ရှောင်ဟန်၏ စကားကို ကြားလိုက်ရသောအခါ ကျောင်းအုပ်ကြီးကျောက်နှင့် ဆရာ၊ ဆရာမများအားလုံး ဆွံ့အသွားကြကုန်သည်။ ထျန်းရွှေအကယ်ဒမီကျောင်းတော်ကြီးကို စတင်တည်ထောင်ခဲ့သည့် အချိန်မှစ၍ ယနေ့ထက်တိုင် အမျိုးသားကျောင်းသားဟူ၍ တစ်ဦးတစ်ယောက်မျှ လက်ခံခဲ့ဖူးခြင်း မရှိချေ။ ရှောင်ဟန်သည် နှစ်တစ်ရာအတွင်း တစ်ယောက်ပေါ်ရန်ခဲယဉ်းသည့် မွေးရာပါအပြည့်အဝရှိသော ဝိညာဉ်စွမ်းအားပိုင်ရှင် ပါရမီရှင်တစ်ဦးဖြစ်ပြီး အကန့်အသတ်မဲ့ အလားအလာများ ရှိနေသော်လည်း၊ သူသည် ထျန်းရွှေအကယ်ဒမီ၏ ကျောင်းသားလက်ခံရေး စည်းမျဉ်းသတ်မှတ်ချက်များနှင့် ကိုက်ညီမှုမရှိသည်မှာ အမှန်ပင်ဖြစ်၏။
“ရှောင်ဟန်... မင်း ဘာတွေလျှောက်ပြောနေတာလဲ၊ ဟိုဘက်သွားပြီး ဆော့နေလိုက်ဦးနော်”
လင်းဇိရော့၏ စကားကြောင့် ကသိကအောက်ဖြစ်နေသော လေထုမှာ ပြေလျော့သွားရသည်။
“ကျွန်တော်က နောက်လိုက်တာပါ ဟီးဟီး...”
ရှောင်ဟန်သည် ရွှယ်ယွဲ့အာ၏ လက်ကလေးကို ဆွဲလိုက်ရင်း
“ယွဲ့အာ... လာ၊ မင်း အစ်မကို သွားရှာဖို့ ငါ လိုက်ပို့ပေးမယ်”
“နင်က ငါ့အစ်မကို သိလို့လား”
“သိတာပေါ့... မင်းအစ်မက ရွှယ်ဘင်းအာ မဟုတ်လား”
ရှောင်ဟန် ထွက်ခွာသွားပြီးနောက် ကွင်းပြင်ကျယ်ကြီးမှာ ပြန်လည်တိတ်ဆိတ်သွားပြီး သိုင်းဝိညာဉ်နိုးထခြင်း အခမ်းအနားကို ဆက်လက်လုပ်ဆောင်ကြလေသည်။
အခြားတစ်ဖက်တွင်မူ...
ရွှယ်ဘင်းအာသည် ရေခဲနန်းဆောင်အတွင်း၌ ကျင့်ကြံခြင်းအလုပ်ကို အားသွန်ခွန်စိုက် လုပ်ဆောင်နေစဉ် ရုတ်တရက်ဆိုသလို သူမ၏ နှလုံးခုန်သံများ မြန်ဆန်လာပြီး ခန္ဓာကိုယ်အတွင်းရှိ အချုပ်အနှောင်တစ်ခုခုကို ချိုးဖျက်လိုက်နိုင်သကဲ့သို့ ခံစားလိုက်ရသည်။
“အောင်မြင်ပြီ... ငါ နောက်ဆုံးတော့ အဆင့်ဆယ်ကို ချိုးဖျက်နိုင်ခဲ့ပြီပဲ။ ငါ ဝိညာဉ်သားရဲတွေကို သွားရောက်အမဲလိုက်ပြီး ငါ့ရဲ့ ပထမဆုံး ဝိညာဉ်ကွင်းကို ရယူနိုင်တော့မယ်”
လူအများစုသည် သိုင်းဝိညာဉ်နိုးထပြီးနောက်ပိုင်းတွင် လိုက်လျောညီထွေဖြစ်အောင် အချိန်အတန်ကြာ ညှိယူရလေ့ရှိပြီး မိမိနှင့် သင့်လျော်မည့် ကျင့်ကြံခြင်းနည်းလမ်းကို တဖြည်းဖြည်းချင်း ရှာဖွေကြရသည်။ ထို့ကြောင့် ပထမဆုံးနှစ်တွင် များပြားလှသော တိုးတက်မှုကို မရရှိနိုင်ကြချေ။ ရွှယ်ဘင်းအာ၏ ရေခဲဖီးနစ် သိုင်းဝိညာဉ်သည် အလွန်အမင်း အစွမ်းထက်လှသည်။ သူမအနေဖြင့် နိုးထစောစီးစွာတွင် သိုင်းဝိညာဉ်၏ စွမ်းအားကို မထိန်းချုပ်နိုင်ခဲ့သောကြောင့် လိုက်လျောညီထွေဖြစ်အောင် ညှိယူရုံမျှဖြင့် ခြောက်လကျော် အချိန်ကုန်လွန်ခဲ့ရသည်။ သို့သော် သူမ၏ နားလည်သဘောပေါက်မှု အရည်အချင်းက ကောင်းမွန်လွန်းသဖြင့် သုံးလေးလမျှ ကျင့်ကြံရုံဖြင့် ဝိညာဉ်စွမ်းအားကို တစ်ဆင့် တိုးမြှင့်နိုင်ခဲ့ခြင်း ဖြစ်၏။
“အစ်မ...”
“ယွဲ့အာ... ညည်း ဒီနေရာကို ဘယ်လိုလုပ် ရှာတွေ့တာလဲ”
“ရှောင်ဟန် ခေါ်လာပေးတာပါ”
ရွှယ်ဘင်းအာနှင့် ရှောင်ဟန်တို့သည် မနေ့ကမှ တစ်ကြိမ်သာ ဆုံတွေ့ဖူးခြင်းဖြစ်သည်။
“မင်း ဘာလို့ ကျောင်းကို ထပ်လာပြန်တာလဲ၊ မင်းအမေ အရိုက်မှာကို မကြောက်ဘူးလား။ ပြီးတော့ မင်း သိုင်းဝိညာဉ်နိုးထဖို့ ဝိညာဉ်နန်းတော်ကို ဘာလို့မသွားတာလဲ”
“အစ်မ... ရှောင်ဟန်က သိုင်းဝိညာဉ်နိုးထပြီးပြီလေ။ သူ ရရှိခဲ့တဲ့ သိုင်းဝိညာဉ်က စစ်မှန်သော ရေခဲလေးနှင့်မြှား ဖြစ်ပြီးတော့ မွေးရာပါအပြည့်အဝရှိတဲ့ ဝိညာဉ်စွမ်းအားတောင် ပါတာပါ”
“ဘာ... မွေးရာပါ အပြည့်အဝရှိတဲ့ ဝိညာဉ်စွမ်းအား ဟုတ်လား”
ရွှယ်ဘင်းအာသည် မယုံကြည်နိုင်ဟန် အပြည့်ဖြင့် ရှောင်ဟန်ကို စိုက်ကြည့်လိုက်မိသည်။
၎င်းတို့၏ စကားပြောသံများက အခြားသူများ၏ အာရုံကိုလည်း ဆွဲဆောင်သွားခဲ့ရာ ယွီဟိုင်ရိုနှင့် ကူးချင်းပေါ်တို့ပါ ရောက်ရှိလာကြသည်။
“ရှောင်ဟန်... မင်းက တကယ်ပဲ မွေးရာပါအပြည့်အဝရှိတဲ့ ဝိညာဉ်စွမ်းအား ပိုင်ရှင်လား”
“ဟုတ်ပါတယ်... ကျောင်းအုပ်ကြီးကျောက် ကိုယ်တိုင် စမ်းသပ်ပေးခဲ့တာပါ”
“ဒါဆို မင်းက တို့ကျောင်းမှာပဲ သိုင်းဝိညာဉ်ကို နိုးထစေခဲ့တာပေါ့”
“ဟုတ်တယ်လေ... ကြည့်ဦး၊ ကျွန်တော် မိန်းကလေးဝတ်စုံတောင် မလဲရသေးဘူး၊ အမေမိသွားလို့ အဆော်ခံလိုက်ရသေးတယ်”
“ခံရမှာပေါ့”
အားလုံးက ရယ်မောလိုက်ကြသည်။ ထိုစဉ် ကူးချင်းပေါ်က ရုတ်တရက် ဆိုလာသည်။
“ရှောင်ဟန်မှာ မွေးရာပါအပြည့်အဝရှိတဲ့ ဝိညာဉ်စွမ်းအား ရှိနေလိမ့်မယ်လို့ ထင်မထားမိဘူးပဲ။ နှမြောဖို့ကောင်းတာက ရှောင်ဟန်က မိန်းကလေးမဟုတ်တော့ တို့ကျောင်းမှာ နေလို့မရတာပဲနော်”
“ဟုတ်ပါရဲ့... အကယ်၍ ဆရာမလင်းသာ ရှောင်ဟန်ကို တစ်ခြားလွှတ်လိုက်ရင် တို့တွေ ရှောင်ဟန်ကို နောက်ခါ တွေ့ရတော့မှာ မဟုတ်ဘူး”
“ပိုပြီး ကြောက်ဖို့ကောင်းတာက... အကယ်၍ နောင်ကျရင် ဝိညာဉ်သခင်ပြိုင်ပွဲမှာ ရှောင်ဟန်လိုမျိုး တူညီတဲ့ ဓာတ်သဘာဝရှိတဲ့ အစွမ်းထက်ပြိုင်ဘက်နဲ့ တွေ့ရင် တို့တွေ ဘာမှတတ်နိုင်မှာ မဟုတ်တော့ဘူး”
ရှောင်ဟန်က မာနတလူလူဖြင့် ပြုံးလိုက်ရင်း
“မစိုးရိမ်ပါနဲ့ အစ်မတို့ရာ... အကယ်၍ ကျွန်တော်က အစ်မတို့ရဲ့ ပြိုင်ဘက် ဖြစ်လာခဲ့ရင်တောင် အစ်မတို့ကို အနိုင်ပေးမှာပါ”
“အံမယ်... မင်းက တကယ်ကြီး ထင်နေတာလား”
ကူးချင်းပေါ်က ရွှယ်ဘင်းအာကို ကြည့်ကာ မေးလိုက်သည်။
“ဘင်းအာ... ဒါက ဘယ်သူလဲ”
“ညီမအရင်းလေးပါ... ရွှယ်ယွဲ့အာ တဲ့။ ဒါနဲ့ ယွဲ့အာ... ညည်း ဘယ်လို သိုင်းဝိညာဉ်ကို နိုးထစေခဲ့တာလဲ၊ ဝိညာဉ်စွမ်းအားကကော ဘယ်လောက်လဲ”
“ရင်ယု လင်းပိုင် သိုင်းဝိညာဉ်ပါ၊ ဝိညာဉ်စွမ်းအား အဆင့်ခုနစ် ရှိပါတယ်။ နောင်ကျရင် အစ်မတို့နဲ့အတူ ပညာသင်ကြားခွင့်ရတော့မှာပါ”
“ဟုတ်ပြီ... ကျောင်းသူသစ်လေးကို ကြိုဆိုပါတယ်”
ရွှယ်ယွဲ့အာမှာ အလွန်ပင် ပျော်ရွှင်သွားရသည်။
“အစ်မ... အစ်မရဲ့ အခု ဝိညာဉ်စွမ်းအားအဆင့်က ဘယ်လောက်လဲ၊ အဆင့်ဆယ်ကို ချိုးဖျက်နိုင်ပြီလား”
“အင်း... ဒီနေ့တင်ပဲ ချိုးဖျက်နိုင်ခဲ့တာ”
“ဘင်းအာ... ဂုဏ်ယူပါတယ်နော်”
ယွီဟိုင်ရိုက ဆိုလာသည်။ ယွီဟိုင်ရိုသည် အသက်ကိုးနှစ်အရွယ်ရှိပြီး အားကောင်းသော တိုက်ခိုက်ရေးစနစ် ဝိညာဉ်သခင်တစ်ဦး ဖြစ်သည်။ သူမသည် သိုင်းဝိညာဉ်နိုးထကတည်းက ထျန်းရွှေအကယ်ဒမီတွင် သုံးနှစ်တိုင်တိုင် ပညာသင်ကြားခဲ့သော်လည်း ယခုအချိန်အထိ အဆင့်တစ်ဆယ့်လေးသာ ရှိသေးသည်။
“ဘင်းအာကော ရှောင်ဟန်ပါ အဆင့်ဆယ်ကို ရောက်နေပြီဆိုတော့ မင်းတို့တွေ မကြာခင်မှာ ပထမဆုံး ဝိညာဉ်ကွင်းကို ရရှိနိုင်ကြတော့မှာပဲ”
“အင်း...”
ရှောင်ဟန်နှင့် ရွှယ်ဘင်းအာတို့သည် တစ်ဦးကိုတစ်ဦး ကြည့်ကာ ပြုံးလိုက်ကြသည်။ ၎င်းတို့သည် မကြာမီအချိန်အတွင်း မိမိတို့၏ ပထမဆုံး ဝိညာဉ်ကွင်းကို ပိုင်ဆိုင်နိုင်ကြတော့မည် ဖြစ်ပေသည်။
အခြားတစ်ဖက်တွင်...
သိုင်းဝိညာဉ်နိုးထခြင်း အခမ်းအနားပြီးဆုံးပြီးနောက် ကျောင်းအုပ်ကြီးကျောက်သည် အကယ်ဒမီ၏ တာဝန်ခံအဖွဲ့ဝင်အချို့ကို အစည်းအဝေးခန်းမသို့ ဆင့်ခေါ်လိုက်သည်။
“ဒီနေ့ ကျင်းပခဲ့တဲ့ သိုင်းဝိညာဉ်နိုးထခြင်း အခမ်းအနားမှာ ရှောင်ဟန်တစ်ယောက် ထူးခြားဆန်းပြားတဲ့ သိုင်းဝိညာဉ်တစ်ခုကို နိုးထစေခဲ့ပြီး၊ မွေးရာပါအပြည့်အဝရှိတဲ့ ဝိညာဉ်စွမ်းအား ပါလာတယ်ဆိုတာ အားလုံးပဲ သိကြပြီးဖြစ်မှာပါ။ ဒီနေရာမှာ ရှိနေတဲ့သူတိုင်းဟာ ရှောင်ဟန် ကြီးပြင်းလာတာကို စောင့်ကြည့်ခဲ့ကြသူတွေချည်းပဲ။ သူက တို့ကျောင်းမှာပဲ ဆက်နေချင်တယ်လို့ ပြောတယ်၊ ဒီကိစ္စနဲ့ပတ်သက်ပြီး အားလုံးရဲ့ သဘောထားက ဘယ်လိုရှိလဲ”
လူတိုင်းက အသီးသီး ဆွေးနွေးငြင်းခုံလာကြသည်။
“ကျွန်တော်ကတော့ သဘောတူပါတယ်၊ မွေးရာပါအပြည့်အဝရှိတဲ့ ဝိညာဉ်စွမ်းအား ပါဝင်တဲ့ ရေခဲဓာတ်သဘာဝ ဝိညာဉ်သခင်ဆိုတာ နှစ်တစ်ရာမှာ တစ်ယောက် ပေါ်ထွန်းဖို့တောင် ခဲယဉ်းလှပါတယ်။ နောင်တစ်ချိန်မှာ သူဟာ တို့အကယ်ဒမီရဲ့ ဂုဏ်ယူစရာ သမိုင်းမှတ်တိုင်တစ်ခု ဖြစ်လာနိုင်ပါတယ်”
“ပြဿနာက တို့ကျောင်းက အမျိုးသမီးကျောင်းသူတွေကိုပဲ လက်ခံတာလေ၊ အမျိုးသားကျောင်းသားကို လက်ခံခဲ့တဲ့ သာဓကမျိုး တစ်ခါမှ မရှိခဲ့ဖူးဘူး”
“စည်းမျဉ်းဆိုတာ သေနေတာပဲ၊ လူကတော့ ရှင်နေတာပဲမဟုတ်လား။ ဒီတစ်ကြိမ်တင်ပဲ ချွင်းချက်အနေနဲ့ လက်ခံပေးလို့မရဘူးလား”
“ဒိုလော် ကုန်းမြေတိုက်ကြီးတစ်ခုလုံးကို ကြည့်လိုက်ရင် ရေခဲစနစ် ဝိညာဉ်သခင်တွေ ကြီးပြင်းလာဖို့အတွက် တို့ထျန်းရွှေအကယ်ဒမီထက် ပိုပြီး အထောက်အကူပြုနိုင်တဲ့ အရင်းအမြစ်မျိုး ရှိတဲ့ကျောင်း ရှိသေးလို့လား၊ ရှိရင်လည်း ဝိညာဉ်နန်းတော် အကယ်ဒမီပဲ ရှိလိမ့်မယ်”
“ရှောင်ဟန်မှာ မွေးရာပါအပြည့်အဝရှိတဲ့ ဝိညာဉ်စွမ်းအား ရှိနေတဲ့ သတင်းကတော့ အပြင်ကို ပျံ့နှံ့သွားလောက်ပြီ။ မကြာခင်မှာ ဝိညာဉ်နန်းတော်ခွဲကလူတွေ သူ့ကို လာရောက်စည်းရုံးကြလိမ့်မယ်ဆိုတာ သေချာသလောက်ပဲ။ ဘီဘီသုန်းရဲ့ အုပ်ချုပ်မှုအောက်မှာ ဝိညာဉ်နန်းတော်က အရင်လို မဟုတ်တော့ဘူး။ ရှောင်ဟန်ကို သူတို့ ခေါ်ဆောင်သွားတာမျိုး ကျွန်မ အဖြစ်မခံနိုင်ဘူး”
“ဟူး... နှမြောစရာကောင်းလိုက်တာ၊ ရှောင်ဟန်က ယောက်ျားလေး ဖြစ်နေလို့သာပဲ”
အခြေအတင် ဆွေးနွေးနေကြစဉ်အတွင်း လင်းဇိရော့မှာမူ တိတ်ဆိတ်လျက်သာ ရှိနေသည်။ ထိုစဉ် ကျောင်းအုပ်ကြီးကျောက်က လှမ်း၍ မေးလိုက်၏။
“ဇိရော့... မင်းကော ဘယ်လိုထင်လဲ”
လင်းဇိရော့မှာ အလွန်ပင် စိတ်ဒွိဟဖြစ်နေရသည်။ သူမ ရှောင်ဟန်ကို ပြောခဲ့သည်များမှာ စိတ်တိုတိုနှင့် ပြောခဲ့ခြင်းသာ ဖြစ်၏။ သူမသည်လည်း ရှောင်ဟန်ကို မိမိအနားတွင်သာ ရှိစေချင်သည်မှာ အမှန်ပင်ဖြစ်သော်လည်း ရှောင်ဟန်ကြောင့်နှင့် ထျန်းရွှေအကယ်ဒမီ၏ စည်းမျဉ်းများကို မဖောက်ဖျက်ချင်ပေ။ အကယ်၍ ရှောင်ဟန်သာ သူမ မွေးစားထားသော သားမဟုတ်ခဲ့ပါက ဆက်ထားရန် ချက်ချင်း သဘောတူမိမည် ဖြစ်သည်။
“ကျောင်းအုပ်ကြီးကျောက်... ကျွန်မကတော့ ကျောင်းအုပ်ကြီး သဘောအတိုင်းပါပဲ”
ကျောင်းအုပ်ကြီးကျောက်သည် ခဏမျှ စဉ်းစားလိုက်ပြီးနောက် အကြံပြုချက်တစ်ခု ပေးလာသည်။
“ဒါဆိုရင်... တို့တွေ ရှောင်ဟန်ကို အမည်ခံကျောင်းသားတစ်ယောက်အနေနဲ့ ထျန်းရွှေအကယ်ဒမီမှာပဲ ဆက်လက်ပညာသင်ကြားခွင့် ပေးလိုက်ရင်ကော ဘယ်လိုလဲ၊ အားလုံးကကော ဘယ်လိုမြင်လဲ”
“ဒါဆိုရင် သူက တို့အကယ်ဒမီရဲ့ ကိုယ်စားလှယ်အသင်းမှာ ပါဝင်ပြီး နောင်ကျရင် ကျင်းပမယ့် ဝိညာဉ်သခင်ပြိုင်ပွဲတွေမှာ ဝင်ရောက်ယှဉ်ပြိုင်ခွင့် ရဦးမှာလား”
“ရတာပေါ့... အရန်လူအနေနဲ့ ထည့်ထားလို့ရပါတယ်”
“ကျောင်းအုပ်ကြီးကျောက်ရဲ့ အကြံဉာဏ်က အလွန်ကောင်းပါတယ်၊ ကျွန်မ သဘောတူပါတယ်”
“ဟုတ်ပါတယ်... ကျွန်တော်လည်း သဘောတူပါတယ်”
အားလုံးက သဘောတူညီကြောင်း ခေါင်းညိတ်လိုက်ကြသည်။
ကျောင်းအုပ်ကြီးကျောက်သည် အလွန်ပင် ဝမ်းမြောက်သွားရပြီး
“ဒါဆိုရင်တော့ ဒီအတိုင်းပဲ ဆုံးဖြတ်လိုက်ပြီ”
ထျန်းရွှေအကယ်ဒမီသည် နှစ်ပရိစ္ဆေဒကြာမြင့်ပြီဖြစ်သော ကျောင်းတော်ကြီးတစ်ခုအနေဖြင့် ယခင် ဝိညာဉ်သခင်ပြိုင်ပွဲများတွင် အထင်ကြီးလောက်စရာ အစွမ်းများကို ပြသနိုင်ခဲ့သော်လည်း အဆင့်အကောင်းဆုံး သုံးနေရာအတွင်းသို့မူ တစ်ကြိမ်မျှ မဝင်ရောက်နိုင်ခဲ့ဖူးချေ။ ယခုနှစ် ဝိညာဉ်သခင်ပြိုင်ပွဲမှာ ပြီးဆုံးသွားခဲ့ပြီဖြစ်ရာ ဝိညာဉ်နန်းတော် အကယ်ဒမီက မျှော်လင့်ထားသည့်အတိုင်းပင် ချန်ပီယံဆုကို ဆွတ်ခူးသွားခဲ့သည်။ မိုးကြိုးအကယ်ဒမီနှင့် လေနတ်မင်းအကယ်ဒမီ ဟူသော အခြေခံဓာတ်စနစ် အကယ်ဒမီကျောင်းနှစ်ကျောင်းမှာလည်း ထျန်းရွှေအကယ်ဒမီ၏ အထက်တွင်သာ ထပ်မံရပ်တည်နေခဲ့သည်။ သို့သော် ယခုအခါ ရှောင်ဟန်နှင့် ရွှယ်ဘင်းအာတို့ကဲ့သို့သော ပါရမီရှင် မျိုးဆက်သစ်များ ရှိလာပြီဖြစ်ရာ နောက်ထပ် ဆယ်စုနှစ်တစ်ခုအကြာတွင် ကျင်းပမည့် ဝိညာဉ်သခင်ပြိုင်ပွဲ၌ ၎င်းတို့အနေဖြင့် တစ်စုံတစ်ခုကို ဖန်တီးပြနိုင်ကောင်း ပြနိုင်လိမ့်မည် ဖြစ်၏။ ထျန်းရွှေအကယ်ဒမီ၏ တာဝန်ရှိသူများသည် မိုးကြိုးနှင့် လေနတ်မင်းအကယ်ဒမီကျောင်းများကို ကျော်ဖြတ်နိုင်မည့် မျှော်လင့်ချက် ရောင်ခြည်သန်းလာသည်ဟု မြင်မိကြသည်။
အစည်းအဝေး ပြီးဆုံးသွားသည်နှင့် တပြိုင်နက် ထျန်းရွှေမြို့တော် ဝိညာဉ်နန်းတော်ခွဲမှ ဂိုဏ်းအုပ်သည် ကျောင်းတော်သို့ ကိုယ်တိုင်ကိုယ်ကျ ဆိုက်ဆိုက်မြိုက်မြိုက် ရောက်ရှိလာခဲ့တော့သည်။
မွေးရာပါအပြည့်အဝရှိသော ဝိညာဉ်စွမ်းအားပိုင်ရှင် ကလေးငယ်များမှာ ဝိညာဉ်နန်းတော် အကယ်ဒမီအတွက် အဓိက စည်းရုံးရမည့် ပစ်မှတ်များ ဖြစ်ကြသည်မှာ အမှန်ပင်ဖြစ်သည်။
“ကျောင်းအုပ်ကြီးကျောက်... ဒီနေ့ ကျင်းပတဲ့ သိုင်းဝိညာဉ်နိုးထခြင်း အခမ်းအနားမှာ ယောက်ျားလေးတစ်ယောက်က စစ်မှန်သော ရေခဲလေးနှင့်မြှား သိုင်းဝိညာဉ်ကို နိုးထစေခဲ့ပြီး မွေးရာပါအပြည့်အဝရှိတဲ့ ဝိညာဉ်စွမ်းအား ပါဝင်တယ်လို့ ကြားသိရပါတယ်။ အကယ်၍ အဲဒီကလေးကို တို့ ဝိညာဉ်နန်းတော် အကယ်ဒမီမှာ ထားပြီး လေ့ကျင့်ပေးမယ်ဆိုရင် ဧကန်မုချ ထူးချွန်ထက်မြက်တဲ့ လူစွမ်းကောင်းတစ်ယောက် ဖြစ်လာမှာ သေချာပါတယ်။ အဲ... ဒါနဲ့ ကလေးကော ဘယ်မှာလဲဟင်”
“စိတ်မကောင်းပါဘူးခင်ဗျာ... ကျွန်တော်တို့ အဲဒီကလေးကို ကျောင်းမှာပဲ ထိန်းသိမ်းထားလိုက်ပါပြီ”
“ဘာ... ခင်ဗျားတို့ ထျန်းရွှေအကယ်ဒမီက အမျိုးသမီးကျောင်းသူတွေကိုပဲ လက်ခံတာ မဟုတ်ဘူးလား”
“သူ့အတွက်ကြောင့်နဲ့ ကျွန်တော်တို့တွေ ချွင်းချက်အနေနဲ့ အမည်ခံကျောင်းသားအဖြစ် လက်ခံဖို့ ဆုံးဖြတ်လိုက်ပါပြီ၊ ဒါကြောင့်မို့လို့ ဝိညာဉ်နန်းတော်အနေနဲ့ ပူပန်နေဖို့ မလိုပါဘူးခင်ဗျာ”