အခန်း (၁၉) အဲ့ဒီကောင်က ဖားတတ်တဲ့ကောင်ပဲ

မင်းသား ရွှီချင်းဟယ်အဖြစ် ဟန်ဆောင်ထားသည့် ချန်ရန့်ရွှယ်နှင့် ပထမဆုံးအကြိမ် တွေ့ဆုံမှုသည် အတော်လေး ချောမွေ့ခဲ့သည်ဟု ဆိုရမည်။ ရှောင်ဟန်သည် သူမ၏ ရှေ့မှောက်တွင် မိမိ၏ အစွမ်းအစနှင့် အလားအလာများကို ပြသနိုင်ခဲ့သဖြင့် မျှော်လင့်ချက်ထားရကျိုးနပ်သည့် လူငယ်တစ်ဦးဖြစ်ကြောင်း သက်သေပြခဲ့ပြီး ဖြစ်သည်။ ချန်ရန့်ရွှယ်အနေဖြင့် 'မသေမျိုးဆေးပင်များ၏ သရုပ်ဖော်လမ်းညွှန်' ကို ရအောင် ကူညီပေးလိမ့်မည်ဟု သူ ယုံကြည်နေသည်။ ၎င်းမှာ သူတစ်ယောက်တည်းကြောင့်တင် မဟုတ်ဘဲ ထျန်းရွှေ အကယ်ဒမီ၏ အင်အားကိုပါ သူမဘက်ပါအောင် ဆွဲဆောင်ချင်သောကြောင့် ဖြစ်သည်။

သေချာတာပေါ့... ရှောင်ဟန် လိုချင်သည့်အရာက 'မသေမျိုးဆေးပင်များ၏ သရုပ်ဖော်လမ်းညွှန်' စာအုပ်ရုံတင်သက်သက် မဟုတ်ချေ။ သူသည် ချန်ရန့်ရွှယ်နှင့် ပိုမိုရင်းနှီးအောင် လုပ်ပြီးနောက် သူမထံမှတစ်ဆင့် ဒုကူးဘိုနှင့် ပတ်သက်သည့် သေနင်္ဂဗျူဟာမြောက် သတင်းအချက်အလက်များကို စုံစမ်းချင်နေခြင်း ဖြစ်သည်။ ဒုကူးဘိုတစ်ယောက် ရေခဲနှင့် မီးလျှံ ဝိညာဉ်စမ်းရေတွင်း၌ ရှိနေသရွဲ့ ရှောင်ဟန်အနေဖြင့် ထိုနေရာသို့ ဝင်ရောက်နိုင်မည် မဟုတ်ပါ။ သူ မရှိသည့် အချိန်မှသာ ထိုနေရာရှိ ဆေးပင်ဆန်းများကို သွားရောက်ခူးယူခွင့် ရရှိမည် ဖြစ်သည်။ ဤအစီအစဉ်ကို နောက်လာမည့် သုံးနှစ်အတွင်း အပြီးသတ်ရမည်ဖြစ်ရာ ရှောင်ဟန်အတွက် အချိန်သိပ်မကျန်တော့ချေ။

နန်းတော်ထဲမှ ထွက်လာပြီးနောက် ရှောင်ဟန်က ရွှီချင်းဟယ်နှင့် စကားပြောခဲ့သည်များကို လင်းဇိရော့အား ပြန်ပြောပြလိုက်ရာ လင်းဇိရော့မှာ သက်ပြင်းတစ်ချက် ချနိုင်တော့သည်။

"ရှောင်ဟန်... မင်းသားက မင်းကို ကူညီဖို့ သဘောတူလိမ့်မယ်လို့ အမေ တကယ်မထင်ထားဘူး၊ ဒါပေမဲ့ မင်းပြောတဲ့စာအုပ်က ဝိညာဉ်နန်းတော်ထဲမှာ ရှိတာဆိုတော့... သူ တကယ်ပဲ ရအောင် ယူပေးနိုင်ပါ့မလား"

"သူ လုပ်နိုင်လိမ့်မယ်လို့ ကျွန်တော် ယုံကြည်တယ်"

ယခုအချိန်တွင် လင်းဇိရော့အား ရွှီချင်းဟယ်၏ အဆင့်အတန်းအမှန်ကို ပြောပြရန် ရှောင်ဟန်အတွက် အဆင်မပြေသေးချေ။ လင်းဇိရော့က ဆက်လက်၍ သတိပေးရှာသည်။

"ရှောင်ဟန်... တကယ်လို့ သူက မင်းကို အဲ့ဒီစာအုပ် တကယ်ရှာပေးနိုင်ခဲ့ရင်တောင် မင်းအနေနဲ့ ဆေးပင်ဆန်းတွေကို လေ့လာဖို့ ဒါမှမဟုတ် လိုက်ရှာဖို့ပဲ စိတ်သွန်မနေရဘူးနော်၊ အခု ဝိညာဉ်သခင် ပြိုင်ပွဲကြီးအတွက် လေးနှစ်ကျော်ပဲ လိုတော့တာ၊ ကျင့်ကြံခြင်းကသာ မင်းအတွက် အရေးကြီးဆုံးပဲ"

"အမေကလည်း... ကျွန်တော် ဘယ်လောက်အထိ လုပ်ရမလဲဆိုတာ ကိုယ့်ကိုယ်ကိုယ် သိပါတယ်၊ မသေမျိုးဆေးပင်တွေဆိုတာ ဒီလောက် လွယ်လွယ်နဲ့ ဘယ်ရှာလို့ရပါ့မလဲ၊ ဒါပေမဲ့ အဲ့ဒီအပင်တွေက အာဟာရဓာတ် အရမ်းပြည့်ဝတာဗျ၊ ဝေလငါးကော်ထက်တောင် အဆပေါင်းများစွာ ပိုပြီး အစွမ်းထက်သေးတယ်၊ ကျွန်တော်တို့လို လူငယ် ဝိညာဉ်သခင်တွေသာ သင့်တော်တဲ့ မသေမျိုးဆေးပင်ကို မှီဝဲခွင့်ရရင် ကျင့်ကြံခြင်းအရှိန်အဟုန်က အဆမတန် မြန်ဆန်သွားလိမ့်မယ်"

"မင်းပြောသလောက် တကယ်ပဲ အစွမ်းထက်လို့လား"

"သေချာတာပေါ့ အမေရဲ့"

လင်းဇိရော့သည် တစ်စုံတစ်ခုကို ရိပ်မိသွားပုံရပြီး တည်တံ့စွာဖြင့်

"မင်းလေး... ငါ သတိပေးထားမယ်နော်၊ ဒုကူးဘိုရဲ့ အဆိပ်ဝင်္ကပါထဲက အရာတွေကို လုံးဝ စိတ်မကူးနဲ့၊ အဲ့ဒီထဲမှာ ဘယ်လို ရှားပါးရတနာတွေနဲ့ ဆေးပင်ဆန်းတွေပဲ ရှိရှိ မင်း သွားပြီး လောဘမကြီးနဲ့၊ အဲ့ဒါက ဒုကူးဘိုရဲ့ ပိုင်နက်ပဲ၊ ပြီးခဲ့တဲ့အကြိမ်က ငါတို့ ကံကောင်းလို့ လွတ်လာခဲ့တာ၊ မင်း နောက်တစ်ကြိမ် အန္တရာယ်အဖြစ်မခံရဘူး"

"အမေကလည်း စိုးရိမ်လွန်နေပြန်ပြီ၊ ကျွန်တော်က ကိုယ့်အသက်ကို ဥပါဒ်ပေးမယ့် ကိစ္စမျိုး နောက်ပြောင်ပြီး လုပ်ပါ့မလား"

"မင်းအကြောင်း ငါ မသိတာကျလို့! ဘာပဲဖြစ်ဖြစ် အဲ့ဒီအကြောင်းကို လုံးဝ မတွေးနဲ့တော့"

"ဟုတ်ကဲ့ပါ... အမေ စကားကို နားထောင်ပါ့မယ်"

ရှောင်ဟန်သည် လင်းဇိရော့ကို စိတ်မပူစေချင်သော်လည်း ရေခဲနှင့် မီးလျှံ ဝိညာဉ်စမ်းရေတွင်းသို့ သွားရောက်ကာ ဆေးပင်ဆန်းများကို ရယူမည့် အစီအစဉ်ကိုမူ မစွန့်လွှတ်နိုင်ချေ။ သို့သော် ဤအစီအစဉ်ကို လုံးဝဥဿုံ ဘေးကင်းစိတ်ချရသည့် အခြေအနေမျိုးမှသာ အကောင်အထည်ဖော်မည် ဖြစ်သည်။

ရက်အနည်းငယ် ကြာပြီးနောက်...

ရှောင်ဟန်သည် ထျန်းရွှေ အကယ်ဒမီသို့ ပြန်ရောက်လာပြီး နှင်းခဲတောအုပ်ထဲတွင် နှင်းငန်းများကို မည်သို့ အမဲလိုက်ခဲ့ကြောင်းနှင့် ပျံသန်းခြင်းစွမ်းရည်ကို မည်သို့ ရရှိခဲ့ကြောင်းတို့ကို ရွှယ်ဘင်းအာအား ပြောပြလိုက်သည်။ ရွှယ်ဘင်းအာမှာ အံ့အားသင့်ကာ ဝမ်းသာသွားရ၏။

"ရှောင်ဟန်... မင်းက ပျံသန်းနိုင်တဲ့ စွမ်းရည်ကို တကယ်ရခဲ့တာလား၊ တကယ့်ကို ကောင်းတာပဲ"

"ဟုတ်တယ်... နောက်ဆိုရင် ငါလည်း မင်းလိုပဲ ကောင်းကင်ထက်မှာ လွတ်လွတ်လပ်လပ် ပျံသန်းနိုင်ပြီ၊ ဒါနဲ့... မင်းကော အဆင့် ၃၀ ကို ချိုးဖျက်တော့မယ့် အရိပ်အယောင် ခံစားရပြီလား"

"မရောက်သေးဘူး၊ ဒါပေမဲ့ ငါ အဆင့် ၃၀ ကို ချိုးဖျက်နိုင်ခဲ့ရင်တောင် ဝိညာဉ်သားရဲတွေကို ဖမ်းဖို့ နှင်းခဲတောအုပ်ထဲ ချက်ချင်းသွားဖြစ်ဦးမှာ မဟုတ်ဘူး"

ရှောင်ဟန်က အနည်းငယ် ဝေခွဲမရဖြစ်ကာ

"ဘာဖြစ်လို့လဲ"

"ငါ ရွှီဝေဝေ ကို စောင့်ချင်လို့လေ၊ ငါတို့ချင်း ကတိပေးထားတာ ရှိတယ်၊ နှစ်ယောက်လုံး အဆင့် ၃၀ ပြည့်မှ နှင်းခဲတောအုပ်ကို အတူတူ သွားကြမယ်လို့၊ မင်းမရှိတဲ့ အချိန်တုန်းက သူမက အဆင့် ၂၉ ကို ချိုးဖျက်သွားပြီလေ"

"ဩော်... အဲ့ဒါဆိုရင်လည်း ကောင်းတာပေါ့၊ ကြည့်ရတာ မင်းတို့နှစ်ယောက် ဆက်ဆံရေး တော်တော်ပြေလည်ပုံရတယ်"

"အင်း..."

ရှောင်ဟန်သည် ရွှယ်ဘင်းအာနှင့် ရွှီဝေဝေတို့၏ သိုင်းဝိညာဉ် ပေါင်းစပ်ခြင်းအတတ်ကို တွေးမိသွားသည်။ သိုင်းဝိညာဉ် ပေါင်းစပ်ခြင်းအတတ်သည် သိုင်းဝိညာဉ်အချင်းချင်းနှင့် စိတ်ချင်း အပြန်အလှန် နားလည်မှု ရှိရန် လိုအပ်သည်။ ၎င်းတို့နှစ်ဦးသည် ထျန်းရွှေ အကယ်ဒမီသို့ အတူတူ ဝင်ရောက်ခဲ့ကြခြင်း မဟုတ်သော်လည်း အသင်းအသစ် ဖွဲ့စည်းပြီးနောက်တွင်မူ လျင်မြန်စွာပင် ခိုင်မာသော သံယောဇဉ်ကို တည်ဆောက်နိုင်ခဲ့ကြသည်။

ယခုအခါ ရွှီဝေဝေတွင် ဝိညာဉ်စွမ်းရည် နှစ်ခု ရှိနေပြီဖြစ်သည်။ ပထမ ဝိညာဉ်စွမ်းရည်မှာ 'မိုးတိမ်မှောင်' ဖြစ်ပြီး ရာသီဥတုကို ထိန်းချုပ်ကာ မိုးတိမ်မည်းများ ရောက်ရှိလာအောင် လုပ်ဆောင်နိုင်သည်။ ဒုတိယ ဝိညာဉ်စွမ်းရည်မှာမူ 'မိုးသည်းထန်စွာရွာသွန်းခြင်း' ဖြစ်ပြီး ယင်းကို အသက်သွင်းရန် ကောင်းကင်တွင် မိုးတိမ်မည်းများ ရှိနေဖို့ လိုအပ်သည်။ ဤစွမ်းရည်က ပဲစေ့ခန့်ရှိသော မိုးပေါက်များကို ကျဆင်းစေပြီး ကြီးမားလှသည့် ရေကာတာကြီးကဲ့သို့ ပြိုင်ဘက်ကို ရွှဲရွှဲစိုသွားအောင် တိုက်ခိုက်နိုင်သည်။ ရွှီဝေဝေ၏ ပထမစွမ်းရည် နှစ်ခုလုံးသည် တိုက်ခိုက်နိုင်စွမ်း သိပ်မရှိသော်လည်း အသင်းဖော်များအတွက် ရေဓာတ်စွမ်းအင်ဆိုင်ရာ ပံ့ပိုးမှုများကို ပေးစွမ်းနိုင်ပေသည်။

သို့သော် ရွှီဝေဝေနှင့် တစ်သင်းလုံးကို တကယ့် တိုးတက်ပြောင်းလဲမှု ပေးစွမ်းနိုင်မည့်အရာမှာ သူမ ရရှိတော့မည့် တတိယမြောက် ဝိညာဉ်စွမ်းရည် ဖြစ်သော 'နှင်းခဲနှင့် လေမုန်တိုင်း' ဖြစ်ကြောင်း ရှောင်ဟန် သိထားသည်။ ရွှီဝေဝေက ထိုဝိညာဉ်စွမ်းရည်ကို အသုံးပြုလိုက်လျှင် ကောင်းကင်ယံ၌ နှင်းခဲများနှင့် ဆီးနှင်းများ အမြောက်အမြား ထွက်ပေါ်လာပြီး ဝိညာဉ်စွမ်းရည် ဖုံးလွှမ်းထားရာ နယ်ပယ်တစ်ခုလုံး၏ အပူချိန်မှာ သိသိသာသာ ထိုးကျသွားကာ ပြိုင်ဘက်၏ တိုက်ခိုက်နိုင်စွမ်းကို အားနည်းသွားစေသည့်အပြင် ပြိုင်ဘက်၏ ဝိညာဉ်စွမ်းအားကိုလည်း ဆက်တိုက် ကုန်ခမ်းစေမည် ဖြစ်သည်။ ဤဝိညာဉ်စွမ်းရည်ကို အခြေခံမှသာ ရွှီဝေဝေသည် ရွှယ်ဘင်းအာနှင့် ပူးပေါင်းပြီး 'နှင်းခဲလေလွင့် လွင့်မျောခြင်း' ဟူသော သိုင်းဝိညာဉ် ပေါင်းစပ်ခြင်းစွမ်းရည်ကို ထုတ်ဖော်နိုင်မည် ဖြစ်သည်။

"ဘင်းအာ... မင်းက ရွှီဝေဝေနဲ့ ဆက်ဆံရေး ဒီလောက်ကောင်းတာ၊ သူမနဲ့ ပူးပေါင်းပြီး သိုင်းဝိညာဉ် ပေါင်းစပ်ခြင်းအတတ်ကို ဖော်ဆောင်ဖို့ မတွေးဖူးဘူးလား"

"သိုင်းဝိညာဉ် ပေါင်းစပ်ခြင်းအတတ် ဟုတ်လား..."

"ဟုတ်တယ်... ရွှီဝေဝေက ပံ့ပိုးမှုပေးတဲ့ ဝိညာဉ်သခင်ဖြစ်ပြီး မင်းမှာက အထွတ်အထိပ် သားရဲသိုင်းဝိညာဉ် ဖြစ်တဲ့ ရေခဲဖီးနစ် ရှိတယ်၊ မင်းတို့နှစ်ယောက်သာ စိတ်ချင်း တထပ်တည်းကျမယ်ဆိုရင် စိတ်ကူးလို့မရနိုင်တဲ့ ပေါင်းစပ်စွမ်းအားကို သေချာပေါက် ထုတ်ဖော်နိုင်လိမ့်မယ်"

ရွှယ်ဘင်းအာသည် ညင်သာစွာ ပြုံးလိုက်ပြီး ရှောင်ဟန်၏ အကြံပြုချက်ကို အတော်လေး စိတ်ဝင်စားသွားဟန်ဖြင့်

"မင်းရဲ့ အကြံဉာဏ်က တကယ့်ကို ကောင်းတာပဲ၊ သူမနဲ့ ငါ နှစ်ယောက်လုံး အဆင့် ၃၀ ကို ချိုးဖျက်ပြီးရင် သေချာပေါက် လေ့လာကြည့်ပါ့မယ်"

"ကောင်းပြီလေ... မင်းတို့နှစ်ယောက် အောင်မြင်လိမ့်မယ်လို့ ငါ ယုံကြည်ပါတယ်၊ အဲ့ဒီကျရင် ဝိညာဉ်သားရဲ သွားဖမ်းဖို့ နှင်းခဲတောအုပ်ကို ငါပါ လိုက်ခဲ့ပေးမယ်"

"အင်း... ကောင်းပြီ"

၎င်းတို့နှစ်ဦး စကားပြောနေစဉ် အသင်းထဲမှ အခြားမိန်းကလေးအချို့လည်း ရောက်ရှိလာကြသည်။ ယူဟိုင်ရိုက—

"ရှောင်ဟန်... မင်းရဲ့ တတိယ ဝိညာဉ်စွမ်းရည်က ပျံသန်းနိုင်တဲ့ စွမ်းရည် ပေးတယ်လို့ အကယ်ဒမီအုပ်ချုပ်ရေးမှူး လင်းဆီက ကြားတယ်၊ တကယ့်ကို အားကိုးရတာပဲ"

ကုချင်းပေါ်ကလည်း ဝင်ရောက်ထောက်ခံသည်။ 

"ဟုတ်တယ်... ရှောင်ဟန်က ပိုပိုပြီး အစွမ်းထက်လာပြီ၊ အစတုန်းကတော့ ရှောင်ဟန် ခရီးသွားနေလို့ စိုးရိမ်နေတာ"

"အခု ငါတို့အသင်းမှာ ရှောင်ဟန်ရော၊ ဘင်းအာရော နှစ်ယောက်လုံး ပျံသန်းနိုင်စွမ်း ရှိသွားပြီဆိုတော့ မိုးကြိုး အကယ်ဒမီနဲ့ ကမ္ဘာဦးလေပြေ အကယ်ဒမီတို့ကို ရင်ဆိုင်ရတဲ့အခါ သိပ်ပြီး အားနည်းချက် ဖြစ်မနေတော့ဘူးပေါ့"

မိုးကြိုး အကယ်ဒမီ၏ နောက်ကွယ်တွင် ရှိနေသော အင်အားစုမှာ 'ကောင်းကင်ပြာမိုးကြိုး နဂါးရာဇာ' မိသားစု ဖြစ်ပြီး အသင်းခေါင်းဆောင်မှာလည်း ထိုသိုင်းဝိညာဉ်ကို ပိုင်ဆိုင်ထားသည်။ အထွတ်အထိပ် သားရဲသိုင်းဝိညာဉ် ဖြစ်သည့်အလျောက် ကောင်းကင်ပြာမိုးကြိုး နဂါးရာဇာသည် ရက်စက်ပြင်းထန်လှသော တိုက်ခိုက်နိုင်စွမ်းကြောင့် ကျော်ကြားပြီး အစွမ်းထက်လှသည့် လျှပ်စီးတိုက်ခိုက်မှုများလည်း ပါဝင်သည်။ လျှပ်စီးသည် ရေခဲနှင့် ရေဓာတ်စွမ်းအင်များကို သဘာဝအတိုင်း နှိမ်နင်းနိုင်သည့် အာနိသင် ရှိချေသည်။ ထို့ကြောင့် ယခင် ဝိညာဉ်သခင် ပြိုင်ပွဲများတွင် ထျန်းရွှေ အကယ်ဒမီသည် မိုးကြိုး အကယ်ဒမီနှင့် တွေ့တိုင်း အကြိမ်ကြိမ် ရှုံးနိမ့်ခဲ့ရသည်။ မိုးကြိုး အကယ်ဒမီသည် ၎င်းတို့၏ ရင်ထဲတွင် မေးဖျောက်၍မရနိုင်သော ခြောက်လှန့်ဖွယ် အိပ်မက်ဆိုးတစ်ခု ဖြစ်နေခဲ့သည်။

မိုးကြိုး အကယ်ဒမီအပြင် ကမ္ဘာဦးလေပြေ အကယ်ဒမီသည်လည်း ထျန်းရွှေ အကယ်ဒမီကို ဖိနှိပ်ထားဆဲ ဖြစ်သည်။ ကမ္ဘာဦးလေပြေ အကယ်ဒမီသည် အံ့ဩဖွယ်ကောင်းသော အလျင်နှုန်းကြောင့် ကျော်ကြားသည့် လေဓာတ်စနစ် ဝိညာဉ်သခင်များနှင့်သာ စုဖွဲ့ထားခြင်း ဖြစ်ပြီး အသင်းဝင်အများစုမှာ ပျံသန်းနိုင်စွမ်း ရှိကြသဖြင့် ရင်ဆိုင်ရ အလွန်ခက်ခဲလှသည်။

ယခုတစ်ကြိမ် ထျန်းရွှေ အကယ်ဒမီ အသင်းတွင် ပျံသန်းနိုင်စွမ်းရှိသည့် ဝိညာဉ်သခင် နှစ်ဦးအထိ ပါဝင်လာခြင်းက ယခင်က အားနည်းချက်များကို ပြောင်းလဲပစ်ရန် အထောက်အကူ ဖြစ်စေနိုင်ပေသည်။ ထို့ကြောင့် လူတိုင်းက ရွှယ်ဘင်းအာနှင့် ရှောင်ဟန်တို့အပေါ် မျှော်လင့်ချက်ကြီးစွာ ထားနေကြခြင်း ဖြစ်သည်။

ရွှယ်ဘင်းအာက ဆက်ပြောသည်။ 

"ကမ္ဘာဦးလေပြေ အကယ်ဒမီ အသင်းရဲ့ ခေါင်းဆောင် ဖုန်းရှောက်ထျန်း ကလည်း မွေးရာပါ အပြည့်အဝရှိတဲ့ ဝိညာဉ်စွမ်းအား ပိုင်ရှင်တစ်ယောက်ပဲလို့ အကယ်ဒမီအုပ်ချုပ်ရေးမှူး ကျောက်ဆီက ကြားတယ်၊ သူက ယခုနှစ်မှာ အသက် တစ်ဆယ့်ကိုးနှစ် ရှိပြီဖြစ်ပြီး အစွမ်းလည်း တော်တော်ထက်မြက်တယ်၊ ထူးဆန်းတာက သူက ပြီးခဲ့တဲ့ ဝိညာဉ်သခင် ပြိုင်ပွဲတုန်းက ဘာလို့မပါဝင်ခဲ့တာလဲ မသိဘူး"

"ဖုန်းရှောက်ထျန်း ဟုတ်လား..." ရှောင်ဟန်က ပြုံးလိုက်ရင်း

"အဲ့ဒီကောင်က ဖားတတ်တဲ့ကောင်ဗျ၊ သူက သူနှစ်သက်တဲ့ မိန်းကလေးအတွက်နဲ့ မိမိရဲ့ အဆင့်ကို တမင်တကာ ထိန်းထားပြီး ကိုယ်ပိုင်ဖန်တီးထားတဲ့ ဝိညာဉ်စွမ်းရည်တွေကိုပဲ လေ့လာနေတာ"

"ကိုယ်ပိုင်ဖန်တီးထားတဲ့ ဝိညာဉ်စွမ်းရည် ဟုတ်လား... ကိုယ်ပိုင် ဝိညာဉ်စွမ်းရည်ကို လေ့လာဆန်းသစ်နိုင်တဲ့သူကတော့ သာမန်လူတော့ မဟုတ်တာ သေချာတယ်"

"အင်း... သူ အောင်အောင်မြင်မြင် ဖန်တီးနိုင်ခဲ့ပြီလို့ ကျွန်တော် ကြားတယ်၊ 'လေပြေဝံပုလွေဓားချက်' လို့ ခေါ်တယ်၊ အဲ့ဒီကွက်က တကယ့်ကို ပြင်းထန်ပြီး သာမန်လူဆို မခံနိုင်ဘူး၊ တကယ်လို့ ငါတို့ သူ့ကို အနိုင်ယူချင်ရင် အဲ့ဒီကွက်ကို ခြေဖျက်နိုင်မယ့် နည်းလမ်းကို ရှာရလိမ့်မယ်"