ပြိုင်ပွဲမစတင်မီ ကတည်းက နှစ်ဖက်စလုံးသည် တစ်ဦးကိုတစ်ဦး အေးစက်စက် မျက်ဝန်းများဖြင့် စိုက်ကြည့်နေကြပြီး လေထုထဲတွင် ယမ်းငွေ့နံ့များ သိသိသာသာ လှိုင်တက်နေသည်။
ဟော်ဝူရှောင်က ထန်ဆန်းကို ကြည့်ကာ ဖြဲပြုံးလျက်
"မင်းတို့ ရှရက်ခ်အဖွဲ့က ပွဲဆက်တွေ အကြိမ်ကြိမ် နိုင်ထားတာ မှန်ပေမဲ့ ငါတို့ မီးလျှံအဖွဲ့နဲ့ တွေ့တဲ့အခါမှာတော့ မင်းတို့ရဲ့ နိုင်ပွဲစံချိန် လမ်းဆုံးသွားပြီ။ မင်းတို့က တကယ်ပဲ ဇွတ်တရွတ်နိုင်လွန်းတာပဲ၊ မင်းမှာရှိတာ မြက်ပြာနုပင် သိုင်းဝိညာဉ်ပဲဥစ္စာ... ဘာလို့ ဒီပွဲထဲ လာရှုပ်တာလဲ။ မင်းကိုယ်မင်း ဒုက္ခရှာနေတာ မဟုတ်ဘူးလား"
ထန်ဆန်းကလည်း မလျှော့သောအကြည့်ဖြင့် "ဘယ်သူနိုင်မယ်၊ ဘယ်သူရှုံးမယ်ဆိုတာ မပြောနိုင်သေးဘူး။ မြက်ပြာနုပင် သိုင်းဝိညာဉ် ဖြစ်တော့ ဘာဖြစ်လဲ။ မင်းတို့ရဲ့ နိုင်ပွဲစံချိန်ကို အဆုံးသတ်ပေးမယ့်သူက ငါ ဖြစ်နေမလားပဲ" ဟု ပြန်လည်ချေပလိုက်သည်။
"မင်း အခြေအနေကို မင်းမသိရင်လည်း စောင့်ရုံပေါ့"
"ဟွန်း... ဘယ်သူက ဘယ်သူ့ကို ကြောက်ရမှာလဲ"
ဒိုင်မုပိုင်နှင့် မာဟုန်ကျွန်းတို့သည်လည်း လက်သီးများကို တကျွတ်ကျွတ်ဆုပ်လျက် အရေးယူရန် အသင့်ပြင်နေကြသည်။
အစောပိုင်းက ပြီးဆုံးသွားခဲ့သော အရေးပါသည့် ပွဲစဉ်တွင် ကမ္ဘာဦးလေပြေအဖွဲ့နှင့် မိုးကြိုးအဖွဲ့တို့သည် လူတိုင်းအတွက် ပြောင်မြောက်လှသော ကစားကွက်များကို ပြသသွားခဲ့ကြသည်။ ထို့ကြောင့် နောက်ထပ် အမျှော်လင့်ရဆုံး ပွဲစဉ်မှာ ဤပွဲပင် ဖြစ်တော့သည်။
ပြိုင်ပွဲ စတင်တော့မည် ဖြစ်သဖြင့် ပွဲကြည့်စင်ထက်ရှိ ပရိသတ်များမှာလည်း အပြင်းအထန် ဆွေးနွေးငြင်းခုံလာကြသည်။
"ရှရက်ခ်အဖွဲ့ရဲ့ ပွဲထိန်းချုပ်တဲ့ ဝိညာဉ်သခင်က အဖွဲ့ရဲ့ ဦးနှောက်ပဲ၊ အတော်လည်း အစွမ်းထက်တယ်။ ဒါပေမဲ့ သူ့ရဲ့ မြက်ပြာနုပင် သိုင်းဝိညာဉ်က မီးဒြပ်စင်ရဲ့ အနှိမ်နင်းခံ ဖြစ်နေတာလေ။ သူ ဒီပွဲကို အနိုင်ရဦးမလား"
"ဟုတ်တယ်။ ဒါပေမဲ့ သူတို့ လူစာရင်းကို အနည်းငယ် ပြောင်းလဲထားကြတယ်လေ။ ဟို ဆံပင်နီနဲ့ လူဝတုတ်ကြီး ကွင်းထဲတက်လာတာ ဒါ ပထမဆုံးအကြိမ်ပဲ။ သူ့မှာ ထူးခြားတဲ့ အရည်အချင်းတစ်ခုခု ရှိနေနိုင်တယ်"
"အဲဒီဝတုတ်ကြီးက ကြည့်ရတာ ရုပ်ဆိုးလိုက်တာ၊ သူ့မှာ ဘာခွန်အား ရှိမှာမို့လို့လဲ။ ငါကတော့ မီးလျှံအဖွဲ့ကိုပဲ ပိုအထင်ကြီးတယ်"
ပရိသတ်အချို့က ရှရက်ခ်အဖွဲ့ကို အားပေးကြပြီး အချို့က မီးလျှံအဖွဲ့ကို အားပေးကြရာ မီးလျှံအဖွဲ့ အနိုင်ရလိမ့်မည်ဟု မျှော်လင့်သူက ပိုမိုများပြားလှသည်။
"ဒီပွဲစဉ်ကတော့ မီးလျှံအကယ်ဒမီအဖွဲ့နဲ့ ရှရက်ခ်အကယ်ဒမီအဖွဲ့တို့ရဲ့ တိုက်ပွဲ ဖြစ်ပါတယ်။ ပြီးခဲ့တဲ့ ပွဲစဉ်တွေမှာ သူတို့နှစ်ဖွဲ့စလုံး ဆယ်ပွဲဆက်တိုက် အနိုင်ရရှိထားခဲ့ကြပေမဲ့ ဒီနေ့မှာတော့ အနိုင်ရရှိသူတစ်ဦးတည်းသာ ထွက်ပေါ်လာတော့မှာ ဖြစ်ပါတယ်။ ဘယ်သူ အနိုင်ရမလဲဆိုတာ စောင့်ကြည့်ကြရအောင်ပါ။ နှစ်ဖက်စလုံးက ပြိုင်ပွဲဝင်များ မိမိတို့ရဲ့ သိုင်းဝိညာဉ်နဲ့ ဝိညာဉ်ကွင်းတွေကို ထုတ်ဖော်ပေးကြပါရန်။ ပြိုင်ပွဲကို နောက်ထပ် တစ်မိနစ်အတွင်း တရားဝင် စတင်ပါတော့မည်"
ဒိုင်လူကြီး၏ ကြေညာချက်အပြီးတွင် ဗဟိုစင်မြင့်ထက်ရှိ လူတစ်သိုက်လုံး သူတို့၏ သိုင်းဝိညာဉ်များနှင့် ဝိညာဉ်ကွင်းများကို ပြိုင်တူ ထုတ်ဖော်လိုက်ကြသည်။ ပူပြင်းလှသော လေထုကြီးသည် တိုက်ပွဲကွင်းထက်မှ ရုတ်တရက် ထွက်ပေါ်လာခဲ့ပြီး ပွဲကြည့်စင်ထက်ရှိ ပရိသတ်များပင် ထိုအပူရှိန်ကို ထိတွေ့ခံစားလိုက်ကြရသည်။
သူတို့၏ သိုင်းဝိညာဉ်များမှာ ကွဲပြားခြားနားကြသော်လည်း ဝိညာဉ်ကွင်း ဖွဲ့စည်းပုံများမှာမူ အံ့ဩစရာကောင်းလောက်အောင် တူညီနေကြသည်။ အဖွဲ့တစ်ခုစီတွင် ဝိညာဉ်ကွင်းလေးကွင်းရှိသော ဝိညာဉ်ဂိုဏ်းချုပ် နှစ်ဦးနှင့် ဝိညာဉ်ကွင်းသုံးကွင်းရှိသော မဟာဝိညာဉ်သခင် ငါးဦးစီ ပါဝင်ကြပြီး အားလုံးမှာ အကောင်းမွန်ဆုံးသော ဝိညာဉ်ကွင်းဖွဲ့စည်းပုံများကို ပိုင်ဆိုင်ထားကြသည်။
ဤမြင်ကွင်းကို မြင်လိုက်ရသည့်အခါ ပွဲကြည့်ပရိသတ်များမှာ ထပ်မံ စိတ်လှုပ်ရှားသွားကြပြန်သည်။
"အဲဒီလူက အတော်လေး အစွမ်းထက်တယ်လို့ ငါထင်နေတာ၊ တကယ်တော့ ကြက် သိုင်းဝိညာဉ် ဖြစ်နေတာကိုး။ ကွာခြားချက်ကတော့ အဲဒီကြက်မှာ မီးဓာတ်ပါနေတာပဲ။ ဒါကြောင့်လည်း သူ့ကို ကွင်းထဲ လွှတ်လိုက်တာနေမှာ"
"ဒါပေမဲ့ အဲဒီလူက ဝလွန်းတယ်။ သူ့ရဲ့ သိုင်းဝိညာဉ်နဲ့ ပေါင်းလိုက်တဲ့အခါ ကြည့်ရတာ တကယ့်ကို ထူးဆန်းနေတာပဲ။ မီးတောက်နေတဲ့ ကြက်မကြီးတစ်ကောင်လိုပဲ... ဟားဟား"
မာဟုန်ကျွန်း၏ သိုင်းဝိညာဉ်ကို မြင်လိုက်ရသည့်အခါ မီးလျှံအဖွဲ့ဝင်များသည် မရယ်ဘဲ မနေနိုင်ကြတော့ချေ။
ဟော်ဝူရှောင်က "ကြက်တစ်ကောင် ဖြစ်နေတာကိုး၊ ဒါလည်း မီးဓာတ်ရှိတယ်လို့ သတ်မှတ်လို့ရတာပဲ။ ဒါပေမဲ့ ငါတို့ မီးလျှံစနစ် ဝိညာဉ်သခင်တွေထဲမှာ မင်းလို ဝတုတ်နေတဲ့သူမျိုးကို တွေ့ရခဲတယ်" ဟု စနောက်လိုက်သည်။
"ဘာကွ... သေသေချာချာ ကြည့်စမ်း၊ ငါက မိစ္ဆာမီးလျှံ ဖီးနစ်ကွ"
မီးလျှံအဖွဲ့မှ မီးလျှံဗျိုင်းဖြူ သိုင်းဝိညာဉ်သခင် နှစ်ဦးက နှာခေါင်းရှုံ့လျက်
"မင်းက ဘယ်လိုဖီးနစ်မျိုးလဲ။ အလွန်ဆုံးရှိလှ ကြက်ဆင်တစ်ကောင်ပဲ ဖြစ်မှာပါ"
"ဟုတ်ပ။ ကြက်ဆင်တစ်ကောင်က ဖီးနစ်လို့ အခေါ်ခံရဖို့ ထိုက်တန်တယ်ဆိုရင် ငါတို့လို မီးလျှံငှက်တွေကျတော့ ဘာဖြစ်သွားမလဲ။ ဖီးနစ်ပေါက်စလေးတွေလား။ တကယ့်ကို ရယ်စရာကောင်းလွန်းတယ်"
မီးလျှံအဖွဲ့ဝင်အချို့၏ လှောင်ပြောင်သရော်မှုကို ခံလိုက်ရသဖြင့် မာဟုန်ကျွန်းသည် ဒေါသအိုးပေါက်ကွဲသွားခဲ့ပြီး ခန္ဓာကိုယ်မှ ခရမ်းနီရောင် အလင်းတန်းများ ပိုမိုတောက်ပလာကာ တိုက်ပွဲထဲသို့ ချက်ချင်း တိုးဝင်ချင်နေပြီ ဖြစ်သည်။
မာဟုန်ကျွန်း၏ သိုင်းဝိညာဉ်သည် တောကြက်တစ်ကောင်မှ မျိုးဗီဇပြောင်းလဲလာခြင်း ဖြစ်သည်။ မီးတောက်ထဲတွင် အညစ်အကြေးများစွာ ပါဝင်နေသဖြင့် မိစ္ဆာမီးလျှံ ဖြစ်နေရခြင်း ဖြစ်သည်။ ထိုမိစ္ဆာမီးလျှံသည် လွန်စွာ ပူပြင်းပြီး အတိုင်းအတာတစ်ခုအထိ တိုက်စစ်စွမ်းအား ရှိသော်လည်း ကြီးမားလှသော အပြစ်အနာအဆာတစ်ခု ရှိနေသဖြင့် သူ့အတွက် ဒုက္ခများစွာ ပေးခဲ့သည်။ ထန်ဆန်းနှင့် မာဟုန်ကျွန်းတို့ ဆုံတွေ့ခဲ့ပြီးနောက်ပိုင်း ထန်ဆန်းသည် မီးတောက်ထဲမှ အညစ်အကြေးများကို ဖယ်ရှားပေးရန် နည်းမျိုးစုံဖြင့် ကြိုးစားခဲ့သော်လည်း အကျိုးသက်ရောက်မှုမှာ မရှိသလောက် နည်းပါးခဲ့သည်။ မာဟုန်ကျွန်း ကိုယ်တိုင် လုံလောက်အောင် အစွမ်းထက်လာသည့် အချိန်ကျမှသာ ထိုမိစ္ဆာမီးလျှံ၏ ခွန်အားကို ထိန်းချုပ်နိုင်လိမ့်မည် ဖြစ်သည်။
ပြိုင်ပွဲသည် တရားဝင် စတင်သွားခဲ့ပြီ ဖြစ်သည်။
ဒိုင်မုပိုင်သည် တစ်ဖက်အဖွဲ့တွင် တိုက်စစ်အပြင်းဆုံးဖြစ်သော ဟော်ဝူရှောင်ကို တုံ့ဆိုင်းခြင်းမရှိဘဲ ထိပ်တိုက်ရင်ဆိုင်လိုက်သည်။ ထန်ဆန်းက ဟော်ဝူကို ရင်ဆိုင်ပြီး ရှောင်ဝူက မီးလျှံသစ်ကျားသစ် ဝိညာဉ်သခင်ကို ရင်ဆိုင်ကာ မာဟုန်ကျွန်းကမူ သူ့ကို လှောင်ပြောင်ခဲ့သော မီးလျှံဗျိုင်းဖြူ ဝိညာဉ်သခင်ကို ရင်ဆိုင်လိုက်သည်။ ကျန်ရှိသော လူများသည်လည်း မိမိတို့၏ ပြိုင်ဘက်များကို အသီးသီး ရင်ဆိုင်ကြသည်။
ထန်ဆန်းသည် အခြေအနေကို စမ်းသပ်သည့်အနေဖြင့် မြက်ပြာနုပင်တစ်ပင်ကို ဝှေ့ယမ်းထုတ်လိုက်ရာ ဟော်ဝူနှင့် ထိတွေ့မိသည့် တစ်ခဏချင်းမှာပင် ထိုမြက်ပြာနုပင်မှာ ပြာအတိ ဖြစ်သွားခဲ့ရသည်။
"မင်းက တကယ့်ကို ကိုယ့်ခြေလှမ်းကိုယ် မသိတာပဲ။ မီးပုံထဲ တိုးဝင်တဲ့ ပိုးဖလံကောင်လို ကိုယ့်ဖတ်ကိုယ် ဒုက္ခရှာနေတာ။ အမြန်ဆုံး အရှုံးပေးလိုက်တာကမှ မင်းရဲ့ နာကျင်မှုကို သက်သာစေလိမ့်မယ်"
ဟော်ဝူ၏ လှောင်ပြောင်မှုကို ခံရသော်လည်း ထန်ဆန်းသည် တည်ငြိမ်နေဆဲ ဖြစ်သည်။
အစောပိုင်းက ထန်ဆန်းသည် မာဟုန်ကျွန်းနှင့် ပထမဆုံးအကြိမ် တိုက်ခိုက်ခဲ့စဉ်ကတည်းက သူ၏ မြက်ပြာနုပင်သည် မိစ္ဆာမီးလျှံ၏ အနှိမ်နင်းခံ ဖြစ်နေခဲ့သည်ကို သိထားသည်။ သို့သော်လည်း ဟော်ဝူ၏ မီးတောက်က ဤမျှအထိ ပြင်းထန်လိမ့်မည်ဟု သူ မမျှော်လင့်ထားမိချေ။ သူ၏ မြက်ပြာနုပင်တွင် သေစေနိုင်သော အဆိပ်အတောက်များ ပါဝင်နေသော်လည်း မီးလျှံစနစ် ဝိညာဉ်သခင်အားလုံးသည် အဆိပ်အတောက်များကို သဘာဝအလျောက် ခုခံနိုင်စွမ်း ရှိကြသဖြင့် သူတို့ကို အဆိပ်ဖြင့် တိုက်ခိုက်ရန်မှာ မဖြစ်နိုင်ချေ။
ထန်ဆန်းသည် သူ၏ ဝိညာဉ်ကွင်းအားလုံးကို ပြန်လည်ရုပ်သိမ်းလိုက်ပြီး မည်သည့်ဝိညာဉ်စွမ်းရည်ကိုမျှ အသုံးမပြုတော့ဘဲ ဝိညာဉ်စွမ်းအားများကို သူ၏ ကိုယ်ခံပညာကွက်များထဲသို့သာ စုစည်းလိုက်တော့သည်။ ကျောက်စိမ်းနတ်လက်ဝါး၊ ဗျိုင်းအုပ်ထိန်းချုပ် နဂါးဖမ်းနည်းစနစ် နှင့် တစ္ဆေအရိပ်ခြေလှမ်း စသည်တို့ကို ပြိုင်ဘက်နှင့် ယှဉ်ပြိုင်ကစားရန် အသုံးချနိုင်သည်။ ခန္ဓာကိုယ်ပြင်ပ ဝိညာဉ်အရိုးဖြစ်သော ပင့်ကူခြေတံရှစ်ခုနှင့် စွမ်းအားကြီး လျှို့ဝှက်သံတူကြီးတို့မှာ လူသတ်လက်နက်များ ဖြစ်သဖြင့် အလွယ်တကူ ထုတ်သုံးလိမ့်မည် မဟုတ်ချေ။
ဟော်ဝူက သူမ၏ လက်နှစ်ဖက်ကို ဝှေ့ယမ်းလိုက်သည်နှင့်အမျှ မီးလျှံအလင်းတန်းများသည် ထန်ဆန်းထံသို့ တရစပ် ပြေးဝင်သွားခဲ့သည်။ ထန်ဆန်းသည် တစ္ဆေခြေလှမ်းကို အသုံးပြု၍ လျင်မြန်စွာ ရှောင်တိမ်းလိုက်ပြီးနောက် ကျောက်စိမ်းနတ်လက်ဝါးကို ဆန့်ထုတ်ကာ ဟော်ဝူထံသို့ တိုးဝင်ခဲ့သည်။
သူမ၏ ခန္ဓာကိုယ်မှ တတိယမြောက် ဝိညာဉ်ကွင်းက ဖျတ်ခနဲ လင်းလက်သွားသည်နှင့်အတူ ဟော်ဝူသည် သူမ၏ တတိယဝိညာဉ်စွမ်းရည် ဖြစ်သော 'မီးလျှံခုခံမှုကွင်း' ကို အသုံးချလိုက်သည်။ တောက်လောင်နေသော နီရဲလှသည့် အလင်းကွင်းကြီးတစ်ခုသည် ထန်ဆန်းထံသို့ တည့်တည့်မတ်မတ် ပြေးဝင်လာခဲ့သည်။ ထန်ဆန်းသည် ချက်ချင်း ဆောင့်ကြောင့်ထိုင်ချလိုက်ပြီး ခြေထောက်များကို အရှိန်ယူကာ အပေါ်သို့ မြင့်မားစွာ ခုန်တက်လျက် ထိုတိုက်စစ်ကို ရှောင်တိမ်းလိုက်သည်။
"မင်းမှာ အစွမ်းအချို့ ရှိနေတာပဲ၊ ဒါပေမဲ့ ဒီပွဲရဲ့ အောင်ပွဲကတော့ ငါတို့ မီးလျှံအကယ်ဒမီရဲ့ အပိုင်ပဲ ဖြစ်ရမယ်"
ဟော်ဝူက စကားအဆုံးတွင် နောက်ထပ် တိုက်စစ်တစ်ခုကို ထပ်မံ ဆင်နွှဲလိုက်ပြန်သည်။
အခြားတစ်ဖက်တွင်မူ ဟော်ဝူရှောင်နှင့် ဒိုင်မုပိုင်တို့၏ လက်သီးချင်း ပြင်းထန်စွာ ထိပ်တိုက်တွေ့ဆုံခဲ့ကြပြီး လေထုထဲတွင် ရုတ်တရက် အမွေးကျွမ်းနံ့များ ပျံ့နှံ့သွားခဲ့ရသည်။
"ကင်ထားတဲ့ ကျားလက်ဝါးရဲ့ အရသာက ဘယ်လိုလဲ ဟေ့ကောင်"
"သိပ်ပြီး မာန်ဝင့်မနေနဲ့ဦး၊ ငါ့ရဲ့ ဒီလက်သီးကို ခံစမ်း"
ဟော်ဝူရှောင်၏ လှောင်ပြောင်မှုကြောင့် ဒိုင်မုပိုင်သည် ဒေါသအုန်းမွှန်သွားခဲ့သည်။ သူသည် နာကျင်မှုကို အံတုလျက် တိုက်စစ်ကို ထပ်မံ ဆင်နွှဲလိုက်ပြန်သည်။
မာဟုန်ကျွန်း၏ မိစ္ဆာမီးလျှံသည် မြင့်မားသော အပူရှိန် ရှိရုံတင်မကဘဲ ပြင်းထန်သော ကပ်ငြိမှုစွမ်းရည်လည်း ရှိသဖြင့် သာမန်ဝိညာဉ်သခင်များအဖို့ ခုခံရန် ခက်ခဲလှသည်။ သို့သော်လည်း သူသည် မီးဒဏ်ကို မကြောက်ရွံ့ဘဲ သူ့ထက် ပိုမိုလျင်မြန်လှသော မီးလျှံဗျိုင်းဖြူ ဝိညာဉ်သခင်နှင့် တွေ့ဆုံရသည့် အခါတွင်မူ မည်သည့်အားသာချက်မျှ မရှိတော့ချေ။ သူ၏ ကြက်ဆင်သိုင်းဝိညာဉ်သည် မြေပြင်အနီး အနိမ့်ပိုင်းတွင်သာ ပျံသန်းနိုင်ပြီး အလျင်နှုန်းစနစ် မီးလျှံဗျိုင်းဖြူ ဝိညာဉ်သခင်နှင့် အကြိမ်ကြိမ် အားပြိုင်ပြီးနောက်တွင် အမောဆို့ကာ အသက်ရှူသံများ ပြတ်တောင်းလာခဲ့ရသည်။
မီးလျှံသစ်ကျားသစ် ဝိညာဉ်သခင်နှင့် ရင်ဆိုင်နေရသော ရှောင်ဝူသည်လည်း မည်သည့်အားသာချက်မျှ မရရှိခဲ့ချေ။ သူမသည် လွန်စွာ လျင်မြန်လှသော်လည်း တစ်ဖက်လူ၏ ခန္ဓာကိုယ်မှ ပူပြင်းလှသော မီးတောက်များကြောင့် သူမအနေဖြင့် အနီးကပ် တိုက်ခိုက်ရန် မဖြစ်နိုင်ဘဲ မီးလျှံသစ်ကျားသစ် ဝိညာဉ်သခင်သည်လည်း အလွန် လျင်မြန်လှပေသည်။
ရှရက်ခ်အဖွဲ့မှ ကျန်ရှိသော လူသုံးဦးလုံးသည်လည်း ပြိုင်ဘက်၏ မီးလျှံတိုက်စစ်အောက်တွင် အခြေအနေ မဟန်ဘဲ အရေးနိမ့်နေကြသည်။
ဟော်ဝူသည် ထိန်းချုပ်မှုစနစ် ဝိညာဉ်သခင်မတစ်ဦး ဖြစ်သော်လည်း သူမ၏ တိုက်စစ်စွမ်းအားက အနည်းငယ်မျှ လျော့နည်းခြင်း မရှိချေ။ သူမ၏ ခန္ဓာကိုယ်မှ ထွက်ပေါ်လာသော မီးတောက်များကြောင့် ထန်ဆန်းအနေဖြင့် သူမ၏ အနီးသို့ ကပ်ရန်ပင် အခွင့်အရေး မရှိခဲ့ချေ။ ထန်ဆန်းသည် ဟော်ဝူ၏ ဝိညာဉ်စွမ်းအားကို ကုန်ခမ်းစေရန်အတွက် အစဉ်တစိုက် ရှောင်တိမ်းနေခဲ့ပြီး သူမ အင်အားချည့်နဲ့သွားသည့် အချိန်ကျမှသာ အသေအလဲ တိုက်ကွက်တစ်ခု ပေးရန် ကြံစည်နေသည်။
သို့သော်လည်း သူသည် ဟော်ဝူကို အထင်သေးမိခဲ့သည်။ ထန်ဆန်းက ဝိညာဉ်စွမ်းရည်များကို ထုတ်မသုံးသည်ကို မြင်ရသဖြင့် ဟော်ဝူသည်လည်း ဝိညာဉ်စွမ်းအားကို ချွေတာရန်အတွက် ဝိညာဉ်စွမ်းရည် အသုံးချမှုကို လျှော့ချလိုက်သည်။ ထန်ဆန်းတစ်ယောက်တည်းနှင့် ထိုမီးလျှံတိုက်စစ်ကို တုံ့ပြန်ရန်မှာ အလွန် ခက်ခဲလှပေသည်။
"အားးးးးး"
အော်ဟစ်သံတစ်ခုနှင့်အတူ ကျင်းလင်သည် ပထမဆုံးအကြိမ်အဖြစ် တိုက်ပွဲကွင်းပြင်ပသို့ လွင့်စဉ်ထွက်သွားခဲ့ရသည်။ ကျင်းလင် ကွင်းပြင်ပသို့ ရောက်ရှိသွားခြင်းက ရှရက်ခ်အဖွဲ့ကို ခြောက်ယောက်နှင့် ခုနစ်ယောက် အခြေအနေသို့ ရောက်ရှိသွားစေခဲ့ပြီး ပိုမို၍ အကျပ်ရိုက်သွားစေခဲ့သည်။
"တောက်... ငါတို့တွေ တစ်ဖက်သတ် အနှိမ်ခံနေရတာပဲ။ ငါတို့ ရှရက်ခ်ပါရမီရှင်ခုနစ်ဖော် ဒီလိုမျိုး အရှက်ခွဲခံရတာ ဘယ်တုန်းက ရှိဖူးလို့လဲ။ ငါတို့ ဒီအတိုင်းပဲ အရှုံးပေးလိုက်ရတော့မှာလား... မဖြစ်နိုင်တာ"
သူ၏ ဆံပင်များ ကျွမ်းသွားသည့် အနံ့ကို ရရှိလိုက်သည့်အခါ ထန်ဆန်းသည် အလွန်ပင် မကျေမနပ် ဖြစ်လာခဲ့ပြီး ဒေါသကြောင့် သွားကြိတ်မိတော့သည်။ သူ၏ ခန္ဓာကိုယ်တစ်ခုလုံးမှာ မီးတောက်များကြောင့် နီရဲနေခဲ့ပြီး ပြုတ်ထားသော ပုစွန်တစ်ကောင်ကဲ့သို့ ဖြစ်နေသည်။
ထိုစဉ် ထန်ဆန်းသည် မျက်နှာချင်းဆိုင်ရှိ ဟော်ဝူကို စိုက်ကြည့်လိုက်သည်။ သူသည် သူ၏ ညာဘက်ခြေသလုံးကို ရုတ်တရက် အားစိုက်လိုက်ပြီး ဘာအရိပ်အယောင်မျှမရှိဘဲ သူ၏ ဘယ်ဘက်လက်ဝါးထဲတွင် နက်မှောင်သော စွမ်းအင်လုံးတစ်ခု စုစည်းလာခဲ့သည်။
ဤမြင်ကွင်းကို မြင်လိုက်ရသည့်အခါ ယုယုရှောင်ကန်းသည် ချွေးစေးများ ထွက်လာခဲ့ပြီး
"ဒိုင်လူကြီး... ပြိုင်ပွဲကို ရပ်တန့်ပေးပါ၊ ရှရက်ခ်အကယ်ဒမီ အရှုံးပေးပါတယ်" ဟု အော်ဟစ်လိုက်တော့သည်။