အခန်း (၁၂) - ကျွန်တော်နဲ့ သင့်တော်တယ်လို့ ထင်တယ်

နာရီဝက်ခန့် ကြာပြီးနောက် နှစ်ယောက်သား စားသောက်ပြီး ဗိုက်ကားသွားကြသည်ဖြစ်၏။ ဘီဘီတုန်း သည် သစ်ပင်ကြီးတစ်ပင်အောက်တွင် ပြုံးပြုံးလေး ထိုင်နေရင်း သူမ၏ ချစ်စဖွယ် လျှာလေးကို ထုတ်၍ နှုတ်ခမ်းထောင့်က အသားစလေးများကို လျက်လိုက်သည်မှာ မြင်ရသူအဖို့ ရင်ခုန်စရာပင်။ ဘေးနားက လီချန်အန်း သည် ဘီဘီတုန်း ၏ မက်မွန်သီးကဲ့သို့ နီမြန်းနေသော နှုတ်ခမ်းလေးနှင့် လှုပ်ရှားနေသည့် လျှာလေးကို ကြည့်ပြီး ရင်ထဲတွင် တစ်မျိုးလေး ပူရှိန်းရှိန်း ဖြစ်သွားရပါသော်လည်း အမူအရာကိုတော့ ထိန်းထားရ၏။

"ချန်အန်း... ဘာကို ပြုံးပြီးကြည့်နေတာလဲ"

ဘီဘီတုန်း က လှမ်းကြည့်လိုက်သည့်အခါ လီချန်အန်း က သူမကို ကြည့်ပြီး တဟိဟိ ရယ်နေသည်ကို တွေ့တော့ ထူးဆန်းသွားပေသည်။ ခြောက်နှစ်သား ခန္ဓာကိုယ်ထဲတွင် ရင့်ကျက်သော ဝိညာဉ်တစ်ခု ရှိနေပြီး ထိုဝိညာဉ်က အတွေးပေါင်းစုံ တွေးနေသည်ကိုတော့ သူမ မည်သို့မျှ မသိနိုင်ပါပေ။

လီချန်အန်း သည် ဆရာမ၏ အသံကြားမှ အမူအရာကို ချက်ချင်း ပြင်လိုက်ပြီး အေးအေးဆေးဆေးပင် မေးလိုက်၏။ "ဆရာမ... ဒီတစ်ခါ အပြင်ထွက်တာက စိတ်အပန်းဖြေဖို့လို့ ပြောခဲ့တယ်ဆိုတော့... ဆရာမမှာ ဘာအခက်အခဲတွေ ရှိနေလို့လဲဆိုတာ ကျွန်တော့်ကို ပြောပြလို့ ရမလားဟင်"

အသားကင် အတူစားပြီးနောက်တွင်တော့ လီချန်အန်း သည် နတ်သမီးလေးနှင့် ပိုပြီး ရင်းနှီးသွားပြီဟု ခံစားရသဖြင့် ဆရာမကို ကူညီနိုင်မလားဆိုသည့် ရည်ရွယ်ချက်ဖြင့် တိုက်ရိုက်ပင် မေးလိုက်ခြင်း ဖြစ်သည်။ ဤအမျိုးသမီးသည် နောင်နှစ်အနည်းငယ်အထိ သူ၏ အကြီးမားဆုံးသော အားကိုးရာ ဖြစ်သလို၊ အနာဂတ်တွင်လည်း သူ၏ ဇနီးလောင်းဟု စိတ်ထဲက သတ်မှတ်ထားသည် မဟုတ်ပါလား။

ဘီဘီတုန်း က သူမ၏ ဆံနွယ်များကို သပ်ရင်း သက်ပြင်း ခပ်သဲ့သဲ့ ချလိုက်သည်။ လီချန်အန်း က သိပ်ပြီး ကူညီနိုင်မည်မဟုတ်ဟု ထင်ပေမယ့် စကားစပ်မိလာသဖြင့် သူမ မဖုံးကွယ်တော့ပေ။ "ဆရာမဘက်က အဓိက ပြဿနာကတော့ အကြီးအကဲများနန်းဆောင် နဲ့ ပတ်သက်တဲ့ ပဋိပက္ခပဲ။ ဆရာမ ပုပ်ရဟန်းမင်းကြီး ရာထူးကို ဆက်ခံပြီးကတည်းက ပြုပြင်ပြောင်းလဲမှုတွေ အများကြီး လုပ်ခဲ့တယ်။ ဝူဟွန်းနန်းတော် ကို အဆင့်သစ်တစ်ခုဆီ ပို့ဆောင်ဖို့ ကြိုးစားနေတာ။ ဒါပေမဲ့ ဆရာမရဲ့ စီမံကိန်းတွေကို အကြီးအကဲများနန်းဆောင် က အမြဲတမ်း ပယ်ချနေတာကြောင့် အလုပ်တွေ အများကြီး လုပ်လို့မရ ဖြစ်နေရတယ်..."

ဘီဘီတုန်း က လီချန်အန်း နားလည်အောင် ရိုးရိုးရှင်းရှင်းပင် ပြောပြသည်။ လီချန်အန်း ကတော့ အာရုံမလွင့်ဘဲ သေသေချာချာ နားထောင်နေ၏။ သူ၏ ယခင်ဘဝ အတွေ့အကြုံအရ ဆိုလျှင်တော့ ဘီဘီတုန်း သည် တကယ့်ကို ထက်မြက်သော ခေါင်းဆောင်တစ်ယောက် ဖြစ်သည်။ သူမသည် ဝူဟွန်းနန်းတော် ကို ပိုပြီး မြင့်မားသော နေရာဆီ ပို့ဆောင်ချင်သော်လည်း ချန်တောက်လျို ဦးဆောင်သည့် ရှေးရိုးစွဲ အကြီးအကဲများနန်းဆောင် ကတော့ ၎င်းကို နားမလည်ကြပေ။ သူတို့က ဝူဟွန်းနန်းတော် သည် အခုပင် ဝိညာဉ်ကုန်းမြေ မှာ အင်အားအကြီးဆုံး ဖြစ်နေပြီဟု ယူဆကြပြီး သူမ၏ ပြုပြင်ပြောင်းလဲမှုများကို လုံးဝ လက်မခံကြခြင်း ဖြစ်သည်။

လီချန်အန်း သည် နားထောင်ရင်း မျက်လုံးမှိတ်ကာ စဉ်းစားနေ၏။ သမိုင်းတွင်လည်း အင်အားစုအသစ်နှင့် အဟောင်းတို့ ပဋိပက္ခဖြစ်သည့် ဥပမာများ အများကြီး ရှိခဲ့သလို ဖြေရှင်းနည်းများလည်း ရှိသည်။ သူက အထိရောက်ဆုံး နည်းလမ်းကို ရှာဖွေနေခြင်း ဖြစ်၏။ ဘီဘီတုန်း ကတော့ လီချန်အန်း မျက်လုံးမှိတ်ထားသည်ကို မြင်တော့ သူ အနားယူတော့မည်ဟု ထင်ပြီး မနှောင့်ယှက်တော့ပေ။ ဒီနေ့ ဒီစကားများကို ပြောလိုက်ရရုံနှင့်ပင် သူမ ရင်ထဲတွင် အတော်လေး ပေါ့ပါးသွားပါပြီ။ ဖြေရှင်းနည်းကိုတော့ သူမကိုယ်တိုင်တောင် မစဉ်းစားနိုင်ရာ၊ ကလေးငယ် လီချန်အန်း က ဘာလုပ်နိုင်မည်နည်းဟု တွေးထားသည်ဖြစ်၏။

ဒါပေမဲ့ ဘီဘီတုန်း မျက်လုံးမှိတ်ဖို့ ပြင်လိုက်သည့်အချိန်မှာပင် လီချန်အန်း က ရုတ်တရက် မျက်လုံးဖွင့်လိုက်သည်။ သူ၏ မျက်ဝန်းများထဲတွင် အသိဉာဏ်အလင်းများ တောက်ပနေပြီး အလွန်ပင် တည်ကြည်သော လေသံဖြင့် ပြောလိုက်၏။ "ဆရာမ... ဆရာမရဲ့ လက်ရှိ အကျပ်အတည်းကို ဖြေရှင်းဖို့ ကျွန်တော့်မှာ နည်းလမ်းတစ်ခု ရှိတယ်။ တကယ်တော့ ဆရာမအနေနဲ့ လူတစ်စုကို မွေးမြူရမယ်၊ လူတစ်စုကို ဆွဲဆောင်ရမယ်၊ ပြီးတော့မှ လူတစ်စုကို တိုက်ခိုက်ရမှာပါ"

"လူတစ်စုကို မွေးမြူမယ်၊ ဆွဲဆောင်မယ်၊ ပြီးမှ တိုက်ခိုက်မယ်? ချန်အန်း... မင်း ဘာကို ဆိုလိုတာလဲ ရှင်းပြပါဦး"

ဘီဘီတုန်း က အစကတော့ အမှတ်တမဲ့ နားထောင်မလို့ပင်၊ ဒါပေမဲ့ လီချန်အန်း ၏ စကားများက သူမကို ချက်ချင်း စိတ်ဝင်စားသွားစေသည်။

"ဟမ်း... ဆရာမ၊ လူရှိတဲ့နေရာမှာ အားပြိုင်မှုတွေ ရှိတာ သဘာဝပါပဲ။ လူတစ်စုကို မွေးမြူရမယ် ဆိုတာက ဆရာမရဲ့ လူယုံတွေကို အကြီးအကဲများနန်းဆောင် ထဲကို ရောက်အောင် ပို့ဆောင်ရမယ်လို့ ဆိုလိုတာပါ။ လူတစ်စုကို ဆွဲဆောင်ရမယ် ဆိုတာကတော့ ကြားနေဖြစ်တဲ့ အကြီးအကဲတွေကို ဆရာမဘက် ပါလာအောင် လုပ်ဖို့ပါ။ သူတို့ ဆရာမကို ထောက်ခံဖို့ မလိုပါဘူး၊ ကြားနေပေးဖို့ပဲ လိုပါတယ်။ ဒါဆိုရင် ဆရာမရဲ့ ရန်သူတွေက အလိုလို နည်းသွားမှာပေါ့..."

[ ဒင်! ဘီဘီတုန်း ရှေ့တွင် အောင်မြင်စွာ ထုတ်ဖော်နိုင်ခဲ့သည့်အတွက် ရမှတ် +၂၂ ရရှိပါသည်။ ]

လီချန်အန်း ၏ ရှင်းပြချက်ကို နားထောင်ရင်း ဘီဘီတုန်း သည် အစတွင် သံသယဖြစ်နေပေမယ့် နောက်တော့ အံ့သြသွားပြီး နောက်ဆုံးတွင်တော့ အလင်းပွင့်သွားပါတော့သည်။ ဤသို့သော ဖြေရှင်းနည်းမျိုးကို သူမ တစ်ခါမှ မစဉ်းစားမိခဲ့ပေ။ လီချန်အန်း ၏ စကားများက သူမအတွက် ကမ္ဘာသစ်တစ်ခုကို ဖွင့်ပေးလိုက်သလိုပါပဲ။ ဥပမာ ဂိုဏ်းများနှင့် ပတ်သက်သည့် ပြဿနာများကိုလည်း ဤနည်းဖြင့် ဖြေရှင်းလို့ ရသည်မဟုတ်ပါလား။ ဤသို့တွေးမိတော့ သူမသည် လီချန်အန်း ကို တစ်မျိုးလေး ကြည့်လိုက်မိသည်။ ထိုအကြည့်ထဲတွင် ချီးကျူးမှု ၆ ပုံ၊ စပ်စုချင်မှု ၃ ပုံနှင့် အံ့သြမှု ၁ ပုံ ပါဝင်နေ၏။ သူမ ဤတပည့်လေးအပေါ် ပိုပိုပြီး စိတ်ဝင်စားလာပါပြီ။

လီချန်အန်း စကားပြောလို့ ပြီးသည့်အခါမှာတော့ ဘီဘီတုန်း သည် လီချန်အန်း အနားသို့ လျှောက်လာပြီး သူ၏ ခေါင်းလေးကို အသာအယာ ပုတ်ရင်း နူးညံ့စွာ ပြောလိုက်၏။ "ကျေးဇူးတင်ပါတယ်..."

လီချန်အန်း သည် ဘီဘီတုန်း ၏ ဖိအားများ လျော့ကျသွားသည်ကို ခံစားလိုက်ရပြီး သူမ တစ်ကိုယ်လုံး ပေါ့ပါးလန်းဆန်းသွားသည်ကို မြင်တော့ သူလည်း ဝမ်းသာမိသည်။ သူ ကိုယ့်ကိုယ်ကိုယ် ကျေနပ်နေစဉ်မှာပင် ရုတ်တရက် လေပြင်းတစ်ချက် တိုက်ခတ်လာပြီး တစ်စုံတစ်ခုက သူ့ဆီကို ဦးတည်နေသည်ကို ခံစားလိုက်ရ၏။

လီချန်အန်း လှုပ်ရှားဖို့ ပြင်လိုက်သည့်အချိန်မှာပင် တစ်စုံတစ်ယောက်က သူ့ကို ချီလိုက်သည်ကို ခံစားလိုက်ရပြီး သင်းပျံ့နူးညံ့သော ခန္ဓာကိုယ်တစ်ခုနှင့် ကပ်လျက်သား ဖြစ်သွားသည်။ ထို့နောက် ဘီဘီတုန်း ၏ မြင့်မြတ်သောအသံကို ကြားလိုက်ရ၏။ "ဖယ်စမ်း!"

သူမ၏ စကားအဆုံးမှာပင် ပြေးဝင်လာသော အရှိန်အဝါများမှာ တစ်ခါတည်း ပျောက်ကွယ်သွားပါတော့သည်။ ဘီဘီတုန်း သည် လီချန်အန်း ကို မြေပြင်ပေါ် ပြန်ချပေးပြီး အားနာသည့် လေသံဖြင့် ပြော၏။ "ချန်အန်း... ဆရာမ တောင်းပန်ပါတယ်။ ခုနက အတွေးလွန်သွားလို့ အရှိန်အဝါကို ထုတ်မထားမိဘူး။ အဲ့ဒါကြောင့် ဝိညာဉ်သားရဲက အခွင့်ကောင်းယူပြီး ပြေးဝင်လာတာ၊ မင်း ဘာမှ မဖြစ်ဘူးမလား"

လီချန်အန်း က ခေါင်းခါပြလိုက်သည်။ ရင်ထဲတွင် နည်းနည်း ပူသွားသည်ကလွဲ၍ ဘာမှမဖြစ်ပေ။ ဘီဘီတုန်း က စိတ်အေးသွားပြီးနောက် ချုံပုတ်ထဲတွင် လဲနေသည့် ဝိညာဉ်သားရဲကို သွားကြည့်ကြသည်။ ထိုသားရဲသည် အသက်ရှူ အလွန်အားနည်းနေပြီး သေတော့မည့် အခြေအနေ ဖြစ်နေပါပြီ။ ၎င်းသည် ကျားနှင့်တူသော်လည်း ကျားထက် ပိုပြီး သန်မာထည်ဝါသလို တစ်ကိုယ်လုံးလည်း ဆီးနှင်းလို ဖြူဖွေးနေ၏။ အံ့သြဖို့ကောင်းသည်မှာ ထိုသားရဲ၏ မျက်လုံးများမှာ နီလာရောင်လို ပြာလဲ့နေခြင်းပင်။

"ဒါက နှစ်ပေါင်း တစ်ထောင်သက်တမ်းရှိတဲ့ နီလာမျက်လုံးကျားဖြူ ပဲ။ ၎င်းရဲ့ သွေးမျိုးဆက်ကလည်း တကယ့်ကို မြင့်မြတ်တဲ့ သားရဲဘုရင် မျိုးဆက်ပဲ။ ဒါဟာ မဟာဝိညာဉ်တောအုပ် ရဲ့ ရတနာလို ဝိညာဉ်သားရဲမျိုးမို့လို့၊ မဟုတ်ရင် ငါ တစ်ခါတည်း သတ်ပစ်လိုက်မှာ" ဟု ဘီဘီတုန်း က ရှင်းပြသည်။ သူမ၏ တုံ့ပြန်မှုမှာ အလွန်မြန်သဖြင့် လီချန်အန်း ကို ကယ်တင်လိုက်သည့် ခဏမှာပင် ဤသားရဲကို သူမ မြင်လိုက်ခြင်းဖြစ်သည်။ သူမသာ အရှိန်အဝါကို မထိန်းလိုက်လျှင် ဤသားရဲမှာ အခုလောက်ဆို သေနေလောက်ပါပြီ။

တောအုပ်တိုင်းတွင် တောဘုရင် ရှိစမြဲဖြစ်ပြီး ဤ နီလာမျက်လုံးကျားဖြူ သည်လည်း မဟာဝိညာဉ်တောအုပ် ၏ ဘုရင်ပင်။ ၎င်း၏ ကျင့်ကြံမှုမှာ တစ်ထောင်တန်းပဲ ရှိသေးသော်လည်း ၎င်း၏ သွေးမျိုးဆက်နှင့် အင်အားကြောင့် နှစ်ပေါင်း နှစ်ထောင်၊ သုံးထောင် သက်တမ်းရှိသော ဝိညာဉ်သားရဲများကိုပင် ယှဉ်နိုင်လေသည်။

"ဆရာမ... ဟုတ်တယ်၊ ဒီကျားဖြူက ကျွန်တော်နဲ့ တကယ့်ကို သင့်တော်တယ်လို့ ထင်တယ်..."

လီချန်အန်း က ယုံကြည်ချက်ရှိရှိ ပြောလိုက်ခြင်းဖြစ်သည်။ စနစ်ကလည်း ဤကျားဖြူ ပေါ်လာသည်နှင့် အသိပေးချက် ထုတ်ပြန်လိုက်သဖြင့် သူ ရဲရဲဝံ့ဝံ့ စမ်းသပ်ကြည့်ချင်နေခြင်း ဖြစ်၏။

"မဖြစ်ဘူး! ဒီကျားဖြူက သာမန် နှစ်ပေါင်း နှစ်ထောင်၊ သုံးထောင်ရှိတဲ့ သားရဲတွေနဲ့ အင်အားတူသလို ၎င်းရဲ့ သွေးမျိုးဆက်ကလည်း အလွန်ပြင်းထန်တယ်။ ဒါကို ငါ သဘောမတူဘူး!" ဟု ဘီဘီတုန်း က ပြတ်ပြတ်သားသား ငြင်းဆိုလိုက်ပါတော့သည်။