အခန်း (၇) - ပတ်ဝန်းကျင်ကို အတုယူ၍ ကျင့်ကြံခြင်း

ညွှန်ကြားရေးမှူးဆူးက ဆူးယွင်ထောင်းကို သိနေသည်။ မည်သို့ပင်ဆိုစေ နော့တန်မြို့ရှိ ဝိညာဉ်သခင် အသိုင်းအဝိုင်းက တော်တော်လေး သေးငယ်သည်မဟုတ်ပါလား။ ထို့ကြောင့် သူက နော့တန်မြို့ရှိ ဝိညာဉ်နန်းတော် ခွဲမှ တာဝန်ခံတစ်ယောက်ကို သိနေခြင်းက အံ့သြစရာတော့ မဟုတ်ပေ။ ထို့နောက် ညွှန်ကြားရေးမှူးဆူးက မေးလိုက်သည်။

"မိတ်ဆွေလေး ယဲ့လန် ၊ ဒါတွေကို ဘယ်လိုရောင်းချဖို့ စီစဉ်ထားလဲ"

"ညွှန်ကြားရေးမှူး၊ ကျွန်တော်က တစ်ရက်ကို သကြားလုံးသစ်သီးကြိုး တစ်ပွဲပဲ ပေးချင်ပါတယ်။ တစ်ပွဲမှာ သစ်သီးကြိုး ဆယ်ချောင်း ပါပါမယ်။ လောလောဆယ်တော့ တစ်ပွဲကို ရွှေဒင်္ဂါး ၁ ပြား ဈေးသတ်မှတ်ထားဖို့ စီစဉ်ထားတယ်။

ထမင်းစားဆောင်ကနေ ဘယ်လိုရောင်းမလဲ ဆိုတာကတော့ ညွှန်ကြားရေးမှူးဆူး သဘောပါပဲ။ ကျွန်တော်က အမြတ်ထဲကနေ တစ်ပြားမှ မလိုချင်ပါဘူး။ ညွှန်ကြားရေးမှူးအနေနဲ့ ကျွန်တော့်ကို အရင်းဈေး ရွှေဒင်္ဂါး တစ်ပြား ပေးရုံနဲ့တင် လုံလောက်ပါပြီ"

"ကောင်းပြီလေ။ ဒီဈေးနှုန်းက တော်တော်လေး မျှတပါတယ်။ ကျောင်းတော်အတွက်လည်း အမြတ်အစွန်း ရနိုင်မယ့် အနေအထား အများကြီး ကျန်သေးတာပဲ။ မြို့ထဲက မြင့်မြတ်တဲ့မျိုးနွယ်ဝင်တွေသာ ကျောင်းတော်ရဲ့ ထမင်းစားဆောင်မှာ တော်ဝင်အချိုပွဲ ရှိနေမှန်း သိသွားရင် ကျောင်းတော်ရဲ့ တံခါးဝကိုတောင် တက်နင်းကြိတ်ကြိတ်တိုးသွားနိုင်တယ်"

ညွှန်ကြားရေးမှူးဆူးက ကြားကြားချင်းပင် အမြတ်အစွန်းကို တွက်ချက်လိုက်ပြီး ကမန်းကတန်း သဘောတူလိုက်သည်။

ယဲ့လန် လည်း စိတ်သက်သာရာရသွားပြီးနောက် ဆက်ပြောလိုက်သည်။ "နောက်ကျရင် သကြားလုံးသစ်သီးကြိုး နောက်ထပ် အပွဲအနည်းငယ် ထပ်ပို့ပေးပါ့မယ်။ ညွှန်ကြားရေးမှူးဆူးအနေနဲ့ ကျောင်းတော်က တာဝန်ရှိသူတွေနဲ့ ဆရာတွေကို မြည်းစမ်းကြည့်ဖို့ ပေးလိုက်ပါ။ ပြီးတော့ သကြားလုံးသစ်သီးကြိုး ဈေးကွက်ကျယ်လာအောင် မြင့်မြတ်တဲ့မျိုးနွယ်ဝင် ကျောင်းသားတွေကိုလည်း ပိုရောင်းပေးပါ"

"မဆိုးဘူးပဲ။ ဘယ်လောက်ပဲ အရသာရှိတဲ့ အစားအစာဖြစ်နေပါစေ လူတွေသိဖို့တော့ လိုအပ်တာပေါ့"

ညွှန်ကြားရေးမှူးဆူးက ခေါင်းညိတ်လိုက်ပြီး သူ့ရင်ထဲတွင်တော့ သက်ပြင်းချလိုက်မိသည်။ ဆူးယွင်ထောင်းမှာ ဒီလောက်ပါးနပ်တဲ့ ဂျူနီယာတစ်ယောက်ရှိနေတာ တကယ်ကို ကံကောင်းတာပဲ။ ဝိညာဉ်သခင်တွေရဲ့ အရသာခံဖုတွေကို အရင်ဆုံး ဖွင့်ပေးလိုက်ခြင်းအားဖြင့် သူတို့အနေနဲ့ နောင်တစ်ချိန်မှာ ထပ်စားချင်ရင် ငွေပိုသုံးရတော့မည် ဖြစ်သည်။

---

ထို့နောက် ဆွေးနွေးမှုအပြီးတွင် ရဲ့လန်သည် ညွှန်ကြားရေးမှူးဆူး ပြင်ဆင်ပေးသော အစားအစာကို စားသောက်ခဲ့ပြီး အိပ်ဆောင်သို့ ပြန်ကာ ညွှန်ကြားရေးမှူးဆူးအတွက် သကြားလုံးသစ်သီးကြိုး ခြောက်ပွဲ ယူလာပေးခဲ့သည်။

ယဲ့လန် က ကျန်နေသည့် သကြားလုံးသစ်သီးကြိုး သုံးပွဲကိုတော့ အိပ်ဆောင် (၇) မှ ဝမ်ရှန်း နှင့် အခြားသူများကို ပေးလိုက်သည်။ အပိုပါလာသော သစ်သီးကြိုးများကိုတော့ အခြားသော မြင့်မြတ်သည့်မျိုးနွယ်ဝင် အိပ်ဆောင်များသို့ ပေးဝေရန် ဝမ်ရှန်းကို အကူအညီတောင်းလိုက်သည်။

ရက်အနည်းငယ်အတွင်းမှာပင် သကြားလုံးသစ်သီးကြိုးများ၏ နာမည်ကျော်ကြားမှုက နော့တန်မြို့ တစ်ခွင်သို့ ပျံ့နှံ့သွားခဲ့ပြီး နော့တန်ကျောင်းတော် မှ ထုတ်လုပ်သော မြင့်မြတ်သည့် အချိုပွဲတစ်ခု ဖြစ်လာခဲ့သည်။

မြင့်မြတ်သော အမျိုးသမီးများစွာက ကျောင်းတော်ရှိ မြင့်မြတ်သောမျိုးနွယ်ဝင် ကျောင်းသားများကို သကြားလုံးသစ်သီးကြိုး တစ်ပွဲလောက် မြည်းစမ်းခွင့်ရရန် ယူဆောင်လာပေးဖို့ တောင်းဆိုလာကြသည်။

သို့သော် သကြားလုံးသစ်သီးကြိုး ထုတ်လုပ်မှုက အကန့်အသတ်ရှိနေသည်။ ဝယ်လိုအားက ရောင်းလိုအားထက် ကျော်လွန်နေပြီး စားချင်သူများအနေဖြင့် အပိုငွေ အမြောက်အမြားသုံးကာ ဈေးကြီးပေး၍ ဝယ်ယူနေကြရသည်။

သို့ရာတွင် ယဲ့လန် ၌ သကြားလုံးသစ်သီးကြိုး ထုတ်လုပ်မှုကို တိုးမြှင့်ရန် မည်သည့်ရည်ရွယ်ချက်မှ မရှိပေ။

* ပထမအချက်အနေဖြင့် ၎င်းသည် ဆာလောင်မှု ဈေးကွက်ဖန်တီးခြင်း ဗျူဟာ ဖြစ်သည်။ သကြားလုံးသစ်သီးကြိုးများ အရမ်းများနေပါက ဈေးနှုန်းက မလွှဲမသွေ ထိုးကျသွားမည်ဖြစ်ပြီး မြင့်မြတ်သော ကျောင်းသားများနှင့် သူတို့၏ မိသားစုလူကြီးများက သကြားလုံးသစ်သီးကြိုးများကို ထူးခြားသည့်အရာတစ်ခုဟု မြင်ကြတော့မည် မဟုတ်ပေ။

* ဒုတိယအချက်မှာ သူသာ ငွေတွေအများကြီး ရှာနိုင်နေပါက အချို့သောသူများ၏ လောဘကို မလွှဲမသွေ ဆွဲဆောင်မိသလို ဖြစ်သွားမည်။ လက်ရှိအချိန်တွင် ယဲ့လန် ၌ ထိုအရာများကို ဖြေရှင်းနိုင်စွမ်း မရှိသေးပေ။ တစ်လလျှင် ရွှေဒင်္ဂါး ၃၀ ဝင်ငွေဆိုသည်က ဝိညာဉ်နန်းတော် ခွဲ၏ တာဝန်ခံတစ်ယောက်ဖြစ်သော ဆူးယွင်ထောင်း၏ အရှိန်အဝါအောက်တွင် မယိမ်းမယိုင် ထိန်းထားနိုင်သော်လည်း ယင်းထက် ပိုလာပါက ပြဿနာရှိလာနိုင်ပေသည်။ ဝိညာဉ်နန်းတော် က ဆူးယွင်ထောင်းကို ပေးသော လစဉ်ထောက်ပံ့ကြေးမှာ ရွှေဒင်္ဂါး ၃၀ ၏ သုံးပုံတစ်ပုံသာ ရှိကြောင်း သိထားရမည်။

* တတိယအချက်အနေဖြင့် ရဲ့လန်သည် ကျင့်ကြံရန်အတွက် လုံလောက်သော အချိန်ဖယ်ထားရန် လိုအပ်သည်။ယဲ့လန် သည် တုံလော်တိုက်ကြီး သို့ ရောက်လာခဲ့ခြင်းက ငွေရှာရန်မဟုတ်ဘဲ ကျင့်ကြံရန်အတွက်သာ ဖြစ်သောကြောင့် အဓိကအရာနှင့် သာမညအရာကို ပြောင်းပြန်မလုပ်နိုင်ပေ။

ထိုသို့ဖြင့် ယဲ့လန် သည် ငွေကြေးအတွက် စိတ်ပူနေခြင်းကို ရပ်တန်းကရပ်လိုက်ပြီး သိုင်းဝိညာဉ် ကျင့်ကြံခြင်းတွင်သာ စိတ်ရောကိုယ်ပါ မြှုပ်နှံထားလိုက်တော့သည်။

---

လွန်ခဲ့သော ဆယ်ရက်ခန့်ကစပြီး သကြားလုံးသစ်သီးကြိုးများ ပြုလုပ်ရန် အချိန်ယူရသည်မှအပ ယဲ့လန် သည် ကျင့်ကြံခြင်းမရှိသည့် အချိန်တိုင်း ကျောင်းတော်၏ စာကြည့်တိုက်ထဲတွင်သာ နစ်မြုပ်နေခဲ့သည်။ ကျောင်းတော်၏ စာသင်ခန်း သင်ကြားမှုက အခြေခံလွန်းနေသေးသဖြင့် ရဲ့လန်နှင့် မသင့်တော်ပေ။

စာကြည့်တိုက်တွင် ကိုယ်တိုင်လေ့လာခြင်းက အသိပညာများကို ပိုမိုလျင်မြန်စွာ စုပ်ယူနိုင်စေသည်။ ၎င်းသည် သူ၏ ယခင်ဘဝက စာမေးပွဲဦးတည်သော ပညာရေးစနစ်တွင် ကျင်လည်ခဲ့ရခြင်း၏ အားသာချက်များထဲမှ တစ်ခုလည်း ဖြစ်ပြီး သူ၏ ကိုယ်တိုင်လေ့လာသင်ယူနိုင်စွမ်းက အလွန်အားကောင်းနေခြင်းဖြစ်သည်။

ယဲ့လန် သည် ထူးဆန်းသော ပုံပြင်များ၊ ဝိညာဉ်သားရဲ စွယ်စုံကျမ်းများနှင့် ဤအခြားကမ္ဘာရှိ တိုက်ကြီး၏ သမိုင်းကြောင်းတို့ကို စိတ်ဝင်တစား ဖတ်ရှုခဲ့သည်။ စာကြည့်တိုက်ကို စီမံခန့်ခွဲသော အဘိုးအိုနှင့်လည်း သူ အတော်လေး ရင်းနှီးလာခဲ့သည်။ ထိုအဘိုးအိုက စာကြည့်တိုက်အတွင်းရှိ စာအုပ်များ ထားသိုမှုအစီအစဉ်ကို အလွန်ကျွမ်းကျင်စွာ သိရှိထားပြီး ယဲ့လန် စာအုပ်တစ်အုပ် ဖတ်ချင်တိုင်း အဘိုးအိုကို မေးလိုက်ရုံဖြင့် အတိအကျ နေရာကို ရှာတွေ့နိုင်သည်။

မည်သို့ပင်ဆိုစေ ယဲ့လန် သည် သူ၏ ယခင်ဘဝက အမြင်များ ရှိနေသဖြင့် စာအုပ်တိုင်း၏ အတိအကျနေရာကို မှတ်တမ်းတင်ရန် စာကြည့်တိုက် ကက်တလောက် တစ်ခု ဖန်တီးသင့်ကြောင်း အကြံပြုခဲ့သည်။

စာကြည့်တိုက်ရှိ အဘိုးအိုကတော့ ရယ်မောကာ လက်လျှော့လိုက်ပြီး "ဒါက တကယ်ကို ကောင်းမွန်တဲ့ အကြံဉာဏ်ပါပဲ။ ဒါပေမဲ့ လန်လေး ကလွဲရင် ကျောင်းတော်မှာရှိတဲ့ ဘယ်သူကမှ တစ်နှစ်နေလို့ စာကြည့်တိုက်ကို တစ်ခါတောင် လာမကြည့်ကြဘူး။ ကျောင်းတော်က နာမည်ကြီး မဟာသခင်ကြီး တောင် ဒီကိုလာခဲတယ်။ သူက ဒီနေရာကို အထင်သေးနေတာတောင် ဖြစ်နိုင်တယ်! ဒါကြောင့်မို့လို့ ဒီကက်တလောက် လုပ်မယ့်ကိစ္စကို နောင်လာနောက်သားတွေအတွက်ပဲ ချန်ထားခဲ့လိုက်ကြတာပေါ့" ဟု ပြောခဲ့သည်။

ယဲ့လန် လည်း တွေးကြည့်လိုက်ပြီး အမှန်ပင်ဖြစ်ကြောင်း နားလည်သွားသည်။ တုံလော်တိုက်ကြီး တွင် ဝိညာဉ်သခင် များကသာ အမြင့်မြတ်ဆုံး ဖြစ်နေဆဲဖြစ်သည်။ မိမိ၏ လက်သီးက ကြီးမားနေသရွေ့ မိမိပြောသမျှစကားကို အမှန်တရားအဖြစ် သတ်မှတ်ကြမည်သာ ဖြစ်သည်။ ထို့ကြောင့် တုံလော်တိုက်ကြီး ရှိ လူအများစုက ကျင့်ကြံရန်အတွက်သာ အလုပ်ရှုပ်နေကြပြီး အသိပညာ ဗဟုသုတ ရှာမှီးလိုစိတ် ကင်းမဲ့နေကာ သီအိုရီပိုင်းဆိုင်ရာ အသိပညာ ရှားပါးမှုများ ဖြစ်ပေါ်လာရသည်။

ယွီရှောင်ကန်း အနေဖြင့် ရိုးရှင်းသော ဝိညာဉ်ဆိုင်ရာ အဓိက သီအိုရီဆယ်ခု ကို အဆိုပြုခဲ့လျှင်တောင်မှ ၎င်းသည် အသိပညာကင်းမဲ့သော ဝိညာဉ်သခင် အများစုအတွက်တော့ အမှန်တရားအဖြစ် ရိုသေလေးစားခံရရန် လုံလောက်နေခဲ့ပြီ ဖြစ်သည်။

တုံလော်တိုက်ကြီး ရှိ လူအများစုမှာ အဆင့် ၃၀ သို့ မရောက်နိုင်ကြဘဲ လူအများစု၏ အဆင့်မှာ ယွီရှောင်ကန်း ထက်ပင် နိမ့်ကျနေသေးကြောင်း သိထားရမည်ဖြစ်သည်။

ဝိညာဉ်သူတော်စင် အထက်ရှိ အသိုင်းအဝိုင်းငယ်လေး ကတော့ သူတို့ မျိုးနွယ်စုများမှ လက်ဆင့်ကမ်းလာသည့် အတွေ့အကြုံများ ရှိကြသည်။ သူတို့က ယွီရှောင်ကန်း ၏ မဟာသခင်ကြီး ဆိုသည့် ဂုဏ်ပုဒ်ကို ငြင်းပယ်ကြမည် မဟုတ်ပေ။ မည်သို့ပင်ဆိုစေ ယွီရှောင်ကန်း ၏ နောက်ကွယ်တွင် အထက်ဂိုဏ်းကြီးသုံးခု တွင် ပါဝင်သည့် အပြာရောင်လျှပ်စီး အာဏာရှင်နဂါး မျိုးနွယ်စု ၏ ကျောထောက်နောက်ခံ ရှိနေသည်မဟုတ်ပါလား။ ထို့ကြောင့် "မဟာသခင်ကြီး" ဟု ထပ်ခါတလဲလဲ ခေါ်ဆိုမှုများကြားတွင် ယွီရှောင်ကန်း သည် တုံလော်တိုက်ကြီး ၏ နံပါတ်တစ် သီအိုရီမဟာသခင်ကြီး အဖြစ် အမည်ခံလာခဲ့သည်။

---

သူ၏ အာရုံကို ပြန်လည်သိမ်းဆည်းလိုက်ပြီးနောက် ယဲ့လန် သည် သူ၏ ကျင့်ကြံခြင်း တိုးတက်မှုကို အရှိန်မြှင့်ရန် ဆုံးဖြတ်လိုက်သည်။ လက်ရှိ ဖြည်းဖြည်းမှန်မှန် သွားနေသည့်နှုန်းဖြင့် ခြောက်နှစ်ကြာ၍ သူ ကျောင်းဆင်းချိန်ရောက်လျှင်တောင် အဆင့် ၁၀ သို့ ရောက်နိုင်ရန် မဖြစ်နိုင်ပေ။

သကြားလုံးသစ်သီးကြိုးများ ရောင်းရငွေဖြင့် ဝေလငါးသွားရည် ဝယ်ရန် ရန်ပုံငွေလည်း လုံလောက်စွာ စုဆောင်းမိနေပြီ ဖြစ်သည်။ ယခုအချိန်သည် သူ၏ ကျင့်ကြံခြင်း ပတ်ဝန်းကျင်ကို ပြောင်းလဲရမည့်အချိန် ဖြစ်သည်။ အိပ်ဆောင်ထဲမှာပင် နေ၍ ကျင့်ကြံနေပါက သူမည်မျှပင် ကြိုးစားစေကာမူ ကျင့်ကြံခြင်း အရှိန်က တိုးလာမည်မဟုတ်ပေ။

ငွေပြာမြက် ကို ပိုမိုလျင်မြန်စွာ ကျင့်ကြံနိုင်ဖို့ ဘယ်လိုလုပ်ရမလဲ။ သဘာဝတရားအရဆိုလျှင်တော့ ငွေပြာမြက် များပြားစွာရှိသော တောရိုင်းပတ်ဝန်းကျင်တွင် ကျင့်ကြံခြင်းပင် ဖြစ်သည်။ ၎င်းက သိုင်းဝိညာဉ် ပတ်ဝန်းကျင်ကို အတုယူ၍ ကျင့်ကြံခြင်းပင်တည်း။ တုံလော်တိုက်ကြီး တွင် အပေါများဆုံးအရာမှာ ငွေပြာမြက် များပင်ဖြစ်ပြီး နေရောင်ခြည်နှင့် မြေဆီလွှာ ရှိနေသရွေ့ ငွေပြာမြက် များ ရှင်သန်ကြီးထွားရန် နေရာရှိနေမည်သာ ဖြစ်သည်။

ထိုသို့ တွေးမိသည်နှင့် ယဲ့လန် သည် လက်ထဲမှ စာအုပ်ကိုချကာ စခန်းချပစ္စည်းများ ဝယ်ယူရန် မြို့ထဲသို့ တိုက်ရိုက် ပြေးသွားလေတော့သည်။ မည်သို့ပင်ဆိုစေ ပြင်ပပတ်ဝန်းကျင်သည် အိပ်ဆောင်နှင့် မနှိုင်းယှဉ်နိုင်ပေ။ ပတ်ဝန်းကျင်က ကြမ်းတမ်းပြီး ရဲ့လန်အနေဖြင့် အလဟဿ ဒုက္ခခံမည်မဟုတ်ပေ။

စာကြည့်တိုက်မှ ထွက်လာပြီးနောက် ယဲ့လန် သည် နော့တန်မြို့ ထဲသို့သွားကာ တဲတစ်ခု၊ ခြင်ဆေးခွေနှင့် ထိုင်ခုံကူရှင် အစရှိသည့် စခန်းချပစ္စည်းများကို ဝယ်ယူခဲ့သည်။

ယဲ့လန် သည် ကျောင်းတော်၏ နောက်ဘက်တောင်ကုန်းတွင် ကျင့်ကြံရန် စီစဉ်ထားသည်။ ထိုနေရာရှိ အပင်များက ထူထပ်ပြီး အပေါများဆုံးမှာလည်း ငွေပြာမြက် များသာ ဖြစ်သည်။ ပတ်ဝန်းကျင် အနည်းငယ် ကြမ်းတမ်းသည်မှအပ ၎င်းသည် ငွေပြာမြက် သိုင်းဝိညာဉ် ကျင့်ကြံရန်အတွက် အကောင်းဆုံးနေရာတစ်ခု ဖြစ်သည်။

---

စခန်းချပစ္စည်းများဝယ်ယူပြီး ကျောင်းတော်၏ နောက်ဘက်တောင်ကုန်းသို့ အပြေးအလွှား သွားရောက်ချိန်တွင် ညပင်ရောက်နေပြီ ဖြစ်သည်။

လမင်းကြီးက တောက်ပနေပြီး ကြယ်လေးများကတော့ ကြိုးတိုးကျဲတဲ သာရှိသည်။ ညအချိန်ကို အခွင့်ကောင်းယူ၍ ရဲ့လန်သည် ငွေပြာမြက် များ အစိမ်းလန်း အစိုပြည်ဆုံး နေရာကို ရွေးချယ်ကာ တဲထိုးလိုက်ပြီး ခြင်ဆေးခွေကို ထွန်းညှိလိုက်သည်။

ယဲ့လန် သည် မြက်ခင်းပေါ်တွင် တင်ပျဉ်ခွေထိုင်လိုက်ပြီး သူ၏ခန္ဓာကိုယ်ထဲမှ ဝိညာဉ်စွမ်းအား များကို လည်ပတ်စေလိုက်သည်။ မကြာမီမှာပင် အပြာရောင် မြက်ပင်ငယ်လေးများက ယဲ့လန် ၏ ခန္ဓာကိုယ်ထဲမှ အဆက်မပြတ် ထွက်ပေါ်လာခဲ့သည်။

ယဲ့လန် သည် မျက်လုံးများကို တင်းတင်းကျပ်ကျပ် မှိတ်ထားလိုက်ပြီး သူ၏ စိတ်အာရုံထဲရှိ တောရိုင်း ငွေပြာမြက် များကို တိတ်ဆိတ်စွာ ခေါ်ယူလိုက်သည်။

ခဏအကြာတွင် တောရိုင်း ငွေပြာမြက် များသည် ယဲ့လန် ၏ အနီးတစ်ဝိုက်သို့ ဖြည်းညင်းစွာ တွားသွားလာကြသည်။

ငွေပြာမြက် သိုင်းဝိညာဉ် ၏ အလင်းရောင်အောက်တွင် ငွေပြာမြက် များသည် ရွှင်လန်းတက်ကြွစွာ အားပေးနေသည့်အလား တိတ်ဆိတ်စွာ ယိမ်းနွဲ့နေကြသည်။

ယဲ့လန် ၏ အမှောင်ထုဖုံးလွှမ်းနေသော စိတ်အာရုံထဲတွင် ငွေပြာမြက် အလင်းရောင် အစက်အပြောက်လေးများက အနီးအနားတွင် တဖြည်းဖြည်း ပေါ်လာခဲ့သည်။ အထီးကျန်နေသော ဝိညာဉ်များက ငွေပြာမြက် အသစ်လေးတစ်ပင်ကို ကြိုဆိုနေကြသည့် ရွှင်လန်းမှုအဖြစ် ငွေပြာမြက် များ၏ အသိစိတ်ကို သူ ခံစားလိုက်ရသည်။

မကြာမီမှာပင် ငွေပြာမြက် များက ယဲ့လန်၏ တစ်ကိုယ်လုံးကို ဖုံးလွှမ်းသွားခဲ့သည်။ ယဲ့လန် ၏ ခန္ဓာကိုယ်အတွင်းရှိ သွေးကြောများထဲတွင် စုစည်းနေသော ဝိညာဉ်စွမ်းအား များက ပုံမှန်ထက် များစွာ ပိုမိုသက်ဝင်လှုပ်ရှားလာပြီး ငွေပြာ ဝိညာဉ်စွမ်းအား များက သူ၏ ဝမ်းဗိုက်ပိုင်းရှိ ဒန်ထျန်း ဆီသို့ တည့်မတ်စွာ တိုးဝင်သွားခဲ့သည်။

သို့ရာတွင် ယဲ့လန်က သူ၏ခန္ဓာကိုယ်အတွင်းမှ အပြောင်းအလဲများကို မခံစားမိခဲ့ပေ။ သူသည် ငွေပြာ အသိစိတ်ထဲတွင်သာ နစ်မြုပ်နေခဲ့သည်။ သူသည် အမှောင်ထုထဲမှ အထီးကျန်ကြယ်တစ်ပွင့်ကဲ့သို့ မှေးမှိန်သော အလင်းရောင်ကို ထုတ်လွှတ်ကာ အဝေးမှ ကြယ်များနှင့် အပြန်အလှန် တုံ့ပြန်နေသကဲ့သို့ ရှိသည်။

ကြယ်အနည်းငယ်သာ ရှိသော်လည်း ယဲ့လန် သည် ၎င်းတို့၏ အလင်းရောင်ကို သိမြင်နိုင်ဆဲဖြစ်သည်။ ဤကြယ်များ၏ အလင်းရောင်က ရဲ့လန်အပေါ်သို့ ထွန်းလင်းလာပြီး နွေးထွေးသော လျှပ်စီးကြောင်းထဲတွင် ရေချိုးနေရသကဲ့သို့ သူ၏တစ်ကိုယ်လုံးကို နွေးထွေးသွားစေသည်။