်မှာ အဆင့် ၄၀ ကျော်ဖို့က နည်းနည်း ခက်ခဲလိမ့်မယ်၊ ဒါပေမယ့် မင်းအတွက်ကျတော့ ဒါက ပုံမှန်ဖြစ်ရမယ့် သတ်မှတ်ချက် မဟုတ်ဘူးလား။ ဒါပေမယ့်... မင်းသာ အသက် ၁၂ နှစ်မပြည့်ခင်မှာ ခရမ်းရောင်မှတ်တမ်းတံဆိပ်ကို ရယူနိုင်မယ်ဆိုရင်တော့၊ မင်းအတွက်လည်း သင့်တော်မယ့် ဝိညာဉ်အရိုးတစ်ခုကို ငါ ရှာဖွေပေးမယ်။ ဘယ်လိုလဲ"

အသက် ၁၂ နှစ်..

ဟူပိုင် ခဏမျှ စဉ်းစားလိုက်သည်။ ဒါက တကယ်တော့ အနည်းငယ် ခက်ခဲလှသည်။ အသက် ၁၂ နှစ်တွင် အဆင့် ၄၀ သို့ မရောက်နိုင်၍ မဟုတ်ပါချေ ။ အဘယ်ကြောင့်ဆိုသော် နောင်ကျရင် မသေဆေးမြက်နု များကို ရရှိပါက သူတို့ သုံးယောက်လုံး၏ ကျင့်ကြံခြင်းအဆင့်မှာ အရှိန်အဟုန်ပြင်းပြင်းနှင့် ပေါက်ကွဲတိုးတက်လာမည် ဖြစ်သောကြောင့်ပင်။ သို့သော်လည်း ခရမ်းရောင်မှတ်တမ်းတံဆိပ်ကို ရရှိရန်အတွက် ဝိညာဉ်စွမ်းအားအဆင့် ပြည့်မီရုံမျှနှင့် မလုံလောက်ဘဲ... မစ်ရှင်များကိုလည်း အဆက်မပြတ် သွားရောက်လုပ်ဆောင်ရမည် ဖြစ်သည်။

ဘာပဲဖြစ်ဖြစ်... ဝိညာဉ်အရိုး တစ်ခုအတွက်ဆိုလျှင်တော့ သူ သဘောတူရပေမည်။

နောက်တစ်ဆင့်အနေဖြင့် သူတို့သုံးယောက်ထဲတွင် ဟူလီနာတစ်ဦးသာ ဝိညာဉ်စွမ်းရည်ကို မထုတ်ရသေးချေ။ စောစောက ပြောထားသည့်အတိုင်း ဟူလီနာသည် ဟူပိုင်အပေါ်သို့ ညှို့ဓာတ်စွမ်းရည်ကို သုံးပြရမည်ဖြစ်ပြီး၊ ၎င်းက မည်မျှအထိ ထိရောက်မှုရှိမလဲဆိုသည်ကို စမ်းသပ်ရမည် ဖြစ်သည်။

"ဒုတိယအစ်ကို... သတိထားနော်၊ ညီမလေးလည်း နည်းနည်း စိတ်ဝင်စားနေတာ... အစ်ကို့ရဲ့ ညှို့ဓာတ်နဲ့ ညီမလေးရဲ့ ညှို့ဓာတ် ဘယ်သူက ပိုပြီး အစွမ်းထက်မလဲဆိုတာလေ" ဟူလီနာက တခိခိ ရယ်မောလိုက်သည်။ ဝိညာဉ်အကာအကွယ်ကို ရယူလိုက်ပြီးနောက်တွင် သူမ၏ ပုံစံမှာ ပိုမို၍ ညှို့ဓာတ်ပြင်းပြင်းနှင့် စွဲမက်ဖွယ်ကောင်းလာခဲ့ကာ... သူမ၏ ပြုံးပန်းတိုင်း၊ အမူအရာတိုင်းက အခြားသူများ၏ နှလုံးသားကို ဆွဲကိုင်လှုပ်ရမ်းနိုင်စွမ်း ရှိနေသည်။

သို့သော် ရှဲ့ယွဲ့နှင့် ဟူပိုင်တို့အတွက်မူ ဤမြင်ကွင်းအပေါ် ထူးထူးခြားခြား စိတ်လှုပ်ရှားမှုမျိုး မရှိကြချေ။ ၎င်းမှာ ငယ်စဉ်ကတည်းက အတူတူ ကြီးပြင်းလာခဲ့ကြသဖြင့် ဟူလီနာ၏ စရိုက်ကို အလွန်အမင်း ရင်းနှီးနေကြခြင်းကြောင့် ဖြစ်နိုင်သလို... ဤကဲ့သို့သော အလှတရားမျိုးအပေါ် မွေးရာပါ ခုခံနိုင်စွမ်း ရှိနေခြင်းကြောင့်လည်း ဖြစ်နိုင်သည်။

သေချာသည်မှာ နောက်ထပ် အလွန်အရေးကြီးသော အကြောင်းရင်းတစ်ခုလည်း ရှိသေးသည် ။ ပုံမှန် ညီအစ်ကိုအရင်း ခေါက်ခေါက် တစ်ယောက်က မိမိ၏ ညီမအရင်းအပေါ် ထိုကဲ့သို့သော လမ်းမှားရောက်သည့် အတွေးမျိုး တွေးစရာ အကြောင်းရှိပါ့မလား။

သူတို့က စိတ်မမှန်သည့်သူတွေ မှ မဟုတ်ကြဘဲ။

ခုနတင် ခဏမျှ အနားယူလိုက်ရသဖြင့် ဟူပိုင်၏ ခန္ဓာကိုယ်အတွင်းရှိ ဝိညာဉ်စွမ်းအားများမှာလည်း အတိုင်းအတာတစ်ခုအထိ ပြန်လည်ကောင်းမွန်လာခဲ့ပြီ ဖြစ်သည်။ သူသည် ထန်ဆန်း၏ 'ရွှေရောင်ကောင်းကင်အတတ်ပညာ' ကို မတတ်မြောက်သော်လည်း၊ ဝိညာဉ်နန်းတော်က သူတို့အား သင်ကြားပေးထားသည့် တရားထိုင်ခြင်းနည်းလမ်း မှာလည်း ထိပ်သီးအဆင့်အတန်းတွင် ရှိနေသည်။ ၎င်း၏ ဝိညာဉ်စွမ်းအား လှည့်ပတ်စီးဆင်းမှု လမ်းကြောင်းများကြောင့် သူတို့သည် ဝိညာဉ်စွမ်းအားကို ပိုမိုမြန်ဆန်စွာ စုပ်ယူနိုင်ပြီး ပြန်လည်ဖြည့်တင်းနိုင်သည်။

ဒါဟာ အမှန်တော့ ဝိညာဉ်သခင်များအနေဖြင့် ဝိညာဉ်နိုးထပြီးနောက် သင်တန်းကျောင်းကျောင်းများသို့ သွားရောက်ကာ အဘယ်ကြောင့် ပညာသင်ယူရသလဲဆိုသည့် အကြောင်းရင်းပင် ဖြစ်သည်။ သင်တန်းကျောင်းများတွင်သာ ဝိညာဉ်စွမ်းအားကို မည်သို့ ကျင့်ကြံရမည်ဆိုသည့် နည်းစနစ်များကို သင်ကြားပေးနိုင်သောကြောင့် ဖြစ်၏။ သို့သော်လည်း အခြေခံအားဖြင့် ဤတရားထိုင်ခြင်းနည်းလမ်းများမှာ များစွာ ကွာခြားမှု မရှိကြချေ။ ဝိညာဉ်နန်းတော်၊ သဘာဝဓာတ်ကြီးငါးပါး သင်တန်းကျောင်းများ သို့မဟုတ် ကြီးမြတ်လှသော ဂိုဏ်းကြီးခုနစ်ခု ကဲ့သို့သော အင်အားစုကြီးများမှလွဲ၍ ကျန်နေရာများတွင်မူ ကွာဟချက် အနည်းငယ် ရှိနိုင်သည်။

သို့သော် ဤကျင့်စဉ်နည်းလမ်းများထဲတွင် ထန်ဆန်း ပိုင်ဆိုင်ထားသော 'ရွှေရောင်ကောင်းကင်အတတ်ပညာ' မှာမူ ဤကမ္ဘာတွင် တစ်မူထူးခြားသည့် အဆင့်အတန်းတစ်ခုတွင် ရှိနေသည်ဟု သတ်မှတ်ရမည်။ ၎င်းက ဝိညာဉ်နန်းတော်၏ တရားထိုင်နည်းစနစ်ထက် ဝိညာဉ်စွမ်းအားတိုးတက်မှုအပိုင်းတွင် အများကြီး သာလွန်မနေသည့်တိုင်အောင်... ၎င်းတွင် ပါဝင်သော ထပ်ဆောင်း အာနိသင်များမှာ ဝိညာဉ်နန်းတော်၏ နည်းစနစ်တွင် မရှိသော အရာများ ဖြစ်ကြသည်။

ဒါပေမယ့် ဒါက အရေးမကြီးပါချေ။ နောင်လာမည့်ရက်များတွင် ဝိညာဉ်နန်းတော်၏ တရားထိုင်နည်းစနစ်ကို အခြေခံပြီး သူကိုယ်တိုင် တစ်မူထူးခြားသော ကိုယ်ပိုင်ကျင့်စဉ်နည်းလမ်းတစ်ခုကို တီထွင်ဖန်တီးနိုင်မည် မဟုတ်ပါလော။

ထို့အပြင် ယခုအခါ သူသည် ထန်ဆန်းထက် အသက် ၆ နှစ်နီးပါးခန့် ကြိုတင်၍ အခွင့်အရေး ရရှိထားပြီးဖြစ်ကာ ဇာတ်လမ်းအကွေ့အကောက်များကိုလည်း ရေရေလည်လည် သိရှိထားသူ ဖြစ်သည်။ နောင်ကျရင် ထန်ဆန်း၏ ကျော်တက်ခြင်းကို ခံရစရာ အကြောင်း လုံးဝမရှိချေ။

အကယ်၍ ထိုသို့သာ အကျော်ခံလိုက်ရလျှင်... သူ သိက္ခာအကျဆုံး ဖြစ်သွားရမည် မဟုတ်ပါလား။

ဘာပဲဖြစ်ဖြစ် သူ့မှာ ကျင့်ကြံရန်အတွက် အချိန် ၆ နှစ် ပိုမို ရရှိထားခြင်း ဖြစ်သည်။

နန်းတော်ချုပ် တွင် သင်ခန်းစာများ သင်ယူပြီးနောက်တွင်... ဟူပိုင်အား ပီပီတုန်းက ပူဇော်သက္ကာနန်းဆောင် သို့ ခေါ်ဆောင်လာခဲ့သည်။

ပူဇော်သက္ကာနန်းဆောင်သည် နန်းတော်ချုပ်၏ နောက်ကွယ်ရှိ တောင်တန်းတစ်ခုပေါ်တွင် တည်ရှိသည်။ ဒါဟာ ဟူပိုင်အနေဖြင့် ဤနေရာသို့ ပထမဆုံးအကြိမ် ရောက်ရှိလာခြင်း ဖြစ်၏။

ပူဇော်သက္ကာနန်းဆောင်အတွင်း၌မူ... ချန်တောက်လျို နှင့် ရွှေမိကျောင်း တို့အပြင်၊ ကျန်ရှိသော ကြီးမြတ်လှသည့် အရာရှိကြီး ၅ ဦးစလုံးမှာလည်း ဟူပိုင်ဆိုသည့် ကောင်လေးကို စူးစမ်းလိုစိတ်များဖြင့် ခေါင်းအစခြေအဆုံး စိုက်ကြည့်နေကြသည်။

ပီပီတုန်းက ကြီးမြတ်လှသော အရာရှိကြီး ၇ ဦးလုံးကို အေးစက်စွာ တစ်ချက်ကြည့်လိုက်ပြီးနောက်၊ ခေါင်းငုံ့ကာ ဟူပိုင်အား နူးညံ့သိမ်မွေ့သော အသံဖြင့် ဆိုလိုက်သည် -

"ဒီမှာ ကောင်းကောင်းမွန်မွန် လေ့လာပါ။ နောက် နှစ်နာရီကြာရင် ငါ မင်းကို လာခေါ်မယ်။ အကယ်၍ သူတို့တွေ မင်းအပေါ် မကောင်းတာတစ်ခုခု လုပ်ရဲရင် ငါ့ကို ပြန်ပြောပါ"

ပြောပြီးသည်နှင့် တစ်ပြိုင်နက် ပီပီတုန်း၏ ပုံရိပ်က လျှပ်ကနဲ ပျောက်ကွယ်ကာ ပူဇော်သက္ကာနန်းဆောင်မှ ထွက်ခွာသွားခဲ့တော့သည်။ တစ်ချက်ကလေးမျှပင် သူမသည် ချန်ရန်ရွှယ်ကို လှည့်မကြည့်ခဲ့ချေ သို့မဟုတ်... တမင်တကာကို အောင့်အီးသည်းခံပြီး လှည့်မကြည့်ဘဲ နေခဲ့ခြင်း ဖြစ်သည်။

သို့သော်လည်း ကြီးမြတ်လှသော အရာရှိကြီး ၇ ဦးမှာမူ ပီပီတုန်း ထွက်ခွာခါနီးတွင် သူမ၏ မျက်ဝန်းထောင့်မှနေ၍ ချန်ရန်ရွှယ်ထံသို့ မရည်ရွယ်ဘဲ တစ်ချက် ဝေ့ဝဲကြည့်သွားခဲ့သည်ကို သတိပြုမိလိုက်ကြသည်။

ယနေ့ ပီပီတုန်းနှင့် ဟူပိုင်တို့၏ ဆက်ဆံရေးကို ကိုယ်တိုင်မျက်မြင် တွေ့လိုက်ရပြီးနောက်တွင်... အရာရှိကြီး ၅ ဦးလုံးမှာလည်း အကြီးအကဲ ရွှေမိကျောင်း ယခင်က ပြောခဲ့ဖူးသည့် စကားများကို အတိုင်းအတာတစ်ခုအထိ ယုံကြည်သွားကြပြီ ဖြစ်သည်။

ပီပီတုန်းက အမှန်တကယ်ပဲ ပြောင်းလဲသွားခဲ့ပြီ။ ဒီအပြောင်းအလဲက အထူးတလည်ကြီး မကြီးမားသေးသည့်တိုင်အောင်ပေါ့။

ချန်ရန်ရွှယ်ဘက်တွင်မူ... ထွက်ခွာသွားသော ပီပီတုန်း၏ ကျောပြင်ကို ကြည့်ရင်း ရင်ထဲတွင် တွေးမရသည့် ဆုံးရှုံးမှုဝေဒနာတစ်ခုကို ခံစားလိုက်ရသည်။ ပီပီတုန်းသည် သူမအပေါ်တွင် ဤကဲ့သို့သော နူးညံ့သိမ်မွေ့သည့် အသံမျိုးဖြင့် တစ်ခါမျှ စကားမပြောခဲ့ဖူးပါချေ။

သူမအနေဖြင့် အဘိုးဖြစ်သူ ၇ ဦးလုံးကို ဤအကြောင်းရင်းအား မေးမြန်းဖူးသော်လည်း၊ သူတို့အားလုံးက နှုတ်ဆိတ်နေခဲ့ကြသည်။

သို့သော်... ပီပီတုန်း၏ မေတ္တာကို လုယူသွားသည့်အတွက် ဟူပိုင်အပေါ်တွင် သူမ မနာလိုဖြစ်မိသလား။ ထိုကဲ့သို့သော အတွေးမျိုး သူမရင်ထဲတွင် လုံးဝမရှိပါချေ။

ဆန့်ကျင်ဘက်အနေဖြင့်... ဟူပိုင်၏ ပေါ်ပေါက်လာမှုက သူမ၏ မူလက မှောင်မိုက်နေသော နှလုံးသားကမ္ဘာလေးထဲသို့ လင်းလက်တောက်ပစွာ ကျရောက်လာသည့် အလင်းတန်းတစ်ခုကဲ့သို့ ဖြစ်နေခဲ့သည်။

သူမ ယခုအခါ အတော်များများ တွေးတောနားလည်သွားခဲ့ပြီ။ သူမတွင် ဖခင်မေတ္တာ၊ မိခင်မေတ္တာ မရှိခဲ့သည့်တိုင်အောင်... သူမကို အလွန်ချစ်မြတ်နိုးကြသည့် အဘိုးများ ရှိနေဆဲဖြစ်သလို၊ ဟူပိုင်ကဲ့သို့သော မိတ်ဆွေကောင်း တစ်ယောက်လည်း ရှိနေပြီ မဟုတ်ပါလော။

ချန်တောက်လျိုကမူ ဟူပိုင်ဆိုသည့် ကောင်လေးကို ကြည့်ရင်း ကြည့်ရင်းနှင့် ပိုမို သဘောကျ ကျေနပ်လာခဲ့ရသည်။ သူသည် ဟူပိုင်နှင့် ပီပီတုန်းတို့အကြား ယှဉ်ပြိုင်ခဲ့သည့် တိုက်ပွဲတစ်ခုလုံးကိုလည်း စောင့်ကြည့်သိရှိထားသူ ဖြစ်သည်။

သူ၏ အစွမ်းထက်လှသော စိတ်ဝိညာဉ်စွမ်းအားနှင့်ဆိုလျှင် ပူဇော်သက္ကာနန်းဆောင်မှနေ၍ အဝေးရှိ နန်းတော်ချုပ်အတွင်း ဖြစ်ပျက်သမျှ အခြေအနေအားလုံးကို အတိုင်းသား အာရုံခံနိုင်သည်။ ဟူပိုင်၏ သဘာဝဓာတ်စွမ်းအား အသုံးချပုံမှာ ရိုးရိုးရှင်းရှင်း မဟုတ်ဘဲ အလွန်တရာ ဆန်းကြယ်ဉာဏ်ကောင်းလှကြောင်း သူ တွေ့ရှိခဲ့ရသည်။

"ကဲ... ကောင်လေး၊ တို့တွေမှာ အချိန် နှစ်နာရီပဲ ရှိတယ်။ ဒီနေ့ ငါ မင်းကို သင်ပေးမယ့် အလင်းဓာတ်စွမ်းအား အသုံးချပုံကတော့... 'ခြောက်တောင်ပံကောင်းကင်တမန်' ဝိညာဉ်ဆီကနေ ဆင်းသက်လာတဲ့ အလင်းသဘာဝ ကုသခြင်း ဝိညာဉ်စွမ်းရည် ဖြစ်တဲ့ - 'သန့်စင်သောအလင်း ကုသခြင်း' ပဲ"

"သန့်စင်သောအလင်း ကုသခြင်း ဆိုတာက ခြောက်တောင်ပံကောင်းကင်တမန် ဝိညာဉ်ရဲ့ မြင့်မြတ်တဲ့စွမ်းအား နဲ့ အလင်းစွမ်းအား တို့ ပေါင်းစပ်ပြီး အသက်သွင်းရတဲ့ ကုသခြင်း ဝိညာဉ်စွမ်းရည် တစ်ခု ဖြစ်တယ်။ မင်းကတော့ အလင်းဓာတ်စွမ်းအား တစ်ခုတည်းကိုပဲ ထိန်းချုပ်နိုင်တာ ဖြစ်ပေမယ့်... မင်းသာ ဒါကို တတ်မြောက်အောင် သင်ယူနိုင်မယ်ဆိုရင်၊ ရရှိမယ့် ကုသခြင်းအာနိသင်က အားနည်းသွားမှာ မဟုတ်ပါဘူး"