အပိုင်း (၁၀၉) - ငါ့ရဲ့ ဝိညာဉ်စွမ်းရည်က ဒီလောက်အထိတော့ အားမနည်းနိုင်ပါဘူး

ယွီထျန်းဟန် ဝှေ့ယမ်းလိုက်သော နဂါးလက်သည်းမှ ဧရာမ အပြာရောင် လျှပ်စီးကြောင်းကြီးတစ်ခု ချက်ချင်း စုစည်းထွက်ပေါ်လာပြီး ပတ်ဝန်းကျင်ရှိ လေထုမှာ ပြင်းထန်စွာ လိမ်တွန့်သွားကာ တဖြုန်းဖြုန်းနှင့် ပေါက်ကွဲသံများ ထွက်ပေါ်လာခဲ့သည်။

သို့သော် ဤအရာအားလုံးကို ယဲ့လန်၏ ရွှေရောင်မျက်လုံး များက ဖမ်းယူထားနိုင်ပြီး ယွီထျန်းဟန်၏ လွင့်ပျံနေသော နဂါးလက်သည်းမှ ထွက်ပေါ်လာသော ဧရာမ လျှပ်စီးလက်သည်းသည် ယဲ့လန်၏ အမြင်တွင်မူ ‘နှေးကွေးစွာ’ ချဉ်းကပ်လာနေသကဲ့သို့ ဖြစ်နေသည်။

ယဲ့လန်သည် ‘မိုးကြိုး နဂါး လက်သည်း’ ၏ ရိုက်ခတ်ခြင်းကို ခံရမည့် ဆဲဆဲ အချိန်တွင် -

ဘန်း!

ယဲ့လန်၏ ပုံရိပ်သည် ကွယ်ပျောက်သွားပြီး လျှပ်တစ်ပြက် ခြေလှမ်း ကို အသုံးပြုကာ ယွီထျန်းဟန်၏ နောက်ကျောဘက်သို့ ရောက်ရှိသွားခဲ့သည်။

“အရမ်း မြန်တာပဲ!” အော့စလိုနှင့် ယွီဖုန်းတို့က ချက်ချင်း ရေရွတ်လိုက်ကြသည်။ အမြန်နှုန်းအခြေခံစနစ် ဝိညာဉ်သခင်များဖြစ်ကြသည့်အတိုင်း ထို လျှပ်တစ်ပြက်အတွင်း ယဲ့လန်၏ အမြန်နှုန်းက မည်မျှအထိ ကြောက်စရာကောင်းသည်ကို သူတို့ အမှန်တကယ် ခံစားမိလိုက်ကြသည်။

တိုက်ပွဲ၏ အလယ်ဗဟိုတွင် ရှိနေသော ယွီထျန်းဟန်သည် ယဲ့လန် ကွယ်ပျောက်သွားသည်ကို သိလိုက်ရသည့် ချက်ချင်းမှာပင် သူ၏ မျက်နှာအမူအရာသည် အကြီးအကျယ် ပြောင်းလဲသွားခဲ့သည်။ နောက်တစ်စက္ကန့်တွင် ယွီထျန်းဟန်၏ လည်ပင်းနောက်ကွယ်မှ အမွေးအမှင်များ ထောင်ထလာပြီး ပြင်းထန်သော လေပြင်းတစ်ရပ် က သူ့နောက်ကျောဆီသို့ ဦးတည်လာနေသည်ကို ခံစားလိုက်ရသည်။

ယွီထျန်းဟန် ခေါင်းကို လှည့်ကြည့်လိုက်ရာ သွေးရွှေရောင် လခြမ်းကွေးတစ်ခုက သူ၏ နောက်ကျောကို တိုက်ခိုက်ရန် ရောက်ရှိနေပြီ ဖြစ်သည်။ ယွီထျန်းဟန်တွင် စဉ်းစားရန် အချိန်မရှိတော့သဖြင့် သူ၏ ဒုတိယ အစီအစဉ်ကိုသာ အသုံးပြုလိုက်ရတော့သည်။ ယဲ့လန်၏ ကန်ချက်က သူ့ကို ထိမှန်မည့် ချက်ချင်းမှာပင် သူ၏ နဂါးလက်သည်းပေါ်မှ ဒုတိယမြောက် အဝါရောင် ဝိညာဉ်ကွင်း ‘လျှပ်စီးကြောင်း’ က ချက်ချင်း တောက်ပသွားခဲ့သည်။

“ဖူး!!”

ယွီထျန်းဟန်၏ ပါးစပ်မှ လတ်ဆတ်သော သွေးတစ်လုပ် ပန်းထွက်သွားခဲ့ပြီး သွေးများ ထွက်လာပြီးနောက် -

ယွီထျန်းဟန်၏ ခန္ဓာကိုယ်ပေါ်မှ မြွေငယ်လေးများကဲ့သို့ ရှိနေသော လျှပ်စီးကြောင်းများသည် ချက်ချင်းပင် လျင်မြန်စွာ ကျယ်ပြန့်လာပြီး ရစ်ပတ်သွားကာ ရေတွက်၍မရသော မြွေအရွယ်အစားရှိ လျှပ်စီးမြားများအဖြစ်သို့ ပြောင်းလဲပြီး အရပ်မျက်နှာ အနှံ့အပြားသို့ ပေါက်ကွဲထွက်သွားခဲ့သည်!

ယဲ့လန်သည် ယွီထျန်းဟန်၏ နောက်ကျောကို ကန်လိုက်သည့် ချက်ချင်းမှာပင် သူ၏ ခြေထောက်များသည် လျှပ်စီးလှိုင်းများကြောင့် ထုံကျင်သွားခဲ့ပြီး ခန္ဓာကိုယ်အတွင်းရှိ လျှပ်စီးဝိညာဉ်စွမ်းအားများကို ဝိုင်းရံကာ ဖယ်ရှင်းပစ်ရန် သူ၏ ဝိညာဉ်စွမ်းအားကိုပင် လှည့်ပတ်ရန် အချိန်မရလိုက်ချေ။ နောက်တစ်စက္ကန့်တွင် ယဲ့လန်သည် ရေတွက်၍မရသော အပြာရောင် လျှပ်စီးစပါးအုန်းမြွေများ၏ ရစ်ပတ်ခြင်းကို ခံလိုက်ရသည်။ အရပ်မျက်နှာအနှံ့သို့ ပြေးထွက်နေသော လျှပ်စီးစပါးအုန်းမြွေများသည် ချက်ချင်းပင် ယဲ့လန်ထံသို့ ဦးတည်လှည့်လာခဲ့ကြသည်။

ယဲ့လန်၏ တစ်ကိုယ်လုံးရှိ ကြွက်သားများသည် လျှပ်စီးစပါးအုန်းမြွေများကြောင့် ကျုံ့ဝင်ကာ ထုံကျင်သွားပြီး စဉ်ဆက်မပြတ် တုန်ခါနေခဲ့သည်။ ယဲ့လန်သည် သူ၏ ဆဲလ်တိုင်းဆဲလ်တိုင်းကို လျှပ်စီးကြောင်းများက ရစ်ပတ်ထားသဖြင့် လျှပ်စီးလူသားတစ်ယောက် ဖြစ်သွားသကဲ့သို့ ခံစားလိုက်ရသည်။

ကံကောင်းသည်မှာ ယဲ့လန် လျှပ်စီးကြောင့် အကြောသေနေစဉ်မှာပင် ယွီထျန်းဟန်သည် ယဲ့လန်၏ ‘သွေးချပ်ဝတ် မိုးပျံကြယ်’ ကန်ချက်ကြောင့် မီတာဆယ်ဂဏန်းခန့် အဝေးသို့ လွင့်ထွက်သွားခဲ့ရသည်။

ယွီထျန်းဟန် လွင့်ထွက်သွားသည့် အချိန်လစ်ဟာမှုကို အခွင့်ကောင်းယူကာ ယဲ့လန်၏ ခန္ဓာကိုယ်အတွင်းမှ ငွေပြာမြက်သည် အသက်စွမ်းအားများအဖြစ်သို့ ရူးသွပ်စွာ ပြောင်းလဲသွားပြီး ခန္ဓာကိုယ်အတွင်းမှ ဆဲလ်များကို စတင် ပြုပြင်ပေးခဲ့သည်။ ပြီးတော့ ပြုပြင်နေစဉ်မှာပင် ခန္ဓာကိုယ်အတွင်းရှိ လျှပ်စီးဝိညာဉ်စွမ်းအားများကို စဉ်ဆက်မပြတ် ဝိုင်းရံဖျက်ဆီးပစ်နေခဲ့သည်။

ယခင်နှင့်မတူဘဲ ယခုတစ်ကြိမ် တစ်ကိုယ်လုံးကို ပြုပြင်နေစဉ်အတွင်း ယဲ့လန်သည် သူ၏ ခန္ဓာကိုယ်အတွင်းရှိ ငွေပြာဝိညာဉ်စွမ်းအားများသည် ပုံမှန်ထက် ပိုမို လှုပ်ရှားရုန်းကြွနေသည်ကို ခံစားလိုက်ရသည်။

ပွဲကြည့်စင်ပေါ်မှ အပြာရောင်ဆံပင်နှင့် မိန်းကလေးသည် သူ၏ သိုင်းဝိညာဉ်ကို ထုတ်ဖော်ပြီး ရှေ့သို့ လှမ်းရန် ပြင်လိုက်စဉ်မှာပင် မုန့်ရှူး က သူမကို တားဆီးရန် လက်လှမ်းလိုက်ပြီး “ယဲ့လင်လင်၊ စိတ်ပူစရာ မလိုပါဘူး။ ဒီနှစ်ယောက်ရဲ့ အသက်ရှင်သန်နိုင်စွမ်းက သာမန်ဝိညာဉ်သခင်တွေနဲ့ မတူဘူး။ သူတို့ သေချာပေါက် အဆင်ပြေမှာပါ!” ဟု ပြောလိုက်သည်။

ခေတ္တမျှ ဝေခွဲမရဖြစ်သွားပြီးနောက် အပြာရောင်ဆံပင်နှင့် မိန်းကလေးသည် သူမ ထုတ်ဖော်ရန် ပြင်နေသော ညာလက်ကို ပြန်လည် ချလိုက်တော့သည်။

“အဟွတ်! အဟွတ် အဟွတ်!”

ယွီထျန်းဟန်သည် ကြမ်းပြင်ပေါ်မှ ယိမ်းထိုးလျက် ထရပ်လိုက်ပြီး ချောင်းဆိုးကာ သွေးများ အော့အန်နေခဲ့သည်။ ယဲ့လန်က ဤမျှ ကြောက်စရာကောင်းသော ခွန်အားကို ထုတ်ဖော်နိုင်လိမ့်မည်ဟု သူ မမျှော်လင့်ထားခဲ့မိချေ။ သူ၏ နောက်ကျောမှာ နဂါးအသွင် ပြောင်းလဲမထားသဖြင့် ယဲ့လန်၏ သွေးရွှေရောင် လခြမ်းကွေး တိုက်ခိုက်မှုကြောင့် သူ အပြင်းအထန် ဒဏ်ရာရရှိသွားခဲ့ရသည်။

ကံကောင်းသည်မှာ သူ၏ သိုင်းဝိညာဉ်သည် အပြာရောင်လျှပ်စီး အာဏာရှင်နဂါး ဖြစ်ပြီး သူ၏ အသက်ရှင်သန်နိုင်စွမ်းက အလွန်တရာ ကောင်းမွန်လွန်းနေခြင်း ဖြစ်သည်။ ကယ်၍ ဤသွေးရွှေရောင် လခြမ်းကွေး တိုက်ခိုက်မှုသည် သာမန်တိုက်ခိုက်ရေးစနစ် ဝိညာဉ်သခင်တစ်ဦးကို ထိမှန်ခဲ့မည်ဆိုပါက ထိုသူသည် ချက်ချင်း မေ့လဲသွားလောက်သည်။

စက္ကန့်အနည်းငယ်ခန့် သွေးများ အော့အန်ပြီးနောက် ယွီထျန်းဟန်သည် နောက်ဆုံးတွင် ပြန်လည်သက်သာလာခဲ့သည်။ ယွီထျန်းဟန်သည် ယဲ့လန်ကို မော့ကြည့်လိုက်ပြီး သူ၏ ဒုတိယ ဝိညာဉ်စွမ်းရည်က ယဲ့လန်ကို ချက်ချင်း အလဲထိုးနိုင်ခဲ့ခြင်း ရှိ၊ မရှိ သိချင်နေခဲ့သည်။

‘လျှပ်စီးကြောင်း’ ဝိညာဉ်စွမ်းရည်သည် တစ်ဦးတည်းနှင့် အများ တိုက်ခိုက်ရသော အခြေအနေများတွင် အလွန် အသုံးဝင်လှသည်။ ထို့ပြင် ယခုတင် ယဲ့လန် တစ်ဦးတည်းကသာ ထို လျှပ်စီးကြောင်းများ အားလုံးကို ဆွဲဆောင်သွားခဲ့ခြင်း မဟုတ်ပါလား။

ထို့ကြောင့် ယွီထျန်းဟန်သည် ယဲ့လန်၏ အခြေအနေမှာလည်း သူနှင့် တန်းတူ သို့မဟုတ် သူ့ထက် ပို၍ ပြင်းထန်သော ဒဏ်ရာကို ရရှိထားလိမ့်မည်ဟု ယုံကြည်နေခဲ့သည်။

သို့သော် ယွီထျန်းဟန်ကို အံ့အားသင့်စေသည်မှာ ယဲ့လန်သည် သူ၏ ဆံပင်များ ထောင်ထနေသည်မှလွဲ၍ မည်သည့် ဒဏ်ရာမျှ မရရှိထားသကဲ့သို့ ကြည့်ကောင်းနေဆဲ ဖြစ်သည်။

“မဖြစ်နိုင်တာ!”

“ငါ့ရဲ့ ဝိညာဉ်စွမ်းရည်က ဒီလောက်အထိတော့ အားမနည်းနိုင်ပါဘူး!”

“ဘယ်လိုလုပ်ပြီး ဘာသက်ရောက်မှုမှ မရှိရတာလဲ! အဲဒါက နှစ်ခုနစ်ရာသက်တမ်းရှိတဲ့ နဂါးအမျိုးအနွယ် ဝိညာဉ်သားရဲကနေ ထွက်လာတဲ့ ဝိညာဉ်စွမ်းရည်ကွ!” ယွီထျန်းဟန်သည် လွန်စွာ စိတ်ပျက်လက်ပျက်ဖြင့် ကျယ်လောင်စွာ အော်ဟစ်လိုက်တော့သည်။

ယဲ့လန်သည် သူ၏ ဆံပင်ကို လက်ဖြင့် သပ်လိုက်မိသည်။ သူ၏ လက်ရှိ ဆံပင်စတိုင်မှာ ဆူပါဆိုင်းယန်းတစ်ယောက်နှင့် တူနေလောက်သည်။ ယဲ့လန်သည် ယွီထျန်းဟန် ထင်သကဲ့သို့ မည်သည့်ဒဏ်ရာမျှ မရရှိခဲ့ခြင်း မဟုတ်ပေ။ ယဲ့လန် ဒဏ်ရာရခဲ့သည်! သွေးချပ်ဝတ် ပြီးပြည့်စုံသော ခန္ဓာကိုယ်မှ ပေးစွမ်းသော ခံစစ်သည် လျှပ်စီး၏ စွမ်းအားရှေ့မှောက်တွင် မည်သည့် သက်ရောက်မှုမျှ မရှိခဲ့ချေ!

ယဲ့လန် အဆင်ပြေနေပုံပေါ်ရသည့် အကြောင်းရင်းမှာ သူ၏ ခန္ဓာကိုယ်အတွင်းရှိ ငွေပြာမြက်က လျှပ်စီးကြောင့် ဖြစ်ပေါ်လာသော စဉ်ဆက်မပြတ် ပျက်စီးမှုများကို ပြုပြင်ရန် အသက်စွမ်းအားများကို အဆက်မပြတ် ပြောင်းလဲပေးနေခဲ့သောကြောင့် ဖြစ်သည်။

အဆုံးစွန် အသက်စွမ်းအား ဖြစ်သည့်အတိုင်း ထိပ်တန်းတိုက်ခိုက်ရေးစနစ် ဝိညာဉ်အကြီးအကဲ တစ်ဦး၏ ဝိညာဉ်စွမ်းရည်များကြောင့် ဖြစ်ပေါ်လာသော ဒဏ်ရာကိုပင် လုံးဝဥဿုံ ပြုပြင်ပေးနိုင်ခဲ့သည်။

သက်ပြင်းချပြီးနောက် ယဲ့လန်သည် ပထမဆုံးအကြိမ်အဖြစ် စွမ်းအားချင်း ဖိနှိပ်ခြင်းခံရသည့် စိတ်ပျက်မှုကို ခံစားလိုက်ရသည်။ ထိုစဉ်က ဒူကူပိုး သည်လည်း သူ၏ အဆိပ်က အလုပ်မလုပ်သည့်အခါ ဤကဲ့သို့ ခံစားခဲ့ရဖူးလိမ့်မည်။ သူသည် လျှပ်စီး၏ စွမ်းအားကို အနည်းငယ် တတ်နိုင်ခြင်း မရှိ ဖြစ်နေသည်။ သွေးချပ်ဝတ်၏ ခံစစ်က လုံးဝ အရာမဝင်သလို ငွေပြာချပ်ဝတ်မှာလည်း တူညီပေလိမ့်မည်၊ ၎င်းက ရာဘာချပ်ဝတ်မှ မဟုတ်ဘဲကိုး။

ယွီထျန်းဟန်သည် သူ၏ စိတ်ပျက်မှုများကို ဖော်ထုတ်ပြီးနောက် အားလုံးကို ပုံအောရန် ဆုံးဖြတ်လိုက်သည်။

“လျှပ်စီး ဒေါသ!” ယွီထျန်းဟန်က အော်ဟစ်လိုက်သည်။

ယွီထျန်းဟန်၏ မျက်လုံးများသည် ချက်ချင်းပင် ပြာလဲ့လဲ့နှင့် ဖြူဆွတ်သော အရောင်အဖြစ် ပြောင်းလဲသွားပြီး သူ၏ တစ်ကိုယ်လုံးကို ရစ်ပတ်ထားသော လျှပ်စီးလှိုင်းများသည် ချက်ချင်း ကျယ်ပြန့်လာပြီး ပိုမို ကြီးမားလာခဲ့သည်။

လျှပ်စီး ဒေါသ သည် ယွီထျန်းဟန်ကို ရူးသွပ်ခြင်း အခြေအနေသို့ ရောက်ရှိစေပြီး ထိုရူးသွပ်ခြင်း အခြေအနေအတွင်း လျှပ်စီး၏ စွမ်းအားသည် တစ်ရာရာခိုင်နှုန်းအထိ တိုးတက်လာကာ ဝိညာဉ်စွမ်းအားသည် ငါးဆယ်ရာခိုင်နှုန်းအထိ တိုးတက်လာခဲ့သည်!

ယွီထျန်းဟန်၏ ယခင်က နည်းပါးနေသော ဝိညာဉ်စွမ်းအားများသည် ချက်ချင်း ပြည့်လျှံသွားခဲ့သည်။ လျှပ်စီး ဒေါသ အခြေအနေတွင် သူ၏ ခန္ဓာကိုယ်အတွင်းရှိ ဝိညာဉ်စွမ်းအားများသည်လည်း လျင်မြန်စွာ ကုန်ဆုံးသွားမည် ဖြစ်သဖြင့် ယွီထျန်းဟန် လုပ်ဆောင်ရမည့်အရာမှာ တိုက်ပွဲကို လျင်မြန်စွာ အဆုံးသတ်ရန်ပင် ဖြစ်သည်။ ‘လျှပ်စီး ဒေါသ’ ကို အသက်သွင်းပြီးနောက် ယွီထျန်းဟန်၏ အမြန်နှုန်းသည်လည်း လျှပ်စီးစွမ်းအားကြောင့် အကြီးအကျယ် မြင့်မားသွားပြီး ယဲ့လန်ထံသို့ ချက်ချင်း ပြေးဝင်လာခဲ့သည်။

ယဲ့လန်သည် လျှပ်စီးကြောင်းများ ဖုံးလွှမ်းလျက် သူ့ထံသို့ ပြေးဝင်လာသော ယွီထျန်းဟန်ကို ကြည့်ကာ သူ၏ ခန္ဓာကိုယ်မှ ရွှေရောင်ဝိညာဉ်စွမ်းအားတစ်ရပ် လင်းလက်လာစေပြီး ရေတွက်၍မရသော ငွေပြာမြက်များကို ယွီထျန်းဟန်ထံသို့ ရူးသွပ်စွာ တိုးဝင်သွားစေခဲ့သည်။

“ဒါက တကယ်ပဲ ငွေပြာမြက် လား!” ယွီထျန်းဟန်၏ ဦးရေပြား ချက်ချင်း ထုံကျင်သွားခဲ့သည်။

သို့သော် ‘လျှပ်စီး ဒေါသ’ ကို အသက်သွင်းပြီးနောက်တွင်မူ သူ လှည့်ပြန်၍ မရတော့ချေ။ သူ၏ ဝိညာဉ်စွမ်းအား လုံးဝကုန်ဆုံးသွားခြင်း သို့မဟုတ် ပြိုင်ဘက်ကို ချေမှုန်းပစ်ခြင်း၊ ဤနှစ်ခုသာ ရှိတော့သည်။ ယွီထျန်းဟန်တွင် ဆုတ်ခွာစရာ လမ်းမရှိသဖြင့် သွားကြိတ်ကာ ယဲ့လန်ထံသို့သာ ဆက်လက် တိုးဝင်ခဲ့ရတော့သည်။ သူသည် တိုးဝင်လာသော ငွေပြာမြက်များကို ဖြတ်တောက်ရန် သူ၏ နဂါးလက်သည်းများကို စဉ်ဆက်မပြတ် ဝှေ့ယမ်းနေခဲ့သည်။

ကံဆိုးစွာဖြင့် ယဲ့လန်၏ ငွေပြာမြက်များသည် ထန်ဆန်း ၏ မြက်ပင်များကဲ့သို့ သေးသွယ်ခြင်း မရှိချေ။ အချင်း နှစ်ဆယ်စင်တီမီတာခန့် တုတ်ခိုင်သော ငွေပြာမြက်ပင် ဒါဇင်ပေါင်းများစွာထဲမှ အနည်းငယ်ကိုသာ ယွီထျန်းဟန် ဖြတ်တောက်နိုင်ခဲ့ပြီးနောက် -

ယွီထျန်းဟန်သည် ယဲ့လန်၏ ငွေပြာမြက်များ၏ လုံးဝ ဝိုင်းရံနှောင်ဖွဲ့ခြင်းကို ခံလိုက်ရတော့သည်။ မြက်လုံးကြီးတစ်ခုအဖြစ် ရစ်ပတ်ခံလိုက်ရပြီးနောက် ရူးသွပ်နေသော ယွီထျန်းဟန်သည် သူ၏ နောက်ဆုံး ရုန်းကန်မှုကို ပြုလုပ်ခဲ့သည်။

“လျှပ်စီးကြောင်း!”

ယခုတစ်ကြိမ် လျှပ်စီးကြောင်းသည် ယခင်ကထက် ပိုမို ကြောက်စရာကောင်းလှသည်။ ဤသည်မှာ တစ်ရာရာခိုင်နှုန်း တိုးမြှင့်ထားသော လျှပ်စီးကြောင်း မဟုတ်ပါလား။ ရေတွက်၍မရသော တုတ်ခိုင်လှသော လျှပ်စီးမြွေများသည် ငွေပြာမြက် အကျဉ်းထောင်ကို လျှပ်စီးအကျဉ်းထောင်တစ်ခုအဖြစ် ချက်ချင်း ပြောင်းလဲပစ်လိုက်သည်။ ရေတွက်၍မရသော လျှပ်စီးကြောင်းများသည် ငွေပြာမြက်များတစ်လျှောက် စီးဆင်းသွားပြီး ယဲ့လန်ထံသို့ ဦးတည်သွားခဲ့ကြသည်။

သူ၏ ရွှေရောင်မျက်လုံး များ၏ အမြင်မှတစ်ဆင့် ယဲ့လန်သည် လျှပ်စီးကြောင်းများ သူ့ထံသို့ လျင်မြန်စွာ စီးဆင်းလာနေသည်ကို မြင်တွေ့လိုက်ရသည်။ ယဲ့လန် မျက်မှောင်ကုတ်လိုက်ပြီး ငွေပြာအကျဉ်းထောင်နှင့် ချိတ်ဆက်ထားသော စွမ်းအားများကို လျင်မြန်စွာ ဖြတ်တောက်လိုက်သည်။ သို့သော် ဤလျှပ်စီးကြောင်းများသည် ငွေပြာမြက်များ၏ လမ်းညွှန်မှုကြောင့် လေထုထဲမှတစ်ဆင့် ယဲ့လန်ကို ဆက်လက် တိုက်ခိုက်နေဆဲ ဖြစ်သည်။

“လောင်ကျွမ်းပျက်စီးစမ်း!”

“နေမင်း မီးဖို!”

ယဲ့လန်သည် ငွေပြာအကျဉ်းထောင်မှ ငွေပြာမြက် အနည်းငယ်ကို ချက်ချင်း အရည်ပျော်စေကာ သူ၏ ခန္ဓာကိုယ်ထဲသို့ ပြန်လည် သိမ်းဆည်းလိုက်သည်။ ထို့နောက် ထိုငွေပြာမြက်များသည် တောက်ပသော ပုံသဏ္ဌာန်အဖြစ်သို့ ပြောင်းလဲသွားပြီး နောက်ဆုံးတွင် သူ၏ ရင်ဘတ်မှ ရွှေရောင် စွမ်းအင်လှိုင်းကြီးတစ်ခုအဖြစ် ပန်းထွက်သွားခဲ့တော့သည်။

တိတ်ဆိတ်သော လျှပ်စီးမြွေများနှင့် ရွှေရောင်စွမ်းအင်လှိုင်းများသည် တစ်ခုနှင့်တစ်ခု ပြင်းထန်စွာ ထိပ်တိုက်တွေ့ဆုံသွားကြသည်။

စူးရှတောက်ပသော လူသေကဲ့သို့ ဖြူဆွတ်သော အလင်းရောင်တစ်ရပ် ချက်ချင်း ပေါက်ကွဲထွက်ပေါ်လာခဲ့တော့သည်။ စက္ကန့်အနည်းငယ်အကြာတွင် ယဲ့လန်သည် လျှပ်စီးကြောင်းများကို သူကိုယ်တိုင် ချေဖျက်နိုင်ခဲ့သည်ကို မြင်တွေ့လိုက်ရပြီး သူ၏ အဆုံးစွန်ဓာတ်များအပေါ် နားလည်မှုမှာလည်း ပိုမို နက်ရှိုင်းသွားခဲ့ရသည်။

အဆုံးစွန်ဓာတ်များသည် အခြားသော ဒြပ်စင်စွမ်းအင်များကို အမှန်တကယ် ချေဖျက်နိုင်သော်လည်း ချေဖျက်နိုင်စွမ်း ပမာဏသည် ဆန့်ကျင်ဘက်ဓာတ်များ သို့မဟုတ် ပိုမိုနိမ့်ကျသော ဓာတ်များကို ချေဖျက်နိုင်သလောက်တော့ လွန်ကဲခြင်း မရှိလှချေ။