တိုက်ပွဲကြီးတစ်ခုလုံးမှာ တစ်မိနစ်ပင် မပြည့်မီမှာတင် ပြီးဆုံးသွားခဲ့ရပေသည်။ မြန်ဆန်လွန်းလှချည်လား။ ထျန်းပင်းအဖွဲ့သည် သုံးပွဲဆက်တိုက် အနိုင်ရရှိထားသော ကြယ်ခုနစ်ပွင့်အဖွဲ့ကို မမျှော်လင့်ဘဲ အပြတ်အသတ် အသာစီးရယူကာ အနိုင်ပိုင်းလိုက်ပြီး ဤမမျှော်လင့်ထားသော ထိပ်တိုက်တွေ့ဆုံမှုကို အောင်မြင်စွာ အဆုံးသတ်လိုက်နိုင်ခဲ့၏။
ပရိသတ်ကြည့်စင်ပေါ်တွင် ချီးကျူးသံများနှင့် အာမေဍိတ်သံများမှာ တစ်ခုပြီးတစ်ခု ဆူညံစွာ ထွက်ပေါ်လာခဲ့ပြီး လူတိုင်းက ထျန်းပင်းအဖွဲ့၏ ထူးခြားပြောင်မြောက်လှသော စွမ်းဆောင်ရည်အပေါ် လက်ခုပ်တီးကာ ဂုဏ်ပြုလိုက်ကြပေသည်။ ဤမျှ နုနယ်လှသော လူငယ်လေးများက ယခုကဲ့သို့ အံ့အားသင့်ဖွယ် ခွန်အားမျိုးကို ပိုင်ဆိုင်ထားလိမ့်မည်ဟု မည်သူမျှ ကြိုတင်မမျှော်လင့်ထားခဲ့ကြချေ။
ရွှီဝူသည် လင်းကျစ်လော့နှင့် လျူယန်တို့၏ အလယ်တွင် ရပ်နေရင်း မိမိ၏ ရဲဘော်ရဲဘက်များ ပထမဆုံးပွဲစဉ်တွင် ဤမျှလွယ်ကူစွာ အနိုင်ရရှိသွားသည်ကို ကြည့်ကာ အားကျစိတ်များ အနည်းငယ် ဖြစ်ပေါ်နေမိပါတော့သည်။
လင်းကျစ်လော့က တည်ငြိမ်စွာဖြင့် "ဒီတိုက်ပွဲမှာ ငါတို့က ရုတ်တရက် တိုက်ခိုက်လိုက်လို့ နိုင်သွားတာပါ... ပြိုင်ဘက်တွေက ငါတို့အကြောင်းကို မသိကြသလို အထင်လည်း သေးနေခဲ့ကြလို့လေ၊ မနက်ဖြန်ကစရင်တော့ ဘင်းအာတို့ ဒီလောက် လွယ်လွယ်ကူကူ နိုင်တော့မှာ မဟုတ်ဘူး" ဟု ဆို၏။
လျူယန့်ကလည်း "ကျောင်းအုပ်ကြီးလင်း... ကျမကတော့ ရှောင်ဟန်နဲ့ ဘင်းအာတို့ရဲ့ တိုက်ဗျူဟာပိုင်းဆိုင်ရာ စွမ်းရည်တွေကြောင့် ပြိုင်ဘက်က သူတို့အကြောင်းကို ကောင်းကောင်းသိရင်တောင်မှ အလွယ်တကူ အနိုင်ယူနိုင်မှာ မဟုတ်ဘူးလို့ ယုံကြည်ပါတယ်" ဟု ဝင်ရောက်ပြောဆိုလိုက်ပေသည်။
"ဘယ်သူသိနိုင်မလဲ... စောင့်ကြည့်ကြတာပေါ့" လင်းကျစ်လော့က စကားဆုံးသည်နှင့် ရွှယ်ဝု၏ ပုခုံးကို ညင်သာစွာ ပုတ်လိုက်ရင်း "ရွှယ်ဝု... မင်းနဲ့ ဘင်းအာတို့ရဲ့ သိုင်းဝိညာဉ်ပေါင်းစပ်မှု စွမ်းရည် (Martial Soul Fusion Technique) က ဝိညာဉ်ဘုရင် (Soul King) အဆင့်ရှိတဲ့ ပြိုင်ဘက်ကိုတောင် အနိုင်ယူနိုင်စွမ်း ရှိတယ်... ဒါက ငါတို့အဖွဲ့ရဲ့ အားအကိုးရဆုံး လူသတ်လက်နက်ဖြစ်လို့ ကွင်းထဲမှာ အလွယ်တကူ ထုတ်မပြရဘူးနော်" ဟု သတိပေးလိုက်၏။
ရွှီဝူသည် မနက်ဖြန်ညတွင် ကွင်းအတွင်း၌ တိုက်ပွဲဝင်ရမည့် အချိန်ကို အလွန်ပင် မျှော်လင့်နေမိပါတော့သည်။
အသန်မာဆုံးဟု သတ်မှတ်ထားသော အဖွဲ့က အားနည်းသည်ဟု ထင်ရသော အဖွဲ့ကို ရှုံးနိမ့်သွားခဲ့ရုံမျှမက တိုက်ပွဲကြီးတစ်ခုလုံးမှာလည်း တစ်မိနစ်အတွင်း ပြီးဆုံးသွားခဲ့ရပေသည်။ ကြယ်ခုနစ်ပွင့်အဖွဲ့အတွက်မူ ဤအချက်က ကြီးမားလှသော အရှက်ကွဲမှုကြီး ဖြစ်သဖြင့် မျက်နှာများ အုန်ပြာခဲမတတ် ပျက်ယွင်းလျက် အရှက်ရစွာဖြင့် ကွင်းအတွင်းမှ ကမူးရှူးထိုး ထွက်ခွာသွားခဲ့ကြရရှာ၏။
ကွင်းအတွင်း၌မူ ရှောင်ဟန်သည် မိန်းကလေးများနှင့် တစ်ဦးချင်းစီ လက်ဝါးချင်းရိုက်ကာ ပထမဆုံး အောင်ပွဲကို ပျော်ရွှင်စွာ အောင်ပွဲခံနေခဲ့ကြပေသည်။
ထိုစဉ် ပွဲကြေညာသူ၏ အသံ ထွက်ပေါ်လာပြန်၏
ရှောင်ဟန်က ဂုဏ်ယူဝင့်ကြွားစွာ ပြုံးလိုက်ရင်း လောင်းကြေးဖြတ်ပိုင်းကို ထုတ်လိုက်ကာ "ကဲ... ကောင်တာကို သွားပြီး ပိုက်ဆံသွားထုတ်ကြစို့" ဟု ဆိုလိုက်၏။
လူရှစ်ဦးပါဝင်သော အဖွဲ့သည် ပျော်ရွှင်စွာဖြင့် ကောင်တာသို့ လျှောက်လှမ်းလာခဲ့ကြပေသည်။ ရှောင်ဟန်က ဖြတ်ပိုင်းကို ဝန်ထမ်းထံသို့ ကမ်းပေးလိုက်ရာ ဝန်ထမ်းဖြစ်သူက ၎င်းတို့အား အံ့သြတုန်လှုပ်စွာဖြင့် ကြည့်ရှုလိုက်မိ၏။ ထိုလူငယ်လေးများက စစ်ဝိညာဉ်သခင်များချည်း သီးသန့်ဖွဲ့စည်းထားသော ကြယ်ခုနစ်ပွင့်အဖွဲ့ကို အမှန်တကယ် အနိုင်ယူလိမ့်မည်ဟု သူ လုံးဝမမျှော်လင့်ထားခဲ့မိခြင်းကြောင့် ဖြစ်ပေသည်။ ဝန်ထမ်းဖြစ်သူသည် ထျန်းပင်းအဖွဲ့အတွက် ရမှတ်များကို မှတ်ပုံတင်ပေးပြီးနောက် ရှောင်ဟန် လောင်းကြေးနိုင်ခဲ့သော ရွှေဝိညာဉ်ဒင်္ဂါး ရှစ်ထောင်လေးရာကိုပါ တစ်ပါတ်တည်း ရှင်းလင်းပေးလိုက်ပေသည်။
လင်းကျစ်လော့၊ လျူယန်နှင့် ရွှီဝူတို့ လျှောက်လှမ်းလာသည်ကို မြင်သောအခါ ရှောင်ဟန်က ပိုက်ဆံများကို အလျင်အမြန်ပင် သိမ်းဆည်းလိုက်၏။
လင်းကျစ်လော့က "မင်းတို့ ဒီည တော်တော်လေး စွမ်းဆောင်ရည်ကောင်းကြတယ်... အထူးသဖြင့် ဘင်းအာပေါ့" ဟု ချီးကျူးလိုက်သည်တွင်
လင်းကျစ်လော့က ပတ်ဝန်းကျင်ကို ဝေ့ဝဲကြည့်လိုက်ရာ လူအများအပြားက ၎င်းတို့အား အာရုံစိုက် စောင့်ကြည့်နေကြပြီး တီးတိုးဝေဖန် ပြောဆိုနေကြသည်ကို သတိပြုမိလိုက်ပေသည်။
ထို့နောက်တွင် အဖွဲ့ဝင်အားလုံးသည် ဝိညာဉ်ကွင်းကြီးအတွင်းမှ ထွက်ခွာကာ ဟိုတယ်သို့ ပြန်လာခဲ့ကြပါတော့သည်။ လင်းကျစ်လော့က လူတိုင်းကို တစ်နေရာတည်းတွင် စုစည်းလိုက်ပြီးနောက် -
"မင်းတို့ သိကြတဲ့အတိုင်း ဝိညာဉ်ကွင်းမှာ ရမှတ်စည်းမျဉ်းတွေနဲ့ တံဆိပ်အဆင့်အတန်း သတ်မှတ်ချက်တွေ ရှိတယ်... ဒါပေမဲ့ ငါတို့အတွက် အဲဒီလို အပေါ်ယံ ဂုဏ်ပုဒ်တွေက မလိုအပ်ပါဘူး၊ အဓိက ရည်ရွယ်ချက်က မင်းတို့ရဲ့ လက်တွေ့တိုက်ပွဲ အတွေ့အကြုံတွေကို မြှင့်တင်ဖို့ပဲ... ငါတို့ ဒီနေရာမှာ တစ်လကြာ လေ့ကျင့်မှာဖြစ်ပြီး မင်းတို့အတွက် အထူးလေ့ကျင့်ရေး စီမံချက်တစ်ခုကို ငါ ဆွဲထားပြီးပြီ၊ မနက်ဖြန်ညကစပြီး မင်းတို့တစ်ဦးချင်းစီက နေ့တိုင်း နှစ်ပွဲစီ ပါဝင်ယှဉ်ပြိုင်ရမယ်... အဖွဲ့လိုက်ပွဲ၊ နှစ်ယောက်တွဲပွဲ ဒါမှမဟုတ် တစ်ဦးချင်းပွဲ ကြိုက်တာဖြစ်ဖြစ်ရတယ်... ဘာပြဿနာရှိလဲ" ဟု မေးမြန်းလိုက်၏။
လင်းကျစ်လော့က ဆက်လက်၍ "မင်းတို့ အခုတစ်ပွဲ နိုင်သွားတယ်ဆိုပေမဲ့ ပေါ့ဆလို့တော့ မရဘူးနော်... မင်းတို့ရဲ့ ပြိုင်ဘက်က အထင်သေးမိလို့ရယ်၊ ငါတို့အကြောင်း ကောင်းကောင်းမသိလို့ရယ်ကြောင့် ရှုံးသွားတာ... မနက်ဖြန်ညကစရင်တော့ ဒီလောက် လွယ်လွယ်ကူကူနဲ့ နိုင်ဖို့ မလွယ်တော့ဘူး"
"သိပါပြီ... ကျောင်းအုပ်ကြီးလင်း၊ ဒါနဲ့ ကျမတို့အဖွဲ့မှာ လူရှစ်ယောက်ရှိတာဆိုတော့ ညတိုင်း အဖွဲ့လိုက်ပွဲမှာ တစ်ယောက်က နားရမှာပေါ့ ဟုတ်လား" ဟု မေးမြန်းလာရာ
"ဟုတ်တယ်... အဖွဲ့လိုက်ပွဲမှာ နားရတဲ့သူက တစ်ဦးချင်းပွဲ ဒါမှမဟုတ် နှစ်ယောက်တွဲပွဲတွေမှာ ပါဝင်ယှဉ်ပြိုင်နိုင်တယ်... ပွဲက ပိုပြီးတော့ စိန်ခေါ်မှု ရှိသွားအောင်လို့ ငါ မင်းတို့ကို အဖွဲ့နှစ်ဖွဲ့ ခွဲပေးထားမယ်" ဟု လင်းကျစ်လော့က ဆိုကာ အသေးစိတ် အစီအစဉ်များကို ဆက်လက် ရှင်းပြလိုက်ပေသည်။
အဖွဲ့အတွင်း၌ ဝိညာဉ်သခင် (Soul Master) လေးဦးနှင့် မဟာဝိညာဉ်သခင် (Great Soul Master) လေးဦး ရှိရာ လင်းကျစ်လော့သည် ဝိညာဉ်သခင်တစ်ဦးက မဟာဝိညာဉ်သခင်တစ်ဦးကို ဦးဆောင်စေလျက် ဝိညာဉ်သခင်အဆင့် နှစ်ယောက်တွဲ ပြိုင်ပွဲများတွင် ပါဝင်ယှဉ်ပြိုင်စေလိုခြင်း ဖြစ်ပြီး ၎င်းသည် နှစ်ဦးစလုံးအတွက် ပိုမိုစိန်ခေါ်မှု ရှိစေမည် ဖြစ်၏။ သို့သော် ရွှယ်ဝုသည် အကူအညီပေးရေးစနစ် ဖြစ်သဖြင့် တိုက်ခိုက်ရေးစွမ်းရည် အားနည်းလှရာ သူမအနေဖြင့် မဟာဝိညာဉ်သခင်တစ်ဦးနှင့် အဖွဲ့ဖွဲ့၍ ဝိညာဉ်သခင် နှစ်ဦးနှင့် ရင်ဆိုင်ရပါက အနိုင်ရရှိရန် ရာခိုင်နှုန်း တော်တော်လေး နည်းပါးပေလိမ့်မည်။ ထို့ကြောင့် ရှောင်ဟန်၊ ရွှယ်ဘင်းအာနှင့် ယူဟိုင်ရိုတို့ သုံးဦးသည် ပွဲစဉ်များတွင် ပိုမို၍ ပါဝင်ယှဉ်ပြိုင်ကြရမည် ဖြစ်၏။ ၎င်းတို့ သုံးဦးသည် ကူးချင်းပေါ်၊ ရှန်လျို့ယွီ၊ ချိုးရုန့်ရွှေနှင့် ရွှယ်ယွဲ့အာတို့နှင့် အသီးသီး အဖွဲ့ခွဲ၍ ယှဉ်ပြိုင်ကြရမည် ဖြစ်ရာ ဤအချက်က ရှောင်ဟန်နှင့် ရွှယ်ဘင်းအာတို့အနေဖြင့် တစ်ညလျှင် သုံးပွဲအထိ ပါဝင်ယှဉ်ပြိုင်ရနိုင်သည်ဟု ဆိုလိုခြင်း ဖြစ်ပေသည်။
ရှောင်ဟန်က သဘောကျစွာ ရယ်မောလိုက်ရင်း "ဒါပေါ့ဗျာ... ကျတော် ပွဲစဉ်တွေ ပိုပြီး ပါဝင်ခွင့်ရလေလေ၊ ပွဲတွေ ပိုနိုင်လေလေ ပိုက်ဆံ ပိုရလေလေပေါ့" ဟု ဆိုလိုက်ရာ -
လင်းကျစ်လော့ ထွက်ခွာသွားပြီးနောက် ရှောင်ဟန်သည် မိန်းကလေးများ၏ အခန်းတွင် ခေတ္တမျှ ကျန်ရစ်ခဲ့ပေသည်။ သူသည် ရွှေဝိညာဉ်ဒင်္ဂါး ရှစ်ထောင်လေးရာလုံးကို ထုတ်ယူလိုက်ရင်း
"အစ်မတို့ရေ... ကျတော် အစ်မတို့ဆီက ချေးထားတဲ့ အရင်းတွေကို အရင်ဆုံး ပြန်ပေးပါ့မယ်... ကျန်တဲ့ အမြတ်ငွေတွေကိုတော့ ကျတော် နောက်ထပ် လောင်းကြေးထပ်ဖို့အတွက် အသုံးချမှာဖြစ်ပြီးတော့ နောက်ပိုင်းကျရင် ပိုက်ဆံတွေကို အတူတူ ခွဲဝေကြတာပေါ့၊ ဘယ်လိုလဲ" ဟု တိုင်ပင်လိုက်၏။
ရွှီဝူကလည်း "ရှောင်ဟန်... ကျမကတော့ ဒီညပွဲမှာ မင်းတို့ကို ဘာမှ မကူညီပေးနိုင်ခဲ့တော့ ကျမဆီက ရွှေဝိညာဉ်ဒင်္ဂါး လေးရာကိုပါ မင်းကို ထပ်ပေးမယ်... ဒါဆိုရင် စုစုပေါင်း ခြောက်ထောင် တိတိ ဖြစ်သွားတာပေါ့" ဟု ဆိုလာပေသည်။
"ကောင်းပါပြီ... ကျတော် သိပါတယ်၊ အကယ်၍ အစ်မသာ ဒီညပွဲမှာ ပါဝင်ခဲ့ရင်လည်း ကျတော့်ကို ပိုက်ဆံ ချေးပေးမှာပဲလေ... ကျတော်တို့က တစ်ဖွဲ့တည်း ဖြစ်တာမို့လို့ ရတဲ့ပိုက်ဆံကို တူတူမျှဝေရမှာပေါ့... ဒါပေမဲ့ မနက်ဖြန်ညကစရင်တော့ ပိုက်ဆံရှာရတာ ဒီလောက် လွယ်တော့မှာ မဟုတ်ဘူးဗျ၊ ကျတော်တို့ရဲ့ စွမ်းရည်ကို မြင်သွားကြပြီဆိုတော့ ဝိညာဉ်ကွင်းက ပေးမယ့် လောင်းကြေးအဆတွေက တဖြည်းဖြည်း နည်းသွားတော့မှာ" ရှောင်ဟန်က သုံးသပ်ပြလိုက်၏။
လူအချို့သည် ရယ်မောပျော်ရွှင်စွာဖြင့် စကားပြောဆိုရင်း နောက်ထပ် ပါဝင်ယှဉ်ပြိုင်ရမည့် ပွဲစဉ်များကို ရင်ခုန်စွာဖြင့် မျှော်လင့်နေကြပါတော့သည်။
တစ်လဆိုသော အချိန်ကာလမှာ မျက်စိတစ်မှိတ်အတွင်း ကုန်လွန်သွားခဲ့ရပေသည်။ ရှောင်ဟန်နှင့် သူ၏ လူရှစ်ဦးပါဝင်သော အဖွဲ့သည် ၎င်းတို့၏ ထူးခြားပြောင်မြောက်လှသော စွမ်းဆောင်ရည်များကြောင့် ဆိုတို ဝိညာဉ်ကွင်းကြီး၏ အတောက်ပဆုံးသော ကြယ်ပွင့်များ ဖြစ်လာခဲ့ကြ၏။ အထူးသဖြင့် ရှောင်ဟန်နှင့် ရွှယ်ဘင်းအာတို့ ဖြစ်ပေသည်။ ဤတစ်လတာ ကာလအတွင်း ၎င်းတို့ ပါဝင်ယှဉ်ပြိုင်ခဲ့သမျှ ပွဲစဉ်တိုင်းတွင် တစ်ပွဲမျှ ရှုံးနိမ့်ခြင်း မရှိခဲ့ကြဘဲ၊ အထူးသဖြင့် ရှောင်ဟန်သည် တစ်လလုံးလုံး ညတိုင်း သုံးပွဲစီ ပါဝင်ယှဉ်ပြိုင်ကာ ပွဲစဉ်အားလုံးကို အနိုင်ရလဒ် ဆွတ်ခူးနိုင်ခဲ့သည့် မကြုံစဖူး ထူးခြားသော မှတ်တမ်းကောင်းကြီးကိုပါ စိုက်ထူနိုင်ခဲ့ပါတော့သည်။