ပူပြင်းလှတဲ့ နေရောင်အောက်မှာ အဆုံးမမြင်နိုင်လောက်အောင် ကျယ်ပြောလှတဲ့ သမုဒ္ဒရာကြီးက တလက်လက် တောက်ပနေတယ်။
ပင်လယ်ရေမျက်နှာပြင်ပေါ်မှာ ဧရာမဝေလငါးကြီးတစ်ကောင် ငြိမ်သက်စွာ မျောနေတယ်။ ခန္ဓာကိုယ်အရှည်က မီတာနှစ်ရာတောင် ရှိပြီး တစ်ကိုယ်လုံးက နီလာပြာရောင်တောက်ပနေတယ်။ ဦးခေါင်းပေါ်မှာလည်း အချင်းသုံးမီတာကျော်ရှိတဲ့ မျက်လုံးကြီးနှစ်လုံး ရှိနေတယ်။
ဒါပေမဲ့ မျက်လုံးတစ်လုံးကတော့ အလင်းရောင်ကို မခံစားနိုင်တော့ဘဲ ကန်းနေခဲ့တယ်။
ခန္ဓာကိုယ်အရွယ်အစားနဲ့ အသွင်အပြင်က ကြည့်လိုက်ရုံနဲ့တင် ကြောက်စရာကောင်းလွန်းတယ်။
ဒီဝေလငါးကြီးက ဘာမှမလုပ်ဘဲ ငြိမ်ငြိမ်လေး မျောနေရုံနဲ့တင် သမုဒ္ဒရာထဲက ပင်လယ်ဝိညာဉ်သားရဲတိုင်းကို ကြောက်လန့်တုန်လှုပ်သွားစေနိုင်တယ်။
ခဏကြာတော့ ဝေလငါးကြီးက မျက်လုံးတွေကို ဖြည်းဖြည်းချင်း ဖွင့်လာတယ်။ ရှေ့က မြင်ကွင်းကို မြင်လိုက်ရတဲ့အခါမှာတော့ အံ့အားသင့်လွန်းလို့ ခန္ဓာကိုယ်တောင် တုန်သွားတယ်။
"ဟာ... သောက်ကျိုးနည်း!"
"ငါ အိမ်မှာ တစ်ရေးတစ်မော အိပ်နေတာ မဟုတ်ဘူးလား ။ဘယ်လိုလုပ် ပင်လယ်ထဲ ရောက်လာရတာလဲ?"
"ဘာတွေ ဖြစ်နေတာလဲ?"
"ခဏလေး... နေဦး..."
ယဲ့ဝမ်က အနည်းငယ် ထိတ်လန့်သွားတယ်။ သိပ်မကြာခင်မှာပဲ ထူးဆန်းတဲ့အချက်တစ်ခုကို သတိထားမိသွားတယ်။
သူက လူစကားကို ပြောနေတာ သေချာပေမဲ့ ပါးစပ်က ထွက်လာတဲ့အသံကတော့ ဝေလငါးကြီးရဲ့ အော်သံကြီး ဖြစ်နေတယ်။
“ငါ့အသံ... ငါ့ခန္ဓာကိုယ်ကရော”
မူလကတည်းက ခေါင်းရှုပ်နေတဲ့ ယဲ့ဝမ်ဟာ အခုဆို ပိုတောင် နားမလည်နိုင်တော့ဘူး။
အဲဒီအချိန်ကျမှ သူ့ခန္ဓာကိုယ်က တစ်ခုခု ထူးဆန်းနေမှန်း သတိထားမိလာတယ်။ ခန္ဓာကိုယ်ကို စိတ်ကြိုက် ထိန်းချုပ်နိုင်သေးပေမဲ့ အရင်နဲ့ လုံးဝမတူတဲ့ ခံစားချက်မျိုး ရနေတယ်။
ယဲ့ဝမ်က ချက်ချင်းပဲ မျက်လုံးကို အောက်ဘက်ဆီ ရွှေ့ပြီး သူ့ခန္ဓာကိုယ်အောက်ပိုင်းကို ကြည့်လိုက်တယ်။
“အို... ဘုရားရေ”
“မဖြစ်နိုင်တာ”
“ငါးကြီးတစ်ကောင်”
သူ့မျက်စိရှေ့မှာ ဝေလငါးတစ်ကောင်ရဲ့ အမြီးကြီးကို မြင်နေရတယ်!!
အဲဒီအမြီးကြီးက သူ့ခန္ဓာကိုယ်နဲ့ တစ်ဆက်တည်း ဖြစ်နေတယ်!
"ငါ... ငါ ငါးကြီးတစ်ကောင် ဖြစ်သွားတာလား"
ယဲ့ဝမ်က မထိန်းနိုင်တော့ဘဲ အထိတ်တလန့် အော်လိုက်မိတယ်။
အဖြစ်အပျက်က ရုတ်တရက်ကြီး ဖြစ်လာလွန်းတယ်။ မျက်စိတစ်မှိတ်အတွင်းမှာပဲ တက်ကြွသန်မာတဲ့ လူငယ်တစ်ယောက်အဖြစ်ကနေ တစ်ရေးအိပ်ရာနိုးလာတာနဲ့ ဝေလငါးကြီးတစ်ကောင် ဖြစ်သွားရတယ်ဆိုတာကို လက်ခံဖို့ ခဏတာအတွင်းမှာ မဖြစ်နိုင်သေးဘူး။
"ငါ လူဝင်စားလာတာလား?"
"ဒီလို အဓိပ္ပာယ်မရှိတဲ့ ကိစ္စမျိုး တစ်နေ့ကျ ငါ့အပေါ် ဖြစ်လာလိမ့်မယ်လို့ မထင်ထားခဲ့ဘူး!"
နှစ်ပေါင်းများစွာ ဝတ္ထုတွေ ဖတ်လာခဲ့တဲ့ ဝတ္ထုအရူးကြီးတစ်ယောက်ဖြစ်တဲ့ ယဲ့ဝမ်ဟာ သူ့အခြေအနေကို တဖြည်းဖြည်း သဘောပေါက်လာတယ်။ သူဟာ တခြားကမ္ဘာတစ်ခုကို လူဝင်စားလာခဲ့တာ ဖြစ်နိုင်ခြေများတယ်။
ကမ္ဘာကူးပြောင်းလာရတာကိုတော့ လက်ခံနိုင်ပါတယ်။
‘ဒါပေမဲ့ ဘာလို့ ငါးကြီး ဖြစ်ရတာလဲ’
‘လူတစ်ယောက်အဖြစ် ပြန်မွေးဖွားလာရင် ပိုကောင်းမှာပေါ့’
ခဏကြာတဲ့အခါ ယဲ့ဝမ်ရဲ့ စိတ်ခံစားချက်တွေက တဖြည်းဖြည်း တည်ငြိမ်လာတယ်။
"ဟူး... ထားလိုက်ပါတော့။ ဝေလငါးဆိုလည်း ဝေလငါးပေါ့။"
"ဒါပေမဲ့ ဒီကမ္ဘာက ဘယ်လိုကမ္ဘာမျိုးလဲ?"
"ငါ့ခန္ဓာကိုယ်ထဲမှာ ကြောက်မက်ဖွယ်ကောင်းတဲ့ စွမ်းအားတစ်ခု ပုန်းအောင်းနေတယ်ဆိုတာကို ရှင်းရှင်းလင်းလင်း ခံစားလို့ရတယ်။ ကောင်းကင်နဲ့ မြေကြီးကြားမှာ ရှိနေတဲ့ ထူးခြားတဲ့ စွမ်းအင်ကိုလည်း အာရုံခံနိုင်တယ်။"
"ဒီကမ္ဘာက သာမန်ကမ္ဘာတစ်ခုတော့ မဟုတ်လောက်ဘူး မဟုတ်လား?"
"ပြီးတော့... ငါကိုယ်တိုင်လည်း သာမန်ဝေလငါးတစ်ကောင် မဟုတ်လောက်ဘူး။"
အဖြစ်မှန်ကို လက်ခံပြီးနောက် ယဲ့ဝမ်ဟာ ဒီကိစ္စကို စတင်စဉ်းစားရင်း သူ့ပတ်ဝန်းကျင်က ကမ္ဘာကြီးကို အာရုံခံကြည့်လိုက်တယ်။
ဒါပေမဲ့ သူဟာ အခုဆို ဒိုလော့တိုက်ကြီးပေါ်မှာ အင်အားအကြီးဆုံး ဝိညာဉ်သားရဲဖြစ်ပြီး ကျင့်ကြံသက်တမ်းက နှစ်တစ်သန်းနီးပါးအထိ ရောက်ရှိနေတဲ့ ကြောက်မက်ဖွယ်ရာ အုပ်စိုးသူတစ်ယောက် ဖြစ်နေပြီဆိုတာကို မသိသေးဘူး။
အဲဒီအချိန်မှာပဲ ဧရာမဝေလငါးကြီးရဲ့ မူလမှတ်ဉာဏ်တွေက ရေလွှမ်းမိုးသလို ယဲ့ဝမ်ရဲ့ စိတ်ထဲကို တရစပ် စီးဝင်လာတယ်။
"အင်းးးးးးးးးးး!"
"နာလိုက်တာ"
ယဲ့ဝမ်ရဲ့ ဦးခေါင်းက ပေါက်ကွဲထွက်တော့မတတ် ပြင်းထန်တဲ့ နာကျင်မှုကို ခံစားလိုက်ရတယ်။ နဖူးကြောတွေ တင်းလာပြီး ဦးနှောက်တစ်ခုလုံး ပွင့်ထွက်တော့မလို နာကျင်နေတယ်။
ခဏကြာတော့ နာကျင်မှုက ပျောက်ကွယ်သွားပေမဲ့ ယဲ့ဝမ်ရဲ့ စိတ်ကတော့ နောက်တစ်ကြိမ် လှုပ်ခတ်သွားပြန်တယ်။
"ဘုရားရေ..."
"ငါက... ပင်လယ်ရေနက် နတ်ဆိုးဝေလငါးဘုရင်ကြီးလား"
"ဒီကမ္ဘာက ဒိုလော့တိုက်ကြီးပဲ ဖြစ်နေတာလား"
ဝတ္ထုတွေကို နှစ်ပေါင်းများစွာ ဖတ်လာခဲ့တဲ့ ဝါရင့်ဝတ္ထုအရူးကြီးတစ်ယောက်အနေနဲ့ ယဲ့ဝမ်က ဒိုလော့တိုက်ကြီးအကြောင်းကို ဘယ်လိုလုပ် မသိဘဲ နေမှာလဲ။
ပင်လယ်ရေနက် နတ်ဆိုးဝေလငါးဘုရင်ဟာ သမုဒ္ဒရာကြီးတစ်ခုလုံးရဲ့ အုပ်စိုးသူပဲ။
ကျင့်ကြံသက်တမ်း နှစ်ပေါင်း ၉၉၉,၉၉၉ နှစ်ရှိတဲ့ ပင်လယ်ဝိညာဉ်သားရဲတစ်ကောင်!
ခန္ဓာကိုယ်ရဲ့ ကြံ့ခိုင်မှုက နတ်ဘုရားခန္ဓာကိုယ်ရဲ့ ၉၉ ရာခိုင်နှုန်းအထိ ရောက်ရှိနေတယ်!
စွမ်းအားကလည်း နတ်ဘုရားတစ်ပိုင်းအဆင့်အထိ ရောက်နေပြီး နတ်ဘုရားဖြစ်လာဖို့ ခြေတစ်လှမ်းပဲ လိုတော့တယ်!
နတ်ဘုရားအဆင့်အောက်မှာ ရှိတဲ့ အင်အားအကြီးဆုံး ထိပ်တန်းတည်ရှိမှုတွေထဲက တစ်ကောင်ဖြစ်ပြီး စိတ်ကူးနဲ့တောင် မယှဉ်နိုင်လောက်အောင် ကြောက်စရာကောင်းတဲ့ အကောင်ကြီးပဲ!
အခုတော့ သူကိုယ်တိုင်က ပင်လယ်ရေနက် နတ်ဆိုးဝေလငါးဘုရင် ဖြစ်သွားခဲ့ပြီ!
"အို... ဘုရားရေ..."
"သောက်ကျိုးနည်း! ပင်လယ်ရေနက် နတ်ဆိုးဝေလငါးဘုရင်က အရမ်းသန်မာတာ မှန်ပေမဲ့ ဒီကောင်ကြီးရဲ့ အသက်ရှင်ဖို့ အချိန်က သိပ်မကျန်တော့ဘူးထင်တယ်။"
မူလကတည်းက တိုက်ကြီးတစ်ခုလုံးရဲ့ အမြင့်ဆုံးအဆင့်မှာ ရှိနေတဲ့ စွမ်းအားကို ပိုင်ဆိုင်ထားရပေမဲ့ ယဲ့ဝမ်က ပျော်ရွှင်မနေခဲ့ဘူး။ အဲဒီအစား ဘာပြောရမှန်းမသိလောက်အောင် စိတ်ပျက်သွားတယ်။
ဘာလို့လဲဆိုတော့ ပင်လယ်ရေနက် နတ်ဆိုးဝေလငါးဘုရင်ဟာ နောက်ဆုံးမှာ စံနှုန်းနှစ်မျိုးနဲ့ ဆက်ဆံတတ်တဲ့ ခွေးကောင်ထန်ဆန်းရဲ့ လက်ချက်နဲ့ သေဆုံးရမှာ ဖြစ်နေလို့ပဲ။
ထန်ဆန်းရဲ့ ပင်လယ်နတ်ဘုရား စမ်းသပ်မှုကိုးဆင့်ထဲက အဋ္ဌမမြောက်စမ်းသပ်မှုမှာ မဖြစ်မနေ သတ်ဖြတ်ရမယ့် ပစ်မှတ်က သူပဲ။
တစ်နည်းအားဖြင့် ပြောရရင် သူဟာ ဒီလှည့်စားတတ်တဲ့ ထန်ဆန်းရဲ့ လက်ချက်နဲ့ မလွဲမသွေ သေဆုံးရမယ်။ အဲဒီနောက် သူ့ရဲ့ ဝိညာဉ်စက်ကွင်းနဲ့ ဝိညာဉ်အရိုးတွေကိုပါ ထန်ဆန်းက စုပ်ယူသွားဦးမှာပဲ။
"မဖြစ်ဘူး! ထန်ဆန်း လာသတ်တာကို ဒီအတိုင်း ထိုင်စောင့်နေရမယ်တဲ့လား။ ဘယ်လိုလုပ် ဖြစ်နိုင်မှာလဲ! ငါ တစ်ခုခုတော့ လုပ်ရမယ်!"
ယဲ့ဝမ်က အဲဒီလို ကံကြမ္မာမျိုးကို လက်ခံဖို့ လုံးဝ ဆန္ဒမရှိဘူး။
ထန်ဆန်းရဲ့ အသက်ဘယ်လောက်ရှိပြီလဲ၊ လက်ရှိအချိန်က ဘယ်အချိန်လဲ၊ ထန်ဆန်း ဘယ်တော့ ရောက်လာမလဲဆိုတာကို သူ တိတိကျကျ မသိဘူး။ ဒါပေမဲ့ ပင်လယ်ရေနက် နတ်ဆိုးဝေလငါးဘုရင်ရဲ့ လက်ရှိမှတ်ဉာဏ်ထဲမှာတော့ ထန်ဆန်း၊ ရှောင်ဝူနဲ့ဒိုင်မုပိုင်တို့အကြောင်း တစ်စွန်းတစ်စမှ မရှိသေးဘူး။
ဒီအချက်ကို အခြေခံပြီး ခန့်မှန်းကြည့်ရင် လက်ရှိအချိန်ဟာ ထန်ဆန်း ပင်လယ်နတ်ဘုရားကျွန်းကို ပထမဆုံးအကြိမ် မသွားရောက်ခင် အချိန်ဖြစ်ရမယ်။
"ထန်ဆန်း ပင်လယ်နတ်ဘုရားကျွန်းကို မရောက်သေးဘူးဆိုရင်တော့ ကိစ္စက လွယ်သွားပြီ။ ငါက သူ့ဘဝလမ်းကြောင်းကို ကြိုတင်ပြောင်းလဲပေးလိုက်ရုံပဲ။ ဒါမှမဟုတ် ထန်ဆန်းကို ကျင့်ကြံလို့မရတော့တဲ့ လူတစ်ယောက်ဖြစ်အောင် တိုက်ရိုက်လုပ်ပစ်မယ်။ မဟုတ်သေးဘူး... တစ်ခါတည်း သတ်ပစ်လိုက်လည်း ရတာပဲ!"
"ပင်လယ်ရေနက် နတ်ဆိုးဝေလငါးဘုရင်ရဲ့ စွမ်းအားကို ပိုင်ဆိုင်ထားတဲ့ ငါ့အတွက် အရွယ်မရောက်သေးတဲ့ လှည့်စားတတ်တဲ့ကောင်ကို သတ်ဖို့ ခက်ပါ့မလား? ထန်ဟောက်က သူ့ကို ကာကွယ်ပေးနေရင်တောင် ဘာမှမဖြစ်ဘူး! ထန်ဟောက်က ငါ့ကို နိုင်လို့လား?"
"မဟုတ်ဘူး! မဟုတ်သေးဘူး!"
ယဲ့ဝမ်က ရုတ်တရက် တစ်ခုခုကို သတိရသွားတယ်။ ခုနက စဉ်းစားထားတဲ့ နည်းလမ်းက အလုပ်ဖြစ်မှာ မဟုတ်လောက်ဘူး။
"ငါ မှတ်မိသလောက်ဆိုရင် ဝိညာဉ်သားရဲတစ်ကောင်က ကျင့်ကြံသက်တမ်း နှစ်တစ်သိန်း ပြည့်သွားတဲ့အခါ လူသားအဖြစ် ပြောင်းလဲပြီး ကျင့်ကြံဖို့ ရွေးချယ်နိုင်တယ်။ ဒါမှမဟုတ် သားရဲပုံစံအတိုင်း ဆက်ပြီး ကျင့်ကြံနိုင်တယ်။ ဒါပေမဲ့ လူသားအဖြစ် ပြောင်းလဲနိုင်တဲ့ အခွင့်အရေးကို လက်လွတ်သွားရင် နောက်တစ်ကြိမ် လူသားအဖြစ် ပြောင်းလဲဖို့ ခက်ခဲသွားတယ်။"
"ငါသာ လူသားအဖြစ် ပြောင်းလဲလို့မရဘူးဆိုရင် ပင်လယ်ဝိညာဉ်သားရဲတစ်ကောင်အနေနဲ့ လူသားလောကထဲကို ဘယ်လိုလုပ် သွားနိုင်မှာလဲ? ပြီးတော့ လူသားအဖြစ် ပြောင်းလဲနိုင်ခဲ့ရင်တောင် အစကနေ ပြန်ကျင့်ကြံရဦးမှာပဲ..."
"ငါးအမျိုးအစား ပင်လယ်ဝိညာဉ်သားရဲတွေက ကျင့်ကြံသက်တမ်း နှစ်တစ်သိန်း ပြည့်သွားရင် ခဏတာ လူသားအသွင် ပြောင်းလဲပြီး ကုန်းပေါ်တက်နိုင်တယ်။ ဒါပေမဲ့ ကုန်းပေါ်မှာ အများဆုံး နှစ်နာရီပဲ နေနိုင်တယ်။ ရေထဲကနေ ထွက်လာတဲ့အတွက် ကိုယ်ပိုင်စွမ်းအားကလည်း သုံးဆယ်ရာခိုင်နှုန်းအထိ လျော့ကျသွားမယ်။"
"နှစ်နာရီဆိုတာ ကုန်းပေါ်တက်ပြီး ထန်ဆန်းကို လိုက်ရှာဖို့တောင် မလုံလောက်ဘူး။ ငါ အဲဒီအချိန်မတိုင်ခင် သေသွားလိမ့်မယ်!"
"တကယ့်ကို ခက်ခဲလိုက်တာ! ကြည့်ရတာ ထန်ဆန်း ပင်လယ်နတ်ဘုရားကျွန်းကို ရောက်လာတဲ့အထိပဲ စောင့်ရတော့မယ်ထင်တယ်။ ဒါပေမဲ့ ထန်ဆန်း ပင်လယ်နတ်ဘုရားကျွန်းကို ရောက်သွားတဲ့အချိန်မှာ ဒီလှည့်စားတတ်တဲ့ကောင်က သမုဒ္ဒရာနှလုံးသားကို ရရှိထားပြီးသား ဖြစ်နေလိမ့်မယ်။ လူသတ်မြို့တော်ကိုလည်း ဖျက်ဆီးပြီး သတ်ဖြတ်နတ်ဘုရားနယ်မြေကိုပါ ရရှိထားလောက်ပြီ!"
"အဲဒီအချိန်ကျရင် ထန်ဆန်းက ပင်လယ်နတ်ဘုရားနဲ့ အသူရာနတ်ဘုရားတို့ရဲ့ အာရုံစိုက်မှုကို ရရှိထားပြီးသား ဖြစ်နေပြီ။ နတ်ဘုရားနှစ်ပါးရဲ့ ကာကွယ်မှုအောက်မှာ သူ့ကို ထိခိုက်အောင် လုပ်ဖို့က အရမ်းခက်ခဲသွားမှာ မဟုတ်ဘူးလား?"
ယဲ့ဝမ်က စိတ်အနှောင့်အယှက် ဖြစ်လာတယ်။
သူ့မှတ်ဉာဏ်ထဲမှာ နတ်ဘုရားတွေဟာ သေမျိုးတွေရဲ့ ကိစ္စတွေကို ဝင်ရောက်စွက်ဖက်ခွင့် မရှိဘူးလို့ သိထားတယ်။ ဒါပေမဲ့ ပင်လယ်နတ်ဘုရားနဲ့ အသူရာနတ်ဘုရားဆိုတဲ့ အဲဒီနှစ်ကောင်ကတော့ နတ်ဘုရားနယ်မြေရဲ့ စည်းမျဉ်းတွေကို အကြိမ်ကြိမ် ချိုးဖောက်ပြီး လူသားလောကထဲ ဝင်ရောက်စွက်ဖက်ခဲ့ကြတယ်။ ထန်ဆန်းကိုလည်း အကြိမ်ကြိမ် ကူညီပေးခဲ့ကြတယ်။
ထန်ဆန်း သတ်ခံရတော့မယ့် အချိန်တိုင်းမှာ ပင်လယ်နတ်ဘုရားနဲ့ အသူရာနတ်ဘုရားတို့က ထွက်ပေါ်လာပြီး ကူညီပေးတတ်ကြတယ်။
ယဲ့ဝမ်က ထန်ဆန်း ပင်လယ်နတ်ဘုရားကျွန်းကို ရောက်လာတဲ့အချိန်မှ လှုပ်ရှားမယ်ဆိုရင် ပင်လယ်နတ်ဘုရားနဲ့ အရှူရာနတ်ဘုရားတို့ရဲ့ အကြိမ်ကြိမ် ဝင်ရောက်စွက်ဖက်မှုကို ခံရနိုင်တယ်။ အဲဒီလိုဆိုရင် အောင်မြင်ဖို့ အရမ်းခက်ခဲသွားလိမ့်မယ်။
နောက်ဆုံးမှာ သူဟာ ထန်ဆန်း ပင်လယ်နတ်ဘုရားကျွန်းပေါ်မှာ တစ်ဆင့်ပြီးတစ်ဆင့် အင်အားကြီးထွားလာတာကို ဒီအတိုင်း ထိုင်ကြည့်နေရုံပဲ တတ်နိုင်တော့မယ်။ အဲဒီနောက် အဋ္ဌမမြောက်စမ်းသပ်မှုအတွင်း ထန်ဆန်းရဲ့ လက်ချက်နဲ့ သေဆုံးပြီး တခြားသူတစ်ယောက် နတ်ဘုရားဖြစ်လာဖို့အတွက် နောက်ဆုံးခြေလှမ်းအဖြစ် အသုံးချခံရလိမ့်မယ်။
"မဖြစ်ဘူး! ငါ့ကံကြမ္မာကို မဖြစ်မနေ ပြောင်းလဲပစ်ရမယ်!"
ယဲ့ဝမ်က မကျေနပ်မှုအပြည့်နဲ့ ဟိန်းဟောက်လိုက်တယ်။
အဲဒီအချိန်မှာပဲ သူ့စိတ်ထဲကို အသံတစ်သံ ရုတ်တရက် ပေါ်လာတယ်။
[ကံကြမ္မာတိုက်ပွဲ စတင်ပါပြီ။ လက်ခံပါသလား။]
[လက်ခံသည် - ငြင်းပယ်သည်]
"ကံကြမ္မာတိုက်ပွဲ အဲဒါက ဘာကို ဆိုလိုတာလဲ..."
ယဲ့ဝမ်က အံ့အားသင့်သွားတယ်။
[ဒီတိုက်ပွဲဟာ သင်နဲ့ ထန်ဆန်းကြားက ကံကြမ္မာတိုက်ပွဲ ဖြစ်ပါတယ်။ စည်းမျဉ်းများမှာ ထန်ဆန်းကို သင် သတ်ဖြတ်ခွင့်မရှိပါ။ ထန်ဆန်းကို ကျင့်ကြံနိုင်စွမ်း လုံးဝမရှိတော့တဲ့ လူတစ်ယောက်အဖြစ်လည်း ပြောင်းလဲပစ်ခွင့်မရှိပါ။ ထန်ဆန်းရဲ့ ကြီးထွားမှုနဲ့ ဖွံ့ဖြိုးတိုးတက်မှုကို လွှမ်းမိုးဖို့၊ ဝင်ရောက်စွက်ဖက်ဖို့အတွက် နည်းလမ်းမျိုးစုံကို အသုံးပြုနိုင်ပါတယ်။ ဒါပေမဲ့ ထန်ဆန်းဟာ ပင်လယ်နတ်ဘုရား စမ်းသပ်မှုကိုးဆင့်မှာ ပါဝင်ပြီး ပင်လယ်နတ်ဘုရားရဲ့ အဋ္ဌမမြောက်စမ်းသပ်မှုအထိ ရောက်ရှိလာဖို့ကိုတော့ သေချာပေါက် အာမခံရပါမယ်။]
[ထန်ဆန်း ပင်လယ်နတ်ဘုရားရဲ့ အဋ္ဌမမြောက်စမ်းသပ်မှုကို စတင်တဲ့အချိန်မှာ ကံကြမ္မာတိုက်ပွဲ တရားဝင် စတင်ပါမယ်။ သင် ထွက်ပြေးလို့မရပါ။ ပင်လယ်နတ်ဘုရားရဲ့ အဋ္ဌမမြောက်စမ်းသပ်မှုအတွင်း ထန်ဆန်းကို မဖြစ်မနေ သတ်ဖြတ်ရပါမယ်။ အောင်မြင်ပါက နတ်ဘုရားတစ်ပါးရဲ့ အမွေအနှစ်ကို ရရှိပါမယ်။ မအောင်မြင်ပါက သေဆုံးပါမယ်။]