အခန်း (၆၁) တတိယအကြိမ်မြောက် လေလံပွဲ (၁၆) စနစ်၏ အပြစ်ပေးမှု

တန်ဟောက် ထွက်ခွာသွားပြီးနောက် လေလံရုံတစ်ခုလုံး လုံးဝ တိတ်ဆိတ်သွားတော့သည်။

သို့သော်လည်း ခုနတင် ဖြစ်ပွားခဲ့သည့် ဘွဲ့အမည်ခံ ဒိုလော့ သုံးဦးအကြားမှ ရိုးရှင်းပြီး တိုက်ရိုက်ဆန်လှသော ထိပ်တိုက်တွေ့ဆုံမှုမှာ လူတိုင်း၏ စိတ်ထဲတွင် အရိပ်ထင်ကျန်နေဆဲ ဖြစ်သည်။

ဓားဒိုလော့ ချန်ရှင်းသည် လေးနက်တည်ကြည်သော မျက်နှာထားဖြင့် သူ၏ ခုနစ်လုပ်ကြံဓားကို ဖြည်းညှင်းစွာ ပြန်လည်ရုပ်သိမ်းလိုက်သည်။

"အဆင့် ၉၅"

သူ၏ လေသံထဲတွင် အံ့အားသင့်မှု အနည်းငယ် ပါဝင်နေသည်။

"ဒါ့အပြင်... အဲဒီနယ်ပယ်က တကယ့်ကို အာဏာရှင်ဆန်လွန်းတယ်"

ထိုနယ်ပယ်အတွင်းရှိ စင်ကြယ်လှသော သတ်ဖြတ်ခြင်း စိတ်ဆန္ဒကြောင့် သူ၏ ဓားအာရုံခံစားမှုပင်လျှင် အနည်းငယ် တန့်သွားသကဲ့သို့ ဖြစ်ခဲ့ရသည်။

ရွှီကျိုရှီသည် ရှေ့သို့ လျှောက်လာပြီး သူ၏ ဘေးတွင် မတ်တပ်ရပ်လိုက်ရာ မျက်နှာအမူအရာမှာလည်း တူညီစွာ ညှိုးငယ်နေသည်။

"နယ်ပယ်ချင်း ထိတွေ့မိတဲ့အချိန်တုန်းက အဲဒီလူက ကျွန်တော့်ကို အသက်အရွယ် နုပျိုသေးတယ်ဆိုတဲ့ ခံစားချက်မျိုး ပေးတယ်"

"ဒီလောက် အသက်ငယ်ငယ်နဲ့ ဒီလို ကျင့်ကြံခြင်း အဆင့်မျိုး ရှိနေတာ ပြီးတော့ အဲဒီတူကလည်း..."

ချန်ရှင်းသည် ဤစကားကို ကြားသောအခါ ဘာမှ ဆက်မပြောတော့ပေ။ သူသည် မိမိ၏ ဓားတိုက်စစ် အစွမ်းကို အမြဲတမ်း ဂုဏ်ယူဝံ့ကြွားခဲ့သူ ဖြစ်သည်။ ယနေ့တွင် သူသည် မိမိ၏ အစွမ်းကုန် စွမ်းအားကို ထုတ်မသုံးခဲ့သော်လည်း သူသည် အဆင့် ၉၇ သို့ တက်လှမ်းထားနိုင်ခဲ့ပြီ မဟုတ်ပါလား။ သို့သော် တစ်ဖက်လူကလည်း အစွမ်းကုန် ရုန်းကန်ခဲ့ရခြင်း ဟုတ်ချင်မှဟုတ်ပေမည်။

ဟောက်ထျန်တူ...

ထိုအမည်တစ်ခုတည်းကပင် အစွန်းဆုံးသော စွမ်းအားကို ကိုယ်စားပြုနေသည်။

အခြား သီးသန့်ခန်းတစ်ခုတွင်...

တန်ဆန်းသည် နှုတ်ခမ်းကို တင်းတင်းကိုက်ထားပြီး ခန္ဓာကိုယ်လေးမှာ မထိန်းချုပ်နိုင်ဘဲ တုန်ရင်နေရရှာသည်။

ထိုအမည်းရောင် ဧရာမ တူကြီးထံမှ ထွက်ပေါ်လာသော ရင်းနှီးသလိုလိုနှင့် စိမ်းသက်နေသော အာဏာရှင်ဆန်သည့် အငွေ့အသက်က... သူ၏ ဒုတိယမြောက် ကိုယ်ပွားဝိညာဉ်ကို ခုနတင် အလိုအလျောက် ပေါ်ထွက်လာစေခဲ့ခြင်း ဖြစ်သည်။

ဖလန်းဒါးနှင့် ယွီရှောင်ကန်းတို့သည် တစ်ဦးကိုတစ်ဦး ကြည့်လိုက်ကြပြီး အချင်းချင်း၏ မျက်ဝန်းထဲမှ ပြင်းထန်လှသော ထိတ်လန့်မှုကို မြင်တွေ့လိုက်ရသည်။ သို့သော် သူတို့နှစ်ဦးစလုံးက သိနားလည်စွာဖြင့် တိတ်ဆိတ်နေရန်သာ ရွေးချယ်လိုက်ကြသည်။

စီမံခန့်ခွဲရေး အခန်းတွင်း၌ နင်လျူသည် သက်ပြင်းအရှည်ကြီး တစ်ချက်ချလိုက်ပြီး မိမိကိုယ်ကို အတင်း တည်ငြိမ်အောင် ထိန်းလိုက်ရသည်။

ခုနက ထိပ်တိုက်တွေ့ဆုံမှုနှင့် ထိုအဆင့်ရှိ စွမ်းအားများက သူ့ကို ခဏတာမျှ အင်အားမဲ့သကဲ့သို့ ခံစားရစေသည်။ သူသည် ယခင်က ကိုယ်ပွားဝိညာဉ် ဆန်းသစ်ပြောင်းလဲခြင်းနှင့် ဝိညာဉ်စွမ်းအား တိုးတက်လာခြင်းတို့ကြောင့် စိတ်ထဲတွင် အနည်းငယ် မောက်မာမိခဲ့သည်မှာ အမှန်ပင် ဖြစ်သည်။ ယနေ့ မြင်တွေ့လိုက်ရသည့် အခါမှသာ လောကကြီးမှာ မိုးထက်မြင့်သည့် အရာများ ရှိနေသေးကြောင်း သူ သဘောပေါက်သွားတော့သည်။

မိမိ၏ အစွမ်းမှာ တကယ့် ကျွမ်းကျင်သူအစစ်အမှန်များ ရှေ့မှောက်တွင် အလွန်တရာ အရေးမပါလှပေ။

"ငါ တကယ်ပဲ ဘဝင်မြင့်နေခဲ့တာပဲ"

နင်လျူသည် မိမိကိုယ်ကို လှောင်ပြောင်မိရင်း ပိုမိုအစွမ်းထက်လာချင်သည့် စိတ်ဆန္ဒမှာ ယခုအချိန်တွင် ပိုမို ပြတ်သားလာခဲ့သည်။ သူသည် စီမံခန့်ခွဲရေး အခန်းမှ ထွက်ခွာခဲ့ပြီး ပျက်စီးရှုပ်ပွနေသော လေလံစင်မြင့်၏ အလယ်ဗဟိုဆီသို့ လှျှောက်လှမ်းသွားလိုက်သည်။

စင်အောက်ရှိ ထောင်ပေါင်းများစွာသော မျက်လုံးများက သူ့ထံသို့ စိုက်ကြည့်လာကြသည်။ အံ့အားသင့်ခြင်း စူးစမ်းလိုခြင်းနှင့် စိတ်လှုပ်ရှားခြင်းများ ရောပြွမ်းနေကြသည်။

"လူကြီးမင်းတို့ခင်ဗျာ"

နင်လျူ၏ အသံသည် ဝိညာဉ်စွမ်းအားမှတစ်ဆင့် ခန်းမတစ်ခုလုံးသို့ ပျံ့နှံ့သွားသည်။

"ဒီနေ့ ဖြစ်ပျက်ခဲ့တဲ့ ကိစ္စကတော့ ကျွန်တော်တို့ ခုနစ်ရတနာ လေလံရုံအနေနဲ့ ဧည့်ဝတ်မကျေပွန်ခဲ့လို့ လူကြီးမင်းတို့အားလုံးကို ထိတ်လန့်သွားစေခဲ့ရပါတယ်။"

"ကျွန်တော် နင်လျူဟာ သောတိုမြို့ ခုနစ်ရတနာ လေလံရုံရဲ့ အရှင်အသစ် ဖြစ်ပါတယ်။"

"ဒီနေ့ ဖြစ်ပွားခဲ့တဲ့ မတော်တဆမှုအတွက် ခုနစ်ရတနာ လေလံရုံကို ကိုယ်စားပြုပြီး လူကြီးမင်းတို့ အားလုံးကို အလေးအနက် အနူးအညွတ် တောင်းပန်အပ်ပါတယ်။"

သူသည် စကားပြောပြီးနောက် အောက်သို့ ဝတ်ချ၍ ညွှတ်တွား ဦးညွှတ်လိုက်သည်။

စင်အောက်ရှိ လူအုပ်ကြီးကြားမှ တိုးတိုးတိုးတိုး ပြောသံများ ထွက်ပေါ်လာသည်။

"ဒီလောက် ငယ်ငယ်လေးနဲ့ သူက အရှင်အသစ်လား"

"ခုနစ်ရတနာ အုပ်ကြွပ်ကျောင်းတော်ရဲ့ တိုက်ရိုက်တပည့်လား"

"ဘာပဲဖြစ်ဖြစ် ဒီလောက် ကြီးမားတဲ့ ကိစ္စကို သူ ဘယ်လို အဆုံးသတ်မလဲဆိုတာ စောင့်ကြည့်ရအောင်။"

နင်လျူသည် ကိုယ်ကို ပြန်မတ်လိုက်ပြီး ဆက်ပြောသည်။

"အသက်ရေကိုတော့ အဖိုးတန် ဧည့်သည်တော်တစ်ဦးက လေလံတင်ဖို့ အပ်နှံခဲ့တာ ဖြစ်ပါတယ်။ အခုလို လုယူခံလိုက်ရတဲ့အတွက် ကျွန်တော်တို့ ခုနစ်ရတနာ လေလံရုံအနေနဲ့ တာဝန်ကနေ လွှဲရှောင်လို့မရပါဘူး။"

"ဒါကြောင့် ဒီကိစ္စအတွက် လျော်ကြေးအနေနဲ့ ခုနစ်ရတနာ လေလံရုံကနေ ပိုင်ရှင်ထံသို့ ရွှေဒင်္ဂါး ငါးသန်း ပေးလျော်မယ်လို့ ကျွန်တော် ကြေညာပါတယ်။"

ဝါး

ထိုစကား ထွက်လာသည်နှင့် စင်အောက်ရှိ လူတိုင်း ထိတ်လန့်သွားကြတော့သည်။ ရွှေဒင်္ဂါး ငါးသန်းတဲ့လား။ ဤပမာဏမှာ နည်းပါးသော ငွေကြေးမဟုတ်ပေ။ တော်ဝင်မြို့တော်ရှိ အချို့သော ပထမတန်းစား ကျောင်းတော်များနှင့် မှူးမတ်များအတွက်ပင် တကယ့်ကို ကြီးမားလှသော ငွေပမာဏ ဖြစ်သည်။ အကယ်၍ ဤမျှအထိ ဆုံးရှုံးသွားပါက မိသားစုနှင့် ကျောင်းတော်ပင် ပျက်စီးသွားနိုင်ခြေ ရှိသည်။

ဤအရှင်အသစ်လေးမှာ မည်သို့သော သတ္တိမျိုးဖြင့် ဤမျှအထိ ဆုံးဖြတ်ရဲရသနည်း။

"ကောင်းတယ် လေလံရုံအရှင် နင်က တာဝန်ယူရဲတာပဲ"

မည်သူက စတင်အော်ဟစ်လိုက်မှန်း မသိရဘဲ နောက်ကွယ်မှ ထောက်ခံသံများ ဆက်တိုက် ထွက်ပေါ်လာတော့သည်။

"ဟုတ်တယ် လေလံရုံကိုပဲ အပြစ်တင်လို့မရပါဘူး။ ဒီလောက် အစွမ်းထက်တဲ့ ဘွဲ့အမည်ခံ ဒိုလော့တစ်ယောက်က ပစ္စည်းလာလုမယ်လို့ ဘယ်သူက ထင်ထားမှာလဲ။"

"အရှင်နင်က ဒီလို တာဝန်ယူပေးတာ တကယ်ကို လေးစားစရာကောင်းတယ်။"

"ခုနစ်ရတနာ အုပ်ကြွပ်ကျောင်းတော်က စီးပွားရေး အင်အားကြီးတာ မှန်ပေမဲ့ လေလံရုံရဲ့ ဒီလို သဘောထားကိုတော့ အသိအမှတ်ပြုရမယ်။"

လူတိုင်း၏ နင်လျူအပေါ် ထင်မြင်ချက်မှာ ခဏတာအတွင်း များစွာ ကောင်းမွန်လာခဲ့ပြီး မျှော်လင့်မထားသော မတော်တဆမှုကြောင့် ဖြစ်ပေါ်လာသည့် မကျေနပ်မှု အနည်းငယ်မှာလည်း ပျောက်ကွယ်သွားတော့သည်။

နင်လျူသည် လက်နှစ်ဖက်ကို ယှက်လိုက်ပြီး...

"လူကြီးမင်းတို့ရဲ့ နားလည်ပေးမှုအတွက် ကျေးဇူးတင်ပါတယ်။"

"လေလံပွဲကို ဆက်လက် ကျင်းပသွားမှာမို့လို့ စိတ်အေးချမ်းသာစွာ စောင့်ကြည့်ပေးကြပါ။"

သူက အချက်ပြလိုက်ရာ ကြီးကြပ်ရေးမှူး လီအန်းသည် အစေခံအချို့ကို အမြန်စေလွှတ်၍ စင်မြင့်ထက်မှ ပျက်စီးမှုများကို စတင် ရှင်းလင်းစေတော့သည်။

…

စီမံခန့်ခွဲရေး အခန်းတွင်း၌...

နင်ရုံရုံသည် အခန်းထဲသို့ ပြန်လည်ဝင်ရောက်လာသော နင်လျူကို ကြည့်ပြီး နှုတ်ခမ်းလေး စူကာ ပြောလိုက်သည်။

"စီနီယာအစ်ကို... ဒါက ရွှေဒင်္ဂါး ငါးသန်းတောင်လေ"

"ကျွန်တော်တို့က ဒီအတိုင်းပဲ လျော်ပေးလိုက်ရတော့မှာလား"

သူမသည် အလွန် ဒေါသထွက်နေရှာသည်။

"အဲဒီလူက တကယ့်ကို မုန်းဖို့ကောင်းတာပဲ သမီး ပြန်ရောက်ရင် ဖေဖေကို ပြောပြီး သူ့ကို သေချာပေါက် ရှာခိုင်းပြီး ပညာပေးရမယ်"

ဓားဒိုလော့ ချန်ရှင်းနှင့် ရွှီကျိုရှီတို့သည်လည်း လမ်းလျှောက်ဝင်ရောက်လာကြသည်။ နင်လျူသည် နင်ရုံရုံကို တစ်ချက်ကြည့်ပြီး တည်ငြိမ်စွာ ပြောလိုက်သည်။

"ရုံရုံ... ငွေကြေးဆိုတာ အသေးအဖွဲ ကိစ္စပါ။"

"ဒီနေ့ မင်းနဲ့ငါ ပိုပြီး မြင်အောင်ကြည့်ရမှာက ကွာခြားချက်ပဲ။"

"အကယ်၍ ဒီနေ့ မင်းနဲ့ငါသာ ဝိညာဉ်သူတော်စင် အဆင့်ရှိလို့ အသက်ကြီးအုန်းနဲ့ အစ်ကိုရွှီတို့ကို အကူအညီ လုံလောက်အောင် ပေးနိုင်ခဲ့မယ်ဆိုရင် အဲဒီလူက ဒီလောက် လွယ်လွယ်ကူကူနဲ့ ထွက်ပြေးနိုင်ပါ့မလား။"

နင်ရုံရုံသည် ဤစကားကို ကြားသောအခါ ရုတ်တရက် တိတ်ဆိတ်သွားသည်။ သူမသည် စိတ်ကြီးဝင်တတ်သော်လည်း လူအထုံတော့ မဟုတ်ပေ။ နင်လျူ ပြောသည့်အချက်က အလွန် တည့်မတ်လှသည်။

ဓားဒိုလော့ ချန်ရှင်းသည် ဤစကားကို ကြားရသောအခါ နင်လျူကို ချီးမွမ်းသော မျက်လုံးများဖြင့် ကြည့်လိုက်သည်။

"နင်လျူ ပြောတာ မှန်တယ်။"

"မင်းမှာ ဒီလို စိတ်ဓာတ်မျိုး ရှိနေတာ တကယ်ကို ကောင်းပါတယ်။"

"ရွှေဒင်္ဂါး ငါးသန်းဆိုတာ ငါတို့ ခုနစ်ရတနာ အုပ်ကြွပ်ကျောင်းတော်အတွက်တော့ ဘာမှမဟုတ်ပါဘူး။"

သူသည် ခဏရပ်ပြီး ဆက်ပြောသည်။

"ဒါပေမဲ့ ဒီသောတိုမြို့လေးက ဒီလိုလူမျိုးကို ဆွဲဆောင်နိုင်လိမ့်မယ်လို့ ငါ လုံးဝ မျှော်လင့်မထားခဲ့ဘူး။"

နင်လျူက ဘာမှ ပြန်မပြောသော်လည်း သူ၏ စိတ်ထဲတွင်မူ သတိပေးသံတစ်ခု တိတ်တဆိတ် ထွက်ပေါ်လာသည်။

[တုန်] [ပဉ္စမမြောက် လေလံပစ္စည်း 'အသက်ရေ' လေလံအောင်မြင်ခြင်း မရှိခဲ့ပါသဖြင့် အရှင်အနေဖြင့် သက်ဆိုင်ရာ ဆုလာဘ်များကို ရရှိနိုင်မည် မဟုတ်ပါ။]

[အပြစ်ပေးခြင်း စနစ် စတင်လည်ပတ်ပါပြီ နောင်လာမည့် လေလံပွဲ သုံးကြိမ်တွင် အရှင်အနေဖြင့် စင်တင်ရောင်းချနိုင်မည့် လေလံပစ္စည်း အရေအတွက် အပေါ်ဆုံး အကန့်အသတ်မှာ ကိုးခုသာ ဖြစ်ပါလိမ့်မည်။ အကယ်၍ လေလံပွဲ သုံးကြိမ်အတွင်း ထပ်မံ၍ လေလံမအောင်မြင်သည့် အပြစ်ပေးခြင်း စနစ် မဖြစ်ပေါ်ပါက ပစ္စည်းဆယ်ခုအထိ ပြန်လည် သတ်မှတ်ပေးပါလိမ့်မည်။]

ဤသတိပေးချက်ကို ကြားလိုက်ရသောအခါ နင်လျူသည် မျက်မှောင်အနည်းငယ် ကြုတ်မိသွားသည်။ စနစ်က အပြစ်ပေးလိုက်သည် ဆိုခြင်းမှာ ဘာကို ဆိုလိုသနည်း။

၎င်းက စနစ်သည်လည်း သူ့ကို တတ်နိုင်သမျှ မြန်မြန် အစွမ်းထက်လာစေချင်ကြောင်း သက်သေပြနေခြင်း ဖြစ်သည်။ မဟုတ်ပါက အကယ်၍သာ နောက်ထပ် ကိုးကြိမ်ခန့် ထပ်မံ လုယက်ခံရပါက သူ၏ စနစ်မှာ ပျက်စီးသွားပေလိမ့်မည်။

လေလံစင်မြင့်ထက်တွင်မူ လှပသော လေလံဆရာမလေး ဒိုဒိုသည် သူမ၏ စိတ်ခံစားချက်များကို ပြန်လည် ပြုပြင်ထိန်းညှိပြီး ဖြစ်သည်။ သူမ၏ အသံမှာ တူညီစွာ ချိုမြိန်နေဆဲ ဖြစ်သည်။

"အဖိုးတန် ဧည့်သည်တော်တို့ စောင့်ဆိုင်းရတာ ကြာသွားတဲ့အတွက် တောင်းပန်ပါတယ်။"

"ခုနတင် မတော်တဆမှု အနည်းငယ် ဖြစ်ပွားခဲ့ပေမဲ့ ကျွန်မတို့ရဲ့ စိတ်လှုပ်ရှားစရာ လေလံပွဲကတော့ ဆက်လက် ရှိနေဦးမှာပါ။"

"နောက်ထပ် ကျွန်မတို့ရဲ့ ဆဋ္ဌမမြောက် လေလံပစ္စည်းကို စင်တင်ပေးဖို့ ဖိတ်ခေါ်လိုက်ပါတယ်"

သူမ၏ စကားအဆုံးတွင် အစေခံမိန်းကလေးတစ်ဦးသည် ဗန်းတစ်ခုကို သယ်ဆောင်၍ တက်လာသည်။ ထိုဗန်းပေါ်တွင်မူ အနီရောင် ပိုးထည်စတစ်ခု ဖုံးအုပ်ထားသည်။ ဒိုဒိုသည် သူမ၏ နုနယ်သော လက်ကလေးကို မြှောက်ကာ ပိုးထည်စကို ဖယ်ရှားလိုက်သည်။

ဗန်း၏ အလယ်ဗဟိုတွင်မူ ရှေးဟောင်း သိုးရေလိပ်စာအုပ်တစ်အုပ် တိတ်တဆိတ် ရှိနေသည်။ ထိုစာလိပ်မှ ရှေးဟောင်း မင်ရည်နံ့ သင်းသင်းလေး ထွက်ပေါ်နေပြီး သမိုင်းကြောင်း ကြာမြင့်လှပြီ ဖြစ်ပုံရသည်။

"လူကြီးမင်းတို့ အားလုံး ကြည့်ရှုပေးကြပါ။"

ဒိုဒိုသည် သိုးရေလိပ်ကို ကောက်ကိုင်လိုက်ပြီး လူတိုင်းကို ပြသလိုက်သည်။

"ဒါကတော့ ခန္ဓာကိုယ် ကြံ့ခိုင်မှုဖြစ်စေတဲ့ ဆေးနည်းစာအုပ် ဖြစ်ပါတယ်။"

"ကျွန်မတို့ လေလံရုံရဲ့ အကဲဖြတ်ချက်အရ ဒီဆေးနည်းစာအုပ်ထဲမှာ ရေးသားထားတဲ့ ဆေးရေချိုးနည်းစနစ်ဟာ ကလေးငယ်တွေရဲ့ ကိုယ်ပွားဝိညာဉ် မနိုးထမီ ခန္ဓာကိုယ်ကို လေ့ကျင့်ခန်းလုပ်ပေးပြီး ကာယကြံ့ခိုင်မှုကို မြှင့်တင်ပေးနိုင်ပါတယ်။"

"၎င်းရဲ့ အကြီးမားဆုံး အာနိသင်ကတော့ ကိုယ်ပွားဝိညာဉ် နိုးထလာတဲ့အချိန်မှာ နိုးထသူကို မွေးရာပါ ဝိညာဉ်စွမ်းအား အနည်းငယ် ပိုမိုရရှိစေဖို့ အခွင့်အလမ်း အတိုင်းအဆတစ်ခု ရှိစေတာပဲ ဖြစ်ပါတယ်။"

"အာနိသင်ကတော့ ရှိပါတယ် ဒါပေမဲ့ လူကြီးမင်းတို့ နားလည်ထားတဲ့အတိုင်း ဒါက ကံကြမ္မာတစ်ခုလုံးကို ပြောင်းလဲပစ်နိုင်တဲ့ အရာမျိုးတော့ မဟုတ်ပါဘူး။"

ဒိုဒို၏ အသံမှာ ရှင်းလင်းချက် ပေးနေသည့်ပုံစံမျိုး ဖြစ်သည်။

"ကိုယ်ပွားဝိညာဉ်ရဲ့ အစွမ်းထက်မှုနဲ့ မွေးရာပါ ဝိညာဉ်စွမ်းအား အဆင့်ဟာ မိမိရဲ့ သွေးမျိုးဆက် ဆက်ခံမှုနဲ့ ကိုယ်ပိုင်ပါရမီအပေါ်မှာ ပိုပြီး မူတည်ပါတယ် ဒါက ကံတရားက သတ်မှတ်ပေးထားတာပါ။"

"ဒီဆေးနည်းကတော့ အတိုင်းအဆတစ်ခုအထိ ဖြစ်နိုင်ခြေကို အနည်းငယ် မြှင့်တင်ပေးနိုင်ရုံသာ ရှိပါတယ်။"

"ဒီလို ဖြစ်လင့်ကစား ဒီပစ္စည်းဟာ နက်ရှိုင်းတဲ့ နောက်ခံရှိတဲ့ မိသားစုကြီးတွေနဲ့ ကျောင်းတော်တွေအတွက်တော့ တကယ့်ကို ကောင်းမွန်တဲ့ ရွေးချယ်မှုတစ်ခု ဖြစ်နေဆဲပါပဲ။"

"ဘာပဲဖြစ်ဖြစ် ဘယ်သူကများ မိမိရဲ့ သားသမီးတွေကို ပိုမိုကောင်းမွန်တဲ့ အစပြုခြင်းမျိုး မရရှိစေချင်ဘဲ နေပါ့မလဲ။"

"ဒီခန္ဓာကိုယ် ကြံ့ခိုင်မှုဖြစ်စေတဲ့ ဆေးနည်းစာအုပ်ရဲ့ အခြေခံဈေးကတော့ ရွှေဒင်္ဂါး တစ်သိန်း ဖြစ်ပါတယ်"

"ဈေးနှုန်း တိုးမြှင့်လိုပါက တစ်ကြိမ်လျှင် အနည်းဆုံး ရွှေဒင်္ဂါး တစ်သောင်းထက်မနည်း တိုးပေးရပါမယ်။"

"အခု လေလံပွဲကို စတင်ပါပြီ"