အခန်း (၁၈၀) - တစ်မိသားစုလုံး၏ အင်အားကို သုံး၍ အခြေခံတည်ဆောက်ခြင်းဆေးလုံးနှင့် လဲလှယ်ခြင်း

မဟာအကြီးအကဲ၏ မေးခွန်းကို အခြေအနေသွားရောက်စစ်ဆေးပြီးကာစဖြစ်သော ပဉ္စမအကြီးအကဲက ပြန်လည်ဖြေကြားလိုက်သည်။

"ငါ မိသားစုရဲ့ ဘဏ္ဍာတိုက်ထဲက သိုင်းဝိညာဉ်အရိုးတွေအကုန်လုံးကို ယူလာခဲ့တယ်၊ တစ်ချက်လောက် ကြည့်ကြည့်ကြပါဦး"

ပြောပြောဆိုဆိုဖြင့် ပဉ္စမအကြီးအကဲသည် သူ၏ သိုလှောင်ခြင်းသိုင်းကိရိယာထဲမှ သိုင်းဝိညာဉ်အရိုးအားလုံးကို ထုတ်ယူကာ စားပွဲရှည်ကြီးပေါ်သို့ တင်လိုက်သည်။ စားပွဲပေါ်ရှိ သိုင်းဝိညာဉ်အရိုးအားလုံးမှာ နှစ်ပေါင်းတစ်သောင်းအောက် အဆင့်များသာဖြစ်ပြီး နှစ်ပေါင်းတစ်သောင်းသက်တမ်းရှိသော အရိုးတစ်ခုမျှပင် ပါမလာခဲ့ချေ။ နှစ်ပေါင်းခြောက်ထောင်ကျော် သက်တမ်းရှိသော အရိုးနှစ်ခုနှင့် ခြောက်ထောင်အောက် သက်တမ်းရှိသော အရိုးခြောက်ခု၊ ဤသည်မှာ ဘဏ္ဍာတိုက်တစ်ခုလုံးတွင် ရှိသမျှ သိုင်းဝိညာဉ်အရိုးအားလုံးပင် ဖြစ်တော့သည်။

မဟာအကြီးအကဲသည် ထိုသိုင်းဝိညာဉ်အရိုးများကို ကြည့်ရင်း သက်ပြင်းချကာ တိတ်ဆိတ်သွားခဲ့သည်။

"ဒါက နည်းလွန်းလှချေလား၊ ဒီအရိုးတွေအကုန်လုံး ပေါင်းလိုက်ရင်တောင် အခြေခံတည်ဆောက်ခြင်းဆေးလုံး လေးလုံးစာလောက်ပဲ လဲလို့ရမှာ မဟုတ်လား"

"မဟုတ်ဘူး၊ သုံးလုံးပဲ ရရင်ရမှာ ဟု ယွီရှောင်ဂန်း၏ဖခင်ဖြစ်သူ မျိုးနွယ်စုခေါင်းဆောင် ယွီယွမ်ကျန်းက ကြားဖြတ်ပြောဆိုလိုက်သည်။"

"အားလုံးသိကြတဲ့အတိုင်း နှစ်ပေါင်းခြောက်ထောင်အောက် သိုင်းဝိညာဉ်အရိုးတွေက သိုင်းပညာရှင်တွေအတွက် သိပ်ပြီးအသုံးမဝင်လှဘူး၊ ဒီခြောက်ထောင်အောက် အရိုးခြောက်ပွင့်လုံး ပေါင်းမှ ဆေးလုံးတစ်လုံးစာပဲ တန်ဖိုးရှိလိမ့်မယ်"

ထို့နောက် ယွီယွမ်ကျန်းက ပတ်ဝန်းကျင်ကို လေးနက်သောမျက်ဝန်းများဖြင့် ဝေ့ကြည့်ကာ အသံကိုနှိမ့်၍ ဆိုလိုက်သည်။

"အခုအချိန်က ငါတို့ဂိုဏ်းရဲ့ ကြီးကျယ်တဲ့အနာဂတ်အတွက် စကားပြောရမယ့်အချိန်ပဲ၊ မင်းတို့လက်ထဲမှာ အဆင့်မြင့်သိုင်းဝိညာဉ်အရိုးတွေ ရှိနေတယ်ဆိုရင် ထုတ်ပေးကြပါ၊ မိသားစုအနေနဲ့ မင်းတို့ရဲ့အရိုးတွေကို တခြားသူတွေအတွက် အလဟဿ အသုံးပြုမှာမဟုတ်ဘူး၊ ဒီအရိုးတွေနဲ့ လဲလှယ်လို့ရလာတဲ့ ဆေးလုံးတွေကို မင်းတို့ကိုယ်တိုင် စိတ်ကြိုက် စီမံခန့်ခွဲခွင့်ပေးမယ်"

ယွီယွမ်ကျန်း ကောင်းကောင်းသိရှိထားသည်။ သိုင်းဝိညာဉ်အရိုးဟူသည် အလွန်ရှားပါးလှသည်ဆိုသော်လည်း မိသားစုဘဏ္ဍာတိုက်ထဲတွင် နှစ်ပေါင်းတစ်သောင်းသက်တမ်းရှိသော အရိုးတစ်ခုမျှပင် မရှိရခြင်းမှာ မဖြစ်နိုင်ချေ။ ကံထူး၍ သိုင်းဝိညာဉ်အရိုး ရရှိထားသော်လည်း မိသားစုထံ အစီရင်မခံဘဲ ဖုံးကွယ်ထားသူများ ရှိနေရမည် ဖြစ်သည်။ နှစ်ပေါင်းတစ်သောင်း သက်တမ်းရှိ သိုင်းဝိညာဉ်အရိုး၏ တန်ဖိုးမှာ အတိုင်းအဆမရှိလှရာ ရရှိထားသူတိုင်းသည် မိမိကိုယ်တိုင် စုပ်ယူရန် သို့မဟုတ် သားစဉ်မြေးဆက်အတွက် သိမ်းဆည်းထားရန်သာ ကြိုးစားကြမည်ဖြစ်ပြီး မတတ်သာသည့် အဆုံးမှသာ မိသားစုထံ အပ်နှံကြမည် မဟုတ်ပါလား။

ထိုစကား ထွက်လာသည်နှင့်တစ်ပြိုင်နက် ခန်းမဆောင်ကြီးတစ်ခုလုံး တိတ်ဆိတ်ခြောက်သွေ့သွားခဲ့သည်။ ယွီယွမ်ကျန်းက သက်ပြင်းတစ်ချက်ချလိုက်ပြီးနောက် သူ၏ သိုလှောင်ခြင်းကိရိယာထဲမှ နှစ်ပေါင်းနှစ်သောင်း သက်တမ်းရှိသော ညာဘက်လက်ရုံး သိုင်းဝိညာဉ်အရိုးတစ်ခုကို အရင်ဆုံး ထုတ်ယူလိုက်သည်။ ထိုအရိုးကို သူရရှိထားသည်မှာ ကြာမြင့်လှပြီဖြစ်သော်လည်း သူ၏ခန္ဓာကိုယ်ရှိ အရိုးနေရာများနှင့် ထပ်နေသဖြင့် နောင်တစ်ချိန်တွင် မျိုးနွယ်စုခေါင်းဆောင်ရာထူးကို ဆက်ခံမည့် တပည့်ဖြစ်သူအတွက် သိမ်းဆည်းပေးထားခဲ့ခြင်း ဖြစ်သည်။ သို့သော် ယခုအချိန်တွင်မူ မိသားစု၏ အနာဂတ်အတွက် ထိုအရိုးကို ထုတ်သုံးရန် ဆုံးဖြတ်လိုက်ရတော့သည်။

သို့ဆိုလျှင် ထိုအရိုးကို မိမိ၏သားဖြစ်သူ ယွီရှောင်ဂန်းအား အဘယ်ကြောင့် မပေးသနည်း။ အခြားသော ရတနာပစ္စည်းများကို ပေးချင်ပေးနိုင်သော်လည်း ဤကဲ့သို့ တန်ဖိုးကြီးမားလှသော သိုင်းဝိညာဉ်အရိုးကို ယွီရှောင်ဂန်းအား ပေးအပ်လိုက်ခြင်းမှာ သဲထဲရေသွန်သကဲ့သို့ အလဟဿ ဖြုန်းတီးပစ်ခြင်းသာ ဖြစ်ပေလိမ့်မည်။

"အဟမ်း... မျိုးနွယ်စုခေါင်းဆောင်၊ ငါ့လက်ထဲမှာလည်း တစ်ခုရှိပါတယ်" ဟု မဟာအကြီးအကဲက လည်ချောင်းသံဖြင့် ပြောဆိုလိုက်ပြီးနောက် သူ၏လက်ဖဝါးပေါ်တွင် တိကျလှသော နှစ်ပေါင်းတစ်သောင်း သက်တမ်းရှိ ဦးခေါင်းသိုင်းဝိညာဉ်အရိုးတစ်ခု ပေါ်လာခဲ့သည်။

"တခြားသူတွေကော ရှိသေးလား" ဟု ယွီယွမ်ကျန်းက ဆက်လက်မေးမြန်းလိုက်သည်။

"ရှိပါတယ်၊ ကျွန်တော့်ဆီမှာ နှစ်ပေါင်းခြောက်ထောင်သက်တမ်းရှိတဲ့ ရင်အုပ်အရိုးတစ်ခု ရှိပါတယ်"

"ကျွန်တော့်ဆီမှာတော့ နှစ်ပေါင်းရှစ်ထောင်သက်တမ်းရှိတဲ့ ဘယ်ဘက်ခြေထောက်အရိုး ရှိပါတယ်"

"ကျွန်တော့်မှာလည်း..."

ထိုအခါမှသာ ခန်းမအတွင်းရှိ လူအများထံမှ သိုင်းဝိညာဉ်အရိုးများ တဖွဲဖွဲ ထွက်ပေါ်လာတော့သည်။ ဟုတ်ပေသည်၊ ထိုသူများအထဲတွင် မဟာအကြီးအကဲနှင့် မျိုးနွယ်စုခေါင်းဆောင်တို့မှလွဲ၍ ကျန်ရှိသောသူများ ထုတ်ပြသည့်အရိုးများမှာ နှစ်ထောင်ချီသက်တမ်းရှိသော အရိုးများသာ ဖြစ်ကြသည်။ မဟာအကြီးအကဲသည် သူ၏လူယုံဖြစ်ပြီး ယွီသျှံဟန်ကို ထောက်ခံသူဖြစ်ရာ ထိုနှစ်ပေါင်းတစ်သောင်းအရိုးမှာ ယွီသျှံဟန်အတွက် သိမ်းဆည်းပေးထားခြင်း ဖြစ်ပေလိမ့်မည်။ ယွီယွမ်ကျန်းက မဟာအကြီးအကဲကို လေးနက်စွာ တစ်ချက်ကြည့်လိုက်သော်လည်း ဘာမျှ ဆက်မပြောတော့ပေ။

လက်ရှိအချိန်တွင် မိသားစုအတွင်း၌ ပါရမီအရှိဆုံး လူငယ်နှစ်ဦးမှာ ယွီသျှံဟန်နှင့် ယွီသျှံရှင်းတို့ ဖြစ်ကြသည်။ ယွီသျှံဟန်က မွေးရာပါ သိုင်းစွမ်းအား အနည်းငယ် ပိုမိုမြင့်မားပြီး ယွီသျှံရှင်းကမူ အသက်ပိုကြီးသဖြင့် ကျင့်ကြံခြင်းအဆင့် ပိုမိုခိုင်မာတောင့်တင်းသည်။

"ငါနဲ့ မဟာအကြီးအကဲရဲ့ သိုင်းဝိညာဉ်အရိုးတွေကို ဖယ်လိုက်ရင်တောင် မင်းတို့အားလုံးရဲ့ အရိုးတွေပေါင်းလိုက်ရင် အခြေခံတည်ဆောက်ခြင်းဆေးလုံး နှစ်လုံးစာလောက် ထပ်ရနိုင်တယ်၊ ဒီလိုဆိုရင် မိသားစုအနေနဲ့ နဂါးအသွင်ပြောင်းလဲခြင်း လျှို့ဝှက်သိုင်းပညာကို ထုတ်မသုံးဘဲနဲ့တောင် အခြေခံတည်ဆောက်ခြင်းဆေးလုံး ငါးလုံးထက်မနည်း ရရှိနိုင်လိမ့်မယ်"

ယွီယွမ်ကျန်းက စိတ်ကျေနပ်စွာဖြင့် ခေါင်းညိတ်လိုက်သည်။ သူသည် မိမိနှင့် မဟာအကြီးအကဲ၏ အရိုးနှစ်ခုကို ထိုတွက်ချက်မှုထဲတွင် ထည့်မတွက်ထားပေ။ အဘယ်ကြောင့်ဆိုသော် သိုင်းဝိညာဉ်အရိုးတစ်ခုသည် နှစ်ပေါင်းတစ်သောင်းသက်တမ်းသို့ ရောက်ရှိသွားပါက အရည်အသွေးပိုင်းအရ အကြီးအကျယ် ပြောင်းလဲသွားပြီး အနည်းဆုံး အခြေခံတည်ဆောက်ခြင်းဆေးလုံး နှစ်လုံးနှင့် ညီမျှသော တန်ဖိုးရှိသောကြောင့် ဖြစ်သည်။ ထိုအရိုးနှစ်ပွင့်တည်းနှင့်တင် ဆေးလုံး လေးလုံး သို့မဟုတ် ငါးလုံးခန့် လဲလှယ်နိုင်မည် မဟုတ်ပါလား။

သို့သော်လည်း လက်တွေ့မြေပြင်တွင်မူ ယွီယွမ်ကျန်း စိတ်ကူးယဉ်သကဲ့သို့ ဖြစ်မလာနိုင်ပေ။ ထိုသိုင်းဝိညာဉ်အရိုးများအနက် နှစ်ပေါင်းခြောက်ထောင်ကျော် သက်တမ်းရှိသော အရိုးများသာ သိုင်းနတ်ဘုရားနန်းတော်အတွက် အသုံးဝင်ပေလိမ့်မည်။ နှစ်ပေါင်းခြောက်ထောင်အောက် အရိုးများမှာမူ မည်မျှပင် များပြားစေကာမူ ဆေးလုံးတစ်လုံးနှင့်ပင် လဲလှယ်နိုင်ရန် ခဲယဉ်းလှသည်။ သိုင်းပညာရှင်တစ်ဦးအနေဖြင့် ပိုမိုမြင့်မားသောအဆင့်သို့ တက်လှမ်းလိုပါက ဤမျှသက်တမ်းနိမ့်သော သိုင်းဝိညာဉ်အရိုးကို စုပ်ယူလိမ့်မည်မဟုတ်ချေ။ ပါရမီညံ့ဖျင်းသော သိုင်းပညာရှင်များအတွက် ထိုအရိုးများက ထူးခြားသော အာနိသင်မရှိလှသလို ပါရမီထူးချွန်သူများအတွက်မူ မိမိတို့၏ အနာဂတ်ပါရမီကို ပိတ်ဆို့နှောင့်ယှက်မည့် ဝန်ထုပ်ဝန်ပိုးကြီး ဖြစ်လာနိုင်သဖြင့် ရလဒ်က ကောင်းကျိုးထက် ဆိုးကျိုးက ပိုများပေလိမ့်မည်။

အလွယ်တကူ နားလည်အောင် ပြောရလျှင် နှစ်ပေါင်းခြောက်ထောင် သက်တမ်းရှိ သိုင်းဝိညာဉ်အရိုးကို စုပ်ယူထားသော သိုင်းပညာရှင်တစ်ဦး၏ အမြင့်ဆုံးအတိုင်းအဆမှာ 'ဝိညာဥ်ဘိုးဘေး' အဆင့်မျှသာ ဖြစ်ပေလိမ့်မည်။ မိမိ၏တစ်သက်တာတွင် 'ဝိညာဥ်ဘုရင်' အဆင့်သို့ မည်သည့်နည်းနှင့်မျှ မတက်လှမ်းနိုင်တော့ဟု အရှုံးပေးထားသူများသာ ထိုကဲ့သို့သော အရိုးမျိုးကို ရွေးချယ်စုပ်ယူကြပေသည်။ ထို့အတူ နှစ်ပေါင်းတစ်သောင်း သက်တမ်းရှိသော အရိုးကို စုပ်ယူထားသူတစ်ဦး၏ အမြင့်ဆုံးအတိုင်းအဆမှာ 'ဝိညာဥ်သူတော်စင်' အဆင့်မျှသာ ဖြစ်ရာ 'ဝိညာဥ်ဒိုလော့' အဆင့်ရှိ စွမ်းအားရှင်ကြီးများအတွက်မူ သိုင်းစွမ်းအား အနည်းငယ် တိုးပွားရုံမှလွဲ၍ အသုံးမဝင်လှချေ။ ၎င်းမှရရှိသော အရိုးစွမ်းရည်မှာ ဝိညာဉ်ဒိုလော့တစ်ဦး၏ ဆဋ္ဌမမြောက် ဝိညာဉ်စွမ်းရည်လောက်ပင် အစွမ်းမထက်လှချေ။

၎င်းထက် မြင့်မားသော နှစ်ပေါင်းငါးသောင်းကျော် သက်တမ်းရှိ ဝိညာဉ်ဝိညာဉ်အရိုးများမှာမူ 'မဟာဒိုလော့' စွမ်းအားရှင်ကြီးများအတွက်ပင် အလွန်တရာ ရှားပါးလှသော ရတနာများ ဖြစ်ကြသည်။ နှစ်ပေါင်းတစ်သိန်း သက်တမ်းရှိသော သိုင်းဝိညာဉ်အရိုးဆိုလျှင်မူ ဆုတောင်းရုံနှင့် မရနိုင်ဘဲ ကံတရားအကြောင်း ဖန်လာမှသာ တွေ့မြင်နိုင်မည့် အရာဖြစ်ရာ ခန္ဓာကိုယ်တစ်ခုလုံးတွင် နှစ်ပေါင်းတစ်သိန်း သက်တမ်းရှိသော သိုင်းဝိညာဉ်အရိုးများဖြင့် ပြည့်နှက်နေမည့်သူဟူသည် လောကတွင် ရှိနိုင်ပါမည်လော။

ထိုအချိန်တွင် ဟူပိုင်က စိတ်ထဲမှ ကဲ့ရဲ့ပြုံး ပြုံးရင်း 'မင်းတို့ အခု ဘာပြောလိုက်တာလဲ 'ဟု ရေရွတ်နေပေလိမ့်မည်။

သို့သော် ယွီယွမ်ကျန်း မသိရှိထားသော အချက်တစ်ခုမှာ ယွီရှောင်ဂန်းသည် မိသားစုဂိုဏ်းထံမှ စောစီးစွာ ထွက်ခွာသွားခဲ့ပြီး ဝိညာဉ်နတ်ဘုရားနန်းတော်ဆီသို့ မြင်းဇုန်စိုင်း၍ ဦးတည်နေခဲ့ပြီ ဖြစ်သည်။ သူသည် မိသားစု၏ နဂါးအသွင်ပြောင်းလဲခြင်း လျှို့ဝှက်သိုင်းပညာကို သုံး၍ အခြေခံတည်ဆောက်ခြင်းဆေးလုံးများနှင့် လဲလှယ်ရန် ကြံစည်နေခဲ့သည်။ ဝိညာဉ်နတ်ဘုရားနန်းတော်အနေဖြင့် ဝိညာဉ်ပညာရှင်တစ်ဦးသည် မိမိဘဝတွင် ဆေးလုံးတစ်လုံးသာ သောက်သုံးရမည်ဟု စည်းကမ်းချက် ထုတ်ပြန်ထားခြင်း မရှိပေ။ ထို့ကြောင့် သူသည် လဲလှယ်ရရှိသမျှ အခြေခံတည်ဆောက်ခြင်းဆေးလုံးအားလုံးကို မိမိကိုယ်တိုင် သောက်သုံးပြီး ကောင်းကင်ဘုံ၏ ကံကြမ္မာကို ဆန့်ကျင်ကာ သူ၏ဘဝကို ပြောင်းလဲပစ်ရန် သန္နိဋ္ဌာန်ချထားခဲ့သည်။

သို့သော် ယွီရှောင်ဂန်းတစ်ယောက် ကောင်းကင်ဘုံကို ဆန့်ကျင်၍ ဘဝကို ပြောင်းလဲနိုင်သည်ဖြစ်စေ၊ မပြောင်းလဲနိုင်သည်ဖြစ်စေ ဟူပိုင် ကော ချန်တောက်လျို နှင့် အခြားသောသူများကပါ အမှန်တကယ် ဂရုစိုက်နေကြမည် မဟုတ်ပေ။ ယွီရှောင်ဂန်း၏ မွေးရာပါ သိုင်းစွမ်းအား တိုးတက်လာလျှင်ပင် သူ၏ သိုင်းစွမ်းရည်အာနိသင်က ပြောင်းလဲသွားပါမည်လော။

မူရင်းဇာတ်လမ်းထဲတွင် ယွီရှောင်ဂန်းသည် အဆင့်ကိုးခရမ်းရောင်မှိုရတနာကို ရရှိခဲ့ပြီးနောက် သူ၏ကျင့်ကြံခြင်းအဆင့်မှာ 'အဆင့်မြင့် ဒိုလော့' အဆင့်အထိ တက်လှမ်းနိုင်ခဲ့သော်လည်း သူ၏ ညှော်နံ့ထွက်သော ဝိညာဉ်စွမ်းရည်ဆိုးကြီးကမူ ပျောက်ကွယ်သွားခဲ့ခြင်း မရှိချေ။ ထိုမှိုရတနာကိုလည်း ယွီရှောင်ဂန်းကိုယ်တိုင် ရှာဖွေတွေ့ရှိခဲ့ခြင်းမဟုတ်ဘဲ ထန်ဆန်းက ကူညီပေးခဲ့ခြင်းသာ ဖြစ်သည်။ အကယ်၍ သူသာ မိမိဘာသာ ဝိညာဉ်သားရဲကို ရွေးချယ်ခဲ့ရမည်ဆိုပါက သူ၏သိုင်းဝိညာဉ်ဖြစ်သော လော့စန်းပေါင်း လင်းလက်တောက်ပသော အလင်းနဂါးအဖြစ် ပြောင်းလဲသွားလျှင်ပင် အသုံးမဝင်သော အမှိုက်တစ်ခုအဖြစ်သာ ကျန်ရစ်နေပေလိမ့်မည်။

ထိုအချိန်တွင် ထျန်းတောက်အင်ပါယာမြို့တော်ရှိ အင်အားကြီးမျိုးနွယ်စုကြီးထံ၌ ဖြစ်သည်။

"နှာခေါင်းသွေးထွက်လှချေကော၊ အဲဒီ အဖိုးကြီး သုံးယောက်က ငါ့ကွယ်ရာမှာ ဝိညာဉ်နတ်ဘုရားနန်းတော်နဲ့ တိတ်တဆိတ် ပူးပေါင်းသွားကြတယ်ပေါ့" ဟု ထိုက်တန်(အင်အားဂိုဏ်း ခေါင်းဆောင်)က ဒေါသတကြီး ဟိန်းဟောက်လိုက်ရင်း သူထိုင်နေသော ကျောက်ကုလားထိုင်ကြီးကို လက်ဖဝါးဖြင့် ရိုက်ခွဲပစ်လိုက်သည်။

"အဖေ၊ ပြီးခဲ့တဲ့ နှစ်ပတ်လည်အစည်းအဝေးတုန်းက အဲဒီသုံးယောက်က အဖေ့ကို ဝိညာဉ်နန်းတော်နဲ့ ပူးပေါင်းဖို့ လာပြီးဖျောင်းဖျခဲ့ကြသေးတယ် မဟုတ်လား၊ အဲဒီအချိန်ကတည်းက သူတို့မှာ ဒီစိတ်ကူး ရှိနေပုံရတယ်၊ ဒါပေမဲ့ အဖေက သဘောမတူခဲ့တော့..."

"တောက်၊ အဲဒီတုန်းက သူတို့ နောက်ပြောင်နေကြတယ်လို့ပဲ ငါထင်ခဲ့တာ၊ သူတို့ ဝိညာဉ်နန်းတော်အကြောင်းကို မသိကြဘူးလား၊ အတိတ်တုန်းက ဝိညာဉ်နန်းတော်သာ မရှိခဲ့ရင် ငါတို့မျိုးနွယ်စု ဒီလိုအခြေအနေမျိုးအထိ ကျဆင်းခဲ့ပါ့မလား"

"အဖေ၊ ဒါဆို အခု ငါတို့ ဘာဆက်လုပ်ကြမလဲ၊ ဒီအခြေအနေက ငါတို့ကို ကြားညှပ်ပြီး ဘေးကျပ်နံကျပ် ဖြစ်စေတယ်"

ထိုက်တန်(အင်အားဂိုဏ်း ခေါင်းဆောင်)က ခဏမျှ စဉ်းစားတွေးတောလိုက်ပြီးနောက် ပြောဆိုလိုက်သည်။

"လောလောဆယ်တော့ အခြေအနေကို စောင့်ကြည့်ကြသေးတာပေါ့"

"ဒါနဲ့ စကားမစပ်၊ ထန်ဟောက်တစ်ယောက် ဝ်ညာဉ်မြို့တော်မှာ ပေါ်လာပြီး ဖမ်းဆီးခြင်းခံလိုက်ရတယ်ဆိုတဲ့ သတင်းက အမှန်ပဲလား"

ထိုက်နုက ခေါင်းညိတ်ပြလိုက်ရင်း...

"ဟုတ်ပါတယ်အဖေ၊ သိုင်းနတ်ဘုရားနန်းတော်ကလူတွေ ဖမ်းဆီးသွားတာလို့ ကြားရပါတယ်၊ သူ အဆင်ပြေရဲ့လားတော့ မသိဘူး"

ထိုက်တန်(အင်အားဂိုဏ်း ခေါင်းဆောင်)၏ မျက်နှာအမူအရာမှာ အလွန်တရာ အုံ့မှိုင်းသွားခဲ့သော်လည်း အဆုံးတွင်မူ ဘာမျှ ဆက်မပြောတော့ဘဲ ဝေးလံသော အရပ်ဆီသို့သာ ငေးကြည့်နေခဲ့သည်။ သူ၏ အင်အားကြီးမျိုးနွယ်စုအနေဖြင့် ကျန်ရှိသော အခြားမျိုးနွယ်စု သုံးစုနှင့် ရန်သူများ ဖြစ်လာရတော့မည့်အရေးကို တွေးတောနေမိပုံရသည်။

"သူငယ်ချင်းဟောင်းတို့... မင်းတို့က ငါ့ကို အကျပ်ကိုင်နေကြတာပဲ မဟုတ်လား"

မိုးကြိုးနဂါးပြာဧကရာဇ်ကျောင်းတော်တွင် ဖြစ်သည်။

ယွီလူ့မြန့်က မည်မျှပင် ဖုံးကွယ်ထားစေကာမူ ဖလန်ဒါမှတစ်ဆင့် လျှို့အာလုံသည် ယွီရှောင်ဂန်းတစ်ယောက် မိုးကြိုးနဂါးပြာမျိုးနွယ်စုထံသို့ ပြန်လည်ရောက်ရှိသွားကြောင်း သိရှိသွားခဲ့သည်။

ပထမတွင် လျှို့အာလုံသည် အလွန်တရာ ဝမ်းမြောက်ဝမ်းသာ ဖြစ်သွားခဲ့သော်လည်း နောက်ပိုင်းတွင်မူ သူမ တွေဝေတုံ့ဆိုင်းသွားခဲ့သည်။ သူမအနေဖြင့် မျိုးနွယ်စုထံသို့ ပြန်သွားသင့်ပါသလော။ အကယ်၍ ပြန်သွားခဲ့မည်ဆိုလျှင် ရှောင်ဂန်းကို မည်ကဲ့သို့သော မျက်နှာမျိုးဖြင့် ရင်ဆိုင်ရပါမည်နည်း။

ထို့အပြင် သူမ၏ဖခင်သည်လည်း ထိုမိသားစုအတွင်း၌ ရှိနေသေးရာ သူရှိနေသရွေ့ သူမနှင့် ရှောင်ဂန်းတို့နှစ်ဦး အတူတူပေါင်းဖက်နိုင်ရန်ဟူသည် မည်သည့်နည်းနှင့်မျှ ဖြစ်နိုင်ခြေရှိမည် မဟုတ်ပေ။