အခန်း (၄၄) - လီချန်အန်း၏ တင်ပြချက်

"ကောင်းပြီလေ... အကြောင်းပြချက်ကအဓိပ္ပာယ်မရှိဘူးဆိုမှတော့ ဝူဟွန်းနန်းတော်ကနေ တရားဝင်အသိအမှတ်ပြုတဲ့ သန့်စင်သောသားတော် ဖြစ်လာဖို့ လီချန်အန်း... မင်းကို တစ်နှစ်အတွင်း ကိုယ့်ကိုယ်ကိုယ် သက်သေပြဖို့ အချိန်ကန့်သတ်ပေးလိုက်တယ်"

နန်းတော်အနောက်ဘက်ရှိ ပုပ်ရဟန်းမင်းကြီးနန်းဆောင်ဆီမှ ဘီဘီတုန်း၏ ခန့်ညားထည်ဝါလှသော အသံတော် ထွက်ပေါ်လာပြီး ပရိသတ်တစ်ခုလုံးဆီသို့ ပဲ့တင်ထပ်သွားသည် ဖြစ်ရာ လူတိုင်း စကားပြောခြင်းကို ချက်ချင်းရပ်တန့်လိုက်ကြတော့သည်။ သို့သော်လည်း လူတိုင်း၏ အကြည့်များမှာ လီချန်အန်း ဆီသို့ နည်းမျိုးစုံဖြင့် ရောက်ရှိနေကြလေသည်။ အချို့က အံ့အားသင့်နေကြပြီး၊ အချို့က မနာလိုဖြစ်နေကြကာ၊ အချို့ကမူ ဂုဏ်ပြုနေကြသည်...။

လူတိုင်း လူစုခွဲပြီး ထွက်ခွာတော့မည့်အချိန်တွင် လီချန်အန်း၏ နားထဲသို့ ဘီဘီတုန်း၏ စိတ်ချင်းဆက်သွယ်ကာ ပြောကြားလိုက်သော အသံတစ်သံ ရုတ်တရက် ရောက်ရှိလာသည်။

"ငါ့ဆီကို လာခဲ့ဦး"

လီချန်အန်းသည် သဘာဝကျစွာပင် မသွားဘဲ မနေရဲသည့်အပြင် အမြန်ဆုံးလည်း သွားချင်နေသည် ဖြစ်ရာ ရှုပ်ထွေးနေသည့် အခြေအနေကို အခွင့်ကောင်းယူကာ အကြောင်းပြချက်တစ်ခု ပေးပြီး ပုပ်ရဟန်းမင်းကြီးနန်းဆောင်ဆီသို့ တန်းတန်းမတ်မတ် ဝင်ရောက်သွားခဲ့သည်။

ပင်မခန်းမဆောင်ကြီးထဲတွင် ဘီဘီတုန်းသည် အလယ်ဗဟို ပလ္လင်ထက်၌ ထိုင်နေပြီး သူမ၏ဘေးတွင်မူ ဂန္ဓမာပန်းဝိညာဉ် မတ်တပ်ရပ်နေသည်။ လီချန်အန်း ဝင်လာသည်ကို မြင်သောအခါ ဂန္ဓမာပန်းဝိညာဉ်က လီချန်အန်းကို မျက်ခုံးပင့်ပြပြီး အားပေးသည့် အပြုံးတစ်ခု ပြုံးပြလိုက်သည်။ ဘီဘီတုန်းကမူ လီချန်အန်းကို အနည်းငယ် မကျေနပ်သော အမူအရာဖြင့် ကြည့်နေသည်။

"ဝိညာဉ်စွမ်းအားကို မြန်မြန်ပြန်ဖြည့်တင်းပေးနိုင်တဲ့ ဝိညာဉ်အမြုတေ ရှိနေတာက အမှန်ပဲ၊ ပြီးတော့ မင်းမှာ အင်အားကြီးတဲ့ ဝိညာဉ်စွမ်းအား ရှိနေတာလည်း အမှန်ပဲ... ဒါပေမဲ့ အဲဒါကို အလွန်အကျွံ အားမစိုက်ဖို့ ငါမင်းကို ပြောထားတယ် မဟုတ်လား၊ အခု မင်းရဲ့ ဝိညာဉ်အမြုတေက ဘယ်လောက်တောင် မတည်မငြိမ် ဖြစ်နေလဲဆိုတာ မင်းမသိဘူးလား"

ဘီဘီတုန်းသည် လီချန်အန်း ဝင်လာသည်နှင့်တစ်ပြိုင်နက် ဆူပူကြိမ်းမောင်းလိုက်သော်လည်း သူမ၏ အမူအရာမှာ တကယ်ဒေါသထွက်နေပုံမရဘဲ စိုးရိမ်ပူပန်နေသည့်ပုံ ပေါက်နေသည်။

"ကျွန်တော် တောင်းပန်ပါတယ် ဆရာမ... ကျွန်တော် မှားသွားပါတယ်"

လီချန်အန်းသည် မည်သို့မျှ ပြန်လည်ငြင်းဆန်ခြင်း သို့မဟုတ် ဆင်ခြေပေးခြင်းမရှိဘဲ ခန္ဓာကိုယ်ကို ကိုးဆယ်ဒီဂရီအထိ ညွတ်ကိုင်းကာ မိမိ၏အမှားကို လေးလေးနက်နက် ဝန်ခံလိုက်သည်။

ဒါကတော့ လီချန်အန်း၏ လောကအလယ်တွင် ကျင်လည်သည့် နည်းလမ်းပင် ဖြစ်သည်။ မိမိဘက်က မှားနေသည်မှာ ထင်ရှားပြီး တစ်ဖက်လူကလည်း မိမိကို စိုးရိမ်နေသည့်အချိန်တွင် လိုက်လံငြင်းခုံနေခြင်းမှာ ကျိုးကြောင်းဆီလျော်မှု မရှိပေ။ ထို့အပြင် အမျိုးသမီးတစ်ယောက်နှင့် ကျိုးကြောင်းဆင်ခြင်ပြရန် လီချန်အန်းအနေဖြင့် မတတ်နိုင်သလို လုပ်လည်းမလုပ်ချင်ပါ။

ထို့အပြင် သူ၏ လက်ရှိအခြေအနေမှာ အမှန်တကယ်ပင် အလွန်ဆိုးရွားနေသည်။ ဝိညာဉ်အမြုတေကို အဆက်မပြတ် လည်ပတ်စေခဲ့ခြင်းကြောင့် အမှန်တကယ်ပင် ဝန်ပိနေခဲ့ပြီ ဖြစ်သည်။ အကယ်၍ သူ့ကို ကူညီပေးမည့် ကျွမ်းကျင်ပညာရှင်သာမရှိပါက နာတာရှည်ရောဂါစွဲကပ်ကျန်ရစ်ခဲ့မည်မှာ သေချာသည်။

"ဟင်း... ငါနဲ့အတူ အခန်းထဲကို လိုက်ခဲ့၊ ငါမင်းကို ပြန်ပြီး ပြုပြင်ထိန်းညှိပေးမယ်"

ဘီဘီတုန်းသည် လီချန်အန်း၏ ဖြစ်ပျက်ပုံကို မြင်သောအခါ ဆက်လက်၍ မဆူပူတော့ဘဲ သက်ပြင်းတိုးတိုးတစ်ချက်ချကာ ခန်းမအပြင်ဘက်သို့ လျှောက်လှမ်းသွားသည်။ လီချန်အန်းသည် ဘွဲ့အမည်ရှိဝိညာဉ် နှစ်ယောက်ကို အမြန် နှုတ်ဆက်လိုက်ပြီးနောက် ချက်ချင်းပင် နောက်ကနေ လိုက်သွားခဲ့သည်။

အမှန်အတိုင်းပြောရလျှင် သူသည် ထိုကုတင်ကြီးကို အလွန် လွမ်းဆတ်နေခဲ့ပြီး ယနေ့တွင်လည်း သူ့ကို စိတ်လှုပ်ရှားစေမည့် အဝတ်အစားများ ရှိနေမလားဆိုသည်ကို မသိတော့ပေ...။

သို့သော်လည်း ယနေ့တွင် ဘီဘီတုန်း၏ ကုတင်မှာ အလွန် သန့်ရှင်းသပ်ရပ်နေပြီး မည်သည့် ထူးခြားဆန်းပြားမှုမျှ ရှိမနေခဲ့ပါ။ သို့သော်လည်း လီချန်အန်းသည် အလွန် ကျေနပ်နှစ်သိမ့်စွာဖြင့် ကုတင်ပေါ်တွင် ထိုင်လိုက်ပြီး ဘီဘီတုန်းကို သူ၏ခန္ဓာကိုယ်အား ပြုပြင်ထိန်းညှိပေးစေကာ ဝိညာဉ်အမြုတေကို တည်ငြိမ်အောင် လုပ်ဆောင်စေသည်။

ဘီဘီတုန်း၏ အင်အားမှာ အမှန်တကယ်ပင် ကြောက်မက်ဖွယ်ကောင်းလှသည်ဟု ပြောရမည် ဖြစ်သည်။ ဘီဘီတုန်း၏ အစွမ်းထက်လှသော ဝိညာဉ်စွမ်းအားကြောင့် လီချန်အန်း၏ ဝိညာဉ်အမြုတေမှာ လျင်မြန်စွာ တည်ငြိမ်သွားပြီး လီချန်အန်းထံမှ သက်တောင့်သက်သာရှိလွန်း၍ ညည်းတွားသံတစ်သံပင် ထွက်ပေါ်လာခဲ့သည်။

"အား... အင်း... ဟူး..."

လီချန်အန်းက ဟန်ဆောင်နေခြင်း မဟုတ်ဘဲ ဘီဘီတုန်း၏ ကုသပေးမှုက သူ့ကို အမှန်တကယ်ပင် အလွန် ဇိမ်ကျစေသောကြောင့် ဖြစ်သည်။

"ချန်အန်း... အမှန်အတိုင်းပြောရရင် မင်းက ဒီတစ်ကြိမ်မှာ ဆရာ့ကို တကယ် အံ့အားသင့်အောင် လုပ်နိုင်ခဲ့တယ်၊ နောက်နောင် ဒီလိုအခြေအနေမျိုးမှာ အသက်နဲ့လဲပြီး အားမစိုက်ပါနဲ့" ဘီဘီတုန်းက ထိုအချိန်တွင် ပြောလိုက်သည်။ "သန့်စင်သောသားတော် ရာထူးထက်... ဆရာမက မင်းရဲ့ ခန္ဓာကိုယ်နဲ့ အခြေခံအုတ်မြစ် ပျက်စီးသွားမှာကို ပိုပြီး စိုးရိမ်တယ်၊ နားလည်လား"

ဘီဘီတုန်းသည် လီချန်အန်းကို ပထမဆုံး တပည့်အဖြစ် လက်ခံခဲ့စဉ်က သူ၏ ဝိညာဉ်လက်နက်နှစ်ခုပိုင်ရှင် ဖြစ်မှုကြောင့် ဖြစ်သော်လည်း၊ အတူတကွ နေထိုင်ခဲ့သည့် နှစ်လတာ ကာလအတွင်းမှာတော့ ဘီဘီတုန်းသည် လီချန်အန်းကို မိသားစုဝင်တစ်ယောက်ကဲ့သို့ စိတ်ရင်းမှန်ဖြင့် ဆက်ဆံလာခဲ့ပြီ ဖြစ်သည်။ သူမသည် ဂရုစိုက်မှုများစွာကို ရရှိခဲ့ဖူးပြီး စားသောက်သည်မှာလည်း တောင်ပင်လယ်အလှုအတန်းကဲ့သို့ ကောင်းမွန်လှသော အစားအစာများ ဖြစ်သော်လည်း၊ လီချန်အန်း ထံမှတော့ စိတ်ရင်းမှန်ကို ခံစားရသည်...။

"တောင်းပန်ပါတယ် ဆရာမ... နောက်နောင် ဆရာမကို စိုးရိမ်အောင် မလုပ်တော့ပါဘူး"

လီချန်အန်းသည် တစ်ကိုယ်လုံး လှည့်လိုက်ပြီး သူ၏ခေါင်းကို ဘီဘီတုန်း၏ နူးညံ့လှသော ပေါင်ပေါ်သို့ တင်ကာ မှီလိုက်ရင်း မျက်ဝန်းများထဲတွင် အပြစ်ကင်းစင်မှုများ ပြည့်နှက်နေသည်။

ဘီဘီတုန်းသည် အစပိုင်းတွင် အနည်းငယ် အံ့အားသင့်သွားသော်လည်း လီချန်အန်းက သူမ၏ ပေါင်ပေါ်တွင် လှဲလျောင်းလိုက်ပြီးနောက်တွင်မူ စက်ဆုပ်ရွံရှာခြင်းမရှိဘဲ အမိတစ်ယောက်ကဲ့သို့ လီချန်အန်း၏ ခေါင်းကို နူးညံ့စွာ ပွတ်သပ်ပေးလိုက်သည်။

"ကျွန်တော်က တခြားသူတွေထက် မနိမ့်ကျဘူးဆိုတာကို သက်သေပြချင်ရုံတင်ပါ၊ ဆရာမကို ကာကွယ်ပေးနိုင်ဖို့ ပိုပြီး ကြိုးစားသွားမှာပါ... ဆရာမကို ရန်ပြုချင်တဲ့သူမှန်သမျှ ကျွန်တော်ရဲ့ အလောင်းကို ကျော်သွားရပါလိမ့်မယ်" လီချန်အန်းသည် ဘီဘီတုန်း၏ မျက်ဝန်းများကို စိုက်ကြည့်ကာ တည်ကြည်လေးနက်စွာ ပြောလိုက်သည်။

"ကောင်းပါပြီ... ဆရာမကို ကာကွယ်ပေးမယ့်အချိန်ကို ဆရာမ စောင့်နေပါ့မယ်"

ဘီဘီတုန်း၏ နှလုံးသားထဲတွင် နွေးထွေးမှုများ ပြည့်လျှံသွားပြီး လီချန်အန်း၏ ခေါင်းကို နူးညံ့စွာ ဆက်လက် ပွတ်သပ်ပေးရင်း တိုးညှင်းစွာ ပြောလိုက်သည်။

...

လီချန်အန်း မိမိအိမ်သို့ ပြန်ရောက်ပြီးနောက် မည်သည့်အချိန်မျှ ဖြုန်းတီးခြင်းမရှိဘဲ စာရွက်စာတမ်းများ ရေးသားရန်အတွက် အထူးပြုလုပ်ထားသော စာရွက်ကို ရှာဖွေကာ ကလောင်တံဖြင့် စတင် ရေးသားတော့သည်။

'ဝူဟွန်းနန်းတော်၏ ရေရှည်တည်တံ့သော ဖွံ့ဖြိုးတိုးတက်မှုဆိုင်ရာ လမ်းညွှန်ချက်များစွာ!'

မှန်ပေသည်... လီချန်အန်းသည် မိမိကိုယ်ကိုယ် သက်သေပြရန်အတွက် တစ်နှစ်တာ အချိန်ကို ကုန်လွန်ခံရန် အစီအစဉ်မရှိပေ။ ထိုအရာက အလွန် နှေးကွေးလွန်းလှသည်။ သူသည် သံပူခိုက်တွင် ရိုက်ရမည် ဖြစ်ရာ ဤစာရွက်စာတမ်းကို အသုံးပြု၍ မိမိကိုယ်ကိုယ် သက်သေပြရမည် ဖြစ်သည်။

ယခုအခါ သူသည် အာရုံစိုက်ခြင်းကို ခံနေရပြီ ဖြစ်သဖြင့် ပို၍ပင် ရဲရဲဝံ့ဝံ့ လုပ်ဆောင်ရန် ဆုံးဖြတ်လိုက်သည်။ မူလက ဤအတွေးအခေါ်များသည် လီချန်အန်းအတွက် ယခုအချိန်တွင် အနည်းငယ် စောလွန်းနေသေးသော်လည်း၊ သူ့ကို နောက်ထပ် ဆယ်နှစ် သို့မဟုတ် ရှစ်နှစ်ခန့် စောင့်ဆိုင်းခိုင်းပါက သူ မစောင့်ချင်တော့သလို ဝူဟွန်းနန်းတော်ကလည်း ဆက်လက် မစောင့်ဆိုင်းနိုင်တော့သဖြင့် တစ်ခုခုကို တိုက်ရိုက် ထုတ်ပြလိုက်ခြင်း ဖြစ်သည်။

လီချန်အန်းသည် သူ၏ ယခင်ဘဝတွင် ဤကဲ့သို့သော အဆင့်မြင့် တင်ပြချက် အစီရင်ခံစာများစွာကို မြင်တွေ့ခဲ့ဖူးသည်။ ထို့အပြင် နောက်ထပ် အနှစ်သုံးသောင်းအတွင်း ဖြစ်ပျက်မည့် ဝိညာဉ်ကုန်းမြေ၏ ဇာတ်ကွက် အလားအလာကို သိရှိထားသဖြင့် လက်တွေ့အခြေအနေများအပေါ် အခြေခံ၍ ဖြစ်နိုင်ခြေရှိသော ဖွံ့ဖြိုးတိုးတက်မှု အစီရင်ခံစာကို တင်ပြရန် မခက်ခဲပေ။

ဥပမာအားဖြင့် ပြည်သူလူထုနှင့် ပတ်သက်၍ လီချန်အန်းက 'ပြည်သူ့ထံမှလာ၍ ပြည်သူ့ထံသို့ သွားခြင်း' ဟူသော အတွေးအခေါ်ကို တင်ပြခဲ့သည်။ သာမန်အရပ်သားများ၏ ဝိညာဉ်လက်နက် နိုးထလာစေရန် ဆက်လက်ကူညီပေးခြင်းအပြင်၊ ဝူဟွန်းနန်းတော်၏ ခွဲထွက်ဌာနခွဲအသီးသီးမှ ဝိညာဉ်ဆရာများသည် မိမိတို့၏ ရာထူးဂုဏ်ဒြပ်များကို ဘေးဖယ်ထားကာ သာမန်ပြည်သူများထံသို့ သွားရောက်ရမည် ဖြစ်သည်။

ဥပမာအားဖြင့် အိုစာနာစာ အဖော်မဲ့ သက်ကြီးရွယ်အိုများကို ကူညီပေးခြင်းကဲ့သို့သော သေးငယ်သည့် ကိစ္စရပ်များမှစ၍၊ ပြည်သူလူထု၏ အသက်အိုးအိမ်စည်းစိမ်ကို အန္တရာယ်ပြုနေသည့် ဝိညာဉ်ဆရာများနှင့် ရွာထဲသို့ ကျူးကျော်ဝင်ရောက်လာသည့် ဝိညာဉ်သားရဲများကို ရှင်းလင်းဖယ်ရှားပေးခြင်းကဲ့သို့သော ကြီးမားသည့် ကိစ္စရပ်များအထိ ကူညီပေးရန်နှင့် ထို့နောက်တွင် ရွာများသို့ အခါအားလျော်စွာ သွားရောက်ကာ ဟောပြောပွဲများ ပြုလုပ်ပေးခြင်း၊ အသိပညာပေးခြင်းများကို လုပ်ဆောင်ရမည် ဖြစ်သည်။

ပထမဆုံး ကြည့်လိုက်ပါက ဤအရာမှာ အကျိုးအမြတ်မရှိဟု ထင်ရသော်လည်း၊ နှစ်အနည်းငယ် ကြာပြီးနောက် ဝူဟွန်းနန်းတော်က နိုင်ငံတော်တစ်ခု တည်ထောင်လိုသည့်အခါတွင် စည်းရုံးသိမ်းသွင်းရရှိမည့် ပြည်သူလူထု အရေအတွက်မှာ သံသယဖြစ်ဖွယ်မရှိဘဲ အလွန်အမင်း များပြားလှမည် ဖြစ်ကာ အင်ပါယာကြီးနှစ်ခု၏ ပြည်သူများသည် ဝူဟွန်းနန်းတော်ကို ရင်ဆိုင်ရန် မျက်နှာပျက်ကြလိမ့်မည် ဖြစ်သည်။ ဤအရာက အင်ပါယာကြီးနှစ်ခု၏ အခြေခံအုတ်မြစ်ကို တိုက်ရိုက် အားနည်းသွားစေမည် ဖြစ်သည်။

ဒါကတော့ လှည့်ကွက် အသေးစားလေးတစ်ခုသာ ဖြစ်သည်။ ပြည်သူလူထုနှင့် ပတ်သက်၍ လီချန်အန်းသည် အရေးအကြီးဆုံး ကဏ္ဍအဖြစ် စာမျက်နှာ ငါးမျက်နှာတိုင်တိုင် ရေးသားခဲ့သည်။

အခြားဥပမာတစ်ခုအနေဖြင့် စစ်ရေးကဏ္ဍတွင်မူ လီချန်အန်းသည် အထူးသုတေသန ရန်ပုံငွေများ ခွဲဝေချထားပေးရန်၊ ဝိညာဉ်လမ်းညွှန်ကိရိယာများကို လေ့လာရန်အတွက် သုတေသနအဖွဲ့အစည်းတစ်ခု တည်ထောင်ရန်နှင့် ကျရှုံးမှုကို မကြောက်သော သုတေသနမျိုးကို လုပ်ဆောင်ရန် အဓိကထား ရေးသားခဲ့သည်။

...

ဤအစီရင်ခံစာကို ငါးရက်တိုင်တိုင် ရေးသားခဲ့ရသည်။ လီချန်အန်းက အစီရင်ခံစာကို တင်ပြလိုက်သောအခါ ဘီဘီတုန်းသည် တစ်နေ့လုံး ထိုင်ကြည့်နေခဲ့သည်။

ဘီဘီတုန်း ကိုယ်တိုင် လုပ်ဆောင်နေသည့် အရာအချို့ ရှိသကဲ့သို့ အချို့အရာများမှာ လုံးဝ မျှော်လင့်မထားခဲ့မိသော အရာများ ဖြစ်သည်။ သို့သော်လည်း လီချန်အန်း၏ အစီရင်ခံစာမှာ အနှစ်ချုပ်တစ်ခုကဲ့သို့ ဖြစ်နေပြီး သူမ၏ အတွေးအခေါ်များစွာကို စနစ်တကျ ဖော်ပြထားသဖြင့် ဘီဘီတုန်းကို အံ့အားသင့် မင်သက်သွားစေခဲ့သည်။

ထို့နောက် ဘီဘီတုန်းသည် နောက်တစ်နေ့တွင် အကြီးအကဲများနန်းဆောင်သို့ ကိုယ်တိုင်သွားရောက်ကာ မဟာအကြီးအကဲ ချန်တောက်လျှိုနှင့် တွေ့ဆုံခဲ့သည်။ ထို့နောက်တွင် ဝူဟွန်းနန်းတော်၏ အမြင့်ဆုံးအဆင့် အစည်းအဝေးကို ကျင်းပခဲ့ကြသည်။

ထိုအစည်းအဝေးတွင် မည်သည့်အရာများကို ဆွေးနွေးခဲ့ကြသည်ကို မည်သူမျှ မသိရှိကြသော်လည်း လီချန်အန်းသည် အစိတ်အပိုင်းတစ်ခုတွင် ပါဝင်ရန် ခေါ်ယူခြင်းခံခဲ့ရပြီး မေးခွန်းအချို့ကို ဖြေကြားကာ 'ပါရမီရှင်' ဟူသော စကားလုံး၏ အဓိပ္ပာယ်မှာ မည်သို့ရှိသည်ကို လူတိုင်းအား ပြသခဲ့သည်။

တစ်ချိန်တည်းမှာပင် သူ၏ သန့်စင်သောသားတော် ရာထူးကိုလည်း တရားဝင် အတည်ပြုလိုက်ကြတော့သည်။

ထို့နောက်တွင် လျှို့ဝှက်ဆန်းကြယ်သော မြေအောက်သုတေသနအဖွဲ့အစည်းတစ်ခုကို မဟာဝိညာဉ်တောအုပ်၏ အောက်ခြေတွင် လျှို့ဝှက်စွာ စတင်တည်ထောင်ခဲ့ပြီး အချို့သော မူဝါဒများကိုလည်း နေရာအချို့တွင် စမ်းသပ်ပရောဂျက်များအဖြစ် အသံတိတ် စတင်အကောင်အထည်ဖော် ဆောင်ရွက်ခဲ့ကြလေသည်...။