အခန်း(၁၆) - သန့်စင်ခြင်းစွမ်းအား နှင့် ရွှေမိကျောင်းဒိုလော့ကို နှစ်ပေါင်းရာချီ အံ့ဩမှင်တက်သွားစေခြင်း

အမြီးကိုးချောင်းမိစ္ဆာနတ်သမီး။

တကယ့်ကို နားဝင်ချိုပြီး သာယာနာပျော်ဖွယ်ရှိသော နာမည်တစ်ခုပင်။

ဟူပိုင်သည် မူလနာမည်ကို လုံးဝဥဿုံ ပြောင်းလဲပစ်ရန် မရည်ရွယ်ခဲ့ပေ။ မည်သို့ဆိုစေ 'မိစ္ဆာနတ်သမီး' ဟူသော အမည်မှာ လှပပြီးသားဖြစ်၍ သူက 'အမြီးကိုးချောင်း' ဟူသော ဝိသေသလက္ခဏာကိုသာ ရှေ့က ထပ်မံဖြည့်စွက်ပေးလိုက်ခြင်း ဖြစ်သည်။

သို့သော် သူတို့ သုံးဦး၏ ဝိညာဉ်ပေါင်းစပ်ခြင်းစွမ်းရည်မှာ ဝိညာဉ်စွမ်းအား အမြောက်အမြားကို ဝါးမြိုကုန်ခမ်းစေသဖြင့် ယခုလက်ရှိ ကျင့်ကြံခြင်းအဆင့်အရ အခြားစွမ်းရည်များကို ထပ်မံမထုတ်သုံးလျှင်ပင် အလွန်ဆုံး သုံးမိနစ်ခန့်သာ တောင့်ခံထားနိုင်သည်။ သို့မဟုတ်ပါက ပို၍ပင် မြန်မြန်ဆန်ဆန် စွမ်းအားကုန်ခမ်းသွားပေလိမ့်မည်။

"ဆရာ... အမေ... အဖေ... ရှောင်ရွှယ်... တို့တွေ နာနာအတွက် သင့်တော်တဲ့ ဝိညာဉ်သားရဲတစ်ကောင်ကို အမြန်သွားရှာပြီး အမဲလိုက်ကြရအောင် ဒါက တို့တွေရဲ့ ဝိညာဉ်ပေါင်းစပ်ခြင်းစွမ်းရည်ကို စမ်းသပ်ပြသဖို့ အခွင့်အရေးကောင်းပဲ ဒါပေမယ့် မြန်မြန်တော့ လုပ်ရမယ်နော်"

အမြီးကိုးချောင်းမိစ္ဆာနတ်သမီး၏ ခန္ဓာကိုယ်ထဲမှ ဟူပိုင်၏ လေသံ ထွက်ပေါ်လာခဲ့သည်။ သူ၏ ဒုတိယမြောက် ဝိညာဉ်ကွင်းကို ရရှိပြီးနောက် သူ၏ ဝိညာဉ်စွမ်းအားမှာ အဆင့် ၂၃ သို့ ရောက်ရှိသွားခဲ့ပြီ ဖြစ်ရာ ရှဲ့ယွဲ့၏ အဆင့်နှင့် မတိမ်းမယိမ်း ရှိနေပြီ ဖြစ်သည်။

ဝိညာဉ်များ ပေါင်းစပ်သွားပြီးနောက် သူတို့ သုံးဦးစလုံး အသိသာဆုံး ခံစားလိုက်ရသည့်အရာမှာ သူတို့၏ စိတ်ဝိညာဉ်အာရုံစွမ်းအားသည် အဆမတန် မြင့်မားလာခြင်းပင် ဖြစ်သည်။ ရှဲ့ယွဲ့နှင့် ဟူလီနာတို့သည် ပြင်ပလောကရှိ သဘာဝဓာတ်စွမ်းအား အမျိုးမျိုးကို ရှင်းလင်းပြတ်သားစွာ အာရုံခံမိနေကြပြီး သူတို့သာ အလိုရှိပါက ထိုဓာတ်စွမ်းအားများက သူတို့၏ အမိန့်ကို နာခံကြတော့မည့်အလား ခံစားနေရသည်။ သူတို့သည် ဤအရာမှာ ဟူပိုင်ကိုယ်တိုင်၌ မွေးရာပါပါလာသော စွမ်းရည်ဖြစ်ပြီး ယခု ဝိညာဉ်ပေါင်းစပ်မှုကြောင့် ပိုမို အစွမ်းထက်လာခြင်းဖြစ်ကြောင်း နားလည်လိုက်ကြသည်။

ပီပီတုန်းသည်လည်း အမြီးကိုးချောင်းမိစ္ဆာနတ်သမီး၏ စွမ်းပကားကို သိရှိလိုသဖြင့် အဖွဲ့ကို ဦးဆောင်ရင်း သူမ၏ စိတ်ဝိညာဉ်အာရုံခံမှုကို တိုက်ရိုက်ချဲ့ထွင်ကာ ပတ်ဝန်းကျင်ရှိ စိတ်ဝိညာဉ်ဆိုင်ရာ ဝိညာဉ်သားရဲများကို အလျင်အမြန် ရှာဖွေလိုက်တော့သည်။

မကြာမီမှာပင် သူမသည် ညာဘက်အထက် မီတာတစ်ထောင်ခန့်အကွာတွင် အတော်အတန် သေးငယ်သော သုံးမျက်လုံး မိစ္ဆာမြေခွေးတစ်ကောင်ကို တွေ့ရှိသွားခဲ့သည်။ သူမက ချက်ချင်း ဆိုလိုက်သည် ..

"ဟိုဘက် မီတာတစ်ထောင်လောက်အကွာမှာ သုံးမျက်လုံး မိစ္ဆာမြေခွေးပေါက်လေး တစ်ကောင်ရှိတယ် သူ့ရဲ့ အရွယ်အစားအရ သက်တမ်း ၇၅၀ ဝန်းကျင်လောက် ရှိမယ်ထင်တယ် နာနာ စုပ်ယူဖို့အတွက် အသင့်တော်ဆုံးပဲ"

နောက်ထပ် သုံးမျက်လုံး မိစ္ဆာမြေခွေးတစ်ကောင် ဟုတ်လား။

ဟူပိုင် တိတ်တဆိတ် ရယ်မိတော့သည်။ မိမိတို့မိသားစုက သုံးမျက်လုံး မိစ္ဆာမြေခွေးတွင်းထဲကို တိုးဝင်မိနေတာများလား။ မိမိနှင့် ဟူလီနာကို ဖယ်ထားလျှင်ပင် မိခင်ဖြစ်သူ ဟူလျဲ့ယောင်၏ စိတ်ဝိညာဉ်ကွင်းများထဲတွင် သုံးမျက်လုံး မိစ္ဆာမြေခွေးများထံမှ ရရှိခဲ့သည့်အရာ မည်မျှတောင် ပါဝင်နေမည်နည်း။

အခြားနည်းလမ်းမရှိပေ၊ စိတ်ဝိညာဉ်ဆိုင်ရာ ဝိညာဉ်သားရဲများသည် အလွန်တရာ ရှားပါးလှပြီး မြေခွေးအမျိုးအစား (ပို၍ အဆင်ပြေသော) ဖြစ်ရမည်ဆိုလျှင် ပို၍ပင် ရှားပါးလှသည်။ သုံးမျက်လုံး မိစ္ဆာမြေခွေးသည် ဝိညာဉ်သားရဲများထဲတွင် ထိပ်တန်းအဆင့်ရှိသော်လည်း အောက်ခြေအဆင့် သားရဲများလည်း ရှိနေသဖြင့် အလွယ်တကူ ဆုံတွေ့နိုင်ခြင်း ဖြစ်သည်။ ထို့ကြောင့် သူတို့သည် ဤမျိုးစိတ်တစ်ခုတည်းထံမှသာ စွမ်းအားများကို 'မွေးညှပ်ညှပ်' သကဲ့သို့ ထပ်ခါတလဲလဲ ရယူနေကြရခြင်း ဖြစ်တော့သည်။

ဟူပိုင်က ရင်ထဲတွင် ထိုသားရဲလေးအတွက် တိတ်တဆိတ် 'ဝမ်းနည်း' ပေးမိသည် ။

သုံးမျက်လုံး မိစ္ဆာမြေခွေး - "တို့တွေက မျိုးရိုးတူတွေဖြစ်ပါလျက်နဲ့ ဘာဖြစ်လို့ တစ်ကောင်နဲ့တစ်ကောင် ဒီလောက်အထိ အငြိုးကြီးပြီး သတ်ဖြတ်နေကြရတာလဲ"

သုံးမျက်လုံး မိစ္ဆာမြေခွေး တည်ရှိရာနေရာကို အတိအကျ သိရှိရသည်နှင့် အမြီးကိုးချောင်းမိစ္ဆာနတ်သမီးသည် ရှေ့သို့ တိုက်ရိုက် အရှိန်ပြင်းစွာ ပြေးဝင်သွားခဲ့တော့သည်။

ဤဝိညာဉ်ကွင်းမှာ ဟူလီနာ စုပ်ယူရန် ဖြစ်သည့်အတွက် ထိုသားရဲအား ပြင်းထန်စွာ ဒဏ်ရာရအောင် ပြုလုပ်ပြီးနောက် ဝိညာဉ်ပေါင်းစပ်ခြင်းစွမ်းရည်ကို ဖျက်သိမ်းကာ သူမကိုယ်တိုင်ပင် အဆုံးသတ်ချက်ကို လုပ်ဆောင်ရမည် ဖြစ်သည်။ အကယ်၍ အမြီးကိုးချောင်းမိစ္ဆာနတ်သမီးကသာ တိုက်ရိုက် သတ်ဖြတ်လိုက်ပါက ထိုဝိညာဉ်ကွင်းသည် မည်သူ့ထံသို့ ရောက်ရှိသွားမည်ကို သူတို့ မသိသလို စမ်းသပ်လောင်းကစားခြင်းလည်း မပြုလိုကြချေ။

မီတာ ၁၀၀ အကွာအဝေးသို့ ချဉ်းကပ်မိသည်နှင့် သုံးမျက်လုံး မိစ္ဆာမြေခွေးသည် အန္တရာယ်ကို အာရုံခံမိသွားပုံရသည်။ ၎င်း၏ မျက်ဝန်းများတွင် ကောက်ကျစ်စဉ်းလဲမှုများ လင်းလက်သွားပြီး ဗီဇစိတ်အရ လှည့်ထွက်ပြေးရန် ပြင်တော့သည်။

အမြီးကိုးချောင်းမိစ္ဆာနတ်သမီးသည် ဤဝိညာဉ်သားရဲကို မည်သို့ လွတ်မြောက်ခွင့်ပေးပါမည်နည်း။ ၎င်းသည် လမင်းဓားမြှောင်ကို ဝှေ့ယမ်းပစ်လွှတ်လိုက်ပြီး သားရဲ၏ ထွက်ပြေးမည့် လမ်းကြောင်းကို ပိတ်ဆို့လိုက်သည်။ ထိုခဏချင်းအတွင်းမှာပင် အမြီးကိုးချောင်းမိစ္ဆာနတ်သမီးသည် မီတာ ၃၀ အကွာအဝေးသို့ ရောက်ရှိသွားခဲ့ပြီ ဖြစ်သည်။

ကောင်းကင်မြေခွေး နယ်ပယ်။

ဤနယ်ပယ်အတွင်းတွင် သုံးမျက်လုံး မိစ္ဆာမြေခွေးသည် တိုက်ရိုက် ဖိနှိပ်ခြင်းကို ခံလိုက်ရပြီး လှုပ်ရှားနိုင်စွမ်း ကင်းမဲ့သွားခဲ့ရသည်။ ကောင်းကင်မြေခွေး နယ်ပယ်သည် ဟူပိုင်၏ စိတ်ဆန္ဒအတိုင်း ၎င်း၏ အာနိသင်ကို ပြောင်းလဲနိုင်သည်။ ဟူပိုင်က မဟာမိတ်အဖြစ် သတ်မှတ်ထားသူများ (ဥပမာ ဟူလျဲ့ယောင် ကဲ့သို့သောသူများ) အတွက်မူ စွမ်းအားများကို မြှင့်တင်ပေးနိုင်သော်လည်း ရန်သူအဖြစ် သတ်မှတ်ခံရသူများမှာမူ အမြီးကိုးချောင်းကောင်းကင်မြေခွေး၏ တိုက်ရိုက် ဖိနှိပ်ချုပ်ချယ်မှုကို ခံရမည် ဖြစ်သည်။

ဒါက လုံးဝဥဿုံဖြစ်သော သွေးမျိုးဆက် ဖိနှိပ်မှုပင်။

ဝိညာဉ်သခင်များရော ဝိညာဉ်သားရဲများပါ သွေးမျိုးဆက်နှင့် စွမ်းရည်ဆိုင်ရာ ဖိနှိပ်မှုများကို အလွန် အလေးထားကြသည်။ ကံမကောင်းစွာဖြင့် အမြီးကိုးချောင်းကောင်းကင်မြေခွေးသည် သုံးမျက်လုံး မိစ္ဆာမြေခွေးကို ကဏ္ဍစုံတွင် အပြတ်အသတ် သာလွန်နေခဲ့သည်။

အမြီးကိုးချောင်းမိစ္ဆာနတ်သမီးသည် လမင်းဓားမြှောင်ကို ပြန်မသုံးတော့ဘဲ ဆီးနှင်းပမာ ဖြူဖွေးလှသော မြေခွေးအမြီး ကိုးချောင်းကို ထွက်ပေါ်စေကာ လက်သီးဆုပ်ကြီးများအဖြစ် ပြောင်းလဲလျက် သုံးမျက်လုံး မိစ္ဆာမြေခွေး၏ ခန္ဓာကိုယ်အနှံ့သို့ တရစပ် ထုထောင်းချေမှုန်းလိုက်တော့သည်။

နောက်မှ လိုက်ပါလာသော လူအုပ်ကြီးသည် အမြီးကိုးချောင်းမိစ္ဆာနတ်သမီး၏ လုပ်ဆောင်ချက်များကို တိတ်တဆိတ် ကြည့်ရှုနေကြသည်။ ပီပီတုန်းသည် ရင်ထဲတွင် တိတ်တဆိတ် အံ့သြသွားရသည် ။ ဒီစွမ်းရည်က တကယ်ပဲ နယ်ပယ်တစ်ခုကို သယ်ဆောင်လာတာပဲ။

ထို့ပြင် သူမအနေဖြင့် ယခုအခါ တစ်ခုကို အသေအချာ အတည်ပြုနိုင်ခဲ့ပြီ ဖြစ်သည်။ ဟူပိုင်၏ ဝိညာဉ်သည် သူမ၏ အပေါ်တွင် သန့်စင်ခြင်း အာနိသင်တစ်ခု၊ စိတ်ခံစားချက်များကို သန့်စင်ပေးသည့် အာနိသင်မျိုး ရှိနေသည်။ ဤဒြပ်မဲ့စွမ်းအားက သူမကို ပိုမို စိတ်သက်သာရာရစေသည်။ တဖြည်းဖြည်းနှင့် သူမ၏ အမြီးကိုးချောင်းမိစ္ဆာနတ်သမီးအပေါ် ကြည့်သည့် အကြည့်များ၊ ပို၍ တိတိကျကျ ပြောရလျှင် ဟူပိုင်အပေါ် ကြည့်သည့် အကြည့်များသည် နူးညံ့ပျော့ပျောင်းလာခဲ့တော့သည်။

သူမသည် ရာရှာဆာ ၏ မိစ္ဆာအတွေးများ ဝါးမြိုတိုက်စားမှုကို မည်သို့ ပိုမိုကောင်းမွန်စွာ ထိန်းချုပ်ရမလဲဆိုသည်ကို ပူပန်နေခဲ့ရခြင်း ဖြစ်သည်။ ချန်ရွှင်ကျီး ကို ဝါးမြိုခဲ့ကတည်းက သူမ၏ စိတ်ခံစားချက်များသည် ပိုမို မတည်မငြိမ် ဖြစ်လာပြီး ထိန်းချုပ်ရ ခက်ခဲလာခဲ့သည်။ ထိုသူကို ဝါးမြိုခြင်းမှာ သူမ၏ ပထမဆုံး ရာရှာဆာ စမ်းသပ်ချက်၏ အစိတ်အပိုင်း ဖြစ်ခဲ့သည် မဟုတ်ပါလော။

အကြောင်းရင်းအချို့ကြောင့် ပီပီတုန်းသည် ချန်ရန်ရွှယ်ကို လှမ်းကြည့်လိုက်မိပြီး နှုတ်ခမ်းများ လှုပ်ရှားသွားကာ ...

"ရှောင်ရွှယ်... ငါ့ကလေး..."

"ဟင်..."

ချန်ရန်ရွှယ်သည် တစ်စုံတစ်ယောက်က သူမ၏ နာမည်ကို ခေါ်လိုက်သလို ကြားလိုက်ရသဖြင့် ပီပီတုန်းဘက်သို့ လှည့်ကြည့်လိုက်သော်လည်း အခြားသူ၏ အာရုံမှာ သူမထံတွင် ရှိမနေသည်ကို တွေ့ရသည်။ ဒါက စိတ်ထင်လို့များလား။ ချန်ရန်ရွှယ်သည် ရင်ထဲတွင် ကိုယ့်ကိုယ်ကိုယ် လှောင်ပြုံး ပြုံးမိလိုက်သည်။ ဟုတ်တာပေါ့... ပီပီတုန်းက သူမကို ဒီလောက်အထိ ရင်းရင်းနှီးနှီး ဘယ်လိုလုပ် ခေါ်ပါ့မလဲ။

ပီပီတုန်းသည် ချန်ရန်ရွှယ် တစ်စုံတစ်ခုကို သတိမပြုမိခင်မှာပင် ခေါင်းကို အမြန်ပြန်လွှဲလိုက်ပြီး ရင်ထဲတွင် တိတ်တဆိတ် ထိတ်လန့်သွားခဲ့ရသည်။ သူမ တကယ်ကြီး နှုတ်က ထုတ်ပြောမိလိုက်တာလား။

နေဦး... ဒါက မဟုတ်သေးပါဘူး။ စကားလုံး အပြည့်အစုံ ထွက်မလာသေးသော်လည်း ချန်ရန်ရွှယ်ကတော့ အမှန်ပင် ကြားလိုက်ရခြင်း ဖြစ်ရာ သူမ စိတ်ထင်ခြင်း မဟုတ်ချေ။ အထူးသဖြင့် ဤတစ်ကြိမ်တွင် စကားပြောလိုက်သည့်အခါ လွန်ခဲ့သော နှစ်ပေါင်းများစွာက လျှို့ဝှက်အခန်းထဲက အဖြစ်အပျက်များ စိတ်ထဲတွင် ဖျတ်ခနဲ ပေါ်လာသော်လည်း မူလက ပေါက်ကွဲထွက်လုနီးပါး ဖြစ်ခဲ့သော နာကျည်းမှု ဒေါသစွမ်းအင်များသည် ဒြပ်မဲ့စွမ်းအားတစ်ခုကြောင့် ပြေပျောက်သွားခဲ့ရသည်။

ဤအချက်က ဟူပိုင်၏ အမြီးကိုးချောင်းကောင်းကင်မြေခွေး ဝိညာဉ်တွင် သူကိုယ်တိုင်ပင် မသိသေးသော သန့်စင်ခြင်းစွမ်းအား ရှိနေကြောင်း သို့မဟုတ် သူ၏ ကောင်းကင်မြေခွေး နယ်ပယ်တွင် ထိုကဲ့သို့သော စွမ်းပကား ရှိနေကြောင်း သူမကို ပိုမို ယုံကြည်သွားစေသည်။ သူမ မသေချာသေးသဖြင့် နောင်တွင် ထပ်မံ၍ စမ်းသပ်ကြည့်ရဦးမည်။

ရာရှာဆာ နတ်ဘုရားက ဟူပိုင်သည် နောင်တစ်ချိန်တွင် သူမ၏ လက်ထောက်ကောင်း ဖြစ်လာလိမ့်မည်ဟု ပြောခဲ့သည်မှာ မဆန်းတော့ချေ။ ထိုနတ်ဘုရားမက ဤအချက်ကို စောစောကတည်းက ရိပ်မိနေခဲ့ခြင်းများလား။ ဒါတင်မကသေးဘဲ ဟူပိုင်သာ သူမ၏ ဘေးနားတွင် ရှိနေပါက တစ်နေ့တွင် သူမသည် ထိုစိတ်ဒဏ်ရာကို ကျော်လွှားနိုင်ပြီး ချန်ရန်ရွှယ်၏ ရှေ့တွင် သူမ၏ နာမည်ကို သဘာဝကျကျ ခေါ်ဆိုနိုင်လိမ့်မည်ဟု သူမ ယုံကြည်သွားခဲ့သည်။

ချန်ရန်ရွှယ်က ထိုအရာကို စိတ်ထင်သည်ဟု မှတ်ယူခဲ့သော်လည်း မှောင်ရိပ်ထဲတွင် စောင့်ကြည့်နေသော ရွှေမိကျောင်း ဒိုလော့ ရှိနေသည်ကို မမေ့အပ်ချေ။ သူသည် သူ၏ အာရုံကို နှစ်ပိုင်းခွဲထားပြီး တစ်ပိုင်းက အမြီးကိုးချောင်းမိစ္ဆာနတ်သမီး၏ စွမ်းရည်များကို အကဲခတ်နေကာ ကျန်တစ်ပိုင်းက ချန်ရန်ရွှယ်နှင့် ပီပီတုန်းတို့ကို အမြဲမပြတ် စောင့်ကြည့်နေခြင်း ဖြစ်သည်။ ထို့ကြောင့် ပီပီတုန်းက ရှောင်ရွှယ်၏ နာမည်ကို ခေါ်ဆိုပြီး သမီးအဖြစ် အသိအမှတ်ပြုလိုက်သည်ကို သူ အမှန်တကယ် မြင်တွေ့ကြားသိလိုက်ရခြင်း ဖြစ်သည်။

အမလေး ဘုရားရေ...

ဤတွေ့ရှိချက်ကြီးက သူ့ကို နှစ်ပေါင်းရာချီတိုင်အောင် အံ့ဩမှင်တက်သွားစေခဲ့တော့သည်။

သို့သော် ရွှေမိကျောင်း ဒိုလော့သည် ကောင်းကင်မြေခွေး နယ်ပယ်၏ အဝန်းအဝိုင်းထဲတွင် ရှိမနေချေ။ ရှိနေခဲ့လျှင်ပင် ထိုနယ်ပယ်က ပီပီတုန်းအပေါ် မည်သို့သော သက်ရောက်မှု ရှိနေသည်ကို သူ အာရုံခံနိုင်မည် မဟုတ်ပေ။ ထိုသန့်စင်ခြင်းစွမ်းအားမှာ မိစ္ဆာစွမ်းအင်များနှင့် မကောင်းသော အတွေးများကို သန့်စင်ပေးခြင်း ဖြစ်ရာ ပီပီတုန်း တစ်ဦးတည်းသာ ထိုအရာကို ခံစားသိရှိနိုင်ခြင်း ဖြစ်ပေတော့သည်။