အခန်း(၁၇) - အမြီးကိုးချောင်းမိစ္ဆာနတ်သမီး၏ စွမ်းရည်များနှင့် ကိုက်ညီမှုအဆင့်

လျှပ်စီးဓာတ်စွမ်းအားများ ကိန်းအောင်းနေသည့် အမြီးကိုးချောင်းကောင်းကင်မြေခွေး၏ အမြီးကိုးချောင်းဖြင့် တရစပ် ထုထောင်းခြင်းကို ခံလိုက်ရပြီးနောက် သုံးမျက်လုံး မိစ္ဆာမြေခွေးသည် အသက်လုရလောက်အောင် ပြင်းထန်စွာ ဒဏ်ရာရရှိသွားပြီး သတိလစ်မေ့မြောသွားခဲ့ရတော့သည်။

ဤသည်မှာ နောင်တွင် ဟူလီနာ အလွယ်တကူ ဝိညာဉ်ကွင်းစုပ်ယူနိုင်ရန် သက်ညှာပေးခဲ့ခြင်းကြောင့်သာ ဖြစ်ပြီး သို့မဟုတ်ပါက သူတို့၏ လက်ရှိစွမ်းအားဖြင့် ထိုမိစ္ဆာမြေခွေးကို တစ်ချက်တည်းနှင့် အမှုန့်ခြေပစ်နိုင်လောက်ပေသည်။

ပုံမှန်အခြေအနေတွင် ရှဲ့ယွဲ့နှင့် ဟူလီနာတို့၏ ယခုလက်ရှိ ကျင့်ကြံခြင်းအဆင့်ဖြင့် ပေါင်းစပ်ထားသော 'မိစ္ဆာနတ်သမီး' သည်ပင် အလတ်စား ဝိညာဉ်သက်ကြီး တစ်ဦး၏ တိုက်ခိုက်ရေးစွမ်းရည်ကို ပိုင်ဆိုင်ထားပြီးသား ဖြစ်သည်။ ထိုအခြေအနေမှာ ဟူလီနာ၏ အဆင့်က နိမ့်ပါးလွန်း၍ ဆွဲချထားသည့်တိုင်အောင် ဖြစ်၏။ အကယ်၍ ဟူလီနာ၏ ကျင့်ကြံခြင်းအဆင့်သည် ရှဲ့ယွဲ့နှင့် တန်းတူဖြစ်ပြီး နှစ်ဦးစလုံးသာ ဝိညာဉ်ဆရာကြီး အဆင့် ဖြစ်ခဲ့ကြလျှင် ပေါင်းစပ်လာမည့် မိစ္ဆာနတ်သမီးသည် ဝိညာဉ်ဘိုးဘေး အဆင့်နှင့် ယှဉ်နိုင်လောက်သည်။ သို့သော်လည်း ဝိညာဉ်ဆရာကြီးနှစ်ဦး၏ ဝိညာဉ်စွမ်းအားဖြင့် ဝိညာဉ်ဘိုးဘေးအဆင့် စွမ်းရည်ကို ထုတ်သုံးမည်ဆိုပါက အလွန်ဆုံး တစ်မိနစ်မပြည့်ခင်မှာပင် စွမ်းအားကုန်ခမ်းပြီး လွင့်ပြယ်သွားကြပေလိမ့်မည်။

သို့သော် ယခုအခါ ဟူပိုင်၏ ပါဝင်မှုကြောင့်လည်းကောင်း၊ သူတို့ သုံးဦးကြားရှိ အလွန်မြင့်မားလှသော ဝိညာဉ်ကိုက်ညီမှုကြောင့်လည်းကောင်း ဝိညာဉ်ဆရာကြီးနှစ်ဦးနှင့် အဆင့်၁၀ ဝိညာဉ်ကျောင်းသားတစ်ဦးတို့ ပေါင်းစပ်လိုက်သည့် 'အမြီးကိုးချောင်းမိစ္ဆာနတ်သမီး' သည် ဝိညာဉ်ဘိုးဘေး တစ်ဦး၏ တိုက်ခိုက်ရေးစွမ်းရည်ကို အမှန်တကယ် ပြသနိုင်ခဲ့ခြင်း ဖြစ်သည်။

ဤတိုက်ကွက်တစ်ခုတည်းကို ထုတ်သုံးပြီးနောက် အမြီးကိုးချောင်းမိစ္ဆာနတ်သမီးသည် ချက်ချင်း လွင့်ပြယ်သွားခဲ့ရသည်။ တစ်မိနစ်မျှသာ ရှိသေးသော်လည်း သူတို့ သုံးဦး၏ ဝိညာဉ်စွမ်းအားမှာ လုံးဝဥဿုံ ကုန်ခမ်းလုနီးပါး ဖြစ်သွားခဲ့ရ၏။ ကျင့်ကြံခြင်းအဆင့် နိမ့်ပါးသော ဝိညာဉ်သခင်များအတွက်မူ ဝိညာဉ်ပေါင်းစပ်ခြင်းစွမ်းရည်၏ စွမ်းအားဝါးမြိုမှုမှာ ထင်ထားသည်ထက် များစွာ ပိုမိုကြီးမားလှပြီး သုံးဦးပေါင်း စွမ်းရည်ဆိုလျှင် ပြောနေစရာပင် မလိုတော့ချေ။

နှစ်ပေါင်းတစ်သောင်းအကြာတွင် ဟော့ယွီဟောက် နှင့် ဝမ်တုန်း တို့ ဝိညာဉ်ဆရာကြီးအဆင့်၌ ဝိညာဉ်ပေါင်းစပ်ခြင်းစွမ်းရည်ကို ထုတ်သုံးခဲ့စဉ်ကလည်း တိုက်ကွက်တစ်ခုတည်းနှင့် ဝိညာဉ်စွမ်းအားများ ကုန်ခမ်းသွားခဲ့ရပြီး တစ်ပတ်အတွင်း ထပ်မံအသုံးပြုနိုင်ခြင်း မရှိခဲ့ချေ။ နောက်ပိုင်းတွင် သူတို့၏ စွမ်းအားများ တိုးတက်လာမှသာ သုံးရက်လျှင် တစ်ကြိမ်အထိ အချိန်ကာလကို လျှော့ချနိုင်ခဲ့ခြင်း ဖြစ်သည်။

ထို့ကြောင့်ပင် ဟူပိုင်သည် ပီပီတုန်းအား သူမ၏ မြင့်မားလှသော ကျင့်ကြံခြင်းစွမ်းအားကို သုံး၍ ဟူလီနာအတွက် သင့်တော်မည့် ဝိညာဉ်သားရဲကို ပတ်ဝန်းကျင်တွင် အမြန်ဆုံး ရှာဖွေခိုင်းခဲ့ခြင်း ဖြစ်သည်။ အဘယ်ကြောင့်ဆိုသော် ဤတစ်ကြိမ် ပေါင်းစပ်ပြီးပါက နောက်ထပ်တစ်ကြိမ် ပြန်လည်ပေါင်းစပ်နိုင်ရန် အနည်းဆုံး တစ်ပတ်ခန့် စောင့်ရဦးမည်ကို သူ သိနေခြင်းကြောင့်ပင်။ သူတို့ သုံးဦးစလုံးသည်လည်း အမြီးကိုးချောင်းမိစ္ဆာနတ်သမီး၏ သီးသန့်စွမ်းရည်များက ဘာတွေလဲဆိုတာကို အလွန် စမ်းသပ်ကြည့်ချင်နေခဲ့ကြသည်။

ဟူလီနာသည် မျက်နှာလေး အနည်းငယ် ဖြူလျော်နေသော်လည်း သူမ၏ ဝိညာဉ်သိုလှောင်ကိရိယာထဲမှ ဓားမြှောင်တိုတစ်ချောင်းကို ထုတ်ယူကာ သတိကြီးစွာဖြင့် ရှေ့သို့ လှမ်းတက်လိုက်ပြီး သုံးမျက်လုံး မိစ္ဆာမြေခွေး၏ လည်ပင်းကို ထိုးစိုက်လိုက်တော့သည်။ အဝါရောင် ဝိညာဉ်ကွင်းတစ်ခုသည် မိစ္ဆာမြေခွေး၏ ခန္ဓာကိုယ်ထံမှ ပေါ်ထွက်လာခဲ့ပြီး ထိုဝါရောင်ကွင်း၏ အနားသတ်များတွင် ခရမ်းရောင်အလင်းတန်း သိမ်သိမ်လေးများ ယှက်သန်းနေခဲ့သည်။

သို့သော် နှမြောစရာကောင်းလှသည်မှာ ယခုတစ်ကြိမ်တွင် အခြားသူများ မျှော်လင့်ထားသကဲ့သို့ ဝိညာဉ်အရိုး ထွက်မလာခဲ့ချေ။ ဒါကလည်း ပုံမှန်သာ ဖြစ်ပေသည်။ အစောပိုင်း နှစ်ကြိမ်စလုံး ဝိညာဉ်အရိုးများ၊ ၎င်းပြင် ပြင်ပဝိညာဉ်အရိုးများပါ ဆက်တိုက်ထွက်လာခဲ့ခြင်းက သူတို့ကို အလွန်တရာ အံ့အားသင့်စေခဲ့ပြီး ဆန်းကြယ်လွန်းနေခဲ့ခြင်း ဖြစ်သည်။ သက်တမ်းထောင်ချီရှိသော ဝိညာဉ်သားရဲများထံမှ ဝိညာဉ်အရိုးထွက်နှုန်းမှာပင် အလွန်တရာ နည်းပါးလှရာ သက်တမ်းရာချီရှိသော သားရဲထံမှဆိုလျှင် ပြောနေစရာပင် မလိုတော့ချေ။

အမှန်အတိုင်း ပြောရလျှင် ဝိညာဉ်နန်းတော်တွင်ပင် သက်တမ်းရာချီ ဝိညာဉ်အရိုးတစ် ခုမှ ရှိမနေချေ။ သက်တမ်းတစ်ထောင်အောက် ဝိညာဉ်သားရဲများထံမှ ဝိညာဉ်အရိုး ထွက်မလာနိုင်စွမ်းမှာ တစ်ရာခိုင်နှုန်းအပြည့်နီးပါး သေချာသလောက် ရှိသည်ဟု ဆိုနိုင်သည်။

ဟူလီနာ ဝိညာဉ်ကွင်းကို စုပ်ယူနေသည့် အချိန်တွင် ချန်ရန်ရွှယ်သည် ရှေ့သို့ လှမ်းလာပြီး အားနည်းနေပုံရသော ဟူပိုင်ကို တွဲကူပေးလိုက်ရင်း သာယာသော လေသံလေးဖြင့် မေးမြန်းလိုက်သည်။

"မောင်လေးပိုင်... ပုံမှန် မိစ္ဆာနတ်သမီးနဲ့ ယှဉ်ရင် ပေါင်းစပ်ပြီးနောက်ပိုင်း ပိုပြီး အစွမ်းထက်တဲ့ တိုက်ခိုက်ရေးစွမ်းရည် ရှိလာတာအပြင် ဒီ အမြီးကိုးချောင်းမိစ္ဆာနတ်သမီး မှာ အခြား ဘာထူးခြားတဲ့ စွမ်းရည်တွေ ရှိသေးလဲဟင်"

မိစ္ဆာနတ်သမီးနှင့် ပတ်သက်၍မူ အနားရှိ လူအားလုံး အတော်အတန် ရင်းနှီးပြီးသား ဖြစ်ကြသည်။ ၎င်း၏ အဓိက ထူးခြားချက်မှာ မြူနီရောင်များနှင့် လမင်းဓားမြှောင်များကို သုံးသည့် အနီးကပ်တိုက်ခိုက်ရေးစွမ်းရည် ဖြစ်သည်။ ယခု အမြီးကိုးချောင်းမိစ္ဆာနတ်သမီးတွင်မူ ထိုစွမ်းရည်နှစ်ခုအပြင် အခြားသော ကောင်းကင်မြေခွေး နယ်ပယ်ကဲ့သို့သော စွမ်းရည်များ ရှိနေသည်မှာ ထင်ရှားရာ ဝိညာဉ်ချင်း ပေါင်းစပ်သွားပြီးနောက် မည်သို့သော အပြောင်းအလဲကြီးများ ရှိလာသလဲဆိုတာကို သိချင်နေကြခြင်းပင်။

ဟူပိုင်နှင့် ရှဲ့ယွဲ့တို့ အချင်းချင်း အကြည့်တစ်ချက် ဖလှယ်လိုက်ကြပြီးနောက် ဟူပိုင်က ခေတ္တမျှ စဉ်းစားကာ ဆိုလိုက်သည်။

"ပထမဆုံးအနေနဲ့ ကောင်းကင်မြေခွေး နယ်ပယ် ရှိပါတယ်။ ကျွန်တော် တစ်ယောက်တည်း သုံးမယ်ဆိုရင် သဘာဝဓာတ်စွမ်းအားအားလုံးအပေါ် ကျွန်တော့်ရဲ့ ထိန်းချုပ်မှုကို မြှင့်တင်ပေးနိုင်ပြီး ဓာတ်စွမ်းအားအားလုံးရဲ့ အာနိသင်ကို ၂၀ ရာခိုင်နှုန်း တိုးတက်စေပါတယ်။ ကျွန်တော့်ရဲ့ ကိုယ်ပိုင်အရည်အသွေးတွေ အားလုံးလည်း ၂၀ ရာခိုင်နှုန်း မြင့်တက်လာပြီး ကျွန်တော်က မဟာမိတ်လို့ သတ်မှတ်ထားတဲ့ မြေခွေးအမျိုးအစား ဝိညာဉ်ရှိတဲ့ ဝိညာဉ်သခင်တွေရဲ့ အရည်အသွေးအားလုံးကိုလည်း ၅ ရာခိုင်နှုန်း မြှင့်တင်ပေးပါတယ်။ ရန်သူအဖြစ် သတ်မှတ်ခံရသူတွေကိုတော့ ဖိအားတွေ ပေးပြီး သွေးမျိုးဆက် ဖိနှိပ်မှုကို ပြုလုပ်ပါတယ်၊ ဖိနှိပ်မှု အတိုင်းအတာကတော့ တစ်ဖက်လူရဲ့ သွေးမျိုးဆက်နဲ့ အဆင့်ပေါ်မှာ မူတည်ပါတယ်။ ဝိညာဉ်ချင်း ပေါင်းစပ်ပြီးတဲ့ အခါမှာတော့ ကျွန်တော့်ရဲ့ ကောင်းကင်မြေခွေး နယ်ပယ်အာနိသင်ဟာ ၅၀ရာခိုင်နှုန်းလောက်အထိ ထပ်ပြီး မြင့်တက်သွားပါတယ်"

ဤအချက်နှင့် ပတ်သက်၍ မိခင်ဖြစ်သူ ဟူလျဲ့ယောင်ကလည်း ကြားဖြတ်၍ ဆိုလိုက်သည်။

"အင်း... မင်းရဲ့ နယ်ပယ်စွမ်းရည်က ဝိညာဉ်ချင်း ပေါင်းစပ်ပြီးတဲ့နောက်မှာ တကယ့်ကို သိသိသာသာ အားကောင်းလာတာပဲ။ အများပြောကြတာတော့ နယ်ပယ်စွမ်းရည်တွေဟာ ဝိညာဉ်သခင်ရဲ့ ကျင့်ကြံခြင်းအဆင့် မြင့်မားလာတာနဲ့အမျှ ဆင့်ကဲပြောင်းလဲနိုင်တယ်တဲ့၊ ဝိညာဉ်သခင်က နယ်ပယ်စွမ်းရည်ကို စောစောစီးစီး နားလည်သဘောပေါက်လေ နောင်တစ်ချိန်မှာ နယ်ပယ်စွမ်းရည်အသစ်တွေကို ထပ်မံနားလည်နိုင်စွမ်း ပိုများလေပဲ"

"ဒါကြောင့် ဟူပိုင်... မင်းရဲ့ ကောင်းကင်မြေခွေး နယ်ပယ်ဟာ မင်းရဲ့ စွမ်းအားတွေ တိုးတက်လာတာနဲ့အမျှ ထပ်ပြီး ဆင့်ကဲပြောင်းလဲနိုင်ဦးမှာပဲ"

မိမိကိုယ်ပိုင် အရည်အသွေးအားလုံး ၂၀ ရာခိုင်နှုန်း မြင့်တက်ပြီး သဘာဝဓာတ်စွမ်းအား ၂၀ ရာခိုင်နှုန်း တိုးတက်ခြင်းဆိုသည်မှာ ပီပီတုန်း၏ အမြင်တွင်ပင် လွန်စွာ ကြောက်မက်ဖွယ်ကောင်းလှသော အရာ ဖြစ်နေသည်။ ၎င်းပြင် ဤအရာကို ပိုင်ဆိုင်ထားသူမှာ အသက် ခြောက်နှစ်အရွယ် ကလေးငယ်တစ်ဦးသာ ရှိသေးသည် မဟုတ်ပါလော။ နယ်ပယ်တစ်ခုကို ကိုယ်တိုင် ပိုင်ဆိုင်ထားသူဖြစ်သည့်အလျောက် နယ်ပယ်များသည် အမှန်တကယ် ဆင့်ကဲပြောင်းလဲနိုင်ကြောင်း သူမ ကောင်းကောင်းသိသည်။ မည်မျှအထိ ပြောင်းလဲနိုင်မည်ဆိုသည်မှာ ဝိညာဉ်သခင်၏ မိမိဝိညာဉ်နှင့် နယ်ပယ်အပေါ် နားလည်နိုင်စွမ်းနှင့် တီထွင်ဖန်တီးနိုင်စွမ်းအပေါ်တွင်သာ လုံးဝဥဿုံ မူတည်ပေသည်။

ဇာတ်လမ်းအကြောင်းအရာကို ကောင်းစွာသိသော ဟူပိုင်သည်လည်း ဤအချက်ကို သေချာပေါက် နားလည်သည်။ ထန်ဆန်း ၏ သတ်ဖြတ်ခြင်းနယ်ပယ်သည် သုံးကြိမ်တိုင်တိုင် ဆင့်ကဲပြောင်းလဲခဲ့ပြီး သူ၏ ငွေပြာမြက်နယ်ပယ်သည်လည်း သုံးကြိမ်တိုင်တိုင် ပြောင်းလဲခဲ့သည် မဟုတ်ပါလော။

ဟူပိုင်က ခေါင်းညိတ်လက်ခံလိုက်ပြီး ဆက်ပြောပြသည်။

"ပြီးတော့ ဝိညာဉ်ချင်း ပေါင်းစပ်ပြီးတဲ့နောက်မှာ နယ်ပယ်ကို မသုံးရင်တောင်မှ ကျွန်တော့်ရဲ့ ဓာတ်စွမ်းအားတွေအပေါ် ထိန်းချုပ်မှုက သိသိသာသာ အားကောင်းလာပါတယ်။ ဒါကြောင့် ကျွန်တော် ခန့်မှန်းမိတာကတော့ နောင်ကျရင် ကျင့်ကြံခြင်းအဆင့် မြင့်မားလာတာနဲ့အမျှ ဝိညာဉ်ကွင်းတွေရဲ့ အကူအညီ မလိုဘဲနဲ့တောင်မှ ဓာတ်စွမ်းအားတွေကို ပုံမှန်အတိုင်း စိတ်ကြိုက် ထိန်းချုပ်အသုံးပြုနိုင်လိမ့်မယ် ထင်ပါတယ်။ ဒါပေမယ့် ဝိညာဉ်ကွင်းတွေ ရှိနေရင်တော့ အာနိသင်က သေချာပေါက် ကွာခြားသွားမှာပါ၊ ဝိညာဉ်ကွင်းတွေကလည်း ကျွန်တော့်ရဲ့ ဓာတ်စွမ်းအားတွေကို ပိုပြီး မြှင့်တင်ပေးနိုင်လို့ပါ"

"နောက်ပြီး အားလုံး မြင်တွေ့ခဲ့ရတဲ့ အမြီးကိုးချောင်းစွမ်းအင်တွေရဲ့ ဒြပ်သဏ္ဌာန်ပေါ်ပေါက်လာမှုပဲ ဖြစ်ပါတယ်၊ အဲဒီအမြီးကိုးချောင်းထဲကိုလည်း ဓာတ်စွမ်းအားတွေ ထည့်သွင်းလို့ရသလို အဝေးကြီးအထိ ဆန့်ထုတ်လို့လည်း ရပါတယ်။ ပိုပြီး အဝေးကြီးကို ဆန့်ထုတ်လေ ဝိညာဉ်စွမ်းအား ပိုပြီး ကုန်ခမ်းလေပါပဲ၊ အမြင့်ဆုံး ကန့်သတ်ချက်က ဘယ်လောက်လဲဆိုတာကိုတော့ ကျွန်တော် မစမ်းရသေးပါဘူး"

ဤအရာများမှာ အမြီးကိုးချောင်းမိစ္ဆာနတ်သမီး လက်ရှိ ပိုင်ဆိုင်ထားသော စွမ်းရည်များ ဖြစ်ကြသည်။ နောင်တွင် အခြားသော စွမ်းရည်များ ရှိလာဦးမည်လားဆိုသည်မှာမူ သူတို့ သုံးဦး၏ ရှေ့ဆက်တိုးတက်မှုနှင့် နားလည်သဘောပေါက်မှုအပေါ်တွင်သာ မူတည်ပေတော့မည်။

"ဝါး... မောင်လေးပိုင်... ဒီစွမ်းရည်တွေက တကယ့်ကို အစွမ်းထက်လွန်းတာပဲ။ ဒါနဲ့ စကားမစပ်... ဝိညာဉ်ချင်း ပေါင်းစပ်တဲ့အခါမှာ ကိုက်ညီမှုအဆင့် ဆိုတဲ့ ပြဿနာလည်း ရှိသေးတယ်မလား မောင်လေးတို့ သုံးယောက်ကြားထဲက ကိုက်ညီမှုအဆင့်က ဘယ်လောက်လောက် ရှိမလဲဆိုတာ ခန့်မှန်းလို့ ရမလားဟင်"

"ကိုက်ညီမှုအဆင့် ပိုပြီး မြင့်မားလေ ပေါင်းစပ်ပြီးနောက်မှာ ထွက်ပေါ်လာတဲ့ စွမ်းပကားက ပိုပြီးတော့ ကြီးမားလေပဲလေ"

ဟူပိုင်က ခေါင်းကို အသာအယာခါယမ်းရင်း ဆိုလိုက်သည်။

"အင်း... ကျွန်တော်တို့ကြားထဲက ကိုက်ညီမှုအဆင့် အတိအကျကိုတော့ ကျွန်တော် မသိဘူး၊ ဒါပေမယ့် ကျွန်တော့်ရဲ့ ခန့်မှန်းချက်အရဆိုရင် ၈၀ ရာခိုင်နှုန်း ဝန်းကျင်လောက်တော့ ရှိမယ် ထင်ပါတယ်"

၁၀၀ ရာခိုင်နှုန်းအပြည့် ကိုက်ညီမှုအဆင့် ရရှိရန်မှာ အလွန်တရာ ခက်ခဲလှပေသည်။ သူနှင့် ရှဲ့ယွဲ့၊ ဟူလီနာတို့ကြားတွင် သွေးသားရင်းချာ တော်စပ်မှု ရှိနေသည့်တိုင်အောင် ၁၀၀ ရာခိုင်နှုန်းအပြည့်ကို မမီနိုင်ခဲ့ချေ။ နှစ်ပေါင်းတစ်သောင်းအကြာတွင် ဟော့ယွီဟောက်နှင့် ဝမ်တုန်းတို့ ၁၀၀ ရာခိုင်နှုန်းအပြည့် ရရှိခဲ့ကြခြင်းမှာ တကယ့်ကို မယုံကြည်နိုင်စရာကောင်းလှပြီး နောက်ကွယ်မှ 'အပေးအယူ ညှိနှိုင်းမှု' တစ်ခုခု ရှိနေမလားဟုပင် သံသယဝင်စရာ ကောင်းလှသည်။

"အာ... ၈၀ ရာခိုင်နှုန်းလောက်ပဲ ရှိတာလား နှမြောစရာပဲ။ မောင်လေးတို့ သုံးယောက်က ဒီမြေကမ္ဘာပေါ်မှာ သုံးဦးပေါင်း ဝိညာဉ်ပေါင်းစပ်ခြင်းစွမ်းရည်ကို ထုတ်သုံးနိုင်တဲ့ ဒုတိယမြောက် အဖွဲ့ဖြစ်သလို သွေးသားရင်းချာတွေလည်း ဖြစ်နေတော့ တို့က ပိုပြီး မြင့်မားမယ်၊ ဒဏ္ဍာရီလာ ၁၀၀ ရာခိုင်နှုန်းအပြည့် ကိုက်ညီမှုအဆင့်တောင် ဖြစ်နိုင်မယ်လို့ ထင်ထားခဲ့တာ"

ထိုစဉ်မှာပင် ပီပီတုန်းက ကြားဖြတ်၍ မိန့်ဆိုလိုက်သည်။

"၈၀ ရာခိုင်နှုန်း ကိုက်ညီမှုအဆင့်ဆိုတာ တကယ့်ကို အလွန် မြင့်မားလှတဲ့ အဆင့်တစ်ခုပဲ။ ငါ ရွှေတြိဂံအဖွဲ့ရဲ့ ကိုက်ညီမှုအဆင့် ဘယ်လောက်လဲဆိုတာ အတိအကျ မသိပေမယ့် တစ်ခုတော့ သေချာတယ်၊ သူတို့ရဲ့အဆင့်က တကယ့်ကို အလွန် နိမ့်ပါးပါတယ်။ သူတို့ရဲ့ သုံးဦးပေါင်း ဝိညာဉ်ပေါင်းစပ်ခြင်းစွမ်းရည်ဟာ တစ်ခါတစ်ရံမှာ ပုံမှန် နှစ်ဦးပေါင်း ဝိညာဉ်ပေါင်းစပ်ခြင်းစွမ်းရည်လောက်တောင် အစွမ်းမထက်တတ်ကြဘူး"

"ဥပမာ ပြောရရင်... ငါတို့ ဝိညာဉ်နန်းတော်က ဂန္ဓာရ ဒိုလော့ နဲ့ တစ္ဆေ ဒိုလော့တို့ဆိုရင် သူတို့ကြားထဲက ကိုက်ညီမှုအဆင့်က မမြင့်မားလှဘူး ၅၀ ဝန်းကျင်လောက်ပဲ ရှိတာ၊ ဒါပေမယ့် သူတို့ရဲ့ 'အဆင့်နှစ်ဆင့် တည်ငြိမ်ခြင်း နယ်ပယ်' စွမ်းရည်ဟာ အဆင့် ၉၆ ဒါမှမဟုတ် အဆင့် ၉၇ ရှိတဲ့ အထူးဒိုလော့ တစ်ဦးကိုတောင် လှုပ်ရှားလို့မရအောင် ချုပ်နှောင်ထားနိုင်စွမ်း ရှိတယ် မဟုတ်လား"